မေးခွန်းသေတ္တာ

◼ အချိန်ကြာမြင့်စွာမလှုပ်ရှားသူတစ်ဦးအား သတင်းကောင်းကြေညာသူတစ်ဦးအဖြစ် အရည်အချင်းပြန်ပြည့်မီလာစေရန် မည်သို့ကူညီပေးနိုင်သနည်း။

မလှုပ်ရှားသူတစ်ဦးသည် ယေဟောဝါ၏အမှုတော်ဆောင်ရန် လှိုက်လှဲသောဆန္ဒရှိကြောင်း သက်သေထူသောအခါ ယင်းသည် ဝမ်းသာစရာဖြစ်သည်။ (လု. ၁၅:၄-၆) ထိုသူသည် အတိုက်အခံပြုမှု သို့မဟုတ် ဘဝ၏ဖိစီးမှုများကြောင့် ကိုယ်ပိုင်လေ့လာမှု၊ အစည်းအဝေးတက်ခြင်းနှင့် လယ်ကွင်းဓမ္မအမှုတွင်ပါဝင်ခြင်းတို့ကို ပျက်ကွက်စေရန် ခွင့်ပြုခဲ့ပေမည်။ ထိုသူအား ဝိညာဉ်ရေးတိုးတက်လာစေရန် အကောင်းဆုံးပုဂ္ဂိုလ်ရေးအကူအညီကို မည်သို့ပေးနိုင်သနည်း။

အချိန်ကြာမြင့်စွာမလှုပ်ရှားသူတစ်ဦးကို ဓမ္မအမှုတွင် ပြန်ပါဝင်ရန်မဖိတ်ခေါ်မီ နိုင်ငံတော်ကြေညာသူတစ်ဦးအဖြစ် အရည်အချင်းပြည့်မီ၊ မပြည့်မီသိရှိရန် အကြီးအကဲနှစ်ဦး သူနှင့်တွေ့ဆုံသင့်သည်။ သူတို့သည် သတင်းကောင်းကြေညာသူများအဖြစ် အရည်အချင်းပြည့်မီရန်ကြိုးစားနေသည့် လူသစ်များနှင့်တွေ့ဆုံသောအခါ အသုံးပြုခဲ့သည့်လုပ်ထုံးလုပ်နည်းအတိုင်း လုပ်ဆောင်မည်ဖြစ်သည်။ (နိုဝင်ဘာ ၁၅၊ ၁၉၈၉၊ ကင်းမျှော်စင်၊ စာမျက်နှာ ၁၆-၇ ရှု။) မလှုပ်ရှားသူ၌ အခြားသူများအား သတင်းကောင်းဝေမျှလိုသည့် ထက်သန်သောဆန္ဒရှိသင့်သည်။ သူသည် ကျွန်ုပ်တို့၏ဓမ္မအမှု စာအုပ်စာမျက်နှာ ၉၉-၁၀၀ တွင်ဖော်ပြထားသည့် အခြေခံတောင်းဆိုချက်များကို ပြည့်မီရန်နှင့် အသင်းတော်အစည်းအဝေးများပုံမှန်တက်ရန်လည်းလိုသည်။

ဝိညာဉ်ရေးလုပ်ရိုးလုပ်စဉ်ကောင်းတစ်ခုရှိခြင်းက ပြန်လှည့်လာသူအား ယေဟောဝါနှင့် သူ၏တန်ဖိုးရှိဆက်ဆံရေး ခိုင်မြဲတည်တံ့စေရန်နှင့် ထာဝရအသက်လမ်းပေါ် ဆက်လျှောက်လှမ်းနေစေရန် အကူအညီများစွာဖြစ်စေပါလိမ့်မည်။ (မ. ၇:၁၄; ဟေဗြဲ ၁၀:၂၃-၂၅) သူ၏ “အစွမ်းကုန်ကြိုးစား” ခြင်းနှင့် တည်မြဲသည့်ခရစ်ယာန်အရည်အသွေးများကို တိုးပွားစေခြင်းတို့သည် သူ့အား “မလှုပ်မရှား၊ အသီးမသီးခြင်း” အဖြစ်မျိုးထပ်မဖြစ်စေရန် တားဆီးပေးပါလိမ့်မည်။—၂ ပေ. ၁:၅-၈၊ ကဘ။