အချင်းချင်း ချစ်မြဲ ချစ်ပါ

၁-၂။ (က) “ချစ်ခြင်းမေတ္တာဟာ အမြတ်ဆုံးပဲ” လို့ တမန်တော် ပေါလု ဘာကြောင့် ပြောသလဲ။ (ခ) ဘာမေးခွန်းတွေ ဆွေးနွေးကြမလဲ။

ယုံကြည်ခြင်း၊ မျှော်လင့်ခြင်း၊ ချစ်ခြင်းမေတ္တာဆိုတဲ့ အရည်အသွေး သုံးမျိုးထဲမှာ “ချစ်ခြင်းမေတ္တာဟာ အမြတ်ဆုံးပဲ” လို့ တမန်တော် ပေါလု ပြောတယ်။ (၁ ကော. ၁၃:၁၃) ဘာကြောင့်လဲ။ မျှော်လင့်နေတဲ့ ကမ္ဘာသစ် ကတိအားလုံး အနာဂတ်မှာ ပြည့်စုံသွားတဲ့အခါ မျှော်နေစရာ၊ ယုံနေစရာ မလိုတော့ဘူး။ ယေဟောဝါနဲ့ လူလူချင်းကိုတော့ အမြဲ ချစ်နေရမှာ။ ချစ်သည်ထက် ချစ်နေရမှာ။

^၂ အမြဲ ချစ်ရမှာဆိုတော့ မေးခွန်း သုံးခု ဆွေးနွေးကြရအောင်။ ပထမ၊ ဘာကြောင့် ချစ်ရမလဲ။ ဒုတိယ၊ ဘယ်လို ချစ်ရမလဲ။ တတိယ၊ ဘယ်လို ချစ်မြဲ ချစ်နိုင်မလဲ။

ဘာကြောင့် ချစ်ရမလဲ

၃။ အချင်းချင်း ဘာကြောင့် ချစ်ရမလဲ။

^၃ အချင်းချင်း ဘာကြောင့် ချစ်ရမလဲ။ အကြောင်းရင်းတစ်ခုက ခရစ်ယာန်စစ်တွေကို ခွဲခြားသိစေလို့ပဲ။ “အချင်းချင်း ချစ်မယ်ဆိုရင် ခင်ဗျားတို့ဟာ ကျွန်တော့်တပည့်တွေပဲဆိုတာ လူတွေ သိလိမ့်မယ်” လို့ တမန်တော်တွေကို ယေရှု ပြောတယ်။ (ယော. ၁၃:၃၅) ဒါ့အပြင် ချစ်ခြင်းမေတ္တာက စည်းလုံးစေတယ်။ “စည်းလုံးခြင်းအတွက် ခိုင်မြဲတဲ့ နှောင်ကြိုး” လို့ ပေါလု ခေါ်ထားတယ်။ (ကော. ၃:၁၄) အချင်းချင်း ချစ်သင့်တဲ့ နောက်ထပ် အရေးကြီး အကြောင်းရင်းကတော့ ဘုရားကို ချစ်ရာ ရောက်လို့ပဲ။ “ဘုရားသခင်ကို ချစ်ရင် ညီအစ်ကိုကိုလည်း ချစ်ရမယ်” လို့ တမန်တော် ယောဟန် ပြောတယ်။—၁ ယော. ၄:၂၁။

၄-၅။ ဘုရားကို ချစ်တာနဲ့ အချင်းချင်းကို ချစ်တာ ဘယ်လို ဆက်စပ်သလဲ။ ဥပမာပေးပါ။

^၄ ဘုရားကို ချစ်တာနဲ့ ညီအစ်ကို/မတွေကို ချစ်တာ ဘယ်လို ဆက်စပ်သလဲ။ နှလုံးနဲ့ တခြားကိုယ်အင်္ဂါတွေ ဘယ်လို ဆက်နွှယ်နေသလဲ စဉ်းစားကြည့်ပါ။ လက်ကောက်ဝတ် သွေးခုန်နှုန်း စမ်းကြည့်ရုံနဲ့ နှလုံးအခြေအနေကို ဆရာဝန် သိတယ်။ ဒီကနေ ဘာသိနိုင်သလဲ။

^၅ သွေးခုန်နှုန်း စမ်းပြီး နှလုံးအခြေအနေ ဆရာဝန် သိသလို ညီအစ်ကို/မတွေကို ဘယ်လောက် ချစ်သလဲဆိုတာ ကြည့်ပြီး ဘုရားကို ဘယ်လောက် ချစ်သလဲ ခန့်မှန်းနိုင်တယ်။ ညီအစ်ကို/မတွေကို ချစ်တဲ့ မေတ္တာ လျော့လာတာ ဘုရားကို ချစ်တဲ့ မေတ္တာ လျော့လာတဲ့ လက္ခဏာပဲ။ ညီအစ်ကို/မတွေကို ချစ်မြဲ ချစ်တာဟာ ဘုရားကို ချစ်တဲ့ မေတ္တာ ခိုင်မြဲနေတဲ့ လက္ခဏာပဲ။

၆။ ညီအစ်ကို/မတွေကို သိပ်မချစ်တော့ဘူးဆိုရင် ဘာကြောင့် အန္တရာယ် ရှိသလဲ။ (၁ ယောဟန် ၄:၇-၉၊ ၁၁)

^၆ ညီအစ်ကို/မတွေကို သိပ်မချစ်တော့ဘူးဆိုရင် အန္တရာယ် ရှိတယ်။ ယေဟောဝါနဲ့ ကျွန်တော်တို့ ဆက်ဆံရေး အားနည်းနေပြီဆိုတာ ပြလို့ပဲ။ “မြင်နေရတဲ့ ညီအစ်ကိုကို မချစ်ရင် မမြင်ရတဲ့ ဘုရားသခင်ကို မချစ်နိုင်ဘူး” လို့ တမန်တော် ယောဟန် ပြောတယ်။ (၁ ယော. ၄:၂၀) ဘာသိရသလဲ။ “အချင်းချင်း ချစ်” မှ ကျွန်တော်တို့ကို ယေဟောဝါ နှစ်သက်လက်ခံမှာ။—၁ ယောဟန် ၄:၇-၉၊ ၁၁ ကို ဖတ်ပါ။

ဘယ်လို ချစ်ရမလဲ

၇-၈။ အချင်းချင်း ချစ်ကြောင်း ဘယ်လို ပြရမလဲ။

^၇ “အချင်းချင်း ချစ်” ဖို့ ကျမ်းစာမှာ ထပ်ခါထပ်ခါ ပြောထားတယ်။ (ယော. ၁၅:၁၂၊ ၁၇။ ရော. ၁၃:၈။ ၁ သက်. ၄:၉။ ၁ ပေ. ၁:၂၂။ ၁ ယော. ၄:၁၁) ဒါပေမဲ့ ချစ်ခြင်းမေတ္တာဟာ ခံစားချက် ဖြစ်လို့ မမြင်နိုင်ဘူး။ ဒါဆိုရင် အချင်းချင်း ချစ်တယ်ဆိုတာ ဘယ်လို မြင်သာစေနိုင်မလဲ။ အပြောအဆို၊ လုပ်ရပ်အားဖြင့်ပါ။

^၈ ချစ်ကြောင်း ပြနိုင်တဲ့နည်း အများကြီး ရှိတယ်။ ကျမ်းစာမှာ ဘယ်နည်းတွေ ဖော်ပြထားသလဲ။ “အချင်းချင်း မှန်သောစကားကိုပဲ ပြောကြပါ။” (ဇာ. ၈:၁၆) ‘အချင်းချင်း သင့်သင့်မြတ်မြတ် နေကြပါ။’ (မာ. ၉:၅၀) “ကိုယ်တိုင် အစပြုပြီး အချင်းချင်းကို ဂုဏ်တင်ပါ။” (ရော. ၁၂:၁၀) “အချင်းချင်းကို ကြိုဆိုလက်ခံကြပါ။” (ရော. ၁၅:၇) ‘အချင်းချင်း ခွင့်လွှတ်ကြပါ။’ (ကော. ၃:၁၃) “အချင်းချင်းရဲ့ ဝန်တွေကို ကူထမ်းပေးကြပါ။” (ဂလ. ၆:၂) “အချင်းချင်း ဆက်ပြီး နှစ်သိမ့်အားပေးနေကြပါ။” (၁ သက်. ၅:၁၁) “အချင်းချင်းအတွက် ဆုတောင်းပေးကြပါ။”—ယာ. ၅:၁၆။

၉။ နှစ်သိမ့်ပေးတာဟာ ဘာကြောင့် ချစ်ကြောင်း ပြတဲ့ အရေးကြီး နည်းတစ်နည်း ဖြစ်သလဲ။ (ရုပ်ပုံကိုလည်း ကြည့်ပါ။)

^၉ ရှေ့စာပိုဒ်မှာ ပါတဲ့ ချစ်ကြောင်း ပြနိုင်တဲ့ နည်းတစ်နည်း သုံးသပ်ကြရအောင်။ “အချင်းချင်း ဆက်ပြီး နှစ်သိမ့်အားပေးနေကြပါ” လို့ ပေါလု ပြောတယ်။ နှစ်သိမ့်ပေးတာ ဘာကြောင့် ချစ်ကြောင်း ပြတဲ့ အရေးကြီး နည်းတစ်နည်း ဖြစ်သလဲ။ အကိုးအကားစာအုပ် တစ်အုပ်အရ ပေါလု သုံးတဲ့ “နှစ်သိမ့်” ဆိုတဲ့ စကားလုံးဟာ “သောကရောက်နေသူ ဘေးမှာ ရပ်ပြီး အားပေးတယ်” လို့ အဓိပ္ပာယ် ရတယ်။ ဒါကြောင့် သောကရောက်နေတဲ့ ညီအစ်ကို/မကို နှစ်သိမ့်ပေးတာဟာ အသက်လမ်းမှာ ဆက်လျှောက်နိုင်အောင် ထူမပေး၊ ဖေးမပေးတာမို့ ချစ်ရာ ရောက်တယ်။—၂ ကော. ၇:၆၊ ၇၊ ၁၃။

၁၀။ ကရုဏာ ထားတာနဲ့ နှစ်သိမ့်ပေးတာ ဘယ်လို ဆက်စပ်သလဲ။

^၁၀ ကရုဏာ ထားတာနဲ့ နှစ်သိမ့်ပေးတာ ဆက်စပ်နေတယ်။ ကရုဏာ ရှိသူဟာ တခြားသူတွေကို နှစ်သိမ့်ပေးချင်တယ်။ ဒုက္ခ လျော့အောင် လုပ်ပေးချင်တယ်။ လူတွေကို ယေဟောဝါ ကရုဏာ ရှိလို့ နှစ်သိမ့်ပေးတာ ဖြစ်ကြောင်း ပေါလု ရှင်းပြတယ်။ ယေဟောဝါကို “ကရုဏာကြီးတဲ့ အဖ၊ နှစ်သိမ့်ခြင်းအမျိုးမျိုးရဲ့ အရှင်” လို့ ခေါ်ထားတယ်။ (၂ ကော. ၁:၃) ကရုဏာ အထားနိုင်ဆုံး ပုဂ္ဂိုလ် ဖြစ်လို့ ကရုဏာရဲ့ ရင်းမြစ်၊ ကရုဏာကြီးတဲ့ အဖလို့ ခေါ်တာ။ ကရုဏာ ရှိလို့လည်း ကျွန်တော်တို့ “ဆင်းရဲဒုက္ခအမျိုးမျိုး ခံရတဲ့အခါ” နှစ်သိမ့်ပေးတာ။ (၂ ကော. ၁:၄) စမ်းရေ အေးအေးလေးက ရေငတ်သူကို လန်းဆန်းစေသလို သောကရောက်သူကို ယေဟောဝါ လန်းဆန်းစေတယ်။ နှစ်သိမ့်ပေးတယ်။ ယေဟောဝါကို အတုယူပြီး တခြားသူတွေကို ဘယ်လို ကရုဏာထား နှစ်သိမ့်ပေးနိုင်မလဲ။ တစ်နည်းကတော့ ကရုဏာ ထားတတ်ဖို့၊ နှစ်သိမ့်ပေးတတ်ဖို့ ကူညီပေးတဲ့ အရည်အသွေးတွေ ရှိလာအောင် ကြိုးစားခြင်းပါ။ ဘာအရည်အသွေးတွေလဲ။

၁၁။ ကောလောသဲ ၃:၁၂ နဲ့ ၁ ပေတရု ၃:၈ အရ တခြားသူတွေကို ချစ်မြဲ ချစ်ဖို့၊ နှစ်သိမ့်ပေးဖို့ ဘာအရည်အသွေးတွေ လိုသေးသလဲ။

^၁၁ တစ်ရက်ပြီး တစ်ရက် ညီအစ်ကို/မတွေကို ချစ်မြဲ ချစ်ဖို့၊ “ဆက်ပြီး နှစ်သိမ့်အားပေး” ဖို့ ဘာက ကူညီပေးမလဲ။ ကိုယ်ချင်းစာခြင်း၊ ညီရင်းအစ်ကို မေတ္တာနဲ့ ချစ်ခင်ခြင်း၊ ကြင်နာခြင်းစတဲ့ အရည်အသွေးတွေပါ။ (ကောလောသဲ ၃:၁၂။ ၁ ပေတရု ၃:၈ တို့ကို ဖတ်ပါ။) ဒီအရည်အသွေးတွေက ဘယ်လို ကူညီပေးသလဲ။ “စိတ်ထဲ ရှိတာတွေပဲ နှုတ်က ထွက်တတ်တယ်။ လူကောင်းတစ်ယောက်ဟာ စိတ်ထဲမှာ ကောင်းတာတွေ ပြည့်နေလို့ ကောင်းတာတွေပဲ ပြောတတ်တယ်” လို့ ယေရှု ပြောတယ်။ (မ. ၁၂:၃၄၊ ၃၅) ဒါကြောင့် စိတ်ထဲမှာသာ ကရုဏာနဲ့ တခြားဆက်စပ် အရည်အသွေးတွေ ပြည့်နေရင် သောကရောက်သူကို နှစ်သိမ့်မပေးဘဲ မနေနိုင်တော့ဘူး။ နှစ်သိမ့်အားပေးတာဟာ ချစ်ကြောင်း ပြတဲ့ နည်းတစ်နည်းပါပဲ။

ဘယ်လို ချစ်မြဲ ချစ်နိုင်မလဲ

၁၂။ (က) ဘာသတိထားရမလဲ။ (ခ) ဘာမေးခွန်း ဆွေးနွေးကြမလဲ။

^၁၂ ကျွန်တော်တို့အားလုံး “အချင်းချင်း ချစ်မြဲ ချစ်” ချင်ကြတယ်။ (၁ ယော. ၄:၇) ဒါပေမဲ့ ‘အတော်များများ မေတ္တာတရား ခေါင်းပါးလာမယ်’ လို့ ယေရှု သတိပေးထားတယ်။ (မ. ၂၄:၁၂) တပည့် တော်တော်များများ မေတ္တာ ခေါင်းပါးလာမယ်လို့ ပြောနေတာ မဟုတ်ဘူး။ ဒါပေမဲ့ ဒီလောကရဲ့ မေတ္တာ ခေါင်းပါးတဲ့ သဘောထား ကူးစက်မလာအောင် သတိထားရမယ်။ ဒါဆိုရင် ညီအစ်ကို/မတွေကို ချစ်မြဲ ချစ်နေမနေ စမ်းလို့ ရတဲ့ နည်း ရှိသလား။

၁၃။ ညီအစ်ကို/မတစ်ယောက်ကို ချစ်မြဲ ချစ်နေမနေ ဘယ်အချိန်မှာ ပေါ်မလဲ။

^၁၃ တစ်နည်းကတော့ အခြေအနေတချို့မှာ ကျွန်တော်တို့ ဘယ်လို တုံ့ပြန်သလဲ ဆန်းစစ်ခြင်းပါ။ (၂ ကော. ၈:၈) “အရေးကြီးဆုံးကတော့ အချင်းချင်း နှစ်နှစ်ကာကာ ချစ်ကြပါ။ ချစ်ခြင်းမေတ္တာ ရှိသူဟာ ခွင့်လွှတ်ဖို့ အမြဲ အသင့်ရှိတယ်” ဆိုပြီး အခြေအနေတစ်ခုကို တမန်တော် ပေတရု ပြောပြတယ်။ (၁ ပေ. ၄:၈) ညီအစ်ကို/မတစ်ယောက် ကိုယ့်အပေါ် အမှားလုပ်တဲ့အခါ၊ စိတ်ထိခိုက်အောင် လုပ်တဲ့အခါ သူ့ကို ချစ်မြဲ ချစ်နေမနေ ကိုယ့်တုံ့ပြန်ပုံမှာ ပေါ်တယ်။

၁၄။ ၁ ပေတရု ၄:၈ အရ ဘယ်လို ချစ်ရမလဲ။ ဥပမာ ပေးပါ။

^၁၄ ပေတရုစကားတွေကို သေသေချာချာ ဆန်းစစ်ကြည့်ရအောင်။ အခန်းငယ် ၈ ပထမပိုင်းမှာ ဘယ်လို ချစ်ဖို့ ပြောသလဲ။ “နှစ်နှစ်ကာကာ ချစ်” ပါတဲ့။ ပေတရု သုံးတဲ့ “နှစ်နှစ်ကာကာ” ဆိုတဲ့ စကားလုံးဟာ “ဆွဲဆန့်” လို့ အဓိပ္ပာယ် ရတယ်။ နှစ်နှစ်ကာကာ ချစ်ရင် ဘာလုပ်မယ်လို့ ဆက်ပြောသလဲ။ ခွင့်လွှတ်မယ်လို့ ပြောတယ်။ မူရင်းကျမ်းမှာ ဖုံးအုပ်တယ်လို့ သုံးထားတယ်။ အစွန်းအထင်း၊ ခြစ်ရာ အပြည့်နဲ့ စားပွဲတစ်လုံးကို မြင်ယောင်ကြည့်ပါ။ ဆွဲသားပိတ်စသာ ရှိရင် အစွန်းအထင်း တစ်ခု၊ နှစ်ခုလောက် မဟုတ်ဘဲ အစွန်းအထင်းအားလုံး လုံအောင် ဆွဲဖုံးလိုက်လို့ ရတယ်။ အဲဒီလိုပဲ၊ ညီအစ်ကို/မတွေကို နှစ်နှစ်ကာကာ ချစ်ရင် အမှားတစ်ခု၊ နှစ်ခုလောက် မဟုတ်ဘဲ အမှားအားလုံး ဖုံးလိုက်နိုင်၊ ခွင့်လွှတ်လိုက်နိုင်တယ်။

၁၅။ ချစ်ခြင်းမေတ္တာ ခိုင်မြဲနေရင် ဘာလုပ်နိုင်မလဲ။ (ကောလောသဲ ၃:၁၃)

^၁၅ ခွင့်လွှတ်ဖို့ ခက်ရင်တောင် ခွင့်လွှတ်နိုင်တဲ့အထိ ချစ်ခြင်းမေတ္တာ ခိုင်မြဲသင့်တယ်။ (ကောလောသဲ ၃:၁၃ ကို ဖတ်ပါ။) တခြားသူတွေကို ခွင့်လွှတ်တာဟာ ချစ်ခြင်းမေတ္တာ ခိုင်မြဲကြောင်း၊ ဘုရားစိတ်တော်နဲ့ တွေ့ချင်ကြောင်း သက်သေပဲ။ ခွင့်လွှတ်ဖို့၊ ဆတ်ဆတ်ထိမခံ မဖြစ်ဖို့ ဘာက ကူညီပေးနိုင်သေးသလဲ။

၁၆-၁၇။ တခြားသူတွေရဲ့ အသေးအဖွဲ အမှားတွေကို ဗွေမယူဖို့ ဘာက ကူညီပေးဦးမလဲ။ ဥပမာ ပေးပါ။ (ရုပ်ပုံကိုလည်း ကြည့်ပါ။)

^၁၆ ညီအစ်ကို/မတွေရဲ့ အားနည်းချက် မဟုတ်ဘဲ ကောင်းကွက်ကို အာရုံစိုက်ပါ။ ပျော်စရာ ပေါင်းသင်းမှုအပြီး ဓာတ်ပုံ စုရိုက်တယ်လို့ မြင်ယောင်ကြည့်ပါ။ ပထမတစ်ပုံ ပုံထွက် မကောင်းမှာ စိုးလို့ နောက်နှစ်ပုံ ထပ်ရိုက်တယ်။ ဓာတ်ပုံ သုံးပုံ ရှိသွားပြီ။ တစ်ပုံမှာ ညီအစ်ကိုတစ်ယောက် မျက်နှာမဲ့နေတယ်။ ဘာလုပ်မလဲ။ အဲဒီညီအစ်ကိုကော ပုံထဲမှာ ပါသမျှ လူတွေ ပြုံးနေတဲ့ နောက်ထပ် နှစ်ပုံ ရှိတာပဲ။ မလှတဲ့ ပုံ ဖျက်လိုက်မှာပေါ့။

^၁၇ ကိုယ့်မှတ်ဉာဏ်ထဲ ဘယ်အမှတ်တရတွေ သိမ်းထားမလဲဆိုတာ ဘယ်ဓာတ်ပုံ သိမ်းထားမလဲဆိုတာနဲ့ တူတယ်။ ကျွန်တော်တို့မှာ ညီအစ်ကို/မတွေနဲ့ အမှတ်တရကောင်းတွေ ရှိတယ်။ ညီအစ်ကို/မတစ်ယောက် ပြောလိုက်၊ လုပ်လိုက်တာကြောင့် စိတ်ထိခိုက်ရတဲ့အချိန်လည်း တစ်ခါတလေ ရှိနိုင်တယ်။ ဘာလုပ်မလဲ။ မလှတဲ့ ပုံ ဖျက်လိုက်သလို အဲဒီမှတ်ဉာဏ်ကို ကြိုးစားဖျောက်ဖျက်လိုက်ပါ။ (ပညာ. ၁၉:၁၁။ ဧ. ၄:၃၂) အမှတ်တရကောင်းတွေ ရှိနေတာပဲ။ ကောင်းတဲ့ အမှတ်တရတွေပဲ သိမ်းထား၊ တန်ဖိုးထားချင်တယ် မဟုတ်လား။ အသေးအဖွဲ အမှားတွေကို ဘာကြောင့် မှတ်ထားမှာလဲ။

အချင်းချင်း ချစ်ဖို့ အခုအချိန်မှာ ဘာကြောင့် အရေးကြီးသလဲ

၁၈။ ချစ်ခြင်းမေတ္တာနဲ့ပတ်သက်ပြီး ဘယ်အဓိက အချက်တွေ ဒီဆောင်းပါးမှာ ဆွေးနွေးခဲ့ကြသလဲ။

^၁၈ အချင်းချင်း ဘာကြောင့် ချစ်မြဲ ချစ်ချင်သလဲ။ ဆွေးနွေးခဲ့တဲ့အတိုင်း ညီအစ်ကို/မတွေကို ချစ်တာဟာ ယေဟောဝါကို ချစ်ရာ ရောက်လို့ပဲ။ ညီအစ်ကို/မတွေကို ချစ်ကြောင်း ဘယ်လို ပြကြမလဲ။ တစ်နည်းကတော့ ဆက်ပြီး နှစ်သိမ့်အားပေးခြင်းအားဖြင့်ပါ။ ကရုဏာသာ ရှိရင် “ဆက်ပြီး နှစ်သိမ့်အားပေး” နိုင်မယ်။ အချင်းချင်း ဘယ်လို ချစ်မြဲ ချစ်ရမလဲ။ အမှားတွေ ခွင့်လွှတ်ဖို့ အတတ်နိုင်ဆုံး ကြိုးစားခြင်းအားဖြင့်ပါ။

၁၉။ အထူးသဖြင့်၊ အခုအချိန်မှာ အချင်းချင်း ချစ်ဖို့ ဘာကြောင့် လိုသလဲ။

^၁၉ အချင်းချင်း ချစ်ဖို့ အခုအချိန်မှာ ဘာကြောင့် အရေးကြီးသလဲ။ “အရာခပ်သိမ်းရဲ့ အဆုံး ရောက်ခါနီးပြီ။ ဒါကြောင့် . . . အချင်းချင်း နှစ်နှစ်ကာကာ ချစ်ကြပါ” လို့ တမန်တော် ပေတရု ပြောတယ်။ (၁ ပေ. ၄:၇၊ ၈) ဒီဆိုးညစ်တဲ့ လောက အဆုံး နီးလာတာနဲ့အမျှ ဘာတွေ ဖြစ်လာမလဲ။ “လူတွေက ကျွန်တော့်နာမည်ကြောင့် ခင်ဗျားတို့ကို မုန်းလိမ့်မယ်” လို့ ယေရှု ကြိုပြောတယ်။ (မ. ၂၄:၉) အမုန်းဒဏ် ခံနိုင်ဖို့ဆိုရင် စည်းလုံးနေမှ ရမယ်။ “စည်းလုံးခြင်းအတွက် ခိုင်မြဲတဲ့ နှောင်ကြိုး” မေတ္တာနဲ့ ရစ်ပတ်ထားရင် ကျွန်တော်တို့ကို သွေးခွဲဖို့ စာတန် ကြံစည်သမျှ ရှုံးနိမ့်မှာ အသေအချာပဲ။—ကော. ၃:၁၄။ ဖိ. ၂:၁၊ ၂။