မျှော်လင့်ချက်ဖြင့် စွဲမြဲနေ၊ချစ်ခြင်းမေတ္တာဖြင့် လှုံ့ဆော်ခံရ

“ယခုတွင် ယုံကြည်ခြင်း၊ မျှော်လင့်ခြင်း၊ ချစ်ခြင်း ဤသုံးပါးတည်လျက်ရှိ၏။ ဤသုံးပါးတွင် ချစ်ခြင်းမေတ္တာသည် အမြတ်ဆုံးဖြစ်[၏]။”—၁ ကောရိန္သု ၁၃:၁၃။

၁။ တမန်တော်ပေါလုသည် ကျွန်ုပ်တို့အား အဘယ်သတိပေးချက်ကိုပေးခဲ့သနည်း။

ယုံကြည်ခြင်းသည် သင်္ဘောတစ်စီးကဲ့သို့ ပျက်စီးသွားနိုင်ကြောင်း တမန်တော်ပေါလု သတိပေးခဲ့သည်။ “ယုံကြည်ခြင်းကိုလည်းကောင်း၊ ကိုယ်ကိုကိုယ်သိသောစိတ်ကြည်လင်ခြင်းကိုလည်းကောင်း စွဲလမ်း၍ . . . ထိုစိတ်ကြည်လင်ခြင်းကို အချို့သောသူတို့သည် ပယ်သည်ဖြစ်၍ ယုံကြည်ခြင်းတရားအရာ၌ သင်္ဘောပျက်ခြင်းကိုခံရကြ၏” ဟုသူပြောဆိုသည်။ (၁ တိမောသေ ၁:၁၉၊ သမ္မာ) စီ.အီး. ပထမရာစုတွင် ပင်လယ်ကူးသင်္ဘောများကို သစ်သားဖြင့်ဆောက်လုပ်ခဲ့ကြ၏။ ယင်းတို့၏ခိုင်ခံ့မှုသည် သစ်အရည်အသွေးနှင့် ကျွမ်းကျင်စွာသင်္ဘောဆောက်လုပ်ခြင်းအပေါ်မူတည်သည်။

၂။ ကျွန်ုပ်တို့၏ယုံကြည်ခြင်းသင်္ဘောကို အဘယ်ကြောင့်ကောင်းစွာဆောက်လုပ်ထားရမည်နည်း။ ယင်းကြောင့် ကျွန်ုပ်တို့အဘယ်အရာပြုရန်လိုသနည်း။

^၂ ကျွန်ုပ်တို့၏ယုံကြည်ခြင်းသင်္ဘောသည် ကသောင်းကနင်းနိုင်သည့် လူ့လောကပင်လယ်ထဲတွင် ပေါလောမျှောနေရန်လိုသည်။ (ဟေရှာယ ၅၇:၂၀; ဗျာဒိတ် ၁၇:၁၅) ထို့ကြောင့် ယင်းကို ကောင်းစွာဆောက်လုပ်ထားရမည်၊ သို့ဖြစ်စေရန် ကျွန်ုပ်တို့အပေါ်မူတည်၏။ ဂျူးနှင့်ရောမအသိုင်းအဝိုင်း၏ “ပင်လယ်” သည် ကနဦးခရစ်ယာန်များအတွက် အထူးလှိုင်းထန်လာနေသောအခါ ယုဒက ဤသို့ရေးခဲ့သည်– “သူတို့မူကား၊ ချစ်သူတို့၊ အလွန်သန့်ရှင်းသော သင်တို့၏ယုံကြည်ခြင်းတရားအပေါ်တွင် ကိုယ်ကိုဆောက်တည်လျက် သန့်ရှင်းသောဝိညာဉ်တော်၌ ဆုတောင်း . . . လျက် ထာဝရအသက်အလို့ငှာ ငါတို့အရှင်ယေရှုခရစ်၏ကရုဏာတော်ကို စောင့်မျှော်လျက် ဘုရားသခင်၏ချစ်ခြင်းမေတ္တာ၌ ကိုယ်ကိုစောင့်ရှောက်၍နေကြလော့။” (ယုဒ ၂၀၊ ၂၁၊ သမ္မာ) ‘သန့်ရှင်းသူတို့၌အပ်ပေးခဲ့ပြီးသောယုံကြည်ခြင်း’ အတွက်တိုက်လှန်ခြင်းအကြောင်း ယုဒလည်းပြောခဲ့သောကြောင့် “အလွန်သန့်ရှင်းသောယုံကြည်ခြင်း” ဟူသောစကားလုံးသည် ကယ်တင်ခြင်းသတင်းကောင်းပါဝင်သည့် ခရစ်ယာန်သွန်သင်ချက်အစီအစဉ်တစ်ခုလုံးကို ရည်ညွှန်းပေမည်။ (ယုဒ ၃) ခရစ်တော်သည် ထိုယုံကြည်ခြင်း၏အုတ်မြစ်ဖြစ်၏။ ကျွန်ုပ်တို့သည် စစ်မှန်သောခရစ်ယာန်ယုံကြည်ခြင်းကိုမှီဝဲဆည်းကပ်ဖို့ဆိုလျှင် ခိုင်မြဲသောယုံကြည်ခြင်းရှိဖို့လိုသည်။

“ဂိုဏ်းလှန့်” မုန်တိုင်းဒဏ်ကိုခံရပ်ခြင်း

၃။ တချို့သည် “ဂိုဏ်းလှန့်မှု” ကိုမည်သို့အသုံးပြုကြသနည်း။

^၃ မကြာမီနှစ်များက ဂိုဏ်းဂဏငယ်များတွင် အတော်အတန်ကြောက်မက်ဖွယ် အစုလိုက်ကိုယ့်ကိုယ်ကိုသတ်သေမှုများ၊ လူသတ်မှုများနှင့် အကြမ်းဖက်တိုက်ခိုက်မှုများ ဖြစ်ပျက်ခဲ့သည်။ စိတ်ရင်းမှန်သောနိုင်ငံရေးခေါင်းဆောင်များအပါအဝင် လူများစွာသည် အပြစ်မဲ့သူ၊ အထူးသဖြင့် အရွယ်မရောက်သေးသူများကို အဆိုပါအန္တရာယ်ရှိသော ဂိုဏ်းဂဏငယ်များ၏ရန်မှကာကွယ်ပေးရန် အရေးတယူပြုလုပ်ခဲ့ကြသည်ကို နားလည်နိုင်၏။ “ဤလောကကိုအစိုးရသောဘုရား” သည် ရက်စက်ယုတ်မာသော ဤရာဇဝတ်မှုများနောက်ကွယ်တွင် အမှန်ရှိနေကြောင်းထင်ရှား၏၊ ဤနည်းဖြင့် သူသည် ဂိုဏ်းလှန့်မှုဟုခေါ်သောအဖြစ်မျိုးကို ဖန်တီးပေးခဲ့ရာ ယေဟောဝါ၏လူတို့ကိုအတိုက်အခံပြုကြရန် ယင်းကိုအသုံးပြုလျက်ရှိသည်။ (၂ ကောရိန္သု ၄:၄; ဗျာဒိတ် ၁၂:၁၂) တချို့သည် ကျွန်ုပ်တို့၏လုပ်ငန်းကို အတိုက်အခံပြုစေရန် ယင်းအခြေအနေကိုအမြတ်ထုတ်ခဲ့ကြပြီ။ တချို့သောနိုင်ငံများတွင် “အန္တရာယ်ရှိသောဂိုဏ်းဂဏများ” မှလူတို့ကိုကာကွယ်ပေးမှုဟူသည့်အရေးကို ဆောင်ရွက်နေကြရာ ထိုတွင် ယေဟောဝါသက်သေများကိုမှားယွင်းစွာထည့်သွင်းသမုတ်ကြသဖြင့် ကျွန်ုပ်တို့ကိုစောင်းချိတ်ပြစ်တင်ပြောဆိုကြသည်။ ယင်းက ဥရောပနိုင်ငံတချို့တွင် တစ်အိမ်မှတစ်အိမ်သက်သေခံခြင်းကိုအခက်အခဲဖြစ်စေခဲ့ပြီး ကျွန်ုပ်တို့နှင့်ကျမ်းစာသင်နေသူတချို့ကို သင်အံမှုရပ်တန့်စေခဲ့ပြီ။ သို့နှင့် ယင်းသည် ညီအစ်ကိုတချို့အပေါ် အပျက်သဘောသက်ရောက်ခဲ့၏။

၄။ အတိုက်အခံပြုမှုသည် ကျွန်ုပ်တို့ကို အဘယ်ကြောင့်စိတ်မပျက်စေသင့်သနည်း။

^၄ သို့ရာတွင် ကျွန်ုပ်တို့ကို စိတ်ပျက်စေဖို့ဝေးစွ၊ အတိုက်အခံပြုမှုသည် စစ်မှန်သောခရစ်ယာန်ဘာသာကို ကျွန်ုပ်တို့လိုက်စားနေသည်ဟူသောခံယူချက်ကို ပိုခိုင်မာစေသင့်သည်။ (မဿဲ ၅:၁၁၊ ၁၂) အစောပိုင်းခရစ်ယာန်များသည် ပုန်ကန်ရန်လှုံ့ဆော်သည့်ဂိုဏ်းဖြစ်သည်ဟု စွပ်စွဲခံခဲ့ကြရပြီး နေရာအနှံ့ “ကဲ့ရဲ့အပြစ်တင်ခြင်း” ခံခဲ့ကြရ၏။ (တမန်တော် ၂၄:၅; ၂၈:၂၂) သို့သော် တမန်တော်ပေတရုသည် ယုံကြည်သူချင်းများကို ဤသို့ရေးကာ နှစ်သိမ့်ပေးခဲ့သည်– “ချစ်သူတို့၊ သင်တို့ကိုစုံစမ်းစရာဖို့ ယခုခံရသောမီးစစ်ခြင်းအရာကိုကား သင်တို့၌အံ့သြဖွယ်သောအရာဖြစ်သည်ဟု ထင်မှတ်၍ အံ့သြခြင်းမရှိကြနှင့်။ သင်တို့သည် ခရစ်တော်၏ဆင်းရဲကိုဆက်ဆံကြသည်ဖြစ်၍ ဘုန်းတော်ပေါ်ထွန်းသောအခါ အလွန်ဝမ်းမြောက်ရွှင်လန်းမည်အကြောင်း ယခုပင်ဝမ်းမြောက်ကြလော့။” (၁ ပေတရု ၄:၁၂၊ ၁၃) အလားတူ ပထမရာစုအုပ်ချုပ်ရေးအဖွဲ့ဝင်တစ်ဦးက ဤသို့ရေးခဲ့သည်– “ငါ့ညီအစ်ကိုတို့၊ သင်တို့၏ယုံကြည်ခြင်းကို စစ်ကြောစုံစမ်းခြင်းအရာသည် သည်းခံခြင်းကိုပွားစေတတ်သည်ဟုသိမှတ်လျက် အထူးထူးအပြားပြားစုံစမ်းနှောင့်ယှက်ခြင်းနှင့် တွေ့ကြုံသောအခါ ဝမ်းမြောက်စရာအကြောင်းသက်သက်ဖြစ်သည်ဟု မှတ်ကြလော့။ သင်တို့သည် အလျှင်းမချို့တဲ့ဘဲ စေ့စပ်စုံလင်မည်အကြောင်း သည်းခံခြင်းစိတ်သည် အကုန်အစင်ပြုပြင်ပါစေ။” (ယာကုပ် ၁:၂-၄) လေမုန်တိုင်းသည် သင်္ဘော၏ခိုင်ခံ့မှုကိုစမ်းသပ်သကဲ့သို့ အတိုက်အခံပြုမှုမုန်တိုင်းသည် ကျွန်ုပ်တို့၏ယုံကြည်ခြင်းသင်္ဘောရှိ အားနည်းချက်မှန်သမျှကိုဖော်ပြပါလိမ့်မည်။

ဆင်းရဲခြင်းသည် ခံနိုင်ရည်ကိုဖြစ်စေ

၅။ ကျွန်ုပ်တို့၏ယုံကြည်ခြင်းသည် ဆင်းရဲခြင်းခံရလျှင်မြဲမြံကြောင်း မည်သို့သေချာနိုင်သနည်း။

^၅ ခရစ်ယာန်များသည် ဆင်းရဲခြင်းမုန်တိုင်းဒဏ်ခံရပြီးမှသာ သူတို့တွင်ခံနိုင်ရည်နှင့် မယိမ်းယိုင်သောယုံကြည်ခြင်းရှိကြောင်း စိတ်ချနိုင်သည်။ ကျွန်ုပ်တို့သည် ခိုင်မြဲသောယုံကြည်ခြင်းအပါအဝင် အရာရာတွင် “အလျှင်းမချို့တဲ့ဘဲ စေ့စပ်စုံလင်မည်” ဆိုလျှင် ကျွန်ုပ်တို့၏ခံနိုင်ရည်သည် မုန်တိုင်းထန်သောပင်လယ်တွင် “အကုန်အစင်ပြုပြင်” ပါလိမ့်မည်။ ပေါလုက ဤသို့ရေးခဲ့သည်– “ညှဉ်းဆဲခံခြင်း၊ ဆင်းရဲ . . . ခြင်း၊ မလွတ်နိုင်သောဘေးဥပဒ်နှင့်တွေ့ခြင်း . . . [တို့ဖြင့်] ဘုရားသခင်၏အမှုတော်ဆောင်များမှန်ကြောင်းကို ငါတို့သည် အရာရာ၌ကိုယ်ကိုထင်ရှားစွာပြကြ၏။”—၂ ကောရိန္သု ၆:၄၊ ၁၀၊ သမ္မာ။

၆။ “ဆင်းရဲခြင်းကိုခံ၍” အဘယ်ကြောင့် “ဝါကြွားဝမ်းမြောက်ခြင်း” ရှိသင့်သနည်း။

^၆ ရံဖန်ရံခါ ကျွန်ုပ်တို့ကြုံကောင်းကြုံနိုင်သည့် ဆင်းရဲခြင်းမုန်တိုင်းသည် ကျွန်ုပ်တို့၏ယုံကြည်ခြင်းသင်္ဘောခိုင်ခံ့မြဲမြံကြောင်းတင်ပြဖို့ အခွင့်အလမ်းများဖြစ်သည်ဟု ယူမှတ်သင့်သည်။ ရောမရှိခရစ်ယာန်များထံ ပေါလုက ဤသို့ရေးခဲ့သည်– “ဆင်းရဲခြင်းကိုခံ၍ ဝါကြွားဝမ်းမြောက်ခြင်းရှိကြ၏။ အကြောင်းမူကား . . . ဆင်းရဲခြင်းသည် သည်းခံခြင်းကိုပြုစုတတ်၏။ သည်းခံခြင်းသည်လည်း သက်သေထင်ရှားခြင်းကိုပြုစုတတ်၏။ သက်သေထင်ရှားခြင်းသည်လည်း မျှော်လင့်ခြင်းကိုပြုစုတတ်၏။ ထိုမျှော်လင့်ခြင်းသည် ရှက်ကြောက်စရာအကြောင်းနှင့်ကင်းလွတ်၏။” (ရောမ ၅:၃-၅) စမ်းသပ်မှုများကြားတည်မြဲခြင်းသည် ယေဟောဝါ၏မျက်နှာသာကိုရရှိစေသည်။ တစ်ဖန် ယင်းက ကျွန်ုပ်တို့၏မျှော်လင့်ခြင်းကိုခိုင်ခံ့စေ၏။

တချို့ သင်္ဘောပျက်ရသည့်အကြောင်း

၇။ (က) ပေါလုအသုံးပြုခဲ့သောစကားလုံးများ ဖော်ပြသည့်အတိုင်း တချို့သည် ဝိညာဉ်ရေးသင်္ဘောပျက်ခြင်း မည်သို့ကြုံခဲ့ကြရသနည်း။ (ခ) ယနေ့ တချို့သည် သမ္မာတရားလမ်းမှ မည်သို့လွဲခဲ့ကြပြီနည်း။

^၇ “သင်္ဘောပျက်” ခြင်းအကြောင်း ပေါလုသတိပေးခဲ့ချိန်တွင် ကိုယ်ကိုကိုယ်သိသောစိတ်ကြည်လင်ခြင်းကို “ပယ်” ၍ယုံကြည်ခြင်းမရှိတော့သူတချို့ကို သူဆိုလိုနေခြင်းဖြစ်သည်။ (၁ တိမောသေ ၁:၁၉) ထိုသူတို့တွင် အယူဖောက်ပြန်သွားသည့် ဟုမေနဲနှင့် အာလေဇန္ဒြုတို့ပါဝင်ကြကာ သမ္မာတရားလမ်းမှလွဲသွားပြီး ကဲ့ရဲ့ပြောဆိုကြ၏။ (၁ တိမောသေ ၁:၂၀; ၂ တိမောသေ ၂:၁၇၊ ၁၈) ယနေ့ သမ္မာတရားလမ်းလွဲသွားသည့် အယူဖောက်ပြန်သူတို့သည် စကားအားဖြင့်ဆိုရလျှင် “သစ္စာနှင့်သတိပညာရှိသောကျွန်” ကိုရိုက်ပုတ်ကြ၏၊ တစ်နည်းအားဖြင့် ဝိညာဉ်ရေးအစာကျွေးသည့်လက်ကို ကိုက်နေကြ၏။ တချို့သည် “ကျွန်ဆိုး” နည်းတူ “ငါ့အရှင် လာခဲလိမ့်မည်” ဟုပြောဆိုကြသည်။ (မဿဲ ၂၄:၄၄-၄၉၊ သမ; ၂ တိမောသေ ၄:၁၄၊ ၁၅) ဤစနစ်ဆုံးခန်းနီးကြောင်းကို သူတို့ငြင်းပယ်ကြပြီး ယေဟောဝါ၏လူများအလယ်တွင် အရေးတကြီးသဘောထားရှိနေစေသည့်အတွက် ဝိညာဉ်ရေးအရနိုးကြားနေသော ကျွန်အတန်းအစားကို ပြစ်တင်ဝေဖန်ကြသည်။ (ဟေရှာယ ၁:၃) ထိုသို့အယူဖောက်ပြန်သူများသည် “အချို့သောသူတို့၏ယုံကြည်ခြင်းကိုမှောက်လှန်” စေ၍ ဝိညာဉ်ရေးသင်္ဘောကိုပျက်စီးစေခဲ့ကြပြီ။—၂ တိမောသေ ၂:၁၈။

၈။ အဘယ်အရာက တချို့၏ယုံကြည်ခြင်းသင်္ဘောကိုပျက်စေ သို့မဟုတ် နစ်မြုပ်စေခဲ့သနည်း။

^၈ ဆက်ကပ်အပ်နှံထားသည့် တခြားခရစ်ယာန်များသည် သူတို့၏ကိုယ်ကိုကိုယ်သိသောစိတ်ကိုပယ်ကြပြီး ဤလောက၏စည်းမဲ့ပျော်ပါးမှုနှင့် ယင်း၏လိင်အကျင့်ယိုယွင်းမှုကိုလိုက်စားကြခြင်းအားဖြင့် ယုံကြည်ခြင်းသင်္ဘောပျက်ခဲ့ကြပြီ။ (၂ ပေတရု ၂:၂၀-၂၂) တခြားသူများမှာမူ စနစ်သစ်ရောက်လာမည့်ဟန်မရှိသေးဟု ယူဆကြသဖြင့် သူတို့၏ယုံကြည်ခြင်းသင်္ဘောကို နစ်မြုပ်စေခဲ့ကြ၏။ တစ်စုံတစ်ရာသောပရောဖက်ပြုချက်များ၏ပြည့်စုံခြင်းနှင့်ပတ်သက်၍ အချိန်ကိုမတွက်ချက်နိုင်ကြ၍ “ယေဟောဝါ၏နေ့” ကိုစိတ်ထဲမှပယ်ထုတ်ကာ စစ်မှန်သောဝတ်ပြုရေးကိုစွန့်ခဲ့ကြ၏။ (၂ ပေတရု ၃:၁၀-၁၃; ၁ ပေတရု ၁:၉) မကြာမီ သူတို့သည် လက်ရှိစနစ်၏မည်းမှောင်၍ဆင်းရဲခက်ခဲသည့်လောကထဲ ပြန်ရောက်နေကြောင်း သိရှိကြသည်။ (ဟေရှာယ ၁၇:၁၂၊ ၁၃; ၅၇:၂၀) ခရစ်ယာန်အသင်းတော်သည် စစ်မှန်သောဘာသာရေးကိုကျင့်သုံးကြောင်း ယင်းနှင့်ပေါင်းသင်းခြင်းကို ရပ်စဲခဲ့သူတချို့ယုံကြည်ကြဆဲဖြစ်သည်။ သို့ရာတွင် သူတို့သည် ယေဟောဝါကတိထားတော်မူသော ကမ္ဘာသစ်ကိုစောင့်မျှော်ရန် လိုအပ်သော သည်းခံမှုနှင့် ခံနိုင်ရည်မရှိကြောင်း သိသာထင်ရှားသည်။ ပရဒိသုတွင်အသက်တာသည် သူတို့အတွက် စောလျင်စွာမရောက်လာချေ။

၉။ ဆက်ကပ်အပ်နှံပြီးသောခရစ်ယာန်အချို့သည် အဘယ်အရာကိုပြုလုပ်နေကြသနည်း၊ ၎င်းဖြစ်ရပ်များက ကျွန်ုပ်တို့အား အဘယ်အရာကို သုံးသပ်စေသင့်သနည်း။

^၉ ကမ္ဘာ့ဒေသတချို့ရှိ ဆက်ကပ်အပ်နှံပြီးသောခရစ်ယာန်အချို့သည် သူတို့၏ယုံကြည်ခြင်းသင်္ဘောရွက်ကို လိပ်တင်ထားကြပုံရသည်။ သူတို့၏ သင်္ဘောသည် ပေါလောမျောလျက်ရှိနေသေးသော်လည်း ယုံကြည်ခြင်းအပြည့်ဖြင့် ရှေ့ဆက်တိုးမည့်အစား အပျော်ခရီးသွားနှုန်းအတိုင်းသွားနေကြ၏။ “မကြာမီ ရောက်လာမည့် ပရဒိသု” မျှော်လင့်ချက်ကိုနှစ်သက်ပြီး ယင်းကိုရရှိရန် အချို့သည် ဟောပြောခြင်းလုပ်ငန်းတွင် စိတ်အားထက်သန်စွာပါဝင်ရန်၊ အစည်းအဝေးများနှင့် စည်းဝေးကြီးအားလုံးကို မှန်မှန်တက်ရောက်ရန် ကြိုးစားအားထုတ်ဖို့အသင့်ရှိခဲ့ကြသည်။ ယခုမူ သူတို့၏မျှော်လင့်ချက်များပြည့်စုံချိန်မှာ ထင်သည်ထက်ပိုဝေးနေရာ သူတို့၏ကြိုးစားမှုများကို လျှော့ခဲ့ကြပြီ။ ဟောပြောခြင်းလုပ်ငန်းလျော့နည်းလာခြင်း၊ အစည်းအဝေးများမမှန်ခြင်းနှင့် စည်းဝေးကြီးအစီအစဉ်အချို့အပိုင်းများကိုမတက်ခြင်းတို့က ယင်းကိုထင်ရှားစေ၏။ အခြားသူများမှာမူ အပန်းဖြေမှုနှင့် ပစ္စည်းဥစ္စာရှာခြင်းအတွက် အချိန်ပို၍ပေးလာကြသည်။ ဤအဖြစ်များသည် ယေဟောဝါထံ ကျွန်ုပ်တို့၏ဆက်ကပ်အပ်နှံမှုနှင့်အညီ ကျွန်ုပ်တို့၏အသက်တာကို အဘယ်အရာက တွန်းအားပေးသင့်ကြောင်း သုံးသပ်စေသင့်သည်။ ကိုယ်တော့်လုပ်ငန်းတော်၌ ကျွန်ုပ်တို့၏ဇွဲသည် “မကြာမီရောက်တော့မည့်ပရဒိသု” မျှော်လင့်ချက်အပေါ်တွင် မူတည်သင့်သလော။

ကျောက်ဆူးနှင့်ခိုင်းနှိုင်းထားသော မျှော်လင့်ချက်

၁၀၊ ၁၁။ ပေါလုသည် ကျွန်ုပ်တို့၏မျှော်လင့်ချက်ကို အဘယ်အရာနှင့်နှိုင်းယှဉ်ခဲ့သနည်း။ ဤနှိုင်းယှဉ်ချက်သည် အဘယ်ကြောင့်သင့်တော်သနည်း။

^၁၀ ယေဟောဝါသည် အာဗြဟံအားဖြင့် ကောင်းချီးများပေးမည်ဟု ကတိပြုထားကြောင်း ပေါလုထောက်ပြခဲ့သည်။ ထို့နောက် တမန်တော်က ဤသို့ရှင်းပြခဲ့သည်– “ဘုရားသခင်သည် အကျိန်အားဖြင့် အာမခံတော်မူ၏။ အကြောင်းမူကား ဘုရားသခင်သည် မုသာမသုံးနိုင်သောအရာတည်းဟူသော မဖောက်ပြန်မပြောင်းလဲနိုင်သော အရာနှစ်ပါး [ကိုယ်တော်၏နှုတ်မြွက်စကားတော်နှင့် ကိုယ်တော်၏အကျိန်] ကိုအမှီပြု၍ ကိုယ်ရှေ့၌ထားသောမျှော်လင့်ရာကို ခိုလှုံခြင်းငှာပြေးသောငါတို့သည် သက်သာအားကြီးကြမည်အကြောင်းတည်း။” (ဟေဗြဲ ၆:၁၇-၁၉; ကမ္ဘာဦး ၂၂:၁၆-၁၈) ဘိသိက်ခံခရစ်ယာန်များအတွက်မျှော်လင့်ချက်သည် မဖောက်ပြန်မပျက်စီးနိုင်သော ကောင်းကင်အသက်တာဖြစ်၏။ ယနေ့ ယေဟောဝါ၏ကျေးကျွန်အများစုသည် မြေကြီးပရဒိသုပေါ်တွင် ထူးမြတ်သောထာဝရအသက်မျှော်လင့်ချက်ရှိကြသည်။ (လုကာ ၂၃:၄၃) ထိုသို့သောမျှော်လင့်ချက်မပါဘဲ ယုံကြည်ခြင်းမရှိနိုင်ချေ။

^၁၁ ကျောက်ဆူးသည် သင်္ဘောတစ်စီးကို ရပ်နားရာနေရာမှ မျောမသွားစေသည့် အစွမ်းထက်သော လုံခြုံရေးကိရိယာတစ်ခုဖြစ်၏။ မည်သည့်သင်္ဘောသားမျှ ကျောက်ဆူးမပါဘဲ ဆိပ်ကမ်းမှထွက်မည်မဟုတ်ပါ။ ပေါလုသည် အကြိမ်ကြိမ်သင်္ဘောပျက်ခဲ့ဖူးသည့်အတွက် ရေကြောင်းခရီးသည်များ၏အသက်သည် သင်္ဘောကျောက်ဆူးပေါ်တွင်မူတည်လေ့ရှိကြောင်း အတွေ့အကြုံမှပြောဆိုနိုင်သည်။ (တမန်တော် ၂၇:၂၉၊ ၃၉၊ ၄၀; ၂ ကောရိန္သု ၁၁:၂၅) ပထမရာစုတွင် မာလိန်မှူးအလိုရှိသည်အတိုင်းမောင်းနှင်ရန် သင်္ဘောတွင်အင်ဂျင်မရှိပါ။ လှော်တက်ဖြင့် လှော်ခတ်ရသောစစ်သင်္ဘောများမှလွဲ၍ သင်္ဘောများသည် အဓိကအားဖြင့် လေကိုအမှီပြု၍လွှင့်ကြ၏။ သင်္ဘောသည် ကျောက်ဆောင်များ၏အန္တရာယ်ကြုံနေရလျှင် မာလိန်မှူးပြုနိုင်သည့် တစ်ခုတည်းသောနည်းမှာ ကျောက်ချပြီး မုန်တိုင်းကိုလွတ်မြောက်ရန် ပင်လယ်ကြမ်းပြင်မှ ကျောက်ဆူးပြုတ်မသွားဖို့ မျှော်လင့်ရန်သာရှိသည်။ ထို့ကြောင့် ပေါလုသည် ခရစ်ယာန်တစ်ဦး၏မျှော်လင့်ချက်ကို “မြဲမြံခိုင်ခံ့သောစိတ်နှလုံး၏ကျောက်ဆူး” နှင့်နှိုင်းယှဉ်ခဲ့ခြင်းဖြစ်သည်။ (ဟေဗြဲ ၆:၁၉) အတိုက်အခံပြုမှုမုန်တိုင်း သို့မဟုတ် အခြားသောစမ်းသပ်မှုများ၏ တိုက်ခိုက်မှုကိုခံရသောအခါ ကျွန်ုပ်တို့၏ထူးမြတ်သောမျှော်လင့်ချက်သည် သက်ရှိစိုးလ်များအဖြစ် ကျွန်ုပ်တို့ကိုမြဲမြံစေသည့် ကျောက်ဆူးနှင့်တူသည်။ သို့နှင့် ကျွန်ုပ်တို့၏ယုံကြည်ခြင်းသင်္ဘောသည် အန္တရာယ်ရှိသောသံသယဝင်ခြင်းသောင်ပြင်များပေါ် သို့မဟုတ် ပျက်စီးစေသောအယူဖောက်ပြန်ခြင်းကျောက်ဆောင်များသို့ မျောပါသွားမည်မဟုတ်ချေ။—ဟေဗြဲ ၂:၁; ယုဒ ၈-၁၃။

၁၂။ ကျွန်ုပ်တို့သည် ယေဟောဝါထံမှထွက်သွားခြင်းကို မည်သို့ရှောင်ကြဉ်နိုင်သနည်း။

^၁၂ ပေါလုက ဟေဗြဲခရစ်ယာန်များကို ဤသို့သတိပေးခဲ့သည်– “ညီအစ်ကိုတို့၊ သင်တို့သည် အသက်ရှင်တော်မူသောဘုရားသခင့်ထံတော်မှ ထွက်သွားသောအားဖြင့် မယုံကြည်တတ်၊ ဆိုးညစ်သောစိတ်နှလုံးမရှိစေခြင်းငှာသတိပြုကြလော့။” (ဟေဗြဲ ၃:၁၂) ဂရိစကားတွင် “ထွက်သွားခြင်း” ဟူသည်စာသားအတိုင်း “ခပ်လှမ်းလှမ်းတွင်နေခြင်း” ဟုအဓိပ္ပာယ်ရှိရာ ယင်းသည် အယူဖောက်ပြန်ခြင်းကိုဆိုလိုသည်။ သို့သော် ထိုသို့သင်္ဘောလုံးဝပျက်ခြင်းအဖြစ်ကို ကျွန်ုပ်တို့ရှောင်ကြဉ်နိုင်သည်။ ယုံကြည်ခြင်းနှင့် မျှော်လင့်ခြင်းသည် စမ်းသပ်မှုမုန်တိုင်းဒဏ်ကို အပြင်းအထန်ခံနေရစဉ်ပင် ယေဟောဝါအား မှီခိုနေစေပါလိမ့်မည်။ (တရားဟောရာ ၄:၄; ၃၀:၁၉၊ ၂၀) ကျွန်ုပ်တို့၏ယုံကြည်ခြင်းသည် အယူဖောက်ပြန်သည့်သွန်သင်ခြင်းလေတိုတ်ခတ်မှုကြောင့် သင်္ဘောလူးလိမ့်သကဲ့သို့ ဖြစ်လိမ့်မည်မဟုတ်ချေ။ (ဧဖက် ၄:၁၃၊ ၁၄) သို့နှင့် ကျွန်ုပ်တို့၏ကျောက်ဆူးကဲ့သို့သော မျှော်လင့်ခြင်းကြောင့် ယေဟောဝါ၏ကျေးကျွန်များအနေနှင့် ဘဝမုန်တိုင်းဒဏ်ကို ခံနိုင်ကြပါလိမ့်မည်။

ချစ်ခြင်းမေတ္တာနှင့်သန့်ရှင်းသောဝိညာဉ်တော်ဖြင့် လှုံ့ဆော်ခံရ

၁၃၊ ၁၄။ (က) ကျွန်ုပ်တို့၏မျှော်လင့်ခြင်းကျောက်ဆူးတစ်ခုတည်းနှင့် အဘယ်ကြောင့်မလုံလောက်သနည်း။ (ခ) ယေဟောဝါ၏မြင့်မြတ်သောလုပ်ငန်းတော်၌ပါဝင်ရန် လှုံ့ဆော်သောစွမ်းအားသည် အဘယ်အရာဖြစ်သင့်သနည်း၊ အဘယ်ကြောင့်နည်း။

^၁၃ ယေဟောဝါအားဝတ်ပြုရသောရည်ရွယ်ချက်သည် မြေကြီးပရဒိသုတွင် ထာဝစဉ်အသက်ရှင်ရန်မျှော်လင့်ချက်တစ်ခုတည်းအတွက်ဖြစ်မည်ဆိုလျှင် ခရစ်ယာန်တစ်ဦးသည် စနစ်သစ်သို့တက်လှမ်းနေနိုင်မည်မဟုတ်ချေ။ သူ၏ဘဝတွင် မျှော်လင့်ခြင်းကျောက်ဆူးကို မြဲမြံစေသည့်အရာတစ်ခုအဖြစ်ထားစဉ် ထိုမျှော်လင့်ခြင်းနှင့် ယုံကြည်ခြင်းအပြင် လှုံ့ဆော်ပေးသောချစ်ခြင်းမေတ္တာကို ထပ်ဆင့်ရန်လိုသည်။ ပေါလုက ယင်းကို ဤသို့ရေးကာ အလေးပေးဖော်ပြခဲ့သည်– “ယခုတွင်ယုံကြည်ခြင်း၊ မျှော်လင့်ခြင်း၊ ချစ်ခြင်း ဤသုံးပါးတည်လျက်ရှိ၏။ ဤသုံးပါးတွင် ချစ်ခြင်းမေတ္တာသည် အမြတ်ဆုံးဖြစ်သတည်း။”—၁ ကောရိန္သု ၁၃:၁၃။

^၁၄ မြင့်မြတ်သောလုပ်ငန်းတော်၌ပါဝင်ရန် လှုံ့ဆော်သောစွမ်းအားသည် ကျွန်ုပ်တို့ကို ယေဟောဝါပြသခဲ့သည့် တိုင်းဆ၍မရနိုင်သော ကိုယ်တော်၏မေတ္တာကို တုံ့ပြန်၍ ကိုယ်တော်အားစိတ်ရင်းမှန်နှင့် ချစ်ခြင်းဖြစ်သင့်သည်။ တမန်တော်ယောဟန်က ဤသို့ရေးခဲ့သည်– “ချစ်ခြင်းမရှိသောသူသည် ဘုရားသခင်ကိုမသိ။ အကြောင်းမူကား ဘုရားသခင်သည် ချစ်ခြင်းမေတ္တာဖြစ်တော်မူ၏။ သားတော်အားဖြင့် ငါတို့သည်အသက်ရှင်စေခြင်းငှာ ဘုရားသခင်သည် တစ်ပါးတည်းသောသားတော်ကို ဤလောကသို့စေလွှတ်တော်မူသောအရာ၌ ငါတို့ကိုချစ်တော်မူသောမေတ္တာတော်သည် ထင်ရှားလျက်ရှိ၏။ ဘုရားသခင်သည် ငါတို့ကိုရှေ့ဦးစွာချစ်တော်မူသောကြောင့် ငါတို့သည်ဘုရားသခင်ကိုချစ်ကြ၏။” (၁ ယောဟန် ၄:၈၊ ၉၊ ၁၉) ယေဟောဝါအားကျေးဇူးတင်ခြင်းဖြင့် ကျွန်ုပ်တို့၏အဓိကပူပန်မှုသည် ကိုယ်တိုင်ကယ်တင်ခြင်းရဖို့မဖြစ်သင့်ဘဲ ကိုယ်တော်၏သန့်ရှင်းသောနာမတော်အား ဂုဏ်တင်ခြင်းနှင့် ကိုယ်တော်၏ဖြောင့်မတ်သည့်အကြွင်းမဲ့ပိုင်သအုပ်စိုးမှု သင်္ကာယနကင်းရှင်းခြင်းကို တွေ့မြင်ရရန်ဖြစ်သင့်သည်။

၁၅။ ယေဟောဝါအားချစ်သည့်မေတ္တာနှင့် ကိုယ်တော့်အကြွင်းမဲ့ပိုင်သအုပ်စိုးမှုသည် မည်သို့ဆက်စပ်သနည်း။

^၁၅ ကျွန်ုပ်တို့သည် ပရဒိသုကိုသာမဟုတ်ဘဲ ယေဟောဝါအားချစ်ခြင်းကြောင့် ကိုယ်တော်အားဝတ်ပြုခြင်းကို ကိုယ်တော်အလိုရှိတော်မူ၏။ ကျမ်းစာစောင်များအပေါ်ထိုးထွင်းသိမြင်ခြင်းa ကျမ်းစာစွယ်စုံကျမ်းက ဤသို့ဖော်ပြသည်– “ကိုယ်တော်၏အကြွင်းမဲ့ပိုင်သအုပ်စိုးမှုနှင့် ယင်းကိုဝေနေယျသတ္တဝါများထောက်ခံကြခြင်းသည် မေတ္တာအပေါ်အဓိကအခြေခံခြင်းကို ယေဟောဝါဂုဏ်ယူ၏။ ကိုယ်တော်၏ကောင်းမြတ်သည့် အရည်အသွေးများကြောင့်လည်းကောင်း၊ ယင်းတို့သည် ဖြောင့်မတ်သောကြောင့်လည်းကောင်း ကိုယ်တော့်အကြွင်းမဲ့ပိုင်သအုပ်စိုးမှုကို အခြားမည်သည့်အရာထက်မဆို မြတ်နိုးသူများကိုသာ ကိုယ်တော်လိုလားတော်မူသည်။ (၁က ၂:၉) လွတ်လပ်စွာပြုမူရန်ကြိုးစားမည့်အစား ကိုယ်တော်၏အကြွင်းမဲ့ပိုင်သအုပ်စိုးမှုအောက်တွင်နေ၍ ဝတ်ပြုကိုးကွယ်ရန်ရွေးချယ်ကြသည်။ အကြောင်းမှာ ကိုယ်တော်အား သူတို့သိကျွမ်း၍ ကိုယ်တော်၏ချစ်ခြင်းမေတ္တာ၊ တရားမျှတမှုနှင့် ဉာဏ်ပညာတို့သည် မိမိတို့၏အရည်အသွေးများထက် များစွာသာလွန်ကြောင်း သိရှိကြသောကြောင့်ဖြစ်သည်။ (ဆ ၈၄:၁၀၊ ၁၁)”—အတွဲ ၂၊ စာမျက်နှာ ၂၇၅။

၁၆။ ယေရှုအားချစ်သည့်မေတ္တာသည် ကျွန်ုပ်တို့၏အသက်တာတွင် လှုံ့ဆော်သောစွမ်းအား မည်သို့ဖြစ်သနည်း။

^၁၆ ခရစ်ယာန်များအနေနှင့် ယေရှု၏မေတ္တာကိုတုံ့ပြန်သောအားဖြင့် ကိုယ်တော်အားချစ်ကြောင်း ကျွန်ုပ်တို့တင်ပြကြသည်။ ပေါလုက ဤသို့ကျိုးကြောင်းဆင်ခြင်ခဲ့သည်– “အကြောင်းမူကား တစ်ယောက်သောသူသည် လူအပေါင်းတို့အတွက်ကြောင့် အသေခံသည်မှန်လျှင် လူအပေါင်းတို့သည် သေလျက်နေကြသည်ဟူ၍လည်းကောင်း၊ အသက်ရှင်သောသူတို့သည် တစ်ဖန်ကိုယ်အလိုသို့လိုက်၍မရှင်၊ သူတို့အတွက်ကြောင့် အသေခံပြီးမှ ထမြောက်တော်မူသောသူ၏အလိုသို့လိုက်၍ ရှင်စေမည်အကြောင်း၊ လူအပေါင်းတို့အတွက်အသေခံတော်မူသည်ဟူ၍လည်းကောင်း ငါတို့သည်သဘောထားလျက် ခရစ်တော်၏ချစ်ခြင်းမေတ္တာတော်သည် ငါတို့ကိုအနိုင်အထက်သွေးဆောင်၏။” (၂ ကောရိန္သု ၅:၁၄၊ ၁၅) ကျွန်ုပ်တို့၏ဝိညာဉ်ရေးအသက်တာ၊ ယုံကြည်ခြင်းနှင့် မျှော်လင့်ခြင်းအုတ်မြစ်ဖြစ်သော ခရစ်တော်အပေါ် တည်ဆောက်ထား၏။ အထူးသဖြင့် အကြီးအကျယ်စမ်းသပ်ခံရချိန်များတွင် ယေရှုခရစ်အားချစ်သည့်မေတ္တာသည် ကျွန်ုပ်တို့၏မျှော်လင့်ခြင်းကိုခိုင်ခံ့စေကာ ယုံကြည်ခြင်းကိုမြဲမြံစေသည်။—၁ ကောရိန္သု ၃:၁၁; ကောလောသဲ ၁:၂၃; ၂:၆၊ ၇။

၁၇။ အဘယ်ပြင်းထန်သောစွမ်းအားကို ကျွန်ုပ်တို့အတွက် ယေဟောဝါပြင်ဆင်ပေးသနည်း။ ယင်း၏အရေးကြီးမှုကို တမန်တော် ၁:၈ နှင့်ဧဖက် ၃:၁၆ တွင်မည်သို့ဖော်ပြထားသနည်း။

^၁၇ ခရစ်ယာန်များအနေနှင့် ကျွန်ုပ်တို့၏အသက်တာတွင် ဘုရားသခင်နှင့် သားတော်တို့အားချစ်သည့်မေတ္တာသည် အဓိကလှုံ့ဆော်သောစွမ်းအားဖြစ်သော်လည်း ကိုယ်တော့်လုပ်ငန်းတော်၌ ရှေ့ဆက်လုပ်ဆောင်စေသည့် ကျွန်ုပ်တို့အားလှုံ့ဆော်ပေးသော၊ ခွန်အားရှိစေသောအခြားအရာတစ်ခုကို ယေဟောဝါပြင်ဆင်ပေး၏။ ၎င်းအရာများသည် ကိုယ်တော်၏လှုပ်ရှားသောစွမ်းအား သို့မဟုတ် သန့်ရှင်းသောဝိညာဉ်တော်ဖြစ်သည်။ “စပီးရစ်” ဟုပြန်ဆိုထားသော ဟေဗြဲနှင့်ဂရိစကားလုံးများသည် လေ၏ပြင်းထန်သောရွေ့လျားမှုကိုရည်ညွှန်းသည်။ ပေါလုစီးနင်းခဲ့သော ရွက်သင်္ဘောများသည် ခရီးပန်းတိုင်ရောက်ဖို့ မမြင်နိုင်သောလေကိုအားထားရ၏။ အလားတူစွာ ကျွန်ုပ်တို့၏ယုံကြည်ခြင်းသင်္ဘောသည် ယေဟောဝါ၏လုပ်ငန်းတော်တွင် ရှေ့သို့ရွေ့လျားနေရန် ချစ်ခြင်းမေတ္တာနှင့် ဘုရားသခင်၏မျက်မြင်မရသော တက်ကြွလှုပ်ရှားသည့်စွမ်းအားရှိရန်လိုသည်။—တမန်တော် ၁:၈; ဧဖက် ၃:၁၆။

ကျွန်ုပ်တို့၏ပန်းတိုင်ဆီသို့!

၁၈။ ကျွန်ုပ်တို့၏ယုံကြည်ခြင်းသည် အနာဂတ်တွင် စမ်းသပ်ခံရတိုင်း အဘယ်အရာက ခံရပ်စေမည်နည်း။

^၁၈ စနစ်သစ်မရောက်မီ ကျွန်ုပ်တို့၏ယုံကြည်ခြင်းနှင့် ချစ်ခြင်းမေတ္တာသည် အပြင်းအထန်စမ်းသပ်ခံရပေမည်။ သို့သော် ယေဟောဝါသည် “မြဲမြံခိုင်ခံ့သော” ကျောက်ဆူး—ကျွန်ုပ်တို့၏ထူးမြတ်သောမျှော်လင့်ချက်—ကိုပေးထားသည်။ (ဟေဗြဲ ၆:၁၉; ရောမ ၁၅:၄၊ ၁၃) ကျွန်ုပ်တို့သည် အတိုက်အခံပြုမှု သို့မဟုတ် အခြားသောစမ်းသပ်မှုများကိုကြုံရသောအခါ ကျွန်ုပ်တို့၏မျှော်လင့်ချက်အားဖြင့် ကောင်းစွာကျောက်ချထားမည်ဆိုလျှင် ခံနိုင်ရည်ရှိနိုင်သည်။ မုန်တိုင်းတစ်ခုငြိမ်သွားပြီး အခြားတစ်ခုမဖြစ်မီ ကျွန်ုပ်တို့၏မျှော်လင့်ချက်နှင့် ယုံကြည်ခြင်းကိုခိုင်ခံ့စေဖို့ စိတ်ပိုင်းဖြတ်ထားကြစို့။

၁၉။ ကျွန်ုပ်တို့၏ယုံကြည်ခြင်းသင်္ဘောကို လမ်းကြောင်းပေါ် မည်သို့မောင်းနှင်နေပြီး ဘုရားသခင့်ကမ္ဘာသစ်နားခိုရာသို့ မည်သို့ရောက်သွားစေနိုင်သနည်း။

^၁၉ “စိတ်နှလုံး၏ကျောက်ဆူး” ကိုမဖော်ပြမီ ပေါလုက ဤသို့ဆိုခဲ့သည်– “သင်တို့ရှိသမျှသည် ပျင်းရိခြင်းနှင့်ကင်းလွတ်၍ ယုံကြည်ခြင်းနှင့် သည်းခံခြင်းအားဖြင့် ကတိတော်တို့ကိုအမွေခံရသောသူတို့နည်းတူ ကျင့်နိုင်မည်အကြောင်း ထိုသို့သောလုံ့လဝီရိယ [“အရှိန်မြှင့်ရန်၊” ကဘ အောက်ခြေမှတ်ချက်] ကိုထုတ်၍အဆုံးတိုင်အောင်ယုံမှားခြင်းနှင့် ကင်းသောမျှော်လင့်ခြင်းနှင့်ပြည့်စုံစေခြင်းငှာ ငါတို့သည်အလိုရှိကြ၏။” (ဟေဗြဲ ၆:၁၁၊ ၁၂) ယေဟောဝါနှင့် သားတော်အားချစ်သည့်မေတ္တာ၏လှုံ့ဆော်မှုနှင့် သန့်ရှင်းသောဝိညာဉ်တော်တန်ခိုးကိုခံစားကြရလျက် ဘုရားသခင်ကတိထားရာ ကမ္ဘာသစ်နားခိုရာမရောက်မချင်း ကျွန်ုပ်တို့၏ယုံကြည်ခြင်းသင်္ဘောကို လမ်းကြောင်းပေါ် မောင်းနှင်ကြစို့လေ။

[အောက်ခြေမှတ်ချက်များ]

ပြန်လည်သုံးသပ်ခြင်းဖြင့်

◻ ကျွန်ုပ်တို့၏ယုံကြည်ခြင်းနှင့်စပ်လျဉ်း၍ အဘယ်သတိပေးချက်ကို ပေါလုပေးခဲ့သနည်း။

◻ ဝိညာဉ်ရေးယုံကြည်ခြင်းသင်္ဘောပျက်ခြင်းကို တချို့မည်သို့ ကြုံခဲ့ကြရသနည်း၊ အခြားသူများသည် မည်သို့ ဖြည်းလေးသွားနေကြသနည်း။

◻ ကျွန်ုပ်တို့၏ယုံကြည်ခြင်းနှင့် အဘယ်ဘုရားသခင်ရေးရာအရည်အသွေး တွဲဖက်ပေးရန်လိုသနည်း။

◻ ဘုရားသခင့်ကတိထားရာ ကမ္ဘာသစ်နားခိုရာသို့ရောက်ရန် အဘယ်အရာကကူညီပေးမည်နည်း။

[စာမျက်နှာ ၁၆ ပါ ရုပ်ပုံ]

ဘဝမုန်တိုင်းဒဏ်ကိုကြံ့ကြံ့ခံရန်ကျွန်ုပ်တို့၏ယုံကြည်ခြင်းသင်္ဘောကိုကောင်းစွာဆောက်လုပ်ထားရမည်

[စာမျက်နှာ ၁၇ ပါ ရုပ်ပုံ]

ကျွန်ုပ်တို့၏မျှော်လင့်ခြင်းသင်္ဘော ပျက်နိုင်

[စာမျက်နှာ ၁၈ ပါ ရုပ်ပုံ]

မျှော်လင့်ခြင်းသည် ခရစ်ယာန်များအနေနှင့် ကျွန်ုပ်တို့အသက်တာအတွက် ကျောက်ဆူးဖြစ်