Photo by Zhai Yujia/China News Service/VCG via Getty Images
NÁ KUNDOO TU̱ʼVAYÓ
Sándiʼi-xa̱ʼa̱ní sa̱vi̱ ñuuna | ¿Ndáaña káʼa̱n Biblia xa̱ʼa̱ ña̱yóʼo?
Nu̱ú iníísaá ñuyǐví ku̱a̱ʼání na̱ yiví yáʼana nu̱ú tu̱ndóʼo chi ku̱a̱kiʼviní ti̱kui̱í ñuuna. Kotondó noticia yóʼo:
“Sa̱kán íyo loʼo ki̱vi̱, ndeéní ku̱un sa̱vi̱ chí capital ña̱ ñuu China ta xa̱a̱ íyo 140 ku̱i̱ya̱ ña̱ ta̱ʼán kuu ña̱yóʼo. Nani tá sábado iinsaá nda̱a̱ miércoles ku̱a̱ʼání sa̱vi̱ ku̱un, ki̱ʼva 744.8 milímetro nda̱ará (29.3 pulgada)a” (AP News, 2 tí agosto ña̱ 2023).
“Tá jueves ndeéní ku̱un sa̱vi̱ ta ndeéní ni̱xi̱ka ta̱chí chí sur ña̱ Japón i̱xaa ña̱ tifón ña̱ naní Khanun, u̱vi̱ ki̱vi̱ nííví ku̱unrá. U̱vi̱ na̱ yiví ni̱xi̱ʼi̱ xa̱ʼa̱ ña̱yóʼo”. Ta saátu ka̱china “ña̱ tá ná ndiʼi kuun sa̱vi̱ ki̱ʼva 0.6 metro (2 pies)b súkun ndaa ti̱kui̱í chí cordillera central ña̱ ñuu Taiwán” (Deutsche Welle, 3 tí agosto ña̱ 2023).
“Ni̱ki̱ʼviní ti̱kui̱í chí ñuu ña̱ naní Nueva Escocia xa̱ʼa̱ ña̱ ndeéní ku̱un sa̱vi̱, ndiʼi táʼví nu̱ú kíndo̱o ña̱ Atlántico ña̱ Canadá xa̱a̱ íyo 50 ku̱i̱ya̱ ña̱ ta̱ʼán kundoʼona saá ñuu yóʼo” (BBC News, 24 tí julio ña̱ 2023).
¿Ndáa ña̱ káʼa̱n Biblia xa̱ʼa̱ ña̱yóʼo?
Seña ña̱ koo “ki̱vi̱ nu̱ú ndíʼi”
Biblia káʼa̱nña xíʼinyó ña̱ ndóoyó “ki̱vi̱ nu̱ú ndíʼi” (2 Timoteo 3:1). Ta̱ Jesús ni̱ka̱ʼa̱nra ña̱ tiempo ña̱ ndóoyó vitin kuniyó ña̱ʼa ña̱ ndeéní yi̱ʼvíyó xíʼin (Lucas 21:11). Íyoní tu̱ndóʼo xa̱ʼa̱ ña̱ nása̱maní ki̱ʼva ña̱ íyo ñuyǐví yóʼo ta ku̱a̱ʼání ña̱ʼa íxaaña, tá kúú ña̱ ndeéní kúun sa̱vi̱ ña̱ niʼníní á ña̱ vi̱xinní ta ndiʼi ña̱yóʼo ni loʼo va̱ása kúnda̱a̱-iniyó ama kuuña ta ndáa ki̱ʼva kooña, ta ndeéníka xa̱a̱ña saxóʼvi̱ña miíyó.
Iin ña̱ kivi kundaa-iniyó
Biblia káʼa̱nña xíʼinyó ña̱ ndiʼi tu̱ndóʼo ña̱ íyo yóʼo chíndeétáʼanña xíʼinyó ña̱ kǒo kaka-iniyó xa̱ʼa̱ ña̱ ndátuyó. ¿Nda̱chun káʼa̱nyó ña̱yóʼo? Saáchi ña̱yóʼo ni̱ka̱ʼa̱n ta̱ Jesús: “Tá ná kunindó ña̱ xa̱a̱ kúu ndiʼi ña̱ʼa yóʼo, kunda̱a̱-inindó ña̱ xa̱a̱ yatin kixaa̱ Reino Ndióxi̱” (Lucas 21:31; Mateo 24:3).
Ndiʼi ña̱ kúu yóʼo náʼa̱ña nu̱úyó ña̱ xa̱a̱ si̱lóʼo tiempo ta kixáʼa Reino Ndióxi̱ kiʼinña kuenta xíʼin ndiʼi tu̱ndóʼo ña̱ íyo yóʼo, tá kúú ña̱ ki̱ʼvaní kuun sa̱vi̱ (Job 36:27, 28; Salmo 107:29).
Tá kúni̱kaún kunda̱a̱-iniún xa̱ʼa̱ ndáaña keʼé Reino Ndióxi̱ ña̱ va̱ʼa ndasaviíña nu̱ú ñuʼú yóʼo, koto artículo ña̱ naní “¿Quién salvará el planeta?”.