အသက်ရှင်ခဲ့သမျှတွင် အကြီးမြတ်ဆုံးလူသား ကိုလေ့လာခြင်း

^၁ အောက်တိုဘာ ၁၂ အပတ်အတွင်း အသက်ရှင်ခဲ့သမျှတွင် အကြီးမြတ်ဆုံးလူသား ကိုအသင်းတော်စာအုပ်ကြီးသင်တန်းများတွင် စတင်လေ့လာကြမည်။ ယေရှုခရစ်၏ဘဝနှင့်ဓမ္မအမှုကို ပြန်သုံးသပ်ကြခြင်းသည် ရွှင်လန်းစရာပါတကား။ လေ့လာခဲ့သည့်အခြားစာအုပ်များနှင့် ဤစာအုပ်ပုံစံမတူသည့်အတွက် အကူအညီဖြစ်စေမည့်ညွှန်ကြားချက်အနည်းငယ်လိုမည်။

^၂ စာအုပ်တွင် စာမျက်နှာများမရှိသဖြင့် ကျွန်ုပ်တို့၏နိုင်ငံတော်ဓမ္မအမှုပါအစီအစဉ်တွင် လေ့လာမည့်အခန်းသုံးလေးခန်းကို ဖော်ပြပေးမည်။ အခန်း ၃၅၊ ၁၁၁ နှင့် ၁၁၆ တို့သည် အနည်းငယ်ပိုရှည်သည့်အတွက် ယင်းအခန်းတစ်ခုစီကို နှစ်ပိုင်းခွဲလေ့လာကြမည်။ အရည်အချင်းရှိညီအစ်ကိုတစ်ဦးသည် တစ်ခန်းလုံး (သို့မဟုတ် အခန်း ၃၅၊ ၁၁၁ နှင့် ၁၁၆ ဆိုလျှင် ခေါင်းစဉ်ငယ်တစ်ခုလုံး) ကိုဖတ်ပြီးနောက် သင်တန်းမှူးသည် အခန်းအဆုံးပါ သက်ဆိုင်ရာအခန်း၊ သို့မဟုတ် အပိုင်းအတွက်မေးခွန်းများကို မေးပါလိမ့်မည်။ မေးခွန်းတို့အတွက် အဖြေများသည် အခန်းတွင် တစ်ဆက်တည်းရှေ့ဆင့်နောက်ဆင့် အမြဲတန်းမတွေ့ရပါ။ တိုရင်းလိုရှင်းအဖြေများသည် လေ့လာနေသည့်သင်ခန်းစာပါ အကြောင်းအတိုင်းဖြစ်သင့်သည်။

^၃ ယင်းနောက် အချိန်ရှိပါက အခန်း၏အဆုံးတွင်ဖော်ပြထားသည့် ကျမ်းချက်အားလုံးကို ဖတ်သင့်သည်။ ကိုးကားထားသည့်ကျမ်းပိုဒ်အရှည်တို့ကို ပိုင်းဖြတ်ပြီး ကြေညာသူအသီးသီးအား ဖတ်စေနိုင်သည်။ ထိုနောက် ဖတ်ခဲ့သည့်ကျမ်းချက်အကြောင်း သက်ဆိုင်သလိုဖြေဆိုနိုင်ပါသည်။ သင်တန်းမှူးပြင်ဆင်ထားသည့် ထိမိသောမေးခွန်းများသည် စာအုပ်တွင်ဖော်ပြထားသည့်အကြောင်းနှင့် ဖတ်လိုက်သောကျမ်းချက် မည်သို့သက်ဆိုင်ကြောင်း အဓိပ္ပာယ်ပြည့်ဝသောအဖြေများကို ပေးစေပါလိမ့်မည်။ မေးခွန်းများ၊ အဖြေများအားလုံးသည် တက်ရောက်လာသူများအား ယေရှုခရစ်၏ဘဝအသက်တာနှင့် ကိုယ်တော်၏သွန်သင်ချက်များကို အာရုံပြုစေသင့်သည်။

^၄ အကြီးမြတ်ဆုံးလူသား စာအုပ်သည် ယေရှု၏အသက်တာဘဝကို သက္ကရာဇ်စဉ်အတိုင်း သုံးသပ်ထားသည်။ အဖြစ်အပျက်များကို ရုပ်လုံးပေါ်စေ၍ အဘယ်အရပ်၌ ဖြစ်ပျက်ခဲ့ကြောင်း သိရှိခြင်းဖြင့် ယင်းတို့ကိုမှတ်မိနိုင်ရန် အကူအညီပေးသည်။ ထိုကြောင့်ရောင်စုံရုပ်ပုံများကို အသေအချာသုံးသပ်ကြပါ။ စာအုပ်အစ နိဒါန်းစကားနောက်တွင်ပါသည့်မြေပုံကိုလည်း မကြာခဏကိုးကားဖော်ပြပါ။

^၅ ပထမအပတ်တွင် စာအုပ်ပါ နိဒါန်းအပိုင်းကို သုံးသပ်ကြမည်။ ခေါင်းစဉ်ငယ်ကလေးများအောက်ပါ အပိုဒ်အားလုံးကိုဖတ်ပြီးနောက် သင်တန်းမှူးသည် မိမိပြင်ဆင်ထားသည့် သင့်တော်သောမေးခွန်းများကို မေးမြန်းပါလိမ့်မည်။ စလျှင်စချင်းပြုသည့် ဤဆွေးနွေးခန်းသည် လာမည့်နှစ်အတွင်းလေ့လာမည့်အကြောင်းများအတွက် လမ်းခင်းပေးပါလိမ့်မည်။ လေ့လာရာအကြောင်းကို မည်မျှထိတိုင် အောင်မြင်စွာလေ့လာသုံးသပ်ကြခြင်းသည် တက်ရောက်သူအားလုံးတို့၏ ပြင်ဆင်မှု မည်မျှကောင်းမကောင်းပေါ် အခြေခံပါလိမ့်မည်။ အထူးသဖြင့် သင်တန်းမှူးသည် ပတ်စဉ်ပင် ကောင်းစွာပြင်ဆင်ရမည်။ ဤသို့ပြုခြင်းအားဖြင့် အသက်ရှင်ခဲ့သမျှတွင် အကြီးမြတ်ဆုံးလူသားဖြစ်သူ ကျွန်ုပ်တို့သခင်ကယ်တင်ရှင်ယေရှုခရစ်ကို အကျွမ်းတဝင်သိလာကြပါလိမ့်မည်။