“Va̱ása ndakanixi̱níndó táki̱ʼva ndákanixi̱ní na̱ va̱lí”

1. ¿Ndáa ki̱ʼva kúni̱ Jehová ña̱ kooyó?

KÚSI̱ÍNÍ-INI na̱ ti̱ndaʼa̱ tá káku se̱ʼena ta kúni̱nína xínina ña̱ loʼo se̱ʼena. Ni liviníva ña̱ loʼo se̱ʼena, soo kúni̱vana ña̱ kuaʼnuña chi tá ná kǒo kuaʼnuña sana ndi̱ʼi̱níva-inina. Ki̱ʼva saá íyo miíyó, chi kúsi̱íníva-ini Jehová tá kíxáʼa sákuaʼayó xa̱ʼa̱ra. Soo kǒo kúni̱ra ña̱ kooyó na̱ va̱lí ndiʼi tiempo (1 Cor. 3:1). Saáchi kúni̱ra ña̱ ndakanixi̱níyó táki̱ʼva ndákanixi̱ní na̱ yiví na̱ xa̱a̱ chée (1 Cor. 14:20).

2. ¿Ndáa pregunta ndakuiinyó nu̱ú artículo yóʼo?

² Nu̱ú artículo yóʼo ndakuiinyó sava pregunta, tá kúú: ¿Ndáaña kúni̱ kachi ña̱ ndakanixi̱níyó táki̱ʼva ndákanixi̱ní iin na̱ xa̱a̱ chée? ¿Ndáaña xíniñúʼu keʼéyó ña̱ va̱ʼa kuxa-iniyó xíʼin tu̱ʼun Ndióxi̱? Tá káʼviyó ña̱ va̱xi nu̱ú Biblia, ¿ndáa ki̱ʼva chindeétáʼan ña̱yóʼo xíʼinyó ña̱ viíka kutáʼanyó xíʼin Jehová? Saátu ná kǒo ndakanixi̱níyó ña̱ xa̱a̱ viíní kítáʼanyó xíʼin Jehová ta kǒo xíniñúʼu chika̱a̱kayó ndee̱ ña̱ kitáʼanyó xíʼinra.

NDAKANIXI̱NÍ TÁKI̱ʼVA NDÁKANIXI̱NÍ IIN NA̱ XA̱A̱ CHÉE

3. ¿Ndáaña kúni̱ kachi ña̱ kooyó iin na̱ cristiano na̱ xa̱a̱ chée?

³ Tá káʼa̱n Biblia ña̱ kooyó cristiano na̱ xa̱a̱ chée, ña̱yóʼo kúni̱ kachiña ña̱ ndakanixi̱níyó táki̱ʼva ndákanixi̱ní na̱ xa̱a̱ chée. Tu̱ʼun griego ña̱ sa̱ndáya̱ʼana tu̱ʼun “na̱ xa̱a̱ chée” kúni̱ kachiña “na̱ xa̱a̱ xu̱xa-ini” “na̱ va̱ʼaní kéʼé iin ña̱ʼa” (1 Cor. 2:6). Ña̱kán, tá va̱ʼaní xáa̱yó kúnda̱a̱-iniyó xíʼin tu̱ʼun Ndióxi̱, nda̱a̱ táki̱ʼva íyo na̱ xa̱a̱ chée saá íyoyó ni loʼo ku̱i̱ya̱yó. ¿Á ña̱yóʼo kúni̱ kachiña ña̱ tá xa̱a̱ xíni̱ va̱ʼayó xa̱ʼa̱ Jehová kǒo xíniñúʼu sakúaʼakayó xa̱ʼa̱ra? Va̱ásaví, chi ndiʼi tiempo xíniñúʼu chika̱a̱kayó ndee̱ ña̱ sakúaʼayó xa̱ʼa̱ra (1 Tim. 4:15). Soo, ¿ndáa ki̱ʼva ndakuniyó iin na̱ yiví na̱ xa̱a̱ xu̱xa-ini xíʼin tu̱ʼun Ndióxi̱ ni loʼo á ku̱a̱ʼá ku̱i̱ya̱na?

4. ¿Ndáa ki̱ʼva íyo na̱ cristiano na̱ xa̱a̱ xu̱xa-ini?

⁴ ¿Ndáa ki̱ʼva íyo iin na̱ cristiano na̱ xa̱a̱ xu̱xa-ini xíʼin tu̱ʼun Ndióxi̱? Na̱yóʼo xíniso̱ʼona ndiʼi ña̱ káʼa̱n Jehová ta kǒo kéʼéna ña̱ kúni̱ miína. Ni kúúna na̱ yiví ku̱a̱chi ta sava yichi̱ kéʼéna ña̱ va̱ása va̱ʼa, soo chíka̱a̱nína ndee̱ ña̱ vií ndakanixi̱nína ta koona nda̱a̱ táki̱ʼva kúni̱ Jehová. Xa̱a̱ sa̱ndákoona ña̱ va̱ása va̱ʼa xi̱keʼéna tá ya̱chi̱ ta chíka̱a̱na ndee̱ ña̱ ndakanixi̱nína táki̱ʼva ndákanixi̱ní Jehová (Efes. 4:​22-24). Vií íyo ña̱ ndáka̱xinna keʼéna chi xíniso̱ʼona consejo ña̱ káʼa̱n Jehová. Xa̱ʼa̱ ña̱kán, kǒo xíniñúʼuvína iin lista ña̱ káʼnu, nu̱ú ka̱ʼa̱nna xíʼinna ndáaña xíniñúʼu keʼéna á ña̱ kǒo xíniñúʼu keʼéna. Saátu tá ndáka̱xinna keʼéna iin ña̱ʼa chíka̱a̱na ndee̱ ña̱ saxínunaña (1 Cor. 9:​26, 27).

5. ¿Ndáaña kivi kundoʼo na̱ cristiano na̱ kǒo chíkaa̱ ndee̱ ña̱ sakúaʼakana xa̱ʼa̱ Ndióxi̱? (Efesios 4:​14, 15).

⁵ Soo na̱ cristiano na̱ kǒo chíkaa̱ ndee̱ ña̱ sakúaʼakana xa̱ʼa̱ Jehová kándíxana ña̱ káʼa̱n na̱ vatá á na̱ to̱ʼón ta táxina ña̱ sandáʼvinana ta saátu kivi kandíxana ña̱ káʼa̱n na̱ apóstata (kaʼvi Efesios 4:​14, 15).a Sana kixáʼana kuu i̱ni̱-inina á kukúini̱-inina xíʼin inkana á kutóona na̱ána á ña̱ kamaní sa̱a̱na á ña̱ kuni̱na keʼéna ña̱ kini (1 Cor. 3:3).

6. ¿Ndáa ejemplo chindeétáʼan xíʼinyó kunda̱a̱-iniyó ndáa ki̱ʼva xáʼnu iin na̱ yiví xíʼin tu̱ʼun Ndióxi̱? (Koto na̱ʼná).

⁶ Nda̱a̱ táki̱ʼva sa̱kúaʼayó, Biblia chítáʼanña ña̱ sákuaʼayó xa̱ʼa̱ Ndióxi̱ xíʼin ña̱ xáʼnu iin na̱ yiví. Na̱ va̱lí kǒo xíni̱na ku̱a̱ʼání ña̱ʼa, ña̱kán xíniñúʼuna ña̱ kundaanana ta chindeétáʼanna xíʼinna ña̱ va̱ʼa kunda̱a̱-inina xa̱ʼa̱ sava ña̱ʼa. Ná kachiyó ña̱ iin ñaʼá ku̱a̱ʼa̱nñá xíʼin se̱ʼeñá chí calle. Ta káʼa̱nñá xíʼin ñá loʼo se̱ʼeñá ña̱ tiinñá ndaʼa̱ñá ña̱ va̱ʼa ya̱ʼañá. Soo tá xa̱a̱ xa̱ʼnuka ñá loʼo yóʼo, siʼíñá káʼa̱nñá xíʼinñá ña̱ kivi ya̱ʼa miíñá chí calle soo ná kotoñá u̱vi̱ saá xiyo á kǒo carro va̱xi. Ña̱kán tá xa̱a̱ ku̱chéeñá, xa̱a̱ xíni̱vañá ndáaña xíniñúʼu keʼéñá. Ta saátu ndóʼo miíyó na̱ sákuaʼa xa̱ʼa̱ Jehová. Tá kúú, iin na̱ hermano sana kǒo xíni̱na ku̱a̱ʼání ña̱ʼa xa̱ʼa̱ Jehová, ña̱kán xíniñúʼuna iin na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ ña̱ chindeétáʼanna xíʼinna ña̱ ndaka̱xin viína ña̱ keʼéna. Soo na̱ cristiano na̱ xa̱a̱ xu̱xa-ini xíʼin tu̱ʼun Ndióxi̱, kǒo xíniñúʼuna ña̱ ka̱ʼa̱nna xíʼinna ndáaña xíniñúʼu keʼéna saáchi nándukú miína xa̱ʼa̱ sava ña̱ʼa nu̱ú tu̱ʼun Ndióxi̱ ta ña̱yóʼo chíndeétáʼanña xíʼinna ña̱ vií koo ña̱ ndaka̱xinna keʼéna.

7. ¿Á xíniñúʼu na̱ hermano na̱ xu̱xa-ini xíʼin tu̱ʼun Ndióxi̱ ña̱ chindeétáʼanna xíʼinna?

⁷ Nda̱a̱ na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ xíniñúʼuna ña̱ chindeétáʼan inkana xíʼinna. Na̱ cristiano na̱ kúma̱ní kuxa-ini xíʼin tu̱ʼun Ndióxi̱ ndátuna ña̱ ka̱ʼa̱n inkana xíʼinna ndáaña xíniñúʼu keʼéna. Soo na̱ xa̱a̱ xu̱xa-ini xíʼin tu̱ʼun Ndióxi̱ ndúkúvana consejo nu̱ú inkana, soo miína ndáka̱xin ndáaña keʼéna saáchi kúnda̱a̱-inina ña̱ iin tá iinyó ndakuiinyó xa̱ʼa̱ ña̱ kéʼéyó (Gál. 6:5).

8. ¿Nda̱chun va̱ása inkáchi íyo na̱ hermano na̱ xu̱xa-ini xíʼin tu̱ʼun Ndióxi̱?

⁸ Ndiʼi na̱ yiví tá xáʼnuna xa̱a̱ síín síín náʼa̱na. Saátu na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ xa̱a̱ síín síín ña̱ va̱ʼa kúúmiína. Tá kúú savana ndíchinína ta inkatuna ndakúní-inina, savana va̱ʼaní-inina ta inkatuna va̱ʼaní kúnda̱a̱-ini xíʼin ña̱ ndóʼoyó. Ná kachiyó ña̱ u̱vi̱ na̱ cristiano kúni̱na keʼéna iin ña̱ʼa, soo su̱ví inkáchi íyo ña̱ ndáka̱xinna, soo ña̱ va̱ʼa kúú ña̱ nda̱kaxin u̱vi̱ saávana keʼéna. Xa̱ʼa̱ ña̱kán, kǒo káʼa̱n kúáchina á kánitáʼanna xa̱ʼa̱ ña̱ nda̱kaxinna keʼéna, ta chíkaa̱na ndee̱ ña̱ vií kutáʼanna (Rom. 14:10; 1 Cor. 1:10).

¿NDÁAÑA XÍNIÑÚʼU KEʼÉYÓ TASÁA VIÍNÍKA KUTÁʼANYÓ XÍʼIN JEHOVÁ?

9. ¿Nda̱chun xíniñúʼu chikaa̱yó ndee̱ ña̱ sakúaʼakayó xa̱ʼa̱ Jehová?

⁹ Su̱ví ndi̱ku̱n kamaví xáʼnu na̱ va̱lí, saáchi kúee kúeeva xáʼnuna. Soo miíyó tá kǒo chíkaa̱kayó ndee̱ ña̱ sakúaʼayó xa̱ʼa̱ Jehová, kǒo kivi kuxa-iniyó xíʼin tu̱ʼunra. Tá kúú, na̱ xi̱ndoo ñuu Corinto sa̱kúaʼana xa̱ʼa̱ Jehová ta nda̱kuchina, nda̱kiʼinna espíritu santo ta ku̱a̱ʼání ña̱ sa̱náʼa̱ ta̱ apóstol Pablo miína (Hech. 18:​8-11). Soo ni xa̱a̱ ku̱a̱ʼá ku̱i̱ya̱ nda̱kuchi sava na̱ cristiano na̱ xi̱ndoo ñuu Corinto, ni̱xi̱yona nda̱a̱ táki̱ʼva íyo na̱ va̱lí, chi kǒo níchika̱a̱na ndee̱ ña̱ sakúaʼakana xa̱ʼa̱ Jehová (1 Cor. 3:2). ¿Ndáaña kivi keʼéyó ña̱ kǒo kundoʼoyó táki̱ʼva ndo̱ʼo na̱kán?

10. ¿Ndáaña xíniñúʼu keʼéyó ña̱ va̱ʼa kuxa-iniyó xíʼin tu̱ʼun Ndióxi̱? (Judas 20).

¹⁰ Tá kúni̱yó kuxa-iniyó xíʼin tu̱ʼun Ndióxi̱ á ña̱ sakúaʼakayó xa̱ʼa̱ra xíniñúʼu chika̱a̱níyó ndee̱. Soo na̱ hermano na̱ íyo nda̱a̱ táki̱ʼva íyo na̱ va̱lí, tá kǒo xíínna chikaa̱na ndee̱ ña̱ sakúaʼakana xa̱ʼa̱ Jehová kǒo kivi xa̱a̱na keʼéna ña̱ kúni̱ra (Prov. 1:22). Kǒo kúni̱yó keʼéyó táki̱ʼva kéʼé sava na̱ yiví chi ni xa̱a̱ xa̱ʼnuvana, soo kǒo xíínna ndaka̱xinna ndáaña keʼéna chi ndátuna nda̱a̱ ná ka̱ʼa̱n na̱ yivána xíʼinna saáví keʼéna iin ña̱ʼa. Soo, miíyó kúni̱yó chikaa̱yó ndee̱ ña̱ kachíñukayó nu̱ú Jehová ta kǒo xíniñúʼu ka̱ʼa̱nvína xíʼinyó tasaá keʼéyóña (kaʼvi Judas 20). Tá ndákanixi̱níún ña̱ íxama̱níka sakúaʼún xa̱ʼa̱ Ndióxi̱, ka̱ʼa̱n xíʼinra ña̱ ná taxira ndee̱ ndaʼún ta ná chindeétáʼanra xíʼún ña̱ kuni̱ún keʼún ña̱yóʼo (Filip. 2:13).

11. ¿Ndáa ki̱ʼva chíndeétáʼan Jehová xíʼinyó ña̱ va̱ʼa xa̱a̱yó kooyó na̱ cristiano na̱ xu̱xa-ini? (Efesios 4:​11-13).

¹¹ Kúni̱va Jehová chindeétáʼanra xíʼinyó ña̱ va̱ʼa kunda̱a̱ka-iniyó xíʼin tu̱ʼunra. Ti̱xin congregación íyo na̱ anciano na̱ kivi chindeétáʼan xíʼinyó ña̱ kundiku̱nyó yichi̱ ta̱ Cristo (kaʼvi Efesios 4:​11-13). Saátu táxira espíritu santo ndaʼa̱yó ta ña̱yóʼo chíndeétáʼanña xíʼinyó ña̱ ndakanixi̱níyó táki̱ʼva ndákanixi̱ní ta̱ Cristo (1 Cor. 2:​14-16). Ta saátu ta̱xira ña̱ ka̱ʼyi̱ ku̱mí saá ña̱ Evangelio ta ña̱yóʼo chíndeétáʼanña xíʼinyó ña̱ va̱ʼa kunda̱a̱-iniyó ndáa ki̱ʼva ni̱xi̱yo ta̱ Jesús tá ki̱xira nu̱ú ñuʼú yóʼo. Tá ndákanixi̱níyó táki̱ʼva ndákanixi̱ní ta̱ Jesús ta kéʼéyó táki̱ʼva kéʼéra saá kivi xa̱a̱yó kooyó na̱ cristiano na̱ xu̱xa-ini xíʼin tu̱ʼun Ndióxi̱.

XÍNIÑÚʼU KUNDA̱A̱-INIYÓ XA̱ʼA̱ ÑA̱ NDÁYÁʼVINÍ ÑA̱ VA̱XI NU̱Ú BIBLIA

12. ¿Ndáaña kúú sava ña̱ xíniñúʼu kunda̱a̱-iniyó xa̱ʼa̱?

¹² Ña̱ va̱ʼa kuxa-iniyó xíʼin tu̱ʼun Ndióxi̱, xíniñúʼu chikaa̱yó ndee̱ ña̱ sakúaʼakayó ku̱a̱ʼá ña̱ʼa xa̱ʼa̱ ta̱ Cristo. Sava ña̱ ndáyáʼviní ña̱ xíniñúʼu keʼéyó kúú, ña̱ ndandikó-iniyó xa̱ʼa̱ ku̱a̱chiyó, ña̱ kandíxayó Ndióxi̱, ña̱ ndakuchiyó xíʼin ña̱ kandíxayó ña̱ ndataku na̱ ni̱xi̱ʼi̱ (Heb. 6:​1, 2). Ndiʼi na̱ ndásakáʼnu Ndióxi̱ xíniñúʼu kunda̱a̱-inina xa̱ʼa̱ ña̱yóʼo. Xa̱ʼa̱ ña̱kán, ta̱ Pedro ni̱ka̱ʼa̱nra xa̱ʼa̱ ña̱yóʼo tá na̱túʼunra xíʼin ku̱a̱ʼání na̱ yiví xa̱ʼa̱ Ndióxi̱ tá ni̱xi̱yo ña̱ Pentecostés (Hech. 2:​32-35, 38). Ña̱ va̱ʼa xa̱a̱yó kooyó discípulo ta̱ Cristo xíniñúʼu kandíxayó ndiʼi ña̱yóʼo ta kunda̱a̱-iniyó xíʼinña. Ta̱ apóstol Pablo ni̱ka̱ʼa̱nra ña̱ tá kǒo kándíxayó ña̱ ndataku na̱ ni̱xi̱ʼi̱, nda̱a̱ táki̱ʼva íyo ña̱ kǒo kándíxayó ni iin ña̱ káʼa̱n Ndióxi̱ saá íyoña (1 Cor. 15:​12-14). Soo kǒo xíniñúʼu ndakanixi̱níyó ña̱ iinlá ña̱yóʼo xíniñúʼu kunda̱a̱-iniyó xa̱ʼa̱.

13. ¿Ndáaña xíniñúʼu keʼéyó ña̱ va̱ʼa kunda̱a̱-iniyó xíʼin ña̱ʼa ña̱ yo̱ʼvi̱ ña̱ va̱xi nu̱ú tu̱ʼun Ndióxi̱ nda̱a̱ táki̱ʼva káchi Hebreos 5:14? (Koto na̱ʼná).

¹³ Íyova ña̱ va̱ása yo̱ʼvi̱ ña̱ va̱xi nu̱ú tu̱ʼun Ndióxi̱, soo saátu íyo sava ña̱ yo̱ʼvi̱ní. Ta xíniñúʼu kunda̱a̱-iniyó xa̱ʼa̱ ña̱yóʼo chi sava ña̱yóʼo kúú ley Jehová, ta íyotu ña̱ naní principio ta ña̱yóʼo kúú ña̱ chíndeétáʼan xíʼinyó ña̱ kunda̱a̱-iniyó ndáa ki̱ʼva ndákanixi̱ní Jehová. Ña̱ va̱ʼa kunda̱a̱-iniyó xíʼinña, xíniñúʼu kaʼviyó Biblia, ndakanixi̱níyó xa̱ʼa̱ ña̱ káʼviyó tasaá keʼéyó ña̱ sákuaʼayó. Ña̱yóʼo chindeétáʼanña xíʼinyó ña̱ keʼéyó ña̱ kútóo Jehová (kaʼvi Hebreos 5:14).b

14. ¿Ndáa ki̱ʼva chi̱ndeétáʼan ta̱ apóstol Pablo xíʼin na̱ cristiano na̱ ñuu Corinto?

¹⁴ Na̱ cristiano na̱ kǒo kúnda̱a̱ va̱ʼa ini xíʼin tu̱ʼun Ndióxi̱, íxayo̱ʼvi̱ña xíʼinna ña̱ ndaka̱xinna ña̱ keʼéna tá va̱ása káʼa̱n káxi Biblia xa̱ʼa̱ iin ña̱ʼa ña̱ kúni̱na kunda̱a̱-inina xa̱ʼa̱. Ña̱kán savana ndákanixi̱nína ña̱ kivi keʼéna ña̱ kúni̱ miína. Inkana kúni̱na ña̱ ná ka̱ʼa̱n inkana xíʼinna ndáaña xíniñúʼu keʼéna. Tá kúú, sava na̱ cristiano na̱ ñuu Corinto ni̱ka̱ʼa̱nna xíʼin ta̱ apóstol Pablo ña̱ ka̱ʼa̱nra á kivi kuxuna ña̱ʼa ña̱ xi̱taxina ndaʼa̱ na̱ ndióxi̱ vatá, soo ta̱ Pablo ni̱ka̱ʼa̱nra xíʼinna ña̱ xíniñúʼu ndaka̱xin miína ndáaña va̱ʼa kúú ña̱ túvi miívana. Ña̱kán, ni̱ka̱ʼa̱nra xíʼinna xa̱ʼa̱ sava ña̱ va̱xi nu̱ú Biblia ña̱ kivi chindeétáʼan xíʼinna ña̱ vií koo ña̱ ndaka̱xinna keʼéna, tasaá kǒo sandákavana-ini na̱ hermano (1 Cor. 8:​4, 7-9). Ta̱ Pablo sa̱náʼa̱ra na̱ Corinto ña̱ kuniñúʼuna ña̱ va̱xi nu̱ú tu̱ʼun Ndióxi̱ ña̱ va̱ʼa ndaka̱xinna ña̱ keʼéna, nu̱úka ña̱ kundatuna ña̱ ka̱ʼa̱n inkana xíʼinna ndáaña keʼéna.

15. ¿Ndáa ki̱ʼva chi̱ndeétáʼan ta̱ apóstol Pablo xíʼin na̱ cristiano hebreo ña̱ va̱ʼa kunda̱a̱ka-inina xíʼin tu̱ʼun Ndióxi̱?

¹⁵ Saátu ku̱a̱ʼání ña̱ kivi sakúaʼayó xíʼin carta ña̱ chi̱ndaʼá ta̱ apóstol Pablo ku̱a̱ʼa̱n nu̱ú na̱ cristiano hebreo. Savana kǒo níxi̱chikaa̱kana ndee̱ ña̱ sakúaʼakana xa̱ʼa̱ Ndióxi̱, ña̱kán ni̱ka̱ʼa̱nra xíʼinna: “Tuku xíniñúʼu koʼondó leche nu̱úka ña̱ kuxundó ña̱ʼa ña̱ téʼé” (Heb. 5:12). Kǒo níxi̱chikaa̱kana ndee̱ ña̱ sakúaʼana ña̱ʼa xa̱á ña̱ xi̱sanáʼa̱ Jehová miína ti̱xin congregación (Prov. 4:18). Tá ni̱xi̱ʼi̱ ta̱ Jesús saá ndi̱ʼi̱-xa̱ʼa̱ ley ta̱ Moisés, soo ni xa̱a̱ ni̱ya̱ʼa 30 ku̱i̱ya̱ na̱ cristiano judío xi̱kuni̱kavana keʼéna ña̱ xi̱kaʼa̱n ley ta̱ Moisés (Rom. 10:4; Tito 1:10). Ña̱kán, ta̱ apóstol Pablo chi̱ndaʼára carta yóʼo ku̱a̱ʼa̱n nu̱úna ña̱ va̱ʼa kunda̱a̱-inina xíʼin ña̱ káʼa̱n tu̱ʼun Ndióxi̱. Ña̱ ni̱ka̱ʼa̱nra xíʼinna kúú ña̱ xi̱niñúʼu kunda̱a̱-inina mií tiempo saá ta ña̱yóʼo va̱ʼaní chi̱ndeétáʼanña xíʼinna ña̱ kunda̱a̱-inina ndáa ki̱ʼva kúni̱ Jehová ña̱ ndasakáʼnunara. Saátu chi̱ndeétáʼanña xíʼinna ña̱ ndakú koo inina ta kǒo sandákoona ña̱ natúʼunna xa̱ʼa̱ Ndióxi̱ ni xi̱sasi na̱ judío nu̱úna (Heb. 10:​19-23).

¿NDA̱CHUN KǑO XÍNIÑÚʼU NDAKANIXI̱NÍYÓ ÑA̱ XA̱A̱ XÍNI̱NÍYÓ XA̱ʼA̱ NDIÓXI̱?

16. ¿Ndáaka ña̱ xíniñúʼu keʼéyó ni xa̱a̱ xíni̱vayó xa̱ʼa̱ Jehová?

¹⁶ Tá xa̱a̱ xíni̱yó ku̱a̱ʼá ña̱ʼa xa̱ʼa̱ Jehová ná chika̱a̱yó ndee̱ ña̱ sakúaʼakayó ku̱a̱ʼá ña̱ʼa xa̱ʼa̱ra. Ña̱kán, ná kǒo ndakanixi̱níyó ña̱ xa̱a̱ xíni̱níyó (1 Cor. 10:12). Ná kíʼinyó kuenta xíʼin ña̱ kéʼéyó tasaá kunda̱a̱-iniyó á chíka̱a̱yó ndee̱ ña̱ sakúaʼakayó xa̱ʼa̱ Jehová (2 Cor. 13:5).

17. ¿Ndáaña sákuaʼayó xíʼin carta ña̱ ka̱ʼyí ta̱ apóstol Pablo ku̱a̱ʼa̱n nu̱ú na̱ cristiano Colosenses?

¹⁷ Carta ña̱ kaʼyí ta̱ apóstol Pablo ku̱a̱ʼa̱n nu̱ú na̱ Colosenses ni̱ka̱ʼa̱nra xíʼinna ña̱ xíniñúʼu chika̱a̱na ndee̱ ña̱ kuxa-inina xíʼin tu̱ʼun Ndióxi̱. Ta saátu ña̱ kǒo sandákoona ña̱ sakúaʼana xa̱ʼa̱ra. Ta ni xa̱a̱ xi̱xini̱níva na̱ cristiano kán xa̱ʼa̱ Jehová, soo ni̱ka̱ʼa̱nra xíʼinna ña̱ kiʼinnína kuenta ña̱ kǒo taxina sandáʼvi na̱ yiví miína (Col. 2:​6-10). Ta̱ Epafras xi̱kaʼa̱nníra xíʼin Ndióxi̱ xa̱ʼa̱ na̱yóʼo ña̱ va̱ʼa ndakú koo inina nda̱a̱ táki̱ʼva íyo na̱ yiví na̱ xu̱xa-ini (Col. 4:12; nota). ¿Ndáaña sákuaʼayó xíʼin ña̱yóʼo? Ña̱ xíniñúʼu chikaa̱yó ndee̱ ña̱ kuxa-iniyó xíʼin tu̱ʼun Ndióxi̱ ta kǒo sandákooyó ña̱ keʼéyó ña̱yóʼo ta miíra chindeétáʼan xíʼinyó. Ta̱ apóstol Pablo xíʼin ta̱ Epafras xi̱kuni̱na ña̱ ndakúní koo ini na̱ cristiano Colosenses ni xi̱yaʼana nu̱ú ku̱a̱ʼá tu̱ndóʼo.

18. ¿Ndáaña kivi kundoʼo na̱ va̱ʼaní ndásakáʼnu Jehová? (Koto na̱ʼná).

¹⁸ Ta̱ apóstol Pablo ni̱ka̱ʼa̱nra xíʼin na̱ cristiano hebreo ña̱ ni va̱ʼaní ndásakáʼnuna Jehová soo kivi xa̱a̱na kuxíkána nu̱úra tasaá kǒo ixakáʼnuka-inira xa̱ʼa̱na. Soo na̱ hebreo xi̱chika̱a̱nívana ndee̱ ña̱ keʼéna ña̱ káʼa̱n Jehová (Heb. 6:​4-9). Ta tiempo vitin, ¿ndáaña kúu xíʼin na̱ ndúu inactivo á na̱ expulsado tá ndándikó-inina xa̱ʼa̱ ña̱ ke̱ʼéna? Xa̱ʼa̱ ña̱ vitá íyo inina ta ndándikó-inina xa̱ʼa̱ ña̱ va̱ása va̱ʼa ke̱ʼéna, saá náʼa̱na ña̱ va̱ása íyona nda̱a̱ táki̱ʼva íyo na̱ yiví na̱ ni̱ka̱ʼa̱n ta̱ apóstol Pablo xa̱ʼa̱. Soo tá xa̱a̱ ndíkóna nu̱ú Jehová xíniñúʼuna ña̱ chindeétáʼanra xíʼinna (Ezeq. 34:​15, 16). Ña̱kán, na̱ anciano kivi káʼa̱nna xíʼin iin na̱ hermano na̱ xa̱a̱ ku̱a̱ʼání ku̱i̱ya̱ ndásakáʼnu Jehová ña̱ chindeétáʼanna xíʼinna ña̱ kutáʼan vií tukuna xíʼin Jehová.

19. ¿Ndáaña xíniñúʼu chika̱a̱yó ndee̱ keʼéyó?

¹⁹ Tá chíka̱ún ndee̱ ña̱ sakúaʼún xa̱ʼa̱ Jehová, kǒo sandákoún ña̱ keʼún ña̱yóʼo. Chika̱a̱ ndee̱ ña̱ nandukún xa̱ʼa̱ ña̱ kǒo kúnda̱a̱-iniún xíʼin tasaá kivi ndakanixi̱níún táki̱ʼva ndákanixi̱ní Jehová. Tá xa̱a̱ va̱ʼaní kítáʼún xíʼin Jehová chika̱a̱ ndee̱ ña̱ kǒo sandákoún ña̱ sakúaʼún xa̱ʼa̱ra.