ပိတ်ပင်မှုအောက်ရှိကျွန်ုပ်တို့အား ယေဟောဝါစောင့်ရှောက်—အပိုင်း ၁

ဆယ်စုနှစ်များစွာတစ်လျှောက် ယေဟောဝါသက်သေများသည် သူတို့၏ခရစ်ယာန်လှုပ်ရှားမှုများပိတ်ပင်တားမြစ်ခံရသောနိုင်ငံများရှိ သူတို့ညီအစ်ကိုများအကြောင်းသိလိုခဲ့ကြသည်။ ထိုနေရာများတွင်ဖြစ်ပျက်ခဲ့သည့်အကြောင်းအရာအချို့ကို ဖော်ပြသည့် ပထမပိုင်းဆောင်းပါးသုံးပိုဒ်ကိုတင်ဆက်ခွင့်ရသည့်အတွက် ကျွန်ုပ်တို့ဝမ်းသာကြသည်။ ယင်းတို့သည် ယခင်ကအရှေ့ဂျာမနီဟုသိခဲ့ကြသောနိုင်ငံရှိ သစ္စာရှိခရစ်ယာန်များ၏ကိုယ်ပိုင်မှတ်တမ်းများဖြစ်ကြသည်။

၁၉၄၄ ခုနှစ်တွင် ကျွန်တော်သည် ဂျာမန်စစ်အကျဉ်းသားဖြစ်နေပြီး စကော့တလန်နိုင်ငံ၊ အဲရ်မြို့အနီးရှိ ကမ္မနော့ခ်စခန်းတွင် ဆေးရုံအမှုထမ်းအဖြစ် လုပ်ဆောင်နေရသည်။ ဒေသခံလူများနှင့် တရင်းတနှီးဆက်ဆံခြင်းကို တားမြစ်ထားသော်လည်း ကျွန်တော်အား စခန်းအပြင်ထွက်ခွင့်ကိုပေးထားသည်။ တစ်ခုသောတနင်္ဂနွေနေ့၌ ကျွန်တော်လမ်းလျှောက်ထွက်စဉ် ကျမ်းစာမှအကြောင်းများကို ကျွန်တော့်အား စိတ်အားထက်သန်စွာရှင်းပြခဲ့သည့်လူတစ်ယောက်နှင့်တွေ့ဆုံခဲ့သည်။ နောက်ပိုင်းတွင် မကြာခဏဆိုသလို ကျွန်တော်တို့အေးအေးဆေးဆေးတွေ့ဆုံဖြစ်ခဲ့ကြသည်။

တစ်ခါသော် ကျွန်တော့်အား အိမ်တစ်အိမ်တွင် စုဝေးရန်ခေါ်ဖိတ်ခဲ့သည်။ ယင်းသို့ပြုခြင်းသည် သူ့အတွက် အလွန်အန္တရာယ်များသည်။ အကြောင်းမှာ ကျွန်တော်သည် ရန်သူလူမျိုးများ၏ ဘက်သားတစ်ယောက်ဖြစ်နေသောကြောင့်ဖြစ်သည်။ ထိုအချိန်က သူသည် ယေဟောဝါသက်သေတစ်ဦးဖြစ်ပြီး အစည်းအဝေးသည် သူတို့၏ကျမ်းစာလေ့လာမှုအုပ်စုငယ်တစ်ခုဖြစ်ကြောင်း ကျွန်တော်မသိခဲ့ပါ။ ကျွန်တော်သိပ်သဘောမပေါက်ခဲ့သော်လည်း ကလေးငယ်တစ်ယောက်သည် ရှည်သောအဖြူရောင်ဝတ်စုံကိုဝတ်ဆင်ထားပြီး ခြင်္သေ့တစ်ကောင်နှင့် သိုးကလေးတစ်ကောင်အလယ်တွင်ရှိနေသည့်ရုပ်ပုံတစ်ခုကို ကျွန်တော်ကောင်းစွာမှတ်မိနေသည်။ ယင်းသည် သမ္မာကျမ်းစာရှိ ဟေရှာယကျမ်းတွင်ပါသော ကမ္ဘာသစ်ကိုပုံဖော်ထားပြီး ကျွန်တော့်အားအလွန်စိတ်စွဲငြိစေခဲ့သည်။

၁၉၄၇ ခုနှစ်၊ ဒီဇင်ဘာလရောက်သောအခါ အကျဉ်းစခန်းမှ ကျွန်တော်လွတ်မြောက်ခဲ့သည်။ အမိနိုင်ငံဂျာမနီသို့ပြန်လာပြီး စစ်ပွဲမတိုင်မီက ကျွန်တော်သိကျွမ်းခဲ့ဖူးသူ မားဂစ်အား လက်ထပ်ခဲ့သည်။ ပိုလန်နှင့်ချက်ကိုစလိုဗားကီးယားနိုင်ငံနယ်စပ်ရှိ ဇီတောင်မြို့တွင် ကျွန်တော်တို့အခြေချကြသည်။ ရက်အနည်းငယ်အတွင်း ယေဟောဝါသက်သေတစ်ဦးကျွန်တော်တို့အိမ်တံခါးလာခေါက်သည်။ “စကော့တလန်မှာကိုယ်တွေ့ခဲ့တဲ့အဖွဲ့ဆိုရင်တော့ သူတို့နဲ့ပေါင်းရမယ်” ဟုကျွန်တော့်ဇနီးအားကျွန်တော်ပြောသည်။ ထိုအပတ်အတွင်း၌ပင် ကျွန်တော်တို့သည် ယေဟောဝါသက်သေများနှင့် ပထမဆုံးအကြိမ် အစည်းအဝေးတက်ကြသည်။

မကြာမီကျွန်တော်တို့သည် ခရစ်ယာန်အစည်းအဝေးများကို မှန်မှန်တက်ရောက်ရန်နှင့် ဟောပြောခြင်းလုပ်ငန်းတွင်ပါဝင်ရန်လိုအပ်ကြောင်း သမ္မာကျမ်းစာမှသိရှိလာခဲ့ကြသည်။ သမ္မာကျမ်းစာမှ သက်သေခံများသင်ပေးသောအရာများသည် မကြာမီ ကျွန်တော်တို့ဘဝအတွက် အရေးကြီးဆုံးအရာများဖြစ်လာသည်။ အချိန်တန်သော် ကျမ်းစာလေ့လာသည့်အုပ်စုတစ်ခုကို ကျွန်တော်စတင်ဦးဆောင်ခဲ့သည်။ ၁၉၅၀ ခုနှစ်၊ ဖေဖော်ဝါရီလတွင် နယ်လှည့်ကြီးကြပ်မှူးနှစ်ဦးက “ခင်ဗျားတို့နှစ်ခြင်းမခံချင်ကြဘူးလား” ဟုမေးခဲ့ရာ ထိုနေ့လည်ပိုင်းတွင်ပင် မားဂစ်နှင့်ကျွန်တော်တို့နှစ်ခြင်းအားဖြင့် ဘုရားသခင်ထံဆက်ကပ်အပ်နှံကြောင်း တင်ပြခဲ့ကြသည်။

ပြဿနာများစတင်ခြင်း

ဇီတောင်သည် ဂျာမနီရှိဆိုဗီယက်ဇုံအတွင်းတည်ရှိရာ ယေဟောဝါသက်သေများကို နှောင့်ယှက်ရန်ကြိုးစားမှုသည် ၁၉၄၉ ခုနှစ်တွင် စတင်ခဲ့သည်။ ကြီးမားသောအခက်အခဲများကြားမှ ဘော့တ်ဇဲန်၌ စည်းဝေးပွဲငယ်ကလေးကျင်းပရန် အဆောက်အဦများရရှိခဲ့သည်။ နွေရာသီတွင် ဘာလင်တွင်ကျင်းပမည့်ခရိုင်စည်းဝေးပွဲကြီးအတွက် အထူးရထားအစီအစဉ်များ ရုတ်တရက်ဖျက်သိမ်းခံခဲ့ရသည်။ သို့သော် တက်ရောက်သူထောင်ချီ၍ရှိခဲ့သည်။

အသင်းတော်အစည်းအဝေးများလည်း နှောင့်ယှက်ခြင်းခံခဲ့ရသည်။ ဟောပြောသူကို အနှောင့်အယှက်ပေးသူများသည် အော်ဟစ်ခြင်းနှင့်လေချွန်ခြင်းများပြုလုပ်ရန်အတွက် အစည်းအဝေးတက်ကြသည်။ တစ်ခါက နယ်လှည့်ကြီးကြပ်မှူး၏ဟောပြောချက်ပင် ရပ်တန့်လုနီးပါး နှောင့်ယှက်ခြင်းခံရသည်။ သတင်းစာက ကျွန်တော်တို့အား ဆုံးခန်းအချိန်၏ပရောဖက်များဟုခေါ်သည်။ သတင်းဆောင်းပါးများက ကျွန်တော်တို့သည် မိုးတိမ်ထဲသို့စုသိမ်းခြင်းခံရရန် တောင်ထိပ်များတွင် စုရုံးနေကြသည်ဟုပင် ဆိုကြသည်။ သက်သေခံများသည် မိမိတို့နှင့်သီလယိုယွင်းမှုပြုရန် ကြိုးစားကြသည်ဟုဆိုသော မိန်းကလေးအချို့၏ပြောဆိုချက်ကို သတင်းစာများကကိုးကားဖော်ပြကြသည်။ ‘ယေဟောဝါထံဆက်ကပ်အပ်နှံမှုပြုသူသည် ထာဝရအသက်ကိုရမည်’ ဟူသောရှင်းပြချက်ကို သက်သေခံများနှင့် လိင်ဆက်ဆံမှုရှိသောသူသည် ထာဝရအသက်ကိုရမည်ဟု လုပ်ကြံပြောဆိုကြသည်။

နောက်ပိုင်းတွင် ကျွန်တော်တို့သည် စစ်လှုံ့ဆော်သူများဟူ၍ပင် စွပ်စွဲခံကြရသည်။ ကျွန်တော်တို့ပြောသည့်ဘုရားသခင့်အာမဂေဒုန်စစ်ပွဲသည် လက်နက်ပြိုင်ဆိုင်ထုတ်လုပ်ရေးနှင့်စစ်ကို အားပေးခြင်းဖြစ်သည်ဟု မှားယွင်းစွာအဓိပ္ပာယ်ဖွင့်ခြင်းခံခဲ့ရသည်။ အခြေအမြစ်မဲ့လိုက်လေခြင်း။ သို့ရာတွင် ၁၉၅၀ ခုနှစ်၊ ဩဂုတ်လတွင် ပုံနှိပ်သူအဖြစ်ကျွန်တော်အလုပ်လုပ်သော ဒေသခံသတင်းစာတိုက်သို့ ညတာဝန်အတွက်ကျွန်တော်ရောက်သောအခါ ဂိတ်ပေါက်တွင်ရပ်တန့်ခြင်းခံရပြီး ရဲများနှင့်အတူရှိသောအစောင့်က “မင်းကိုအလုပ်ကထုတ်လိုက်ပြီ။ မင်းတို့တတွေဟာ စစ်ကိုလိုလားတဲ့သူတွေပဲ” ဟုပြောသည်။

အိမ်ပြန်ရောက်သောအခါ မားဂစ်မှာ စိတ်သက်သာမှုရှိပါသည်။ “အလုပ်ပြန်နောက်မကျတော့ဘူးပေါ့” ဟုသူမဆိုသည်။ ကျွန်တော်တို့မစိုးရိမ်ခဲ့ပါ။ မကြာမီ အခြားအလုပ်တစ်ခုကို ကျွန်တော်ရှာတွေ့ခဲ့သည်။ ဘုရားသခင်ပေးမည်ကို ကျွန်တော်တို့ယုံကြည်စိတ်ချခဲ့ကြပြီး ကိုယ်တော်ပေးတော်မူခဲ့သည်။

ကျွန်တော်တို့၏လုပ်ငန်းပိတ်ပင်ခံရ

၁၉၅၀ ခုနှစ် ဩဂုတ်လ ၃၁ ရက်ရောက်သော် ဂျာမန်ဒီမိုကရက်တစ်သမ္မတနိုင်ငံအတွင်းရှိ ယေဟောဝါသက်သေတို့၏လှုပ်ရှားမှုမှာ ပိတ်ပင်ခံခဲ့ရသည်။ ဖမ်းဆီးမှုများ ဆက်တိုက်တိုးတက်လာခဲ့သည်။ သက်သေခံများသည် စစ်ဆေးခြင်းများခံရကြပြီး အချို့သေဒဏ်စီရင်ခြင်းခံခဲ့ကြရသည်။ ဇီတောင်မြို့ရှိနာဇီအကျဉ်းစခန်းများတွင် ညှဉ်းဆဲခံခဲ့ရသူနှစ်ဦးသည် ကွန်မြူနစ်တို့၏ထောင်ချခြင်းကိုခံခဲ့ရသည်။

ကျွန်တော်တို့အသင်းတော်ကိုကြီးကြပ်သူသည် သူ၏ဇနီးနှင့်အတူဖမ်းဆီးခံရသည်။ သူတို့၏ကလေးငယ်နှစ်ဦးကို ဖမ်းဆီးသူများသည် အိမ်တွင်ထားခဲ့ကြသည်။ အဖိုးအဖွားဖြစ်သူတို့က ကလေးငယ်များကိုယူ၍ကြည့်ရှုထားရာ ယခုထိုမိန်းကလေးနှစ်ဦးစလုံးသည် ဘုရားသခင့်နိုင်ငံတော်အကြောင်းကို ဇွဲရှိစွာဟောပြောနေကြသည်။

အရှေ့ဂျာမနီအသင်းတော်များရှိ သတင်းပို့သူများသည် အနောက်ဘက်စစ်မျက်နှာပြင်ရှိ စာပေစာတမ်းများရယူရာနေရာများသို့ ဘာလင်မှခေါက်တုံ့ခေါက်ပြန်သွားလာပြီး စာပေများကို သယ်ယူကြသည်။ သတ္တိရှိချောလုလင်များစွာအဖမ်းခံရပြီး တရားရုံးတွင်စီရင်ခံရကာ ထောင်ချခံကြရသည်။

နံနက်စောစောတစ်ခုတွင် အာဏာပိုင်များသည် ကျွန်တော်တို့၏အိမ်ကိုရှာဖွေမှုပြုရန် ရောက်လာကြသည်။ သူတို့၏အလာကို ကျွန်တော်တို့မျှော်လင့်ထားခဲ့ကြသည်။ ထို့ကြောင့် ကျွန်တော်သိမ်းဆည်းထားသည့်အသင်းတော်မှတ်တမ်းအားလုံးကို နကျယ်ကောင်များအသိုက်အနီးရှိစပါးကျီထဲတွင် ထိုးထည့်ထားသည်။ ပိုးကောင်များသည် ကျွန်တော့်ကို တစ်ခါမျှဒုက္ခမပေးဖူးပါ။ သို့သော် ထိုလူများက ဟိုဟိုဒီဒီထိုးကြည့်သောအခါ နကျယ်ကောင်များအုပ်လိုက်ထွက်၍ သူတို့ကိုဝိုင်းအုံလိုက်ရာ အားလုံးထွက်ပြေးကုန်ကြသည်။

ယေဟောဝါသည် ကျွန်တော်တို့အား ၁၉၄၉ ခုနှစ်တွင်ကျင်းပသောစည်းဝေးပွဲကြီးအားဖြင့်လည်း ပိတ်ပင်မှုအတွက် အသင့်ပြင်ပေးခဲ့သည်။ ကျွန်တော်တို့အား ကိုယ်ပိုင်လေ့လာမှု၊ အစည်းအဝေးများတက်ရောက်ခြင်းနှင့် ကျွန်တော်တို့၏ဟောပြောခြင်းလုပ်ဆောင်မှုများကို တိုးမြှင့်ကြရန်၊ တစ်ဦးနှင့်တစ်ဦးကူညီထောက်မကြပြီး အားပေးကြရန် စည်းဝေးပွဲအစီအစဉ်က ကျွန်တော်တို့ကိုလှုံ့ဆော်ခဲ့သည်။ ယင်းက ကျွန်တော်တို့ဆက်လက်သစ္စာရှိရန် အမှန်အကူအညီဖြစ်စေခဲ့သည်။ ထို့ကြောင့် လူများကျွန်တော်တို့ကိုအပြစ်တင်ဝေဖန်ပြီး ကြိမ်ဆဲကြသော်လည်း ကျွန်တော်တို့မမှုခဲ့ကြပါ။

ပိတ်ပင်မှုအောက်တွင်အစည်းအဝေးများကျင်းပခြင်း

ပိတ်ပင်မှုကိုကြေညာပြီးသောအခါ သက်သေခံနှစ်ဦးနှင့်ကျွန်တော်တွေ့ဆုံပြီး အသင်းတော်အစည်းအဝေးများကို မည်သို့ကျင်းပရမည်ကို ဆွေးနွေးခဲ့ကြသည်။ အစည်းအဝေးအတွင်းဖမ်းဆီးမိလျှင် ထောင်ချခံရမည်ဖြစ်သောကြောင့် အစည်းအဝေးတက်ခြင်းသည် အလွန်အန္တရာယ်များသည်။ ကျွန်တော်တို့နယ်မြေအတွင်းရှိ သက်သေခံများထံသို့ သွားရောက်လည်ပတ်ခဲ့သည်။ အချို့တို့သည် စိုးရိမ်ပူပန်ကြသော်လည်း အစည်းအဝေးများတက်ခြင်းသည် အရေးကြီးကြောင်းကို ယောက်တိုင်းအသိအမှတ်ပြုခြင်းသည် အားရှိစရာဖြစ်ခဲ့သည်။

စိတ်ဝင်စားသူတစ်ယောက်သည် ကျွန်တော်တို့ကို အစည်းအဝေးကျင်းပရန် စပါးကျီတစ်ခုပေးထားသည်။ ယင်းသည် လယ်ကွင်းထဲတွင်ရှိပြီး လူတိုင်းမြင်နိုင်သော်လည်း နောက်ဘက်တွင်တံခါးရှိပြီး ယင်းသည် ချုံဖုတ်များဖြင့်ကွယ်နေသောလမ်းကလေးတစ်ခုနှင့် တည့်တည့်ရှိနေသည်။ ထို့ကြောင့် ကျွန်တော်တို့သွားလာခြင်းကို မည်သူမျှမမြင်နိုင်ကြပါ။ ထိုစပါးကျီသည် ဆောင်းရာသီတစ်လျှောက်လုံး လူပေါင်း ၂၀ ခန့်တို့နှင့် ဖယောင်းတိုင်မီးဖြင့် ကျွန်တော်တို့၏အစည်းအဝေးကျင်းပရာနေရာဖြစ်ခဲ့သည်။ ကင်းမျှော်စင် သင်တန်းနှင့် လုပ်ငန်းတော်အစည်းအဝေးအတွက် ကျွန်တော်တို့အပတ်စဉ်တွေ့ဆုံစည်းဝေးကြသည်။ ဝိညာဉ်ရေးတွင် ကျွန်တော်တို့နိုးကြားနေကြရန် အထူးပြုဖော်ပြသည့်အစီအစဉ်ကို ကျွန်တော်တို့၏အခြေအနေအပေါ်မူတည်ပြီး ပြောင်းလဲထားသည်။ မကြာမီ ထိုလူအား ကျွန်တော်တို့၏ညီအစ်ကိုအသစ်အဖြစ် ကြိုဆိုလက်ခံရသည့် စိတ်တက်ကြွမှုကိုခံစားခဲ့ရသည်။

၁၉၅၀ ပြည့်နှစ်များ၏အလယ်လောက်တွင် တရားရုံး၏စီရင်ချက်များသည် ပျော့ပျောင်းလာပြီး အချို့ညီအစ်ကိုများထောင်မှလွတ်ခဲ့ကြသည်။ များစွာသောသူတို့သည် အနောက်ဂျာမနီသို့နှင်ထုတ်ခံရကြသည်။ ကျွန်တော့်အတွက်မူ အနောက်ဂျာမနီမှညီအစ်ကိုတစ်ဦးလာရောက်လည်ပတ်ပြီးနောက် မမျှော်လင့်သောအပြောင်းအလဲတစ်ရပ်ဖြစ်ခဲ့သည်။

ကျွန်တော်ပထမဆုံးအရေးကြီးတာဝန်

မိမိကိုယ်ကို ဟန်စ်ဟုခေါ်သော ညီအစ်ကိုတစ်ယောက်ရှိသည်။ သူနှင့်ကျွန်တော်စကားပြောပြီးနောက်တွင် ကျွန်တော့်အား ဘာလင်ရှိလိပ်စာတစ်ခုရှိရာသို့သွားခိုင်းသည်။ တံခါးခေါင်းလောင်းကို အမှတ်သင်္ကေတဖြင့်နှိပ်လိုက်သောအခါ အထဲသို့ဝင်ခွင့်ရခဲ့သည်။ လူနှစ်ယောက်သည် ကျွန်တော်နှင့်အတူ နှစ်သက်ဖွယ်ကောင်းသော်လည်း အလွန်ယေဘုယျဆန်သောဆွေးနွေးမှုကိုပြုခဲ့သည်။ သူတို့က “အထူးတာဝန်တစ်ရပ်ကိုခင်ဗျားရရင် လက်ခံနိုင်မလား” ဟုစ၍မေးလာသည်။

“ဟုတ်ကဲ့” ဟုကျွန်တော်ဖြေခဲ့သည်။

“ကောင်းပြီ။ အဲဒါကိုပဲကျွန်တော်တို့သိချင်နေတာ။ ခင်ဗျားအိမ်ကိုပဲကောင်းကောင်းမွန်မွန်ရောက်အောင်ပြန်ပါ”

နောက်သုံးပတ်ကြာသောအခါ ကျွန်တော်ဘာလင်သို့တစ်ခေါက်ပြန်လာရပြီး ယခင်အခန်းထဲ၌တစ်ခါရောက်ပြန်သည်။ ညီအစ်ကိုများသည် ဇီတောင်နှင့်အနီးတစ်ဝိုက်ဒေသရှိရာမြေပုံကို ကျွန်တော့်အားပေးပြီး ဤသို့တွေ့ဆုံရခြင်း၏လိုရင်းချက်ကို ပြောပြကြသည်။ “ဒီဒေသမှာရှိတဲ့သက်သေခံတွေနဲ့ ကျွန်တော်တို့အဆက်အသွယ်မရဘူး။ ခင်ဗျားအဆက်အသွယ်လုပ်ပေးနိုင်မလား။”

“ဟုတ်ကဲ့၊ ကျွန်တော်လုပ်မယ်” ဟုချက်ချင်းကျွန်တော်ပြန်ဖြေကြားခဲ့သည်။ နယ်မြေသည် ကျယ်ဝန်းပြီး ရီဇားမှဇီတောင်အထိ မိုင်ပေါင်း ၆၀ ကျော်ရှည်လျားပြီး မိုင် ၃၀ အထိကျယ်သည်။ ကျွန်တော့်တွင် စက်ဘီးသာရှိသည်။ သက်သေခံတစ်ဦးစီနှင့်ဆက်သွယ်မိသောအခါ ထိုသူတစ်ဦးစီသည် မိမိတို့၏အသင်းတော်နှင့်ပြန်လည်တွေ့ဆုံပြီး အသင်းတော်တစ်ခုစီက ဘာလင်သို့ စာပေစာတမ်းနှင့်ညွှန်ကြားချက်များကို သွားရောက်ရယူသည့်ကိုယ်စားလှယ် မှန်မှန်စေလွှတ်သည်။ ဤနည်းစနစ်သည် အာဏာပိုင်များ၏နှိပ်စက်ညှဉ်းပန်းခြင်းကို အသင်းတော်တစ်ခုခံရသောအခါ အခြားအသင်းတော်တစ်ခုကို အန္တရာယ်မဖြစ်စေရန်ကာကွယ်ပေးသည်။

ယေဟောဝါကိုယုံစားခြင်း

နှိပ်စက်ညှဉ်းပန်းမှုများကြားမှပင် ကျမ်းစာ၏ညွှန်ကြားချက်ကိုလိုက်နာသောအားဖြင့် ကျွန်တော်တို့သည် တစ်အိမ်တက်ဆင်းဘုရားသခင့်နိုင်ငံတော်သတင်းဟောပြောခြင်းကို မရပ်ဆိုင်းခဲ့ပါ။ (မဿဲ ၂၄:၁၄။ ၂၈:၁၉၊ ၂၀။ တမန်တော် ၂၀:၂၀) ကျွန်တော်တို့နှင့် လူချင်းသိထားနှင့်သူများက သွားရန်အားပေးထောက်ခံထားသောလိပ်စာများသို့ ကျွန်တော်တို့သွားကြပြီး အံ့သြဖွယ်တွေ့ကြုံမှုများကိုတွေ့ကြုံကြရသည်။ တစ်ခါတွင် ကျွန်တော်တို့၏မှားယွင်းမှုသည် ကောင်းချီးအဖြစ်သို့ပြောင်းလဲသွားသည်ကို အောက်ပါအတိုင်းတွေ့ခဲ့ရသည်။

ကျွန်တော်နှင့်ကျွန်တော့်ဇနီးတို့သည် လည်ပတ်ရန်လိပ်စာတစ်ခုကိုရရှိခဲ့သည်။ သို့သော် ကျွန်တော်တို့အိမ်မှားရောက်သွားခဲ့သည်။ တံခါးပွင့်လာသောအခါ အဝတ်ချိတ်သည့်စင်ပေါ်ရှိရဲဝတ်စုံတစ်ခုကို ကျွန်တော်တို့သတိထားမိလိုက်သည်။ မားဂစ်၏မျက်နှာဖြူဖတ်ဖြူရော်ဖြစ်သွားပြီး ကျွန်တော်လည်းနှလုံးခုန်လာသည်။ ကျွန်တော်တို့ထောင်ချခံရနိုင်သောကြောင့်ဖြစ်သည်။ သို့နှင့် အမြန်ဆုတောင်းလိုက်ရသည်။

“ခင်ဗျားတို့ဘယ်သူတွေလဲ” ဟုထိုသူက ရည်မွန်ဖော်ရွေစွာမေးလိုက်ရာ ကျွန်တော်တို့စိတ်သက်သာသွားကြသည်။

မားဂစ်က “ရှင့်ကိုကျွန်မတစ်နေရာရာမှာတွေ့ဖူးတယ်။ ဒါပေမယ့်ဘယ်မှာလဲဆိုတာတော့ ကျွန်မသတိမရတော့ဘူး။ ဟုတ်ပါတယ်၊ ရှင်ဟာရဲသားတစ်ယောက်ပဲ။ ရှင်တာဝန်ကျနေတုန်းကျွန်မတွေ့တာပဲဖြစ်ရမယ်။”

ယင်းက အခြေအနေကို အေးဆေးငြိမ်သက်သွားစေသည်။ ထိုနောက်သူက ခင်မင်ရင်းနှီးသောလေသံဖြင့် “ခင်ဗျားတို့ ယေဟောဝါတွေလား” ဟုမေးသည်။

“ဟုတ်ပါတယ်။ ခင်ဗျားရဲ့အိမ်တံခါးလာခေါက်ဖို့အတွက် ကျွန်တော်တို့သတ္တိမွေးဖို့လိုတယ်ဆိုတာကိုတော့ ခင်ဗျားဝန်ခံရမယ်။ ခင်ဗျားကိုကျွန်တော်တို့ပုဂ္ဂိုလ်ရေးအရစိတ်ဝင်စားလို့ပဲ” ဟုကျွန်တော်ဝင်ပြောသည်။

သူက ကျွန်တော်တို့အထဲဝင်ရန်ခေါ်ဖိတ်သည်။ သူ့ထံသို့အကြိမ်ပေါင်းများစွာလည်ပတ်ခဲ့ပြီး ကျမ်းစာသင်အံမှုစတင်ခဲ့သည်။ တစ်ချိန်တွင် ထိုသူသည် ကျွန်တော်တို့၏ခရစ်ယာန်ညီအစ်ကိုတစ်ဦးဖြစ်လာခဲ့သည်။ ထိုတွေ့ကြုံမှုသည် ယေဟောဝါအပေါ်ကျွန်တော်တို့၏ယုံစားမှုကို မည်မျှခွန်အားပေးခဲ့သည်တကား။

ညီအစ်မများလည်း ယေဟောဝါကိုအကြွင်းမဲ့ယုံစားရန်လိုအပ်သည့် သတင်းပို့လုပ်ငန်းကို မကြာခဏလုပ်ဆောင်ကြသည်။ စာအုပ်စာတမ်းများကိုရယူရန် ဘာလင်သို့မားဂစ်သွားခဲ့သည့်အဖြစ်အပျက်က ယင်းကိုဖော်ပြသည်။ မျှော်လင့်ထားသည့်စာအုပ်ထက်ပိုများသွားသည်။ လေးလံပြီးပြည့်နှက်နေသောလက်ဆွဲသေတ္တာကို အဝတ်တန်းကြိုးတစ်ခုဖြင့် ရစ်ပတ်ချည်နှောင်ထားသည်။ မားဂစ်ရထားပေါ်ရောက်သည်အထိ အားလုံးအဆင်ပြေသည်။ ထိုနောက် နယ်စပ်အရာရှိတစ်ဦးလိုက်လာခဲ့သည်။

“အဲဒါဘယ်သူ့ဥစ္စာလဲ။ အထဲမှာဘာတွေပါသလဲ” ဟုသေတ္တာကိုလက်ညှိုးထိုးမေးသည်။

“ကျွန်မရဲ့လျှော်ရမဲ့အဝတ်အစားတွေပါ” ဟုမားဂစ်ပြန်ပြောသည်။

မယုံသင်္ကာစွာဖြင့် သေတ္တာကိုဖွင့်ခိုင်းသည်။ မားဂစ်က သေတ္တာကိုရစ်ပတ်ချည်နှောင်ထားသောကြိုးထုံးကို အေးဆေးလေးကန်စွာဖြေနေသည်။ နယ်စပ်အရာရှိ၏လုပ်ငန်းမှာ ရထားတစ်စင်းနှင့် တစ်စုံတစ်ခုသောအကွာအဝေးအထိသာလိုက်ပြီး ဆင်း၍ အခြားရထားတစ်စင်းနှင့်လိုက်၍ ပြန်လှည့်ရမည်ဖြစ်ရာ သူအလွန်စိတ်မရှည်နိုင်အောင်ပင်ဖြစ်နေသည်။ နောက်ဆုံး ကြိုးထုံးသုံးခုပြေသွားသောအခါ သူလက်လျှော့လိုက်ပြီး “ဒီကထွက်သွားစမ်း။ အဲဒါပါယူသွားလိုက်” ဟုအော်ပြောလိုက်သည်။

တစ်ဦးချင်းအရယေဟောဝါစောင့်ရှောက်မှု

ညအချိန်တွင်သာ အသင်းတော်ကြည့်ရှုစောင့်ရှောက်ခြင်းလုပ်ငန်းကိုလုပ်ကိုင်ရသဖြင့် ကျွန်တော့်အတွက် အိပ်ချိန်လေးနာရီထက်မပိုသောညများကို မကြာခဏကြုံတွေ့ရသည်။ ယင်းသို့လှုပ်ရှားရသည့်ညတစ်ညအပြီးတစ်မနက်တွင် ကျွန်တော်တို့၏အိမ်တံခါးကို အရာရှိများကလာရောက်ထုနှက်၍နှိုးကြသည်။ ရှာဖွေရန်အတွက် သူတို့လာကြခြင်းဖြစ်သည်။ ဘာမျှဝှက်ထားရန်အချိန်မရတော့ပါ။

အရာရှိများသည် တစ်မနက်ခင်းလုံးတစ်နေရာမကျန်ရှာဖွေကြသည်။ အိမ်သာကိုပင်ချန်လှပ်မထားခဲ့ကြပါ။ အင်္ကျီချိတ်သည့်စင်တွင်ရှိသောကျွန်တော်၏အင်္ကျီကိုစစ်ဆေးရန် တစ်ယောက်မျှသတိမရကြပေ။ စာရွက်စာတမ်းများကို ယင်း၏အိတ်ကပ်များစွာထဲသို့ အလျင်စလိုကျွန်တော်ထိုးထည့်ထားခဲ့သည်။ အင်္ကျီအိတ်ကပ်များသည် ဖောင်းကားနေသော်လည်း သူတို့လက်ချည်းသက်သက်ပြန်သွားခဲ့ကြသည်။

အခြားတစ်ချိန်ဖြစ်သော ၁၉၆၁ ခုနှစ် ဩဂုတ်လတွင် ကျွန်တော်ဘာလင်သို့ရောက်ရှိနေခဲ့သည်။ ဘာလင်တံတိုင်းဖြိုဖျက်ခြင်းမခံရမီ ကျွန်တော်၏နောက်ဆုံးအကြိမ်စာအုပ်စာတမ်းရယူရခြင်းဖြစ်ခဲ့သည်။ ဇီတောင်သို့ပြန်ရန် လူများစွာပြည့်လျှံနေသောဘာလင်ရထားဘူတာတွင် ကျွန်တော်ရောက်ရှိနေသည်။ ရထားဆိုက်လာသောအခါ လူများသည် ရထားပေါ်ရောက်ရန် စင်္ကြံပေါ်တွင်အလုအယက်တိုးဝှေ့နေကြသည်။ လူအုပ်နှင့်အတူ ကျွန်တော်လည်းတိုးဝှေ့ပြီး ရုတ်တရက်အခန်းလွတ်တစ်ခုထဲသို့ရောက်သွားကြောင်း ကျွန်တော်သိရှိလိုက်ရသည်။ ရထားပေါ်ရောက်ပြီးမကြာမီမှာပင် တွဲစောင့်က အပြင်မှနေ၍ တံခါးများကိုပိတ်လိုက်သည်။ ရထား၏အခန်းတစ်ခုတွင် ကျွန်တော်တစ်ယောက်တည်းရှိပြီး အခြားအခန်းတွင် အခြားခရီးသည်များအုပ်စုလိုက်ရှိနေသည်။

ကျွန်တော်တို့ဇီတောင်သို့ထွက်လာခဲ့သည်။ ရထားတွဲထဲတွင် ကျွန်တော်တစ်ယောက်တည်းအချိန်အတော်ကြာနေခဲ့ရသည်။ ထို့နောက် ရထားရပ်လာပြီး ကျွန်တော့်အခန်းတံခါးများ ပွင့်လာသည်။ ဆိုဗီယက်စစ်သားများဝင်လာကြသည်။ ထိုအခါကျမှသာ ဆိုဗီယက်စစ်သားများအတွက် ဖယ်ထားသောအခန်းတွင် ကျွန်တော်ရောက်နေကြောင်း သဘောပေါက်တော့သည်။ ကြမ်းပြင်ကွဲအက်ပြီး ကျွန်တော့်ကိုမျိုပစ်ရန် ဆန္ဒပြုမိလိုက်သည်။ သို့ရာတွင် စစ်သားများသည် တစ်ခုခုလွဲမှားနေသည်ဟုမြင်ပုံမရပေ။

ကျွန်တော်တို့ဇီတောင်သို့ခရီးဆက်ခဲ့ကြသည်။ ကျွန်တော်တို့အခန်းတံခါးများပွင့်လာသောအခါ စစ်သားများခုန်ဆင်းသွားကြသည်။ ဘူတာရှိခရီးသည်အားလုံးကို သူတို့စစ်ဆေးရှာဖွေကြသည်။ ကျွန်တော်တစ်ယောက်တည်းသာ အဆီးအတားမရှိသွားခွင့်ရသည်။ စစ်သားများစွာတို့က ကျွန်တော့်ကိုအဆင့်မြင့်အရာရှိတစ်ဦးထင်ပြီး အလေးပင်ပြုသွားကြသည်။

စာအုပ်စာတမ်းများသည် မည်မျှတန်ဖိုးရှိကြောင်း နောက်ပိုင်းမှသာကျွန်တော်တို့သိရှိခဲ့ကြသည်။ အကြောင်းမှာ ဘာလင်တံတိုင်းကြီးကိုဖြိုဖျက်ခြင်းသည် ကျွန်တော်တို့၏အထောက်အပံ့ကို ခေတ္တရပ်ဆိုင်းစေခဲ့သောကြောင့်ဖြစ်သည်။ သို့ရာတွင် ရရှိခဲ့သောစာအုပ်စာတမ်းများသည် ကျွန်တော်တို့အတွက် လပေါင်းများစွာဖူလုံသည်။ တစ်ချိန်တည်းတွင် ကျွန်တော်တို့နှင့်အဆက်အသွယ်ရရှိနိုင်ရန် စီစဉ်နိုင်ခဲ့သည်။

၁၉၆၁ ခုနှစ်က ဘာလင်တံတိုင်းပြီးဖြစ်ပေါ်လာခဲ့ခြင်းသည် အရှေ့ဂျာမနီရှိကျွန်တော်တို့အတွက် အပြောင်းအလဲများဖြစ်ခဲ့သည်။ သို့သော် ယေဟောဝါသည် အဖြစ်အပျက်များထက် အစဉ်အမြဲသာလွန်တော်မူသည်။ ပိတ်ပင်မှုအောက်ရှိကျွန်တော်တို့အား ဆက်လက်၍ကာကွယ်စောင့်ရှောက်တော်မူခဲ့သည်။—ဟားမဲန်လိုဘာပြောပြသည်။