လူထုကင်းမျှော်စင်၏ အပိုင်းအားလုံးကို သင်အသုံးပြုနေပါသလော

^၁ “လယ်ကွင်းမှာအသုံးပြုဖို့ ကျွန်မ မစောင့်နိုင်တော့ဘူး!” ဇန်နဝါရီ ၁၊ ၂၀၀၈ ကင်းမျှော်စင်ကို ဖတ်ပြီးနောက် ညီအစ်မတစ်ဦးက ရေးသားခဲ့ခြင်းဖြစ်သည်။ လူထုစာစောင်တွင် ပုံမှန်ပါဝင်သည့်အပိုင်းအချို့ကို သင်သုံးသပ်ဖူးသလော၊ သင်၏လယ်ကွင်းဓမ္မအမှုတွင် ယင်းတို့ကို ကောင်းစွာအသုံးပြုရန် နည်းလမ်းများ သင်ရှာတွေ့ထားပါသလော။

^၂ “ယေရှုထံမှ ကျွန်ုပ်တို့သင်ယူရရှိရာ”– ကျမ်းစာသင်အံမှုများစတင်ရာတွင် အကူအညီဖြစ်စေသည့် ဤအပိုင်းကို သင်တွေ့ရှိထားပေမည်။ အကယ်၍ သင်မတွေ့ရှိသေးပါက အိမ်ရှင်အား ဆောင်းပါး၏ခေါင်းစဉ်ကိုဖတ်ပြရန် ကြိုးစားပါ၊ ထို့နောက် ပထမစာပိုဒ်တွင် ဖော်ပြထားသည့် အကြောင်းအရာနှင့်ပတ်သက်၍ ယေရှု အဘယ်အရာပြောဆိုခဲ့သည်ကို အိမ်ရှင်အားပြပါ။ အစပိုင်းတွင် စိတ်ဝင်စားမှုပြသောအခါ စဉ်းစားစရာမေးခွန်းများအဖြစ် ဖော်ပြထားသော ခေါင်းစဉ်ငယ်များကို အသုံးပြု၍ ဆက်လက်ဆွေးနွေးရန် ကြိုးစားပါ။ မေးခွန်းနှင့်ပတ်သက်၍ မှတ်ချက်ပေးရန် အိမ်ရှင်အားဖိတ်ခေါ်ပါ။ ဆက်စပ်သော မည်သည့်ရုပ်ပုံကိုမဆို အကျဉ်းချုပ်ရှင်းပြပြီး နောက်တစ်ပိုဒ်သို့ကူးပါ။ သင်သည် ပထမဦးဆုံးတွေ့ဆုံချိန်တွင် ဆောင်းပါး၏ ပထမပိုင်းကို ခြုံငုံမိနိုင်မည်ဖြစ်ကာ နောက်တစ်ကြိမ် သင်ပြန်သွားသောအခါ ဒုတိယပိုင်းကို ဆွေးနွေးပါ။ သမ္မာကျမ်းစာသွန်သင်ရာစာအုပ်ဖြင့် ဆက်လက်လေ့လာရန် ကြိုတင်ပြင်ဆင်ပါ။

^၃ “မိသားစုပျော်ရွှင်မှုအတွက်သော့ချက်များ”– သုံးလတစ်ကြိမ် ထည့်သွင်းဖော်ပြထားသော ဤအခန်းဆက်ဆောင်းပါးသည် မိသားစုငြိမ်သက်မှုအား ခြိမ်းခြောက်နေသည့် ပြဿနာများကို ကိုင်တွယ်ဖြေရှင်းသောအခါ ကျမ်းစာမူများအား မည်သို့လက်တွေ့ကျင့်သုံးနိုင်ပုံကို လင်ယောက်ျားများ၊ ဇနီးသည်များနှင့် မိဘများ နားလည်သဘောပေါက်စေရန် ရည်ရွယ်သည်။ ထို့ပြင်သမ္မာကျမ်းစာတွင် တွေ့ရှိရသော ဉာဏ်ပညာကို သက်သေခံမဟုတ်သူများ နားလည်သဘောပေါက်စေရန် ယင်းဆောင်းပါးများကို သင်အသုံးပြုနိုင်ပါသည်။​—၂ တိ. ၃:၁၆၊ ၁၇။

^၄ လူငယ်များအတွက်ကဏ္ဍများ– “လူငယ်စာရှုသူများအတွက်” အခန်းဆက်ဆောင်းပါးသည် စာရှုသူအား သတ်သတ်မှတ်မှတ် ကျမ်းစာမှတ်တမ်းတစ်ခုကို စူးစမ်းလေ့လာရာတွင် အသုံးပြုနိုင်ရန် စီစဉ်ထားသည့် အပိုင်းဖြစ်သည်။ ဓမ္မအမှုတွင် သင်တွေ့ဆုံရသည့်လူငယ်များအား ဘုရားသခင့်နှုတ်ကပါဌ်တော်လေ့လာခြင်း၏ လက်တွေ့ကျတန်ဖိုးကို သိမြင်စေရန် ယင်းဆောင်းပါးများကို အသုံးပြုနိုင်ပါသည်။ (ဆာ. ၁၁၉:​၉၊ ၁၀၅) မိဘများနှင့်စကားပြောဆိုသောအခါ တစ်လခြား ပါဝင်သော “သားသမီးတို့ကို သွန်သင်လော့” အခန်းဆက်ဆောင်းပါးကို ပြသနိုင်ပေမည်။ ယင်းဆောင်းပါးများက လူငယ်လေးများကို ကျမ်းစာဇာတ်ကောင်များမှ အရေးကြီးသင်ခန်းစာများသင်ယူရန် ကူညီပေးနိုင်သည်။ ယင်းဆောင်းပါးများကို သင့်သားသမီးများနှင့်အတူဖတ်ရန် အခွင့်အရေးယူပြီးပြီလော။

^၅ အခြားကဏ္ဍများ– လစဉ် “စာရှုသူများအမေး” ကဏ္ဍသည် သက်သေခံမဟုတ်သူများမေးနိုင်သည့် မေးခွန်းတစ်ခုကို ဆင်ခြင်သုံးသပ်သည်။ သင်သည် တစ်အိမ်မှတစ်အိမ် မဂ္ဂဇင်းများဝေငှသောအခါ ယင်းဆောင်းပါးကို ပြသနိုင်သည်။ “. . . မှစာ” ကဏ္ဍသည် မိမိတို့၏ဓမ္မအမှုကိုဆောင်ရွက်နေစဉ် သာသနာပြုများနှင့် အခြားသူများ ရင်ဆိုင်ရသည့် စိန်ခေါ်ချက်များကို ဖော်ပြသည့် ထူးခြားသော ကိုယ်တွေ့မှတ်တမ်းတစ်ခုဖြစ်သည်။ ယင်းဆောင်းပါးများသည် ခရစ်တော်ရောက်ရှိနေခြင်း နိမိတ်ပြည့်စုံသည့်အနေဖြင့် သတင်းကောင်းကို ကမ္ဘာတစ်ခွင် ဟောပြောလျက်နေကြကြောင်း စိတ်ဝင်စားသူများ သိမြင်နားလည်စေရန် ကူညီပေးနိုင်ပါသည်။​—မ. ၂၄:​၃၊ ၁၄။

^၆ သီအိုကရက်တစ်ဓမ္မအမှုကျောင်း၏ ကျမ်းစာဖတ်ရှုခြင်းအပေါ်အခြေခံသည့် “ဘုရားသခင်၌ ချဉ်းကပ်ကြလော့” ဟူသောလစဉ်ကဏ္ဍသည် ယေဟောဝါအကြောင်း ပိုမိုလေ့လာသင်ယူလိုသည့် စိတ်ရင်းမှန်သူများအား လှုံ့ဆော်ပေးပေမည်။ တစ်နှစ်လျှင် လေးကြိမ်ပါဝင်သော “သူတို့၏ယုံကြည်ခြင်းကို တုပကြလော့” ဟူသည့်အခန်းဆက်ဆောင်းပါးများသည် ခေတ်သစ်စာရှုသူများအတွက် ကျမ်းစာဇာတ်ကောင်များ၏ ရွေးချယ်မှုများ၊ ၎င်းတို့ရင်ဆိုင်ရသောစိန်ခေါ်ချက်များ၊ ၎င်းတို့၏ယုံကြည်ချက်များကို အသက်ဝင်အောင်ပြုလုပ်ပေး၍ ကျမ်းစာမှတ်တမ်းများကို စိတ်တွင်မြင်ယောင်စေရန် ပုံစံပြုထားပါသည်။

^၇ လယ်ကွင်းတွင် အသုံးပြုရန်ရည်ရွယ်ထားသော ကင်းမျှော်စင်တစ်စောင်လုံးကို ကျွန်ုပ်တို့ လစဉ်ရရှိနေခြင်းသည် အလွန်အားရဝမ်းမြောက်စရာပါတကား! ထို့ကြောင့် ကျွန်ုပ်တို့သည် ယင်းတွင်ပါဝင်ရာများကို အကျွမ်းတဝင်ရှိထားပြီး ဓမ္မအမှုတွင် အပြည့်အဝ အသုံးပြုကြပါစို့။