Vi tua Pande ku Linga nga Tuli na ku Takania

1-2. (a) Vihula vika va hasa ku lihula vangamba va Yehova? (b) Vika tu lilongesa mu cilongesa cino?

TU VOSE tue ku kala na vimpataa ni ku takania, ambe vakuluntu ni vanike. Ca ku muenako, umo mukuendze a hasa ku lihula nga Yehova ua mu haka mpundu seho. Omo liaco a hasa ku takania nga citava a lihane va mu mbatize ni kuahi. Ni umo muanetu ua hanguile ku tuameka Yehova mu cihela ca ku tonda vupite. Munima ya ku kulupa, ali lika na vimbongo via kupuamo mu ku suka vusoko vuendi. Kaha a hasa ku takania nga ua lingile mpundu cihangula ca cili mua puile mukuendze. Ni nga umo ndumbuetu kesi naua na ndzili, a hasa kuivua vusiua omo lia ku hona ku puisamo naua via kele na ku linga. Vuno mua lihulaho laza nguenu: ‘Vuno Yehova ua nji haka mpundu seho ni? Kapandi ka nja lihakelele mu cipanga ca Yehova ka ka ile mu ngoco ni?’

² Nga tu tualelelaho ku takania, ci hasa ku zeyesa lutsilielo luetu ni vene ku likela ku lemesa Yehova. Mu cilongesa cino, tu mona vati ku tuala mana ku vitume via mu Mbimbiliya ci tu kuasa (1) nga tuli na ku takania nga Yehova ua tu haka seho, (2) nga tuli na ku liveya omo lia vihangula vi tua lingile, ni (3) nga ka tuesi naua na ku puisamo vi tua kele na ku linga mu cipanga ca Yehova.

VIKA MU HASA KU LINGA NGA MULI NA KU TAKANIA?

3. Vika tu hasa ku linga nga tuli na ku takania?

³ Njila imo i tu hasa ku manusuilamo ku takania cetu ya pua ku tondesesa vikumbululo via vihula vietu mu Mbimbiliya. Nga tu lingamo, tu ka kaniamesa lutsilielo na vusamba vuetu na Yehova. Kaha tu ka hasa ku kolesa “mu ku tsiliela.”—1 Kol. 16:13.

4. Vati tu hasa ‘kueseka viuma viose’? (1 Tesalonika 5:21)

⁴ Tandenu 1 Tesalonika 5:21. Mbimbiliya ya tu mamuna nguayo: “Esekenu viuma viose.” Vati tu hasa ku lingamo? Nga ka tuesi na vusunga ku tuala ha vimo, tua pande ku tondesesa vi ya handeka Mbimbiliya. Ca ku muenako, aci singaniekenu umo mukuendze ue ku lihula nga ua kala mpundu na seho ku meso a Njambi. Vuno na pande ku kala lika muze ca ku hona ku tonda cikumbululo ni? Houe, na pande ‘kueseka viuma viose’ mu ku lilongesa Mbimbiliya a tantekeye vati Yehova ue ku mu muenamo.

5. Vati tue “kuivua” vikumbululo via Yehova ku vihula vietu?

⁵ Mu tue ku tanda Mbimbiliya capua vene ngue tuli na ku “kuivua” Yehova. Ka tua pandele lika ku tanda, vunoni ca tondeka ku lihakela kapandi linga tu uane vikumbululo via vihula vietu. Tu hasa ku lingamo mu ku tondesesa mu mikanda yetu mu ku pangesa vikuata via ku tondesesa navio via tu hana Yehova ku hitila mu lukungulukilo luendi. (Visi. 2:​3-6) Kaha tu hasa ku vundila Yehova a tu kuase ku uana vikumbululo via vihula vietu. Munima yaco, tu hasa ku tondesesa vitume via mu Mbimbiliya na mizimbu ikuavo i tu kuasa. Cikuavo naua, capua ca cili ku tanda mizimbu ya vantu va va tumbula mu Mbimbiliya va kele na ku livua ngeci muetu.

6. Vati viuano vie ku tu kuasa nga tuli na ku takania?

⁶ Cikuavo naua, tue “kuivua” Yehova ku hitila mu viuano vietu. Nga tu kunguluka kusua kumo, tu hasa kuivua vikumbululo via vihula vietu ku hitila mu cimpande, ni ku hitila mu cikumbululo ca umo muanetu ni ndumbuetu. (Visi. 27:17) Tu lilongesenu vika vi tu kuasa ku uana vikumbululo vi tu tondeka mpundu.

VUNO YEHOVA UA MI HAKA SEHO NI?

7. Vamo va hasa ku lihula vika?

⁷ Mua lihulaho laza nguenu: ‘Vuno Yehova ue ku nji mona ni?’ Nga mue ku livua nguenu ka mua kele na seho, mu hasa ku singanieka nguenu kacitava mu likuate vusamba na Sakatanga. Muangana Ndaviti halumo nendi ua singaniekelemo. Ngeci ua komokele mua tantekeyele nguendi Yehova ua haka seho ku vantu. Ua handekele nguendi: “Yehova muntu ikeye iya, amba u mu tantekeye? Cipue muana muntu, amba u mu singanieke?” (Visa. 144:3) Kulihi mu hasa ku uana cikumbululo ceci cihula: “Vuno Yehova ua haka seho ku vantu ni?”

8. Kuliya na 1 Samuele 16:​6, 7, 10-12, vika Yehova ue ku mona muli vantu?

⁸ Mbimbiliya ya muesa ngecize, Yehova ue ku mona vaze ve ku soloka ngue ka va kele na seho ku vakuavo. Ca ku muenako, Yehova ua tumine Samuele ku ndzivo ya Njese linga a ka vuavese umo ua vana va Njese kupua muangana ua Isaleli. Kaha Njese ua sanene vana vendi vatanu na vatatu va liuane na Samuele, vunoni munendi ua kasulantsongo Ndaviti ka keleko.b Vutuhu ngoco, Yehova ua hanguile Ndaviti. (Tandenu 1 Samuele 16:​6, 7, 10-12.) Yehova ua muene mpundu vuntu vua Ndaviti, kaha ua tantekeyele ngueni ua lemene cikuma via mu lutsilielo.

9. Vusunga vuka mu hasa ku kala navuo nguenu Yehova ua mi haka seho? (Talenu naua cikupulo.)

⁹ Aci singaniekenu ha viuma via mi lingila laza Yehova mu ku muesa nguendi ua mi haka seho. Ue ku mi hana vimamuna vi mue ku tondeka mpundu. (Visa. 32:8) Evi via muesa ngecize a mi tantekeya vuino. (Visa. 139:1) Nga muononoka vimamuna via Yehova na ku mona vati ue ku mi kuasa, mu ka kala na vusunga nguenu, Yehova ua mi haka seho. (1 Miz. 28:9; Vili. 17:​26, 27) Yehova ue ku mona kapandi kenu ka ku mu pangela na ku muononoka. Ue ku mona naua vifua vienu via cili kaha a tonda ku likuata vusamba nenu. (Yele. 17:10) Cikuavo naua, a ka viukilila cikuma nga nenu mu tava ku likuata vusamba nendi.—1 Yoa. 4:19.

VUNO MUA LINGILE VIHANGULA VIA CILI NI?

10. Vihula vika vi hasa ku katuka nga tu singanieka ha vihangula vi tua lingile?

¹⁰ Vintsimbu vimo vamo va hasa ku takania ku tuala ha vihangula vi va lingile. Halumo va sezele cipanga ci va kele na ku va fueta vimbongo via vingi. Ni vene ka va putukile imo mingoso linga va pangele Yehova mu vutuntu. Vunoni munima ya miaka ya yingi, halumo ve ku mona vakuavo va lingile vihangula vieka, vali na vimbongo via vingi kaha ve ku yoya muono ua cili. Ngeci va hasa ku lihula nguavo: ‘Vuno nja lingile vene vihangula via cili mu ku tuameka Yehova ni? Ni nga nja fuitanganene linga nji kale na vimbongo via vingi?’

11. Visinganieka vika ua luile navio mukua Visamo 73?

¹¹ Nga nenu mue ku lihula vihula vi tua tumbula helu, talenu vi ya handeka Mbimbiliya ku tuala hali mukua Visamo 73. Ua muene vampite vaze ka va kele na ku pangela Yehova, va kele na ku soloka ngue ka va kele na visoti mu muono. (Visa. 73:​3-5, 12) Mukua Visamo mua muene muono ua vantu vaco, ua livuile ngue kapandi ka lihakelele mu ku pangela Yehova ka ile mu ngoco. Visinganieka viaco via mu zeyesele, ngeci ua handekele nguendi: “Litangua liose nja mono ku yanda.” (Visa. 73:​13, 14) Vati ua vulile na visinganieka viaco?

12. Kuliya na Visamo 73:​16-18, vika via kuasele mukua Visamo ku vula visinganieka via ku pihia?

¹² Tandenu Visamo 73:​16-18. Mukua Visamo ua ile ku ndzivo ya Yehova. Ua kele ha kati ka vangamba va Yehova, kaha ua hasele ku hilula vuino. Ua nongonuene nguendi, vutuhu vampite vaze ka kele na ku pangela Yehova va kele na muono ua cili, vunoni ka va kele na lulavelelo. Omo liaco, ka zeyele naua kaha ua nongonuene nguendi, ua lingile cihangula ca cili mu ku tuameka Yehova mu muono. Ngeci mukemuo, ua lihakelele kapandi ka ku tualelelaho ku pangela Yehova.—Visa. 73:​23-28.

13. Vika mu hasa ku linga nga muli na ku liveya ku tuala ha vihangula vi mua lingile? (Talenu naua cikupulo.)

¹³ Ngeci mua mukua Visamo, nenu mu hasa ku vula visinganieka via ku pihia na vukuasi vua Mbimbiliya. Vati mu hasa ku lingamo? Hilulenu ha viuma via cili vi mua kala navio, hamo lika na vivezikiso via Yehova. Kaha vulukenu nguenu, vantu ka ve ku pangela Yehova ka va kele na vukuasi vuendi. Vantu vaco mu ku linga ka va kele na lulavelelo, ngeci ve ku tuala lika mana ku vupite. Mu ntsimbu ino Yehova ua mi hana viuma via cili, na ku mi kulahesa ku ka mi hana naua vikuavo ku lutue. (Visa. 145:16) Aci singaniekenu vati ue ku fuile muono uenu nga ka mua lingile cihangula ca ku tuameka Yehova! Kalenu na vusunga nguenu: Nga vihangula vienu vimanena ha cilemo cenu kuli Njambi na ku vakuenu, kasi mu ka kala na via vingi vi ka mi vuisa ndzolela mu muono.

VUNO YEHOVA KASI UE KU NJI TUALA MANA NI?

14. Vitanga vika ve kulua navio vamo, kaha vika ve ku lihula?

¹⁴ Vamo vangamba va Yehova ka ve ku hasa naua ku puisamo via vingi mu cipanga ca Yehova, omo lia vukulupe na ku vavala. Omo liaco, ve ku livua ngue ka va kele naua na seho kuli Yehova. Ngeci mukemuo, va hasa ku lihula nguavo: ‘Vuno Yehova kasi ue ku nji tuala mana ni?’

15. Vusunga vuka ua kele navuo mukua Visamo 71?

¹⁵ Mukua Visamo 71 ua lisosomuene, muomu ka kele naua na ndzili omo lia vukulupe. Ngeci ua vundilile kuli Yehova nguendi: “Kati u nji seze omo ngolo yange i hua.” (Visa. 71:​9, 18) Vutuhu ua zeyele, vunoni ua kele na vusunga nguendi Yehova ue ku mu tuamenene na ku mu kuasa, nga a tualelelaho ku mu pangela. Mukua Visamo ua tantekeyele nguendi, Yehova ue ku viukilila na vaze ve ku lihakela kapandi ka ku mu pangela, vutuhu ka ve ku hasa naua ku puisamo via vingi.—Visa. 37:​23-25.

16. Vati Yehova ue ku pangesa vakulupe? (Visamo 92:​12-15)

¹⁶ Vakulupe, puenu na ku limona mu cifua ce ku mi muenamo Yehova. A mi kuasa mu tualeleleho ku mu pangela vutuhu mua kulupa. (Tandenu Visamo 92:​12-15.) Kati mu tuale mana ku viuma ka mu hasa ku puisamo, vunoni ku viuma vi mu hasa ku puisamo. Ca ku muenako, mu hasa ku kaniamesa vakuenu ku hitila mu lungano luenu, kaha na seho i mua haka ku vakuenu. Mu hasa ku va leka vati Yehova ua mi kuasele mu ku hita ca miaka, na vikulaheso via mu Mbimbiliya vi mua lavelela cikuma. Cikuavo naua, vulukenu nguenu ku kundika vakuenu mu vivundilo ci hasa ku va kuasa. (1 Pet. 3:12) Mua vusunga, tu vose tu hasa ku hana vimo kuli Yehova na ku vakuetu.

17. Omo lia vika ka tua pandele ku lisetekesa na vakuetu?

¹⁷ Nga mue kuivua vusiua omo lia ku hona ku puisamo via vingi mu cipanga ca Yehova, kalenu na vusunga nguenu Yehova ue ku haka seho ku viose-ovio vi mue ku hasa ku puisamo. Mu hasa kuivua ntsindiye ya ku lisetekesa na vakuenu, vunoni kati mu lingemo. Omo lia vika? Muomu Yehova ke ku tu setekesa na vakuetu. (Ngal. 6:4) Ca ku muenako, Maliya ua hele Yesu mazi a ndando ya kama. (Yoa. 12:​3-5) Kaha ntuluue ua puile cihutu, ua lambuile tumbongo tuvali tua seho ya indende mu tembele. (Luka 21:​1-4) Vutuhu ngoco, Yesu ka setekesele Maliya na ntuluue. Vunoni ua muene nguendi vose vavali va muesele lutsilielo. Na vuno vene, Yehova ua haka seho ya kama ku viose vi mue ku mu lingila muomu mua mu tsiliela na ku mu lema, ambe nga mue ku singanieka nguenu vi mue ku linga via vindende.

18. Vika vi tu kuasa ku vula ku takania cetu? (Talenu naua cikasa “Lizi lia Yehova li mi Kuasa ku Manusula Vimpata.”)

¹⁸ Tu vose, vintsimbu vimo tue ku takania. Vunoni Mbimbiliya i hasa ku tu kuasa ku vula ku takania cetu. Ngeci mukemuo, lihakelenu kapandi ka ku tonda vikumbululo via vihula vienu linga mu kale na vusunga. Mua vusunga, Yehova a mi tantekeya mpundu. Ua haka seho ku vihangula vi mua lingile linga mu mu tuameke mu muono, kaha a ka mi lunguisa. Kalenu na vusunga nguenu, Yehova ua lema vangamba vendi va kuononoka kaha ua va haka seho.