KIXÁʼA NATÚʼUN XÍʼIN NA̱ YIVÍ
LECCIÓN 2
Kǒo kaʼyíún ña̱ ka̱ʼún xíʼinna
Ña̱ káʼa̱n tu̱ʼun Ndióxi̱: “Tu̱ʼun ña̱ káʼa̱nna mií tiempo ña̱ xíniñúʼuyóña sákusi̱íña-iniyó” (Prov. 15:23).
Ña̱ ke̱ʼé ta̱ Felipe
1. Koto VIDEO á kaʼvi Hechos 8:30, 31. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
¿Ndáa ki̱ʼva ki̱xáʼa ta̱ Felipe nátúʼunra xíʼin ta̱ eunuco etíope?
¿Ndáaña ke̱ʼéra ña̱ va̱ʼaní sa̱náʼa̱ra ta̱yóʼo xa̱ʼa̱ inkaka ña̱ va̱xi nu̱ú tu̱ʼun Ndióxi̱?
¿Ndáaña sákuaʼayó xíʼin ña̱ ke̱ʼé ta̱ Felipe?
2. Tá kǒo káʼyíyó nu̱ú iin tutu ña̱ ka̱ʼa̱nyó xíʼin na̱ yiví, saá kúú ña̱ va̱ʼaníka kuniso̱ʼona tá nátúʼunyó xíʼinna.
Keʼé táki̱ʼva ke̱ʼé ta̱ Felipe
3. Kiʼin kuenta xíʼin ña̱ kéʼéna. Ndáa ki̱ʼva xítona, ndáa ki̱ʼva kánda̱na, á ndixa kúni̱na kuniso̱ʼona ña̱ nátúʼún xíʼinna, á ndákuiinna yuʼún tá ndáka̱tu̱ʼúnna xa̱ʼa̱ iin ña̱ʼa. Soo, ña̱ va̱ʼa kixáʼún natúʼún xíʼinna xa̱ʼa̱ Biblia kivi ndaka̱tu̱ʼúnna: “¿Á xíni̱ún ña̱ ndíʼi̱-ini Ndióxi̱ xa̱ʼún?”. Ta kǒo ixandúxaún xíʼinna tá kǒo xíínna kuniso̱ʼona.
4. Kúee koo iniún xíʼinna. Taxi ná ka̱ʼa̱nna xíʼún xa̱ʼa̱ ña̱ sándi̱ʼi̱-inina tasaáví kixáʼún natúʼún xíʼinna xa̱ʼa̱ tu̱ʼun Ndióxi̱. Kǒo kundi̱ʼi̱-iniún tá va̱ása níkivi natúʼún xíʼinna xa̱ʼa̱ Ndióxi̱ mií kivi kán, chi kivi natú’ún xí’inna inka yichi̱ tá ná kuniúnna.
5. Nasama ña̱ ka̱ʼún. Sana xa̱a̱ nda̱kanixi̱níún ndáaña ka̱ʼún xa̱ʼa̱ xíʼinna, soo kíʼún kuenta ña̱ inkava ña̱ʼa kíxáʼana káʼa̱nna xa̱ʼa̱. Ña̱kán, nuúka ña̱ ka̱ʼún xa̱ʼa̱ ña̱ xa̱a̱ nda̱kanixi̱níún ka̱ʼún xíʼinna kivi kixáʼún natúʼún xíʼinna xa̱ʼa̱ ña̱ sándi̱ʼi̱-inina.