ဘုရားသခင့်နိုင်ငံတော်ကြွေးကြော်သူများမှတ်တမ်း
“ဖုန်းမှားနေပါတယ်”
တောင်အာဖရိကနိုင်ငံရှိ ဂျိုဟန်နက်စ်ဘာ့ဂ်မြို့တွင်နေထိုင်သူ လက်စ်လီနှင့် ကယ်ရိုလိုင်းတို့သည် လုံခြုံရေးဂိတ်များရှိသည့် အငြိမ်းစားရပ်ကွက်တွင် နေထိုင်သူတို့ထံ အလှည့်ကျစီ တယ်လီဖုန်းဖြင့်သက်သေခံနေကြသည်။ အိမ်၌လူမရှိသည်ကများပြီး သူတို့၏ခရစ်ယာန်သတင်းတရားကို စိတ်ဝင်စားမှုမရှိကြသောကြောင့် အမျိုးသမီးတစ်ဦး ဖုန်းကိုင်စကားပြောဆိုသောအခါ ကယ်ရိုလိုင်း အတော်အားတက်သွားသည်။
“မစ္စစ် ဘီ—လား” ဟုကယ်ရိုလိုင်းကမေးသည်။
“မဟုတ်ပါဘူးရှင်၊ ကျွန်မက မစ္စစ် ဂျီ—ပါ၊ ဖုန်းမှားနေပါတယ်” ဟူသော ဖော်ရွေသည့်အသံတစ်သံကိုကြားလိုက်သည်။
ကြားရသောအသံသည် လှိုက်လှိုက်လှဲလှဲရှိသည်ကို သတိပြုမိရာ ကယ်ရိုလိုင်းက “ဟုတ်ကဲ့၊ မစ္စစ် ဘီ—ကိုကျွန်မဘာပြောချင်တယ်ဆိုတာကို ပြောပြပါရစေ” ဟုဖြေဆိုလိုက်သည်။ ထို့နောက် လာလတ္တံ့သော ဘုရားသခင့်နိုင်ငံတော်၏ ကောင်းချီးများအကြောင်း ဆက်ပြောပြသည်။ ကျွန်ုပ်တို့ထံမှ ဘုရားသခင်အဘယ်အရာတောင်းဆိုတော်မူသနည်း ဘရိုရှာကို အိမ်အရောက်လာပို့ပေးမည်ဟု စီစဉ်လိုက်ပြီးနောက် “ဒါနဲ့ စကားမစပ် ရှင်က ဘယ်ဘာသာဝင်လဲ” ဟု မစ္စစ် ဂျီ—ကမေး၏။
“ကျွန်မတို့က ယေဟောဝါသက်သေတွေပါ” ဟုကယ်ရိုလိုင်းပြန်ဖြေသည်။
“အိုး၊ တော်ပြီ၊ အဲဒီဘာသာလား! ကျွန်မရှင်နဲ့မတွေ့ချင်ဘူး။”
“ဒါပေမဲ့ မစ္စစ် ဂျီ—မိနစ် ၂၀ လုံးလုံး ရှင့်ကို ကျွန်မက လူသားတွေအတွက် ဘုရားသခင့်နိုင်ငံတော် မကြာခင်လုပ်ဆောင်ပေးတော့မယ့်အရာတွေကို ကျမ်းစာကနေကောက်နုတ်ပြီး အကောင်းဆုံး မျှော်လင့်ချက်ကို ဝေမျှပြောဆိုခဲ့တယ်လေ၊ အဲဒါတွေကြားရတော့ စိတ်လှုပ်ရှားတဲ့အထိ ရှင်ပျော်သွားပြီး ပိုသိချင်လာခဲ့တယ်လေ။ တကယ်ဆိုရင် ယေဟောဝါသက်သေတွေအကြောင်း ရှင်ဘာတွေသိထားလို့လဲ။ ရှင်နေမကောင်းဖြစ်ရင် စက်ပြင်တဲ့သူဆီသွားမလား။ ယေဟောဝါသက်သေတွေ ဘာကိုယုံကြည်တယ်ဆိုတာ ကျွန်မ ရှင့်ကိုပြောပြပါရစေ” ဟုကယ်ရိုလိုင်းက မေတ္တာရပ်ခံလိုက်သည်။
တစ်ခဏမျှ တိတ်သွားပြီးနောက် “ရှင်ပြောတာမှန်တယ် ထင်ပါတယ်။ လာခဲ့ပါ။ ဒါပေမဲ့ ရှင်သိထားဖို့ကတော့ ကျွန်မဘာသာပြောင်းအောင် ရှင်ဘယ်တော့မှမလုပ်နိုင်ဘူးဆိုတာပါပဲ။”
“မစ္စစ် ဂျီ—ကျွန်မ ရှင့်ကိုဘာသာပြောင်းစေချင်ရင်တောင် ဘယ်လိုမှ ကျွန်မ မတတ်နိုင်ပါဘူး၊ အဲဒါက ယေဟောဝါတစ်ပါးတည်းသာ တတ်နိုင်တဲ့အမှုပါ” ဟုကယ်ရိုလိုင်းပြန်ဖြေသည်။
ဘရိုရှာသွားပို့ချိန်တွင် အဆင်ပြေခဲ့သည်၊ မစ္စစ် ဂျီ—(ဘက်တီ) က နောက်တစ်ကြိမ်လည်ပတ်ခွင့်ပြုခဲ့သည်။ ကယ်ရိုလိုင်းပြန်လည်ပတ်သောအခါ ဘက်တီက ထမင်းစားခန်း၌ သူနှင့်အတူတစ်စားပွဲတည်းထိုင်သော အခြားအမျိုးသမီးများကို မိမိသည် ယေဟောဝါသက်သေများနှင့်ဆွေးနွေးနေကြောင်း ပြောပြသည်ဟုဆိုသည်။ သူတို့က လက်မြှောက်ကြကာ “သူတို့နဲ့ ဘယ်လိုပတ်သက်နိုင်မလဲ၊ သူတို့တစ်တွေဟာ ယေရှုကိုမှမယုံကြတာ” ဟုမေးမြန်းပြောဆိုကြကြောင်း ပြောပြသည်။
ပြီးခဲ့သည့်တစ်ခေါက်ဆွေးနွေးခဲ့သော ဘုရားသခင့်နိုင်ငံတော်အကြောင်းမှ အဓိကအချက်တစ်ခုကို ကယ်ရိုလိုင်းက ဘက်တီအား ချက်ချင်းပြန်သတိရစေလိုက်သည်။
“ဘယ်သူ ဘုရင်ဖြစ်မှာလဲ” ဟုကယ်ရိုလိုင်းကမေး၏။
“ယေရှုပေါ့” ဟုဘက်တီဖြေသည်။
“သိပ်မှန်တယ်” ဟုကယ်ရိုလိုင်း ပြန်ပြော၏။ ယေရှုသည် ဘုရားသခင့်သားတော်ဖြစ်၏ဟု ယေဟောဝါသက်သေများ ယုံကြည်ကြကြောင်း၊ သို့သော် ကိုယ်တော်သည် သုံးပါးပေါင်းတစ်ဆူတွင်ပါဝင်သည့် ဘုရားသခင်နှင့်တန်းတူဖြစ်သူမဟုတ်ကြောင်း ဆက်၍ရှင်းပြသည်။—မာကု ၁၃:၃၂; လုကာ ၂၂:၄၂; ယောဟန် ၁၄:၂၈။
နောက်ထပ်အကြိမ်အနည်းငယ် လည်ပတ်ပြီးသော် ဘက်တီသည် အကောင်းမြင်စိတ်ရှိ၍ ရွှင်လန်းသူတစ်ဦးဖြစ်သော်လည်း ကျန်းမာရေးမကောင်းဘဲ ဝေဒနာခံစားနေရကြောင်း ကယ်ရိုလိုင်းသိမြင်လာခဲ့ရသည်။ အမှန်မှာ သူသည် ကင်ဆာရောဂါဝေဒနာရှင်တစ်ဦးဖြစ်နေပြီး သေရမည်ကို ကြောက်ရွံ့နေသည်။ “ဒီအကြောင်းတွေကို လွန်ခဲ့တဲ့နှစ်တွေကတည်းကကြားခဲ့ရပြီး ရှင့်ယုံကြည်ခြင်းမျိုး ရှိခဲ့ရင်ကောင်းမှာပဲ” ဟု သူထုတ်ပြောသည်။ သေခြင်းသည် အိပ်မောကျနေခြင်းနှင့်တူပြီး ထမြောက်ရာကာလတွင် ၎င်းမှပြန်ထလာနိုင်ကြောင်း ကျမ်းချက်များပြပြီး ကယ်ရိုလိုင်းက သူ့ကိုနှစ်သိမ့်အားပေးခဲ့သည်။ (ယောဟန် ၁၁:၁၁၊ ၂၅) ယင်းက ဘက်တီအတွက် အလွန်အားရှိစရာဖြစ်ခဲ့ရာ ယခုသူသည် ပုံမှန်ကျမ်းစာသင်အံမှု ပြုလုပ်လျက်ရှိသည်။ သူသည် ကျန်းမာရေးချို့တဲ့လာနေသည့်အတွက်ကြောင့်သာ ဘုရားသခင့်နိုင်ငံတော်ခန်းမ၌ အစည်းအဝေးများကို မတက်ရောက်နိုင်ချေ။
ကယ်ရိုလိုင်းက ဤသို့ဆိုသည်– “ဒီအလုပ်ကို ကောင်းကင်တမန်တွေ လမ်းညွှန်ဦးဆောင်နေတာ ထင်ရှားပါတယ်။ ‘ဖုန်းနံပါတ်မှား’ ပြီး ဘက်တီဆီဆက်ခဲ့မိတာ၊ စဉ်းစားကြည့်ဦးလေ၊ သူက ၈၉ နှစ်ရှိနေပြီ!”—ဗျာဒိတ် ၁၄:၆။