မည်သို့ထာဝစဉ်အသက်ရှင်နိုင်ကြောင်း သင်ယူနိုင်ရန် ကူညီပေးဖို့ လူတို့ထံ ပြန်လည်ပတ်

^၁ သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်စာအုပ်ထွက်လာကတည်းက ဘာသာစကား ၁၁၅ ဘာသာဖြင့် စောင်ရေပေါင်း ၆၅ သန်းကျော် ပုံနှိပ်ထုတ်ဝေပြီးပြီ။ ယခုယေဟောဝါ၏ကျေးကျွန်များဖြစ်နေသူ မြောက်မြားစွာတို့သည် ဤမွန်မြတ်သောစာပေအားဖြင့် သမ္မာကျမ်းစာ၏အခြေခံသမ္မာတရားများကို သိရှိလာခဲ့ကြပြီ။ ဤလနှင့်နောက်တစ်လအတွင်း ဤကျမ်းစာလေ့လာရာတွင် အကူအညီပေးသည့်စာအုပ်ကို မြန်မာ၊ အင်္ဂလိပ်၊ တရုတ်၊ တယ်မီလ်ဖြင့်ရှိပါက ဝေငှပေးနိုင်ပါသည်။ သို့မဟုတ် ယင်းစာအုပ်ရှိထားနှင့်သူများကို ရပ်ကွက်တွင် တွေ့ဆုံပါလိမ့်မည်။

^၂ စာအုပ်ရှိသူတို့ထံ ပြန်လည်ပတ်သွားခြင်း။ ကြေညာသူအချို့သည် မာတိကာကိုပြ၍ စိတ်ဝင်စားသူအား အဘယ်အကြောင်းကိုသိလိုသနည်းဟု မေးမြန်းရုံနှင့် အကျိုးဖြစ်ထွန်းခဲ့ပါသည်။ အိမ်ရှင်သည် အကြောင်းတစ်ခုကိုရွေးချယ်သည့်အခါ နောက်တစ်ကြိမ်လည်ပတ်လာမည့်အချိန်မတိုင်မီ ယင်းအခန်းကြီးကို ကြိုတင်ဖတ်ထားရန် အကြံပြုပါ။

^၃ ဖြစ်နိုင်မည်ဆိုလျှင် ပြန်လည်ပတ်မည့်နေ့ရက်ကို အတိအကျချိန်းချက်ထားသင့်သည်။ သူ့ထံပြန်မသွားမီ အိမ်ရှင်ရွေးချယ်ထားသည့်အခန်း၏ အပိုဒ်အနည်းငယ်ကို ဆွေးနွေးရန် ကြိုတင်ပြင်ဆင်ထားလိုပေမည်။ အိမ်ရှင်သိလိုသည့် အထူးအကြောင်းတစ်ခုမရှိလျှင် အခန်း ၁ မှစတင်ဆွေးနွေးနိုင်ပါသည်။ အပိုဒ်အနည်းငယ်ကိုဖတ်ပြီးသည့်နောက် လာမည့်အပိုဒ်များတွင် ဆွေးနွေးမည့်အကြောင်းကို မေးခွန်းထုတ်သင့်ပါသည်။ ယင်းသို့ပြုခြင်းအားဖြင့် ထာဝစဉ်အသက်ရှင်စာအုပ်ကို ဆက်လေ့လာနိုင်မည့် နောက်တစ်ကြိမ်လည်ပတ်မှုအတွက် လမ်းခင်းပေးပါလိမ့်မည်။

^၄ အိမ်ရှင်၌ မေးစရာမေးခွန်းများရှိမည်ဆိုလျှင် ယင်းကို ဦးစွာဆွေးနွေးပါက ကောင်းပေမည်။ သူ၏မေးခွန်းများကို စာအုပ်တွင် ဖြေဆိုပေးထားစရာအကြောင်းရှိသည်။ စာအုပ်ပါအကြောင်းများကို ကိုယ်တိုင်ကောင်းစွာသိထားခြင်းအားဖြင့် သက်ဆိုင်သောအပိုဒ်များသို့ဖွင့်ကာ ပေါ်လာသည့်မေးခွန်းများကို ဖြေဆိုပေးနိုင်ပါသည်။

^၅ ဝေစာလက်ခံယူထားသူများထံ ပြန်လည်ပတ်ခြင်း။ ငြိမ်းချမ်းသောကမ္ဘာသစ်ဝေစာကို အိမ်ရှင်နှင့်ထားရစ်ခဲ့သည့်ဆိုပါစို့။ ပြန်လည်ပတ်သည့်အခါ ဝေစာ၏အစတွင်ရှိ အပိုဒ်များကို ဆွေးနွေးနိုင်ပါသည်။

အိမ်ရှင်သည် စိတ်ဝင်စားမှုတကယ်ရှိကြောင်းတင်ပြသည့်အခါ ဆာလံ ၃၇:၂၉ ကိုကိုးကားထားသည့် စာမျက်နှာ ၃ ရှိပထမအပိုဒ်အဆုံးသို့ရောက်သောအခါ ဤသို့ပြောနိုင်ပေမည်။

▪ “အဲ့ဒီစကားများက သင်သည် ကမ္ဘာ့ပရဒိသုအတွင်း ထာဝစဉ်အသက်ရှင်နိုင်သည်ဆိုတဲ့စာအုပ်ထဲမှာဆွေးနွေးထားတဲ့အကြောင်းကို ပေါ်လွင်စေတယ်။ အခန်း ၁ ပါ ‘အဘယ်ကြောင့်ယုံကြည်နိုင်’ ခေါင်းစဉ်အောက် အပိုဒ် ၃ မှာတင်ပြထားတဲ့အချက်ကို သတိပြုပါ။” ထိုနောက် အပိုဒ် ၃ ကိုဖတ်ပြီး ယင်း၏မေးခွန်းကိုမေးကာ အပိုဒ် ၄ နှင့် ၅ ကိုထပ်တူနည်းအတိုင်းပင် မေးမြန်းနိုင်ပါသည်။ ထိုနောက် ဤသို့ပြောနိုင်မည်။ “အခု အခြေအနေတွေဟာ ဘုရားသခင့်ရည်ရွယ်ချက်နဲ့ ဘာကြောင့် ဒီလောက်ကွာခြားရသလဲ။ နောက်အပိုဒ်တွေမှာ ဒီအကြောင်းကို ရှင်းပြလိမ့်မယ်။ အဲ့ဒီမေးခွန်းရဲ့အဖြေကိုရအောင် ဒီအချိန်မှာပဲ နောက်အပတ် ပြန်လာချင်တယ်။” အိမ်ရှင်သည် တကယ်စိတ်စားမည်ဆိုလျှင် ဤအချိန်တွင် စာအုပ်ကို ဝေငှလိုပေမည်။ သို့မဟုတ် နောက်တစ်ချိန်ဆွေးနွေးခန်းအဆုံးတွင် ဝေငှပေးရန် ဆုံးဖြတ်ပေမည်။

^၆ “ထာဝစဉ်အသက်ရှင်နိုင်သည်” စာအုပ်ကိုဝေငှရန် ဤသို့ဆိုနိုင်သည်။

▪ “ဒီစာအုပ်ကို ကိုယ်ပိုင်ရချင်မှာပဲ။ အဲ့ဒါမှ ကြိုတင်ဖတ်ထားနိုင်ပြီး နောက်တစ်ခါဆွေးနွေးကြတဲ့အခါ ပိုသဘောပေါက်လိမ့်မယ်။” အိမ်ရှင်က စာအုပ်ကိုယူရန် စိတ်ဆုံးဖြတ်လျှင် ယင်း၏တန်ဖိုးကို ပြောပြနိုင်ပါသည်။

^၇ လူတို့သည် မည်သို့ထာဝစဉ်အသက်ရှင်နိုင်ကြောင်း ပြန်သွားပြောပြခြင်းသည် အလွန်အရေးကြီးသောအလုပ်ဖြစ်သည်။ ကိုယ်တိုင်တတ်သိထားသည့်အကြောင်းကို သူတစ်ပါးအား သွန်သင်ပေးရမည်ဟု ယေရှုမှာကြားခဲ့သည်။ အလုပ်လုပ်မည့်သူ များများပေးပါရန် ယေဟောဝါထံ ကျွန်ုပ်တို့ ဆုတောင်းထားပါသည်။ ထိုကြောင့် စိတ်ဝင်စားသူများကိုရှာဖွေ၍ ရိတ်သိမ်းခြင်းတွင် လုပ်ဆောင်ဖက်များဖြစ်လာရန် သူတို့အားသွန်သင်ပေးခြင်းတာဝန်ကို ကျေပွန်စွာ ထမ်းဆောင်ကြစို့။​—မ၊ ၉:၃၇။ ၂၈:၁၉၊ ၂၀။