Ua Kulivanga ua Yoano
4 Vakua cilemo cange, kati mu tsiliele mu mezi ose a kuhuimina,* vunoni esekenu mezi aco linga mu mone nga ana tundu kuli Njambi. Muomu vapolofeto va makuli vavengi, va na lisanduoka ha mavu.
2 Mezi a kuhuimina a kutunda kuli Njambi, mu hasa ku atantekeyela ha viuma evi: Ose atava nguao Yesu Kilistu uezile na muvila ua ntsitu, akeo a kutunda kuli Njambi. 3 Vunoni mezi ose a kuhuimina ka atava Yesu, kati akuli Njambi. Cikuavo naua, akeo mezi a kuhuimina a mukua kuluisa Kilistu* u muavuile nguavo akeza, kaha ali laza ha mavu.
4 Tuana tuange, enu mu vakua Njambi, kaha mua vulu vapolofeto va makuli, muomu uze ua likata nenu ua hiana uze ua likata na vakua mavu. 5 Vapua vakua mavu, ngeci mukemuo ve kuhandeka via mavu kaha vakua mavu ve kuva halakana. 6 Etu tu vakua Njambi. Uose atantekeya Njambi atu halakana; uze kapuile mukua Njambi ka tu halakana. Hakeho ha tue ku tepesela mezi a kuhuimina a vusunga, na mezi a kuhuimina a visaki.
7 Vakua cilemo cange, tu tualelenuho kulilema umo na mukuavo, muomu cilemo ca tunda kuli Njambi, kaha uose uze alema mukuavo na semuka kuli Njambi kaha atantekeya Njambi. 8 Uose kaleme vakuavo, ka tantekeya Njambi, muomu Njambi ikeye cilemo. 9 Njambi uatu soluele cilemo cendi, mu kutuma Muanendi umolika ha mavu, linga tuka tambule muono kuhitila muli ikeye. 10 Njambi uatu muesele eci cilemo, kati ngue yetu tua mu lemene, vunoni ikeye uatu lemene kaha ua tumine Muanendi mu kupua nkombelo ya ku konekela* vipi vietu.
11 Vakua cilemo cange, nga mukemuo mua tu lemene Njambi muze, netu tuapande kulilema umo na mukuavo. 12 Naumo ua monaho laza Njambi uahi. Nga tu tualelaho kulilema umo na mukuavo, Njambi aka tualelaho netu, kaha cilemo cendi ci kapua ca vutuntu* muli yetu. 13 Tu tantekeya nguetu tua likata nendi kaha ikeye ua likata netu, muomu ua tuhana sipilitu yendi. 14 Cikuavo naua, yetu vavenya tua limuenavio kaha tuambulula vukaleho nguetu, Tata ua tumine Muanendi mu kupua Muovole ua mavu. 15 Uose atava nguendi Yesu uapua Muana Njambi, Njambi aka tualelaho kulikata nendi kaha nendi vene aka likata na Njambi. 16 Kaha tua tantekeya na kutsiliela nguetu Njambi ua tulema.
Njambi ikeye cilemo, kaha uose atualelaho kumuesa cilemo, aka tualelaho kulikata na Njambi, na Njambi aka tualelaho kulikata nendi. 17 Omo lievi, cilemo va naci solola kuli yetu mu vutuntu,* linga tuka handeke na kuzituka* cose ha litangua lia kusompesa, muomu ngue muze muafua ikeye,* netu vene mukemuo mu tuafua hano ha mavu. 18 Mu cilemo kamuesi liova, vunoni cilemo ca ku tantuluka ce kusekula liova, muomu liova lieku tu tangula. Mua vusunga, uose ali na liova kesi na cilemo ca kupuamo.* 19 Etu tue kumuesa cilemo, muomu ikeye ua livangele ku tulema.
20 Nga muntu ahandeka nguendi, “Njalema Njambi,” vunoni uazinda muanaye, uapua mukua makuli. Muomu uose kaleme muanaye ya namono, ka citava aleme Njambi intsa kanda amone. 21 Kaha ua tuhana eli lisiko nguendi, uose alema Njambi napande naua kulema muanaye.