Ná chindeétáʼanyó xíʼin na̱ kúni̱ sakúaʼa xa̱ʼa̱ Ndióxi̱

1. ¿Ndáaña kéʼé sava na̱ yiví tá nátúʼunyó xíʼinna? (Hechos 13:​47, 48; 16:​14, 15).

TÁ SIGLO nu̱ú, ku̱a̱ʼání na̱ yiví ni̱xa̱a̱ ku̱ndaa̱-ini xa̱ʼa̱ ña̱ nda̱a̱ tá na̱túʼunna xíʼinna xa̱ʼa̱ Ndióxi̱ (kaʼvi Hechos 13:​47, 48; 16:​14, 15). Saátu tiempo vitin ku̱a̱ʼání na̱ yiví kúsi̱í-inina tá sákuaʼana xa̱ʼa̱ Ndióxi̱ nani nátúʼunna xíʼinna. Tá kúú sava na̱ kǒo níxi̱kandíxa ña̱ xi̱natúʼunyó xíʼinna, tá yáʼa tiempo kíxáʼana kúni̱na sakúaʼana xa̱ʼa̱ tu̱ʼun Ndióxi̱. Tá ku̱a̱ʼa̱nyó predicación, ¿ndáaña xíniñúʼu keʼéyó tá nda̱ni̱ʼíyó iin na̱ kúni̱ sakúaʼa xa̱ʼa̱ Ndióxi̱?

2. ¿Ndáa ki̱ʼva kítáʼan ña̱ nátúʼunyó xíʼin na̱ yiví xa̱ʼa̱ Ndióxi̱ xíʼin na̱ kíʼin kuenta xíʼin ña̱ chi̱ʼina?

² Ña̱ nátúʼunyó xíʼin na̱ yiví íyoña nda̱a̱ táki̱ʼva kéʼé na̱ ndáa ña̱ chi̱ʼina. Iin ta̱ chíʼi tá xítora ña̱ iin planta xa̱a̱ kúúmiínú ku̱i̱’i, ndi̱ku̱n xa̱a̱ ku̱a̱ʼa̱nra ndákayara tíyó’o. Ta ki̱ʼva saá íyo ña̱ nátúʼunyó xa̱ʼa̱ Ndióxi̱, nani chíkaa̱yó ndee̱ ña̱ chindeétáʼanyó xíʼin iinna ña̱ kunda̱a̱ka-inina xa̱ʼa̱ ña̱ sánáʼa̱ Biblia sana ndáni̱ʼíyó inka na̱ ndixa kúni̱ kunda̱a̱-ini xa̱ʼa̱ ña̱ nda̱a̱ ta ndúkúyó ki̱ʼva ña̱ chindeétáʼanyó xíʼin na̱yóʼo (Juan 4:​35, 36). Tá kíʼin va̱ʼayó kuenta xíʼin na̱ káʼviyó xíʼin, saá kúú ña̱ kunda̱a̱-iniyó ndáana kúú na̱ kúni̱ sakúaʼa ta kotoyó ndáa ki̱ʼva chindeétáʼanyó xíʼin iin tá iin na̱yóʼo. Nu̱ú artículo yóʼo kotoyó ndáaña keʼéyó xíʼin na̱ yiví tá yichi̱ nu̱ú ni̱xa̱ʼa̱nyó nu̱úna ta kúni̱kana kunda̱a̱-inina xa̱ʼa̱ ña̱ nda̱a̱ ta saátu ka̱ʼa̱nyó xa̱ʼa̱ ndáaña kivi keʼéyó ña̱ va̱ʼa chindeétáʼanyó xíʼinna ña̱ kuaʼnukana xíʼin tu̱ʼun Ndióxi̱.

TÁ KÚNI̱NA SAKÚAʼANA

3. Tá xíkayó predicación ta nda̱ni̱ʼíyó iin na̱ kúni̱ sakúaʼa, ¿ndáaña kivi keʼéyó? (1 Corintios 9:26).

³ Tá ku̱a̱ʼa̱nyó predicación ta nda̱ni̱ʼíyó iin na̱ kúni̱ sakúaʼa xa̱ʼa̱ Ndióxi̱, ndi̱ku̱n ndukúyó ki̱ʼva ña̱ chindeétáʼanyó xíʼinna ña̱ va̱ʼa kutáʼanna xíʼinra. Ná ka̱ʼa̱nyó xíʼinna ña̱ kixáʼayó kaʼviyó xíʼinna xa̱ʼa̱ Biblia ta ná ka̱ʼa̱nyó xíʼinna ña̱ ku̱ʼu̱nna reunión xíʼinyó (kaʼvi 1 Corintios 9:26).

4. ¿Ndáa ejemplo náʼa̱ nu̱úyó ña̱ íyova na̱ yiví na̱ ndi̱ku̱n kúni̱ ña̱ ná kaʼviyó xíʼinna?

⁴ Ka̱ʼa̱n xíʼinna ña̱ kaʼviún xíʼinna. Sava yichi̱ tá nátúʼunyó xíʼin na̱ yiví ndi̱ku̱n kúni̱na kaʼvina. Ña̱yóʼo kúú ña̱ ku̱u chí Canadá. Iin ki̱vi̱ jueves xi̱kuuña, iin ñá loʼo ku̱yatinñá nu̱ú níndichi tú exhibidor ta ki̱ʼinñá iin folleto ña̱ naní Kivi koo si̱íún vitin ta saátu chí nu̱únínu. Iin ñá hermana ñá xi̱ndichi kán ni̱ka̱ʼa̱nñá xíʼinñá ña̱ kivi kixáʼa iinna kaʼvina xíʼinñá xíʼin folleto yóʼo ta kǒo xu̱ʼún kiʼinna ndaʼa̱ñá. Ñá loʼo kán xi̱kuni̱ñá kunda̱a̱ka-iniñá xa̱ʼa̱ ña̱yóʼo ta saá ta̱xiñá número ndaʼa̱ ñá hermana. Ta mií ki̱vi̱ kán chi̱ndaʼáñá mensaje nu̱ú ñá hermana ña̱ va̱ʼa kunda̱a̱-iniñá ndáa ki̱ʼva kaʼvina xíʼinñá. Ñá hermana ni̱ka̱ʼa̱nñá xíʼinñá ña̱ kivi kaʼviñá xíʼinñá ki̱vi̱ sábado á domingo soo ñá loʼo kán ni̱ka̱ʼa̱nñá: “¿Á kivi kaʼviyó ta̱an chi íyova tiempo nu̱úi̱?”. Ta inka ki̱vi̱ ki̱xáʼaná káʼviná ta mií semana saá ña̱ yichi̱ nu̱ú kúú ña̱ ni̱xa̱ʼa̱nñá reunión ta kamaní ki̱xáʼañá kúnda̱a̱-iniñá xíʼin tu̱ʼun Ndióxi̱.

5. ¿Ndáaña xíniñúʼu kiʼinyó kuenta xíʼin tá káʼa̱nyó xíʼin na̱ yiví ña̱ kaʼviyó xíʼinna? (Koto na̱ʼná).

⁵ Su̱ví ndiʼiví na̱ yiví kúni̱ kaʼvi nda̱a̱ táki̱ʼva ke̱ʼé ñá loʼo yóʼo. Sava yichi̱ kivi ka̱ʼa̱nyó xíʼin na̱ yiví xa̱ʼa̱ ña̱ kúni̱na kunda̱a̱-inina xa̱ʼa̱ tasaá kuni̱kana sakúaʼakana xa̱ʼa̱ ña̱yóʼo. Tá vií kéʼéyó ta náʼa̱yó ña̱ ndíʼi̱-iniyó xa̱ʼa̱na, ña̱yóʼo chindeétáʼan xíʼinyó ña̱ ndi̱ku̱n kixáʼayó kaʼviyó xíʼinna. ¿Ndáaña kivi ka̱ʼa̱nyó xíʼinna ña̱ va̱ʼa kixáʼayó kaʼviyó xíʼinna? Ña̱yóʼo kúú ña̱ ni̱nda̱ka̱tu̱ʼunna sava na̱ hermano na̱ va̱ʼaní kíxáʼa káʼvi xíʼin na̱ yiví xa̱ʼa̱ Biblia. Ná kotoyó ndáaña ni̱ka̱ʼa̱nna.

6. ¿Ndáaña kivi keʼéyó ña̱ va̱ʼa kuni̱ na̱ yiví ndikóyó nu̱úna ña̱ sanáʼa̱yóna xa̱ʼa̱ Biblia?

⁶ Sava na̱ publicador xíʼin na̱ precursor ni̱ka̱ʼa̱nna ña̱ sava ñuu va̱ása xíniñúʼuví kuniñúʼuyó tu̱ʼun kaʼviyó. Ña̱ chíndeétáʼanka xíʼinna kúú xíniñúʼuna tu̱ʼun natúʼunyó ña̱ va̱ʼaka kunda̱a̱ka-iniyó xa̱ʼa̱ ña̱ káʼa̱n Biblia. Ta ña̱ va̱ʼa ka̱ʼa̱nyó xíʼinna ña̱ kúni̱yó ndikóyó nu̱úna, na̱yóʼo káʼa̱nna ña̱ va̱ʼaka ná ka̱ʼa̱nyó “Ndákanda̱ní-iniyó saáchi Biblia káʼa̱nña xa̱ʼa̱ pregunta ña̱ xa̱a̱ ku̱a̱ʼání tiempo kúni̱yó kunda̱a̱-iniyó xa̱ʼa̱” á “Biblia va̱ása káʼa̱n kuitíña xa̱ʼa̱ religión chi saátu káʼa̱nña xa̱ʼa̱ consejo ña̱ kivi chindeétáʼan xíʼinyó”. Ta saátu kivi ka̱ʼa̱nyó ña̱yóʼo xíʼinna: “Ti̱xin 10 á 15 minuto ku̱a̱ʼání ña̱ʼa kivi sakúaʼún ña̱ kivi chindeétáʼan xíʼún”. Va̱ása xíniñúʼuví ka̱ʼa̱nyó xíʼinna ña̱ kúni̱yó ku̱ʼu̱nyó kotoyóna ndiʼi semana ña̱ va̱ʼa kǒo kundi̱ʼi̱-inina.

7. ¿Ndáa ki̱ʼva xáa̱ sava na̱ yiví kúnda̱a̱-inina ña̱ nda̱ni̱ʼína ña̱ nda̱a̱? (1 Corintios 14:​23-25).

⁷ Ka̱ʼa̱n xíʼinna ña̱ ná ku̱ʼu̱nna reunión. Tiempo tá ni̱xi̱yo ta̱ Pablo sava na̱ yiví ni̱xa̱a̱na ku̱ndaa̱-inina xa̱ʼa̱ ña̱ nda̱a̱ tá ni̱xa̱ʼa̱nna ña̱ nu̱ú yichi̱ reunión (kaʼvi 1 Corintios 14:​23-25). Ki̱ʼva saátu kúú tiempo vitin. Ku̱a̱ʼání na̱ yiví tá kíxáʼana xáʼa̱nna reunión kamaka kíxáʼana sákuaʼana xa̱ʼa̱ Ndióxi̱. ¿Ama kivi ka̱ʼa̱nyó xíʼinna ña̱ ku̱ʼu̱nna reunión? Nu̱ú libro ña̱ naní Kivi koo si̱íún vitin ta saátu chí nu̱únínu, lección 10 káʼa̱nña xíʼinna ña̱ ku̱ʼu̱nna reunión soo kǒo xíniñúʼuví kundatuyó ña̱ xa̱a̱na nda̱a̱ lección yóʼo ña̱ va̱ʼa ka̱ʼa̱nyó xíʼinna ña̱ ku̱ʼu̱nna reunión. Kiviva ka̱ʼa̱nyó xíʼinna ña̱ ku̱ʼu̱nna reunión xíʼinyó ña̱ xíyo ki̱vi̱ sábado á domingo tá nátúʼunyó yichi̱ nu̱ú xíʼinna, ta kivi ka̱ʼa̱nyó xíʼinna xa̱ʼa̱ título ña̱ discurso á ña̱ sakúaʼayó nu̱ú Tutu Ña̱ Nátúʼun xíʼinyó ña̱ kaʼviyó semana kán.

8. Tá káʼa̱nyó xíʼin na̱ yiví ña̱ ku̱ʼu̱nna xíʼinyó reunión, ¿ndáaña kivi ndakaniyó nu̱úna? (Isaías 54:13).

⁸ Tá káʼa̱nyó xíʼin na̱ yiví ña̱ ku̱ʼu̱nna reunión ná ka̱ʼa̱nyó xíʼinna ña̱ síínva íyo ña̱yóʼo nu̱ú sava veʼe-ñu̱ʼu ña̱ xa̱a̱ xáʼa̱nna. Tá ni̱xa̱ʼa̱n iin ñá ñaʼá yichi̱ nu̱ú iin reunión ñáyóʼo ni̱nda̱ka̱tu̱ʼunñá ñá sánáʼa̱ miíñá: “Ta̱ kéʼé pregunta, ¿á xíni̱ra ki̱vi̱ ndiʼina?”. Ñá hermana yóʼo ni̱ka̱ʼa̱nñá xíʼinñá ña̱ na̱ congregación íyona nda̱a̱ táki̱ʼva íyo iin familia ta chíkaa̱na ndee̱ ña̱ kuxini̱na ki̱vi̱ ndiʼina. Ñá ñaʼá yóʼo ni̱ka̱ʼa̱nñá xíʼinñá ña̱ veʼe-ñu̱ʼu nu̱ú xi̱xa̱ʼa̱nñá ni va̱ása xíni̱na ki̱vi̱ na̱ xi̱xa̱ʼa̱n kán. Na̱ yiví va̱ása kúnda̱a̱-inina nda̱chun kúúmiíyó reunión, ña̱kán xíniñúʼu ndakaniyó nu̱úna xa̱ʼa̱ ña̱yóʼo (kaʼvi Isaías 54:13).a Ndákutáʼanyó ña̱ va̱ʼa ndasakáʼnuyó Jehová, sakúaʼayó xa̱ʼa̱ra ta saátu ña̱ chika̱a̱yó ndee̱ xíʼin táʼanyó (Heb. 2:12; 10:​24, 25). Reunión ña̱ xíkuumiíyó viíní íyoña ña̱ va̱ʼa chindeétáʼanña xíʼinyó ña̱ va̱ʼa sakúaʼakayó xa̱ʼa̱ Ndióxi̱ ta kǒo kéʼéyó nda̱a̱ táki̱ʼva kéʼé inka veʼe-ñu̱ʼu (1 Cor. 14:40). Xa̱ʼa̱ ña̱ viíní ku̱vaʼa salón nu̱ú ndákutáʼanyó kivi sakúaʼayó ku̱a̱ʼání ña̱ʼa. Kǒo kíʼviyó xíʼin ña̱ política ni kǒo káʼa̱nyó xa̱ʼa̱ ña̱yóʼo ta ni kǒo chíndeétáʼanyó xíʼinna. Saátu ti̱xin reunión kǒo kánitáʼanyó ni kǒo ndáʼyi̱ nu̱ú táʼanyó. Ta ña̱ va̱ʼa kunda̱a̱ka-ini na̱ yiví ndáa ki̱ʼva xíyo reunión, kivi na̱ʼa̱yó nu̱úna video ña̱ naní ¿Ndáaña kéʼé na̱ testigo Jehová nu̱ú ndátakana?

9, 10. Tá káʼa̱nyó xíʼin iin na̱ yiví ña̱ ku̱ʼu̱nna reunión, ¿ndáaña kivi keʼéyó ña̱ va̱ʼa chindeétáʼanyó xíʼinna? (Koto na̱ʼná).

⁹ Sava na̱ yiví va̱ása xíínna ku̱ʼu̱nna reunión saáchi yíʼvina ña̱ ka̱ʼa̱nna xíʼinna ña̱ koona testigo Jehová. Kivi ka̱ʼa̱nyó xíʼinna ña̱ na̱ va̱ása kúú Testigo kiviva ku̱ʼu̱nna reunión ta kuniso̱ʼona ta kǒo na̱ ka̱ʼa̱n xíʼinna ña̱ nasamana religiónna á keʼéna inkaka ña̱ʼa. Va̱ása kéʼéna inka reunión xa̱ʼa̱ na̱ va̱lí, ña̱kán kivi ku̱ʼu̱nna xíʼin na̱ familiana ta ndiʼina kivi sakúaʼa ta va̱ása kundi̱ʼi̱-inina xa̱ʼa̱ se̱ʼena chi inkáchiva kundoo ndiʼina ta inkáchi ña̱ sakúaʼana xa̱ʼa̱ (Deut. 31:12). Va̱ása kíʼinyó xu̱ʼún ndaʼa̱ na̱ yiví saáchi kéʼéyó nda̱a̱ táki̱ʼva ni̱ka̱ʼa̱n ta̱ Jesús: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mat. 10:8). Kivi ka̱ʼa̱nyó xíʼinna ña̱ kǒo xíniñúʼuví kundixina ti̱ko̱to̱ ña̱ yaʼvi ku̱ʼu̱nna saáchi Ndióxi̱ va̱ása xítora ña̱yóʼo chi ña̱ kíʼinkara kuenta xíʼin kúú ña̱ ndíkaa̱ níma̱na (1 Sam. 16:7).

¹⁰ Tá na̱ yiví na̱ ka̱nayó ni̱xa̱a̱na reunión, ná chindeétáʼanyó xíʼinna ña̱ va̱ʼa kunina. Kivi ka̱ʼa̱nyó xíʼin na̱ anciano ta saátu inka na̱ hermano ña̱ ná chindeéna na̱yóʼo. Tá vií kéʼéyó xíʼinna sana na̱yóʼo kuni̱ tukuna ndikóna. Tá kǒo Biblia kúúmiína, kivi na̱ʼa̱yó texto ña̱ va̱xi nu̱ú Biblia ña̱ kúúmiíyó nu̱úna ta saátu ndáa ki̱ʼva kundiku̱nna ña̱ káʼa̱nna ti̱xin reunión.

TÁ KI̱XÁʼAYÓ KÁʼVIYÓ XÍʼINNA

11. ¿Ndáa ki̱ʼva na̱ʼa̱yó ña̱ íxato̱ʼóyó tiempo na̱ yiví?

¹¹ Tá ki̱xáʼayó káʼviyó xíʼin iin na̱ yiví, ¿ndáaña xíniñúʼu kiʼinyó kuenta xíʼin? Xíniñúʼu ixato̱ʼóyó tiempo na̱ yiví. Tá ki̱ndooyó iin hora xíʼinna, xíniñúʼu mií hora saá xa̱a̱yó nu̱úna, ni sava na̱ yiví va̱ása ndáyáʼviví ña̱yóʼo nu̱úna. Tá sa̱kán ki̱xáʼayó káʼviyó xíʼinna, loʼova tiempo ná kaʼviyó xíʼinna. Sava na̱ hermano na̱ viíní sánáʼa̱ káʼa̱nna ña̱ va̱ása xíniñúʼu ku̱a̱ʼáví tiempo kaʼviyó xíʼinna ni kúni̱kana sakúaʼana. Ná va̱ása ku̱a̱ʼání ka̱ʼa̱nyó ta ná taxiyó ka̱ʼa̱nka miína (Prov. 10:19).

12. Tá kíxáʼayó káʼviyó xíʼin na̱ yiví, ¿ndáaña kúni̱yó ña̱ ná xa̱a̱na keʼéna?

¹² Tá kíxáʼayó káʼviyó xíʼin na̱ yiví ña̱ kúni̱yó kúú ña̱ kuxini̱na Jehová ta ku̱ʼvi̱-inina kuninara xíʼin se̱ʼera ta̱ Jesús. Ña̱ va̱ʼa sanáʼa̱yó na̱ yiví xíniñúʼu kuniñúʼuyó ña̱ va̱xi nu̱ú Biblia ta su̱ví ña̱ ndákanixi̱ní miíyó (Hech. 10:​25, 26). Ta̱ apóstol Pablo sa̱náʼa̱ra na̱ yiví xa̱ʼa̱ ta̱ Jesucristo ta̱ chi̱ndaʼá mií Ndióxi̱ ña̱ va̱ʼa xa̱a̱yó kuxini̱yó Jehová ta ku̱ʼvi̱-iniyó kuniyóra (1 Cor. 2:​1, 2). Saátu ni̱ka̱ʼa̱n ta̱ Pablo ña̱ ndáyáʼviní chindeétáʼanna xíʼin na̱ sa̱kán kíxáʼa sákuaʼa ña̱ kuumiína ña̱ va̱ʼa ña̱ ndáyáʼviní nda̱a̱ táki̱ʼva ndáyáʼvi ña̱ oro, plata xíʼin yu̱u̱ ña̱ liviní (1 Cor. 3:​11-15). Sava ña̱yóʼo kúú ña̱ kandíxayó Ndióxi̱, ña̱ ndíchi kooyó, ña̱ vií ndakanixi̱níyó xíʼin ña̱ ixato̱ʼóyó Jehová (Sal. 19:​9, 10; Prov. 3:​13-15; 1 Ped. 1:7). Ná kundiku̱nyó yichi̱ ta̱ Pablo ta chindeétáʼanyó xíʼin na̱ káʼviyó xíʼin ña̱ va̱ʼa ndakú koo ña̱ kándíxana Ndióxi̱ ta vií kutáʼanna xíʼin yiváyó Jehová (2 Cor. 1:24).

13. ¿Ndáa ki̱ʼva na̱ʼa̱yó ña̱ kúee íyo iniyó xíʼin na̱ sánáʼa̱yó ta kúnda̱a̱-iniyó xíʼin ña̱ ndóʼona? (2 Corintios 10:​4, 5; koto na̱ʼná).

¹³ Ná keʼéyó nda̱a̱ táki̱ʼva sa̱náʼa̱ ta̱ Jesús, kúee koo iniyó ta saátu ná kunda̱a̱-iniyó xíʼin ña̱ ndóʼo na̱ yiví. Ná kǒo nda̱ka̱tu̱ʼunyó na̱ yiví ña̱ kivi sákukaʼan nu̱úna. Tá ki̱ʼinyó kuenta ña̱ va̱ása níkunda̱a̱-inina xíʼin iin ña̱ʼa, tá xa̱a̱ sa̱ndíʼiyó ka̱ʼviyó saá kivi ndikóyó ka̱ʼa̱nyó xa̱ʼa̱ ña̱yóʼo xíʼinna. Tá íxayo̱ʼvi̱ña xíʼinna kandíxana sava ña̱ káʼa̱n Biblia, ná kǒo ixandúxayó xíʼinna ña̱ nasamana ña̱ kéʼéna va̱ʼaka ná taxiyó tiempo ndaʼa̱na ña̱ xa̱a̱ ña̱ sákuaʼana nda̱a̱ níma̱na (Juan 16:12; Col. 2:​6, 7). Biblia káʼa̱nña ña̱ vatá ña̱ sánáʼa̱ na̱ yiví íyoña nda̱a̱ táki̱ʼva íyo nama̱ ña̱ kútu̱ní ku̱vaʼa ta xíniñúʼu ndiʼi-xa̱ʼa̱ña (kaʼvi 2 Corintios 10:​4, 5). Ña̱ va̱ʼa sandákoo na̱ yiví ña̱ vatá ña̱ kándíxana, siʼna xíniñúʼu chindeétáʼanyó xíʼinna ña̱ kundaa-inina Jehová (Sal. 91:9).

TÁ XÁʼA̱NNA REUNIÓN

14. ¿Ndáaña xíniñúʼu keʼéyó xíʼin na̱ xáʼa̱n reunión?

¹⁴ Jehová kúni̱ra ña̱ vií ná keʼéyó xíʼin ndiʼi na̱ yiví na̱ xáʼa̱n reunión ña̱ kúúmiíyó ni nda̱a̱ ndáaka culturana, kúúna na̱ ndáʼvi á na̱ ku̱i̱ká á nda̱a̱ ndáaka ñuu ki̱xina (Sant. 2:​1-4, 9). Ná kotoyó ndáa ki̱ʼva keʼéyó ña̱yóʼo.

15, 16. ¿Ndáakaña kivi keʼéyó ña̱ va̱ʼa kusi̱í-ini na̱ yiví na̱ xáʼa̱n reunión?

¹⁵ Íyo sava na̱ yiví na̱ xáʼa̱n reunión xa̱ʼa̱ ña̱ kúni̱ kuitína kunda̱a̱-inina ndáaña xíyo kán á xáʼa̱nna chi iin na̱ íyo yatin xíʼinna ni̱ka̱ʼa̱nna xíʼinna ña̱ ku̱ʼu̱nna. Ña̱kán tá xi̱niyó iin na̱ xa̱á ña̱ ni̱xa̱a̱na reunión viíní ná ndakiʼinyóna ta kǒo sándi̱ʼiyó-inina. Kivi ka̱ʼa̱nyó xíʼinna ña̱ inkáchi ná koona xíʼinyó ti̱xin reunión ta kivi taxiyó Biblia ndaʼa̱na á inkaka tutu ña̱ xíniñúʼuyó ti̱xin reunión. Ná ndukúyó ki̱ʼva ña̱ chindeétáʼanyó xíʼinna ta saá va̱ása ndi̱ʼi-inina. Tá kúú, iin ta̱a ta̱ ni̱xa̱ʼa̱n reunión va̱ása va̱ʼa níkunira saáchi túvira ña̱ ti̱ko̱to̱ra va̱ása va̱ʼa náʼa̱ña. Iin ta̱ hermano nda̱kiʼinra miíra ta̱ ni̱ka̱ʼa̱nra xíʼinra ña̱ ná kǒo kundi̱ʼi-inira chi na̱ testigo Jehová íyona nda̱a̱ táki̱ʼva íyo ndiʼi na̱ yiví. Ta̱ ta̱a kán ni̱xa̱a̱ra nda̱kuchira ta va̱ása nínandóso-inira xa̱ʼa̱ tu̱ʼun ña̱ ni̱ka̱ʼa̱n ta̱ hermano kán xíʼinra. Soo ni náʼa̱vayó ña̱ ndíʼi̱-iniyó xa̱ʼa̱ na̱ yiví na̱ xáʼa̱n reunión xíʼinyó, ná va̱ása nda̱ka̱tu̱ʼunyóna xa̱ʼa̱ ña̱ʼa ña̱ va̱ása xíniñúʼu kunda̱a̱-iniyó xa̱ʼa̱ (1 Ped. 4:15).

¹⁶ ¿Ndáakaña kivi keʼéyó ña̱ va̱ʼa kusi̱í-ini na̱ yiví na̱ xáʼa̱n reunión? Tá kúú, ná va̱ása ka̱ʼa̱nyó ña̱ va̱ása va̱ʼa xa̱ʼa̱ na̱ kǒo kúú testigo á xa̱ʼa̱ ña̱ kándíxana ni tá nátúʼunyó ti̱xin reunión á tá táxiyó comentario. Tá xáʼa̱n na̱ yiví reunión, ná kǒo ka̱ʼa̱nyó tu̱ʼun ña̱ sáxo̱ʼvi̱-inina ta xa̱ʼa̱ ña̱yóʼo va̱ása kuni̱kana ku̱ʼu̱nna (Tito 2:8; 3:2). Tá kúú, va̱ása xíniñúʼu kusi̱kindaayó ña̱ kándíxa na̱ yiví na̱ va̱ása kúú testigo Jehová (2 Cor. 6:3). Ta na̱ hermano na̱ táxi discurso xíniñúʼu kiʼinnína kuenta xíʼin ña̱yóʼo. Ta saátu xíʼin ña̱ káʼa̱nna ná na̱ʼa̱na ña̱ ndíʼi̱-inina xa̱ʼa̱ na̱ xáʼa̱n reunión ta saátu vií ná ndakanina xa̱ʼa̱ tu̱ʼun ña̱ xa̱a̱ xíni miíyó xa̱ʼa̱ ña̱ kǒo kunda̱a̱-ini na̱ yiví kán xíʼin.

17. ¿Ndáaña keʼéyó tá nda̱ni̱ʼíyó na̱ yiví na̱ kúni̱ kunda̱a̱-ini xa̱ʼa̱ ña̱ nda̱a̱?

¹⁷ Nani yáʼa ki̱vi̱ ku̱a̱ʼa̱nña, ndáyáʼviníka ña̱ natúʼunyó xíʼin na̱ yiví chi íyoka na̱ yiví na̱ kúni̱ kunda̱a̱-ini xa̱ʼa̱ ña̱ nda̱a̱ ña̱ va̱ʼa ni̱ʼina ña̱ kutakuna ndiʼi tiempo (Hech. 13:48). Ña̱kán tá nda̱ni̱ʼíyó na̱ yiví na̱ kúni̱ sakúaʼa xa̱a̱ Ndióxi̱, ndi̱ku̱n ná ka̱ʼa̱nyó xíʼinna ña̱ kúni̱yó ku̱ʼu̱nyó kaʼviyó xíʼinna ta kanayóna ña̱ ku̱ʼu̱nna reunión. Ta saá kúú ña̱ chindeétáʼanyó xíʼinna ña̱ ni̱ʼina ña̱ kutakuna ndiʼi tiempo (Mat. 7:14).