ယေဟောဝါသက်သေများ—သတင်းကောင်းဟောပြောရန် ဖွဲ့စည်းထားခြင်း
သတင်းကောင်းကိုကြေညာဖို့ ယေဟောဝါသက်သေတွေကို ဖွဲ့စည်းခဲ့တာ အနှစ် ၁၀၀ ကျော်ခဲ့ပါပြီ။ ဟောပြောခြင်းလုပ်ငန်းကို တစ်ခါနဲ့မှမတူအောင် အကြီးအကျယ်လုပ်ဆောင်နေပါတယ်၊ ရာနဲချီတဲ့ဘာသာစကားတွေနဲ့ နိုင်ငံနဲ့နယ်မြေပေါင်း ၂၃၀ ကျော်မှာ ဒီသတင်းတရားကို ဟောပြောနေကြတယ်။ (မ. ၂၄:၁၄) ဒီလုပ်ငန်း ဘာကြောင့် လိုအပ်ရတာလဲ။ ဘယ်လိုလုပ်ပြီး ကမ္ဘာချီအတိုင်းအတာနဲ့ ပြီးမြောက်နေတာလဲ။ ယေဟောဝါသက်သေများ—သတင်းကောင်းဟောပြောရန်ဖွဲ့စည်းထားခြင်း ဗီဒီယိုက ကျွန်ုပ်တို့ရဲ့ ကမ္ဘာတစ်ဝန်းက လုပ်ဆောင်မှုတွေကို အသေးစိတ်ဖော်ပြသွားတဲ့အခါ အဲဒီမေးခွန်းတွေရဲ့အဖြေကို သိရပါလိမ့်မယ်။ ဗီဒီယိုကြည့်ပြီးနောက် ဒီမေးခွန်းတွေကို ဖြေဆိုကြည့်ပါ။
ဒီဗီဒီယိုက အောက်ပါအချက်တွေကို ပိုနားလည်လာအောင်၊ ပိုလေးမြတ်လာအောင် သင့်ကို ဘယ်လိုကူညီပေးသလဲ– (၁) သတင်းကောင်းကြေညာဖို့ ယေဟောဝါအဖွဲ့အစည်းရဲ့ ကြိုးစားအားထုတ်မှု။ (၂ တိ. ၄:၂) (၂) ကမ္ဘာတစ်ဝန်းက ဗေသလမိသားစုဝင်တွေအကြောင်း။ (၃) သာသနာပြုတွေနဲ့ ကြီးကြပ်မှူးတွေကို လေ့ကျင့်ပေးနေတဲ့ သင်တန်းတွေအကြောင်း။ (၂ တိ. ၂:၂) (၄) နေ့တစ်နေ့ကို နေ့စဉ်ကျမ်းချက်သုံးသပ်ခြင်းနဲ့စတင်ဖို့၊ အသင်းတော်စည်းဝေးတွေအတွက် ပြင်ဆင်ဖို့ အရေးကြီးရတဲ့အကြောင်း။ (တ. ၁၇:၁၁) (၅) အစည်းအဝေးတွေကိုတက်ရောက်ခြင်းအားဖြင့် ရရှိတဲ့အကျိုးကျေးဇူး။ (ဟေဗြဲ ၁၀:၂၄၊ ၂၅) (၆) ကမ္ဘာပေါ်မှာ ပရဒိသုပြန်ဖြစ်လာတဲ့အခါ သင်ရရှိမယ့် ကောင်းချီးတွေအကြောင်း။ (ဟေရှာ. ၁၁:၉) (၇) လုပ်ဆောင်နေတဲ့ ရိတ်သိမ်းခြင်းလုပ်ငန်းမှာ ပါဝင်ခွင့်ဆိုတဲ့ သင်ရရှိထားတဲ့အခွင့်ထူးအကြောင်း။—ယော. ၄:၃၅။
ဒီဗီဒီယိုဟာ စိတ်ဝင်စားသူတွေကို ယေဟောဝါသက်သေတွေလုပ်ဆောင်နေတဲ့ ကမ္ဘာချီလုပ်ငန်းနဲ့ မိတ်ဆက်ပေးတဲ့ ကောင်းမွန်လှတဲ့ ကိရိယာတစ်ခုဖြစ်တယ်။ (၈) ကျမ်းစာသင်သားတွေ၊ ဆွေမျိုးတွေနဲ့ တခြားသူတွေကို ဘယ်အချိန်မှာ ဒီဗီဒီယိုပြရင် ကောင်းမလဲ။ (၉) ဒီဗီဒီယိုပြတဲ့အတွက် ရရှိဖူးတဲ့ ရလဒ်ကောင်းတွေကို ပြောပြပါ။
ယေဟောဝါပြီးမြောက်စေတဲ့အရာတွေကို စဉ်းစားကြည့်တဲ့အခါ ဆာလံဆရာရဲ့ဒီခံစားချက်တွေဟာ ကျွန်ုပ်တို့ဆီ ကူးစက်လာပါတယ်– “အကျွန်ုပ်၏ဘုရားသခင်ထာဝရဘုရား အကျွန်ုပ်တို့အဖို့ပြုတော်မူသော အံ့သြဖွယ်အမှုတို့နှင့် ကြံစည်တော်မူသောအကြံအစည်တို့သည် များလှပါ၏။ ရှေ့တော်၌ အစဉ်အတိုင်းလျှောက်၍မကုန်နိုင်ပါ။” (ဆာလံ ၄၀:၅) ယေဟောဝါနဲ့ ကိုယ်တော့်အဖွဲ့အစည်းကို တခြားသူတွေ နားလည်လာအောင်၊ လေးမြတ်လာအောင် ဒီဗီဒီယိုကို ကောင်းစွာအသုံးပြုနိုင်ကြပါစေ။