မှောက်မှားသောသွန်သင်သူများအပေါ် ယေဟောဝါ၏တရားစီရင်ချက်

“ယေရုရှလင်မြို့သားပရောဖက်တို့၌လည်း စက်ဆုပ်ရွံရှာဖွယ်သောသဘောကို ငါမြင်ပြီ။ သူတို့သည် မတရားသောမေထုန်၌မှီဝဲလျက်၊ မုသားကိုလည်းသုံးလျက် . . . ထိုသူရှိသမျှတို့သည် ငါ၌ သောဒုံမြို့သားကဲ့သို့လည်းကောင်း၊ ယေရုရှလင်မြို့သားတို့သည် ဂေါမောရမြို့သားကဲ့သို့လည်းကောင်း ဖြစ်ကြ၏။”—ယေရမိ ၂၃:၁၄။

၁ ဘုရားသခင်၏သွန်သင်ခြင်းတွင်ပါဝင်သူတစ်ဦးသည် အဘယ်ကြောင့် အလွန်ကြီးလေးသည့်တာဝန်ရရှိထားသနည်း။

ဘုရားသခင်၏သွန်သင်ခြင်းအစီအစဉ်တွင် ပါဝင်လုပ်ဆောင်သူမည်သူမဆို အလွန်ကြီးလေးသည့်တာဝန်ကို ရယူထားကြသည်။ ယာကုပ် ၃:၁ တွင် ဤသို့သတိပေးထားသည်– “ငါ့ညီအစ်ကိုတို့၊ ငါတို့သည် သာ၍ကျပ်တည်းသောစစ်ကြောစီရင်ခြင်းကိုခံရမည်ဟု သင်တို့သိ၍ အများသောဆရာမဖြစ်ကြနှင့်။” မှန်ပါသည်၊ သာမန်ခရစ်ယာန်များထက် ဘုရားသခင့်နှုတ်ကပါဌ်တော်သွန်သင်ပေးသူများသည် လက်ခံနိုင်ဖွယ်ကောင်းသည့် ထုချေရှင်းလင်းမှုပြုရန် သာ၍ကြီးလေးသည့်တာဝန်ရှိကြသည်။ ယင်းက မှောက်မှားသောဆရာအဖြစ် ထင်ရှားသူများအတွက် မည်သို့အဓိပ္ပာယ်ရှိသနည်း။ ယေရမိအချိန်ကအခြေအနေကို ကြည့်ကြစို့။ ယင်းက ယနေ့ဖြစ်ပျက်နေသည်များကို မည်သို့ ကြိုတင်အရိပ်ပြေးကြောင်း သုံးသပ်ကြည့်ကြမည်။

၂၊ ၃။ ယေရုရှလင်၏ မှောက်မှားသည့်သွန်သင်သူများနှင့်ပတ်သက်၍ မည်သည့်စီရင်ချက်ကို ယေရမိအားဖြင့်ယေဟောဝါဖော်ပြသနည်း။

^၂ ဘီ.စီ.အီး. ၆၄၇ ခုနှစ်၊ ယောရှိမင်းနန်းစံ ၁၃ နှစ်အချိန်က ယေရမိသည် ယေဟောဝါ၏ပရောဖက်အဖြစ်တာဝန်အပ်နှင်းခံခဲ့ရသည်။ ယေဟောဝါသည် ယုဒလူမျိုးအပေါ် စွဲချက်တင်စရာတစ်ခုရှိသောကြောင့် ယင်းကိုကြေညာရန် ယေရမိကိုစေလွှတ်ခဲ့သည်။ ယေရုရှလင်မြို့ရှိ မှောက်မှားသောပရောဖက်များ၊ သို့မဟုတ် သွန်သင်သူများသည် ဘုရားသခင့်အမြင်တွင် ‘စက်ဆုပ်ရွံရှာဖွယ်သောအရာများ’ ကိုပြုနေကြသည်။ သူတို့၏ဆိုးသွမ်းမှုသည် အလွန်ကြီးလေးလွန်းရကား ဘုရားသခင်သည် ယေရုရှလင်နှင့်ယုဒကို သောဒုံနှင့်ဂေါမောရမြို့များနှင့် ပုံခိုင်းခဲ့သည်။ ယေရမိကျမ်းအခန်းကြီး ၂၃ က ယင်းအကြောင်းကျွန်ုပ်တို့ကိုပြောပြသည်။ အခန်းငယ် ၁၄ ပြောသည်မှာ–

^၃ “ယေရုရှလင်မြို့သားပရောဖက်တို့၌လည်း စက်ဆုပ်ရွံရှာဖွယ်သောသဘောကို ငါမြင်ပြီ။ သူတို့သည် မတရားသောမေထုန်၌မှီဝဲလျက်၊ မုသားကိုလည်းသုံးလျက်၊ အဓမ္မပြုသောသူတို့ကိုအားပေးတတ်သဖြင့် အဘယ်သူမျှ မိမိပြုသောအဓမ္မအမှုကိုမစွန့်။ ထိုသူရှိသမျှတို့သည် ငါ၌ သောဒုံမြို့သားကဲ့သို့လည်းကောင်း၊ ယေရုရှလင်မြို့သားတို့သည် ဂေါမောရမြို့သားကဲ့သို့လည်းကောင်းဖြစ်ကြ၏။”

၄။ ယေရုရှလင်မြို့ရှိသွန်သင်သူများ၏ စာရိတ္တဆိုင်ရာဆိုးဝါးသည့်ပုံသက်သေများသည် ယနေ့ခရစ်ယာန်ဘောင်၌ မည်သို့အားဖြင့်တူညီသနည်း။

^၄ မှန်ပါသည်။ ထိုပရောဖက်များ၊ သို့မဟုတ် သွန်သင်သူများသည် စာရိတ္တဆိုင်ရာဆိုးဝါးသည့်ပုံသက်သေများကို ကိုယ်တိုင်တင်ပြကြပြီး လူများကိုလည်း အလားတူပြုရန်အားပေးကြသည်။ ယနေ့ခရစ်ယာန်ဘောင်၏အခြေအနေကို ကြည့်လိုက်ပါဦး! ယေရမိအချိန်ကလူများနှင့် တထေရာတည်းတူမနေပေလော။ ယနေ့ဓမ္မဆရာများသည် သူ့မယားပြစ်မှားသူများ၊ လိင်တူမေထုန်သမားများကို သူတို့နှင့် ရာထူးတူအဆင့်တွင် ဆက်လက်ထားရှိပြီး ချာ့ချ်လုပ်ငန်းများထမ်းဆောင်ခွင့်ကိုပင် ပေးထားကြသေးသည်။ ချာ့ချ်အသင်းသားများအဖြစ် စာရင်းဝင်သူအများအပြားလည်း စာရိတ္တပျက်ပြားနေကြသည်မှာ အံ့သြဖွယ်ရာလော။

၅။ ခရစ်ယာန်ဘောင်၏ အကျင့်ပျက်ပြားသည့်အခြေအနေသည် အဘယ်ကြောင့် သောဒုံနှင့်ဂေါမောရထက်သာသနည်း။

^၅ ယေရုရှလင်မြို့သားများကို သောဒုံနှင့်ဂေါမောရမြို့သားများနှင့် ယေဟောဝါပုံခိုင်းခဲ့သည်။ သို့သော် ခရစ်ယာန်ဘောင်၏အကျင့်ပျက်ပြားသည့်အခြေအနေသည် သောဒုံနှင့်ဂေါမောရထက် သာ၍ဆိုးရွားသည်။ မှန်ပါသည်၊ ၎င်းသည် ယေဟောဝါ၏အမြင်တွင် သာ၍ပင် ကဲ့ရဲ့ရှုတ်ချစရာဖြစ်သေးတော့သည်။ သူမ၏သွန်သင်သူများသည် ခရစ်ယာန် အကျင့်စာရိတ္တဆိုင်ရာဥပဒေသများကို မထီလေးစားလျစ်လျူရှုကြသည်။ ယင်းက မကောင်းမှုကိုပြုရန် နည်းပေါင်းစုံဖြင့် မသိမသာသွေးဆောင်မှုများရှိသည့် စာရိတ္တကျဆင်းသောအသိုင်းအဝိုင်းတစ်ခုကို ဖြစ်ပေါ်စေသည်။ သို့နှင့် ဆိုးသွမ်းမှုများသည် သမားရိုးကျပင်ဖြစ်သည်ဟုယူမှတ်ခံရသည့်အထိ ထိုသို့သောစာရိတ္တအခြေအနေသည် နေရာအနှံ့ဖြစ်ပေါ်နေသည်။

“မုသားကိုလည်းသုံး”

၆။ ယေရုရှလင်မြို့ရှိပရောဖက်များ၏ ဆိုးသွမ်းမှုနှင့်ပတ်သက်၍ ယေရမိဘာပြောခဲ့သနည်း။

^၆ ယေရုရှလင်မြို့ရှိပရောဖက်များအကြောင်း အခန်းငယ် ၁၄ မည်သို့ပြောသည်ကို သတိပြုပါ။ သူတို့သည် “မုသားကိုလည်းသုံး” ကြသည်။ အခန်းငယ် ၁၅ ၏နောက်ဆုံးအပိုင်းက ဤသို့ဆိုသည်– “ယေရုရှလင်မြို့သားပရောဖက်တို့သည် မူလအမြစ်ဖြစ်၍ အဓမ္မအမှုသည် တစ်ပြည်လုံးကိုနှံ့ပြားလေပြီ။” ထို့နောက် အခန်းငယ် ၁၆ ဤသို့ဆက်ပြောသည်– “ကောင်းကင်ဗိုလ်ခြေအရှင်ထာဝရဘုရားမိန့်တော်မူသည်ကား ပရောဖက်ပြု၍သင်တို့အားဟောတတ်သော ဆရာတို့၏စကားကို နားမထောင်ကြနှင့်။ သူတို့သည် သင်တို့အား အချည်းနှီးဟောတတ်ကြ၏။ ထာဝရဘုရား၏နှုတ်တော်ထွက်သို့မလိုက်၊ ကိုယ်အလိုအလျောက် ရူပါရုံကိုမြင်သည့်အတိုင်း ဟောပြောတတ်ကြ၏။”

၇၊ ၈။ အဘယ်ကြောင့် ခရစ်ယာန်ဘောင်ဓမ္မဆရာများသည် ယေရုရှလင်မြို့ရှိ မှောက်မှားသောပရောဖက်များနှင့်တူပြီး ယင်းက ချာ့ချ်တက်သူများကို မည်သို့အကျိုးသက်ရောက်သနည်း။

^၇ ယေရုရှလင်မြို့ရှိမှောက်မှားသောပရောဖက်များနည်းတူ ခရစ်ယာန်ဘောင်ဓမ္မဆရာများသည် မုသားသုံးလျက် ဘုရားသခင့်နှုတ်ကပါဌ်တော်တွင်မတွေ့ရသော သွန်သင်ချက်များ၊ ဖောက်ပြန်သည့်အယူဝါဒများကို ပျံ့နှံ့စေကြသည်။ ဤမှားယွင်းသောသွန်သင်ချက်အချို့ကား အဘယ်နည်း။ စိုးလ်မသေနိုင်သည့်အဖြစ်၊ သုံးပါးပေါင်းတစ်ဆူ၊ ငရဲကလေး၊ လူများကိုထာဝရညှဉ်းဆဲရန်မီးငရဲ တို့ဖြစ်ကြသည်။ လူများနားထောင်လိုသည့်အရာများကို ဟောပြောခြင်းအားဖြင့်လည်း နားထောင်သူများကို နားယားပြေစေကြသည်။ ခရစ်ယာန်ဘောင်သည် ဘုရားသခင်၏ငြိမ်သက်ခြင်းရှိသောကြောင့် ကပ်ဘေးကိုမရင်ဆိုင်ရနိုင်ဟု ထပ်ခါထပ်ခါသံကောင်းဟစ်ကြ၏။ သို့သော် ဓမ္မဆရာများသည် “ကိုယ်အလိုအလျောက် ရူပါရုံကိုမြင်သည့်အတိုင်း ဟောပြော” ကြခြင်းဖြစ်သည်။ ယင်းသည် မုသားများဖြစ်သည်။ ထိုသို့သောမုသားများကို ယုံကြည်သူတို့သည် ဝိညာဏအဆိပ်သင့်ခြင်းကို ခံရကြသည်။ သူတို့သည် ပျက်စီးခြင်းသို့ရောက်ရန် လှည့်ဖြားခံရခြင်းပင်!

^၈ အခန်းငယ် ၂၁ တွင် ဤမှောက်မှားသောသွန်သင်သူများအား ယေဟောဝါပြောသည့်စကားကို စဉ်းစားကြည့်ပါ– “ငါမစေလွှတ်ဘဲ ထိုပရောဖက်တို့သည် ပြေးကြပြီ။ ငါမမှာထားဘဲ သူတို့သည် ကိုယ်အလိုအလျောက်ဟောပြောကြပြီ။” ထို့ကြောင့် ယနေ့ဓမ္မဆရာများသည် ဘုရားသခင်၏စေလွှတ်ခြင်းမခံရသကဲ့သို့ ကိုယ်တော့်သမ္မာတရားကိုလည်း သူတို့မသွန်သင်ကြပါ။ ရလဒ်ကားအဘယ်နည်း။ ချာ့ချ်တက်သူများအား သူတို့၏ဓမ္မအမှုဆောင်များက လောကီအတွေးအခေါ်များကိုကျွေးကြသောကြောင့် ကြောက်ခမန်းလိလိကျမ်းပညာမတတ်ခြင်း သူတို့အထဲတွင်ပေါ်ပေါက်လာသည်။

၉၊ ၁၀။ (က) ယေရုရှလင်၏မှောက်မှားသောသွန်သင်သူများသည် မည်ကဲ့သို့သောအိပ်မက်များရှိကြသနည်း။ (ခ) ခရစ်ယာန်ဘောင်ဓမ္မဆရာများ မည်သည့်နည်းဖြင့် အလားတူ “မှားသောအိပ်မက်များ” သွန်သင်လာခဲ့ကြပြီနည်း။

^၉ ထို့အပြင် ယနေ့ဓမ္မဆရာများသည် မှောက်မှားသောမျှော်လင့်ချက်များကို ကြေညာကြသည်။ အခန်းငယ် ၂၅ ကိုမှတ်သားပါ– “ငါသည်အိပ်မက်မြင်ပြီ၊ အိပ်မက်မြင်ပြီဟု ငါ့နာမကိုအမှီပြု၍ မုသားဖြင့်ဟောပြောသော ပရောဖက်တို့၏စကားကို ငါကြားပြီ။” မည်ကဲ့သို့သောအိပ်မက်များနည်း။ အခန်းငယ် ၃၂ ကဖော်ပြသည်– “မှားသောအိပ်မက်ကိုဟောပြော၍ မုသားစကားနှင့်အချည်းနှီးစကားအားဖြင့် ငါ၏လူမျိုးကိုမှားယွင်းစေသောပရောဖက်တို့ကို ငါသည်ဆန့်ကျင်ဘက်ပြုမည်။ သူတို့ကိုငါမစေလွှတ်၊ မမှာထားသောကြောင့် ဤလူမျိုးသည် ကျေးဇူးမရှိဟု ထာဝရဘုရားမိန့်တော်မူ၏။”

^၁၀ မည်သည့်မှားသောအိပ်မက်များ၊ သို့မဟုတ် မျှော်လင့်ချက်များကို ဓမ္မဆရာများသွန်သင်ခဲ့ကြပြီနည်း။ ငြိမ်းချမ်းရေးနှင့်လုံခြုံမှုအတွက် ယနေ့လူသားများ၏ တစ်ခုတည်းသောမျှော်လင့်ချက်မှာ ယူအဲန်ဖြစ်ချေပြီ။ မကြာမီနှစ်များအတွင်းက ယူအဲန်ကို “သင့်တင့်ညီညွတ်ခြင်းနှင့်ငြိမ်းချမ်းရေးအတွက် နောက်ဆုံးမျှော်လင့်ချက်”၊ “ငြိမ်းချမ်းရေးနှင့်တရားမျှတမှုအတွက် တရားရုံးချုပ်”၊ “ကမ္ဘာ့ငြိမ်းချမ်းရေးအတွက် လက်ရှိဘဝနှင့်ဆိုင်သောအဓိကမျှော်လင့်ချက်” ဟူ၍ခေါ်ကြသည်။ လှည့်စားမှုကြီးပါတကား! လူသားများ၏တစ်ခုတည်းသောမျှော်လင့်ရာမှာ ဘုရားသခင့်နိုင်ငံတော်ဖြစ်သည်။ သို့သော် ယေရှု၏ဟောပြောခြင်းတွင် အဓိကအကြောင်းအရာဖြစ်သည့် ကောင်းကင်အစိုးရနှင့်ပတ်သက်သောအမှန်တရားကို ဓမ္မဆရာများ မဟောပြော၊ မသွန်သင်ကြပါ။

၁၁။ (က) ယေရုရှလင်၏မှောက်မှားသောသွန်သင်သူများသည် မည်သည့်နည်းဖြင့် ဘုရားသခင့်ကိုယ်ပိုင်နာမတော်အပေါ် ဆိုးကျိုးသက်ရောက်စေကြသနည်း။ (ခ) ယေရမိအတန်းအစားနှင့်မတူဘဲ ယနေ့ မှောက်မှားသောဘာသာရေးသွန်သင်သူများသည် မြင့်မြတ်သောနာမတော်နှင့်ပတ်သက်၍ မည်သို့ ပြုလာခဲ့ကြပြီနည်း။

^၁၁ အခန်းငယ် ၂၇ က ထပ်၍ဤသို့ပြောသည်– “ဘိုးဘေးတို့သည် ဗာလကြောင့် ငါ့နာမကိုမေ့လျော့သကဲ့သို့ သူတို့သည် အိမ်နီးချင်းတစ်ယောက်ကိုတစ်ယောက် ပြောတတ်သောအိပ်မက်များအားဖြင့် ငါ၏လူမျိုးသည်ငါ့နာမကိုမေ့လျော့စေမည်ဟု အကြံရှိကြသည်တကား။” ယေရုရှလင်မြို့ရှိပရောဖက်များသည် ဘုရားသခင်၏နာမတော်ကို လူများမေ့လျော့အောင်ပြုကြသည်။ ယနေ့မှောက်မှားသောဆရာများသည် အလားတူပြုမနေကြပေလော။ ပိုဆိုးသည်ကား ယေဟောဝါတည်းဟူသော ဘုရားသခင့်နာမတော်ကို ထိမ်ဝှက်ထားကြခြင်းဖြစ်သည်။ နာမတော်ကိုအသုံးပြုရန်မလိုဟု သူတို့သွန်သင်ကြပြီး သူတို့၏ဘာသာပြန်ကျမ်းများမှ ယင်းကိုနုတ်ပယ်ပစ်ကြသည်။ ဘုရားသခင်၏နာမတော်သည် ယေဟောဝါဖြစ်သည်ဟု သွန်သင်ပေးသူမည်သူမဆိုအား သူတို့အပြင်းအထန်ဆန့်ကျင်ကြသည်။ သို့သော် ဝိညာဉ်တော်ဘိသိက်ခံအကြွင်းအကျန်ခရစ်ယာန်များဖြစ်သည့် ယေရမိအတန်းအစားသည် သူတို့၏အပေါင်းအဖော်များနှင့်အတူ ယေရှုပြုခဲ့သည့်အတိုင်း ပြုကြသည်။ သူတို့သည် လူသန်းပေါင်းများစွာတို့အား ဘုရားသခင့်နာမတော်ကို သွန်သင်ပေးလာခဲ့ကြပြီ။

သူတို့အားအပြစ်တင်ထိုက်သည့်အချက်ကို ဖော်ထုတ်ခြင်း

၁၂။ (က) အဘယ်ကြောင့် မှောက်မှားသောဘာသာရေးသွန်သင်သူများအပေါ် ကြီးလေးသောသွေးအပြစ်ကျရောက်သနည်း။ (ခ) ကမ္ဘာစစ်ကြီးနှစ်ခုတွင် ဓမ္မဆရာများသည် မည်သည့်အခန်းကဏ္ဍတွင်ပါဝင်ခဲ့ကြသနည်း။

^၁၂ ဓမ္မဆရာများသည် မိမိတို့သိုးစုများကို ပျက်စီးခြင်းလမ်းကျယ်သို့ပို့ဆောင်ပေးနေသည့် မှောက်မှားသောသွန်သင်သူများဖြစ်ကြောင်း ယေရမိအတန်းအစားက ကြိမ်ဖန်တလဲဖော်ထုတ်ခဲ့ပြီ။ မှန်ပါသည်၊ ထိုအိပ်မက်သမားများသည် ဘုရားသခင်၏ဆန့်ကျင်တရားစီရင်ခြင်းနှင့် အဘယ်ကြောင့်ထိုက်တန်ကြောင်း အကြွင်းအကျန်အတန်းအစားက ရှင်းလင်းဖော်ပြခဲ့ပြီ။ ဥပမာအနေနှင့် “မြေကြီးပေါ်မှာကွပ်မျက်သောသူအပေါင်း” တို့၏အသွေးကို မဟာဗာဗုလုန်တွင်တွေ့ မြင်ရကြောင်း ဖော်ပြသည့် ဗျာဒိတ် ၁၈:၂၄ ကို ယေဟောဝါ၏ကျေးကျွန်များ မကြာခဏကိုးကားတတ်ကြသည်။ ဘာသာရေးကွဲပြားမှုကြောင့် တိုက်ခိုက်ခဲ့သောစစ်ပွဲအားလုံးကို စဉ်းစားကြည့်ပါ။ ဗာဗုလုန်ဘာသာရေးသွန်သင်သူများအပေါ် ကျရောက်သည့်သွေးအပြစ်သည် မည်မျှကြီးလေးလှပါသည်တကား! သူတို့၏သွန်သင်ချက်များသည် ကွဲပြားမှုကိုဖြစ်စေခဲ့ပြီး ယုံကြည်မှုနှင့်လူမျိုးခြားနားသူများစပ်ကြား မုန်းတီးမှုကိုသာ တိုးပွားစေခဲ့ပြီ။ ပထမကမ္ဘာစစ်နှင့်ပတ်သက်၍ တရားဟောဆရာများလက်နက်တင်ပြ စာအုပ်ကပြောသည်– “ဓမ္မဆရာများသည် စစ်ပွဲ၏ပြင်းပြသော ဝိညာဏအရေးပါမှုနှင့် လှုံ့ဆော်မှုကိုတင်ပြခဲ့သည် . . . ဤနည်းဖြင့် ချာ့ချ်သည် စစ်ပွဲများတွင် ထိရောက်စွာပါဝင်ပတ်သက်လာခဲ့သည်။” ဒုတိယကမ္ဘာစစ်တွင်လည်း အလားတူဖြစ်ခဲ့သည်။ ဓမ္မဆရာများသည် စစ်ပွဲတွင်ပါဝင်သောနိုင်ငံများအား အပြည့်အဝအားပေးထောက်ခံပြီး သူတို့၏စစ်တပ်များကို ကောင်းချီးပေးခဲ့ကြသည်။ ဘာသာတူချင်းတစ်ဦးကိုတစ်ဦးသတ်ဖြတ်သည့် ကမ္ဘာစစ်ကြီးနှစ်ခုသည် ခရစ်ယာန်ဘောင်မှစတင်ခဲ့သည်။ ခရစ်ယာန်ဘောင်အတွင်းရှိ လူသာမန်များနှင့် ဘာသာရေးထက်သန်သူများသည် ယနေ့အချိန်အထိ သွေးသွန်းခြင်းကို ပြုမြဲပြုလာခဲ့ကြသည်။ သူတို့၏မှောက်မှားသည့်သွန်သင်ချက်များမှ ထိတ်လန့်ဖွယ်ရလဒ်ပါတကား!

၁၃။ ခရစ်ယာန်ဘောင်၏ဓမ္မဆရာများသည် ယေဟောဝါနှင့်မည်သည့်ဆက်ဆံရေးမျှမရှိကြောင်း ယေရမိ ၂၃:၂၂ ကမည်သို့ဖော်ပြသနည်း။

^၁၃ ယေရမိအခန်းကြီး ၂၃၊ အခန်းငယ် ၂၂ (ကဘ) ကိုကျေးဇူးပြု၍မှတ်သားပါ– “ထိုသူတို့သည် ငါ၏ရင်းနှီးကျွမ်းဝင်သောအုပ်စုတွင် ရပ်တည်လျှင် ငါ့စကားကိုငါ၏လူမျိုးအားကြားပြောပြီး မိမိတို့၏ဆိုးသောလမ်းမှလည်းကောင်း၊ ဆိုးသောအပြုအမူများမှလည်းကောင်း လွဲသွားစေမည်။” ခရစ်ယာန်ဘောင်ဘာသာရေးပရောဖက်များသာ ယေဟောဝါ၏ရင်းနှီးကျွမ်းဝင်သောအုပ်စုတွင် ပါဝင်ခဲ့လျှင်၊ သစ္စာနှင့်သတိပညာရှိကျေးကျွန်ကဲ့သို့ ကိုယ်တော်နှင့်နီးကပ်သည့်ဆက်ဆံရေးရှိခဲ့လျှင် သူတို့လည်း ဘုရားသခင့်စံချိန်များနှင့်အညီ အသက်ရှင်ကြလိမ့်မည်။ ခရစ်ယာန်ဘောင်ရှိလူများအားလည်း ဘုရားသခင့်ကိုယ်ပိုင်နှုတ်ကပါဌ်တော်ကို ကြားသိစေကြမည်ဖြစ်သည်။ ယင်းသို့ ပြုမည့်အစား ခေတ်သစ်မှောက်မှားသောဆရာများသည် သူတို့၏နောက်လိုက်များအား ဘုရားသခင့်မဟာရန်သူကြီးစာတန်မာရ်နတ်၏ မျက်ကန်းကျေးကျွန်များဖြစ်စေခဲ့ကြပြီ။

၁၄။ ၁၉၅၈ ခုနှစ်က ခရစ်ယာန်ဘောင်ဓမ္မဆရာများအား ပြင်းထန်ထိရောက်စွာပြစ်တင်ရှုတ်ချသည့် မည်သည့်ဖော်ထုတ်မှုပေါ်ထွက်လာသနည်း။

^၁၄ ယေရမိအတန်းအစားက ဓမ္မဆရာများ၏အဖြစ်မှန်ကိုဖော်ထုတ်ခြင်းသည် အလွန်ပြင်းထန်သည်။ ဥပမာ၊ ၁၉၅၈ ခုနှစ်က နယူးယောက်မြို့တွင် ယေဟောဝါသက်သေများကျင်းပခဲ့သည့် မြင့်မြတ်သောအလိုတော် အပြည်ပြည်ဆိုင်ရာစည်းဝေးပွဲကြီးတွင် ကင်းမျှော်စင်အသင်း၏ ဒုတိယဥက္ကဋ္ဌ၏ဖော်ပြချက်မှ ကောက်နုတ်ချက်အချို့မှာ ဤသို့ ဖြစ်သည်– “အားလုံးသော ရာဇဝတ်မှု၊ သက်ငယ်ပြစ်မှု၊ မုန်းတီးမှု၊ ခိုက်ရန်ဖြစ်မှု၊ ငဲ့ကွက်မှု . . . နှင့် အဓိပ္ပာယ်မဲ့ရှုပ်ထွေးမှုများ၏ အခြေအမြစ်ကျသည့်အကြောင်းရင်းမှာ လူသားတို့၏ မမြင်နိုင်သောရန်သူစာတန်မာရ်နတ် ကြိုးကိုင်ထားသည့် မှားယွင်းသောဘာသာ၊ အတုအယောင်ဘာသာဖြစ်သည်ဟု အဓိပ္ပာယ်ရှုပ်ထွေးခြင်း၊ သို့မဟုတ် ယုံမှားသံသယရှိခြင်းလုံးဝမပါဘဲ ကျွန်ုပ်တို့ကြေညာသည်။ ကမ္ဘာ့အခြေအနေနှင့်ပတ်သက်၍ တာဝန်အရှိဆုံးလူများမှာ ဘာသာရေးဆိုင်ရာ ညွှန်ကြားပေးသူများနှင့်ဦးဆောင်သူများ ဖြစ်ကြသည်; ယင်းတို့အတွက် အပြစ်တင်ဖွယ်အကောင်းဆုံးသူများမှာ ခရစ်ယာန်ဘောင်ဓမ္မဆရာများဖြစ်ကြသည် . . . ပထမကမ္ဘာစစ်နောက်ပိုင်းအချိန်တစ်လျှောက်လုံး ခရစ်ယာန်ဘောင်သည် ဘုရားသခင်ရှေ့တွင် ယေရမိခေတ်ဣသရေလလူမျိုးများ၏ အနေအထားအတိုင်း ရပ်တည်လာခဲ့သည်။ မှန်ပါသည်၊ ခရစ်ယာန်ဘောင်သည် ယေရမိမြင်ခဲ့သည့်ယေရုရှလင်ပျက်စီးခြင်းထက် သာ၍ကြောက်မက်ဖွယ်ကောင်းပြီး အဖျက်စွမ်းအားကြီးမားသည့် ပျက်စီးခြင်းသို့ ဦးတည်နေသည်။”

မှောက်မှားသောသွန်သင်သူများအပေါ်တရားစီရင်ချက်

၁၅။ ဓမ္မဆရာများသည် ငြိမ်းချမ်းရေးနှင့်ပတ်သက်သော မည်သည့်ပရောဖက်ပြုချက်များပြုကြသနည်း။ ယင်းတို့ပြည့်စုံမည်လော။

^၁၅ ဤသတိပေးချက်များကြားမှပင် ထိုအချိန်ကတည်းက ဓမ္မဆရာများမည်သို့ကျင့်ကြံလာခဲ့ကြပြီနည်း။ အခန်းငယ် ၁၇ ပြောသကဲ့သို့သာဖြစ်သည်– “ထာဝရဘုရား၏နှုတ်ကပါဌ်တော်ကို မထီမဲ့မြင်ပြုသောသူတို့အား သင်တို့သည် ငြိမ်ဝပ်ခြင်းရှိကြလိမ့်မည်ဟု ဟောတတ်ကြ၏။ မိမိတို့စိတ်နှလုံးခိုင်မာခြင်းသဘောသို့ လိုက်သောသူတို့အား သင်တို့သည် ဘေးဥပဒ်နှင့်မတွေ့ရကြဟု ဟောတတ်ကြ၏။” ယင်းသို့မှန်ပါသလော။ မမှန်ပါ။ ယေဟောဝါသည် ဓမ္မဆရာများ၏ မှောက်မှားသည့်ပရောဖက်ပြုချက်များကို ဖော်ထုတ်မည်။ မိမိနာမဖြင့်သူတို့ပြောသောအရာများကို ကိုယ်တော်ပြည့်စုံစေမည်မဟုတ်။ မည်သို့ဆိုစေ၊ ဘုရားသခင်၏ငြိမ်သက်ခြင်းရှိရန်နှင့်ပတ်သက်၍ ဓမ္မဆရာတို့၏အာမခံချက်အတုအယောင်သည် အလွန်လှည့်ဖြားမှုပါတကား!

၁၆။ (က) ဤလောက၏စာရိတ္တအခြေအနေမည်သို့ရှိပြီး ယင်းအတွက်တာဝန်ရှိသူများတွင် မည်သူများပါဝင်သနည်း။ (ခ) ဤလောက၏ စာရိတ္တဆိုင်ရာယုတ်ညံ့သောအမြင်များနှင့်ပတ်သက်၍ ယေရမိအတန်းအစားက ဘာပြုလုပ်နေသနည်း။

^၁၆ ‘ဘာ၊ ကျွန်တော်က ဓမ္မဆရာတွေရဲ့မှားယွင်းတဲ့သွန်သင်မှုများနဲ့ လှည့်ဖြားခံရတယ်ဟုတ်လား။ လုံးဝမဟုတ်ဘူး’ ဟု သင်ထင်နေသလော။ သိပ်လည်းမသေချာလွန်းပါနှင့်! ဓမ္မဆရာများ၏ မှောက်မှားသောသွန်သင်ချက်များသည် တစ်စတစ်စနှင့်ဆိုးဝါးသော၊ ကြောက်မက်ဖွယ်ကောင်းသော စာရိတ္တအခြေအနေကို ဖြစ်စေခဲ့ပြီ။ သူတို့၏စည်းလွတ်ဝါးလွတ်သွန်သင်ချက်များသည် မည်မျှစာရိတ္တယိုယွင်းသည့်အရာဖြစ်ပါစေ ထိုအရာအားလုံးနီးပါးကို တော်မှန်သည်ဟု သွန်သင်ကြသည်။ ဤစာရိတ္တယိုယွင်းကျဆင်းမှုအခြေအနေသည် ရုပ်ရှင်၊ တီဗွီ၊ မဂ္ဂဇင်းများနှင့် တေးဂီတများစသည့် အပန်းဖြေမှုနယ်ပယ်များအားလုံးသို့ ပျံ့နှံ့ရောက်ရှိနေသည်။ ဤယိုယွင်းကျဆင်းနေသော ပရိယာယ်ကြွယ်ဝစွာဆွဲဆောင်မှုရှိသည့် စာရိတ္တအခြေအနေဩဇာအောက်သို့ မကျဆင်းသွားရန် ကျွန်ုပ်တို့သည် ကြပ်တည်းစွာသတိထားကြရမည်။ ငယ်ရွယ်သူများသည် ယုတ်ညံ့စေသောဗွီဒီယိုများနှင့် တေးဂီတများ၏ ကျော့မိခြင်းကိုခံရနိုင်သည်။ ယနေ့လူများတွင်ရှိသော ဘာမဆိုရပါတယ်ဟူသည့်သဘောထားသည် ဓမ္မဆရာများ၏ မှောက်မှားသောသွန်သင်ချက်များနှင့် ဘုရားသခင်၏ဖြောင့်မတ်သောစံချိန် လက်ကိုင်ပြုရန်ပျက်ကွက်မှုများ၏ တိုက်ရိုက်အကျိုးဆက်ဖြစ်သည်။ ယေရမိအတန်းအစားသည် ဤစာရိတ္တပျက်ပြားသောအမြင်များကို တိုက်လှန်နေလျက်ရှိပြီး ခရစ်ယာန်ဘောင်အပေါ်လွှမ်းမိုးနေသော ဤဆိုးသွမ်းမှုကို ဘုရားသခင့်ကျေးကျွန်များငြင်းဆန်နိုင်ရန် အကူအညီပေးလျက်ရှိသည်။

၁၇။ (က) ယေရမိ၏အဆိုအရ ဆိုးညစ်သည့်ယေရုရှလင်မြို့ပေါ်သို့ မည်သည့်တရားစီရင်ချက်ကျရောက်မည်နည်း။ (ခ) မကြာမီ ခရစ်ယာန်ဘောင်ဘာဖြစ်မည်နည်း။

^၁၇ ခရစ်ယာန်ဘောင်၏ မှောက်မှားသောသွန်သင်သူများသည် ကြီးမြတ်သောတရားသူကြီးယေဟောဝါထံမှ မည်သည့်စီရင်ချက်ကိုခံရမည်နည်း။ အခန်းငယ် ၁၉၊ ၂၀၊ ၃၉ နှင့် ၄၀ တို့က အဖြေပေးသည်– “ထာဝရဘုရား၏လေပွေတော်သည် ပူသောအရှိန်နှင့်ထွက်၏။ ပြင်းစွာသောလေပွေဖြစ်၍ မတရားသောသူတို့ခေါင်းပေါ်မှာ ပြင်းစွာတိုက်လိမ့်မည်။ ထာဝရဘုရားသည် လက်စသတ်၍ အကြံအစည်တော်ကိုပြည့်စုံစေတော်မမူမီ အမျက်တော်မငြိမ်းရ။ . . . ငါသည် သင်တို့ကိုလည်းကောင်း၊ သင်တို့နှင့်ဘိုးဘေးတို့အား ငါပေးသောမြို့ကိုလည်းကောင်း ငါ့ထံမှ အကုန်အစင်ကျုံး၍ပစ်လိုက်မည်။ အစဉ်အမြဲမမေ့လျော့နိုင်သော ထာဝရကဲ့ရဲ့ခြင်းနှင့်အရှက်ကွဲခြင်းကို သင်တို့အပေါ်မှာသက်ရောက်စေမည်။” ထိုအရာအားလုံး ယေရုရှလင်မြို့နှင့် ယင်း၏ဗိမာန်တော်အပေါ်သို့ ကျရောက်ခဲ့ပြီး ဆိုးညစ်သောခရစ်ယာန်ဘောင်အပေါ်သို့လည်း အလားတူဘေးဒုက္ခကြီး မကြာမီကျရောက်တော့မည်ဖြစ်သည်။

“ယေဟောဝါ၏ဝန်ထုပ်” ကိုကြေညာခြင်း

၁၈၊ ၁၉။ ယုဒလူမျိုးအား အဘယ် “ယေဟောဝါ၏ဝန်ထုပ်” ကို ယေရမိကြေညာပြီး ယင်းတွင် မည်သည့်အရာပါဝင်သနည်း။

^၁၈ ထို့ကြောင့် ယေရမိအတန်းအစားနှင့် သူ့အပေါင်းအဖော်များ၏တာဝန်ကား အဘယ်နည်း။ အခန်းငယ် ၃၃ [ကဘ] က ကျွန်ုပ်တို့အား ဤသို့ပြောပြသည်– “ဤလူများ၊ သို့မဟုတ် ပရောဖက်၊ သို့မဟုတ် ယဇ်ပုရောဟိတ်က ‘ယေဟောဝါ၏ဝန်ထုပ်ကားအဘယ်နည်း’ ဟုသင့်ကိုမေးလျှင် သူတို့အားသင်ပြောရမည်မှာ ‘“အသင်လူများသည်—ဝန်ထုပ်ကြီးပါတကား! သင်တို့ကိုငါမုချစွန့်ပစ်မည်” ဟုယေဟောဝါမိန့်တော်မူသည်’ ဟူ၍ဖြစ်သည်။”

^၁၉ “ဝန်ထုပ်” ဟူသောဟေဗြဲစကားလုံးသည် အဓိပ္ပာယ်နှစ်မျိုးရှိသည်။ ယင်းသည် အလွန်အရေးကြီးသောဘုရားသခင့်ကြေညာချက် သို့မဟုတ် တစ်ဦးတစ်ယောက်အား ဝန်လေး၍ပင်ပန်းစေသောအရာကို ရည်ညွှန်းနိုင်သည်။ ဤတွင် “ယေဟောဝါ၏ဝန်ထုပ်” ဟူသောအသုံးအနှုန်းသည် အလွန်အရေးကြီးသောပရောဖက်ပြုချက်—ယေရုရှလင်မြို့သည် ပျက်စီးရန်စီရင်ခံရသည်ဟူသောကြေညာချက်ဖြစ်သည်။ သို့သော် ယေရမိထပ်ခါထပ်ခါဆင့်ဆိုသော ယေဟောဝါထံမှ အလွန်အရေးကြီးသည့် ပရောဖက်ပြုနှုတ်ထွက်စကားကို လူများနားထောင်လိုခဲ့ကြသလော။ မရှိခဲ့ပါ။ လူများသည် ယေရမိကို ဤသို့ပြောင်လှောင်သရော်ခဲ့ကြသည်– ‘ယခု သင်၌အဘယ်ပရောဖက်ပြုချက် (ဝန်ထုပ်) ရှိသနည်း။ သင့်ပရောဖက်ပြုချက်သည် ဝန်လေးပင်ပန်းစေမည့်ဝန်ထုပ်တစ်ခုဖြစ်မည်မှာ သေချာလေစွ!’ သို့သော် ယေဟောဝါသူတို့ကို ဘာပြောခဲ့သနည်း။ “အသင်လူများသည်—ဝန်ထုပ်ကြီးပါတကား! သင်တို့ကိုငါမုချစွန့်ပစ်မည်။” မှန်ပါသည်။ ဤလူများသည် ယေဟောဝါအတွက်ဝန်ထုပ်ဖြစ်ပြီး ယေဟောဝါသည် မိမိကိုယ်ကိုဝန်မလေးစေတော့ရန် သူတို့ကိုပယ်ရှားပစ်မည်ဖြစ်သည်။

၂၀။ ယနေ့ “ယေဟောဝါ၏ဝန်ထုပ်” ကား အဘယ်နည်း။

^၂၀ ယနေ့အတွက် “ယေဟောဝါ၏ဝန်ထုပ်” ကားအဘယ်နည်း။ ဘုရားသခင့်နှုတ်ကပါဌ်တော်မှ အရေးကြီးသည့်ပရောဖက်ပြုသတင်းများဖြစ်သည်။ ယင်းသည် ဖျက်ဆီးခြင်းဖြင့်လေးလံနေပြီး အလွန်နီးကပ်နေပြီဖြစ်သောခရစ်ယာန်ဘောင်၏ပျက်စီးခြင်းကို ကြေညာသည်။ ကျွန်ုပ်တို့အနေနှင့် ဤ “ယေဟောဝါ၏ဝန်ထုပ်” ကိုကြေညာရန် ကြီးလေးသောတာဝန်ရှိကြသည်။ အဆုံးနီးလာသည်နှင့်အမျှ ခရစ်ယာန်ဘောင်၏လမ်းလွဲနေသောလူများသည် “ဝန်ထုပ်” ဖြစ်ကြောင်း၊ မှန်ပါသည်၊ ယေဟောဝါအတွက် “လေးလံလိုက်သည့်ဖြစ်ခြင်း!” နှင့် မကြာမီ ခရစ်ယာန်ဘောင်ကို ဘေးဒုက္ခထဲသို့စွန့်ပစ်ခြင်းအားဖြင့် ဤဝန်ထုပ်မှ မိမိကိုယ်ကိုဝန်ပေါ့စေတော့မည်ဖြစ်ကြောင်းတို့ကို လူအားလုံးကို ကျွန်ုပ်တို့ပြောပြကြရမည်။

၂၁။ (က) ဘီ.စီ.အီး. ၆၀၇ ခုနှစ်တွင် အဘယ်ကြောင့် ယေရုရှလင်မြို့ဖျက်ဆီးခံခဲ့ရသနည်း။ (ခ) ယေရုရှလင်မြို့ပျက်စီးပြီးနောက် မှောက်မှားသောပရောဖက်များနှင့် ယေဟောဝါ၏စစ်မှန်သောပရောဖက်များ အဖြစ်အပျက်သည် ယနေ့ကျွန်ုပ်တို့အား မည်သည့်အာမခံချက်ပေးသနည်း။

^၂၁ ယေဟောဝါတရားစီရင်ချက်သည် ယေရမိအချိန် ဘီ.စီ.အီး. ၆၀၇ ခုနှစ်တွင် ဗာဗုလုန်လူမျိုးအားဖြင့် ယေရုရှလင်ဖျက်ဆီးခံရစဉ်က ကျရောက်ခဲ့သည်။ ပရောဖက်ပြုခဲ့သည့်အတိုင်း၊ ယင်းက ခေါင်းမာသော၊ သစ္စာမရှိသော ထိုဣသရေလလူမျိုးများအတွက် ‘ကဲ့ရဲ့ရှုတ်ချမှုနှင့် အရှက်တကွဲအကျိုးနည်းမှု’ ဖြစ်ခဲ့သည်။ (ယေရမိ ၂၃:၃၉၊ ၄၀) ယေဟောဝါအား အဖန်တလဲလဲမထီမဲ့မြင်ပြုခဲ့ကြသောကြောင့် မိမိတို့၏ဆိုးသွမ်းမှုအကျိုးဆက်တွင် ကိုယ်တော်သူတို့ကိုပစ်ထားကြောင်း ယင်းကဖော်ပြသည်။ သူတို့၏ ရောင့်တက်သော မှောက်မှားသည့်ပရောဖက်များ၏နှုတ်သည် အဆုံးတွင်ပိတ်သွားကြသည်။ သို့သော် ယေရမိ၏နှုတ်မူ ဆက်၍ပရောဖက်ပြုမြဲဖြစ်သည်။ ယေဟောဝါသူ့အားပစ်မထားခဲ့ပါ။ အလားတူပင် ကိုယ်တော်၏ကြီးလေးသောစီရင်ချက်သည် ခရစ်ယာန်ဘောင်ဓမ္မဆရာများနှင့် သူတို့မုသားကိုယုံကြည်သူများ၏အသက်ကို ချေမွဖျက်ဆီးသောအချိန်တွင် ယေရမိအတန်းအစားကို ယေဟောဝါပစ်ထားတော်မူမည်မဟုတ်။

၂၂။ ယေဟောဝါ၏စီရင်ချက်အားဖြင့် ခရစ်ယာန်ဘောင်သည် မည်သည့်အခြေအနေသို့ ရောက်ရှိသွားမည်နည်း။

^၂၂ မှန်ပါသည်၊ စည်းစိမ်ချမ်းသာများချွတ်ပစ်ခံရပြီး ရှက်ဖွယ်ကောင်းအောင်ဖော်ထုတ်ခံရသည့် ခရစ်ယာန်ဘောင်၏အဖြစ်သည် ဘီ.စီ.အီး. ၆၀၇ ခုနှစ်နောက်ပိုင်း၊ ယေရုရှလင်မြို့၏ ပျက်စီးယိုယွင်းပြီးလူသူကင်းမဲ့သည့်အခြေအနေနှင့် တထေရာတည်းသွားတူမည်ဖြစ်သည်။ ယင်းကား မှောက်မှားသောသွန်သင်သူများအပေါ် ယေဟောဝါ၏ထိုက်တန်သောစီရင်ချက်ဖြစ်သည်။ ထိုစီရင်ချက်သည် ပျက်ကွက်မည်မဟုတ်ပါ။ အတိတ်က ယေရမိ၏မှုတ်သွင်းခံသတိပေးစကားများ ပြည့်စုံမှန်ကန်ခဲ့သည့်နည်းတူ ခေတ်သစ်ပြည့်စုံချက်များလည်း ဖြစ်လာမည်။ ထို့ကြောင့် ကျွန်ုပ်တို့သည် ယေရမိကဲ့သို့ ဖြစ်ကြပါစေ။ ကိုယ်တော်၏ဖြောင့်မတ်သည့်စီရင်ချက်သည် မှောက်မှားသောဘာသာရေးသွန်သင်သူအားလုံးတို့အပေါ် အဘယ်ကြောင့်ပြည့်ပြည့်ဝဝကျရောက်တော့မည်ကို သူတို့သိရန် ယေဟောဝါ၏ပရောဖက်ပြုဝန်ထုပ်ကို လူများအား မကြောက်မရွံ့ကြေညာကြစို့။

ပြန်လည်ဆွေးနွေးရန်မေးခွန်းများ

◻ ရှေးယေရုရှလင်မြို့သည် ယေဟောဝါ၏အမြင်တွင် မည်မျှဆိုးသွမ်းသနည်း။

◻ ခရစ်ယာန်ဘောင်သည် မည်သည့်နည်းဖြင့် ‘မုသားကိုသုံး’ သနည်း။

◻ ခေတ်သစ်ဓမ္မဆရာများ၏ အပြစ်တင်ထိုက်သည့်အချက် မည်သို့ဖော်ထုတ်ခံရသနည်း။

◻ အဘယ် “ယေဟောဝါ၏ဝန်ထုပ်” သည် ယခုကြေညာခံနေရသနည်း။

[စာမျက်နှာ ၈ ပါ ရုပ်ပုံ]

‘စက်ဆုပ်ရွံရှာဖွယ်သောအရာများ’ ကို ယေရုရှလင်မြို့သားပရောဖက်များ ကျူးလွန်ခဲ့

[စာမျက်နှာ ၉ ပါ ရုပ်ပုံ]

“ကိုယ်အလိုအလျောက်ရူပါရုံကိုမြင်သည့်အတိုင်း ဟောပြောတတ်ကြ၏”

[စာမျက်နှာ ၁၀ ပါ ရုပ်ပုံ]

ဖျက်ဆီးခံရပြီးယေရုရှလင်မြို့၏အခြေအနေသည် ခရစ်ယာန်ဘောင်၏ နောက်ဆုံးဖျက်ဆီးခံရမည့်အဖြစ်ကိုသရုပ်ဖော်