ǀUniga ǃâb ǁgamǀhaos ǁāǁnâhe ǂgao ra khoe-i ǀkha

ǁĀǁnâdi ge Jehovab di ǀHûǀguitimî-aon di ǂharib kai ǀhaodi tsî ǀkharib kai ǀhaodi tawa ra dīhe. ǁĀǁnâs di ǃhoas khaoǃgâb ge ǃhoa-aoba ǁāǁnâhe ǂgao ra khoena nî mîba în mâ tsî ǀgam dîra hoa khoen nî ǁnâuse ǃeream:

1. Sadu di ǁorena xu ǃhobasen tsî sadu ûiba Jehovaba ǃoa māǁnâsen î du hâ î du ǁÎb ǂâisa dī Jesub Xristub di ǁguibas ǃnâ-ū?

2. ǁNâuǃā î du ra sadu ǁāǁnâs ra sado Jehovab di ǀHûǀguitimî-aon di ǀgui kaisa, Jehovab ǀapeǂhumis di ǁani kai du rasa?

Nē dîde ǃereams ge ra ǁgau ǁāǁnâhe ǂgao ra khoe-i “ǃgâiǃōsib” xoremarib dis ǃnâ ra ǂgomsa tsî i ǁî-e Jehovab ai ama māǁnâsen hâsa. (Rom. 10:9, 10) ǁĀǁnâhe ǂgao ra khoe-i ge nē dîde ǀgores ǃnâ-ū nî ǂâiǃgâ î-i ǁnā tsēs ai ama tsâ i ra ǀgaub ai ǃeream.

Jehovab ai du ge ǀgores ǃnâ māǁnâsen, ǁîb ǀguiba du nî ǃoabasa mîmâi tsî ǁîb ǂâisa dīsa ǂhâǂhâsase sida ûigu ǃnâ ra mû?

ǂGomǃgâ î du ra sao ra ǀhaos ai du nî ǁāǁnâhesa?

ǁĀǁnâs ǃgao tae-i sarana du a ana ǁkhā? (1Tim. 2:9, 10; Jhn. 15:19; Fil. 1:10)

ǃAmkuse da ge nî ana “taob tsî îǂhôasib tsîkha ǀkha” nēs ge nî ǁgau “eloǃaoǃgâsiba” da ūhâ ǃkhaisa. ǁĀǁnâhe ra khoe-i ge tsâ saran hîna khoe-i ǀkhāba ǃgâise ǂganam tama hâ-e ana tide tamas ka io xūna xoa-aisa sarana anas tsîn ge ǃgâi tama. ǃAmku, ǃanu tsî ǃgâi ǀgaub ǃnân ge nî ana, nē ǁaxasiba anu hâse.

ǁĀǁnâhe ra khoe-e mati nî tanisen? (Luk. 3:21, 22)

Jesub di ǁāǁnâs ge Xristeǁîna nētsē aiǁgaus ase ība. ǁÎb ge ǁāǁnâs ǃharosa kaise ǂhâǂhâsase gere mû tsî ǁnāsa ǁîb di ǂūb tsî dīb ǃnâ-ū ge ǁgau. ǁNā-amaga i ge ǁāǁnâs ta dīhe ǃkhaiba tsâ tamas ka io ǀnî hâ xū-i hîna ǁaxasiba ǂhâǂhâsase mûsen kai tide-e tā nî dīhe. ǀAsa Xristeǁî-i ge tā khoe-i hîna go xū-e dan i khama nî tanisen. ǁĀǁnâs ge ǂkhîba ra mā ǁaxasiba xawe i ge ǁnā ǃgâiaǂgaoba ǂhanu ǀgaub ai nî ǁgauhe.

Mâǁaeb hoaba ǀhoade ǃoa īs tsî Xristeǁîn ǀkha hâs tsîna mati nî hui da sida māǁnâsens Jehovab ǃoa-ai da ge dīsa ûiǂuis ǀkha?

Tae-i ǃaroma i a ǂhâǂhâsa ǁāǁnâs khaoǃgâ du Elobmîsa ôaǃnâ tsî aoǁnâ sîsenni ǃnâ nî ǁhao ǃkhaisa?

ǀHAOHÂB ǃÛI-AOGU ǁGUIǂAMDI

ǁĀǁnâhe ǂgao ra khoe-i ga ǁî-i ra ǁāǁnâhe ǂgao ǃkhaisa ǂanǂan o, o i ge ǁî-e nî mîbahe î-i dîde ǃgûǃgâ “Dîdi ǁnān hîna ra ǁāǁnâhe ǂgaon ǃaroma,” 12 sa xu 49ǁî ǂhawegu ai. ǁÎ-i ge “Haisi-ams ǁāǁnâsa tama aoǁnâ-ao-i ǃaroma” di hâ ǃâba nî khomai 7ǁî ǂhaweb ai, ǁguiǃā rasa mati i nî aiǂhomisen ǀgauba ǀhaohâb ǃûi-aogu ǀkha ǁgamǀhaos ǃaroma. ǁĀǁnâhe ǂgao ra khoe-i ge ǂkhanisa a ūhâ ǁkhā ǂhâba i hâ xūna i nî xoaǃnâse tsî i ge nē ǂkhanisa ǁkhowa-amsase a ūhâ ǁkhā ǁgamǀhaos ǃnâ. Xawe i ge ǂhâbasa tama hâ ǀnî hâ khoe-i ǀkha nē dîde ǃgûǃgâsa ǀhaohâb ǃûi-aogu ǀkha i sī nî ǁgamǀhaos aiǃâ.

ǁĀǁnâhe ǂgao ra khoe-i ge ǀhaohâb ǃûi-aogu di mûǂam-aoba nēs xa nî ǂanǂan. Khoe-i hîna ra ǁāǁnâhe ǂgao i ga “Dîdi ǁnān hîna ra ǁāǁnâhe ǂgaon ǃaroma,” di hâ ǃâba khomai toa o, ob ge ǀhaohâb ǃûi-aogu mûǂam-aoba khoe-e nî dî Jehovab ai i ǀgores ǃnâ-ū māǁnâsen hâsa ǁÎb ǂâisa dīs ǃgao. Khoe-i ga māǁnâsen o, ob ge ǀhaohâb ǃûi-aogu di mûǂam-aoba ǀgam ǀhaohâb ǃûi-aokha nî mîba î kha nē khoe-i ǀkha “Dîdi ǁnān hîna ra ǁāǁnâhe ǂgaon ǃaroma,” di hâ ǃâba ǃhoaǃgao. ǀNî hâ ǀhaohâb ǃûi-aob ge ǀgam ǃâkha nî ǃhoaǃgao. ǂHâbasa tama i ge hâ nē dîdi amsi ǃâusa kai ǀhaodi nî hās aiǃâ.

Nē ǀgam ǃâkha ge ǀgui kamab ǃnâ a ǃhoaǂamhe ǁkhā xawe ǁnās xa ǃnāsa ǁaeba ǁgamǀhaos ge ǃgomsi tama. Mâ ǃâb hoab ge ǀgores ǀkha tsoatsoa tsî ǀgores ǀkha nî ǀam. Nē dîdi ge tā ǃnoesase nî dīhe ǀhaohâb ǃûi-aob tamas ka io ǁāǁnâhe ǂgao ra khoe-i xa. ǀHaohâb ǃûi-aogu ge nē ǁgaumâisa ǂgurose nî mâi ǁîgu di ǀapeǁguigu ǃnâ.

Nē dîdi ge ǁāǁnâhe ǂgao ra khoen ǀkha ǀguriǀguri nî dīhe, ǀguis xa ǃnāsases ose. Mâ dîs hoasa gu ga ǀhaohab ǃûi-aoga ǁāǁnâhe ǂgao ra khoe-e ǃeream kai o, o gu ge nî mûǂan matikōse i nē khoe-e amaba ra ǁnâuǃāsa tsî ǁāǁnâs ǃgao i a aiǂhomisa ǃkhaisa. ǁĀǁnâhe ǂgao ra khoe-i ge ǃnāsase nî ǁgâiǂuisen. ǃGame hâ khoe-aogura ge nē dîde ǀguiba a dī ǁkhā.

Tarekhoes ga ǁāǁnâhe ǂgao o, o di ge nē ǁgamǀhaode mûhe ǁkhā ǃkhai i ai nî dīhe. Nē ǁgamǀhaodi ǃoa nî ū saohe khoe-i ge ǀhaohâb ǃûi-ao tamas ka io nî ǀhaohâb hui-ao i. ǁNās ge ǃhoaǃgaohe ra ǃâb hîna nî ǃgûǃgâheba xu nî hâ, sao ra xoaǀgoras ǃnâ i ra ǁgauhe khami.

ǀHaohâb ǃûi-aogu ǀkhaiba gu ge ǀhaohâb hui-aogu hîna ǃgâi ǀgoraǃgâsa a dī ǁkhā ga ǁāǁnâs dîdi hîna Elobmîs ǁkhāǁkhās ai a ǃgaoǃgaosana khoe-i ǀkha nî dī, nēn ge “1Ro ǃâb: Xristeǁîn ǂgomdi” di hâ ǃâb tawa ra hō-e. ǀHaohâb ǃûi-aogu ǀguigu ge “2ǁÎ ǃâb: Xristeǁîn ûiǀgaub” di hâba nî dī. ǀHaohâb ǃnâ i ga ǁgaumâisa ǃgâsaga ǀkhai o, ob ge !narimara mûǂam-aoba nî mîbahe îb ǀgūse hâ ǀhaohâb ai huiba ǂgan.

ǁĀǁnâhe ra khoe-i ga noxoba ǂkhariro i o, o i ge ǁî-i ǁgû-i hîna amab ǃnâ hâ i tsîna ǁnāpa nî hâ i. ǁÎ-i ǁgû-i ga sīhō tama ga ra io, o kha ge ǀgam ǀhaohâb ǃûi-aokha (tamas ka io i ge ǀgui ǀhaohâb ǃûi-aob tsî ǀhaohâb hui-aob tsîna) mâ ǃâb hoab ǃnâ nî ǁhao.

ǀHaohâb ǃûi-aogu ge nî mû ǁāǁnâhe ǂgao ra khoe-i ǂhâbasa Elobmîs ǁkhāǁkhāsa ra ǁnâuǃā ǃkhaisa. ǁÎgu ge ra mû ǂgao ǁāǁnâhe ǂgao ra khoe-i amaba ǂgaob hoab ǀkha ū tsî a ǀnamsa tsî i ǁî-e Jehovab di ǀapeǂhumisa ra ǃgôaǃgâ ǃkhaisa. Khoe-i ga Elobmîs ǁkhāǁkhāde ǁnâuǃā tama io, o gu ge ǀhaohâb ǃûi-aoga nē khoe-e huiba nî mā î-i ega hâ ǁaeb ai ǁâǁnâhe. ǀNî khoen ge aoǁnâ sîsenna i a ǀnam ǃkhaisa i nî ǁgau tsî ǀapeǂhumisa i ǁnâuǀnamxase nî sao ai ga ǁaeba nî māhe. ǀHaohâb ǃûi-aogu ge gā-aisiba nî sîsen-ū tsî kamaba mâ ǃâb hoab ǃaroma nî ǀgoraǂgā, î gu mû nē khoe-i amabes ǃnâ a ǁāǁnâhe ǁkhā ǃkhaisa. ǀNî dîdi ge ǃnubu ǁaeb ǃnâ nî dītoahe tsî di ge ǀnî de gaxu ǁaeba nî ū xawe di ge hoa dîde nî ǃgûǃgâhe.

ǀHaohâb ǃûi-aogu hîna nē ǃâga ra ǃgûǃgâgu ge 3ǁî ǃâb khaoǃgâ nî ǀhao tsî nî mîǁgui nē khoe-i nî ǁāǁnâhes tamas ka io ǁāǁnâhe tidesa. ǀHaohâb ǃûi-aogu ge khoe-i di khaoǃhūb, ǁkhāsib tsî ǀnî hâ mâsigu tsîna ǂâis ǃnâ nî ūhâ. Sida ǃgâiǃgâibasens ge khoen hîna Jehovaba a ǀnam ân tsî Elobmîs amaba ra ūǃoabasen an ǃoa hâ. Sida huib ǀkhan ge ǁîn hîna ra ǁāǁnâhe ǂgaona nî aiǂhomihe ǃgâiǂhôasa aoǁnâs ǃaroma.

ǀGui tamas ka io ǀgam ǀhaohâb ǃûi-aokha ge khoe-i hîna ra ǁāǁnâhe ǂgao i ǀkha ǀhao tsî nî mîba ǁî-i a ǁāǁnâhe ǁkhās tamas ka io ǁāǁnâhe ǁoasa. Khoe-i ga ǁāǁnâs ǃgao ǂhanu o, o gu ge ǀhaohâb ǃûi-aoga ǁî-i ǀkha “ǀUniga ǃâb ǁgamǀhaos ǁāǁnâhe ǂgao ra khoe-i ǀkha” 51 sa xu 53ǁî ǂhawegu ai ra hōheba nî ǃgûǃgâ. ǁÎ-i ga ǀAmosib kōse ǃgâiaǂgao re ti hâ ǂkhanisa toa tama io, o gu ge ǀhaohâb ǃûi-aoga ǁî-e nî ǂkhâǃnâ î-i ǁnā ǂkhanisa ǁkhāǁkhāsen toa ǁāǁnâs khaoǃgâ. ǁĀǁnâhe ra khoe-e mîba re ǁî-i ǁāǁnâs tsēs ge ǀHaohâb aoǁnâ-aon kardi ǃnâ nî xoamâihe ǁî-i ǀons ǃnâ. ǁÎ-e ǂâiǂâiǃnâ re ǀhaohâb ǃûi-aogu ge ǁî-i ǃnāsa ǃgāsasiba ra ū i-i Jehovab di ǀHûǀguitimî-aon di gagasi ǁaxasiga ǃhūbaib ǂhawase kōǃgâ-e ǁkhā tsî i ge ǁî-i tsîna gagasi xūn ǃnâ ǁhao tsî gagasi ǂkhâǃnâsa nî hō. ǀHaohâb ǃûi-aogu ge ǀasa aoǁnâ-ao-e nî ǂâiǂâiǃnâ aoǁnâ-aon di ǃnāsa ǃgāsasib ge Global Data Protection Policy hîna jw.orgs ai hâs ǃoagu ra dīhe. Nē ǃhoaǀhaos ge 10 haigu tamas ka io ǀoro haigu ǀguiga nî ū.

ǀGui kurib nē khoe-i ǁāǁnâs khaoǃgâ gu ge ǀgam ǀhaohâb ǃûi-aoga ǁî-e sari, ǂkhâǃnâ tsî huiba nî mā. ǀGui ǀhaohâb ǃûi-aob ge nî ǁî-i di aoǁnâ sîsenni ǃgubis di mûǂam-ao i. Nē i ga ǂkhamkhoe o, o i ge ǁgûra tsîna nî hâ nē ǁgamǀhaos ǃnâ. Nē saris ge ǀnamxaǃnâ tsî ǂkhâǃnâxa ǀgaub ai nî dīhe. ǀHaohâb ǃûi-aogu ge ǁî-i ǀkha nî ǁgam mati i gagasise ra aiǃgûsa tsî ǃgai ǀgaub ǃnâ nî mîba mati i nî aiǃgûsa. Elobmîsa ôaǃnâs, khomais, omaris ǃoabasa dīs, ǂgomǂgomsase ǀhaode hâǃnâs tsî ǁîdi ǃnâ ǁhaos tsî mâ wekheb hoaba aoǁnâ sîsen-e dīs tsîna i ge nî ǂkhâǃnâhe. (Efe. 5:15, 16) ǁÎ-i ga ǀAmosib kōse ǃgâiaǂgao re ti hâ ǂkhanisa toa tama io, o gu ge ǀhaohâb ǃûi-aoga khoe-e nî ǂgan î-i nē ǂkhanisa ǁî-i ǀkha ǁkhāǁkhāsen toa. ǀHaohâb ǃûi-aogu ge khoe-e māsenxase tsî ǀnamxaǃnâse nî koa. Hoaǁaedi ge ǀapemāde ǀgui tamas ka io ǀgam xūn ai ra māhe.