¿Ndáa tí kúú kití yukú tí color kúáʼaní tí káʼa̱n Apocalipsis capítulo 17 xa̱ʼa̱?

Ña̱ káʼa̱n Biblia xa̱ʼa̱ ña̱yóʼo

Kití yukú tí color kúáʼaní tí káʼa̱n Apocalipsis capítulo 17 xa̱ʼa̱ ndánaʼa̱rí iin organización ña̱ kúni̱ sandákutáʼan ndiʼi ñuu ña̱ íyo nu̱ú ñuʼú yóʼo. Tá xa̱ʼa̱, ña̱ organización yóʼo xi̱naníña Sociedad á Liga de Naciones. Ta vitin naníña Naciones Unidas (ONU).

Ña̱ʼa ña̱ chindeétáʼan xíʼinyó ña̱ ndakuniyó kití yukú yóʼo

Ndána̱ʼa̱rí ña̱ política. Biblia káchiña, tí kití yukú tí color kúáʼaní íyo u̱xa̱ xi̱nírí ña̱ kúni̱ kachi “u̱xa̱ yuku̱” xíʼin “u̱xa̱ na̱ rey” (Apocalipsis 17:9, 10). Sava yichi̱ nu̱ú tu̱ʼun Ndióxi̱, yuku̱ xíʼin kití yukú ndánaʼa̱ña na̱ chíñu (Jeremías 51:24, 25; Daniel 2:44, 45; 7:17, 23).
Tíyóʼo ndánaʼa̱rí ña̱ política ña̱ íyo iníísaá ñuyǐví. Tí kití yukú tí color kúáʼaní inkáchi náʼa̱rí xíʼin tí kití yukú tí u̱xa̱ xi̱ní tí káʼa̱n Apocalipsis capítulo 13 xa̱ʼa̱, ta tíyóʼo ndána̱ʼa̱rí ndiʼi na̱ chíñu na̱ íyo ñuyǐví yóʼo. U̱vi̱ saá kití yukú yóʼo íyo u̱xa̱ xi̱nírí, u̱xu̱ ndiki̱rí ta xi̱nírí ni̱ka̱ʼyi̱ ki̱vi̱ ña̱ káʼa̱n-ndi̱va̱ʼa xa̱ʼa̱ Ndióxi̱ (Apocalipsis 13:1; 17:3). Inkáchi náʼa̱ u̱vi̱ saá tí kití yukú yóʼo. Ña̱kán, kití yukú tí color kúáʼaní ndána̱ʼa̱rí na̱ chíñu ñuyǐví yóʼo (Apocalipsis 13:15).
Inka na̱ chíñu chíndeétáʼan xíʼinrí. Tí kití yukú tí color kúáʼaní ki̱xáʼa íyorí chi inka na̱ chíñu chi̱ndeétáʼan xíʼinrí ña̱ ki̱xáʼarí xáʼndachíñurí (Apocalipsis 17:11, 17).
Va̱ʼaní kítáʼanrí xíʼin veʼe-ñu̱ʼu vatá. Babilonia ña̱ káʼnu ña̱ ndána̱ʼa̱ ndiʼi veʼe-ñu̱ʼu vatá íyoña sa̱tá kití yukú tí color kúáʼaní. Ña̱yóʼo náʼa̱ña ña̱ veʼe-ñu̱ʼu vatá kítáʼanña xíʼin kití yukú yóʼo (Apocalipsis 17:3-5).
Káʼa̱n-ndi̱va̱ʼarí xa̱ʼa̱ Ndióxi̱. Tí kití yukú yóʼo “iníísaárí ni̱ka̱ʼyi̱rí xíʼin ki̱vi̱ ña̱ káʼa̱n-ndi̱va̱ʼa xa̱ʼa̱ Ndióxi̱” (Apocalipsis 17:3).
Ni̱xi̱yo iin tiempo ña̱ kǒo ni iin ña̱ʼa níkeʼérí. Tu̱ʼun Ndióxi̱ ni̱ka̱ʼa̱nña ña̱ tí kití yukú tí color kúáʼaní kundikaa̱rí “ini ya̱vi̱ naá”,a á va̱ása kookarí. Soo kixaa̱ iin tiempo ña̱ kita tukuvarí (Apocalipsis 17:8).

Xa̱a̱ xínu profecía ña̱ va̱xi nu̱ú Biblia

Ná kotoyó ndáa ki̱ʼva xa̱a̱ xínu profecía ña̱ káʼa̱n xa̱ʼa̱ kití yukú tí color kúáʼaní tí ndána̱ʼa̱ na̱ Naciones Unidas ta saátu ña̱ Sociedad de Naciones ña̱ ni̱xi̱yo tá ya̱chi̱.

Ña̱ política kúúña. Ña̱ ONU chíndeétáʼanña xíʼin ña̱ política chi ndákiʼinña tu̱ʼun “ndiʼi ñuu ña̱ kítáʼan xíʼinña”.b
Ña̱yóʼo ndánaʼa̱ña ña̱ política ña̱ íyo iníísaá ñuyǐví. Ku̱i̱ya̱ 2011, ki̱xáʼa inka ñuu kítáʼanña xíʼin ña̱ Naciones Unidas ta ña̱yóʼo ndu̱uña ña̱ número 193. Xa̱ʼa̱ ña̱kán, ña̱ ONU káʼa̱nña ña̱ kíʼinña kuenta xíʼin ku̱a̱ʼá ñuu válí xíʼin ñuu náʼnu ña̱ íyo iníísaá nu̱ú ñuʼú.
Inka na̱ chíñu chíndeétáʼan xíʼinña. Ña̱ ONU kúúmiíña ndee̱ xíʼin nda̱yí xa̱ʼa̱ ña̱ chíndeétáʼan ku̱a̱ʼání país xíʼinña.
Va̱ʼaní kítáʼanña xíʼin na̱ veʼe-ñu̱ʼu. Ña̱ Sociedad de Naciones xíʼin ña̱ Naciones Unidas ndiʼi tiempo chíndeétáʼan veʼe-ñu̱ʼu xíʼinña.c
Va̱ása íxato̱ʼóña Ndióxi̱. Ke̱ʼéna ña̱ Naciones Unidas ña va̱ʼa “vií ndatiinña ku̱a̱chi xíʼin ndiʼi ñuu”. d Ta iin ña̱ va̱ʼa kúú ña̱ kúni̱na keʼéna, soo mií ña̱ nda̱a̱ va̱ása íxato̱ʼóña Ndióxi̱, saáchi káʼa̱nna ña̱ kuchiñuna sandíʼi-xa̱ʼa̱na ndiʼi tu̱ndóʼo, soo iinlá Reino Ndióxi̱ kuchiñu keʼé ña̱yóʼo (Salmo 46:9; Daniel 2:44).
Ni̱xi̱yo iin tiempo ña̱ kǒo ni iin ña̱ʼa níkeʼéña. Tándi̱ʼi ni̱xi̱yo ña̱ Primera Guerra Mundial saá ki̱xáʼa íyo ña̱ Sociedad de Naciones, ta ke̱ʼéna ña̱yóʼo chi kǒo níxi̱kuni̱kana ña̱ koo ku̱a̱chi, soo kǒo níkivi kasina nu̱ú na̱ ñuu chi xi̱kanitáʼankavana. Ku̱i̱ya̱ 1939 kǒo ni iin ña̱ʼa níkeʼékaña tasaá ki̱xáʼa Segunda Guerra Mundial. Tá ndi̱ʼi̱ ku̱a̱chi yóʼo, ku̱i̱ya̱ 1945 ki̱xáʼa íyo ña̱ ONU. Ta ña̱ ki̱xáʼana kéʼéna inkáchi kítáʼanña xíʼin ña̱ xi̱keʼé na̱ Sociedad de Naciones.

a Nda̱a̱ táki̱ʼva káchi Diccionario expositivo de palabras del Antiguo xíʼin ña̱ Nuevo Testamento exhaustivo, de W. E. Vine, tu̱ʼun griego ña̱ ni̱ka̱ʼyi tu̱ʼun “ya̱vi̱ naá” káʼa̱nña xa̱ʼa̱ña “ña̱ kúnuníña ta kǒo nu̱ú ndíʼiña”. Ta Biblia ña̱ naní Escrituras de Restauración xíniñúʼuña ña̱ tu̱ʼun “ya̱vi̱ ña̱ kúnuní ta kǒo nu̱ú ndíʼiña”. Soo Biblia káʼa̱nña xa̱ʼa̱ ña̱yóʼo ña̱ kúúña iin veʼeka̱a nu̱ú kǒo kívi keʼéna ni iin ña̱ʼa.

b Koto Artículo 2 ña̱ va̱xi nu̱ú Carta de las Naciones Unidas.

c Tá kúú ku̱i̱ya̱ 1918, iin tiʼvi na̱ yiví na̱ kítáʼan xíʼin na̱ veʼe-ñu̱ʼu na̱ naní protestantes na̱ íyo ñuu Estados Unidos ni̱ka̱ʼa̱nña ña̱ Liga de Naciones kúúña “ña̱ política ña̱ kitáʼan xíʼin Reino Ndióxi̱ ñuyǐví yóʼo”. Ku̱i̱ya̱ 1965, na̱ níʼi yichi̱ nu̱ú na̱ budista, católico, na̱ hindú, na̱ judío, na̱ musulmán, na̱ ortodoxo xíʼin na̱ protestante ndakutáʼanna ñuu San Francisco ña̱ íyo Estados Unidos ña̱ va̱ʼa chindeétáʼanna xíʼin ña̱ ONU tasaá ka̱ʼa̱nna xíʼin Ndióxi̱ xa̱ʼa̱ña. Ku̱i̱ya̱ 1979, ta̱ papa Juan Pablo II ni̱ka̱ʼa̱nra ña̱ ONU “xíniñúʼu kooña ndiʼi tiempo ña̱ va̱ʼa vií ndatiinña ku̱a̱chi ta vií kundoo ndiʼi na̱ yiví”.

d Koto Artículo 1 ña̱ va̱xi nu̱ú Carta de las Naciones Unidas.