ဘုရားသခင့်စကားတော်ကို သွန်သင်သူများ တာဝန်ကျေပွန်ရန် တိုက်တွန်းခံရ

မကြာသေးမီလများအတွင်း ထောင်သောင်းမကသွန်သင်သူများသည် သွန်သင်မှုခံယူရန် စုရုံးခဲ့ကြသည်။ လွန်ခဲ့သောမေလမှစ၍ ကမ္ဘာတစ်ဝန်းရှိ ယေဟောဝါသက်သေများ၏ ရာနှင့်ချီသော “ဘုရားသခင့်စကားတော်ကို သွန်သင်သူများ” ခရိုင်စည်းဝေးကြီးများတွင် သူတို့စုဝေးခဲ့ကြ၏။ စည်းဝေးကြီးတက်ရောက်သူများသည် သွန်သင်သူများအဖြစ် မိမိတို့ကိုယ်ကိုသွန်သင်ကြရန်၊ အရည်အချင်းပိုမိုပြည့်မီလာကြရန်၊ မိမိတို့တာဝန်ကိုကျေပွန်ကြရန် တိုက်တွန်းခံခဲ့ရသည်။

ဤစည်းဝေးကြီးတစ်ခုခုကို သင်တက်ရောက်ခဲ့ပါသလော။ တက်ရောက်ခဲ့မည်ဆိုလျှင် စစ်မှန်သောဘုရားသခင် ယေဟောဝါကိုဝတ်ပြုဖို့ အဆိုပါစည်းဝေးကြီးများ၌ သင်ရရှိခဲ့သည့်ဝိညာဉ်အစာကို တန်ဖိုးထားမည်မှာ သေချာပါသည်။ စည်းဝေးကြီး၏မှတ်သားလောက်ဖွယ်အစီအစဉ်ကို ယခု ကျွန်ုပ်တို့နှင့်အတူ ပြန်လည်သုံးသပ်ကြည့်ကြစို့။

ပထမနေ့—မှုတ်သွင်းခံကျမ်းစာစောင်များ သွန်သင်ခြင်းအတွက်အကျိုးပြု

စည်းဝေးကြီးသဘာပတိသည် “ဘုရားသခင့်စကားတော်ကို သွန်သင်ပေးသော အသင်တို့ သင်ကြားခံလော့” ဟောပြောချက်ဖြင့် ကိုယ်စားလှယ်များကို လှိုက်လှိုက်လှဲလှဲကြိုဆိုခဲ့သည်။ “မဟာသွန်သင်ရှင်” ယေဟောဝါထံမှ သွန်သင်မှုခံယူခဲ့သော ယေရှုခရစ်သည် ကြီးမြတ်သောဆရာဖြစ်လာ၏။ (ဟေရှာယ ၃၀:၂၀၊ ကဘ; မဿဲ ၁၉:၁၆) ဘုရားသခင့်စကားတော်ကို သွန်သင်ပေးသူများအဖြစ် ကျွန်ုပ်တို့တိုးတက်လိုလျှင် ယေဟောဝါထံမှ သွန်သင်မှုခံယူကြရမည်။

နောက်ဟောပြောချက်မှာ ဘုရားသခင့် “နိုင်ငံတော်သွန်သင်ခြင်းသည် အသီးကောင်းများသီးပွင့်စေ” ဖြစ်သည်။ အတွေ့အကြုံရှိ ဘုရားသခင့်စကားတော်သွန်သင်ပေးသူများကို လူတွေ့မေးမြန်းခြင်းအားဖြင့် တပည့်ဖြစ်စေခြင်း၏ရွှင်လန်းမှုများနှင့် ကောင်းချီးများကို ပေါ်လွင်ထင်ရှားစေခဲ့၏။

၎င်းနောက် “‘ဘုရားသခင်၏အံ့ဖွယ်သောအမှုတို့ကြောင့်’ လှုံ့ဆော်ခံရ” အကြောင်းနှင့် နှိုးဆော်ဟောပြောခဲ့သည်။ ပထမရာစုတွင် ဘုရားသခင့်နိုင်ငံတော်နှင့်ပတ်သက်သော “အံ့ဖွယ်သောအမှုတို့” ကလူတို့ကို လှုံ့ဆော်တိုက်တွန်းခဲ့၏။ (တမန်တော် ၂:၁၁) ကျွန်ုပ်တို့လည်း ရွေးနုတ်ဖိုး၊ ရှင်ပြန်ထမြောက်ခြင်း၊ ပဋိညာဉ်အသစ်တို့နှင့်ဆိုင်သည့် ကျမ်းစာသွန်သင်ချက်များအဖြစ် “အံ့ဖွယ်သောအမှုတို့” ကိုကြေညာခြင်းအားဖြင့် လူတို့ကို လှုံ့ဆော်ပေးနိုင်သည်။

နောက်ဟောပြောချက်က “ယေဟောဝါ၏ဖြောင့်မတ်ခြင်း၌ ပျော်မွေ့မှုရှာ” ယူကြရန် အားလုံးကို အားပေးခဲ့သည်။ (ဆာလံ ၃၅:၂၇) ဖြောင့်မှန်ရာကိုမြတ်နိုးပြီး မကောင်းမှုကို မုန်းတီးခြင်းအားဖြင့် ကျမ်းစာကိုလေ့လာခြင်းအားဖြင့်၊ ဝိညာဉ်ရေးဘေးသင့်စေမည့်သြဇာများကို အားကြိုးမာန်တက်တွန်းလှန်ခြင်းအားဖြင့်၊ နှိမ့်ချသောသဘောကိုမွေးမြူခြင်းအားဖြင့် ဖြောင့်မတ်စွာကျင့်ခြင်းကို မီအောင်လိုက်ဖို့ အကူအညီရပေမည်။ ထိုသို့ပြုလုပ်ခြင်းဖြင့် အကျိုးမပေးသည့်အပေါင်းအသင်းများ၊ ရုပ်ပစ္စည်းများအပေါ် လောကတန်ဖိုးထားပုံ၊ အကျင့်ယိုယွင်းခြင်းနှင့် အကြမ်းဖက်ဖျော်ဖြေမှုများမှ ကာကွယ်မှုရရှိပေမည်။

ယေဟောဝါသည် ကျွန်ုပ်တို့ကို ကိုယ်တော်၏သမ္မာကျမ်းစာအားဖြင့်၊ သန့်ရှင်းတော်ဝိညာဉ်တော်အားဖြင့်၊ မြေကြီးအဖွဲ့အစည်းအားဖြင့် ကိုယ်တော်၏အရည်အချင်းပြည့်မီသော အမှုဆောင်များဖြစ်စေသည်ဟု “ဘုရားသခင့်စကားတော်သွန်သင်သူများအဖြစ် အပြည့်အဝလေ့ကျင့်ခံရ” ဟူသည့် အဓိကဟောပြောချက်က အသိပေးခဲ့သည်။ ဘုရားသခင့်စကားတော်ကို အသုံးပြုခြင်းနှင့်စပ်လျဉ်း၍ ဟောပြောသူက ဤသို့သတိပေးခဲ့၏– “ကျွန်တော်တို့ရဲ့ပန်းတိုင်ဟာ ကျမ်းစာမှာပါတဲ့သတင်းတရားကို နားထောင်သူတို့ရဲ့နှလုံးထဲ စွဲထင်ကျန်ရစ်စေဖို့ဖြစ်တယ်။”

စည်းဝေးကြီး၏ပထမဦးဆုံး အခန်းဆက်ဟောပြောချက်မှာ “အခြားသူတို့ကိုသွန်သင်စဉ် ကိုယ့်ကိုယ်ကိုသွန်သင်ခြင်း” ဖြစ်၏။ အခြားသူများကို ကျွန်ုပ်တို့သွန်သင်ပေးသည့် မြင့်မားသောခရစ်ယာန်စံနှုန်းနှင့်အညီ ကျွန်ုပ်တို့နေထိုင်သင့်သည်ဟု အဖွင့်ပိုင်းတွင် အလေးအနက်ဖော်ပြခဲ့သည်။ နောက်တစ်ပိုင်းက ‘အမှန်တရားကို မှန်ကန်စွာပိုင်းခြားတတ်’ ရန်ဆုံးမခဲ့သည်။ (၂ တိမောသေ ၂:၁၅) ဘုရားသခင်၏အမှုတော်ကို ထမ်းဆောင်ခဲ့သည်မှာ မည်မျှပင်ကြာပါစေ၊ မိမိတို့ကိုယ်ကိုသွန်သင်ရန် ကျမ်းစာလေ့လာမှုကို မှန်မှန်နှင့်ဝီရိယရှိရှိ ကိုယ်တိုင်ပြုလုပ်ဖို့ အရေးကြီးသည်။ ကျွန်ုပ်တို့တွင် မာနကြီးခြင်း၊ လွတ်လပ်လိုခြင်း၊ ကိုယ့်ကိုယ်ကိုအထင်ကြီးခြင်း၊ မနာလိုခြင်း၊ သဝန်တိုခြင်း၊ နာကြည်းခြင်း၊ မကျေမနပ်ဖြစ်ခြင်းနှင့် အပြစ်ရှာတတ်ခြင်းတို့ကဲ့သို့သော သဘောထားများကို စာတန်ဂရုစိုက်ကြည့်နေကြောင်း အခန်းဆက်ဟောပြောချက်၏ နောက်ဆုံးအပိုင်းက ဖော်ပြ၏။ သို့သော် စာတန်ကို အားကြိုးမာန်တက်တွန်းလှန်လျှင် သူသည် ကျွန်ုပ်တို့ထံမှ ထွက်ပြေးသွားလိမ့်မည်။ သူ့ကို တွန်းလှန်ရန် ဘုရားသခင်ထံ ကျွန်ုပ်တို့ချဉ်းကပ်ဖို့လိုသည်။—ယာကုပ် ၄:၇၊ ၈။

ကျွန်ုပ်တို့၏ဝိညာဉ်ရေး ယုတ်ညံ့သွားစေမည့် အခြေအနေမရောက်အောင် မည်သို့တွန်းလှန်ရမည်ကို “လောကတွင် ကပ်ဆိုက်နေသော ညစ်ညမ်းစာပေရုပ်ပုံများကို စက်ဆုပ်ရွံရှာလော့” ဟူသည့် အချိန်တန်ဟောပြောချက်က ဖော်ပြသည်။ ယေဟောဝါနှင့်ပတ်သက်၍ ပရောဖက်ဟဗက္ကုတ်က ဤသို့ဆို၏– “ကိုယ်တော်သည် [မကောင်းမှု]ကိုကြည့်ရှုတော်မမူ။ သန့်ရှင်းသောမျက်စိရှိတော်မူ၏။ အဓမ္မအမှုကိုကြည့်ရှု၍ နေတော်မမူတတ်ပါ။” (ဟဗက္ကုတ် ၁:၁၃) ကျွန်ုပ်တို့သည် “ဆိုးညစ်သောအမှုကို စက်ဆုပ်ရွံရှာ” သင့်သည်။ (ရောမ ၁၂:၉) မိဘများသည် မိမိတို့ကလေးများ အင်တာနက်အသုံးပြုခြင်းနှင့် ရုပ်မြင်သံကြားကြည့်ရှုခြင်းတို့ကို စိစစ်ကြရန် သတိပေးခဲ့သည်။ ညစ်ညမ်းသောရုပ်ရှင်၊ စာပေ၏ဆွဲဆောင်ခံနေရသူများသည် ဝိညာဉ်ရေးရင့်ကျက်သောမိတ်ဆွေတစ်ဦးထံမှ အကူအညီတောင်းသင့်သည်ဟု ဟောပြောသူကပြောခဲ့သည်။ ၎င်းအပြင် ဆာလံ ၉၇:၁၀; မဿဲ ၅:၂၈; ၁ ကောရိန္သု ၉:၂၇; ဧဖက် ၅:၃၊ ၁၂; ကောလောသဲ ၃:၅; ၁ သက်သာလောနိတ် ၄:၄၊ ၅ စသောကျမ်းချက်များကို ဆင်ခြင်တွေးတောပြီး အလွတ်ကျက်ထားလျှင်ကောင်းပေ၏။

နောက်ဟောပြောချက် “ဘုရားသခင်၏ငြိမ်သက်ခြင်းသည် သင့်ကို ကွယ်ကာစောင့်ရှောက်ပါစေ” ကကျွန်ုပ်တို့စိုးရိမ်ပူပန်မှုဖြင့် ဝန်ပိနေမည်ဆိုလျှင် ကျွန်ုပ်တို့၏ဝန်ကို ယေဟောဝါ၌ချထားနိုင်သည်ဟု အားပေးသည်။ (ဆာလံ ၅၅:၂၂) ဆုတောင်းခြင်းဖြင့် ယေဟောဝါအား ရင်ဖွင့်ကြမည်ဆိုလျှင် ကိုယ်တော်နှင့်ရင်းနှီးသောဆက်ဆံရေးမှရရှိသည့် စိတ်တည်ငြိမ်မှုနှင့် အတွင်းငြိမ်သက်မှုဖြစ်သော “ဘုရားသခင်၏ငြိမ်သက်ခြင်း” ကိုရမည်ဖြစ်သည်။—ဖိလိပ္ပိ ၄:၆၊ ၇။

ဟေရှာယအခန်းကြီး ၆၀ ၏ပြည့်စုံချက်ကို ရှင်းပြသော “ယေဟောဝါသည် မိမိလူမျိုးကို အလင်းဖြင့် တင့်တယ်စေ” ဟောပြောချက်နှင့် ပထမနေ့ကို အဆုံးသတ်ခဲ့ကြရာ အထူးသဖြင့် ဝမ်းသာခဲ့ရ၏။ လောက၏လက်ရှိအမှောင်ထုကြား “တစ်ပါးအမျိုးသားတို့” ဖြစ်သည့် သိုးကဲ့သို့သောလူအုပ်ကြီးသည် ဝိညာဉ်တော်ဖွားခရစ်ယာန်များနှင့်အတူ ယေဟောဝါ၏အလင်းတော်အောက် ပျော်မွေ့လျက်ရှိကြသည်။ ဟောပြောသူသည် အခန်းငယ် ၁၉ နှင့် ၂၀ ကိုညွှန်း၍ ဤသို့ရှင်းပြသည်– ‘ယေဟောဝါဟာ နေလို “ဝင်” ပြီး၊ လလို “မလင်း” ဘဲနေမှာမဟုတ်ပါဘူး။ မိမိလူမျိုးအပေါ် အလင်းဖြာထွက်စေခြင်းဖြင့် ဆက်လက်တင့်တယ်စေလိမ့်မယ်။ ဒီမှောင်မိုက်လောကရဲ့နောက်ဆုံးကာလထဲမှာ ရှိနေကြတဲ့ ကျွန်တော်တို့အတွက် တကယ်ကောင်းတဲ့အာမခံချက်တစ်ခုပါပဲ!’ ဟောပြောချက်နိဂုံး၌ ဟောပြောသူက ဟေရှာယပရောဖက်ပြုချက်—လူခပ်သိမ်းအတွက် အလင်း အတွဲနှစ်ကို ကြေညာ၍ထုတ်ဝေခဲ့သည်။ ဤစာအုပ်အသစ်ကို သင်တို့ဖတ်ပြီးကြပြီလော။

ဒုတိယနေ့—သူတစ်ပါးကို သွန်သင်ခြင်းငှာတတ်စွမ်း

ဒုတိယနေ့တွင် နေ့စဉ်ကျမ်းချက်ကို ဆွေးနွေးပြီးနောက် “အခြားသူများကို ယုံကြည်သူတို့ဖြစ်စေသော ဓမ္မအမှုဆောင်များ” ဟူသည့် စည်းဝေးကြီး၏ဒုတိယအခန်းဆက်ဟောပြောချက်ကို ကျွန်ုပ်တို့ စိတ်ဝင်တစားနားထောင်ခဲ့ကြသည်။ အခန်းဆက်သုံးခုပါ ဟောပြောသူများသည် လူတို့ကို ယုံကြည်သူများဖြစ်လာစေရန် ကူညီပေးရာ၌ပါဝင်သည့် ဘုရားသခင့်နိုင်ငံတော်သတင်းတရား ပျံ့နှံ့စေခြင်း၊ စိတ်ဝင်စားမှုကို ပြုစုပျိုးထောင်ခြင်းနှင့် စိတ်ဝင်စားသူများအား ခရစ်တော်၏မိန့်မှာချက်များကို လိုက်နာရန် သွန်သင်ပေးခြင်း အဆင့်သုံးဆင့်ကို တစ်ဆင့်ချင်းစီအလေးပေးဖော်ပြခဲ့၏။ အခြားသူများအား တပည့်ဖြစ်လာစေရန် ကျွန်ုပ်တို့မည်သို့သွန်သင်ပေးနိုင်ကြောင်း လူတွေ့မေးမြန်းခန်းများနှင့် သရုပ်ပြခန်းများဖြင့်သိရှိစေခဲ့၏။

နောက်ဟောပြောချက်၏အဓိကအချက်မှာ “သင်၏ခံနိုင်ရည်တွင် ဘုရားဝတ်၌မွေ့လျော်ခြင်းကို ထပ်ဆင့်လော့” ဖြစ်သည်။ အရေးကြီးဆုံးမှာ “အဆုံးတိုင်အောင် ခံနိုင်ရည်ရှိခြင်း” ဖြစ်သည်ဟု ဟောပြောသူက ဖော်ပြခဲ့၏။ (မဿဲ ၂၄:၁၃၊ ကဘ) ဘုရားသခင်ဝတ်၌မွေ့လျော်ရန် ဘုရားသခင်ပြင်ဆင်ထားလေသမျှ—ဆုတောင်းခြင်း၊ ကိုယ်ပိုင်လေ့လာမှု၊ အစည်းအဝေးများနှင့် ခရစ်ယာန်ဓမ္မအမှု—တို့ကိုအသုံးပြုသင့်သည်။ ကျွန်ုပ်တို့၏ဘုရားသခင်ဝတ်၌မွေ့လျော်ခြင်းကို ဖျက်ဆီးမည့် လောကတပ်မက်မှုများနှင့် လုပ်ရပ်များမရှိစေရန် တားဆီးဖို့လိုသည်။

ယနေ့ ဝန်လေး၍ပင်ပန်းနေသူများသည် လန်းဆန်းမှုကို မည်သို့ရှာတွေ့နိုင်မည်နည်း။ “ခရစ်တော်၏ထမ်းပိုးအောက် လန်းဆန်းမှုတွေ့ရှိခြင်း” ဟောပြောချက်က ထိုမေးခွန်းကို အဖြေပေးခဲ့သည်။ ယေရှုက မိမိ၏ထမ်းပိုးကိုထမ်း၍ မိမိထံ၌နည်းခံကြရန် နောက်လိုက်များအား ကြင်နာစွာဖိတ်ခေါ်သည်။ (မဿဲ ၁၁:၂၈-၃၀) ယေရှု၏ရိုးရှင်း၍ မျှတမှုရှိသောဘဝပုံစံအတိုင်းနေထိုင်ခြင်းဖြင့် ကိုယ်တော်၏ထမ်းပိုးကို ထမ်းနိုင်ကြပါသည်။ မိမိတို့အသက်တာများကို ရိုးရှင်းစေခဲ့သူတို့ကို လူတွေ့မေးမြန်းခြင်းဖြင့် ဤဟောပြောချက်၏အဓိကအချက်များကို ပို၍ပေါ်လွင်စေခဲ့သည်။

ယေဟောဝါသက်သေများ၏ စည်းဝေးကြီးများတွင် အပေါ်လွင်ဆုံးမှာ ဆက်ကပ်အပ်နှံခါစ ဘုရားသခင့်ကျေးကျွန်များ၏ နှစ်ခြင်းခံခြင်းဖြစ်သည်။ “နှစ်ခြင်းခံခြင်းက သာ၍ကြီးမားသော သွန်သင်ခြင်းအခွင့်ထူးများရရှိစေ” ကြောင်းကို ဟောပြောသောညီအစ်ကိုသည် နှစ်ခြင်းယူမည့်သူများကို လှိုက်လှိုက်လှဲလှဲကြိုဆိုပြီး လုပ်ငန်းတော်၏ သာ၍ကြီးမြတ်သောအခွင့်ထူးများတွင်ပါဝင်ရန် ဖိတ်ခေါ်ခဲ့သည်။ ကျမ်းစာတောင်းဆိုချက်များကိုပြည့်မီသော နှစ်ခြင်းခံပြီးခါစ ဘုရားသခင့်စကားတော်ကိုသွန်သင်သူများသည် အသင်းတော်တွင် တာဝန်အသီးသီးကို လက်လှမ်းယူနိုင်ကြပါသည်။

ထိုမွန်းလွဲပိုင်း၌ ဦးဆုံးဟောပြောချက်ခေါင်းစဉ်မှာ “ကြီးမြတ်သောဆရာကိုတုပလော့” ဖြစ်၏။ ယေရှုသည် ကောင်းကင်တွင်ရှိစဉ် ခမည်းတော်ကို ဂရုစိုက်ကြည့်ရှု၍ တုပခဲ့သောကြောင့် ကြီးမြတ်သောဆရာဖြစ်လာခဲ့သည်။ မြေကြီးပေါ်ရှိစဉ် ထိုးထွင်းသိမြင်နိုင်သောမေးခွန်းများ၊ ရိုးရှင်းသော်လည်း ကွက်ကွက်ကွင်းကွင်းမြင်နိုင်သောဥပမာများစသော ထိရောက်သည့်သွန်သင်နည်းများကို ကိုယ်တော်အသုံးပြုခဲ့၏။ ယေရှုသည် မိမိ၏သွန်သင်ချက်ကို ဘုရားသခင့်စကားတော်အပေါ် အခြေပြု၍ ထက်ထက်သန်သန်၊ လှိုက်လှိုက်လှဲလှဲ၊ အခွင့်အာဏာရှိရှိ မိန့်ဆိုခဲ့သည်။ ကြီးမြတ်သောဆရာကိုတုပရန် ကျွန်ုပ်တို့လှုံ့ဆော်ခံခဲ့ရသည်မဟုတ်ပေလော။

“သူတစ်ပါးအကျိုးသယ်ပိုးရန် သင်လိုလိုလားလားရှိသလော” ဟူသည့် အားကျဖွယ်ဟောပြောချက်က အခြားသူများ၏အကျိုးသယ်ပိုးရာတွင် ယေရှု၏ပုံနမူနာကိုတုပရန် ကျွန်ုပ်တို့ကိုအားပေးခဲ့သည်။ (ယောဟန် ၁၃:၁၂-၁၅) အခြားသူများကိုကူညီပေးရန် အခွင့်အရေးများရှာယူရာတွင် တိမောသေကဲ့သို့ဖြစ်ကြဖို့ အရည်အချင်းရှိအမျိုးသားများကို ဟောပြောသူက တိုက်ရိုက်အားပေးခဲ့၏။ (ဖိလိပ္ပိ ၂:၂၀၊ ၂၁) မိဘများသည် မိမိတို့ကလေးများကို အချိန်ပြည့်အမှုဆောင်လုပ်ငန်းတွင်ပါဝင်ကြရန် အားပေးရာတွင် ဧလကာနနှင့်ဟန္နတို့ကို တုပကြဖို့အားပေးခဲ့သည်။ လူငယ်များမှာမူ မိမိတို့ကိုယ်ကိုတလိုတလားပေးဆက်ခြင်းအားဖြင့် ယေရှုခရစ်နှင့် လူငယ်တိမောသေတို့၏ပုံနမူနာကို တုပကြရန် သတိပေးခဲ့၏။ (၁ ပေတရု ၂:၂၁) သူတစ်ပါးအကျိုးသယ်ပိုးရန် အခွင့်အရေးရှာယူကြသူများ၏စကားများကလည်း ကျွန်ုပ်တို့ကို လှုံ့ဆော်ပေးခဲ့သည်။

တတိယအခန်းဆက်ဟောပြောချက်၏ အဓိကအချက်မှာ “သီအိုကရက်တစ်ပညာရေးမှ သာ၍အပြည့်အဝအကျိုးရယူ” ဖြစ်သည်။ ဦးဆုံးဟောပြောသူက အာရုံစိုက်မှုအတိုင်းအတာ တိုးမြှင့်ပေးခြင်း၏အရေးပါမှုကို အလေးပေးဖော်ပြသည်။ ထိုပန်းတိုင်သို့ရောက်ရှိရန် အစပိုင်းတွင် ကိုယ်ပိုင်လေ့လာမှုကို အချိန်တိုတိုသာပြုလုပ်၍ တဖြည်းဖြည်းအချိန်ကြာကြာပြုလုပ်သွားနိုင်ကြသည်။ အစည်းအဝေးများ၌ ကျမ်းချက်များကိုလိုက်ဖွင့်ပြီး မှတ်စုယူရန် ပရိသတ်ကိုအားပေးခဲ့၏။ ဒုတိယဟောပြောသူက “စင်ကြယ်သောတရားစကားပုံစံကို” စွဲကိုင်ထားရန် လိုအပ်ကြောင်း သတိပေးသည်။ (၂ တိမောသေ ၁:၁၃၊ ၁၄၊ ကဘ) ညစ်ညမ်းသော လူထုဆက်သွယ်ရေးလမ်းကြောင်းများ၊ လူ့အတွေးအခေါ်များ၊ အဆင့်မြင့်အပြစ်ရှာဝေဖန်ရေးများနှင့် အယူဖောက်ပြန်သူများ၏သွန်သင်ချက်များမှ မိမိကိုယ်ကိုကာကွယ်ရန် ကိုယ်ပိုင်လေ့လာမှုပြုလုပ်ဖို့နှင့် အစည်းအဝေးတက်ရောက်ဖို့ အချိန်ဝယ်ယူရမည်။ (ဧဖက် ၅:၁၅၊ ၁၆) အခန်းဆက်ဟောပြောချက်၏ နောက်ဆုံးဟောပြောသူက သီအိုကရက်တစ်ပညာရေးမှ အပြည့်အဝအကျိုးရယူရန် သိရှိထားရာများကို လက်တွေ့ကျင့်သုံးဖို့လိုအပ်ကြောင်း ပေါ်လွင်ထင်ရှားစေခဲ့သည်။—ဖိလိပ္ပိ ၄:၉။

“ကျွန်ုပ်တို့၏ဝိညာဉ်ရေးတိုးတက်မှုအတွက် အသစ်သောပြင်ဆင်ပေးချက်များ” ဟောပြောချက်ကို ကျွန်ုပ်တို့ကြားရသောအခါ တကယ်စိတ်လှုပ်ရှားခဲ့ကြပါသည်တကား! သီအိုကရက်တစ်ဓမ္မအမှုကျောင်းပညာရေးမှ အကျိုးရယူ စာအုပ်အသစ်ကို မကြာမီရရှိတော့မည်ဟု သိရှိရ၍ ကျွန်ုပ်တို့ဝမ်းမြောက်ခဲ့ကြရ၏။ ဟောပြောသူက ထိုစာအုပ်ပါအကြောင်းများကို အကျဉ်းချုပ်ဖော်ပြသောအခါ ကျွန်ုပ်တို့အလွန်ရလိုခဲ့ကြသည်။ စကားပြောသွန်သင်ချက်များစွာပါရှိသည့် ၎င်းစာအုပ်၏အပိုင်းနှင့်စပ်လျဉ်း၍ သူကဤသို့ဆိုသည်– “ဒီစာအုပ်အသစ်က ကောင်းစွာဖတ်ရှုခြင်း၊ ပြောဆိုခြင်းနဲ့ သွန်သင်ခြင်းနဲ့ဆိုင်တဲ့ အချက် ၅၃ ချက်ကို လောကသင်ရိုးစာအုပ်လို ရေးသားထားတာမဟုတ်ပါဘူး။ ကျမ်းစာမူတွေအပေါ် အခြေပြုပြီး တင်ဆက်ထားတယ်။” ပရောဖက်များ၊ ယေရှုနှင့် ကိုယ်တော်၏တပည့်တော်များအသုံးပြုခဲ့သော သွန်သင်ခြင်းနည်းလမ်းကောင်းများကို ဤစာအုပ်ကတင်ဆက်ထား၏။ မှန်ပါသည်၊ ဤသင်ရိုးစာအုပ်နှင့် သီအိုကရက်တစ်ဓမ္မအမှုကျောင်း၏ အကြောင်းအချက်အသစ်များသည် ကျွန်ုပ်တို့အား ဘုရားသခင့်စကားတော်ကို ပိုပြီးထိရောက်စွာသွန်သင်သူများဖြစ်လာစေပါလိမ့်မည်။

တတိယနေ့—ကာလအချိန်ကိုထောက်လျက် သွန်သင်သူများအဖြစ်သို့ ရောက်ကြလော့

နောက်ဆုံးနေ့၏ နေ့စဉ်ကျမ်းချက်ကိုဆွေးနွေးပြီးနောက် စည်းဝေးကြီး၏နောက်ဆုံးအခန်းဆက်ဟောပြောချက် “မာလခိ၏ပရောဖက်ပြုချက်သည် ကျွန်ုပ်တို့အား ယေဟောဝါ၏နေ့အတွက်ပြင်ဆင်ပေး” ကိုအားလုံးက ဂရုစိုက်နားထောင်ခဲ့ကြသည်။ ဗာဗုလုန်မြို့မှ ဂျူးများပြန်ရောက်ပြီးနောက် အနှစ်တစ်ရာခန့်တွင် မာလခိပရောဖက်ပြုခဲ့၏။ သူတို့သည် ယေဟောဝါ၏ဖြောင့်မတ်သောပညတ်တော်များကို လျစ်လျူရှုခြင်းဖြင့်လည်းကောင်း၊ ယဇ်ပူဇော်ရန် မျက်ကန်း၊ ခြေဆွံ့၊ ဖျားနာနေသောတိရစ္ဆာန်များကို ယူဆောင်လာခြင်းဖြင့်လည်းကောင်း ကိုယ်တော်၏နာမတော်ကိုမထီမဲ့မြင်ပြုပြီး အယူဖောက်ပြန်မှုနှင့် ဆိုးသွမ်းမှုတို့တွင် တစ်ဖန်မျောပါသွားခဲ့ကြသည်။ ထို့ပြင် တိုင်းတစ်ပါးအမျိုးသမီးများနှင့် လက်ထပ်နိုင်ကြရန် သူတို့၏ငယ်ပေါင်းဇနီးများကို ကွာရှင်းခဲ့ကြ၏။

မာလခိပရောဖက်ပြုချက်၏ ပထမဦးဆုံးအခန်းကြီးက ယေဟောဝါသည် မိမိလူမျိုးကိုချစ်တော်မူကြောင်း ကျွန်ုပ်တို့အား သေချာစေခဲ့သည်။ ဘုရားသခင်ကို ရိုသေခန့်ညားကြောက်ရွံ့ပြီး မြင့်မြတ်သောအရာများကို လေးမြတ်ဖို့လိုကြောင်း အလေးပေးဖော်ပြခဲ့သည်။ ယေဟောဝါသည် ကိုယ်တော့်ကိုကိုယ်ကျိုးစွန့်မေတ္တာဖြင့် ကျွန်ုပ်တို့အားဝတ်ပြုစေလိုပြီး ကိုယ်တော်အား အကောင်းဆုံးအရာကိုပေးစေလို၏။ ကျွန်ုပ်တို့၏မြင့်မြတ်သောလုပ်ငန်းတော်သည် လုပ်ရိုးလုပ်စဉ်တစ်ခုမျှသာ မဖြစ်သင့်ချေ၊ ဘုရားသခင်ထံ၌ ကျွန်ုပ်တို့စာရင်းရှင်းကြရမည်။

မာလခိကျမ်း၏ဒုတိယအခန်းကြီးကို ကျွန်ုပ်တို့ခေတ်နှင့်သက်ဆိုင်စေ၍ အခန်းဆက်ဟောပြောချက်၏ ဒုတိယဟောပြောသူက ဤသို့မေးခဲ့၏– “‘ကျွန်ုပ်တို့၏နှုတ်၌ အပြစ်ရှာ၍မတွေ့’ နိုင်အောင် ကိုယ်တိုင်သတိရှိပါသလား။” (မာလခိ ၂:၆) သွန်သင်သူများက မိမိ၏စကားသည် ဘုရားသခင့်စကားတော်အပေါ် အခိုင်အမာအခြေပြုမပြု ဂရုစိုက်သင့်၏။ မတရားသဖြင့်ကွာရှင်းပြတ်စဲခြင်းအစရှိသော သစ္စာမဲ့မှုကို ကျွန်ုပ်တို့မုန်းတီးသင့်သည်။—မာလခိ ၂:၁၄-၁၆။

“ယေဟောဝါ၏နေ့ကို မည်သူကပ်ကျော်မည်နည်း” အဓိကအချက်ကို ဟောပြောခဲ့သော ဤအခန်းဆက်ဟောပြောချက်၏ နောက်ဆုံးဟောပြောသူက ယေဟောဝါ၏နေ့အတွက် ကျွန်ုပ်တို့ကိုကြိုတင်ပြင်ဆင်ပေးခဲ့သည်။ “မာလခိအခန်းကြီး ၃၊ အငယ် ၁၇ ဟာယေဟောဝါရဲ့ကျေးကျွန်တွေအပေါ်မှာ အဓိကပြည့်စုံနေတယ်ဆိုတာသိရလို့ သူတို့အတွက် တကယ်ကိုနှစ်သိမ့်မှုပေးတယ်! ဒီကျမ်းချက်က ဒီလိုဆိုပါတယ်– ‘“ထိုသူတို့သည် ငါစီရင်သောနေ့ရက်၌ ငါပိုင်ထိုက်သောဘဏ္ဍာတော်ဖြစ်ကြလိမ့်မည်။ အဘ၏အမှုကိုဆောင်သောသားကို အဘနှမြောသကဲ့သို့ ထိုသူတို့ကို ငါနှမြောမည်” ဟုကောင်းကင်ဗိုလ်ခြေအရှင် ထာဝရဘုရားမိန့်တော်မူ၏’” ဟူ၍ ဟောပြောသူက ရှင်းပြခဲ့သည်။

စည်းဝေးကြီး၏ပေါ်လွင်ချက်နောက်တစ်ခုမှာ ကောရသားများအဖြစ် သရုပ်ဆောင်မည့် “ယေဟောဝါ၏အခွင့်အာဏာကို လေးစားပါ” ဝတ်စုံပြည့်ပြဇာတ်ဖြစ်သည်။ မောရှေနှင့်အာရုန်တို့ကို သူတို့၏ဖခင်က ပုန်ကန်သော်လည်း ယေဟောဝါနှင့် ကိုယ်တော်၏ကိုယ်စားလှယ်များအပေါ် သူတို့သစ္စာစောင့်သိခဲ့ကြ၏။ ကောရနှင့် သူ၏နောက်လိုက်များ အပြစ်ပေးခံရကြသော်လည်း ကောရ၏သားများမှာမူ အသက်ရှင်ကျန်ရစ်ခဲ့ကြသည်။ “ဘုရားသခင်၏အခွင့်အာဏာကို သစ္စာရှိစွာလက်အောက်ခံလော့” နောက်ဆက်တွဲဟောပြောချက်က ကျွန်ုပ်တို့တစ်ဦးစီနှင့် ပြဇာတ်ပါအကြောင်းအရာများ သက်ဆိုင်ကြောင်းသိရှိစေသည်။ ကောရနှင့် သူ၏နောက်လိုက်များ ပျက်ကွက်ခဲ့သည့် ကဏ္ဍခြောက်ခုကို ဟောပြောသူက ဤသို့ဖော်ပြခဲ့သည်– ယေဟောဝါ၏အခွင့်အာဏာကို သစ္စာရှိရှိမထောက်ခံခြင်း; မာန်မာန၊ ရည်မှန်းချက်ကြီးခြင်းနှင့် မနာလိုစိတ်တို့ကို သူတို့အားလွှမ်းမိုးခွင့်ပြုခြင်း; ယေဟောဝါခန့်အပ်ထားသူများ၏ မစုံလင်မှုများကို အာရုံစိုက်ခြင်း; ညည်းညူတတ်သောသဘောကို မွေးမြူခြင်း; မိမိတို့၏လုပ်ငန်းတော်အခွင့်အရေးများကို မကျေမနပ်ဖြစ်ခြင်း; ယေဟောဝါအားသစ္စာစောင့်သိခြင်းထက် ခင်မင်ရင်းနှီးမှု သို့မဟုတ် မိသားစုနှောင်ကြိုးကို ပို၍ဦးစားပေးခြင်းတို့ဖြစ်သည်။

လူထုဟောပြောချက်၏ အဓိကအချက်မှာ “လူမျိုးအပေါင်းအား အမှန်တရားကို မည်သူတို့ သွန်သင်ပေးနေသနည်း” ဖြစ်၏။ ဆွေးနွေးခဲ့သည့်အမှန်တရားမှာ ယေဘုယျအမှန်တရားမဟုတ်ဘဲ ယေဟောဝါ၏ရည်ရွယ်တော်မူချက်နှင့်ပတ်သက်ပြီး ယေရှုခရစ်သက်သေခံခဲ့သော အမှန်တရားဖြစ်သည်။ ယုံကြည်ချက်များနှင့်ဆက်စပ်နေသည့် အမှန်တရား၊ ဝတ်ပြုကိုးကွယ်ပုံနှင့်ဆက်စပ်နေသည့် အမှန်တရားနှင့် ကိုယ်ပိုင်အမူအကျင့်နှင့်ဆက်စပ်နေသည့် အမှန်တရားတို့ကို ဟောပြောသူက ဆွေးနွေးတင်ပြခဲ့သည်။ မျက်မှောက်ခေတ်ယေဟောဝါသက်သေများနှင့် ပထမရာစုရှိခရစ်ယာန်များကို ဤသို့နှိုင်းယှဉ်ပြခြင်းဖြင့် ‘ဘုရားသခင်သည် ကျွန်ုပ်တို့တွင် အမှန်ရှိတော်မူသည်’ ကိုပိုမိုယုံကြည်စိတ်ချစေပါသည်။—၁ ကောရိန္သု ၁၄:၂၅။

ထိုအပတ်တွင် လေ့လာမည့် ကင်းမျှော်စင် သင်တန်းဆောင်းပါးကို အကျဉ်းချုပ်တင်ပြပြီးနောက် “ကျွန်ုပ်တို့၏သွန်သင်ခြင်းတာဝန်ကို အရေးတကြီးကျေပွန်စေခြင်း” နိဂုံးချုပ်ဟောပြောချက်အားဖြင့် ပရိသတ်ရှိ ဘုရားသခင့်စကားတော်ကိုသွန်သင်သူအားလုံး ဆက်လက်ကြိုးစားလုပ်ဆောင်ရန် တိုက်တွန်းခံခဲ့ရ၏။ စည်းဝေးကြီးအစီအစဉ်တစ်ခုလုံးကို အကျဉ်းချုပ်ပြန်လည်သုံးသပ်ခြင်းက သွန်သင်ရာတွင် သမ္မာကျမ်းစာအသုံးပြုခြင်း၏အရေးပါမှု၊ အရည်အချင်းပြည့်မီသောသွန်သင်သူများဖြစ်လာနိုင်သည့် နည်းလမ်းများနှင့် အခြားသူများအား ကျွန်ုပ်တို့သွန်သင်ပေးသည့် အမှန်တရားကို ယုံကြည်စိတ်ချရန် လိုကြောင်းကို အလေးပေးဖော်ပြခဲ့သည်။ ‘ကျွန်ုပ်တို့၏တိုးပွားခြင်းကို ထင်ရှား’ စေပြီး ‘ကိုယ်ကိုလည်းကောင်း၊ ကိုယ်သွန်သင်ပေးခြင်းကိုလည်းကောင်း သတိပြု၍ အမြဲတည်နေ’ ရန်ဟောပြောသူက သတိပေးခဲ့၏။—၁ တိမောသေ ၄:၁၅၊ ၁၆။

“ဘုရားသခင့်စကားတော်ကို သွန်သင်သူများ” ခရိုင်စည်းဝေးကြီး၌ ကျွန်ုပ်တို့စားသုံးခဲ့ရသည့် ဝိညာဉ်ရေးခဲဖွယ်စားဖွယ် များပြားလှသည်တကား! အခြားသူများအား ဘုရားသခင့်စကားတော်ကို သွန်သင်ပေးရာတွင် ကျွန်ုပ်တို့၏မဟာသွန်သင်ရှင် ယေဟောဝါနှင့် ကြီးမြတ်တော်မူသောဆရာ ယေရှုခရစ်တို့ကို တုပကြပါစို့။

[စာမျက်နှာ ၂၈ ပါ လေးထောင့်ကွက်/ ရုပ်ပုံ]

အထူးလိုအပ်ရာများကို ဖြည့်ဆည်းပေးရန် စာပေစာတမ်းအသစ်များ

“ဘုရားသခင့်စကားတော်ကိုသွန်သင်သူများ” ခရိုင်စည်းဝေးကြီး တက်ရောက်သူများသည် ကမ္ဘာ့ဒေသအချို့ရှိ လူတို့ကို ကျမ်းစာအမှန်တရားသွန်သင်ပေးရန် အလွန်အထောက်အကူဖြစ်မည့် စာပေစာတမ်းနှစ်မျိုးကို အားရဝမ်းသာလက်ခံယူခဲ့ကြ၏။ သင်၌ မသေနိုင်သောဝိညာဉ် [စပီးရစ်] ရှိသလော ဟူသည့် ဝေစာသည် “စိုးလ်” နှင့် “စပီးရစ်” တို့ကို ဒေသခံဘာသာစကားများက ခွဲခြားမဖော်ပြသောနိုင်ငံများ၌ နေထိုင်ကြသူများနှင့် စကားစမြည်ပြောဆိုရာတွင် အသုံးဝင်မည့်ကိရိယာတစ်ခုဖြစ်လိမ့်မည်။ ဝိညာဉ်စွမ်းအားသည် နာမ်ဝိညာဉ်သတ္တဝါနှင့်မတူကြောင်း၊ လူသေသောအခါ နာမ်ဝိညာဉ်သတ္တဝါ ဖြစ်မသွားကြောင်း ထိုဝေစာအသစ်က ရှင်းရှင်းလင်းလင်းဖော်ပြသည်။

စည်းဝေးကြီး၏ဒုတိယနေ့အဆုံးပိုင်း၌ ကျေနပ်ရောင့်ရဲသောဘဝ—ယင်းကို ရရှိနိုင်ပုံ ဘရိုရှာကို ထုတ်ဝေလိုက်၏။ ဂုဏ်ရည်တော်ရှိဖန်းဆင်ရှင်တစ်ပါးရှိကြောင်းနှင့် ဘုရားသခင့်မှုတ်သွင်းခံစာအုပ်တစ်အုပ်ရှိကြောင်းကို တစ်ခါမျှမတွေးတောခဲ့သူများဖြင့် ကျမ်းစာသင်အံမှုစတင်ရန် ရည်ရွယ်ပြီး ယင်းဘရိုရှာကို ပုံနှိပ်ထုတ်ဝေထားခြင်းဖြစ်သည်။ သင့်ခရစ်ယာန်ဓမ္မအမှုတွင် အဆိုပါစာပေစာတမ်းအသစ်များကို အသုံးပြုနိုင်ခဲ့ပြီလော။

[စာမျက်နှာ ၂၆ ပါ ရုပ်ပုံ]

အီတလီနိုင်ငံ၊ မီလန်မြို့နှင့် ကမ္ဘာတစ်ဝန်းရှိ စည်းဝေးကြီးများ၌ ရာနှင့်ချီနှစ်ခြင်းခံခဲ့

[စာမျက်နှာ ၂၉ ပါ ရုပ်ပုံ]

“ယေဟောဝါ၏အခွင့်အာဏာကို လေးစားပါ” ပြဇာတ်က တက်ရောက်သူများအတွက် လှုံ့ဆော်မှုဖြစ်