ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇန်နဝါရီ ၇-၁၃
ကျမ်းစာထဲက အဖိုးတန်ဘဏ္ဍာများ | တမန်တော် ၂၁-၂၂
“ယေဟောဝါဘုရားရဲ့ အလိုတော်အတိုင်း ဖြစ်ပါစေ”
(တမန်တော် ၂၁:၈-၁၂) နောက်တစ်နေ့မှာ ထွက်ခွာပြီး ကဲသရိမြို့ကို ရောက်လာတော့ သတင်းကောင်းဟောပြောသူ ဖိလိပ္ပုရဲ့အိမ်မှာ ဝင်ပြီး တည်းခိုကြတယ်။ သူဟာ ဂျေရုဆလင်မြို့မှာ တမန်တော်တွေ ရွေးချယ်ခဲ့တဲ့ အမျိုးသားခုနစ်ယောက်ထဲက တစ်ယောက်အဝင်ဖြစ်တယ်။ ၉ သူ့မှာ အိမ်ထောင်မပြုသေးတဲ့သမီး ၄ ယောက်ရှိတယ်။ သူတို့ဟာ ပရောဖက်မတွေဖြစ်တယ်။ ၁၀ အဲဒီမှာ ကျွန်တော်တို့ ရက်အတန်ကြာ တည်းခိုနေတုန်း အာဂဗုလို့ခေါ်တဲ့ ပရောဖက်တစ်ယောက် ယုဒပြည်ကနေ ရောက်လာတယ်။ ၁၁ သူက ကျွန်တော်တို့ဆီ ရောက်လာတဲ့အခါ ပေါလုရဲ့ခါးစည်းကိုယူပြီး ခြေလက်တွေကို သူ့ဘာသာသူ ချည်နှောင်တယ်။ ပြီးတော့ “‘ဂျေရုဆလင်မြို့မှာ ဂျူးတွေက ဒီခါးစည်းပိုင်ရှင်ကို ဒီလိုချည်နှောင်ပြီး လူမျိုးခြားတွေလက်ထဲ အပ်နှံလိမ့်မယ်’ လို့ သန့်ရှင်းသော စွမ်းအားတော်က အသိပေးပါတယ်” ဆိုပြီး ဟောတယ်။ ၁၂ ဒီစကားကိုကြားတော့ ကျွန်တော်တို့ရော အဲဒီမှာရှိနေသူတွေကပါ ဂျေရုဆလင်မြို့ကို မသွားဖို့ ပေါလုကို တောင်းပန်တယ်။
“ယေဟောဝါဘုရား၏ အလိုတော်အတိုင်း ဖြစ်ပါစေ”
၁၅ ဖိလိပ္ပုအိမ်တွင် ပေါလုရှိနေစဉ် လူတို့လေးစားသော အာဂဗုအမည်ရှိသူ ရောက်လာ၏။ သူသည် ပရောဖက်တစ်ဦးဖြစ်ကြောင်း ဖိလိပ္ပုအိမ်တွင် စုရုံးနေကြသူများ သိထားကြသည်။ ကလောဒိမင်း လက်ထက်က ကြီးစွာသော ငတ်မွတ်ခြင်းဘေး အကြောင်း သူ ကြိုဟောခဲ့ဖူးသည်။ (တ. ၁၁:၂၇၊ ၂၈) ‘အာဂဗု အဘယ်ကြောင့် ရောက်လာသနည်း။ အဘယ်သတင်း ယူဆောင်လာသနည်း’ ဟု သူတို့ သိလိုကြပေမည်။ သူတို့ အာရုံစိုက်ကြည့်ရှုနေစဉ် အာဂဗုသည် ပေါလု၏ခါးပန်းကို ယူလိုက်သည်။ ထိုခါးပန်းသည် ငွေနှင့် အခြားပစ္စည်းများကို ထည့်နိုင်သည့် ခါးပတ်ကဲ့သို့သော အဝတ်စဖြစ်၏။ အာဂဗုသည် ထိုခါးပန်းဖြင့် မိမိခြေလက်တို့ကို ချည်နှောင်လိုက်သည်။ ထို့နောက် အရေးကြီးသော ဤသတင်းစကားကို ပြောလေ၏– “‘ဤခါးပန်းရှင်ကို ဂျူးတို့သည် ဂျေရုဆလင်မြို့တွင် ဤသို့ချည်နှောင်ပြီးလျှင် လူမျိုးခြားတို့လက်သို့ အပ်နှံကြလိမ့်မည်’ ဟု သန့်ရှင်းသော စွမ်းအားတော်က ဆင့်ဆိုသည်။”—တ. ၂၁:၁၁။
၁၆ ထိုပရောဖက်ပြုချက်အတိုင်း ပေါလုသည် ဂျေရုဆလင်မြို့သို့ သွားရမည်မှာ သေချာ၏။ ထိုတွင်ရှိသော ဂျူးတို့ကို ဟောပြောခြင်းကြောင့် “လူမျိုးခြားတို့လက်သို့” အပ်နှံခံရမည်ကိုလည်း ဖော်ပြသည်။ အဆိုပါပရောဖက်ပြုချက်ကြောင့် ထိုတွင်ရှိနေသူများ အကြီးအကျယ် စိတ်လှုပ်ရှားသွားကြ၏။ လုကာ ဤသို့ရေးသည်– “ထိုစကားကိုကြားလျှင် ငါတို့နှင့် ထိုအရပ်၌ ရှိသောသူတို့က ဂျေရုဆလင်မြို့သို့ မတက်သွားပါရန် ပေါလုကို တောင်းပန်ကြ၏။ ပေါလုကလည်း ‘အဘယ်ကြောင့် ငိုကြွေးလျက်၊ ငါ့စိတ်နှလုံးကို ကြေကွဲစေကြသနည်း။ သခင်ယေရှု၏ နာမတော်အတွက် ဂျေရုဆလင်မြို့၌ ချည်နှောင်ခြင်းမက အသေသတ်ခြင်းကိုပင် ခံရန် ငါအသင့်ရှိ၏’ ဟုဖြေဆို၏။”—တ. ၂၁:၁၂၊ ၁၃။
(တမန်တော်၂၁:၁၃) ပေါလုက “ဘာလို့ ငိုနေကြတာလဲ။ ကျွန်တော့်သန္နိဋ္ဌာန် ပျက်ပြားအောင် ဘာလို့လုပ်နေကြတာလဲ။ သခင်ယေရှုရဲ့ နာမည်အတွက်ဆိုရင် ဂျေရုဆလင်မြို့မှာ ချည်နှောင်ခံရရုံမက အသေခံဖို့တောင် အသင့်ပါပဲ” လို့ပြောတယ်။
“ယေဟောဝါဘုရား၏ အလိုတော်အတိုင်း ဖြစ်ပါစေ”
၁၇ မြင်ယောင်ကြည့်လိုက်ပါ။ လုကာအပါအဝင် ညီအစ်ကိုများက ဆက်မသွားရန် ပေါလုကို တောင်းပန်နေကြသည်။ အချို့က ငိုကြွေးနေကြသည်။ သူ့ကို ဤမျှချစ်ခင်ပြီး စိုးရိမ်ပူပန်ပေးကြသည့်အတွက် ပေါလုက သူတို့သည် မိမိ၏ “စိတ်နှလုံးကို ကြေကွဲစေ” သည်ဟု ကြင်နာစွာ ဆို၏။ သို့တိုင် သူ အခိုင်အမာ ဆုံးဖြတ်ထားပြီး ဖြစ်သည်။ တိုင်ရာမြို့ရှိ ညီအစ်ကိုများနှင့် တွေ့ဆုံစဉ်ကကဲ့သို့ပင် အသနားခံမှုများ၊ မျက်ရည်များကြောင့် သူ ဝေခွဲမရဖြစ်မည် မဟုတ်ပါ။ ယင်းအစား သူအဘယ်ကြောင့် ဆက်သွားရမည်ကို ရှင်းပြသည်။ တကယ့်ကို သတ္တိရှိပြီး စိတ်ခိုင်မာလိုက်လေခြင်း။ ယခင်က ယေရှု ပြုသကဲ့သို့ပင် ပေါလုသည် ဂျေရုဆလင်မြို့သို့ သွားရန် စိတ်ပိုင်းဖြတ်ပြီးသား ဖြစ်၏။ (ဟေဗြဲ ၁၂:၂) ပေါလုသည် အာဇာနည်တစ်ဦးအဖြစ် သေလို၍ ထိုသို့ပြုခြင်း မဟုတ်ပါ။ သူ သေရမည်ဆိုလျှင်လည်း ခရစ်တော်ယေရှု၏ နောက်လိုက်တစ်ဦးအဖြစ် သေရခြင်းကို သူ ဂုဏ်ယူပါမည်။
(တမန်တော် ၂၁:၁၄) ဘယ်လိုမှ ဖျောင်းဖျလို့ မရတဲ့အခါ သူ့ကို မတားဆီးတော့ဘဲ “ယေဟောဝါ ဘုရားရဲ့ အလိုတော်အတိုင်း ဖြစ်ပါစေ” လို့ပဲ ပြောလိုက်တယ်။
“ယေဟောဝါဘုရား၏ အလိုတော်အတိုင်း ဖြစ်ပါစေ”
၁၈ ညီအစ်ကိုများ မည်သို့တုံ့ပြန်ကြသနည်း။ လေးစားစွာ တုံ့ပြန်ခဲ့ကြသည်။ “ငါတို့သည် သူ့ကို ဖျောင်းဖျ၍ မရသောအခါ ‘ယေဟောဝါဘုရား၏ အလိုတော်အတိုင်း ဖြစ်ပါစေ’ ဟုဆိုလျက် သဘောတူလိုက်ကြ၏” ဟု ကျွန်ုပ်တို့ ဖတ်ရသည်။ (တ. ၂၁:၁၄) ဂျေရုဆလင်မြို့သို့ မသွားရန် ပေါလုကို ကြိုးစားဖျောင်းဖျခဲ့သူတို့ လက်လျှော့လိုက်ကြသည်။ ယေဟောဝါဘုရား၏ အလိုတော်ကို အသိအမှတ်ပြုလက်ခံရန် မိမိတို့အတွက် ခက်ခဲသော်လည်း ပေါလု၏စကားကို ခံယူပြီး လိုက်လျောခဲ့ကြ၏။ ပေါလုသည် သေခြင်းဖြင့် အဆုံးသတ်မည့် ခရီးစဉ်ကို စထွက်လေသည်။ ချစ်ခင်ရသူများက ဖျောင်းဖျပြောဆိုခြင်း မပြုလျှင် ပေါလုအတွက် ပို၍လွယ်ကူပါလိမ့်မည်။
ရှာဖွေလေ့လာ ဘုရားရေးရာရတနာ
(တမန်တော် ၂၁:၂၃၊ ၂၄) ဒါကြောင့် ကျွန်တော်တို့ ပြောတဲ့အတိုင်း လုပ်ပါ– ကျွန်တော်တို့ဆီမှာ ဘုရားကို သစ္စာကတိပြုထားတဲ့သူ လေးယောက်ရှိတယ်။ ၂၄ ခင်ဗျားက သူတို့နဲ့အတူ သွားပြီး မောရှေပညတ်မှာပါတဲ့အတိုင်း ကိုယ်ကို သန့်စင်အောင် လုပ်လိုက်ပါ။ သူတို့ ခေါင်းရိတ်နိုင်ဖို့ လိုအပ်တဲ့ ကုန်ကျစရိတ်ကိုလည်း ကျခံပေးလိုက်ပါ။ အဲဒီလိုလုပ်ရင် ခင်ဗျားနဲ့ပတ်သက်ပြီး သူတို့ကြားတဲ့သတင်းဟာ ကောလာဟလ ဖြစ်နေမှန်း၊ ခင်ဗျားက ဖြောင့်မှန်စွာ ကျင့်ကြံပြီး ပညတ်တရားကို လိုက်နာမှန်း လူတိုင်း သိသွားလိမ့်မယ်။
“ကျွန်ုပ် ထုချေမည့်စကားကို နားထောင်ကြပါ”
၁၀ မည်သို့ပင်ဖြစ်စေ၊ ပေါလုသည် ဥပုသ်နေ့တွင် အလုပ်မလုပ်ခြင်း၊ အစာတချို့ကို ရှောင်ခြင်း အစရှိသော ဂျူးထုံးစံတချို့ကို လိုက်လျှောက်သူများအပေါ် နားလည်ပေးခဲ့သည်။ (ရော. ၁၄:၁-၆) ထို့ပြင် အရေဖျားလှီးခြင်းနှင့်ပတ်သက်၍ ပညတ်များ မထုတ်ပြန်ခဲ့ချေ။ အမှန်ဆိုရလျှင်၊ တိမောသေ၏ဖခင်သည် ဂရိလူမျိုးဖြစ်သဖြင့် ဂျူးတို့ တိမောသေကို သံသယရှိမည်စိုး၍ ပေါလုက သူ့အား အရေဖျားလှီးစေခဲ့သည်။ (တ. ၁၆:၃) အရေဖျားလှီးခြင်းကိစ္စသည် ကိုယ်ပိုင်ဆုံးဖြတ်ရမည့်ကိစ္စ ဖြစ်၏။ ပေါလုက “အရေဖျားလှီးသည်ဖြစ်စေ၊ မလှီးသည်ဖြစ်စေ မည်သို့မျှ အကျိုးမရှိ။ ချစ်ခြင်းမေတ္တာမှ ပေါက်ဖွားသော ယုံကြည်ခြင်းသည်သာ အကျိုးရှိ၏” ဟု ဂလာတိအသင်းသားတို့ကို ပြောခဲ့သည်။ (ဂလ. ၅:၆) သို့သော် ပညတ်တရားကို လိုက်လျှောက်သည့်အနေနှင့် အရေဖျားလှီးခြင်း၊ ယေဟောဝါဘုရား၏ မျက်နှာသာရရှိရန် အရေဖျားလှီးဖို့ လိုသည်ဟု ယူဆခြင်းတို့သည် ယုံကြည်ခြင်းကင်းမဲ့ရာ ရောက်၏။
၁၁ ပေါလုနှင့်ပတ်သက်သည့် သတင်းများမှာ မမှန်ကန်သော်လည်း ၎င်းကြောင့် ဂျူးယုံကြည်သူများ စိတ်အနှောင့်အယှက် ဖြစ်နေသေးသည်။ ထို့ကြောင့် အကြီးအကဲများက ပေါလုကို ဤသို့ ပြုလုပ်ခိုင်းသည်– “ငါတို့တွင် သစ္စာကတိပြုထားသူ လေးဦး ရှိ၏။ ဤသူတို့ကို ခေါ်သွား၍ သူတို့နှင့်တကွ သန့်စင်ခြင်းဝတ်ကို ပြုပါ။ သူတို့၏ ခေါင်းရိတ်ခကိုလည်း ကျခံပေးပါ။ ထိုသို့ပြုလျှင် သင့်အကြောင်း သူတို့ကြားသောသတင်း မမှန်သည်ကိုလည်းကောင်း၊ သင်ကိုယ်တိုင် ပညတ်တရားကို စောင့်ရှောက်၍ ကျင့်ကြံနေသည်ကိုလည်းကောင်း လူတိုင်း သိကြလိမ့်မည်။”—တ. ၂၁:၂၃၊ ၂၄။
၁၂ တကယ့်ပြဿနာမှာ မိမိနှင့်ပတ်သက်သော မဟုတ်မမှန်စကားများ မဟုတ်ဘဲ မောရှေပညတ်အပေါ် ဂျူးယုံကြည်သူများ၏ စိတ်အားကြီးမှု ဖြစ်သည်ဟု ပေါလု ကန့်ကွက်ပြောဆိုနိုင်သည်။ သို့သော် သူသည် ဘုရားသခင့်မူများနှင့် မဆန့်ကျင်သရွေ့ အလိုက်အထိုက် လုပ်ဆောင်ပေးရန် အသင့်ရှိခဲ့၏။ ယင်းမတိုင်မီက ပေါလု ဤသို့စာရေးခဲ့သည်– “ပညတ်တရားအောက်၌ ကိုယ်တိုင် မရှိသော်လည်း ပညတ်တရားအောက်ရှိ လူတို့ကို ရရန် ပညတ်တရားအောက်ရှိသူတို့တွင် ပညတ်တရားအောက်၌ ရှိသောသူကဲ့သို့ ဖြစ်လာ၏။” (၁ ကော. ၉:၂၀) ဤအချိန်အခါတွင် ပေါလုသည် ဂျေရုဆလင်မြို့ရှိ အကြီးအကဲများနှင့် ပူးပေါင်းဆောင်ရွက်ပြီး “ပညတ်တရားအောက်၌ ရှိသောသူကဲ့သို့” ဖြစ်လာ၏။ သူသည် ထိုသို့ပြုလုပ်ခြင်းဖြင့် ယနေ့ ကျွန်ုပ်တို့အတွက် စံနမူနာကောင်း ချမှတ်ပေးခဲ့သည်။ ကျွန်ုပ်တို့၏ စဉ်းစားတွေးခေါ်မှုအတိုင်း တဇွတ်ထိုး မပြုလုပ်ဘဲ အကြီးအကဲများနှင့် ပူးပေါင်းဆောင်ရွက်ဖို့ လိုသည်။—ဟေဗြဲ ၁၃:၁၇။
(တမန်တော် ၂၂:၁၆) ဒါကြောင့် ဘာလို့ အချိန်ဆွဲနေမှာလဲ။ အခု ထပြီး နှစ်ခြင်းခံလိုက်ပါ။ သခင့်နာမည်နဲ့ ဆုတောင်းပါ။ ဒါဆိုရင် ခင်ဗျားရဲ့ အပြစ်တွေကို ဘုရားသခင် ခွင့်လွှတ်လိမ့်မယ်’ လို့ပြောတယ်
nwtsty တ ၂၂:၁၆ လေ့လာမှု မှတ်စု
သခင့်နာမည်နဲ့ ဆုတောင်းပါ။ ဒါဆိုရင် ခင်ဗျားရဲ့ အပြစ်တွေကို ဘုရားသခင် ခွင့်လွှတ်လိမ့်မယ်– လူတစ်ယောက်ရဲ့အပြစ်တွေ ခွင့်လွှတ်ခံရမှာက နှစ်ခြင်းခံလိုက်လို့ မဟုတ်ဘဲ ယေရှုရဲ့နာမည်နဲ့ ဆုတောင်းလို့ ဖြစ်တယ်။ ဆုတောင်းခြင်းမှာ ယေရှုကို ယုံကြည်ခြင်း၊ အဲဒီယုံကြည်ခြင်းကို ခရစ်ယာန်လုပ်ရပ်တွေနဲ့ ပြခြင်း ပါဝင်တယ်။—တ ၁၀:၄၃။ ယာ ၂:၁၄၊ ၁၈။
ကျမ်းစာဖတ်ရှုခြင်း
(တမန်တော် ၂၁:၁-၁၉) သူတို့နဲ့ မခွဲချင်ဘဲ ခွဲခွာပြီးနောက် ကျွန်တော်တို့က သင်္ဘောကို တည့်တည့်ရွက်လွှင့်ပြီး ကောသမြို့ကို ရောက်လာတယ်။ နောက်တစ်နေ့မှာ ရောဒုကျွန်းကို ရောက်တယ်။ အဲဒီကျွန်းကနေ ပါတရမြို့ကို ရောက်တယ်။ ၂ ဖိုနီးရှားပြည်ကိုသွားမယ့် သင်္ဘောနဲ့ကြုံတော့ တက်စီးပြီး ရွက်လွှင့်သွားကြတယ်။ ၃ ဘယ်ဘက်ကို လှမ်းကြည့်ရင် ဆိုက်ပရပ်ကျွန်းကို မြင်ရတဲ့နေရာ ရောက်လာတော့ အဲဒီကျွန်းနားကနေ ဖြတ်ပြီး ဆီးရီးယားပြည်ကို ရွက်လွှင့်သွားတယ်။ သင်္ဘောကုန်စည်တွေကို တိုင်ရာမြို့မှာ ချတဲ့အတွက် ကျွန်တော်တို့လည်း ကုန်းပေါ်တက်လိုက်တယ်။ ၄ အဲဒီမြို့မှာ တပည့်တွေကို ရှာတွေ့တာနဲ့ ခုနစ်ရက်နေကြတယ်။ တပည့်တွေက စွမ်းအားတော် ဖော်ပြထားတဲ့အတွက် ဂျေရုဆလင်မြို့ကို မသွားဖို့ ပေါလုကို အကြိမ်ကြိမ် တားကြတယ်။ ၅ ခုနစ်ရက်စေ့တဲ့အခါ ကျွန်တော်တို့ ထွက်ခွာပြီး ခရီးဆက်မယ်လုပ်တော့ တပည့်တွေက ဇနီးတွေ၊ ကလေးတွေနဲ့အတူ မြို့ပြင်အထိ လိုက်ပို့ကြတယ်။ ပင်လယ်ကမ်းခြေမှာပဲ ကျွန်တော်တို့ ဒူးထောက်ပြီး အတူဆုတောင်းကြတယ်။ ၆ အဲဒီနောက် သူတို့ကို နှုတ်ဆက်ပြီး သင်္ဘောပေါ် တက်ကြတယ်။ သူတို့လည်း အိမ်ပြန်သွားတယ်။ ၇ ကျွန်တော်တို့က တိုင်ရာမြို့ကနေ သင်္ဘောနဲ့ ရွက်လွှင့်လာခဲ့တာ ပတောလမဲမြို့ကို ရောက်လာတယ်။ အဲဒီမြို့မှာ ညီအစ်ကိုတွေကို ဝင်နှုတ်ဆက်ပြီး သူတို့နဲ့ တစ်ရက်နေတယ်။ ၈ နောက်တစ်နေ့မှာ ထွက်ခွာပြီး ကဲသရိမြို့ကို ရောက်လာတော့ သတင်းကောင်းဟောပြောသူ ဖိလိပ္ပုရဲ့အိမ်မှာ ဝင်ပြီး တည်းခိုကြတယ်။ သူဟာ ဂျေရုဆလင်မြို့မှာ တမန်တော်တွေ ရွေးချယ်ခဲ့တဲ့ အမျိုးသားခုနစ်ယောက်ထဲက တစ်ယောက်အဝင် ဖြစ်တယ်။ ၉ သူ့မှာ အိမ်ထောင်မပြုသေးတဲ့သမီး ၄ ယောက်ရှိတယ်။ သူတို့ဟာ ပရောဖက်မတွေ ဖြစ်တယ်။ ၁၀ အဲဒီမှာ ကျွန်တော်တို့ ရက်အတန်ကြာ တည်းခိုနေတုန်း အာဂဗုလို့ခေါ်တဲ့ ပရောဖက်တစ်ယောက် ယုဒပြည်ကနေ ရောက်လာတယ်။ ၁၁ သူက ကျွန်တော်တို့ဆီ ရောက်လာတဲ့အခါ ပေါလုရဲ့ခါးစည်းကိုယူပြီး ခြေလက်တွေကို သူ့ဘာသာသူ ချည်နှောင်တယ်။ ပြီးတော့ “‘ဂျေရုဆလင်မြို့မှာ ဂျူးတွေက ဒီခါးစည်းပိုင်ရှင်ကို ဒီလိုချည်နှောင်ပြီး လူမျိုးခြားတွေလက်ထဲ အပ်နှံလိမ့်မယ်’ လို့ သန့်ရှင်းသော စွမ်းအားတော်က အသိပေးပါတယ်” ဆိုပြီး ဟောတယ်။ ၁၂ ဒီစကားကိုကြားတော့ ကျွန်တော်တို့ရော အဲဒီမှာရှိနေသူတွေကပါ ဂျေရုဆလင်မြို့ကို မသွားဖို့ ပေါလုကို တောင်းပန်တယ်။ ၁၃ ပေါလုက “ဘာလို့ ငိုနေကြတာလဲ။ ကျွန်တော့်သန္နိဋ္ဌာန် ပျက်ပြားအောင် ဘာလို့လုပ်နေကြတာလဲ။ သခင်ယေရှုရဲ့ နာမည်အတွက်ဆိုရင် ဂျေရုဆလင်မြို့မှာ ချည်နှောင်ခံရရုံမက အသေခံဖို့တောင် အသင့်ပါပဲ” လို့ပြောတယ်။ ၁၄ ဘယ်လိုမှ ဖျောင်းဖျလို့ မရတဲ့အခါ သူ့ကို မတားဆီးတော့ဘဲ “ယေဟောဝါ ဘုရားရဲ့ အလိုတော်အတိုင်း ဖြစ်ပါစေ” လို့ပဲ ပြောလိုက်တယ်။ ၁၅ အဲဒီနောက် ခရီးစဉ်အတွက် ကျွန်တော်တို့ပြင်ဆင်ပြီး ဂျေရုဆလင်မြို့ကို ခရီးစထွက်လာတယ်။ ၁၆ ကဲသရိမြို့သား တပည့်တချို့လည်း အတူလိုက်ပါလာပြီး ကျွန်တော်တို့တည်းခိုရမယ့် ဆိုက်ပရပ်ကျွန်းသား မနာသုန်ရဲ့ အိမ်ဆီ ခေါ်သွားတယ်။ မနာသုန်ဟာ အစောပိုင်းတုန်းက တပည့်ဖြစ်လာတဲ့သူပဲ။ ၁၇ ဂျေရုဆလင်မြို့ကို ရောက်တဲ့အခါ ကျွန်တော်တို့ကို ညီအစ်ကိုတွေ ဝမ်းသာအားရ ကြိုဆိုကြတယ်။ ၁၈ နောက်တစ်နေ့မှာ ပေါလုက ကျွန်တော်တို့နဲ့အတူ ယာကုပ်ကို သွားတွေ့တော့ အဲဒီမှာ အကြီးအကဲအားလုံး ရောက်နေတယ်။ ၁၉ ပေါလုက သူတို့ကို နှုတ်ခွန်းဆက်ပြီးတဲ့နောက် သူ့ရဲ့ ဟောပြောခြင်းလုပ်ငန်းကတစ်ဆင့် လူမျိုးခြားတွေဆီမှာ ဘုရားသခင် လုပ်ဆောင်ခဲ့ရာတွေအကြောင်း အသေးစိတ် ပြန်ပြောပြတယ်။
ဇန်နဝါရီ ၁၄-၂၀
ကျမ်းစာထဲက အဖိုးတန်ဘဏ္ဍာများ | တမန်တော် ၂၃-၂၄
“သွေးထိုးလှုံ့ဆော်ပေးတဲ့ အဖျက်သမားအဖြစ် စွပ်စွဲခံခဲ့ရ”
(တမန်တော် ၂၃:၁၂) မိုးလင်းတဲ့အခါ ဂျူးတွေက ပေါလုကို လုပ်ကြံဖို့ လျှို့ဝှက်ကြံစည်ကြတယ်။ သူ့ကို မသတ်ရသေးခင် စားသောက်မိရင် ကျိန်စာသင့်ပါစေ ဆိုပြီး ကျိန်ကြတယ်။
(တမန်တော် ၂၃:၁၆) သူတို့ ချောင်းမြောင်းလုပ်ကြံမယ့်အကြောင်း ပေါလုရဲ့တူက ကြားသွားတဲ့အခါ စစ်တန်းလျားထဲ ဝင်လာပြီး ပေါလုကို ပြောပြတယ်။
“အားယူလော့”
၅ ပေါလုရရှိခဲ့သော အားပေးမှုသည် အချိန်တန်ပင် ဖြစ်၏။ နောက်တစ်နေ့တွင် ဂျူးအမျိုးသား ၄၀ ကျော်တို့သည် “သင်းဖွဲ့ကြံစည်၍ ပေါလုကို မသတ်ရမချင်း မစားမသောက်ဟု ကျိန်ဆို၍ အဓိဋ္ဌာန်ပြုကြ၏။” အဆိုပါ “သင်းဖွဲ့ကြံစည်” မှုက တမန်တော်အား လုပ်ကြံရန် ထိုဂျူးတို့ မည်မျှအခိုင်အမာ ဆုံးဖြတ်ပြီးဖြစ်ကြောင်း ဖော်ပြသည်။ သူတို့၏အကြံအစည် မအောင်မြင်လျှင် သူတို့ အဖြစ်ဆိုးနှင့်ကြုံရမည် သို့မဟုတ် ကျိန်ခြင်းခံရမည်ဟု ယုံကြည်ကြသည်။ (တ. ၂၃:၁၂-၁၅) ယဇ်ပုရောဟိတ်ကြီးများနှင့် လူကြီးများ အတည်ပြုသော ထိုဂျူးတို့၏ အကြံအစည်မှာ ပေါလု၏အမှုကို ပိုမိုတိကျစွာ စစ်ဆေးလိုဟန်ဖြင့် သူ့ကို ဂျူးတရားရုံးချုပ်သို့ ပြန်ခေါ်လာရန် ဖြစ်သည်။ သို့သော် သင်းဖွဲ့ကြံစည်သူများသည် လမ်းတွင်ပင် ပေါလုကို တိုက်ခိုက်လုပ်ကြံမည် ဖြစ်၏။
၆ သို့သော် ပေါလု၏တူသည် ထိုအကြံအစည်ကို သိသွားပြီး ပေါလုထံ သတင်းပို့ခဲ့သည်။ တစ်ဖန် ပေါလုက ထိုလုလင်အား ရောမစစ်သူကြီး ကလောဒိလုသိထံ သတင်းပို့စေခဲ့သည်။ (တ. ၂၃:၁၆-၂၂) အမည်မဖော်ပြသည့် ပေါလု၏တူကဲ့သို့ မိမိတို့အကျိုးထက် ဘုရားသခင့်လူမျိုးတော်၏အကျိုးအတွက် သတ္တိရှိရှိ လုပ်ဆောင်သော၊ နိုင်ငံတော်အကျိုးစီးပွား တိုးတက်ရန် မိမိတို့လုပ်နိုင်သမျှ သစ္စာရှိရှိ လုပ်ဆောင်သော လူငယ်များကို ယေဟောဝါဘုရား ချစ်မြတ်နိုးမည်မှာ သေချာပါသည်။
(တမန်တော် ၂၄:၂) တေရတုလုကို ပြောဆိုခွင့်ပေးလိုက်တဲ့အခါ သူ စပြီး စွဲချက်တင်တော့တယ်– “ကြီးမြတ်တဲ့ ဖေလဇ်မင်း၊ မင်းကြီးရဲ့ကျေးဇူးကြောင့် ကျွန်တော်တို့ အေးချမ်းသာယာစွာ နေထိုင်နေရပါတယ်။ မင်းကြီးရဲ့ အမြော်အမြင် ကြီးမားမှုကြောင့် တိုးတက်ပြောင်းလဲမှုတွေကိုလည်း ဒီလူမျိုးတွေ ခံစားနေရပါတယ်။
(တမန်တော် ၂၄:၅၊ ၆) ဒီလူဟာ မြေတစ်ပြင်လုံးမှာရှိတဲ့ ဂျူးတွေ ပုန်ကန်ထကြွအောင် သွေးထိုးလှုံ့ဆော်ပေးတဲ့ အဖျက်သမား ဖြစ်နေမှန်း၊ နာဇရက်မြို့သားတွေရဲ့ ဂိုဏ်းချုပ် ဖြစ်နေမှန်း ကျွန်တော်တို့ စစ်ဆေးတွေ့ရှိရပါတယ်။ ၆ ဗိမာန်တော်ကိုလည်း ညစ်ညူးအောင်လုပ်ဖို့ ကြိုးစားတဲ့အတွက် သူ့ကို ဖမ်းဆီးလိုက်ပါတယ်။
“အားယူလော့”
၁၀ ဂျေရုဆလင်မြို့မှ စွပ်စွဲသူများ မရောက်မချင်း ပေါလုကို ကဲသရိမြို့တွင် “ဟေရုဒ်မင်း၏နန်းတော်၌ အစောင့်အကြပ်နှင့်ထား” ခဲ့သည်။ (တ. ၂၃:၃၅) ငါးရက်ကြာသော် ယဇ်ပုရောဟိတ်မင်း အာနနိ၊ တေရတုလု အမည်ရှိသော ရှေ့နေနှင့် လူကြီးတစ်စု ရောက်ရှိလာကြသည်။ တေရတုလုသည် ဂျူးတို့အတွက် ဖေလဇ်မင်း ပြုလုပ်ပေးရာကို ဦးစွာ ချီးမွမ်းပြောဆိုခဲ့သည်။ ထိုသို့ပြုခြင်းမှာ ဖေလဇ်မင်းကို မြှောက်ပင့်ပြီး သူ၏မျက်နှာသာရလို၍ ဖြစ်သည်။ ထို့နောက် အမှုကိစ္စနှင့်ပတ်သက်၍ တေရတုလုက ပေါလုကို “အလွန်နှောင့်ယှက်တတ်၍ လူနေရာ မြေတစ်ပြင်လုံးရှိ ဂျူးအပေါင်းကို ဆူပူထကြွစေရန် လှုံ့ဆော်ပေးသော နာဇရက်ဂိုဏ်းချုပ်” ဖြစ်သည်ဟု စွပ်စွဲသည့်အပြင် “ဗိမာန်တော်ကို ညစ်ညူးစေရန် ကြိုးစားသဖြင့် သူ့ကို ကျွန်ုပ်တို့ ဖမ်းဆီးကြပါ၏” ဟူ၍ အကျဉ်းချုပ် လျှောက်လဲခဲ့သည်။ အခြားဂျူးတို့ကလည်း “ဤစကားများ မှန်ပါသည်ဟု ထောက်ခံပြောဆိုလျက် ဝိုင်း၍ ထိုးနှက်ပြောဆိုကြ၏။” (တ. ၂၄:၅၊ ၆၊ ၉) ဆူပူထကြွစေခြင်း၊ အန္တရာယ်ဂိုဏ်းကို ဦးစီးဦးဆောင်ခြင်း၊ ဗိမာန်တော်ကို ညစ်ညူးစေခြင်းတို့သည် သေဒဏ်ခံထိုက်သော ကြီးလေးသည့် စွဲချက်များပင် ဖြစ်သည်။
(တမန်တော် ၂၄:၁၀-၂၁) ဘုရင်ခံက ခေါင်းညိတ်ပြပြီး လျှောက်လဲခွင့် ပေးလိုက်တဲ့အခါ ပေါလုက– “မင်းကြီးဟာ ဒီလူမျိုးကို နှစ်ပေါင်းများစွာ တရားစီရင်ခဲ့မှန်း ကျွန်တော် ကောင်းကောင်းသိပါတယ်။ ဒါကြောင့် ဝမ်းမြောက်ဝမ်းသာ ထုချေလျှောက်ထားပါမယ်။ ၁၁ ဘုရားသခင်ကို ဝတ်ပြုကိုးကွယ်ဖို့ ဂျေရုဆလင်မြို့ကို ကျွန်တော်တက်လာခဲ့တာ ၁၂ ရက် မကျော်သေးပါဘူး။ ဒီအချက် မှန်မမှန် မင်းကြီးကိုယ်တိုင် စစ်ဆေးကြည့်လို့ ရပါတယ်။ ၁၂ ဗိမာန်တော်မှာ တစ်ယောက်ယောက်နဲ့ ကျွန်တော် ငြင်းခုံနေတာ၊ တရားဇရပ်မှာဖြစ်စေ၊ မြို့ထဲမှာဖြစ်စေ လူအုပ်ကို ဆူပူအုံကြွလာအောင် ကျွန်တော်လုပ်နေတာ သူတို့ တစ်ခါမှ မတွေ့ဖူးပါဘူး။ ၁၃ အခုစွဲချက်နဲ့ ပတ်သက်ပြီးတော့လည်း သက်သေအထောက်အထား မပြနိုင်ကြပါဘူး။ ၁၄ ဒါပေမဲ့ ကျွန်တော်က ပညတ်ကျမ်းနဲ့ ပရောဖက်ကျမ်းတွေမှာ ရေးသားထားသမျှကို ယုံကြည်တဲ့အတွက် နာဇရက်မြို့သားတွေရဲ့ ဂိုဏ်းဆိုပြီး သူတို့ခေါ်တဲ့ လမ်းစဉ်အတိုင်း ဘိုးဘေးတို့ရဲ့ဘုရားသခင်ကို ဝတ်ပြုကြောင်း ဝန်ခံပါတယ်။ ၁၅ ဖြောင့်မတ်သူရော မဖြောင့်မတ်သူတွေပါ ရှင်ပြန်ထမြောက်လာမယ့်အကြောင်း သူတို့မျှော်လင့်သလို ကျွန်တော်လည်း ဘုရားသခင်ကို အမှီပြုပြီး မျှော်လင့်ပါတယ်။ ၁၆ ဒါကြောင့် ကျွန်တော်က ဘုရားသခင်ရှေ့၊ လူရှေ့မှာ ကြည်လင်တဲ့ အမှားအမှန်သိစိတ် ရှိနိုင်ဖို့ အမြဲကြိုးစားပါတယ်။ ၁၇ တကယ်တော့ လူမျိုးချင်းတွေကို ပေးကမ်းဖို့၊ ဘုရားသခင်ဆီ အလှူတွေ ဆက်သဖို့ ဂျေရုဆလင်ကို နှစ်အတော်ကြာပြီးမှ ရောက်လာတာပါ။ ၁၈ အဲဒီကိစ္စတွေ ဆောင်ရွက်တဲ့အခါမှာလည်း လူတွေ အုပ်လိုက်နဲ့ လုပ်တာမျိုး၊ ရုန်းရင်းဆန်ခတ် ဖြစ်တာမျိုး မရှိခဲ့ပါဘူး။ မောရှေပညတ်မှာပါတဲ့အတိုင်း ဗိမာန်တော်မှာ ကျွန်တော် ကိုယ်ကိုသန့်စင်တာကိုပဲ သူတို့ တွေ့ကြပါတယ်။ ဒါပေမဲ့ အာရှနယ်ကလာတဲ့ ဂျူးတချို့တော့ ရှိပါတယ်။ ၁၉ စွပ်စွဲစရာရှိတယ်ဆိုရင် အဲဒီဂျူးတွေလည်း မင်းကြီးရှေ့ ရောက်လာပြီး ကျွန်တော့်ကို စွပ်စွဲသင့်ပါတယ်။ ၂၀ ဒါမှမဟုတ် ဂျူးတရားရုံးချုပ် အဖွဲ့ဝင်တွေရှေ့မှာ စစ်ဆေးတုန်းက ကျွန်တော့်မှာ ဘာအမှား တွေ့ခဲ့လဲဆိုတာ ဒီမှာရှိတဲ့လူတွေ ကိုယ်တိုင် လျှောက်လဲကြပါစေ။ ၂၁ အဲဒီတုန်းက ‘လူသေတွေ ရှင်ပြန်ထမြောက်လာမယ့်အကြောင်းကို ကျွန်တော် ယုံကြည်လို့ အခုလို စစ်ကြောစီရင်ခံနေရတာပါ’ လို့ပဲ ပြောမိပါတယ်” ဆိုပြီး ပြောတယ်။
“အားယူလော့”
၁၃ ကျွန်ုပ်တို့၏ဝတ်ပြုရေးကြောင့် လောကအာဏာပိုင်များရှေ့ ခေါ်ဆောင်ခံရပြီး ပုန်ကန်ရန် လှုံ့ဆော်ပေးသူများ၊ ဆူပူထကြွစေသူများ၊ “အန္တရာယ်ဂိုဏ်း” သားများဟူ၍ မဟုတ်မမှန် စွပ်စွဲခံရလျှင် ပေါလု၏စံနမူနာအတိုင်း ကျွန်ုပ်တို့ လိုက်လျှောက်နိုင်ကြသည်။ ပေါလုသည် တေရတုလုကဲ့သို့ မြှောက်ပင့်စကားများဖြင့် ဘုရင်ခံကို မျက်နှာလိုမျက်နှာရ မပြုခဲ့ပေ။ အေးဆေးတည်ငြိမ်၊ လေးစားစွာ ဆက်ဆံခဲ့သည်။ လိမ္မာပါးနပ်မှုဖြင့် ပြတ်သားမှန်ကန်စွာ လျှောက်လဲခဲ့သည်။ ဗိမာန်တော်ကို ညစ်ညူးစေသည်ဟု မိမိကို စွပ်စွဲခဲ့သော “အာရှနယ်မှဂျူး” တို့သည် ဤတွင် မရှိကြောင်း၊ တရားဥပဒေအရ သူတို့နှင့်မျက်နှာချင်းဆိုင်ပြီး သူတို့၏စွဲချက်များကို နားထောင်ခွင့် ပေးသင့်ကြောင်း ပေါလု တင်ပြခဲ့သည်။—တ. ၂၄:၁၈၊ ၁၉။
၁၄ အထူးခြားဆုံးမှာ ပေါလုသည် မိမိ၏ယုံကြည်ချက်များကို သက်သေမခံဘဲ မနေခဲ့ခြင်း ဖြစ်သည်။ ဂျူးတရားရုံးချုပ်ရှေ့ ရောက်ရှိစဉ်က အငြင်းပွားမှုဖြစ်စေခဲ့သော ရှင်ပြန်ထမြောက်ခြင်း ယုံကြည်ချက်အကြောင်းကို ပေါလု သတ္တိရှိရှိ ပြန်ပြောပြလေသည်။ (တ. ၂၃:၆-၁၀) ပေါလု၏ထုချေချက်တွင် ရှင်ပြန်ထမြောက်ခြင်း မျှော်လင့်ချက်ကို အလေးအနက် တင်ပြခဲ့သည်။ အဘယ်ကြောင့်နည်း။ အကြောင်းမှာ ထိုအတိုက်အခံသမားများ လက်ခံမည်မဟုတ်သည့် ယေရှုအကြောင်း၊ သေခြင်းမှ ယေရှု ထမြောက်လာခြင်းအကြောင်းကို ပေါလု သက်သေခံနေ၍ ဖြစ်သည်။ (တ. ၂၆:၆-၈၊ ၂၂၊ ၂၃) မှန်သည်၊ အငြင်းပွားမှုဖြစ်ခဲ့ရသည့် အဓိကအကြောင်းမှာ ရှင်ပြန်ထမြောက်ခြင်းအကြောင်း၊ အတိအကျဆိုရလျှင် ယေရှုနှင့် ယေရှု၏ ရှင်ပြန်ထမြောက်ခြင်းကို ယုံကြည်ခြင်းအကြောင်း ဖြစ်သည်။
ရှာဖွေလေ့လာ ဘုရားရေးရာရတနာ
(တမန်တော်၂၃:၆) အဖွဲ့ဝင်တွေထဲမှာ တစ်ဝက်က ဇဒ္ဒုကဲတွေ၊ တစ်ဝက်က ဖာရိရှဲတွေဖြစ်နေမှန်း ပေါလုသတိထားမိတဲ့အခါ “ညီအစ်ကိုတို့၊ ကျွန်တော်ဟာ ဖာရိရှဲတစ်ယောက်ပါ။ ဖာရိရှဲရဲ့သားလည်း ဟုတ်ပါတယ်။ လူသေတွေ ရှင်ပြန်ထမြောက်လာမယ်ဆိုတဲ့ မျှော်လင့်ချက်ကို ကျွန်တော်ယုံကြည်လို့ အခုလို စစ်ကြောစီရင်ခံနေရတာပါ” ဆိုပြီး ဂျူးတရားရုံးချုပ်မှာ အသံကျယ်ကျယ်နဲ့ ပြောတယ်။
nwtsty တ ၂၃:၆ လေ့လာမှု မှတ်စု
ကျွန်တော်ဟာ ဖာရိရှဲတစ်ယောက်ပါ– ပရိသတ်ထဲမှာ ပေါလုကို သိသူတွေ ရှိတယ်။ (တ ၂၂:၅) သူ့ကိုယ်သူ ဖာရိရှဲရဲ့သားလို့ ပြောလိုက်ခြင်းအားဖြင့် သူလည်း ဖာရိရှဲတွေနဲ့ တစ်ဖွဲ့တည်း ဖြစ်ကြောင်း ဝန်ခံမှန်း သိကြမှာပါ။ ပေါလုဟာ စိတ်အားထက်သန်တဲ့ ခရစ်ယာန်တစ်ယောက် ဖြစ်နေမှန်း ဂျူးတရားရုံးချုပ်က ဖာရိရှဲတွေ သိကြလို့ သူ့ကိုယ်သူ တလွဲဖော်ပြနေတာ မဟုတ်မှန်း သူတို့ သိတယ်။ ဒါပေမဲ့ ဒီအချိန်မှာ ပေါလုက သူ့ကိုယ်သူ ဖာရိရှဲလို့ ပြောလိုက်တာက နိုင်းယှဉ်တဲ့သဘောနဲ့ ပြောတာဖြစ်တယ်။ သူ့ကိုယ်သူ ဇဒ္ဒုကဲလို့ မပြောဘဲ ဖာရိရှဲပါလို့ ပြောတာက သူလည်း ဖာရိရှဲတွေလို ရှင်ပြန်ထမြောက်ခြင်းကို ယုံကြည်ကြောင်း ပြောနေတာ ဖြစ်တယ်။ ဒီလိုပြောလိုက်ခြင်းအားဖြင့် သူနဲ့ ပရိသတ်ထဲက ဖာရိရှဲတွေမှာ တူညီတဲ့အချက် ရှိတယ်ဆိုတာ ဖော်ပြတယ်။ ဂျူးတရားရုံးချုပ် အဖွဲ့ဝင်တချို့ သူ့ဘက်ပါမယ်ဆိုတဲ့ မျှော်လင့်ချက်နဲ့ ဒီအငြင်းပွားစရာ အရေးကိစ္စကို ပေါလု ဖော်ထုတ်ခဲ့ပုံရတယ်။ မျှော်လင့်တဲ့အတိုင်းလည်း ဖြစ်လာတယ်။ (တ. ၂၃:၇-၉) တ ၂၃:၆ ပါ ပေါလုရဲ့ စကားတွေဟာ နောက်ပိုင်း အဂရိပ္ပမင်းရှေ့ သူ ထုချေပြောဆိုချိန်မှာ သူ ဘယ်သူဘယ်ဝါဖြစ်ကြောင်း ဖော်ပြခဲ့တဲ့ စကားတွေနဲ့လည်း ကိုက်ညီတယ်။ (တ ၂၆:၅) ရောမမြို့ကနေ ဖိလိပ္ပိမြို့မှာရှိတဲ့ ခရစ်ယာန်တွေဆီ စာရေးတဲ့အခါမှာလည်း သူဟာ ဖာရိရှဲတစ်ဦးဖြစ်ကြောင်း ထပ်ပြောခဲ့တယ်။ (ဖိ ၃:၅) အရင်က ဖာရိရှဲတွေ ဖြစ်ခဲ့ဖူးတဲ့ တခြားခရစ်ယာန်တွေနဲ့ ပတ်သက်ပြီး တ ၁၅:၅ ပါ ဖော်ပြချက်ကိုလည်း ထည့်စဉ်းစားသင့်တယ်။—တ ၁၅:၅ လေ့လာမှု မှတ်စုကို ကြည့်ပါ။
(တမန်တော် ၂၄:၂၄) ရက်အတန်ကြာတော့ ဖေလဇ်မင်းက ဂျူးလူမျိုး ကြင်ရာတော် ဒရုသိလနဲ့အတူ ရောက်လာပြီး ပေါလုကို လူလွှတ်ခေါ်တယ်။ ခရစ်တော်ယေရှုနဲ့ဆိုင်တဲ့ ယုံကြည်ခြင်းအကြောင်း သူဟောတာကို နားထောင်တယ်။
(တမန်တော် ၂၄:၂၇) နှစ်နှစ်ကြာတော့ ဖေလဇ်မင်းရဲ့ အရိုက်အရာကို ပေါကိဖေတ္တု ဆက်ခံတယ်။ ဖေလဇ်မင်းက ဂျူးတွေရှေ့မှာ မျက်နှာရချင်တော့ ပေါလုကို ဆက်ပြီး အကျဉ်းချထားလိုက်တယ်။
nwtsty တ ၂၄:၂၄ လေ့လာမှု မှတ်စု
ဒရုသိလ– သူဟာ တ ၁၂:၁ မှာဖော်ပြထားတဲ့ ဟေရုဒ် အဂရိပ္ပမင်း ၁ ရဲ့ တတိယသမီး၊ သမီးထွေး ဖြစ်တယ်။ အေဒီ ၃၈ လောက်မှာ မွေးပြီး အဂရိပ္ပမင်း ၂ နဲ့ ဗေရနိတ်ရဲ့ညီမ ဖြစ်တယ်။ (တ ၂၅:၁၃ လေ့လာမှု မှတ်စုနဲ့ ခက်ဆစ်၊ “ဟေရုဒ်” ကိုကြည့်ပါ။) ဖေလဇ်မင်းက သူ့ရဲ့ ဒုတိယယောက်ျားဖြစ်တယ်။ အီမဲစာဘုရင် ဆီးရီးယားလူမျိုး အဇိဇုမင်းဟာ သူ့ရဲ့ ပထမယောက်ျား ဖြစ်တယ်။ သူနဲ့ ကွာရှင်းပြီးနောက် အေဒီ ၅၄ လောက်မှာ ဖေလဇ်မင်းကို လက်ထပ်လိုက်တယ်။ အဲဒီအချိန်မှာ သူအသက်က ၁၆ နှစ်ပဲ ရှိသေးတယ်။ ဖေလဇ်မင်းရှေ့ မှာ ပေါလုက “ဖြောင့်မတ်ခြင်း၊ ချုပ်တည်းခြင်း၊ ရောက်လာမယ့် တရားစီရင်ခြင်း” အကြောင်း ဟောပြောတဲ့အခါ ဒရုသိလလည်း ရှိနေနိုင်တယ်။ (တ ၂၄:၂၅) ဖေလဇ်မင်းရဲ့ အရိုက်အရာကို ပေါကိဖေတ္တု ဆက်ခံတဲ့အခါ ဖေလဇ်မင်းက “ဂျူးတွေရှေ့မှာ မျက်နှာရချင်” လို့ ပေါလုကို ဆက်ပြီး အကျဉ်းချထားတယ်။ အဲဒီလိုလုပ်တာဟာ ဂျူးလူမျိုး၊ ငယ်ရွယ်တဲ့ သူ့ဇနီးရဲ့ အလိုကို လိုက်ခဲ့တာလို့ လူတချို့ ထင်ကြတယ်။—တ ၂၄:၂၇။
ကျမ်းစာဖတ်ရှုခြင်း
(တမန်တော် ၂၃:၁-၁၅) ပေါလုက ဂျူးတရားရုံးချုပ် အဖွဲ့ဝင်တွေကို စေ့စေ့ကြည့်ပြီး “ညီအစ်ကိုတို့၊ ကျွန်တော် ဒီနေ့အထိ အမှားတစ်ခုမှ မလုပ်ခဲ့မှန်း ဘုရားသခင့်ရှေ့မှာ အမှားအမှန်သိစိတ် ကြည်လင်စွာ ပြောနိုင်ပါတယ်” လို့ပြောတယ်။ ၂ အဲဒီအခါ ပုရောဟိတ်မင်း အာနနိက သူ့ပါးစပ်ကို ရိုက်လိုက်စမ်း ဆိုပြီး အနားမှာ ရပ်နေတဲ့သူတွေကို ပြောတဲ့အခါ၊ ၃ ပေါလုက “ထုံးဖြူသုတ်ထားတဲ့ အုတ်ရိုး၊ ခင်ဗျားကို ဘုရားသခင် ရိုက်မှာ။ ပညတ်တရားနဲ့အညီ စီရင်ဖို့ ထိုင်နေပါလျက်နဲ့ ပညတ်တရားကို ချိုးဖောက်ပြီး ကျွန်တော့်ကို ရိုက်ခိုင်းရသလား” ဆိုပြီး ပြန်ပြောတယ်။ ၄ အဲဒီအခါ အနားမှာရပ်နေတဲ့ လူတွေက “ဘုရားသခင်ရဲ့ ပုရောဟိတ်မင်းကို မင်း စော်ကားနေတာလား” လို့ပြောတော့၊ ၅ ပေါလုက “ညီအစ်ကိုတို့၊ သူ ပုရောဟိတ်မင်း ဖြစ်မှန်း ကျွန်တော် မသိလို့ပါ။ ‘အုပ်ချုပ်တဲ့သူကို မလေးမစား မပြောနဲ့’ ဆိုပြီး ကျမ်းစာမှာ ရေးထားတယ်” လို့ပြောတယ်။ ၆ အဖွဲ့ဝင်တွေထဲမှာ တစ်ဝက်က ဇဒ္ဒုကဲတွေ၊ တစ်ဝက်က ဖာရိရှဲတွေဖြစ်နေမှန်း ပေါလုသတိထားမိတဲ့အခါ “ညီအစ်ကိုတို့၊ ကျွန်တော်ဟာ ဖာရိရှဲတစ်ယောက်ပါ။ ဖာရိရှဲရဲ့သားလည်း ဟုတ်ပါတယ်။ လူသေတွေ ရှင်ပြန်ထမြောက်လာမယ်ဆိုတဲ့ မျှော်လင့်ချက်ကို ကျွန်တော်ယုံကြည်လို့ အခုလို စစ်ကြောစီရင်ခံနေရတာပါ” ဆိုပြီး ဂျူးတရားရုံးချုပ်မှာ အသံကျယ်ကျယ်နဲ့ ပြောတယ်။ ၇ သူ အဲဒီလိုပြောတော့ ဖာရိရှဲတွေနဲ့ ဇဒ္ဒုကဲတွေ သဘောထားကွဲလွဲပြီး နှစ်ဖွဲ့ကွဲသွားတယ်။ ၈ ဇဒ္ဒုကဲတွေက ရှင်ပြန်ထမြောက်ခြင်း မရှိ၊ ကောင်းကင်တမန် မရှိ၊ ဝိညာဉ်ပုဂ္ဂိုလ် မရှိလို့ ပြောကြတယ်။ ဖာရိရှဲတွေကျတော့ အဲဒါတွေအားလုံး ရှိတယ်လို့ လက်ခံကြတယ်။ ၉ ဒီလိုနဲ့ ရုန်းရင်းဆန်ခတ် ဖြစ်လာတယ်။ ဖာရိရှဲတွေဘက်က ကျမ်းတတ်တချို့ ထရပ်ပြီး “ဒီလူမှာ ဘာအမှားမှ မတွေ့ဘူး။ ဝိညာဉ်ပုဂ္ဂိုလ် ဒါမှမဟုတ် ကောင်းကင်တမန်က သူ့ကို ပြောခဲ့တာဆိုရင် ဘယ့်နှယ်လုပ်ကြမတုံး—” ဆိုပြီး အကြီးအကျယ် ငြင်းခုံကြတယ်။ ၁၀ အကြီးအကျယ် သဘောထားကွဲလွဲမှု ဖြစ်လာတော့ တပ်မှူးက ပေါလုကို လူတွေ တစ်စစီဆွဲဖြတ်မှာ စိုးရိမ်ပြီး စစ်သည်တွေ လွှတ်လိုက်တယ်။ ပေါလုကို ဆွဲထုတ်ပြီး စစ်တန်းလျားဆီ ပို့ခိုင်းလိုက်တယ်။ ၁၁ နောက်တစ်နေ့ညမှာ သခင်က ပေါလုအနားမှာရပ်ပြီး “သတ္တိရှိပါ။ ဂျေရုဆလင်မြို့မှာ ငါ့အကြောင်း စေ့စေ့စပ်စပ် သက်သေခံခဲ့သလို ရောမမြို့မှာလည်း မင်း သက်သေခံရဦးမယ်” လို့ပြောတယ်။ ၁၂ မိုးလင်းတဲ့အခါ ဂျူးတွေက ပေါလုကို လုပ်ကြံဖို့ လျှို့ဝှက်ကြံစည်ကြတယ်။ သူ့ကို မသတ်ရသေးခင် စားသောက်မိရင် ကျိန်စာသင့်ပါစေ ဆိုပြီး ကျိန်ကြတယ်။ ၁၃ အဲဒီလို လျှို့ဝှက်ကြံစည်ပြီး ကျိန်တဲ့သူ အယောက် ၄၀ ကျော်ရှိတယ်။ ၁၄ သူတို့က ပုရောဟိတ်မင်းတွေ၊ အကြီးအကဲတွေဆီ သွားပြီး “ကျုပ်တို့က ပေါလုကို မသတ်ရသေးခင် စားသောက်မိရင် ကျိန်စာသင့်ပါစေဆိုပြီး ကျိန်ထားကြပြီ။ ၁၅ ဒါကြောင့် ခင်ဗျားတို့နဲ့ ဂျူးတရားရုံးချုပ်အဖွဲ့ဝင်တွေက ပေါလုကို ခေါ်လာပေးဖို့ တပ်မှူးဆီ အကြောင်းကြားလိုက်ပါ။ သူ့အမှုကို ပိုသေချာအောင် စစ်ဆေးချင်တဲ့ပုံမျိုးနဲ့ပေါ့။ ကျုပ်တို့ကတော့ သူ မရောက်ခင် လုပ်ကြံဖို့ အသင့်စောင့်နေလိုက်မယ်” လို့ ပြောကြတယ်။
ဇန်နဝါရီ ၂၁-၂၇
ကျမ်းစာထဲက အဖိုးတန်ဘဏ္ဍာများ | တမန်တော် ၂၅-၂၆
“ပေါလုဟာ ဆီဇာဆီမှာ အယူခံဝင်ပြီး ဟေရုဒ်အဂရိပ္ပမင်းရှေ့မှာ သက်သက်ခံ”
(တမန်တော် ၂၅:၁၁) သေထိုက်တဲ့ပြစ်မှုတစ်ခုခု ကျူးလွန်ခဲ့တာမှန်ရင် အသက်ချမ်းသာပေးဖို့ ကျွန်တော် အသနားခံနေမှာ မဟုတ်ဘူး။ စွဲချက်တွေ အထောက်အထား မခိုင်လုံဘဲ ဒီလူတွေ စိတ်ကျေနပ်ဖို့အတွက်နဲ့ ကျွန်တော့်ကို သူတို့လက်ထဲ ဘယ်သူမှ လွှဲအပ်ခွင့်မရှိဘူး။ ဆီဇာဆီမှာ ကျွန်တော်အယူခံဝင်မယ်” လို့ဖြေတယ်။
“ကဲသာထံ အယူခံဝင်ပါမည်”
၆ ဂျူးတို့၏မျက်နှာသာရလိုသော ဖေတ္တုမင်း၏ဆန္ဒကြောင့် ပေါလု သေနိုင်သည်။ ထို့ကြောင့် ပေါလုသည် ရောမနိုင်ငံသားတစ်ဦးအဖြစ် သူ၏အခွင့်အရေးကို အသုံးပြုခဲ့၏။ သူက ဖေတ္တုမင်းအား “ကဲသာ၏ တရားပလ္လင်ရှေ့မှာ ကျွန်ုပ်ရပ်နေပါ၏။ ဤတွင် ကျွန်ုပ်ကို စီရင်သင့်ပါ၏။ ကိုယ်တော်သည်လည်း ကောင်းစွာ သိတော်မူသည်အတိုင်း ကျွန်ုပ်သည် ဂျူးတို့ကို မပြစ်မှားပါ။ . . . ကဲသာထံ အယူခံဝင်ပါမည်” ဟု လျှောက်ဆို၏။ ထိုသို့အယူခံဝင်မည်ဟု ဆိုလိုက်သည်နှင့် ယင်းကို ပြန်ရုပ်သိမ်းနိုင်လေ့ မရှိပေ။ ယင်းကို အလေးပေးသည့်အနေဖြင့် ဖေတ္တုမင်းက “သင်သည် ကဲသာထံ အယူခံထားပြီ။ ကဲသာထံတော်သို့ သွားရမည်” ဟုဆို၏။ (တ. ၂၅:၁၀-၁၂) ပေါလုသည် ပို၍မြင့်မားသော တရားဝင်အခွင့်အာဏာရှိသူထံ အယူခံဝင်ခြင်းဖြင့် ယနေ့ ခရစ်ယာန်စစ်များအတွက် ပုံသက်သေချမှတ်ခဲ့သည်။ ဆန့်ကျင်သူများက “ဥပဒေထုတ်ဆင့်၍” ဒုက္ခရောက်အောင် ကြံစည်သောအခါ ယေဟောဝါသက်သေများသည် သတင်းကောင်းကို ခုခံကာကွယ်ရန် တရားဝင်နည်းလမ်းများကို အသုံးပြုကြသည်။—ဆာ. ၉၄:၂၀၊ သမ္မာ။
(တမန်တော် ၂၆:၁-၃) အဂရိပ္ပမင်းက “မင်း ထုချေပြောလို့ရပြီ” လို့ အခွင့်ပေးလိုက်တော့ ပေါလုလည်း လက်ကိုဆန့်ပြီး ထုချေပြောဆိုတော့တယ်– ၂ “အဂရိပ္ပမင်း၊ ဂျူးတွေရဲ့ စွဲချက်နဲ့ပတ်သက်ပြီး ရှေ့တော်မှာ အခုလို ထုချေပြောဆိုခွင့် ရတဲ့အတွက် ကျွန်တော် ဝမ်းသာပါတယ်။ ၃ မင်းကြီးဟာ ဂျူးတွေရဲ့ ဓလေ့ထုံးစံတွေ၊ အငြင်းပွားတတ်တဲ့ ပြဿနာတွေအကြောင်း ကောင်းကောင်း သိကျွမ်းတဲ့သူဖြစ်နေလို့ ပိုပြီးဝမ်းသာပါတယ်။ ဒါကြောင့် ကျွန်တော်ပြောတာကို စိတ်ရှည်ရှည် နားထောင်ပေးဖို့ မေတ္တာရပ်ခံပါတယ်။
“ကဲသာထံ အယူခံဝင်ပါမည်”
၁၀ ပေါလုသည် အဂရိပ္ပမင်းရှေ့ ထုချေခွင့်ရသောကြောင့် ကျေးဇူးတင်ကြောင်း လေးစားစွာပြောဆိုပြီး မင်းကြီးသည် ဂျူးတို့၏ထုံးတမ်းနှင့် အမေးပုစ္ဆာအားလုံးကို တတ်ကျွမ်းသူဖြစ်ကြောင်း အသိအမှတ်ပြုလေသည်။ ထို့နောက် ပေါလုက “ကျွန်ုပ်သည် အတင်းကျပ်ဆုံး ဂိုဏ်းထုံးနည်းအတိုင်း ဖာရိရှဲတစ်ဦးအဖြစ် နေထိုင်ခဲ့” သည်ဟု သူ၏ ယခင်အသက်တာအကြောင်း လျှောက်ဆိုသည်။ (တ ၂၆:၅) ဖာရိရှဲတစ်ဦးအနေနှင့် ပေါလုသည် မေရှိယကြွလာမည်ကို မျှော်လင့်ခဲ့သည်။ ယခု ခရစ်ယာန်တစ်ဦးအနေနှင့် သူသည် ကြာမြင့်စွာ စောင့်မျှော်ခဲ့သော ထိုမေရှိယမှာ ယေရှုခရစ်ဖြစ်ကြောင်း ရဲရင့်စွာ ဖော်ပြလေ၏။ ဘိုးဘေးများအား ဘုရားသခင်ပေးတော်မူသော ကတိတော်ပြည့်စုံရန် မျှော်လင့်ခြင်းသည် သူနှင့် သူ့ကို စွပ်စွဲသူများ၏ တူညီသောယုံကြည်ချက်ဖြစ်ပြီး ယင်းအတွက်ပင် ထိုနေ့တွင် ပေါလု စစ်ကြောစီရင်ခံရခြင်း ဖြစ်၏။ ထိုစကားများကြောင့် အဂရိပ္ပမင်းသည် ပေါလုပြောဆိုသမျှကို ပို၍ပင် စိတ်ဝင်စားလာသည်။
၁၁ မိမိသည် ခရစ်ယာန်များကို ယခင်က အလွန်ညှဉ်းဆဲခဲ့ကြောင်း ပေါလု ပြန်အမှတ်ရလျက် “ကျွန်ုပ်မူကား နာဇရက်မြို့သား ယေရှု၏နာမနှင့် ဆန့်ကျင်သော အမှုများစွာကို ပြုအပ်သည်ဟု အမှန်ပင် ထင်မှတ်ခဲ့ပါသည်။ . . . ကျွန်ုပ်သည် အမျက်ခြောင်းခြောင်းထွက်သဖြင့် အခြားမြို့များထိပင် သူတို့ [ခရစ်တော်၏နောက်လိုက်များ] ကို လိုက်လံညှဉ်းဆဲပါ၏” ဟုဆိုသည်။ (တ. ၂၆:၉-၁၁) ပေါလုသည် ပုံကြီးချဲ့ပြောဆိုနေခြင်း မဟုတ်ပါ။ ခရစ်ယာန်များကို သူ ရက်ရက်စက်စက် ညှဉ်းပန်းနှိပ်စက်ခဲ့ကြောင်း လူများစွာ သိကြ၏။ (ဂလ. ၁:၁၃၊ ၂၃) ‘ထိုသို့သောသူကို ဘာက ပြောင်းလဲစေခဲ့သနည်း’ ဟု အဂရိပ္ပမင်း စဉ်းစားနေပေမည်။
၁၂ ပေါလုဆက်ပြောသော ဤစကားများက အဖြေပေးပါသည်– “ယဇ်ပုရောဟိတ်ကြီးတို့ထံမှ အခွင့်အာဏာရလျက် ကျွန်ုပ်သည် ဒမတ်စကတ်မြို့သို့ သွားစဉ်အခါ၊ အိုအရှင်မင်းကြီး၊ မွန်းတည့်အချိန်တွင် လမ်း၌ နေရောင်ထက် တောက်ပသော အလင်းသည် ကျွန်ုပ်နှင့် ခရီးသွားဖော်တို့၏ ပတ်လည်တွင် ကောင်းကင်မှ ထွန်းတောက်သည်ကို မြင်ရပါသည်။ ကျွန်ုပ်တို့အားလုံး မြေပေါ်မှာလဲ၍ နေကြစဉ် ‘ရှောလု၊ ရှောလု၊ ငါ့ကို အဘယ်ကြောင့် ညှဉ်းဆဲသနည်း။ တုတ်ချွန်ကို ခြေနှင့် ကန်နေသည့်အတွက် ဒုက္ခရောက်လေပြီ’ ဟု ဟေဗြဲဘာသာစကားဖြင့် ကျွန်ုပ်အား ပြောသောစကားသံကို ကြားရပါ၏။ ကျွန်ုပ်က ‘သခင်၊ ကိုယ်တော်သည် မည်သူနည်း’ ဟု မေးလျှောက်သော် သခင်က ‘ငါကား သင် ညှဉ်းဆဲသော ယေရှုဖြစ်၏’” ဟု မိန့်တော်မူ၏။—တ. ၂၆:၁၂-၁၅။
၁၃ ဤထူးဆန်းအံ့သြဖွယ်ဖြစ်ရပ် မဖြစ်ပွားမီ ပေါလုသည် ပုံဆောင်သဘောအရ “တုတ်ချွန်ကို ခြေနှင့်ကန်” နေ၏။ တုတ်တံရှည်၏ ချွန်ထက်သောထိပ်ကို ခြေနှင့်ကန်နေခြင်းဖြင့် မိမိကိုယ်ကို အနာတရဖြစ်စေသော ဝန်တင်တိရစ္ဆာန်တစ်ကောင်ကဲ့သို့ ပေါလုသည် ဘုရားသခင့်အလိုတော်ကို ဆန့်ကျင်နေခြင်းဖြင့် မိမိကိုယ်ကို ဘုရားသခင်နှင့် ဆက်ဆံရေးကောင်း မရှိစေရန် တားဆီးနေသည်။ ရှင်ပြန်ထမြောက်ပြီးသော ယေရှုသည် ဒမတ်စကတ်မြို့သို့ အသွားလမ်းပေါ်တွင် ပေါလုအား ကိုယ်ထင်ရှားပြခြင်းဖြင့် စိတ်ရင်းမှန်ရှိသော်လည်း လမ်းလွဲနေသည့် ထိုသူ၏အတွေးအခေါ်ကို ပြောင်းလဲစေခဲ့၏။—ယော. ၁၆:၁၊ ၂။
၁၄ ပေါလုသည် သူ့ဘဝတွင် တကယ်ပင် ကြီးမားသော အပြောင်းအလဲများ ပြုလုပ်ခဲ့၏။ အဂရိပ္ပမင်းအား သူက “ကောင်းကင်မှ ထိုဗျာဒိတ်ရူပါရုံကို ကျွန်ုပ်သည် မနာခံဘဲ မနေပါ။ သူတို့သည် နောင်တရ၍ ဘုရားသခင်ထံ ပြောင်းလဲရမည်၊ နောင်တနှင့် ထိုက်တန်သောအကျင့် ကျင့်ရမည်ဟူသည့် သတင်းတရားကို ဦးစွာ ဒမတ်စကတ်မြို့၊ ထို့နောက် ဂျေရုဆလင်မြို့မှစ၍ ယုဒပြည်အရပ်ရပ်ရှိ လူတို့အားလည်းကောင်း၊ လူမျိုးခြားတို့အားလည်းကောင်း ကျွန်ုပ်ပြောကြားပါ၏” ဟုဆို၏။ (တ. ၂၆:၁၉၊ ၂၀) ပေါလုသည် ထိုမွန်းတည့်ချိန် ရူပါရုံတွင် ယေရှုခရစ် ပေးအပ်ခဲ့သော တာဝန်ကို နှစ်ပေါင်းများစွာ ထမ်းဆောင်ခဲ့၏။ အဘယ်ရလဒ် ရရှိသနည်း။ ပေါလုဟောပြောသော သတင်းကောင်းကို လက်ခံတုံ့ပြန်သူများသည် သူတို့၏ အကျင့်ပျက်ပြားသော၊ မရိုးသားသော အကျင့်အကြံများကို နောင်တယူကာ ဘုရားသခင်ထံ ပြန်လှည့်လာကြသည်။ ထိုသူတို့သည် နိုင်ငံသားကောင်းများ၊ တရားဥပဒေနှင့် အမိန့်ပြဋ္ဌာန်းချက်များကို လေးစားသူများ ဖြစ်လာကြ၏။
၁၅ သို့သော် ထိုကောင်းကျိုးများသည် ပေါလုကို ဆန့်ကျင်သော ဂျူးများအတွက် အချည်းနှီးပင်။ “ထိုအကြောင်းများကြောင့် ဂျူးတို့သည် ဗိမာန်တော်၌ ကျွန်ုပ်ကို ဖမ်းဆီး၍ သတ်ရန် ကြံစည်ကြပါသည်။ သို့ရာတွင် ဘုရားသခင့်အထံတော်မှ မစခြင်းကျေးဇူးတော်ကို ကျွန်ုပ်ခံရ၍ မောရှေနှင့် ပရောဖက်တို့ ဆင့်ဆိုခဲ့ရာများကိုသာ အယုတ်အမြတ်မရွေး ရှိသမျှတို့အား ယနေ့တိုင်အောင် သက်သေခံလျက်နေပါ၏။”—တ. ၂၆:၂၁၊ ၂၂။
၁၆ ကျွန်ုပ်တို့သည် ခရစ်ယာန်စစ်များအနေဖြင့် ကျွန်ုပ်တို့၏ယုံကြည်ခြင်းအတွက် “ခုခံပြောဆိုရန် အစဉ်အသင့်ရှိ” ရမည်။ (၁ ပေ. ၃:၁၅) ကျွန်ုပ်တို့၏ ယုံကြည်ချက်များနှင့် ပတ်သက်၍ တရားသူကြီးများ၊ အုပ်စိုးရှင်များရှေ့ ပြောဆိုသောအခါ အဂရိပ္ပမင်းနှင့် ဖေတ္တုမင်းရှေ့ ပေါလု ပြောဆိုခဲ့သောနည်းကို အတုယူခြင်းက အထောက်အကူပြုနိုင်သည်။ ကျမ်းစာအမှန်တရားသည် ကျွန်ုပ်တို့ကိုယ်တိုင်၏ အသက်တာကိုသာမက သတင်းကောင်းကို လက်ခံသော အခြားသူတို့၏ အသက်တာကိုပါ ကောင်းမွန်စေခဲ့ပုံအကြောင်း လေးစားစွာ ပြောပြခြင်းဖြင့် ထိုအထက်အရာရှိများကို စိတ်စွဲမှတ်သွားစေနိုင်သည်။
(တမန်တော် ၂၆:၂၈) အဂရိပ္ပမင်းက “မင်း သွေးဆောင်တာနဲ့ပဲ အချိန်တိုအတွင်းမှာ ငါ ခရစ်ယာန်ဖြစ်တော့မယ်” လို့ပြောတယ်။
“ကဲသာထံ အယူခံဝင်ပါမည်”
၁၈ သို့သော် ပေါလုက ဘုရင်ခံအား “မြတ်တော်မူသော ဖေတ္တုမင်း၊ ကျွန်ုပ် မရူးပါ။ အမှန်တရားကို စိတ်ကောင်းပကတိဖြင့် ပြောပါ၏။ အရှင်မင်းမြတ်သည် ဤအရာများကို ကောင်းစွာ သိထားသည်ဖြစ်၍ ကိုယ်တော်ကို ကျွန်ုပ် လွတ်လပ်စွာ လျှောက်တင်ပါ၏။ . . . အိုအဂရိပ္ပမင်း၊ ကိုယ်တော်သည် ပရောဖက်ကျမ်းများကို ယုံတော်မူပါသလော။ ယုံတော်မူသည်ကို ကျွန်ုပ်သိပါ၏” ဟုဆို၏။ အဂရိပ္ပမင်းကလည်း “သင်၏ သွေးဆောင်မှုကြောင့် ငါသည် ခရစ်ယာန်ဖြစ်လုပြီ” ဟုဆိုလေ၏။ (တ. ၂၆:၂၅-၂၈) ထိုစကားများကို စိတ်ရင်းမှန်ဖြင့် ပြောသည်ဖြစ်စေ၊ မပြောသည်ဖြစ်စေ ယင်းတို့က ပေါလု၏သက်သေခံချက်သည် မင်းကြီးအပေါ် အလွန်အကျိုးသက်ရောက်ကြောင်း ဖော်ပြနေသည်။
ရှာဖွေလေ့လာ ဘုရားရေးရာရတနာ
(တမန်တော် ၂၆:၁၄) ကျွန်တော်တို့အားလုံး မြေပေါ်လဲသွားတဲ့အခါ ဟီဘရူးလို စကားသံတစ်ခု ထွက်ပေါ်လာပြီး “ရှောလု၊ ရှောလု၊ ငါ့ကို ဘာလို့ နှိပ်စက်ညှဉ်းဆဲနေတာလဲ။ တုတ်ချွန်ကို ကန်ရင် မင်းပဲ နာကျင်မှာပေါ့’ လို့ပြောတာကို ကျွန်တော် ကြားပါတယ်။
nwtsty တ ၂၆:၁၄ လေ့လာမှု မှတ်စု
တုတ်ချွန်ကို ကန်ရင်– တုတ်ချွန်ဆိုတာ တိရစ္ဆာန် နှင်တန်ဖြစ်တယ်။ (သူ ၃:၃၁) “တုတ်ချွန်ကို ကန်ရင်” ဆိုတဲ့ အသုံးအနှုန်းဟာ ဂရိစာပေမှာပါတဲ့ စကားပုံ ဖြစ်တယ်။ ခေါင်းမာတဲ့နွားက တုတ်ချွန်ကို ကန်ရင် နွားပဲ အနာတရဖြစ်မယ်ဆိုတဲ့ သဘောဖြစ်တယ်။ ရှောလုလည်း ခရစ်ယာန်မဖြစ်ခင် အဲဒီလိုလုပ်ခဲ့တယ်။ ယေဟောဝါ ကူညီပေးနေတဲ့ ယေရှုရဲ့ နောက်လိုက်တွေကို ပေါလု ဆန့်ကျင်တိုက်ခိုက်နေရင် သူပဲ နာကျင်ရမှာ ဖြစ်တယ်။ (တ ၅:၃၈၊ ၃၉။ ၁တိ ၁:၁၃၊ ၁၄ နဲ့ နှိုင်းယှဉ်ပါ။) ဒေ ၁၂:၁၁ မှာ “နှင်တံ” ကို ပုံဆောင်စကားနဲ့ အသုံးပြုထားတယ်။ ဆုံးမစကားကို လိုက်နာဖို့ လှုံ့ဆော်ပေးတဲ့ ဉာဏ်ပညာရှိသူရဲ့ စကားကို ဆိုလိုတယ်။
(တမန်တော် ၂၆:၂၇) အဂရိပ္ပမင်း၊ ပရောဖက်တွေကို မင်းကြီး ယုံပါသလား။ ယုံတယ်ဆိုတာ ကျွန်တော်သိပါတယ်” လို့ပြောတယ်။
ဘုရားသခင့်နိုင်ငံတော်သတင်းကို လက်ခံရန် အခြားသူများအား ကူညီ
၁၄ အဂြိပ္ပမင်းသည် အမည်ခံဂျူးတစ်ဦးသာဖြစ်ကြောင်း ပေါလု သိထားသည်။ ယုဒဘာသာနှင့်ပတ်သက်၍ အဂြိပ္ပ သိကျွမ်းထားရာကို အကြောင်းပြုပြီး ပေါလုက မိမိဟောပြောသည့်အကြောင်းသည် အမှန်အားဖြင့် မေရှိယ၏သေခြင်း၊ ရှင်ပြန်ထမြောက်ခြင်းနှင့်ပတ်သက်သည့် “မောရှေမှစသော ပရောဖက်များတို့ ဟောပြောသောစကားထက် . . . မလွန်” ကြောင်း ကျိုးကြောင်းဆင်ခြင်ပြခဲ့သည်။ (တ ၂၆:၂၂၊ ၂၃) အဂြိပ္ပကို ပေါလုက “အိုအဂြိပ္ပမင်းကြီး၊ ကိုယ်တော်သည် အနာဂတ္တိကျမ်းစာကို ယုံတော်မူသလော” ဟု တိုက်ရိုက်မေးမြန်းခဲ့သည်။ ထိုအခါ အဂြိပ္ပမင်း အကျပ်ရိုက်ခဲ့သည်။ ပရောဖက်များကို မယုံဟု ဆိုလိုက်ပါက ယုံကြည်သူဂျူးတစ်ဦးအဖြစ် သူ့အသရေပျက်ချေမည်။ သို့သော် ပေါလုနှင့် သူသဘောတူလိုက်ပါက တမန်တော်နှင့် တစ်တန်းတစ်စားတည်းဖြစ်သွားပြီး သူ့ကို ခရစ်ယာန်တစ်ဦးဟု ခေါ်ကြတော့မည်။ ပေါလုသည် မိမိ၏မေးခွန်းကို အမြော်အမြင်ရှိရှိ ဤသို့ဖြေဆိုခဲ့သည်– “ယုံတော်မူသည်ကို အကျွန်ုပ်သိပါသည်။” အဂြိပ္ပသည် မည်သို့ဖြေဆိုရန် လှုံ့ဆော်ခံရသနည်း။ သူက “သင်သည် ဖြားယောင်းသွေးဆောင်သောအားဖြင့် ငါသည် ခရစ်ယာန်ဖြစ်လုပြီ” ဟု တုံ့ပြန်ခဲ့သည်။ (တ ၂၆:၂၇၊ ၂၈) အဂြိပ္ပသည် ခရစ်ယာန်တစ်ဦး ဖြစ်မလာသော်လည်း ပေါလု၏သတင်းတရားသည် သူ့နှလုံးကို အတော်အတန် ထိမိခဲ့ကြောင်း ထင်ရှားပါသည်။—ဟေဗြဲ ၄:၁၂။
ကျမ်းစာဖတ်ရှုခြင်း
(တမန်တော်၂၅:၁-၁၂) ဖေတ္တုက အဲဒီနယ်ကို ရောက်လာပြီး တာဝန်ဆက်ခံတယ်။ သုံးရက်ကြာတဲ့အခါ ကဲသရိမြို့ကနေ ဂျေရုဆလင်မြို့ကို တက်သွားတယ်။ ၂ ပုရောဟိတ်မင်းတွေနဲ့ အထင်ကရ ဂျူးခေါင်းဆောင်တွေက ပေါလုအကြောင်း တိုင်တန်းကြတယ်။ အဲဒီနောက်၊ ၃ ဂျေရုဆလင်မြို့ဆီ ပေါလုကို ပို့ပေးဖို့ ဖေတ္တုကို သနားခံကြတယ်။ တကယ်တော့ သူ့ကို လမ်းခုလတ်မှာ ချောင်းမြောင်းလုပ်ကြံဖို့ စီစဉ်ထားကြတာ။ ၄ ဒါပေမဲ့ ဖေတ္တုက ပေါလုကို ကဲသရိမြို့မှာပဲ အကျဉ်းချထားမယ့်အကြောင်း၊ သူကိုယ်တိုင် ကဲသရိမြို့ကို ပြန်သွားတော့မယ့်အကြောင်း ပြောတယ်။ ၅ “မင်းတို့ထဲက ခေါင်းဆောင်တချို့ ငါနဲ့အတူလိုက်ခဲ့။ အဲဒီလူမှာ ပြစ်မှုတစ်စုံတစ်ရာ ရှိတယ်ဆိုရင် စွဲချက်တင်ကြပေါ့” လို့လည်း ပြောတယ်။ ၆ ဖေတ္တုက ဂျေရုဆလင်မြို့မှာ ၈ ရက်၊ ၁၀ ရက်လောက်ပဲ နေပြီးနောက် ကဲသရိမြို့ကို ပြန်ဆင်းသွားတယ်။ နောက်တစ်နေ့ရောက်တော့ တရားပလ္လင်ပေါ်မှာ ထိုင်ပြီး ပေါလုကို ခေါ်ခဲ့ဖို့ အမိန့်ပေးတယ်။ ၇ ဂျေရုဆလင်မြို့ကနေ ဆင်းလာတဲ့ဂျူးတွေက ပေါလုဝင်လာတာနဲ့ ဝိုင်းအုံပြီး ကြီးလေးတဲ့စွဲချက်တွေ တင်ကြတော့တယ်။ သက်သေအထောက်အထားတော့ မပြနိုင်ကြဘူး။ ၈ ပေါလုက “ကျွန်တော်ဟာ ဂျူးတွေရဲ့ ပညတ်တရားကိုဖြစ်စေ၊ ဗိမာန်တော်ကိုဖြစ်စေ၊ ဆီဇာ ကိုဖြစ်စေ တစ်ခါမှ မပြစ်မှားခဲ့ဖူးပါဘူး” လို့ ချေပပြောဆိုတယ်။ ၉ ဖေတ္တုက ဂျူးတွေရှေ့ မျက်နှာရချင်တဲ့အတွက် ပေါလုကို “ဒီအမှုအတွက် ဂျေရုဆလင်မြို့ကို သွားပြီး အစစ်ဆေးခံချင်သလား” လို့မေးတော့၊ ၁၀ ပေါလုက “အခု ကျွန်တော်ဟာ ဆီဇာရဲ့ တရားပလ္လင်ရှေ့မှာ ရပ်နေပါတယ်။ ဒီမှာပဲ ကျွန်တော့်ကို စစ်ကြောစီရင်သင့်တယ်။ ဂျူးတွေကို ကျွန်တော် မပြစ်မှားခဲ့မှန်း မင်းကြီး ကောင်းကောင်းသိပါတယ်။ ၁၁ သေထိုက်တဲ့ပြစ်မှုတစ်ခုခု ကျူးလွန်ခဲ့တာမှန်ရင်အသက်ချမ်းသာပေးဖို့ ကျွန်တော် အသနားခံနေမှာ မဟုတ်ဘူး။ စွဲချက်တွေ အထောက်အထား မခိုင်လုံဘဲ ဒီလူတွေ စိတ်ကျေနပ်ဖို့အတွက်နဲ့ ကျွန်တော့်ကို သူတို့လက်ထဲ ဘယ်သူမှ လွှဲအပ်ခွင့်မရှိဘူး။ ဆီဇာဆီမှာ ကျွန်တော်အယူခံဝင်မယ်” လို့ဖြေတယ်။ ၁၂ ဖေတ္တုက အတိုင်ပင်ခံတွေနဲ့ ဆွေးနွေးပြီး “မင်း ဆီဇာဆီမှာ အယူခံဝင်လိုက်ပြီဆိုတော့ ဆီဇာဆီကိုပဲ သွားရမယ်” လို့ပြောတယ်။
ဇန်နဝါရီ ၂၈–ဖေဖော်ဝါရီ ၃
ကျမ်းစာထဲက အဖိုးတန်ဘဏ္ဍာများ | တမန်တော် ၂၇-၂၈
“ရောမမြို့ကို ပေါလု ရွက်လွှင့်”
(တမန်တော် ၂၇:၂၃၊ ၂၄) ကျွန်တော်ဝတ်ပြုတဲ့ ဘုရားသခင်ရဲ့ ကောင်းကင်တမန်တစ်ပါးက ညတုန်းက ကျွန်တော့်အနားမှာ ပေါ်လာပြီး၊ ၂၄ ‘ဘုရားသခင်က မင်းနဲ့အတူပါလာတဲ့ လူအားလုံးကို အသက်ချမ်းသာ ပေးမှာပါ’ လို့ပြောတယ်။
“သင်တို့ အသက်ဆုံးရှုံးမည် မဟုတ်”
၁၅ ပေါလုသည် သင်္ဘောပေါ်ရှိသူများစွာအား “ဘုရားသခင်ပေးတော်မူသော ကတိတော်ကို မျှော်လင့်” ခြင်းအကြောင်း သက်သေခံခဲ့ပေမည်။ (တ. ၂၆:၆။ ကော. ၁:၅) ယခု သင်္ဘောပျက်ကိန်းဆိုက်နေချိန်တွင် လောလောဆယ် မျှော်လင့်ချက်ရှိရေးအတွက် ခိုင်လုံသော အကြောင်းရင်းတစ်ခုကို ပေါလု ဖော်ပြလိုက်၏။ သူက “ကောင်းကင်တမန်တစ်ပါးသည် ညက ငါ့အနားမှာ ပေါ်လာ၍ ‘ပေါလု၊ မကြောက်နှင့်။ သင်သည် ကဲသာ၏ရှေ့မှောက်သို့ ရောက်ရမည်။ ဘုရားသခင်သည် သင်နှင့်အတူ လိုက်ပါသူအပေါင်းတို့ကို အသက်ချမ်းသာပေးလိမ့်မည်’ ဟုမိန့်ဆို” ကြောင်း ပြောပြသည်။ သူတို့ကို ပေါလုက “ထို့ကြောင့် အားယူကြလော့။ ငါ့အား ဘုရားသခင် မိန့်တော်မူသည့်အတိုင်းပင် ဖြစ်လိမ့်မည်ဟု ငါယုံကြည်၏။ သို့ရာတွင် ငါတို့၏သင်္ဘောသည် တစ်စုံတစ်ခုသော ကျွန်းပေါ်တွင် သောင်တင်ရလိမ့်မည်” ဟုဆို၏။—တ. ၂၇:၂၃-၂၆။
(တမန်တော် ၂၈:၁၊ ၂) ကျွန်တော်တို့ အသက်ဘေးကလွတ်ပြီး ကုန်းပေါ်တက်လာတဲ့အခါ အဲဒီကျွန်းကို မော်လတာကျွန်းလို့ ခေါ်မှန်း သိလိုက်ရတယ်။ ၂ တိုင်းတစ်ပါးစကားပြောတဲ့ လူတွေက ကျွန်တော်တို့အားလုံးကို စေတနာအပြည့်နဲ့ ကူညီကြတယ်။ မိုးလည်းရွာ၊ ချမ်းလည်းချမ်းနေတော့ မီးဖိုပေးပြီး ကြိုဆိုဧည့်ခံကြတယ်။
“သင်တို့ အသက်ဆုံးရှုံးမည် မဟုတ်”
၁၈ ဘေးလွတ်သူများသည် စစ္စလီကျွန်းတောင်ဘက်ရှိ မော်လတာကျွန်းပေါ်တွင် ရောက်နေကြောင်း သိလိုက်ကြ၏။ (“မော်လတာကျွန်း—အဘယ်နေရာတွင် ရှိသနည်း” လေးထောင့်ကွက်ကို ရှု။) ဘာသာခြားစကားပြော ကျွန်းသားတို့သည် သူတို့ကို “အထူးကရုဏာ ပြကြ၏။” (တ. ၂၈:၂) ရေစိုရွှဲနေပြီး ခိုက်ခိုက်တုန်အောင် ချမ်းလျက် ကျွန်းပေါ်ရောက်လာသော သူစိမ်းများအတွက် မီးမွှေးပေးကြသည်။ ချမ်းအေးပြီး မိုးရွာနေသော်လည်း မီးရှိန်ကြောင့် သူတို့ နွေးထွေးလာကြ၏။ ထို့ပြင် မီးမွှေးလိုက်သောကြောင့် အံ့ဖွယ်အမှုတစ်ခု ဖြစ်ပျက်လေသည်။
“သင်တို့ အသက်ဆုံးရှုံးမည် မဟုတ်”
၂၁ ထိုဒေသတွင် ချမ်းသာသောမြေပိုင်ရှင် ပုဗလိ နေထိုင်သည်။ သူသည် မော်လတာကျွန်းကို အုပ်ချုပ်သော ရောမအရာရှိတစ်ဦး ဖြစ်ပေမည်။ လုကာက သူ့ကို “ကျွန်းသူကြီး” ဟုဖော်ပြထားရာ မော်လတာကမ္ပည်းစာနှစ်ခုတွင် တွေ့ရသော ဘွဲ့အမည်ကို အသုံးပြုထားခြင်းဖြစ်သည်။ သူသည် ပေါလုနှင့် အဖော်များကို သုံးရက်တိုင် ဧည့်ဝတ်ပြုလေ၏။ သို့သော် ပုဗလိ၏ဖခင်သည် ဖျားနာနေ၏။ ဤတွင် တစ်ဖန် လုကာသည် အခြေအနေကို တိတိကျကျ ဖော်ပြသည်။ ထိုသူသည် “အဖျားရောဂါနှင့် ဝမ်းကိုက်ရောဂါတို့ကြောင့် လဲလျောင်းနေ၏” ဟု သူရေးခြင်းဖြင့် ရောဂါကို တိတိကျကျ ဖော်ပြသည်။ ပေါလုသည် ဆုတောင်းပြီး သူ့အပေါ်လက်တင်သဖြင့် ရောဂါပျောက်ကင်းလေ၏။ ဒေသခံတို့သည် ထိုအံ့ဖွယ်အမှုကြောင့် အလွန်အထင်ကြီးသွားပြီး အခြားလူနာများကိုလည်း ခေါ်ဆောင်လာကြရာ ရောဂါပျောက်ကင်းသဖြင့် ပေါလုနှင့် သူ့အဖော်တို့အား လက်ဆောင်များစွာ ပေးကြသည်။—တ. ၂၈:၇-၁၀။
(တမန်တော် ၂၈:၁၆၊ ၁၇) နောက်ဆုံးမှာ ရောမမြို့ကို ကျွန်တော်တို့ ရောက်လာတယ်။ ပေါလုဟာ အစောင့်စစ်သည်နဲ့အတူ သီးခြားနေခွင့်ရတယ်။ ၁၇ သုံးရက်ကြာတဲ့အခါ ပေါလုက ဂျူးခေါင်းဆောင်တချို့ကို ခေါ်ဖိတ်တယ်။ သူတို့ ရောက်လာတော့ ပေါလုက “ညီအစ်ကိုတို့၊ ကျွန်တော်က လူမျိုးချင်းတွေကိုရော၊ ဘိုးဘေးတွေရဲ့ ထုံးတမ်းစဉ်လာကိုရော မဆန့်ကျင်ဘဲနဲ့ ဂျေရုဆလင်မြို့မှာ အကျဉ်းချခံရပြီး ရောမလူတွေလက်ထဲ ရောက်ခဲ့ပါတယ်။
“စေ့စေ့စပ်စပ် သက်သေခံလျက်”
၁၀ ခရီးစဉ်အဆုံး ရောမမြို့သို့ ထိုခရီးသည်အုပ်စု ရောက်သောအခါ “ပေါလုသည် အစောင့်စစ်သည်နှင့်အတူ သီးခြားနေခွင့်ရ၏။” (တ. ၂၈:၁၆) အိမ်တွင် အကျယ်ချုပ်ချခံရသူများ မထွက်ပြေးစေရန် အစောင့်နှင့်အတူတွဲ၍ သံကြိုးချည်နှောင်ထားလေ့ရှိသည်။ နိုင်ငံတော်သတင်း ကြွေးကြော်သူတစ်ဦးဖြစ်သော ပေါလုသည် ထိုသို့ချည်နှောင်ခြင်းခံနေရသော်လည်း မဟောပြောဘဲ မနေခဲ့ပါ။ ထို့ကြောင့် သုံးရက်မျှ အနားယူပြီးနောက် ပေါလုသည် မိမိကိုယ်ကို မိတ်ဆက်ပြီး သက်သေခံရန် ရောမမြို့ရှိ ဂျူးတို့တွင် ထင်ရှားသောလူကြီးများကို ခေါ်ဖိတ်လေ၏။
ရှာဖွေလေ့လာ ဘုရားရေးရာရတနာ
(တမန်တော် ၂၇:၉) ရက်ပေါင်းများစွာ ကြာပြီးနောက် အပြစ်ဖြေရာနေ့ အစာရှောင်ချိန်တောင် ကျော်လွန်သွားပြီးဖြစ်လို့ ရေကြောင်းခရီးသွားဖို့ အန္တရာယ်များလာတယ်။ ဒါကြောင့် ပေါလုက၊
nwtsty တ ၂၇:၉ လေ့လာမှု မှတ်စု
အပြစ်ဖြေရာနေ့ အစာရှောင်ချိန်– ဒါမှမဟုတ် “ဆောင်းဦး အစာရှောင်ချိန်။” မူရင်း၊ “အစာရှောင်ချိန်။” ဂရိအသုံးအနှုန်းအရ “အစာရှောင်ချိန်” ဟာ မောရှေပညတ် မိန့်မှာထားတဲ့ နှစ်စဉ် အပြစ်ဖြေရာနေ့မှာ အစာရှောင်တာကိုပဲ ဆိုလိုတယ်။ အဲဒါကို ယုံကိပု (“ဖုံးအုပ်ရာနေ့” လို့အဓိပ္ပာယ်ရှိတဲ့ ဟီဘရူးစကားလုံး ယုံဟာကိပုရိမ် ကနေ ဆင်းသက်လာ) လို့လည်း ခေါ်တယ်။ (ဝ ၁၆:၂၉-၃၁။ ၂၃:၂၆-၃၂။ တလ ၂၉:၇။ ခက်ဆစ်၊ “အပြစ်ဖြေရာနေ့” ကိုကြည့်ပါ။) အပြစ်ဖြေရာနေ့နဲ့ ဆက်နွှယ်အသုံးပြုထားတဲ့ “ကိုယ့်ကိုယ်ကိုယ် ဒဏ်ပေးရမယ်” ဆိုတဲ့ အသုံးအနှုန်းဟာ အစာရှောင်တာလိုမျိုး ခြိုးခြံစွာကျင့်တဲ့ နည်းတွေကို ဆိုလိုတာလို့ ယူဆကြတယ်။ (ဝ ၁၆:၂၉၊ အောက်ခြေမှတ်ချက်။) တ ၂၇:၉ မှာပါတဲ့ “အစာရှောင်ချိန်” ဆိုတဲ့ အသုံးအနှုန်းက အပြစ်ဖြေရာနေ့မှာ အစာရှောင်တာလိုမျိုး ခြိုးခြံစွာကျင့်တဲ့ အဓိကနည်းတစ်နည်းကို ထောက်ခံတယ်။ အပြစ်ဖြေရာနေ့ အစာရှောင်ချိန်ဟာ စက်တင်ဘာလ နှောင်းပိုင်း ဒါမှမဟုတ် အောက်တိုဘာလ အစောပိုင်းမှာ ဖြစ်တယ်။
(တမန်တော် ၂၈:၁၁) သုံးလကြာတဲ့အခါ “ဇုသ အမြွှာနတ်သား” ရုပ်ပါတဲ့ သင်္ဘောနဲ့ ကျွန်တော်တို့ ရွက်လွှင့်ကြတယ်။ အဲဒီသင်္ဘောက အလက်ဇန္ဒြီးယားမြို့ကနေလာပြီး မော်လတာကျွန်းမှာ ဆောင်းခိုနေတာ။
nwtsty တ ၂၈:၁၁ လေ့လာမှု မှတ်စု
ဇုသ အမြွှာနတ်သား– ဂရိနဲ့ ရောမဒဏ္ဍာရီအရ “ဇုသ အမြွှာနတ်သား” (ဂရိ၊ ဒိုင်အိုစကိုရွိုင်) တွေဟာ ကယ်စတာနဲ့ ပေါ်လပ်တို့ ဖြစ်တယ်။ သူတို့ဟာ ဇုသနတ်ဘုရား (ဂျူပီတာ) နဲ့ စပါတာ မိဖုရား လီဒါတို့ရဲ့ အမြွှာသားတွေ ဖြစ်တယ်။ သူတို့ကို ပင်လယ်မှာ ဒုက္ခရောက်နေတဲ့ သင်္ဘောသားတွေကို ကာကွယ်ပေးတဲ့ နတ်ဘုရားတွေအဖြစ် ယူမှတ်ကြတယ်။ သင်္ဘောမှာပါတဲ့ ဇုသ အမြွှာနတ်သားရုပ်အကြောင်း အသေးစိတ်အချက်က ဒီကျမ်းမှတ်တမ်းကို မျက်မြင်သက်သေတစ်ဦး ရေးတယ်ဆိုတာ သက်သေထူတယ်။
ကျမ်းစာဖတ်ရှုခြင်း
(တမန်တော် ၂၇:၁-၁၂) ဖေတ္တုက ကျွန်တော်တို့ကို ရေကြောင်းခရီးနဲ့ အီတလီပို့မယ်လို့ ဆုံးဖြတ်တဲ့အတွက် ပေါလုနဲ့ တခြားအကျဉ်းသားတွေကို ဧကရာဇ်တပ်ရင်းရဲ့ တပ်စုမှူး ယုလိလက်ထဲ အပ်လိုက်ကြတယ်။ ၂ အာရှနယ် ပင်လယ်ကမ်းရိုးတန်းတစ်လျှောက် ရွက်လွှင့်မယ့် သင်္ဘောကို အာဒြမုတ္တိမြို့ကနေ တက်စီးပြီး ရွက်လွှင့်သွားတယ်။ မက်ဆီဒိုးနီးယားပြည် သက်သာလောနိတ်မြို့သား အာရိတ္တာခုလည်း ကျွန်တော်တို့နဲ့အတူ ပါလာတယ်။ ၃ နောက်တစ်နေ့ရောက်တော့ ဆိုင်ဒုန်မြို့မှာ သင်္ဘောဆိုက်တယ်။ ယုလိက ပေါလုကို စေတနာထားပြီး မိတ်ဆွေတွေဆီ သွားခွင့်ပေးတယ်။ ဒါကြောင့် မိတ်ဆွေတွေက ပေါလုကို ကူညီခွင့်ရကြတယ်။ ၄ ဆိုင်ဒုန်မြို့ကနေ ပင်လယ်ဆီ ကျွန်တော်တို့ ပြန်ထွက်လာတဲ့အခါ လေဆန်ဖြစ်နေတော့ ဆိုက်ပရပ်ကျွန်းနား လေကွယ်ရာဘက်ကနေ ရွက်လွှင့်ကြတယ်။ ၅ ကိလိကိပြည်နဲ့ ပံဖုလိပြည်တစ်လျှောက် ပင်လယ်ပြင်ကိုဖြတ်ပြီး လုကိပြည်၊ မုရမြို့ကို ရောက်လာတယ်။ ၆ အဲဒီမှာ အလက်ဇန္ဒြီးယားမြို့ကနေလာတဲ့ သင်္ဘောကို တွေ့တယ်၊ အဲဒီသင်္ဘောက အီတလီပြည်ကို သွားမှာဖြစ်လို့ တပ်မှူးက ကျွန်တော်တို့ကို အဲဒီသင်္ဘောပေါ် တင်ပေးလိုက်တယ်။ ၇ ကျွန်တော်တို့ ရက်အတန်ကြာ တဖြည်းဖြည်း ရွက်လွှင့်လာတဲ့အခါ ကနိဒ်မြို့ကို ခက်ခက်ခဲခဲ ရောက်လာတယ်။ လေကြောင်း မသင့်တဲ့အတွက် ရှေ့ဆက်မသွားနိုင်ဘူး။ ဒါကြောင့် သာလမုန်အငူနားကနေ ဖြတ်ပြီး ခရိကျွန်းနား လေကွယ်ရာဘက်ကနေ ရွက်လွှင့်သွားကြတယ်။ ၈ ကမ်းရိုးတန်းတစ်လျှောက် ခက်ခက်ခဲခဲ ရွက်လွှင့်လာပြီးနောက် လာသဲမြို့နားက ဆိပ်ကမ်းသာလို့ခေါ်တဲ့ နေရာကို ရောက်လာကြတယ်။ ၉ ရက်ပေါင်းများစွာ ကြာပြီးနောက် အပြစ်ဖြေရာနေ့ အစာရှောင်ချိန်တောင် ကျော်လွန်သွားပြီးဖြစ်လို့ ရေကြောင်းခရီးသွားဖို့ အန္တရာယ်များလာတယ်။ ဒါကြောင့် ပေါလုက၊ ၁၀ “မိတ်ဆွေတို့၊ ကျွန်တော်တို့ ခရီးဆက်မယ်ဆိုရင် သင်္ဘောရော ကုန်စည်တွေပါ ဆုံးရှုံးရုံမက လူတွေလည်း အသက်ဆုံးရှုံးမယ်ဆိုတာ ကျွန်တော်သိနေတယ်” လို့ အကြံပြုတယ်။ ၁၁ ဒါပေမဲ့ တပ်စုမှူးက ပေါလုအကြံပေးတာကို လက်မခံဘဲ မာလိန်မှူးနဲ့ သင်္ဘောပိုင်ရှင် ပြောတာကိုပဲ နားထောင်တယ်။ ၁၂ အဲဒီဆိပ်ကမ်းက ဆောင်းခိုဖို့ မသင့်တော်ဘူး။ ဒါကြောင့် အဲဒီကနေ ရွက်လွှင့်ပြီး ခရိကျွန်း၊ ဖိနိတ်ဆိပ်ကမ်းဆီ အရောက်သွားမယ်ဆိုရင် ဆောင်းခိုလို့ ရနိုင်မယ်လို့ အများစုက အကြံပြုတယ်။ ဖိနိတ်ဆိပ်ကမ်းမှာ အရှေ့မြောက်နဲ့ အရှေ့တောင်ဘက်ကို မျက်နှာမူထားတဲ့ သင်္ဘောဆိပ်နှစ်ခု ရှိတယ်။