Ña̱ ndátuyó koo chí nu̱únínu xi̱nuvaña

1. ¿Nda̱chun xi̱kandíxaní ta̱ Abrahán ña̱ koo se̱ʼera?

JEHOVÁ ni̱ka̱ʼa̱nra xíʼin ta̱ Abrahán ña̱ ti̱xin na̱ veʼe ta̱yóʼo ku̱a̱ʼání na̱ ñuu ndakiʼinna bendición (Gén. 15:5; 22:18). Ta̱ Abrahán xi̱kandíxaníra Ndióxi̱. Ña̱kán, kǒo níxi̱ka-inira ña̱ xi̱nuva ña̱ ni̱ka̱ʼa̱nra xíʼinra. Soo, ta̱ Abrahán xa̱a̱ 100 ku̱i̱ya̱ xi̱kuumiíra ta ñá Sara 90, ta kǒo nda̱a̱ ni iin se̱ʼena níxi̱yo (Gén. 21:​1-7). Soo, Biblia káʼa̱nña ña̱: Ta̱ Abrahán “ka̱ndíxara ña̱ xa̱a̱ra koora yivá ndiʼi na̱ ñuu nda̱a̱ táki̱ʼva ni̱ka̱ʼa̱n Ndióxi̱ xíʼinra” (Rom. 4:18). Ta ni̱xi̱nuva ña̱ xi̱ndatu ta̱ Abrahán. Saáchi ka̱kuva se̱ʼera, ta Isaac xi̱naníra. Soo, ¿nda̱chun xi̱kandíxaní ta̱ Abrahán ña̱ saxínu Jehová ña̱ ni̱ka̱ʼa̱nra xíʼinra?

2. ¿Nda̱chun kǒo níxi̱ka-ini ta̱ Abrahán ña̱ saxínu Jehová ña̱ ni̱ka̱ʼa̱nra xíʼinra?

² Ta̱ Abrahán xi̱xini̱níra ndáa ki̱ʼva íyo Jehová, xa̱ʼa̱ ña̱kán kǒo níxi̱ka-inira ña̱ saxínuvara ña̱ ni̱ka̱ʼa̱nra xíʼinra (Rom. 4:21). Jehová ni̱ka̱ʼa̱nra ña̱ iin ta̱a ta̱ nda̱kúní-ini ni̱xi̱yo ta̱ Abrahán xa̱ʼa̱ ña̱ xi̱kandíxanírara ta xi̱kusi̱íní-inira xíʼinra (Sant. 2:23). Nda̱a̱ táki̱ʼva káʼa̱n Romanos 4:​18, ta̱ Abrahán xi̱kandíxaníra ña̱ ni̱ka̱ʼa̱n Jehová, ta xi̱ndatura ndakiʼinra ña̱ va̱ʼa chí nu̱únínu. Vitin ná kotoyó ña̱ káʼa̱n ta̱ apóstol Pablo xa̱ʼa̱ ña̱ ndakiʼinyó chí nu̱únínu, ta ña̱yóʼo va̱xiña nu̱ú Romanos capítulo 5.

3. ¿Ndáaña ni̱ka̱ʼa̱n ta̱ Pablo xa̱ʼa̱ ña̱ ndátuyó koo chí nu̱únínu?

³ Ta̱ Pablo káʼa̱nra ña̱ kǒo xíniñúʼu kaka-iniyó xa̱ʼa̱ ña̱ koo chí nu̱únínu saáchi ña̱ xi̱nu kúúvaña (Rom. 5:5). Saátu chíndeétáʼanra xíʼinyó ña̱ kandíxaníkayó ña̱ ni̱ka̱ʼa̱n Ndióxi̱ koo chí nu̱únínu. Nani káʼa̱nyó xa̱ʼa̱ ña̱ va̱xi nu̱ú Romanos 5:​1-5, ndakanixi̱ní xa̱ʼa̱ ña̱ chíndeétáʼan xíʼún ña̱ va̱ʼa kandíxakaún ña̱ káʼa̱n Ndióxi̱ koo chí nu̱únínu. Nu̱ú artículo yóʼo sakúaʼún ndáaka ña̱ kivi keʼún ña̱ va̱ʼa kandíxakaún ña̱ káʼa̱n Ndióxi̱ koo chí nu̱únínu. Vitin ná kotoyó ña̱ ni̱ka̱ʼa̱n ta̱ Pablo.

ÑA̱ NDÁTUYÓ KOO CHÍ NU̱ÚNÍNU VA̱ʼANÍÑA

4. ¿Ndáaña káʼa̱n Romanos 5:​1, 2 xa̱ʼa̱?

⁴ (Kaʼvi Romanos 5:​1, 2). Ta̱ Pablo ka̱ʼyíra tu̱ʼun yóʼo ku̱a̱ʼa̱n nu̱ú na̱ cristiano na̱ xi̱ndoo ñuu Roma. Na̱yóʼo ni̱xa̱a̱na sa̱kuaʼana xa̱ʼa̱ Jehová xíʼin ta̱ Jesús, ni̱na̱ʼa̱na ña̱ kándíxanína Jehová ta ndu̱una cristiano. Xa̱ʼa̱ ña̱ xi̱kandíxanína Jehová ni̱xa̱a̱na ndu̱una na̱ yiví nda̱kú-ini nu̱úra ta nda̱kaxinrana xíʼin espíritu santo. Ta nani tiempo saá ki̱xáʼana ndátuna iin ña̱ ndáyáʼviní ña̱ ndakiʼinna chí nu̱únínu.

5. ¿Ndáa míí ndátu na̱ ungido koona?

⁵ Tá ni̱ya̱ʼa loʼo tiempo, ta̱ Pablo ka̱ʼyíra iin carta ku̱a̱ʼa̱n nu̱ú na̱ cristiano na̱ ni̱xi̱yo ñuu Éfeso, ta ni̱ka̱ʼa̱nra xíʼinna ña̱ íyo iin ña̱ va̱ʼa taxi Ndióxi̱ ndaʼa̱ ndiʼi na̱ nda̱kaxinra xíʼin espíritu santo (Efes. 1:18). Ta xíʼin na̱ colosenses ni̱ka̱ʼa̱nra ña̱ íyo iin ña̱ ndátuna ndakiʼinna chí ndiví (Col. 1:​4, 5). Ndiʼi na̱ cristiano na̱ nda̱kaxin Ndióxi̱ xíʼin espíritu santo ndátuna koona chí ndiví ndiʼi tiempo, ta kán kaʼndachíñuna xíʼin ta̱ Cristo (1 Tes. 4:​13-17; Apoc. 20:6).

6. ¿Ndáaña ni̱ka̱ʼa̱n iin ta̱ ungido xa̱ʼa̱ ña̱ ndátura ndakiʼinra chí nu̱únínu?

⁶ Nu̱ú na̱ ungido ndáyáʼviní ña̱ ndakiʼinna chí nu̱únínu. Tá kúú, ku̱i̱ya̱ 1991 ta̱ hermano Frederick Franz ni̱ka̱ʼa̱nra: “Ña̱ ni̱ka̱ʼa̱n Ndióxi̱ xíʼin ndiʼi miíyó na̱ 144,000 xi̱nuvaña, ta kusi̱íní-iniyó tá ná xi̱nu ña̱yóʼo”. Soo, ¿ndáaña ni̱ka̱ʼa̱nra tá xa̱a̱ ni̱ya̱ʼa ku̱i̱ya̱? Ta̱yóʼo ni̱ka̱ʼa̱nra: “Kǒo xíka-inindi̱ xa̱ʼa̱ ña̱ ndátundi̱ ndakiʼinndi̱ chí nu̱únínu, chi ndátundi̱ ña̱yóʼo ta nani yáʼa tiempo ndáyáʼviníkaña nu̱úndi̱. Ni ná ya̱ʼa millón ku̱i̱ya̱ kundatuvandi̱ chi ndáyáʼviníña nu̱úndi̱. Vitin, ña̱ ndáyáʼviníka nu̱úi̱ kúú ña̱ ndátui̱ ndakiʼi̱n chí nu̱únínu”.

7, 8. ¿Ndáaña ndátu ku̱a̱ʼání miíyó na̱ ndásakáʼnu Ndióxi̱? (Romanos 8:​20, 21).

⁷ Ku̱a̱ʼání miíyó na̱ ndásakáʼnu Jehová tiempo vitin íyova inka ña̱ʼa ña̱ ndátuyó ndakiʼinyó. ¿Ndáaña kúú ña̱yóʼo? Ña̱ kutakuyó ndiʼi tiempo nu̱ú ñuʼú yóʼo, ta Reino Ndióxi̱ káʼndachíñu nu̱úyó. Ta ña̱yóʼo kúútu ña̱ ndátu ta̱ Abrahán ndakiʼinra (Heb. 11:​8-10, 13). Saátu ka̱ʼyí ta̱ Pablo xa̱ʼa̱ ña̱ ndakiʼin na̱ ndátu koo nu̱ú ñuʼú yóʼo (kaʼvi Romanos 8:​20, 21). Tá ni̱xa̱ún sa̱kúaʼún xa̱ʼa̱ Ndióxi̱ ta ku̱ndaa-iniún xa̱ʼa̱ ña̱ káʼa̱nra keʼéra chí nu̱únínu, ¿ndáaña ku̱tóokaún? ¿Á ku̱si̱í-iniún tá ku̱nda̱a̱-iniún ña̱ kiviva xa̱ún koún iin na̱ yiví na̱ kǒoka ku̱a̱chi kúúmií? ¿Á ku̱si̱í-iniún tá ku̱nda̱a̱-iniún ña̱ ndiʼi na̱ táʼún na̱ xa̱a̱ ni̱xi̱ʼi̱ ndatakuna ta koona nu̱ú ñuyǐví xa̱á? Ndióxi̱ sáxi̱nuvara ña̱ ni̱ka̱ʼa̱nra.

⁸ Ndiʼiyó kúsi̱í-iniyó chi íyova ña̱ ndátuyó ndakiʼinyó chí nu̱únínu, savana ku̱ʼu̱nna chí ndiví soo ku̱a̱ʼáníyó kundooyó nu̱ú ñuʼú yóʼo. Ta nani yáʼa ki̱vi̱ xíniñúʼu kandíxaníkayó ña̱ mií Jehová sáxi̱nuvara ña̱ ni̱ka̱ʼa̱nra. Soo, ¿ndáaña kivi chindeétáʼan xíʼinyó? Ña̱ va̱ʼa kunda̱a̱-iniyó ná ka̱ʼa̱nkayó xa̱ʼa̱ ña̱ ka̱ʼyí ta̱ Pablo, chi ña̱yóʼo kivi chindeétáʼanña xíʼinyó ña̱ kǒo kaka-iniyó ña̱ saxínuva Jehová ña̱ ni̱ka̱ʼa̱nra keʼéra chí nu̱únínu.

ÑA̱ CHINDEÉTÁʼAN XÍʼINYÓ ÑA̱ KANDÍXAKAYÓ ÑA̱ KOO CHÍ NU̱ÚNÍNU

9, 10. Nda̱a̱ táki̱ʼva ndo̱ʼo ta̱ Pablo, ¿ndáaña kivi kundoʼoyó? (Romanos 5:3; koto na̱ʼná).

⁹ (Kaʼvi Romanos 5:3). Ta̱ Pablo ni̱ka̱ʼa̱nra ña̱ tá yáʼayó nu̱ú tundóʼo ña̱yóʼo kúú ña̱ chindeétáʼan xíʼinyó ña̱ kandíxakayó ña̱ koo chí nu̱únínu. Ndiʼi miíyó na̱ ndásakáʼnu Ndióxi̱ kúnda̱a̱-iniyó ña̱ ya̱ʼayó nu̱ú tu̱ndóʼo ña̱ yo̱ʼvi̱ní. Ña̱yóʼo kúú ña̱ ni̱ka̱ʼa̱n ta̱ Pablo xíʼin na̱ cristiano na̱ Tesalónica: “Saáchi tá ni̱xi̱yondi̱ xíʼinndó, xi̱ka̱ʼa̱nndi̱ xíʼinndó ña̱ ya̱ʼayó nu̱ú tu̱ndóʼo, ta xa̱a̱ kúnda̱a̱-inindó ña̱ saá kúú ña̱ kúuva” (1 Tes. 3:4). Ta ña̱yóʼo ni̱ka̱ʼa̱nra xíʼin na̱ cristiano na̱ Corinto: “Kúni̱ndi̱ ña̱ ná kunda̱a̱-inindó xa̱ʼa̱ tu̱ndóʼo ña̱ ni̱ya̱ʼandi̱ nu̱ú. [...] Ta ni̱yi̱ʼvíníndi̱ xa̱ʼa̱ ña̱ kivi kundoʼondi̱” (2 Cor. 1:8; 11:​23-27).

¹⁰ Ta nda̱a̱ tiempo vitin ndiʼi miíyó na̱ ndásakáʼnu Ndióxi̱ yáʼayó nu̱ú tu̱ndóʼo (2 Tim. 3:12). ¿Ndáa tu̱ndóʼo xa̱a̱ yáʼún nu̱ú nani ki̱xáʼún ndíku̱n ta̱ Jesús? Sana na̱ migoún á na̱ veʼún íxandiva̱ʼana xíʼún á kúsi̱kindaana yóʼó. ¿Á xa̱a̱ íxandiva̱ʼana xíʼún nu̱ú káchíñún xa̱ʼa̱ ña̱ kǒo kéʼún nda̱a̱ táki̱ʼva kéʼé inkana? (Heb. 13:18). ¿Á xa̱a̱ sási na̱ chíñu nu̱ún xa̱ʼa̱ ña̱ nátúʼún xa̱ʼa̱ Ndióxi̱? Ta̱ Pablo ni̱ka̱ʼa̱nra ña̱ ná kusi̱í-iniyó tá yáʼayó nu̱ú tu̱ndóʼo, ¿nda̱chun?

11. ¿Nda̱chun xíniñúʼu ndakú koo iniyó?

¹¹ Kúsi̱í-iniyó tá yáʼyó nu̱ú tu̱ndóʼo saáchi ña̱yóʼo chíndeétáʼanña xíʼinyó. Romanos 5:3 káchiña: “Saáchi tá yáʼayó nu̱ú tu̱ndóʼo saá kúú ña̱ ndúndakúka-iniyó”. Ndiʼi miíyó na̱ ndásakáʼnu Ndióxi̱ yáʼayó nu̱ú tu̱ndóʼo ña̱kán xíniñúʼu ndakú koo iniyó. Tá kǒo yíʼviyó ta kúndeé-iniyó saá kúú ña̱ ndakiʼinyó ña̱ ndátuniyó. Kǒo kúni̱yó kooyó nda̱a̱ táki̱ʼva íyo na̱ yiví na̱ ni̱ka̱ʼa̱n ta̱ Jesús xa̱ʼa̱, na̱ íyo táki̱ʼva íyo si̱ʼva̱ tí kóyo nu̱ú íyoní yu̱u̱. Na̱ yiví yóʼo kúú na̱ xíniso̱ʼo tu̱ʼun Ndióxi̱ ta kúsi̱íkaví-inina, soo tá va̱xi iin tu̱ndóʼo nu̱úna á íxandiva̱ʼana xíʼinna ndi̱ku̱n sándakoovana ña̱ kándíxana Ndióxi̱ (Mat. 13:​5, 6, 20, 21). Ña̱ nda̱a̱, ni iin miíyó kǒo kútóoyó ya̱ʼayó nu̱ú tu̱ndóʼo, soo tá kúndeé-iniyó ku̱a̱ʼání ña̱ va̱ʼa ndákiʼinyó. Ná kotoyó ndáaña va̱ʼa kúú ña̱ ndákiʼinyó.

12. Tá kúndeé-iniyó, ¿ndáa ki̱ʼva chíndeétáʼanña xíʼinyó?

¹² Ta̱ discípulo Santiago ni̱ka̱ʼa̱nra ndáaña va̱ʼa ndákiʼinyó tá kúndeé-iniyó. Ta̱yóʼo ka̱ʼyíra: “Tá ná kundeé-inindó ya̱ʼandó nu̱ú nda̱a̱ ndáaka tu̱ndóʼo, ña̱yóʼo chindeétáʼanña xíʼinndó ña̱ koo tu̱ʼvandó keʼéndó nda̱a̱ ndáaka chiñu” (Sant. 1:​2-4). Tá kúndeé-iniyó yáʼayó nu̱ú tu̱ndóʼo ¿ndáa ki̱ʼva chindeétáʼan ña̱yóʼo xíʼinyó? Chindeétáʼanña xíʼinyó ña̱ kúee koo iniyó, ña̱ kandíxakayó Ndióxi̱ ta saátu ña̱ kǒo kaka-iniyó ña̱ xi̱nuva ña̱ káʼa̱nra keʼéra chí nu̱únínu. Soo, íyo inkaka ña̱ va̱ʼa ndakiʼinyó tá kúndeé-iniyó.

13, 14. ¿Ndáaña kúu tá ndakú íyo iniyó, ta ndáaña va̱ʼa ndakiʼinyó xa̱ʼa̱ ña̱yóʼo? (Romanos 5:4).

¹³ (Kaʼvi Romanos 5:4). Ta̱ Pablo ni̱ka̱ʼa̱nra tá ndakú íyo iniún saá kúú ña̱ “kíndo̱o va̱ʼún nu̱ú Ndióxi̱”. Su̱ví ña̱yóʼo kúni̱ kachiña ña̱ kúsi̱í-ini Jehová tá yáʼún nu̱ú tu̱ndóʼo, chi ña̱ sákusi̱í-inira kúú ña̱ kúndeé-iniún. Ña̱kán, tá yáʼún nu̱ú iin tundóʼo ta kúndeé-iniún, saá kúú ña̱ sákusi̱íún-ini Jehová (Sal. 5:12).

¹⁴ Ná ka̱ʼa̱nyó xa̱ʼa̱ ta̱ Abrahán. Jehová ku̱si̱íní-inira xíʼinra saáchi ku̱ndeé-inira tá ni̱ya̱ʼara nu̱ú tu̱ndóʼo. Ta ni̱ka̱ʼa̱nra ña̱ migora xi̱kuu ta̱ Abrahán saáchi nda̱kúní ni̱xi̱yo inira xíʼinra (Gén. 15:6; Rom. 4:​13, 22). Kúsi̱íva-ini Jehová xíʼin chiñu ña̱ kéʼéyó nu̱úra ti̱xin congregación, soo ña̱ ndáyáʼvika nu̱úra kúú ña̱ kúndeé-iniyó tá yáʼayó nu̱ú tu̱ndóʼo ta nda̱kú íyo iniyó xíʼinra, ta ndiʼiyó kiviva nda̱kú koo iniyó xíʼinra. ¿Á yáʼún nu̱ú tu̱ndóʼo ña̱ sáxo̱ʼviní yóʼó? Tásaá ndóʼún, ndakaʼán ña̱ kúsi̱íva-ini Ndióxi̱ xíʼin ña̱ kéʼún tá nda̱kú íyo iniún xíʼinra. Ña̱kán, tá kúnda̱a̱-iniyó ña̱ kúsi̱í-ini Jehová xíʼin ña̱ kéʼéyó saá kúú ña̱ kǒo xíka-iniyó xa̱ʼa̱ ña̱ ndakiʼinyó chí nu̱únínu.

KǑO XÍKA-INIYÓ XA̱ʼA̱ ÑA̱ KOO CHÍ NU̱ÚNÍNU

15. ¿Ndáaka ña̱ ni̱ka̱ʼa̱n ta̱ Pablo, ta ndáa pregunta kivi ndakanixi̱níyó xa̱ʼa̱?

¹⁵ Ta̱ Pablo ni̱ka̱ʼa̱nra ña̱ tá kúndeé-iniyó saá kúú ña̱ kíndo̱o va̱ʼayó nu̱ú Ndióxi̱. Ná kotoyó ña̱ ni̱ka̱ʼa̱nra: “Xa̱ʼa̱ ña̱ kíndo̱o va̱ʼayó nu̱ú Ndióxi̱, ña̱yóʼo chíndeétáʼanña xíʼinyó ña̱ kundatuyó ña̱ koo chí nu̱únínu, ta ña̱ ndátuyó koo chí nu̱únínu va̱ása sándakavaña-iniyó” (Rom. 5:​4, 5). Nu̱ú Romanos 5:​2, ta̱ Pablo ni̱ka̱ʼa̱nra xíʼin na̱ cristiano na̱ ñuu Roma, ña̱ xa̱a̱ íyo ña̱ ndáyáʼviní ndakiʼinna chí nu̱únínu. Xa̱ʼa̱ ña̱kán, sana kivi ndakanixi̱níyó xa̱ʼa̱ ña̱yóʼo: tá xa̱a̱ íyo ña̱ xi̱ndatu na̱ hermano kán ndakiʼinna chí nu̱únínu, ¿nda̱chun káʼa̱nka ta̱ Pablo xa̱ʼa̱ ña̱yóʼo?

16. Ka̱ʼa̱n ndáaña kivi chindeétáʼan xíʼin na̱ yiví ña̱ kandíxana ña̱ xi̱nuva ña̱ káʼa̱n Ndióxi̱. (Koto na̱ʼná).

¹⁶ Kivi kunda̱a̱-iniyó xíʼin ña̱ ni̱ka̱ʼa̱n ta̱ Pablo, saáchi tá yáʼa tiempo kivi kandíxakavayó ña̱ káʼa̱n Ndióxi̱ keʼéra chí nu̱únínu. Tá kúú, ¿á ndákaʼún xa̱ʼa̱ yichi̱ nu̱ú tá ni̱ka̱ʼa̱nna xíʼún ña̱ kiviva koún nu̱ú ñuʼú yóʼo ndiʼi saá tiempo tá ná nduuña iin Paraíso? Sana nda̱kanixi̱níún ña̱ su̱ví ña̱ ndixaví kúúña. Soo tá sa̱kúaʼakaún ña̱ káʼa̱n Jehová xíʼin ña̱ káʼa̱n tu̱ʼunra, saá ni̱xa̱ún ku̱nda̱a̱-iniún ña̱ ndixava xi̱nu ña̱ káʼa̱nra koo chí nu̱únínu.

17. Ni xa̱a̱ nda̱kuchiún soo, ¿ndáaña kéʼún ña̱ va̱ʼa kandíxakaún ña̱ káʼa̱n Ndióxi̱?

¹⁷ Ni xa̱a̱ nda̱kuchiún, soo chíka̱a̱kavaún ndee̱ ña̱ sakúaʼún xa̱ʼa̱ Jehová ta xa̱ʼa̱ ña̱kán kándíxaníkaún ña̱ keʼéra chí nu̱únínu (Heb. 5:13–6:1). Sana xa̱a̱ ndóʼún ña̱ káʼa̱n Romanos 5:​2-4, saáchi sana xa̱a̱ yáʼavaún nu̱ú tu̱ndóʼo soo xa̱a̱ kíʼún kuenta ña̱ kíndo̱ova-ini Jehová xíʼin ña̱ kéʼún. Xa̱ʼa̱ ña̱ kúnda̱a̱-iniún ña̱ kúsi̱í-ini Jehová xíʼin ña̱ kéʼún kǒo xíka-iniún ña̱ sáxi̱nuvara ndiʼi ña̱ ni̱ka̱ʼa̱nra xíʼún. Ña̱kán, vitin kándíxaníkavaún ña̱ káʼa̱n Ndióxi̱ nu̱úka ña̱ xi̱kandíxaúnra tá ya̱chi̱, saáchi va̱ʼaní kítáʼún xíʼinra vitin ta kándíxaún ña̱ káʼa̱nra. Ta ña̱yóʼo chindeétáʼanña xíʼún ña̱ kotoún ndáa ki̱ʼva íyoún xíʼin na̱ veʼún, ndáa ki̱ʼva íyo ña̱ ndáka̱xiún keʼún ta saátu ndáa ki̱ʼva xíniñúʼún tiempo ña̱ kúúmiíún.

18. ¿Ndáaña káʼa̱n Jehová xíʼinyó?

¹⁸ Ña̱ chíndeétáʼan xíʼinyó ña̱ kindo̱o va̱ʼayó nu̱ú Ndióxi̱ kúú ña̱ kandíxayó ña̱ xi̱nuva ña̱ ndátuyó koo chí nu̱únínu. Soo, saátu ta̱ Pablo ni̱ka̱ʼa̱nra xa̱ʼa̱ inka ña̱ʼa ña̱ ndáyáʼviní, ña̱ kǒo xíniñúʼu kaka-iniyó ña̱ ndixava xi̱nu ña̱ koo chí nu̱únínu. ¿Nda̱chun? Saáchi ni̱ka̱ʼa̱nra ña̱ mií Ndióxi̱ kúú ta̱ ni̱ka̱ʼa̱n tu̱ʼun kán. Ta̱ Pablo ka̱chira: “Ña̱ ndátuyó koo chí nu̱únínu va̱ása sándakavaña-iniyó; saáchi Ndióxi̱ xíniñúʼura espíritu santora ña̱ táxira ndaʼa̱yó, ña̱ va̱ʼa na̱ʼa̱ra ña̱ kúʼvi̱-inira xínira miíyó” (Rom. 5:5). Ña̱kán, kǒo kaka-iniún chi xi̱nuva ña̱ ndátún ndakiʼún chí nu̱únínu.

19. ¿Ndáaña ndakiʼinyó tá nda̱kú íyo iniyó xíʼin Jehová?

¹⁹ Iin ña̱ va̱ʼaní kúú ña̱ ndakanixi̱níyó xa̱ʼa̱ ndiʼi ña̱ va̱ʼa ña̱ nda̱kiʼin ta̱ Abrahán. Jehová ke̱ʼéra iin trato xíʼinra, ta ni̱ka̱ʼa̱nra ña̱ va̱ʼaní íyo ña̱ xi̱keʼéra saátu ña̱ xi̱kuura migora. Biblia káʼa̱nña: “Xa̱ʼa̱ ña̱ kúeení ni̱xi̱yo ini ta̱ Abrahán, nda̱kiʼinra ña̱ ni̱ka̱ʼa̱n Ndióxi̱ taxira ndaʼa̱ra” (Heb. 6:15; 11:​9, 18; Rom. 4:​20-22). Tákiʼva ke̱ʼé ta̱ Abrahán, miíyó kǒo xíka-iniyó ña̱ tá nda̱kú íyo iniyó xíʼin Jehová ndakiʼinvayó ña̱ ni̱ka̱ʼa̱nra taxira ndaʼa̱yó. Kúsi̱íní-iniyó, saáchi ña̱ ndixa kúú ña̱ káʼa̱n Ndióxi̱ taxira ndaʼa̱yó chí nu̱únínu (Rom. 12:12). Ta̱ Pablo ka̱chira: “Ndióxi̱ ta̱ chíndeétáʼan xíʼinyó ña̱ kundatuyó ña̱ koo chí nu̱únínu, ná taxira ña̱ kusi̱í-inindó saátu ña̱ táxi̱n koo inindó xa̱ʼa̱ ña̱ kándíxandóra, ña̱ va̱ʼa xíʼin ndee̱ ña̱ espíritu santo kivi kundatundó xíʼin ndiʼi níma̱ndó” (Rom. 15:13).