ဘုရားသခင့်နိုင်ငံတော်ကြွေးကြော်သူများမှတ်တမ်း

ယေဟောဝါသက်သေများ အလွတ်သဘောဟောပြောခြင်းကြောင့် ကောင်းကျိုးများရရှိ

လူအများတို့သည် ယေဟောဝါသက်သေများ သူတို့ကို အလွတ်သဘောဟောပြောရာမှ ကျမ်းစာသမ္မာတရားကို ဦးစွာသိရှိလာကြသည်။ ဤကိစ္စတွင် သက်သေခံများသည် ယေရှုခရစ်၏ပုံသက်သေကို လိုက်ကြသည်။ ကိုယ်တော်သည် ရေတွင်းအနီးတွင် ရေခပ်လာသော ရှမာရိအမျိုးသမီးတစ်ဦးအား အလွတ်သဘောဟောပြောတော်မူခဲ့သည်။ (ယောဟန် အခန်းကြီး ၄) အရှေ့အာဖရိကတွင် ယေဟောဝါသက်သေတစ်ဦးက သီလရှင်တစ်ဦးအား အလွတ်သဘောသက်သေခံခဲ့သည်။ ကင်းမျှော်စင်အသင်း၏ ဌာနခွဲရုံးကရရှိသည့်အကျိုးကို အောက်ပါအတိုင်း ပြန်လည်ပြောပြသည်။

▫ သက်သေခံအမျိုးသမီးတစ်ဦးသည် နံနက်စောစောမြို့သို့သွားစဉ် ခရီးတွင်ချာ့ချ်တစ်ခုမှ သီလရှင်တစ်ဦးနှင့် တွေ့ဆုံသည်။ သူမကအခွင့်အရေးယူကာ သီလရှင်အား “ဒီလောက်စောစောစီးစီး ဘယ်ကိုသွားမလို့လဲ” ဟုမေးမြန်းရာ “ကျွန်မရဲ့ဘုရားသခင်ဆီ ဆုတောင်းဖို့သွားတာပါ” ဟုဖြေကြားသည်။ “ရှင့်ဘုရားရဲ့နာမည်ကိုသိပါသလား” ဟုသူမကထပ်၍မေးလိုက်ရာ “သူ့နာမည်က ဘုရားသခင်ဘဲမဟုတ်လား” ဟုသီလရှင်ကပြန်ဖြေသည်။ သက်သေခံက ဘုရားသခင့်နာမတော်အကြောင်း ဆွေးနွေးရန် ထိုနေ့မွန်းလွဲပိုင်းတွင် သူမအိမ်သို့လာမည့်အကြောင်း စကားကမ်းလှမ်းလိုက်သည်။ ထိုသို့ဆွေးနွေးပြီးနောက် သီလရှင်က သူမ၏ဘုရားကျောင်းသို့သွားကာ အထက်လူကြီးအား “ယေဟောဝါ” ဆိုသည်မှာ မည်သည့်အဓိပ္ပာယ်ရှိကြောင်း သိမသိမေးမြန်းရာ ရရှိသောအဖြေမှာ “အဲဒါဘုရားသခင်ရဲ့နာမည်ဖြစ်သည်။” အထက်လူကြီးသည် ဤအကြောင်းကိုသိသော်လည်း သူမအား တစ်ခါမျှပြောမပြခြင်းအတွက် သီလရှင်က အလွန်အံ့သြမိခဲ့သည်။

သက်သေခံသည် ထိုအမျိုးသမီးထံသို့ ကိုးရက်ဆက်တိုက်သွား၍ သုံးပါးပေါင်းတစ်ဆူဘုရား၊ ဝိညာဉ်စိုးလ်၊ ငရဲနှင့်သေလွန်သူတို့အတွက် မျှော်လင့်ချက်အကြောင်းနှင့်ဆိုင်သော သမ္မာတရားကို သင်ပေးခဲ့သည်။ ထိုအမျိုးသမီးသည် သင်ကြားပေးသမျှကို မှတ်သားပြီးနောက် ဤသွန်သင်ချက်အသစ်များကို ဆင်ခြင်သုံးသပ်ဖို့ အချိန်ပေးရန် သက်သေခံအား တောင်းဆိုသည်။ နှစ်ပတ်လွန်ပြီးနောက် သူမသည် သက်သေခံနှင့် ပြန်လည်ဆက်သွယ်ပြီး ဆက်လက်ဆွေးနွေးရန်ပြောသည်။ ထိုအချိန်တွင် သီလရှင်သည် သူမ၏အသင်းမှထွက်ရန် စိတ်ဆုံးဖြတ်ပြီးဖြစ်သည်။ အထက်လူကြီးက သူမကိုပြန်လာရန် ကြိုးစားဖျောင်းဖျသော်လည်း သူမသည် သမ္မာတရားအတိုင်း အမီလိုက်ရန် သန္နိဌာန်ချထားလေသည်။ နောက်ပိုင်းတွင် သူမသည် နှစ်ခြင်းခံပြီးနောက် အသက်ကြီး၍ကျန်းမာရေးမကောင်းသည့်ကြားမှ မှန်မှန်ရှေ့ဆောင်အဖြစ် လပေါင်းများစွာ အမှုတော်ဆောင်ခဲ့သည်။

သူမ၏နေအိမ်မှာကြီးသောကြောင့် ဘုရားသခင်နိုင်ငံတော်ခန်းမအဖြစ်အသုံးပြုရန် အသင်းတော်ကို အခွင့်ပေးရာ ညီအစ်ကိုတို့က အမိုးကိုလဲ၊ အတွင်း၌ ကာထားသောအုတ်နံရံများကိုဖြိုပြီး အဆောက်အဦ၏ကျယ်ဝန်းသောအပိုင်းကို တင့်တယ်လှပသောစည်းဝေးနေရာဖြစ်အောင် ပြုလုပ်လိုက်သည်။ သီလရှင်ဖြစ်ခဲ့ဖူးသော ဤအမျိုးသမီးသည် ခန်းမအနောက်ရှိအခန်းတွင် နေထိုင်သည်။ သူမသည် ယေဟောဝါ၏ကိုးကွယ်ဝတ်ပြုရေးအတွက် ဤသို့လှူဒါန်းလိုက်ရသည့်အတွက် အလွန်ပျော်ရွှင်နေသည်။

▫ အလွတ်သဘောသက်သေခံခြင်း၏ ဉာဏ်ပညာကိုပြသသည့်နောက် တွေ့ကြုံမှုကို ယူဂန္ဓာနိုင်ငံ ကမ်ပါလာမြို့မှရရှိသည်။ အစိုးရရုံးတစ်ရုံးသို့သွားနေစဉ် သက်သေခံသာသနာပြုတစ်ယောက်က ဓာတ်လှေခါးအတွင်း အတူရှိသူတို့အား အလွတ်သဘောစကားစမြည်ပြောဆိုရာ မစ္စတာအယ်လ်—ဆိုသူက ဝေငှသည့်စာပေများကို လိုချင်သော်လည်း လောလောဆယ်မယူနိုင်သေးကြောင်း ပြောခဲ့သည်။ သို့နှင့်သူက သူ့နာမည်နှင့်ရုံးလိပ်စာကို သာသနာပြုအားပေးခဲ့သည်။ နောက်ပိုင်းတွင် သာသနာပြုက လိပ်စာအတိုင်းသွား၍ မစ္စတာအယ်လ်—ကိုစုံစမ်းရာ တွေ့ဆုံခွင့်ရသော်လည်း အခြားလူတစ်ယောက်ဖြစ်နေသည်ကို သာသနာပြုက အံ့သြစွာတွေ့လိုက်ရသည်။ ထိုရုံးတွင် လုပ်ကိုင်သောနာမည်တူလူနှစ်ယောက်ရှိသည်။ ဒုတိယမစ္စအယ်လ်—အား အတိုချုပ်၍သက်သေခံကြည့်ရာ အထူးစိတ်ဝင်စားသည်ကိုတွေ့ရှိသည်။ ပထမ မစ္စတာအယ်လ်—သည် စိတ်ဝင်စားမှုမရှိ ဖြစ်သွားသော်လည်း ဒုတိယမစ္စတာအယ်လ်—နှင့် ကျမ်းစာသင်အံမှုစနိုင်ခဲ့သည်။ သူသည် ယခုနှစ်ခြင်းခံပြီးသော သက်သေခံဖြစ်နေသည့်အပြင် ဇနီးနှင့်သားတို့ကလည်း နှစ်ခြင်းခံနိုင်ရန် ကောင်းစွာတိုးတက်လျက်ရှိသည်။

ယေရှုခရစ်တော်သည် ကောင်းသောသိုးထိန်းဖြစ်တော်မူသဖြင့် ဖြောင့်မတ်ခြင်းတရားဘက် စိတ်နှလုံးတိမ်းညွတ်သည့် သိုးကဲ့သို့သောသူတို့ကို သိတော်မူ၏။ ထိုသို့သောသူတို့ထံ တပည့်တော်များရောက်ရှိရန် ကိုယ်တော်ညွှန်ကြားနေကြောင်း ဤတွေ့ကြုံမှုများကပြသနေသည်။ အလွတ်သဘောဟောပြောခြင်းသည် အကျိုးဖြစ်ထွန်းနိုင်သည်တကား။—ယောဟန် ၁၀:၁၄။