စိတ်ပျက်အားလျော့မှုကို အောင်နိုင်သည့်မျှော်လင့်ချက်

စိတ်ပျက်အားလျော့မှုကို Webster’s Ninth New Collegiate Dictionary အဘိဓာန်က “လုံးလုံးလျားလျားမျှော်လင့်ချက်ဆုံးရှုံးခြင်း” ဟုအဓိပ္ပာယ်ဖွင့်ဆိုထားသည်။ ရှင်းနေသည်မှာ စိတ်ပျက်အားလျော့မှုကိုကျွန်ုပ်တို့အောင်နိုင်ရန် မျှော်လင့်ချက်လိုအပ်သည်။

အကြောင်းမလှသဖြင့် လမ်းဘေးတွင်နေရသူတစ်ဦးသည် မျှော်လင့်ချက်သာရှိပါက လုံးလုံးလျားလျားစိတ်ပျက်အားလျော့မည်မဟုတ်ပါ။ မျှော်လင့်ချက်သည် စိတ်ဓာတ်ကျဆင်းသည့်ရောဂါလက္ခဏာရှိနေသူများကိုပင် ရဲစွမ်းသတ္တိနှင့်ခံနိုင်ရည်စွမ်းအားကိုပေးနိုင်သည်။ သို့သော် မျှော်လင့်ချက်သည် ယုံကြည်အားထားလောက်ရမည်။ ယင်းကဘာကိုဆိုလိုသနည်း။

မျှော်လင့်ချက်၏အခြေအမြစ်

ရှေးဘိုးဘေးအာဗြဟံ၏မယားစာရာအကြောင်းကိုစဉ်းစားကြည့်ပါ။ အသက် ၉၀ သို့ချဉ်းကပ်လာသည့်တိုင် သူမသည်မြုံနေပြီး ကလေးရရန်မျှော်လင့်ချက်မဲ့နေခဲ့ရသည်။ သို့သော် သူမ၏ခင်ပွန်းအာဗြဟံအသက် ၉၉ နှစ်ရောက်သောအခါ နှစ်ပေါင်းများစွာကြို၍ပေးထားသောကတိတော်ကို ဘုရားသခင်ပြန်ပေးတော်မူသည်။ အာဗြဟံသည် “မျိုးနွယ်” သို့မဟုတ် အမွေခံကိုအမှန်ရမည်။ ယင်းသည် အားထားလောက်သည့်ကတိတော်ဖြစ်ကြောင်း အာဗြဟံသိသည်။ အံ့သြဖွယ်နည်းဖြင့် ပျော်ရွှင်စရာအဖြစ်ကိုခံစားရပြီး သားဣဇာက်ကိုမွေးဖွားရသောအခါ စာရာမည်မျှပျော်ခဲ့မည်ကိုစဉ်းစားကြည့်ပါ။ (ကမ္ဘာဦး ၁၂:၂၊ ၃။ ၁၇:၁-၄၊ ၁၉။ ၂၁:၂) ဘုရားသခင်အပေါ်အာဗြဟံ၏ယုံစားမှုသည် မလွဲမှားခဲ့ပါ။ တမန်တော်ပေါလုကရှင်းပြသည်မှာ “ယုံမှားသောစိတ်နှင့်ကင်း၍ ဘုရားသခင်၏ကတိတော်ကိုတွေးတောခြင်းမရှိ၊ ယုံကြည်အားကြီးသဖြင့် ဘုရားသခင်ကိုချီးမွမ်း” သည်ဟူ၍ဖြစ်သည်။—ရောမ ၄:၂၀။

မိမိခေတ်ကခရစ်ယာန်ဖြစ်လာသောဂျူးလူမျိုးများထံ ပေါလုစာရေးရာတွင် သူတို့သည် ယေရှုအားဖြင့် ဘုရားသခင်၏ကယ်တင်ခြင်းကတိတော်ကို ယုံကြည်အားထားနိုင်သည့်အကြောင်းကောင်းနှစ်ရပ်ရှိကြောင်းပြောခဲ့သည်။ အာဗြဟံနှင့်သူ့အပေါင်းအပါများအား ဘုရားသခင်ကျိန်ဆိုသည့်ကတိတော်ကိုရည်ညွှန်း၍ ပေါလုဤသို့အခိုင်အမာပြောခဲ့သည်။ “လူတို့သည် မိမိထက်ကြီးမြတ်သောသူကိုတိုင်တည်၍ ကျိန်ဆိုလေ့ရှိကြ၏။ မြဲမြံစေတတ်သောအကျိန်သည် ငြင်းခုံခြင်းရှိသမျှကိုဖြေတတ်၏။ ထို့ကြောင့် ကတိတော်ကိုအမွေခံရသောသူတို့သည် ဘုရားသခင်အကြံအစည်တော်မဖောက်ပြန်နိုင်ကြောင်းကိုအတပ်သိစေခြင်းငှာ ဘုရားသခင်သည် အကျိန်အားဖြင့်အာမခံတော်မူ၏။ အကြောင်းမူကား၊ ဘုရားသခင်သည် မုသားမသုံးနိုင်သောအရာတည်းဟူသော၊ မဖောက်ပြန်မပြောင်းလဲနိုင်သောအရာနှစ်ပါးကိုအမှီပြု၍ ကိုယ်ရှေ့၌ထားသောမျှော်လင့်ရာကိုခိုလှုံခြင်းငှာ ပြေးသောငါတို့သည် သက်သာအားကြီးကြမည့်အကြောင်းတည်း။” (ဟေဗြဲ ၆:၁၆-၁၈) မှန်ပါသည်။ ဘုရားသခင့်ကတိတော်သည် မှန်ကန်ပြီးယုံကြည်အားထားလောက်သည်။ ယေဟောဝါသည် အနန္တတန်ခိုးရှင်ဖြစ်ပြီး မိမိ၏ကတိတော်များပြည့်စုံရန် အံ့ဖွယ်နည်းဖြင့်အာမခံနိုင်တော်မူသည်။

မျှော်လင့်ချက်—“မြဲမြံခိုင်ခံ့”

ပေါလုက ခရစ်ယာန်မျှော်လင့်ချက်သည် “မြဲမြံခိုင်ခံ့” ကြောင်းရေးသားခဲ့သည်။ (ဟေဗြဲ ၆:၁၉) မိမိယုံကြည်ခြင်းသည် မည်သည့်အပေါ်တွင်အမြစ်တွယ်နေကြောင်း ပေါလုသိခဲ့သည်။ “ထိုယုံကြည်ခြင်းသည် ကုလားကာအတွင်း၌ချ” ထားသည်ဟုသူရှင်းပြသည်။ ယင်းကဘာကိုဆိုလိုသနည်း။ ရှေးခေတ်ယေရုရှလင်မြို့ရှိဗိမာန်တော်ကို ပေါလုအထင်အရှားကိုးကားနေခြင်းဖြစ်သည်။ ယင်းတွင် အသန့်ရှင်းဆုံးအခန်းကို အခြားအခန်းများနှင့်သီးခြားဖြစ်အောင် ကုလားကာဖြင့်ပိုင်းခြားထားသည်။ (ထွက်မြောက်ရာ ၂၆:၃၁၊ ၃၃။ မဿဲ ၂၇:၅၁) မှန်ပါသည်။ ပကတိယေရုရှလင်ဗိမာန်တော်ဖျက်ဆီးခံရသည်မှာ ကြာပြီဖြစ်သည်။ ထို့ကြောင့် ယင်းအသန့်ရှင်းဆုံးအခန်းသည် ယနေ့မည်သည့်အရာနှင့်တူသနည်း။

ဘုရားသခင်ကိုယ်တော်တိုင်နန်းထိုင်ရာကောင်းကင်ပင်ဖြစ်သည်။ ယေရှုကောင်းကင်သို့တက်ကြွပြီးနောက်ပိုင်းအကြောင်းကို ပေါလုပြောသောအခါ ယင်းကိုသူဤသို့ရှင်းပြခဲ့သည်။ “မှန်သောသန့်ရှင်းရာဌာနတို့၏ပုံဖြစ်သော လူတို့လက်ဖြင့်လုပ်သော [ယေရုရှလင်ဗိမာန်တော်ရှိ] သန့်ရှင်းရာဌာနထဲသို့ ခရစ်တော်သည်မဝင်ဘဲ ငါတို့အတွက်ကြောင့်ဘုရားသခင်၏ရှေ့တော်၌ကိုယ်ကိုပြခြင်းငှာ ကောင်းကင်ကိုယ်ထဲသို့ဝင်တော်မူပြီ။” (ဟေဗြဲ ၉:၂၄) ထို့ကြောင့် စိတ်ပျက်အားလျော့မှုကိုတိုက်လှန်နိုင်ရန်ကူညီပေးသော ခရစ်ယာန်မျှော်လင့်ချက်သည် လူသားနိုင်ငံရေးသမားများအပေါ်မူမတည်ဘဲ ကောင်းကင်ဆိုင်ရာအစီအစဉ်ပေါ်တွင်မူတည်သည်။ ကျွန်ုပ်တို့အပြစ်များအတွက်ရွေးဖိုးအဖြစ်မိမိအသက်ကိုပေးပြီး ယခုကျွန်ုပ်တို့အတွက်မိမိကိုယ်ကို ဘုရားသခင်ရှေ့တော်၌ပြတော်မူသော၊ ဘုရားသခင်ခန့်အပ်တော်မူသည့်ယေရှုခရစ်ပေါ်တွင်မူတည်သည်။ (၁ ယောဟန် ၂:၁၊ ၂) ထို့ပြင် ဤမဂ္ဂဇင်းတွင် မကြာခဏဖော်ပြပါရှိသည့်အတိုင်း ထိုယေရှုသည်ပင်လျှင် ဘုရားသခင့်ကောင်းကင်နိုင်ငံတော်တွင် ဘုရားသခင်ခန့်အပ်သောဘုရင်အဖြစ်အုပ်ချုပ်ရန်ဖြစ်ပြီး ၁၉၁၄ ခုနှစ်ကတည်းက စတင်အုပ်ချုပ်တော်မူခဲ့သည်။ ဤကောင်းကင်နိုင်ငံတော်သည် မကြာမီအချိန်အတွင်း လူများစွာအားစိတ်ပျက်အားလျော့ဖွယ်ဖြစ်စေသည့်အရာများကို ဖယ်ရှားပစ်တော့မည်ဖြစ်သည်။

မျှော်လင့်ချက်—“စိုးလ်အတွက်ကျောက်ဆူး”

ယေရှုအားဖြင့်ဖြစ်သော ကယ်တင်ခြင်းမျှော်လင့်ချက်သည် ခိုင်မာသည့်အခြေအမြစ်ပေါ်တွင်ရှိကြောင်းကို မိမိစာဖတ်သူများသေချာစေရန် ပေါလုကထပ်တူပြုချက်ကိုအသုံးပြုခဲ့သည်။ “ဤမျှော်လင့်ချက်ကား ငါတို့စိုးလ်အတွက်ကျောက်ဆူးသဖွယ်ဖြစ်၏” ဟုသူရှင်းပြခဲ့သည်။—ဟေဗြဲ ၆:၁၉၊ ကဘ။

ကျောက်ဆူးကို ပေါလုကဲ့သို့ခရီးသွားသူများကောင်းစွာသိကြသည်။ ရှေးခေတ်ကကျောက်ဆူးများသည် ယခုခေတ်ကျောက်ဆူးများနှင့်အတော်ဆင်တူသည်။ သံဖြင့်ပြုလုပ်ထားလေ့ရှိပြီး ပင်လယ်ကြမ်းပြင်တွင်စွဲကပ်နေစေရန် အသွားနှင့်တူသောအစွန်းနှစ်ဖက်ပါရှိသည်။ စီအီး ၅၈ ခုနှစ်က ရောမသို့ခရီးသွားရာတွင် ပေါလုစီးသည့်သင်္ဘောသည် သောင်တင်မည့်ဘေးကိုရင်ဆိုင်နေရသည်။ သို့သော် သာ၍ရေတိမ်သောနေရာသို့သင်္ဘောရွေ့သွားသောအခါ သင်္ဘောသားများက “သင်္ဘောပဲ့မှကျောက်ဆူးလေးလက်ကိုချ” ခဲ့ကြသည်။ ထိုကျောက်ဆူးများကိုကျေးဇူးတင်ရမည်။ ယင်းတို့ကြောင့် သင်္ဘောသည် မုန်တိုင်းဒဏ်မှလွတ်မြောက်ခဲ့ရသည်။—တမန်တော် ၂၇:၂၉၊ ၃၉၊ ၄၀၊ ၄၄။

ထိုသို့ဆိုလျှင် စီးပွားရေးအခက်အခဲများ၊ ကာယ သို့မဟုတ် စိတ်ပိုင်းဆိုင်ရာဖျားနာမှု သို့မဟုတ် မည်သည့် “မုန်တိုင်း” မျိုးကိုမဆိုသင်ရင်ဆိုင်ရပါက သင့်မျှော်လင့်ချက်ကိုကျောက်ဆူးကဲ့သို့မြဲမြံခိုင်ခံ့စေခြင်းဖြင့် ယင်းတို့ကိုသင်ခံရပ်ကျော်လွှားနိုင်ရန် သင်ဘာပြုရမည်နည်း။ ဦးဆုံးအနေနှင့် ကျမ်းစာပါကတိတော်များသည် ယုံကြည်အားထားလောက်ကြောင်း သင့်ကိုယ်သင်စိတ်ချစေရမည်။ “ခပ်သိမ်းသောအရာကိုစုံစမ်း” ပါ။ (၁ သက်သာလောနိတ် ၅:၂၁) ဥပမာအားဖြင့် နောက်တစ်ခါယေဟောဝါသက်သေများ သင်နှင့်စကားလာပြောသောအခါ သူတို့ဘာပြောသည်ကိုနားထောင်ပါ။ သင်နေသည့်ဒေသသို့သူတို့သိပ်မရောက်ပါက နီးစပ်ရာခန်းမတွင်သူတို့ကိုရှာပါ။ သူတို့နှင့်ပေါင်းရန် သင်အတင်းအကြပ်ပြုခြင်းခံရမည်မဟုတ်ဘဲ သင်အဆင်ပြေမည့်အချိန်နှင့်နေရာတွင် အခမဲ့ကျမ်းစာလေ့လာမှုပြုလုပ်ရန် ခေါ်ဖိတ်ခြင်းခံရမည်သာဖြစ်သည်။

ထိုသို့လေ့လာမှုက ဘုရားသခင်သည် “ကိုယ်တော်ကိုရှာသောသူအား အကျိုးကိုပေးတော်မူ” ကြောင်း သင့်အားစိတ်ချစေသည်။ (ဟေဗြဲ ၁၁:၆) မကြာမီခရစ်တော်ယေရှု၏အုပ်ချုပ်မှုအားဖြင့် ဘုရားသခင့်နိုင်ငံတော်သည် လူများစွာအား စိတ်ပျက်အားလျော့မှုဖြစ်စေသည့် ဖောက်ပြန်မှုများနှင့်မညီမျှမှုများကို ဖယ်ရှားပစ်တော့မည်ဖြစ်ကြောင်း သင်သိလာရပေမည်။ ထိုနိုင်ငံတော်အောက်တွင် ဤကမ္ဘာမြေသည်ပရဒိသုပြန်ဖြစ်လာပြီး ဘုရားသခင်သည် မိမိကိုချစ်မြတ်နိုးသူများအား ထာဝရအသက်ပေးမည်ဖြစ်သည်။ (ဆာလံ ၃၇:၂၉။ ဗျာဒိတ် ၂၁:၄) မည်မျှဂုဏ်ကျက်သရေရှိသည့်မျှော်လင့်ချက်ပါတကား။

ဤမျှော်လင့်ချက်မှန်ကန်သည်ကို ကျမ်းစာအားဖြင့်စစ်ဆေးကြည့်ပါ။ ထို့နောက် ဘုရားသခင့်မိတ်ဆွေဖြစ်လာသောအာဗြဟံကဲ့သို့ ကိုယ်တော်နှင့်ရင်းနှီးသောဆက်ဆံရေးတိုးတက်အောင်တည်ဆောက်ပါ။ (ယာကုပ် ၂:၂၃) ယေဟောဝါသည် “ပတ္ထနာစကားကိုနားညောင်းတော်မူသောအရှင်” ဖြစ်သည့်အားလျော်စွာ သင့်စိုးရိမ်ပူပန်မှုများကို ကိုယ်တော်အားတင်ပြပါ။ စိတ်ရင်းမှန်နှင့်သင်ချဉ်းကပ်လျှင် သင့်ဆုတောင်းခြင်းသည် သင့်ဝန်ထုပ်များကိုပေါ့ပါးစေပြီး စိတ်ပျက်အားလျော့မှုကိုအောင်နိုင်စေလိမ့်မည်။ သင့်အားဖိစီးနှောင့်ယှက်နေသည့်အခြေအနေများပြောင်းလဲသွားရန်ကိုပင် ဘုရားသခင့်ဝိညာဉ်တော်က လမ်းဖွင့်ပေးပေလိမ့်မည်။—ဆာလံ ၅၅:၂၂။ ၆၅:၂။ ၁ ယောဟန် ၅:၁၄၊ ၁၅။

“အမြဲကိုင်စွဲထားလော့”

မိမိ၏ယုံကြည်သူတပည့်တော်ချင်းများအား “အရာခပ်သိမ်းကိုစုံစမ်း” ရန်အားပေးပြီးနောက် တမန်တော်ပေါလုက “ကောင်းသောအရာကိုအမြဲကိုင်စွဲကြလော့” ဟုဆက်ပြောခဲ့သည်။ (၁ သက်သာလောနိတ် ၅:၂၁) ဤသို့ပြုရန်နည်းတစ်နည်းမှာ ခရစ်ယာန်မျှော်လင့်ချက်ကို အမြဲကိုင်စွဲထားသောခရစ်ယာန်ချင်းတို့နှင့်ပေါင်းသင်းရန်ဖြစ်သည်။ ပညာရှိဘုရင်ရှောလမုန်ဤသို့သတိပေးခဲ့သည်။ “ပညာရှိတို့နှင့်ပေါင်းဖော်သောသူသည် ပညာရှိတတ်၏။ လူမိုက်တို့နှင့်ပေါင်းဖော်သောသူမူကား ပျက်စီးတတ်၏။” (သု၊ ၁၃:၂၀) ကောင်းသောအပေါင်းအသင်းကိုရှာတွေ့ရန် ငှဲ့ကွက်သည့်စိတ်ထား သို့မဟုတ် ရှက်ကိုးရှက်ကန်းဖြစ်ခြင်းမရှိပါစေနှင့်။ ဥပမာအားဖြင့် ယေဟောဝါသက်သေများအလယ်တွင် ယခင်ကမျှော်လင့်ချက်မဲ့ခဲ့သူများရှိသည်။ သို့သော် သူတို့၏ကျမ်းစာလေ့လာမှု၊ ယုံကြည်သူချင်းတို့နှင့်ပျော်ရွှင်စွာပေါင်းသင်းမှုများသည် ယေဟောဝါနှင့်သူတို့၏ဆက်ဆံရေးကိုခိုင်ခံ့စေပြီး ယင်းကသူတို့အား ယုံကြည်အားထားလောက်သောကျောက်ဆူးသဖွယ်မျှော်လင့်ချက်ကိုဖြစ်စေသည်။ ယင်းသည် စိတ်ပျက်အားလျော့မှုကို အမှန်အောင်နိုင်သလော။ သေချာပေါက်အောင်နိုင်ပါသည်။

ခင်ပွန်းသည်၏ရက်စက်ကြမ်းကြုတ်သည့်ဆက်ဆံမှုကြောင့် မျှော်လင့်ချက်ကင်းမဲ့လာသော အဲန်မရီး၏ကိစ္စကိုစဉ်းစားကြည့်ပါ။ သူမဤသို့ရှင်းပြသည်။ “ကိုယ့်ကိုယ်ကိုအဆုံးစီရင်ပစ်ဖို့ကျွန်မဆုံးဖြတ်လိုက်တယ်။ ဒါပေမယ့်၊ အကြောင်းတစ်ခုကြောင့် ဘုရားဆီမှာအရင်ဆုတောင်းမယ်လို့ကျွန်မဆုံးဖြတ်တယ်။ ‘ကျွန်မကိုဘာကြောင့်မကူညီနိုင်တာလဲ။ ကိုယ်တော့်ကိုကျွန်မမျှော်လင့်နေတာကြာလှပြီ၊ ဒါပေမယ့်မရခဲ့ဘူး’ လို့ကျွန်မပြောခဲ့တာကိုသတိရတယ်။ ဆုတောင်းချက်ကိုနိဂုံးချုပ်ပြီး ဘဝအတွက်ရည်ရွယ်ချက်မရှိဘူးလို့ကျွန်မတွေးမိတယ်။ ဒါကြောင့် ကျွန်မသေတာပဲကောင်းတယ်။ အဲဒီအချိန်အတွင်းမှာပဲ တံခါးခေါက်သံကိုကျွန်မကြားတယ်။ သွားမဖွင့်ဘူးလို့ကျွန်မဆုံးဖြတ်တယ်။ ဘယ်သူပဲဖြစ်ဖြစ် ကြာရင်ထွက်သွားလိမ့်မယ်လို့ကျွန်မထင်ခဲ့တယ်။

“တံခါးခေါက်သံကအဆက်မပြတ်မြည်နေတော့ ကျွန်မစိတ်အနှောင့်အယှက်ဖြစ်လာတယ်။ မြန်မြန်ပြန်ရင် ကျွန်မလုပ်ချင်တာမြန်မြန်လုပ်လို့ရမယ်လို့မျှော်လင့်ချက်နဲ့မျက်ရည်သုတ်လိုက်ပြီး တံခါးဝမှာဘယ်သူလဲဆိုတာသွားကြည့်လိုက်တယ်။ ဒါပေမယ့်” အဲန်မရီးဆက်ပြောသည်မှာ “ယေဟောဝါကိုကျေးဇူးတင်ရမယ်။ အဲဒီလိုဖြစ်မလာခဲ့ဘူး။ ဘာဖြစ်လို့လဲဆိုရင် ကျွန်မတံခါးကိုဖွင့်လိုက်တဲ့အခါမှာတော့ အမျိုးသမီးနှစ်ယောက်ရပ်နေတာကိုကျွန်မတွေ့တယ်။ ကျွန်မလည်းအရမ်းကိုတွေဝေသွားပြီး သူတို့ဘာပြောလို့ပြောမှန်းနားမလည်ခဲ့တာအမှန်ပဲ။ ဒါပေမယ့် ဘဝမှာရည်ရွယ်ချက်တစ်ခုရှိတဲ့အကြောင်းရှင်းပြတဲ့စာအုပ်တစ်အုပ် ကျွန်မကိုပေးသွားတယ်။ အဲဒါကတော့ ဘဝကိုကျွန်မ စိတ်ဝင်စားအောင်ပြန်လည်နှိုးဆွပေးဖို့ လိုနေတဲ့အရာပဲ။” သူမ၏ဧည့်သည်များက သူမနှင့်မှန်မှန်ကျမ်းစာလေ့လာမှုပြုရန် စီစဉ်ကြသည်။ အဲန်မရီးသည် ဘုရားသခင်၏မိတ်ဆွေတစ်ဦးဖြစ်လာရန် လေ့လာသိရှိခဲ့သည်။ ယင်းကသူမအား ဘဝတွင်ရည်ရွယ်ချက်ရှိစေသည်။ ယခုအခါသူမသည် အခြားသူများအား ဘုရားသခင်ကိုယုံစားရန်ကူညီပေးနေသည်။

စိတ်ပျက်အားလျော့မှုနှင့် ယင်းကြောင့်တွေ့ကြုံခံစားနေရသောအရာအားလုံးနိဂုံးချုပ်ရန် သင်မျှော်လင့်ပေမည်။ သို့ရာတွင် ‘နိုင်ငံတော်လာပါစေ။ အလိုတော်သည် ကောင်းကင်၌ပြည့်စုံသကဲ့သို့ မြေကြီးပေါ်၌လည်းပြည့်စုံပါစေ’ ဟုသင်ဆုတောင်းခဲ့ဖူးပါက စိတ်ထားမှန်ရှိလူသားများအား စိတ်ပျက်အားလျော့စေသည့်အရာများကိုဖယ်ရှားပစ်မည့် ခရစ်တော်အုပ်စိုးသည့်ဘုရားသခင့်နိုင်ငံတော်လာရန် သင်ဆုတောင်းနေခြင်းသာဖြစ်သည်။ (မဿဲ ၆:၁၀) သင့်ကိုယ်ပိုင်ကျမ်းစာလေ့လာမှုနှင့် အလားတူယုံကြည်စိတ်ချမှုရှိသူများနှင့်ပေါင်းသင်းခြင်းက ယေဟောဝါ၏နိုင်ငံတော်လာပြီး ကျွန်ုပ်တို့၏ကမ္ဘာကိုပရဒိသုဖြစ်စေမည်ဟူသောမျှော်လင့်ချက်ကို ခိုင်ခံ့စေသည်။ (၁ တိမောသေ၊ ၆:၁၂၊ ၁၉) ယင်းကား ဤမဂ္ဂဇင်းတိုင်းတွင်ကြေညာသည့် ဂုဏ်ကျက်သရေရှိမျှော်လင့်ချက်ပင်ဖြစ်သည်။ စိတ်ပျက်အားလျော့မှုကိုတိုက်လှန်ရန် ဤမျှော်လင့်ချက်ကို စိတ်ပါလက်ပါစွဲစွဲမြဲမြဲဆုပ်ကိုင်ထားပါ။ မှန်ပါသည်၊ မျှော်လင့်ချက်သည် “စိတ်ပျက်စရာမဖြစ်စေပါ။”—ရောမ ၅:၅