“ဘုရားရေးရာကြောက်ရွံ့ခြင်း” ခရိုင်စည်းဝေးပွဲကို တက်ရောက်လေ!
၁၉၉၄ ခုနှစ်တွင်ကျင်းပမည့် ယေဟောဝါသက်သေများ၏ “ဘုရားရေးရာကြောက်ရွံ့ခြင်း” ခရိုင်စည်းဝေးပွဲကို တက်ရောက်ရန် သင်စီစဉ်ထားပြီးပြီလော။ သုံးရက်လုံးတက်ရောက်ခြင်းဖြင့် သင့်အားအမှန်ပင်အကျိုးကျေးဇူးဖြစ်ထွန်းစေမည်! အမေရိကန်ပြည်ထောင်စုတစ်ခုတည်းတွင် စည်းဝေးပွဲအစီအစဉ် ၁၆၅ ခုကျော်ပြုလုပ်မည်ဖြစ်ရာ သင်နေထိုင်သည့်အနီးအနားတွင် စည်းဝေးပွဲတစ်ခုကျရောက်ဖွယ်ရှိသည်။
ကြောက်ရွံ့ခြင်းတစ်မျိုးသည် ရဲစွမ်းသတ္တိကို လှိုက်စားနိုင်ပြီး မျှော်လင့်ချက်ကို ဖျက်ဆီးနိုင်ရာ သောကြာနေ့နံနက်ပိုင်း အဓိကဟောပြောချက်က ဘုရားရေးရာကြောက်ရွံ့ခြင်းကို အဓိပ္ပာယ်ဖွင့်ဆိုပြီး ယင်း၏အကျိုးကျေးဇူးများကို ဖော်ပြသွားမည်။ အမှန်အားဖြင့် အစီအစဉ်တစ်ရပ်လုံးသည် ဤအကျိုးကျေးဇူးများကို ပေါ်လွင်အောင် တင်ဆက်သွားမည်ဖြစ်သည်။
သောကြာနေ့မွန်းလွဲပိုင်းတွင် ဘုရားရေးရာကြောက်ရွံ့ခြင်းသည် အိမ်ထောင်နှင့် မိသားစုဘဝကို မည်သို့ခိုင်မြဲစေနိုင်ကြောင်း၊ ငယ်ရွယ်သူများအား ဘုရားသခင်အပေါ် စွဲစွဲမြဲမြဲသစ္စာစောင့်နိုင်ရန် ယင်းတို့က မည်သို့ကူညီနိုင်ကြောင်းတို့ကို သင်ကြားနာရမည်။ ထိုမွန်းလွဲပိုင်းအစီအစဉ်ကို “ပူဆွေးသူများအတွက် နှစ်သိမ့်မှု” အကြောင်း အားရရွှင်လန်းဖွယ်တင်ဆက်မှုဖြင့် နိဂုံးချုပ်မည်။ ချစ်မြတ်နိုးရသူများကို သေခြင်းအားဖြင့်ခွဲခွာရသူများကို ကူညီရန် လက်တွေ့ကျသည့်အကြောင်းအချက်များကို ထိုဟောပြောချက်အတွင်း သင်နားလည်သဘောပေါက်လာရမည်။
ဘုရားရေးရာကြောက်ရွံ့ခြင်းက အသင်းတော်၊ ကျွန်ုပ်တို့၏ဓမ္မအမှုတို့နှင့်ပတ်သက်၍ ယေဟောဝါ၏လမ်းညွှန်မှုကို စွဲစွဲမြဲမြဲလိုက်လျှောက်ရာတွင် မည်သို့တည်ကြည်ခိုင်ခံ့စေနိုင်ကြောင်းကို စနေနေ့အစီအစဉ်က တင်ပြသွားမည်။ စည်းဝေးတက်ရောက်သူများသည် “ဘုရားသခင်၏နှုတ်ကပါဌ်တော် သမ္မာကျမ်းစာကို နေ့စဉ်ဖတ်ရှုပါ” အမည်ရှိဟောပြောချက်မှ သမ္မာကျမ်းစာကိုဖတ်ရှုခြင်းနှင် လေ့လာခြင်းတို့အတွက် လက်တွေ့ကျအကြံပေးချက်များကို လက်ခံရရှိကြမည်။ စနေနေ့အစီအစဉ်သည် စိတ်ဝင်စားမှုကိုနှိုးဆွသည့် “ယေဟောဝါ၏ ကြောက်မက်ဖွယ်ရာနေ့ကြီးနီးပြီ” အမည်ရှိဟောပြောချက်ဖြင့် နိဂုံးချုပ်မည်။
တနင်္ဂနွေနေ့အစီအစဉ်၏ထူးခြားချက်မှာ “ဖြောင့်မတ်သူတို့၏ ရှင်ပြန်ထမြောက်ခြင်းတစ်ခု ရှိမည်” အမည်ရှိ ဟောပြောချက်ဖြစ်သည်။ ထိုဟောပြောချက်ပြီးလျှင် “ကြီးစွာသောဒုက္ခအတွင်း အသက်ကယ်တင်ခံရခြင်း” ဟောပြောချက်က ဘယ်တော့မျှမသေရတော့မည့်သူများနှင့်ပတ်သက်၍ ယေရှု၏အံ့ဖွယ်ကတိတော်အကြောင်း ရှင်းလင်းဖော်ပြချက်ကို တင်ပြမည်။—ယောဟန် ၁၁:၂၆။
တနင်္ဂနွေနေ့နံနက်ပိုင်းအစီအစဉ်သည် သင်ရင်ဆိုင်ရသည့်ရွေးချယ်စရာများ အမည်ရှိ စဉ်းစားမှုကိုနှိုးဆွပေးသော ၄၀ မိနစ်ကြာပြဇာတ်ဖြင့် နိဂုံးချုပ်မည်။ ပရိသတ်အား ယောရှုခေတ်ကို ပြန်သတိရစေပြီး ယေဟောဝါအားဝတ်ပြုရန် သူ၏ခိုင်မာသည့်သန္နိဋ္ဌာန်ကို သရုပ်ဖော်ထားသည်ကို ရှုစားကြရမည်။ ဧလိယခေတ်က မီးဖြင့်စမ်းသပ်ခြင်းအကြောင်းကိုတင်ဆက်မည်ဖြစ်ပြီး တက်ရောက်သူများသည် ယနေ့ ဘုရားရေးရာကြောက်ရွံ့ခြင်းကို တင်ပြနိုင်ရန် အကူအညီဖြစ်စေမည့် သင်ခန်းစာများကို ဤအဖြစ်အပျက်နှစ်ခုလုံးမှ ထုတ်နုတ်ဖော်ပြသွားမည်။ မွန်းလွဲပိုင်းတွင် “စစ်မှန်သောဘုရားသခင်ကို ယခုအဘယ်ကြောင့်ကြောက်ရွံ့ရ” အမည်ရှိ လူထုဟောပြောပွဲသည် စည်းဝေးပွဲကြီး၏ အဓိကပေါ်လွင်ချက်ဖြစ်မည်။
တက်ရောက်နိုင်ရန် ယခုစီစဉ်ပါ။ သင်နှင့်အနီးဆုံးကျင်းပရာနေရာကို သိရှိနိုင်ရန် ဒေသခံယေဟောဝါသက်သေများ၏ခန်းမနှင့် ဆက်သွယ်ပါ သို့မဟုတ် ဤမဂ္ဂဇင်းထုတ်ဝေသူများထံ စာရေးအကြောင်းကြားပါ။ ဇွန်လ ၈ ရက်ထုတ် နိုးလော့! (လိပ်) မဂ္ဂဇင်းတွင်လည်း အမေရိကန်ပြည်ထောင်စု၊ ကနေဒါ၊ ဗြိတိန်နှင့် အိုင်ယာလန်နိုင်ငံများတွင် စည်းဝေးပွဲကျင်းပမည့် လိပ်စာအားလုံးကိုပါ ဖော်ပြထားမည်။
[Picture Credit Line on page 32]
T. Rosenthal/SUPERSTOCK