သင်၏မြင့်မြတ်သောလုပ်ငန်းတော်၌ ရွှင်လန်းမှုရရှိခြင်း

^၁ သူတို့သည် “ရွှင်လန်းစွာ” ပြန်လာကြသည်။ ကျမ်းစာမှတ်တမ်းက တပည့်တော် ၇၀ သည် လှည့်လည်ဟောပြောပြီးနောက် ယေရှုထံ ပြန်အစီရင်ခံသည့်အခါ သူတို့မည်သို့ခံစားခဲ့ရသည်ကို ဖော်ပြသည်။ သူတို့သည် ဘုရားသခင့်အလိုတော်ဆောင်ခြင်းမှရသည့် အတွင်းစိတ်ရွှင်လန်းမှုကို ခံစားခဲ့ကြရသည်။ (လု. ၁၀:၁၇၊ သက) မြင့်မြတ်သောလုပ်ငန်းတော်၌ ထိုသို့သောရွှင်လန်းမှုရရှိရန် သင့်ကို ဘာကကူညီပေးနိုင်သနည်း။

^၂ အပြုသဘောထား– ယေဟောဝါ၏ကြီးမြတ်သည့်ရည်ရွယ်ချက်ကို လူတို့အားအသိပေးရသည့် ဘုရားပေးအခွင့်အရေးကို သင်ရရှိထားသည်။ သင်၏ဟောပြောခြင်းအားဖြင့် လူတစ်ဦးအား ဤလောက၏ယုတ်ညံ့သောအကျင့်အကြံများနှင့် မှားယွင်းသောဘာသာ၏အနှောင်အဖွဲ့များမှ လွတ်မြောက်ရန် ကူညီပေးနိုင်ပေမည်။ သင်သည် ယနေ့ကျွန်ုပ်တို့ကိုဝန်းရံနေသော စိတ်ဝမ်းကွဲပြားမှုကင်းသည့်ကမ္ဘာပေါ်အသက်တာမျှော်လင့်ချက်ကို လူတို့အားကမ်းလှမ်းနိုင်သည်။ ခံယူတတ်သောနှလုံးတွင် သမ္မာတရားမျိုးစေ့များကို သင်အောင်မြင်စွာစိုက်ပျိုးသည့်အခါ ယေဟောဝါခံစားရသည့်ရွှင်လန်းမှုကို စဉ်းစားကြည့်ပါ။ သင့်နှလုံးရှိသမျှဖြင့် ဓမ္မအမှုကိုဆက်လက်ဆောင်ရွက်နေစဉ် သင်၌ ရွှင်လန်းခြင်းအသီးသီးရန် ဘုရားသခင့်ဝိညာဉ်တော်အတွက်ဆုတောင်းရာတွင် အပြုသဘောရှိပါ။

^၃ လက်တွေ့ကျသောလေ့ကျင့်မှု– တပည့်တော် ၇၀ နှင့်ယေရှုပြုလုပ်ခဲ့သော ပို့ချမှုအစီအစဉ်ကို မျက်မှောက်ခေတ်လုပ်ငန်းတော်စည်းဝေးနှင့် နှိုင်းယှဉ်ထားသည်။ ကိုယ်တော်သည် သူတို့၏ဓမ္မအမှုကို ထိရောက်စွာပြီးမြောက်နိုင်စေရန် လေ့ကျင့်ပေးခဲ့သည်။ (လု. ၁၀:၁-၁၆) ယနေ့ လုပ်ငန်းတော်စည်းဝေးသည် သင့်အား လူတို့ကိုချဉ်းကပ်နည်းများ၊ စကားစမြည်အစပြုပြောဆိုပုံနှင့် အိမ်တွင်းကျမ်းစာသင်အံမှုများကို စတင်ကျင်းပပုံတို့ကို လေ့ကျင့်ပေးသည်။ ကြိုးစားအားထုတ်၍ သင့်ဟောပြောခြင်းစွမ်းရည်များကို တိုးတက်စေခြင်းဖြင့် သင့်တွင်ရှိနိုင်သည့် မချင့်မရဲဖြစ်ခြင်း သို့မဟုတ် လိုနေသေးသည်ဟူသော မည်သည့်ခံစားချက်များမဆို လျော့နည်းလာကာ ယင်းတို့ကို ယုံကြည်စိတ်ချမှုနှင့်ရွှင်လန်းမှုတို့က ဖုံးလွှမ်းသွားမည်ကို သင်တွေ့ရှိရပါမည်။

^၄ အနာဂတ်ကိုအာရုံစိုက်ပါ– ယေရှုသည် ဆင်းရဲဒုက္ခများခံရသည့်ကြားမှပင် မြင့်မြတ်သောလုပ်ငန်းတော်၌ ရွှင်လန်းမှုရရှိခဲ့သည်။ အဘယ်ကြောင့်နည်း။ ကိုယ်တော်သည် ရှေ့တွင်ရှိသည့်ကောင်းချီးများနှင့် အခွင့်ထူးများအပေါ် မျက်စိရှင်ရှင်ဖြင့် အာရုံစိုက်ခဲ့ခြင်းကြောင့်ဖြစ်သည်။ (ဟေဗြဲ ၁၂:၂) သင်သည်လည်း သင့်စိတ်နှင့်နှလုံးကို ယေဟောဝါ၏နာမတော်အပေါ်နှင့် ဘုရားသခင့်ကမ္ဘာသစ်တွင်ခံစားရမည့် ကောင်းချီးများအပေါ် အာရုံစိုက်စေခြင်းဖြင့် အလားတူပြုလုပ်နိုင်သည်။ ယင်းက သင့်ဓမ္မအမှုတွင် ပိုရွှင်လန်းစေသည့်အပြင် ပိုအဓိပ္ပာယ်ရှိစေပါမည်။

^၅ ယေဟောဝါ၏မြင့်မြတ်သောလုပ်ငန်းတော်ကို လုပ်ဆောင်ခြင်းသည် ယနေ့သင်ရရှိနိုင်သည့် အကြီးမားဆုံးအခွင့်အရေးဖြစ်၏။ ထို့ကြောင့် “အကျွန်ုပ်၏ဘုရားသခင်၊ ကိုယ်တော်၏အလိုကိုဆောင်ရာ၌ အကျွန်ုပ်သည် အားရဝမ်းမြောက်ပါ၏” ဟူ၍ အသင် ပြောဆိုနိုင်ပါစေ။—ဆာ. ၄၀:၈။