ထာဝရအသက်မျှော်လင့်ချက်ကိုပေးသော သေတော်မူခြင်းကို ပွဲကျင်းပခြင်း

^၁ ၁၉၉၃ ဧပြီ ၆ ရက်နေ့၊ နေဝင်ပြီးချိန်တွင် အသက်ရှင်ခြင်းသို့ ပို့ဆောင်တော်မူသောအရှင်၏ သေခြင်းကို ပွဲကျင်းပကြမည်ဖြစ်သည်။ (တ၊ ၃:၁၅) ယေရှုခရစ်၏ အသက်တာဘဝနှင့် သေခြင်းကို သတိရအောက်မေ့ခြင်းသည် အလွန်လျောက်ပတ်ပေသည်။ ကျွန်ုပ်တို့ထာဝစဉ်အသက်ရှင်ရန် မျှော်လင့်နိုင်ခြင်းသည် ယေရှုသွန်းလောင်းတော်မူခဲ့သော အသွေးတော်အပေါ် မူတည်သည်။

^၂ ယေဟောဝါ၏ရည်ရွယ်တော်မူချက် ပြီးမြောက်ပြည့်စုံရေး၌ ခရစ်တော်သေခြင်း၏ အရေးပါမှုကို သတိရအောက်မေ့ပွဲက အလေးအနက်ထင်ရှားစေသည်။ ထိုရည်ရွယ်ချက်၌ အာဒံ၏အမျိုးအနွယ်ကို ရွေးနှုတ်ခြင်းငှာ ပေးဆက်ရန်လိုသည့် စုံလင်သောလူသားအသက် ပူဇော်ရခြင်း ပါဝင်ပါသည်။ ယင်းသို့ပြုခြင်းအားဖြင့် သန်းထောင်ပေါင်းများစွာသောသူတို့သည် ယုံကြည်ခြင်းရှိကြောင်းတင်ပြကြကာ ပရဒိသုကမ္ဘာပေါ် ထာဝစဉ်အသက်ရှင်နိုင်ရန် လမ်းဖွင့်ပေးပါသည်။​—ယော၊ ၃:၁၆။

^၃ သမ္မာတရားနှင့် အသက်ကိုမြတ်နိုးသူအပေါင်းသည် ယေရှု၏အမိန့်တော်ကိုနာခံကာ သခင့်ညစာစားပွဲ ကျင်းပနိုင်ခွင့်ကို တန်ဖိုးထားလေးမြတ်ကြသည်။ (လု၊ ၂၂:၁၉) ခရစ်တော်၏ရွေးဖိုးပူဇော်သက္ကာကို ပြင်ဆင်ပေးတော်မူသည့်အတွက် ကျေးဇူးတင်လေးမြတ်ကြောင်းကို တင်ပြခြင်းငှာ ကျွန်ုပ်တို့တစ်ဦးစီအနေနှင့် အဘယ်အမှုကို ပြုလုပ်ဆောင်ရွက်နိုင်မည်နည်း။ ဤပွဲတော်၏အရေးပါမှုကို အသိအမှတ်ပြုသည့်အနေနှင့် ကောင်းစွာစီစဉ်ထားခြင်းသည် အလွန်အရေးကြီးပါသည်။ ဤအထူးအဖြစ်အပျက်အတွက် အဘယ်ပြင်ဆင်ချက်များကို သင်ပြုလုပ်ထားပါသနည်း။

^၄ ကြိုတင်ပြင်ဆင်ပေးရန် လိုအပ်– မိသားစုရှိသူတိုင်း ပွဲတော်ကို မတက်ရောက်ပဲမနေရန် အသေအချာ စီစဉ်ပေးမည်။ ၁၉၉၃ ပြက္ခဒိန် ပေါ်ဧပြီလ ၁-၆ ရက်အတွက် တင်ပြထားသည့် ကျမ်းပိုဒ်များကို ဖတ်ရှုသုံးသပ်ခြင်းအားဖြင့် ကျွန်ုပ်တို့စိတ်သဘောထားကိုလည်း အသင့်ပြင်ဆင်ထားသင့်သည်။ ဧပြီ ၆ ရက်မတိုင်မီလေးတွင် ကိုယ်ပိုင်လေ့လာမှုနှင့် မိသားစုကျမ်းစာသင်အံမှုပြုချိန်တွင် သတိရအောက်မေ့ပွဲ၏ အရေးပါမှုနှင့်စပ်လျဉ်းသောအကြောင်းများကို ထည့်စဉ်းစားသင့်ပါသည်။ စောစောတက်ရောက်လာနိုင်ရန်နှင့် သတိရအောက်မေ့ပွဲပြီးသည့်အခါ ခေတ္တဆက်နေခြင်းအားဖြင့် ပထမအကြိမ်တက်ရောက်လာသူလူသစ်များကို နှုတ်ဆက်စကားပြောဆိုနိုင်ရန် ကြိုတင်စီစဉ်ပါ။

^၅ သတိရအောက်မေ့ပွဲမတိုင်မီ အပတ်အနည်းငယ်အတွင်း စိတ်ဝင်စားသူရှိရှိသမျှတို့ကို ဤပွဲတော်သို့ ခေါ်ဖိတ်ပါလေ။ အသင်းတော်များထံ နှစ်စဉ်ပို့ပေးသောပုံစံများတွင် ပုံနှိပ်ဖိတ်စာများ ထည့်ပေးပါသည်။ ယင်းတို့ကိုအသုံးပြုကြရာတွင် ဒေသခံအရပ်တွင် ပွဲတော်ကျင်းပမည့်လိပ်စာနှင့်အချိန်ကို စိတ်ဝင်စားသူတို့အားအသိပေးရန် မမေ့ကြပါနှင့်။ သင်ဖိတ်ခေါ်လိုသူများ၏ နာမည်စာရင်းကို ရေးဆွဲပြင်ဆင်ထားပါ။ တက်ရောက်လိုသူအားလုံး အဆင်ပြေစွာ ရောက်ရှိလာနိုင်ကြမည်လော။ အဆင်မပြေပါက သူတို့အား မည်သို့ကူညီပေးနိုင်မည်နည်း။ သင့်ကားတွင် နေရာရှိမည်ဆိုလျှင် မည်သူအား ကြိုပို့စေလိုကြောင်း အကြီးအကဲများအား မေးမြန်းကြည့်ပါ။

^၆ ဤပွဲတော်သည် နှစ်ပတ်လည် အရေးအကြီးဆုံးပွဲတော်ဖြစ်၍ လူများစွာတက်ရောက်မည်ဟု မျှော်လင့်ထားကြသည့်အတွက် အကြီးအကဲများသည် အထူးအစီအစဉ်များကို ကြိုတင်ပြင်ဆင်ရန် လိုပါလိမ့်မည်။ (၁ ကော၊ ၁၄:၄၀) ဧပြီ ၆ ရက်နေ့မတိုင်မီ တစ်ပတ်နှစ်ပတ်အလိုတွင် ပွဲတော်၌ အကူအညီပေးမည့်သူများနှင့် အကြီးအကဲများသည် အထူးအစည်းအဝေးပြုလုပ်ကာ ထိုင်ခုံအစီအစဉ်များ၊ မုန့်နှင့်စပျစ်ရည်ကို မည်သို့မည်ပုံ ဝေငှပေးရမည်အကြောင်း အသေအချာသဘောပေါက်မပေါက် ဆွေးနွေးကြပါမည်။ ပွဲတော်အတွင်း ဧည့်ကြိုတစ်ဦး၊ သို့မဟုတ် မုန့်နှင့်စပျစ်ရည် ဝေငှပေးသူတစ်ဦးအဖြစ် တာဝန်ရရှိထားလျှင် ယင်းကိစ္စနှင့်စပ်လျဉ်းသည့် အကြီးအကဲများ၏ညွှန်ကြားချက်များကို အတိအကျလိုက်နာရန် သတိပြုပါ။ စာမျက်နှာ ၇ ပါအကွက်ရှိ သတိပေးချက်များကို စစ်ဆေးကြည့်ခြင်းအားဖြင့် ဧည့်ကြိုများ၊ မုန့်နှင့်စပျစ်ရည်၊ ယင်းတို့ကို ဝေငှပေးသူများ၊ ဟောပြောသူ အစရှိသူတို့အတွက် အစီအစဉ်အားလုံးကို ကြိုတင်စီစဉ်ပြီးသားရှိမရှိ သိနိုင်ပါလိမ့်မည်။

^၇ ယနေ့ ခရစ်တော်၏ညီတော် အနည်းအကျဉ်းသာ ကမ္ဘာပေါ် ကျန်ကြွင်းတော့သည်။ မဝေးတော့သောအနာဂတ်တွင် သခင့်ညစာစားပွဲကို ကျင်းပရသည့်ပွဲတော် ရှိတော့မည်မဟုတ်ပါ။ (၁ ကော၊ ၁၁:၂၅၊ ၂၆) အောက်မေ့ရာပွဲကျင်းပခြင်း အခွင့်အရေးကို ကျွန်ုပ်တို့ရရှိထားသ၍ကာလပတ်လုံး ထာဝရအသက်မျှော်လင့်ချက်ကိုပေးသော သေတော်မူခြင်းကို လျောက်ပတ်သင့်တော်စွာ ပွဲတော်ကျင်းပကြပါစို့။