ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဖေဖော်ဝါရီ ၅–၁၁
ကျမ်းစာထဲက အဖိုးတန်ဘဏ္ဍာများ | မဿဲ ၁၂–၁၃
“ဂျုံပင်နဲ့ ပေါင်းပင် ပုံဥပမာ”
‘ငါသည်လည်း သင်တို့နှင့်အတူ အစဉ်မပြတ်ရှိသည်’
၂ ဒီပုံဥပမာမှာပါတဲ့ အဖြစ်အပျက်တွေက ယေရှုဟာ မိမိနဲ့အတူ နိုင်ငံတော်မှာ တွဲဖက်အုပ်ချုပ်မယ့် ဂျုံစပါးအတန်းအစားဖြစ်တဲ့ ဘိသိက်ခံခရစ်ယာန်တွေကို လူသားတွေထဲကနေ ဘယ်အချိန်မှာ ဘယ်လိုနည်းနဲ့ ရွေးချယ်မယ်ဆိုတာ ဖော်ပြတယ်။ ယေရှုဟာ အေဒီ ၃၃ ပင်တေကုတ္တေပွဲနေ့မှာ စတင်မျိုးစေ့ကြဲခဲ့တယ်။ ဒီလောကစနစ်ရဲ့ အဆုံးပိုင်းမှာ အသက်ရှင်နေတဲ့ ဘိသိက်ခံတွေ နောက်ဆုံးတံဆိပ်ခတ်ခြင်း ခံရပြီး ကောင်းကင်ကို ခေါ်ဆောင်သွားခံရချိန်မှာ ဂျုံစပါးစုသိမ်းခြင်း ပြီးဆုံးပါမယ်။ (မ. ၂၄:၃၁။ ဗျာ. ၇:၁-၄) လူတစ်ယောက်ဟာ တောင်တစ်လုံးရဲ့ ထိပ်ကနေ ပတ်ဝန်းကျင်ကို ကြည့်ရင် မြင်ကွင်းအားလုံးကို အပေါ်စီးကနေ မြင်ရသလိုပဲ ဒီပုံဥပမာက အနှစ် ၂,၀၀၀ ခန့်အတွင်းမှာ ဖြစ်ပျက်မယ့် အဖြစ်အပျက်အားလုံးကို မြင်တွေ့စေတယ်။ ပုံဥပမာမှာ မျိုးကြဲချိန်၊ ကြီးထွားချိန်နဲ့ စပါးရိတ်ချိန်အကြောင်း ဖော်ပြထားတယ်။ ဒီဆောင်းပါးမှာတော့ အဓိကအနေနဲ့ စပါးရိတ်ချိန်ကို ဖော်ပြပါမယ်။
ယေရှုရဲ့ ဂရုစိုက်မှုအောက်မှာ
၃ အေဒီ ၁၀၀ ခန့်မှာ ခရစ်ယာန် အတုအယောင်တွေဖြစ်တဲ့ ‘ပေါင်းပင်များ ပေါ်ထွက်လာ’ တယ်။ (မ. ၁၃:၂၆) အေဒီ ၃၀၀ ခန့်မှာ ပေါင်းပင်တွေနဲ့တူတဲ့ ခရစ်ယာန် အတုအယောင်တွေဟာ ဘိသိက်ခံ ခရစ်ယာန်တွေထက် အဆမတန် များပြားလာတယ်။ ပုံဥပမာထဲမှာ ကျွန်တွေက လယ်ထဲက “ပေါင်းပင်” တွေကို နုတ်ပစ်လိုက်ရမလားလို့ သခင်ကို မေးတယ်။ (မ. ၁၃:၂၈) သခင် ဘယ်လို ပြန်ဖြေသလဲ။
‘ငါသည်လည်း သင်တို့နှင့်အတူ အစဉ်မပြတ် ရှိသည်’
၄ သခင်ဖြစ်တဲ့ ယေရှုက ဂျုံစပါး၊ ပေါင်းပင်တွေနဲ့ပတ်သက်ပြီး “စပါးရိတ်ချိန်အထိ နှစ်မျိုးစလုံး ပေါက်ပါစေ” ဆိုပြီး ပြောခဲ့တယ်။ ဒီစကားက ပထမရာစုကနေ ယနေ့အချိန်အထိ ဂျုံစပါးနဲ့တူတဲ့ ဘိသိက်ခံခရစ်ယာန်တွေ မြေကြီးပေါ်မှာ အမြဲရှိနေမယ်ဆိုတာကို ဖော်ပြတယ်။ ယေရှုက တပည့်တွေကို “ငါသည်လည်း ဤလောကစနစ် နိဂုံးပိုင်းတိုင်အောင် သင်တို့နှင့်အတူ အစဉ်မပြတ်ရှိသည်” လို့လည်း ပြောခဲ့တယ်။ (မ. ၂၈:၂၀) ဒါကြောင့် ယေရှုဟာ ဘိသိက်ခံ ခရစ်ယာန်တွေကို ဆုံးခန်းကာလအထိ အစဉ်မပြတ် ကာကွယ်ပေးသွားမယ်။ ဒါပေမဲ့ ပေါင်းပင်နဲ့တူတဲ့ ခရစ်ယာန် အတုအယောင်တွေဟာ စပါးပင်တွေကို လွှမ်းမိုးထားလို့ အဲဒီကြာရှည်တဲ့ကာလအတွင်းမှာ ဘယ်သူက စပါးအတန်းအစား ဖြစ်တယ်ဆိုတာ သဲသဲကွဲကွဲ မသိနိုင်ခဲ့ဘူး။ ဒါပေမဲ့ စပါးရိတ်ချိန်မတိုင်ခင် အနှစ် ၄၀ ခန့်မှာ စပါးအတန်းအစားဟာ သိသာထင်ရှားလာတယ်။ ဘယ်လို သိသာထင်ရှားလာသလဲ။
‘ငါသည်လည်း သင်တို့နှင့်အတူ အစဉ်မပြတ် ရှိသည်’
၁၀ ဦးဆုံး၊ ပေါင်းပင်တွေကို နုတ်တယ်။ ယေရှုက ‘စပါးရိတ်ချိန်ရောက်မှ ပေါင်းပင်များကို ဦးစွာနုတ်ပြီး စည်းထားကြဟု စပါးရိတ်သူများကို ငါမှာကြားမည်’ လို့ပြောခဲ့တယ်။ ၁၉၁၄ ခုနှစ်နောက်ပိုင်းမှာ ကောင်းကင်တမန်တွေဟာ ဘိသိက်ခံ “နိုင်ငံတော်သား” တွေထဲကနေ ပေါင်းပင်နဲ့တူတဲ့ ခရစ်ယာန် အတုအယောင်တွေကို ခွဲထုတ်ခြင်းအားဖြင့် စတင် “နုတ်” ခဲ့တယ်။—မ. ၁၃:၃၀၊ ၃၈၊ ၄၁။
၁၁ ပေါင်းပင်နုတ်တဲ့လုပ်ငန်း တဖြည်းဖြည်း တိုးတက်လာတာနဲ့အမျှ အုပ်စုနှစ်ခုရဲ့ကွဲပြားမှုက သိသိသာသာ ထင်ရှားလာတယ်။ (ဗျာ. ၁၈:၁၊ ၄) ၁၉၁၉ ခုနှစ်မှာ မဟာဗာဗုလုန် ကျဆုံးသွားပြီဆိုတာ သိသာထင်ရှားလာတယ်။ ဘယ်အရာက အထူးသဖြင့် ခရစ်ယာန်စစ်တွေနဲ့ အတုအယောင်တွေကို ခွဲခြားသိရှိစေသလဲ။ ဟောပြောခြင်းလုပ်ငန်းပါပဲ။ အသင်းတော်မှာရှိတဲ့သူအားလုံး နိုင်ငံတော်သတင်း ဟောပြောခြင်းလုပ်ငန်းမှာ ပါဝင်ရမယ်ဆိုတာ ကျမ်းစာကျောင်းသားတွေကို ဦးဆောင်တဲ့သူတွေ စတင်သိရှိလာတယ်။ ဥပမာ၊ ၁၉၁၉ ခုနှစ်မှာ ထုတ်ဝေခဲ့တဲ့ မည်သူ့ထံတွင် အလုပ်အပ်နှံထားသနည်း ဆိုတဲ့ စာအုပ်ငယ်ကို ထုတ်ဝေခဲ့တယ်။ အဲဒီစာအုပ်မှာ တစ်အိမ်တက်ဆင်း ဟောပြောခြင်းလုပ်ငန်းမှာ ပါဝင်ကြဖို့ ဘိသိက်ခံ ခရစ်ယာန်အားလုံးကို တိုက်တွန်းထားတယ်။ “လုပ်ငန်းမှာ မဖြစ်နိုင်ဟု ထင်ရသည်၊ သို့သော် ယင်းသည် သခင်၏လုပ်ငန်းဖြစ်သည်။ ကိုယ်တော်ပေးသော ခွန်အားဖြင့် ယင်းလုပ်ငန်းကို ကျွန်ုပ်တို့ လုပ်ဆောင်ကြပါမည်။ ယင်းလုပ်ငန်းတွင် သင်ပါဝင်ရန် အခွင့်အရေးရထားသည်” လို့ အဲဒီစာအုပ်ထဲမှာ ရေးထားတယ်။ ကျမ်းစာကျောင်းသားတွေ ဘယ်လို တုံ့ပြန်ခဲ့ကြသလဲ။ သူတို့တွေဟာ ဟောပြောခြင်းလုပ်ငန်းမှာ ခါတိုင်းထက် ပိုပြီး ကြိုးစားအားထုတ် ပါဝင်ခဲ့ကြတယ်လို့ ၁၉၂၂ ခုနှစ်ထုတ် ကင်းမျှော်စင်မှာ ဖော်ပြထားတယ်။ သိပ်မကြာခင်မှာ တစ်အိမ်တက်ဆင်း ဟောပြောခြင်းဟာ အဲဒီသစ္စာရှိ ခရစ်ယာန်တွေရဲ့ အမှတ်အသားဖြစ်လာပြီး ယနေ့အချိန်ထိ ဖြစ်နေဆဲပဲ။
၁၂ ဒုတိယအချက်က စပါးကို စုသိမ်းခြင်း ဖြစ်တယ်။ ယေရှုက သူရဲ့ကောင်းကင်တမန်တွေကို “စပါးကို ကျီထဲစုသိမ်းကြ” လို့ အမိန့်ပေးခဲ့တယ်။ (မ. ၁၃:၃၀) ၁၉၁၉ ခုနှစ်ကတည်းက ဘိသိက်ခံ ခရစ်ယာန်တွေဟာ သန့်စင်ထားတဲ့ ခရစ်ယာန် အသင်းတော်ထဲကို စုသိမ်းခံနေကြရတယ်။ ဒါဆိုရင် ဒီလောကစနစ် အဆုံးပိုင်းမှာ အသက်ရှင်နေတဲ့ ဘိသိက်ခံ ခရစ်ယာန်တွေကော။ သူတို့တွေ ကောင်းကင်ရောက်သွားတဲ့အခါမှာ နောက်ဆုံးစုသိမ်းခြင်းလုပ်ငန်း ပြီးဆုံးပါလိမ့်မယ်။—ဒံ. ၇:၁၈၊ ၂၂၊ ၂၇။
ရှာဖွေလေ့လာ ဘုရားရေးရာ ရတနာ
nwtsty မ ၁၂:၂၀ လေ့လာမှု မှတ်စု
ငြိမ်းခါနီး မီးစာ။ အိမ်တွေမှာ သုံးနေကျ မီးခွက်ကို မြေနဲ့ လုပ်ထားတယ်။ မီးစာ မီးတောက်စေဖို့ သံလွင်ဆီထဲမှာ မီးစာထည့်ထားတယ်။ “ငြိမ်းခါနီး မီးစာ” လို့ပြန်ဆိုထားတဲ့ ဂရိစကားလုံးဟာ မီးတောက်ကို ငြိမ်းသတ်ပြီးဖြစ်ပေမဲ့ မီးခိုးထွက်နေဆဲ မီးစာကို ရည်ညွှန်းတယ်။ ဟေရှာယ ၄၂:၃ မှာ ယေရှုရဲ့ ထောက်ထားစာနာမှုကို ပရောဖက်ပြုထားတာဖြစ်ပြီး ယေရှုဟာ နိမ့်ကျသူ၊ ဖိနှိပ်ခံရသူတွေရဲ့ နောက်ဆုံးလက်ကျန် မျှော်လင့်ချက်ကို ငြိမ်းသတ်မှာ မဟုတ်ဘူး။
သင် သိပါသလား
ရှေးခေတ်တုန်းက တစ်ယောက်ယောက် သူတစ်ပါးရဲ့လယ်မှာ ပေါင်းမျိုးစေ့ ကြဲတာမျိုး တကယ် ဖြစ်နိုင်သလား။
မဿဲ ၁၃:၂၄-၂၆ မှာ ယေရှု ဒီလိုပြောတယ်– “ယေရှုက နောက်ထပ်ပုံဥပမာတစ်ခု ဆက်ပြောတယ်– “ကောင်းကင်နိုင်ငံကို လူတစ်ယောက် လယ်မှာ ကောင်းတဲ့မျိုးစေ့ ကြဲတာနဲ့ ခိုင်းနှိုင်းနိုင်တယ်။ လူတွေ အိပ်ပျော်နေချိန်မှာ ရန်သူရောက်လာပြီး ဂျုံမျိုးစေ့တွေကြားထဲ ပေါင်းမျိုးစေ့ကြဲပြီး ထွက်သွားတယ်။ ဂျုံပင်ပေါက်ပြီး အနှံထွက်လာတဲ့အခါ ပေါင်းပင်တွေလည်း ပေါ်လာတယ်။” အဲဒီပုံဥပမာကို တကယ်ဖြစ်တယ်လို့ ယူဆရမလားဆိုပြီး စာရေးသူတွေ အငြင်းပွားခဲ့ကြတယ်။ ဒါပေမဲ့ ရောမ တရားဝင်မှတ်တမ်းတွေကတော့ ယူဆသင့်တယ်လို့ ဆိုတယ်။
“ကလဲ့စားချေလိုတဲ့ ရည်ရွယ်ချက်နဲ့ ပေါင်းမျိုးစေ့တွေ ကြဲတာဟာ ရောမဥပဒေအရ ရာဇဝတ်မှု မြောက်တယ်။ ဒီကိစ္စနဲ့ပတ်သက်တဲ့ ဥပဒေတွေ ရှိတာကိုက အဲဒီလိုအမှုတွေ တကယ်ရှိခဲ့မှန်း ဖော်ပြတယ်” လို့ ကျမ်းစာအဘိဓာန်တစ်အုပ်က ဆိုတယ်။ အေဒီ ၅၃၃ မှာ ရောမဧကရာဇ် ဂျပ်စ္စတင်းနီးယန်းက ဒိုင်ဂျက်စ် စာအုပ် ထုတ်ဝေခဲ့တယ်လို့ ဥပဒေပညာရှင် အလာစတာ ကယ်ရာ ပြောခဲ့တယ်။ အဲဒီစာအုပ်ဟာ ရောမဥပဒေပေါင်းချုပ် ဖြစ်ပြီး အေဒီ ၁၀၀-၂၅၀ အတွင်း ဥပဒေပညာရှင်တွေရဲ့ ကောက်နုတ်ချက်တွေ ပါဝင်တယ်။ ဥပဒေပညာရှင်တစ်ယောက်ဖြစ်တဲ့ အာလ်ပီယန်က ဒုတိယရာစု အမှုတစ်ခုကို ရည်ညွှန်းထားတယ်။ တစ်ယောက်ယောက်က သူတစ်ပါးရဲ့လယ်မှာ ပေါင်းမျိုးစေ့တွေ ကြဲသွားတဲ့အတွက် အသီးအနှံတွေ ပျက်စီးသွားတယ်။ လယ်သမား ရထိုက်တဲ့ တရားရေးအခွင့်အရေးတွေနဲ့ ဆုံးရှုံးမှုအတွက် လျော်ကြေးတွေကို အဲဒီစာအုပ်မှာ ဆွေးနွေးထားတယ်။
ရှေးခေတ် ရောမအင်ပါယာမှာ အဲဒီလိုအမှုတွေ ဖြစ်ခဲ့တာက ယေရှုပြောခဲ့တဲ့ ပုံဥပမာဟာ တကယ်ဖြစ်တယ်ဆိုတာ ဖော်ပြတယ်။
ဖေဖော်ဝါရီ ၁၂-၁၈
ကျမ်းစာထဲက အဖိုးတန်ဘဏ္ဍာများ | မဿဲ ၁၄–၁၅
“လူအနည်းငယ်ကတစ်ဆင့် လူအများကြီးကို ကျွေး”
လူအနည်းငယ်ကတစ်ဆင့် လူအများကြီးကို ကျွေး
၂ ယေရှုက လူအုပ်ကို ကြည့်လိုက်တဲ့အခါ သနားစိတ်ဝင်လာတယ်။ ဒါကြောင့် အဲဒီအထဲက ဖျားနာနေတဲ့သူတွေကို ကုသပေးပြီး သူတို့ကို ဘုရားသခင့် နိုင်ငံတော်နဲ့ပတ်သက်တဲ့ အကြောင်းအရာများစွာကို သွန်သင်ပေးခဲ့တယ်။ ညနေစောင်းလာတဲ့အခါ တပည့်တွေက လူအုပ်ကို လူစုခွဲဖို့ ယေရှုကို တိုက်တွန်းကြတယ်၊ ဒါမှ သူတို့တွေ အနီးအနားက ရွာတွေမှာ စားစရာ သွားဝယ်လို့ရမယ်။ ဒါပေမဲ့ ယေရှုက “စားစရာကို သင်တို့ပေးကြ” လို့ တပည့်တွေကို ပြောလိုက်တယ်။ ယေရှုရဲ့စကားကြောင့် တပည့်တွေ ကြောင်တောင်တောင် ဖြစ်သွားမှာပဲ၊ ဘာဖြစ်လို့လဲဆိုတော့ တပည့်တွေမှာ စားစရာဆိုလို့ မဖြစ်စလောက်လေးပဲရှိတယ်၊ သူတို့မှာ မုန့်ငါးလုံးနဲ့ ငါးနှစ်ကောင်ပဲရှိတယ်။
လူအနည်းငယ်ကတစ်ဆင့် လူအများကြီးကို ကျွေး
၃ လူတွေကို သနားတဲ့စိတ်ကြောင့် ယေရှုဟာ ခရစ်ဝင်ကျမ်း လေးစောင်စလုံးမှာ မှတ်တမ်းတင်ထားတဲ့ တစ်ခုတည်းသော အံ့ဖွယ်အမှုကို ပြုလုပ်ခဲ့တယ်။ (မာ. ၆:၃၅-၄၄။ လု. ၉:၁၀-၁၇။ ယော. ၆:၁-၁၃) မြက်ခင်းစိမ်းပေါ်မှာ လူ ၅၀ စီ၊ ၁၀၀ စီစုပြီး ထိုင်ကြဖို့ ယေရှုက တပည့်တွေကို ပြောခိုင်းလိုက်တယ်။ ဆုတောင်းပြီးတဲ့နောက်မှာ ယေရှုက မုန့်နဲ့ ငါးကို စပြီးဖဲ့တယ်။ အဲဒီနောက်မှာ ယေရှုက စားစရာကို လူတွေလက်ထဲ ကိုယ်တိုင်မပေးဘဲ တပည့်တော်တွေကို ပေးလိုက်တယ်။ အဲဒီနောက် တပည့်တော်တွေက လူအုပ်ကို ပြန်ဝေပေးတယ်။ စားစရာတွေဟာ လူတိုင်း စားလောက်ရုံထက်မက ပိုနေတယ်။ စဉ်းစားကြည့်လိုက်ပါ– ယေရှုဟာ တပည့်အရေအတွက် နည်းနည်းလေးကတစ်ဆင့် ထောင်နဲ့ချီတဲ့လူတွေကို ကျွေးခဲ့တယ်။
nwtsty မ ၁၄:၂၁ လေ့လာမှု မှတ်စု
အမျိုးသမီးတွေ၊ ကလေးတွေလည်း။ ဒီမှတ်တမ်းအကြောင်း ပြောတဲ့အခါ မဿဲတစ်ဦးကပဲ အမျိုးသမီးတွေ၊ ကလေးတွေလည်း ပါကြောင်း ထည့်ပြောခဲ့တယ်။ ဒါကြောင့် ဒီအံ့ဖွယ် ကျွေးမွေးမှုမှာ စုစုပေါင်း အယောက် ၁၅,၀၀၀ ကျော်လောက် ရှိနိုင်တယ်။
က၁၃ ၇/၁၅ ပိုဒ်. ၁
လူအနည်းငယ်ကတစ်ဆင့် လူအများကြီးကို ကျွေး
ဒီမြင်ကွင်းကို မြင်ယောင်ကြည့်ပါ။ (မဿဲ ၁၄:၁၄-၂၁ ကိုဖတ်ပါ။) အေဒီ ၃၂ ပသခါပွဲ မတိုင်ခင်လေးမှာ ဖြစ်တယ်။ အမျိုးသား ၅,၀၀၀ လောက်နဲ့ အမျိုးသမီးတွေ၊ ကလေးတွေ ပါဝင်တဲ့ လူအုပ်တစ်အုပ်ဟာ ယေရှုနဲ့ တပည့်တွေနဲ့အတူ ရှိနေတယ်။ သူတို့ဟာ ဂါလိလဲအိုင်မြောက်ဘက် ဘက်ဆိုင်းဒါရွာအနီး၊ လူသူကင်းမဲ့တဲ့နေရာမှာ ရှိနေကြတယ်။
ရှာဖွေလေ့လာ ဘုရားရေးရာ ရတနာ
nwtsty မ ၁၅:၇ လေ့လာမှု မှတ်စု
သူတော်ကောင်း ယောင်ဆောင်သူတို့။ ဂရိစကားလုံး ဟီပိုကရိတီးစ်က ဂရိ (နောက်ပိုင်း ရောမ) ဇာတ်စင်ပေါ်မှာ မျက်နှာဖုံးတပ်ထားတဲ့ သရုပ်ဆောင်တွေကို ရည်ညွှန်းတယ်။ ကိုယ့်သရုပ်မှန်ကို ဖုံးကွယ်ထားသူ ဘယ်သူမဆိုကို ဖော်ပြဖို့ တင်စားတဲ့သဘောနဲ့ အသုံးပြုလာတယ်။ ယေရှုက ဂျူးဘာသာရေးခေါင်းဆောင်တွေကို “သူတော်ကောင်း ယောင်ဆောင်သူတွေ” လို့ ခေါ်ခဲ့တယ်။ —မ ၆:၅၊ ၁၆။
nwtsty မ ၁၅:၂၆ လေ့လာမှု မှတ်စု
သားသမီး . . . ခွေးကလေးတွေ။ မောရှေပညတ်အရ ခွေးတွေဟာ မသန့်ရှင်းဘူး။ ကျမ်းစာမှာ ရှုတ်ချတဲ့သဘောနဲ့ သုံးလေ့ရှိတယ်။ (ဝ ၁၁:၂၇။ မ ၇:၆။ ဖိ ၃:၂။ ဗ ၂၂:၁၅) ဒါပေမဲ့ မာကု (၇:၂၇) မှာရော၊ မဿဲကျမ်းမှာပါ ပါတဲ့ ယေရှုရဲ့ အပြောအဆိုကို ကြည့်တဲ့အခါ “ခွေးကလေး၊” “အိမ်မွေးခွေး” အဓိပ္ပာယ်ရတဲ့ စကားလုံးကို သုံးထားပြီး ထောက်ထားစာနာတဲ့၊ ပျော့ပျောင်းတဲ့ စကားလုံး ဖြစ်တယ်။ ဂျူးမဟုတ်တဲ့အိမ်တွေမှာ အိမ်မွေးတိရစ္စာန်တွေကို ချစ်စနိုးခေါ်ဝေါ်တဲ့ အသုံးအနှုန်းကို ယေရှု သုံးခဲ့တာ ဖြစ်နိုင်တယ်။ ဂျူးတွေကိုတော့ “သားသမီး” နဲ့နှိုင်းပြီး ဂျူးမဟုတ်သူတွေကို “ခွေးကလေးတွေ” နဲ့ ယေရှု နှိုင်းတာက ဘယ်အရာကို ပိုဦးစားပေးရမယ်ဆိုတာ ဖော်ပြတာပါ။ သားသမီးရော ခွေးရောရှိတဲ့ အိမ်တစ်အိမ်မှာ ကလေးကို အရင် အစာကျွေးလေ့ ရှိတတ်ပါတယ်။
ဖေဖော်ဝါရီ ၁၉–၂၅
ကျမ်းစာထဲက အဖိုးတန်ဘဏ္ဍာများ | မဿဲ ၁၆–၁၇
“ဘယ်သူ စဉ်းစားသလို သင်စဉ်းစားနေသလဲ”
လင်ယောက်ျားတို့—ခရစ်တော်၏ဦးစီးမှုကို တုပလော့
၁၇ နောက်တစ်ကြိမ်တွင် ယေရှုက မိမိသည် ယေရုရှလင်မြို့သို့ သွားရမည်။ ထိုတွင် “လူအကြီးအကဲ၊ ယဇ်ပုရောဟိတ်အကြီး၊ ကျမ်းပြုဆရာတို့လက်၌ များစွာခံရမည်။ အသေသတ်ခြင်းကို လည်းခံရမည်။ သုံးရက်မြောက်သောနေ့၌ ထမြောက်လိမ့်မည်” ဟုတမန်တော်များကို ပြောခဲ့သည်။ ထိုအချိန်တွင် ပေတရုက “သခင်၊ ကိုယ်တော်၌ ဤသို့မဖြစ်ပါစေနှင့်။ ဤအမှုသည် ကိုယ်တော်၌မရောက်ရာ” ဟု ပြစ်တင်စကားဆိုလေ၏။ စိတ်လှုပ်ရှားမှုကြောင့် ပေတရု၏စဉ်းစားတွေးခေါ်ပုံ မှားသွားကြောင်း ထင်ရှားသည်။ သွန်သင်ဆုံးမရန် လိုအပ်လာသောကြောင့် “အချင်းရန်သူ၊ ငါ့နောက်သို့ဆုတ်လော့။ သင်သည် ငါတိုက်မိ၍ လဲစရာအကြောင်းဖြစ်၏။ သင်သည် ဘုရားသခင်၏အရာကို စိတ်မစွဲလမ်း၊ လူတို့၏အရာကိုသာ စွဲလမ်းသည်” ဟု ကိုယ်တော်ဆိုခဲ့၏။—မဿဲ ၁၆:၂၁-၂၃။
နိုးကြားနေပါ—သင့်ကို စာတန် ဝါးမျိုချင်
၁၆ ယေဟောဝါရဲ့ ဇွဲထက်သန်တဲ့ ကျေးကျွန်တွေကိုတောင် စာတန် လှည့်စားနိုင်တယ်။ ဥပမာ၊ ယေရှုက မကြာခင် သူအသတ်ခံရတော့မယ့်အကြောင်း တပည့်တွေကို ပြောတဲ့အခါ ဘာဖြစ်ခဲ့တယ်ဆိုတာ စဉ်းစားကြည့်ပါ။ ယေရှုကိုချစ်တဲ့ တမန်တော်ပေတရုက ‘သခင်၊ ကိုယ့်ကိုယ်ကိုယ် သနားပါ။ ဒီအဖြစ်မျိုးကို သခင် ဘယ်တော့မှ မကြုံရဘူး’ လို့ ပြောတဲ့အခါ “စာတန်၊ ထွက်သွားပါ” လို့ ယေရှု ပြန်ပြောခဲ့တယ်။ (မ. ၁၆:၂၂၊ ၂၃) ပေတရုကို “စာတန်” လို့ ယေရှု ဘာကြောင့် ခေါ်ခဲ့သလဲ။ မကြာခင် ဘာဖြစ်တော့မယ်ဆိုတာ ယေရှုသိနေလို့ပဲ။ မကြာခင်မှာ ယေရှုက ရွေးနုတ်ဖိုးပူဇော်သကာအဖြစ် သေဆုံးပြီး စာတန် မုသာကောင်ဖြစ်တယ်ဆိုတာ သက်သေထူလိမ့်မယ်။ ဒီအချိန်ဟာ လူ့သမိုင်းမှာ အရေးကြီးဆုံးအချိန်ဖြစ်တယ်။ “ကိုယ့်ကိုယ်ကိုယ် သနား” နေရမယ့်အချိန် မဟုတ်ဘူး။ ယေရှုသာ သတိလက်လွတ်ဖြစ်သွားရင် စာတန် သိပ်ပျော်မှာ သေချာတယ်။
၁၇ ဒီလောကစနစ်ရဲ့အဆုံး သိပ်နီးနေပြီ။ ဒါကြောင့် ကျွန်တော်တို့လည်း အရေးကြီးတဲ့အချိန်မှာ အသက်ရှင်နေကြတယ်။ စာတန်ဟာ ကျွန်တော်တို့ကို ဒီလောကမှာ အောင်မြင်ဖို့ပဲ သဲကြီးမဲကြီး ကြိုးစားစေချင်တယ်။ ဒီနည်းအားဖြင့် “ကိုယ့်ကိုယ်ကိုယ် သနား” စေချင်တယ်။ နောက်ဆုံးကာလမှာ အသက်ရှင်နေမှန်း မေ့သွားစေချင်တယ်။ သတိလက်လွတ် ဖြစ်သွားစေချင်တယ်။ ဒါပေမဲ့ ဘယ်တော့မှ အဲဒီလို အဖြစ်မခံပါနဲ့။ အဲဒီအစား၊ သတိရှိရှိ ‘စောင့်နေပါ။’ (မ. ၂၄:၄၂) အဆုံးရောက်ဖို့ အဝေးကြီး လိုသေးတယ် ဒါမှမဟုတ် လာတော့မှာ မဟုတ်ပါဘူးဆိုတဲ့ စာတန်ရဲ့ အလိမ်အညာကို ဘယ်တော့မှ မယုံကြည်လိုက်ပါနဲ့။
‘သွား၍ တပည့်ဖြစ်စေလျက် နှစ်ခြင်းပေးကြလော့’
၉ ဘုရားသခင်၏ အလိုတော်ဆောင်ရန် ယေရှု၏ ပုံနမူနာကို လိုက်လျှောက်ခြင်းတွင် အဘယ်အရာ ပါဝင်သနည်း။ ယေရှုက “ငါ၌ ဆည်းကပ်လိုသောသူဖြစ်လျှင် ကိုယ်ကိုကိုယ် ငြင်းပယ်ရမည်။ ကိုယ့်လက်ဝါးကပ်တိုင်ကို ထမ်း၍ ငါ့နောက်သို့ [“အဆက်မပြတ်၊” ကဘ] လိုက်ရမည်” ဟုတပည့်များကို မိန့်မှာခဲ့သည်။ (မဿဲ ၁၆:၂၄) ဤတွင် ကျွန်ုပ်တို့လုပ်ဆောင်ရမည့် အချက်သုံးချက်ကို ကိုယ်တော်ဖော်ပြခဲ့သည်။ ပထမအချက်မှာ မိမိကိုယ်ကို “ငြင်းပယ်” ရမည်။ တစ်နည်းပြောရလျှင် ကျွန်ုပ်တို့၏ ကိုယ်ကျိုးရှာသည့် မစုံလင်သော စိတ်ဆန္ဒများကို ငြင်းဆန်ပြီး ဘုရားသခင်၏ ဆုံးမစကားနှင့် ညွှန်ကြားချက်တို့ကို လိုက်နာရမည် ဖြစ်သည်။ ဒုတိယအချက်မှာ “ကိုယ့်လက်ဝါးကပ်တိုင်ကိုထမ်း” ရမည်။ ယေရှုခေတ်တွင် လက်ဝါးကပ်တိုင်သည် အရှက်ကွဲခြင်းနှင့် ဆင်းရဲဝေဒနာကို ပုံဆောင်၏။ ခရစ်ယာန်များဖြစ်သော ကျွန်ုပ်တို့သည် သတင်းကောင်း ဟောပြောခြင်းကြောင့် ဆင်းရဲခက်ခဲမှု ခံရသည်။ (၂ တိမောသေ ၁:၈) ဤလောက,က ကျွန်ုပ်တို့ကို ကဲ့ရဲ့လှောင်ပြောင်၊ ပြစ်တင်ရှုတ်ချမည် ဖြစ်သော်လည်း ခရစ်တော်ကဲ့သို့ ကျွန်ုပ်တို့သည် “ရှက်ကြောက်သော အရာကို မမှတ်ဘဲ” ဘုရားသခင်၏ စိတ်တော်နှင့် တွေ့နေသည် ဟူသော အသိကြောင့် ပျော်ရွှင်ကြသည်။ (ဟေဗြဲ ၁၂:၂) နောက်ဆုံးအချက်မှာ ယေရှုနောက်သို့ “အဆက်မပြတ်” လိုက်ရမည်။—ဆာလံ ၇၃:၂၆။ ၁၁၉:၄၄။ ၁၄၅:၂။
ရှာဖွေလေ့လာ ဘုရားရေးရာ ရတနာ
nwtsty မ ၁၆:၁၈ လေ့လာမှု မှတ်စု
ခင်ဗျားဟာ ပေတရုပဲ။ ဒီကျောက်ဆောင်ပေါ်မှာ။ အမျိုးသားတွေအတွက် အသုံးပြုတဲ့ ဂရိစကားလုံး ပက်ထရို့စ်ဟာ “ကျောက်ဆောင်၊ ကျောက်တုံး” လို့ အဓိပ္ပာယ်ရှိတယ်။ ရှိမုန်ကို ယေရှုက အဲဒီ ဂရိနာမည် (ပေတရု) ဆိုပြီး ပေးခဲ့တယ်။ (ယဟ ၁:၄၂) အမျိုးသမီးတွေအတွက် အသုံးပြုတဲ့ ပက်ထရာကို “ကျောက်” လို့ ပြန်ဆိုကြပြီး မြေလွှာအောက်က ကျောက်သား၊ ကျောက်ထရံ၊ ကျောက်ပုံလို့ အဓိပ္ပာယ်ရှိနိုင်တယ်။ အဲဒီဂရိစကားလုံးကို မ ၇:၂၄၊ ၂၅။ ၂၇:၆၀။ လု ၆:၄၈။ ၈:၆။ ရ ၉:၃၃။ ၁က ၁၀:၄။ ၁ပ ၂:၈ တွေမှာလည်း တွေ့ရတယ်။ ပေတရုက သူ့ကိုယ်သူ ယေရှုရဲ့ အသင်းတော်အုတ်မြစ်အဖြစ် မရှုမြင်ခဲ့ဘူးဆိုတာ ၁ ပေတရု ၂:၄-၈ မှာပါတဲ့ စကားကို ကြည့်ရင် သိနိုင်တယ်။ အဲဒီမှာ ယေရှုကို ဘုရားကိုယ်တိုင် ရွေးချယ်တဲ့၊ ဟိုကတည်းက ကြိုဟောခဲ့တဲ့ “ထောင့်ချုပ်အုတ်မြစ်ကျောက်” ဖြစ်တယ်လို့ ဆိုထားတယ်။ တမန်တော်ပေါလုကလည်း ယေရှုကို “အုတ်မြစ်၊” “ဘုရားပေးတဲ့ ကျောက်ဆောင်” လို့ ရည်ညွှန်းခဲ့တယ်။ (၁က ၃:၁၁။ ၁၀:၄) ဒါကြောင့် ယေရှုက စကားပရိယာယ်သုံးပြီး ဒီလိုပြောခဲ့မှန်း ထင်ရှားတယ်– ‘(“ကျောက်ဆောင်” လို့ အဓိပ္ပာယ်ရှိတဲ့) ပေတရု၊ ခရစ်ယာန်အသင်းတော်ရဲ့ အုတ်မြစ် “ကျောက်ဆောင်” ခရစ်တော်ဟာ ဘယ်သူလဲဆိုတာကို ခင်ဗျား သိထားပါတယ်။’
အသင်းတော်။ ဂရိစကားလုံး အက်ကလီဆီယာ ဖြစ်ပြီး ပထမဆုံးအကြိမ် တွေ့ရတဲ့ နေရာဖြစ်တယ်။ “အပြင်က” လို့ အဓိပ္ပာယ်ရှိတဲ့ အက် နဲ့ “ခေါ်တယ်” လို့ အဓိပ္ပာယ်ရှိတဲ့ ကလီအို ဆိုတဲ့ ဂရိစကားလုံး နှစ်လုံး ပေါင်းထားတာ။ ရည်ရွယ်ချက်တစ်ခု၊ လုပ်ဆောင်မှုတစ်ခုအတွက် စုရုံးဖို့ ဆင့်ခေါ်ခံရတဲ့ လူတစ်စုလို့ အဓိပ္ပာယ် ရှိတယ်။ ရှေ့နောက်စကားအရ “ဘုရားသခင့် စွမ်းအားတော်နဲ့ တည်ဆောက်” ထားတဲ့ “အသက်ကျောက်” ဘိသိက်ခံ ခရစ်ယာန်တွေနဲ့ ဖွဲ့စည်းထားတဲ့ ခရစ်ယာန်အသင်းတော် တည်ထောင်မယ်ဆိုတာကို ယေရှု ကြိုဟောနေခြင်း ဖြစ်တယ်။ (၁ပ ၂:၄၊ ၅) စက်တွားဂျင့်ကျမ်း မှာ ဘုရားလူမျိုးတစ်မျိုးလုံးကို ရည်ညွှန်းတဲ့ “အစုအဝေး” ဆိုတဲ့ ဟီဘရူးစကားလုံးကို ပြန်ဆိုတဲ့အခါ အဲဒီဂရိစကားလုံးကို မကြာခဏ အသုံးပြုထားတယ်။ (တရ ၂၃:၃။ ၃၁:၃၀) အလားတူပဲ ‘အမှောင်ထဲကနေ အံ့ဖွယ်အလင်းထဲ ခေါ်ခံရတဲ့လူမျိုး၊’ ‘ဒီလောကထဲက ရွေးချယ်ထားသူတွေ’ ဖြစ်တဲ့ ခရစ်ယာန်တွေနဲ့ “ဘုရားသခင့် အသင်းတော်” ကို ဖွဲ့စည်းထားပါတယ်။—၁ပ ၂:၉။ ယဟ ၁၅:၁၉။ ၁က ၁:၂။
nwtsty မ ၁၆:၁၉ လေ့လာမှု မှတ်စု
ကောင်းကင်နိုင်ငံရဲ့ သော့တွေ။ သမ္မာကျမ်းစာမှာ တစ်စုံတစ်ယောက်ကို ပကတိသော့ ဒါမှမဟုတ် ပုံဆောင်သော့ ပေးတယ်ဆိုရင် အခွင့်အာဏာ အတန်အရာရှိတဲ့ ယုံကြည်စိတ်ချရသူ ဖြစ်လို့ပဲ။ (၁ရ ၉:၂၆၊ ၂၇။ ရှာ ၂၂:၂၀-၂၂) ဒါကြောင့် “သော့” ဆိုတဲ့ အသုံးအနှုန်းက အခွင့်အာဏာနဲ့ တာဝန်ရှိမှုကို တင်စားတယ်။ ပေတရုက အပ်နှင်းခံထားရတဲ့ “သော့” တွေကို သုံးပြီး ဂျူးတွေ (တ ၂:၂၂-၄၁)၊ ရှမာရိတွေ (တ ၈:၁၄-၁၇)၊ လူမျိုးခြားတွေ (တ ၁၀:၃၄-၃၈) ကောင်းကင်နိုင်ငံတော်ကို ဝင်ခွင့်ရစေဖို့ ဘုရားသခင့် စွမ်းအားတော် ရအောင် လမ်းဖွင့်ပေးခဲ့တယ်။
ဖေဖော်ဝါရီ ၂၆–မတ် ၄
ကျမ်းစာထဲက အဖိုးတန်ဘဏ္ဍာများ | မဿဲ ၁၈–၁၉
“တိုက်မိလဲစေမယ့် အရာတွေကို ရှောင်ပါ”
nwtsty မ ၁၈:၆၊ ၇ လေ့လာမှု မှတ်စု
ကြိတ်ဆုံကျောက်ကြီး။ မြည်းနဲ့ဆွဲပြီး ကြိတ်ရတဲ့ ကြိတ်ဆုံကျောက် ဖြစ်တယ်။ ကြိတ်ဆုံကျောက်တစ်လုံးဟာ အချင်း ၄-၅ ပေ ရှိတဲ့ ကျောက်တုံးကြီး ဖြစ်တဲ့အတွက် မြည်းနဲ့ ဆွဲပြီး လှည့်ရတယ်။
အပြစ်ကျူးလွန်စေတဲ့ အရာတွေ။ “အပြစ်ကျူးလွန်စေတဲ့အရာ၊” “တိုက်မိလဲစေတဲ့အရာ” လို့ ပြန်ဆိုတဲ့ ဂရိစကားလုံး စကန်ဒါလုန်ရဲ့ မူရင်းအဓိပ္ပာယ်က ထောင်ချောက်ကို ရည်ညွှန်းတယ်။ တချို့က အစာနဲ့ ထောင်ဖမ်းတဲ့ မောင်းခလုတ်လို့ ဆိုကြတယ်။ တိုက်မိပြီး လဲကျစေတဲ့ ဘယ်အရာကိုမဆို ရည်ညွှန်းတဲ့အခါ အဲဒီစကားလုံးကို နောက်ပိုင်းမှာ အသုံးပြုလာကြတယ်။ တင်စားသုံးနှုန်းတဲ့အခါ လူတစ်ယောက်ကို လမ်းမှား လိုက်အောင်၊ အကျင့်ပျက်အောင်၊ အပြစ်ကျူးလွန်အောင် ဦးတည်စေတဲ့ လုပ်ရပ်၊ အခြေအနေကို ရည်ညွှန်းတယ်။ မဿဲ ၁၈:၈၊ ၉ မှာ ဂရိကြိယာပုဒ် စကန်ဒါလီဇိုကို “တိုက်မိလဲစေတယ်” လို့ ပြန်ဆိုထားပြီး “ထောင်ချောက်ထဲ ကျစေတယ်၊ အပြစ်ပြုမိစေတယ်” လို့လည်း ပြန်ဆိုနိုင်တယ်။
nwtsty မီဒီယာ
ကြိတ်ဆုံကျောက်
ကြိတ်ဆုံကျောက်တွေကို ကောက်နှံ ကြိတ်ဖို့၊ သံလွင်ဆီ ကြိတ်ဖို့ အသုံးပြုခဲ့ကြတယ်။ ကြိတ်ဆုံကျောက်တချို့က လက်လှည့်အရွယ် ဖြစ်ပြီး တချို့ကတော့ တိရစ္ဆာန်နဲ့ပဲ လှည့်လို့ရတယ်။ ဖိလိတိလူတွေက ရှံဆုန်ကို အဲဒီလိုမျိုး ကြိတ်ဆုံကျောက်ကြီးကို သုံးပြီး ကြိတ်ခိုင်းခဲ့တာ ဖြစ်နိုင်တယ်။ (သူ ၁၆:၂၁) တိရစ္ဆာန်အားသုံး ကြိတ်ဆုံတွေကို အစ္စရေးနိုင်ငံမှာသာမက ရောမအင်ပါယာတစ်ခွင်မှာပါ အသုံးပြုခဲ့ကြတယ်။
အပေါ်ကျောက်ပြားနဲ့ အောက်ခံကျောက်ပြား
ပုံမှာ ဖော်ပြထားတာက မြည်းစတဲ့ တိရစ္ဆာန်နဲ့ ဆွဲလှည့်ရတဲ့ ကြိတ်ဆုံကျောက်ကြီး ဖြစ်ပြီး ကောက်နှံ၊ သံလွင်ဆီကြိတ်ရာမှာ အသုံးပြုတယ်။ အပေါ်ကျောက်ပြားက အချင်း ၅ ပေလောက် ရှိပြီး အဲဒီထက်ပိုကြီးတဲ့ အောက်ခံကျောက်ပေါ်တင်ပြီး လှည့်ပေးရတယ်။
nwtsty မ ၁၈:၉ လေ့လာမှု မှတ်စု
ဂေဟင်နာ။ ဒီအသုံးအနှုန်းက ဟီဘရူးစကားလုံး ဂေဟင်နုံကနေ ဆင်းသက်လာတယ်။ အဓိပ္ပာယ်က “ဟိန်နုံချိုင့်ဝှမ်း” ဖြစ်တယ်။ ရှေးခေတ် ဂျေရုဆလင်မြို့အနောက်တောင်ဘက်မှာ တည်ရှိတယ်။ (နောက်ဆက်တွဲ ခ၁၂၊ “ဂျေရုဆလင်မြို့နဲ့ အနီးတစ်ဝိုက်” မြေပုံကို ကြည့်ပါ။) ယေရှုအချိန်မှာ အဲဒီချိုင့်ဝှမ်းဟာ အမှိုက်သရိုက်တွေ မီးရှို့တဲ့နေရာ ဖြစ်လာတဲ့အတွက် “ဂေဟင်နာ” ဆိုတဲ့ စကားလုံးဟာ လုံးလုံး ဖျက်ဆီးခံရခြင်းကို ဖော်ပြဖို့ သင့်လျော်ပါတယ်။
nwtstg ခက်ဆစ်
ဂေဟင်နာ
ရှေးခေတ် ဂျေရုဆလင်မြို့အနောက်တောင်ဘက်မှာရှိတဲ့ ဟိန်နုံချိုင့်ဝှမ်းရဲ့ ဂရိနာမည်။ (ယေ ၇:၃၁) အလောင်းတွေ စုပုံတဲ့နေရာအဖြစ် ကြိုဟောချက်အနေနဲ့ ဖော်ပြထားတယ်။ (ယေ ၇:၃၂။ ၁၉:၆) တိရစ္ဆာန်ကိုဖြစ်ဖြစ်၊ လူကိုဖြစ်ဖြစ် ဂေဟင်နာထဲပစ်ချပြီး အရှင်လတ်လတ် မီးရှို့ ညှဉ်းဆဲတယ်ဆိုတဲ့ အထောက်အထား မရှိပါ။ ဒါကြောင့် လူတွေကို မီးနဲ့ ထာဝရညှဉ်းဆဲတဲ့၊ မမြင်နိုင်တဲ့နေရာအဖြစ် တင်စားလို့ မရပါ။ အဲဒီအစား၊ ယေရှုနဲ့ တပည့်တွေက “ဒုတိယသေခြင်း၊” တစ်နည်းအားဖြင့် ထာဝရဖျက်ဆီးခြင်းဆိုတဲ့ ထာဝရပြစ်ဒဏ်ကို တင်စားဖော်ပြဖို့ ဂေဟင်နာဆိုတဲ့ စကားလုံးကို အသုံးပြုခဲ့တယ်။—ဗ ၂၀:၁၄။ မ ၅:၂၂။ ၁၀:၂၈။
nwtsty မ ၁၈:၁၀ လေ့လာမှု မှတ်စု
အဖဘုရားရဲ့ ရှေ့မှောက်မှာ အမြဲခစားနေကြတယ်။ နာမ်ဝိညာဉ်သားတွေပဲ ဘုရားသခင်ရှေ့မှောက် ဝင်ရောက်ခံစားနိုင်တယ်။ သူတို့ပဲ ဘုရားမျက်နှာကို မြင်နိုင်တယ်။—ထွ ၃၃:၂၀။
ကောင်းကင်တမန်တွေက ကျွန်ုပ်တို့ကို အကျိုးပြုနိုင်ပုံ
ဘုရားသခင့်ကျေးကျွန်တွေ ကိုယ်တော်နဲ့ ရင်းနှီးတဲ့ဆက်ဆံရေး ဆက်ရှိနေအောင် ကူညီပေးဖို့ ကောင်းကင်တမန်တွေကို တာဝန်ပေးထားတယ်လို့ ယေရှုပြောပြတယ်။ ဒါကြောင့် တခြားသူတွေ ဘုရားသခင်နဲ့ ဆက်ဆံရေးပြတ်သွားအောင် မလုပ်မိဖို့ တပည့်တွေကို ယေရှု ဒီလိုသတိပေးခဲ့တယ်– “ကလေးငယ်နဲ့တူတဲ့ ဟောဒီလူတွေကို မထီလေးစား မလုပ်မိစေနဲ့။ ကျွန်တော်ပြောမယ်။ သူတို့ရဲ့ ကောင်းကင်တမန်တွေက ကောင်းကင်မှာ စံမြန်းတဲ့ အဖဘုရားရဲ့ ရှေ့မှောက်မှာ အမြဲခစားနေကြတယ်။” (မဿဲ ၁၈:၁၀) အဲလိုယေရှု သတိပေးတာက မိမိရဲ့နောက်လိုက် တစ်ဦးချင်းစီကို ကာကွယ်ပေးဖို့ တာဝန်ပေးထားတဲ့ ကိုယ်စောင့် ကောင်းကင်တမန် ရှိတယ်လို့ ပြောနေတာ မဟုတ်ပါဘူး။ အဲဒီအစား ဘုရားသခင်နဲ့ အနီးကပ် အမှုဆောင်နေတဲ့ ကောင်းကင်တမန်တွေဟာ ခရစ်ယာန်အသင်းတော်ရှိ ညီအစ်ကို ညီအစ်မတွေကို စိတ်၀င်စားနေတယ်လို့ ပြောနေတာပါ။
ရှာဖွေလေ့လာ ဘုရားရေးရာ ရတနာ
nwtsty မ ၁၈:၂၂ လေ့လာမှု မှတ်စု
၇၇ ကြိမ်။ မူရင်းမှာ “ခုနစ်ဆယ် ခုနှစ်လီ။” ဒီဂရိအသုံးအနှုန်းက “၇၀ နဲ့ ၇” (၇၇ ကြိမ်)၊ “၇၀ အမြှောက် ၇” (၄၉၀ ကြိမ်) လို့ အဓိပ္ပာယ် ရှိနိုင်တယ်။ အဲဒီစကားလုံးကို စက်ပ်တွားဂျင့်ကျမ်း ကမ္ဘာဦး ၄:၂၄ မှာ တွေ့ရပြီး ဟီဘရူးအသုံးအနှုန်း “၇၇ ကြိမ်” ကို “၇၇ ကြိမ်” လို့ပဲ ပြန်ဆိုထားတယ်။ ဘယ်လိုပဲနားလည်သည်ဖြစ်ပါစေ၊ ခုနစ်ဂဏန်းကို နှစ်ကြိမ်ဖော်ပြတာက “အကန့်အသတ် မရှိ” ဆိုတဲ့ အဓိပ္ပာယ် ရှိတယ်။ ပေတရုရဲ့ ၇ ကြိမ်ကို ၇၇ ကြိမ်လို့ တိုးလိုက်ခြင်းအားဖြင့် နောက်လိုက်တွေဟာ အကြိမ်အကန့်အသတ် မရှိ ခွင့်လွှတ်သင့်တယ်လို့ ယေရှု ပြောနေတာ။ အဲဒါနဲ့ဆန့်ကျင်ပြီး ဘေဘီလုန် တာလ်မွဒ်ကျမ်း (ရိုးမ ၈၆ခ) မှာ ဒီလိုဆိုထားတယ်– “လူတစ်ဦး အပြစ်တစ်ခုကို ကျူးလွန်ရင် တစ်ကြိမ်၊ နှစ်ကြိမ်၊ သုံးကြိမ်တိုင် ခွင့်လွှတ်လို့ရပေမဲ့ လေးကြိမ်မြောက်ဆိုရင် ခွင့်မလွှတ်ရဘူး။”
nwtsty မ ၁၉:၇ လေ့လာမှု မှတ်စု
ကွာရှင်းစာချုပ်။ ကွာရှင်းဖို့ စဉ်းစားနေတဲ့ အမျိုးသားတစ်ယောက်ကို တရားဝင်စာရွက်စာတမ်း ပြင်ဆင်ဖို့၊ အကြီးအကဲတွေနဲ့ တိုင်ပင်ဖို့ ပညတ်တရားမှာ တောင်းဆိုထားတာက ကြီးလေးတဲ့ ဆုံးဖြတ်ချက်ကို ပြန်သုံးသပ်ဖို့ အချိန်ရစေတယ်။ ပညတ်တရားရဲ့ ရည်ရွယ်ချက်က အဆောတလျင် မကွာရှင်းဖို့၊ အမျိုးသမီးတွေကိုလည်း ကာကွယ်မှု အတော်အတန် ပေးဖို့ ဖြစ်တယ်။ (တရ ၂၄:၁) ယေရှုခေတ်မှာရှိတဲ့ ဘာသာရေးခေါင်းဆောင်တွေကတော့ အလွယ်တကူ ကွာရှင်းပေးခဲ့ကြတယ်။ ပထမရာစု သမိုင်းပညာရှင် ဂျိုစီဖတ်ကိုယ်တိုင်ဟာ ကွာရှင်းထားတဲ့ ဖာရိရှဲတစ်ယောက် ဖြစ်တယ်။ သူက “ဘာအကြောင်းကိစ္စနဲ့မဆို ကွာရှင်းနိုင်တယ်၊ (အမျိုးသားတွေမှာ အကြောင်းပြချက်များစွာ ရှိတယ်)” လို့ဆိုတယ်။
nwtsty မီဒီယာ
ကွာရှင်းစာချုပ်
ဒီကွာရှင်းစာချုပ်ဟာ အေဒီ ၇၁၊ ၇၂ ခုနှစ်လောက်က ဖြစ်ပြီး အာရမိတ်ဘာသာစကားနဲ့ ရေးထားတယ်။ ယုဒတောကန္တာရ၊ ခြောက်သွေ့နေတဲ့ ဝတီမူရဗ္ဗတ်မြစ် မြောက်ပိုင်းမှာ တွေ့ရှိခဲ့တာ ဖြစ်တယ်။ ရောမကို ဂျူးတွေ ပုန်ကန်တဲ့ ခြောက်နှစ်မြောက်မှာ နော့ဆန်ရဲ့သား ယောသပ်ဟာ မဆားဒါးမြို့မှာ နေထိုင်သူ ယောနသန်ရဲ့ သမီး မိရိအံကို ကွာရှင်းပြတ်စဲကြောင်း အဲဒီစာထဲမှာ ရေးထားတယ်။