Tualelelenuho ku Vingila Linga Kati mu Uile mu Vieseko

1-2. (a) Cimamuna cika Yesu ua hele ku vandongesi vendi? (b) Omo lia vika vandongesi va sezele Yesu? (Talenu naua vikupulo.)

YESU nguendi: “Cimbembesi ci zanga, vunoni vusitu vu na zeye.”a (Mat. 26:41b) Aa mezi a muesa ngecize, Yesu a tantekeya nguendi ka tua tantulukile kaha tu hasa ku sevuka. Cikuavo naua, mezi aco a muesa ngecize, ka tua pandele ku litsiliela cikuma. Ntsimbu kanda Yesu a handeke mezi aco, vandongesi vendi va handekele nguavo na limo litangua liahi ve ku mu sezele. (Mat. 26:35) Mua vusunga, va tondele ku linga via cili. Vunoni ka va nonguenene nguavo, mu ntsimbu ya visoti ce ku va puilile ca casi ku sevuka. Ngeci Yesu ua va mamuine nguendi: “Vingilenu, na ku vundila, ku tina mu ka kovele mu ceseko.”—Mat. 26:41a.

² Ca vusiua, vandongesi ka va lingile via va lekele Yesu. Muomu mu va mu kuatele, vose va tinine na ku mu seza. Mua vusunga, ka va tualeleleho ku vingila, ngeci va lingile vize vi va handekele nguavo ka va ka vi lingi.—Mat. 26:56.

3. (a) Linga tu tualeleleho kupua vakua vuoloke kuli Yehova, omo lia vika ka tua pandele ku litsiliela cikuma? (b) Vika tu simutuila mu cilongesa cino?

³ Ka tua pandele ku litsiliela cikuma nguetu, ntsimbu yose tu ka linga via cili. Mua vusunga, tue ku lihakela kapandi mangana kati tu linge na vimo viahi vi vuisa Yehova vusiua. Vunoni tu hasa ku sevuka muomu ka tua tantulukile. (Loma 5:12; 7:​21-23) Kaha tu hasa ku hita mu ceseko mu ntsimbu ka tua lavelele. Ngeci mukemuo, linga tu hase kupua vakua vuoloke kuli Yehova na Munendi, tua pande kuononoka cimamuna ca Yesu ca ku tualelelaho ku vingila. Kaha mu cilongesa cino, tu mona vati tu hasa kuononoka cimamuna caco. Ha katete, tu simutuila ha viuma vika tua pande ku zangama navio. Mu nima yaco, tu simutuila vati tu hasa ku liniunga ku vieseko. Mu ku manusuila, tu simutuila vati tu hasa ku tualelelaho ku vingila.

TANTEKEYENU VUZEYE VUENU

4-5. Omo lia vika ca pua ca seho ku liniunga ku vupi ambe nga vua vundende?

⁴ Vupi vumo ka vua puile vua kama, vunoni vu hasa ku zeyesa vusamba vuetu na Yehova. Kaha vu hasa ku tu lingisa ku linga vupi vua kama.

⁵ Tu vose tue ku hita mu vieseko via ku linga vupi. Vunoni nkala muntu ua kala na vuzeye vuendi, ngeci mukemuo tu vose tu hasa ku linga via vipi. Ca ku muenako, halumo kuli umo ali na kulua na ceseko ca ku linga vupi vua kama, ngeci mua vupangala. Vakuavo halumo vali na vuzeye vua ku linga viuma via mazilo, ngeci mua mututa na ku tala via vuntselentsele. Kaha vakuavo co, halumo ve ku niengua vuasi, ku lihalesa, ku likela ku linga via cili omo lia vuoma vua vantu na viuma vikuavo. Tiango ua sonekele nguendi: “Vose ve ku mona vieseko omo masungu avo vavene.”—Tia. 1:14.

6. Vika tua pande ku litavela?

⁶ Mu tantekeya vuzeye vuenu ni? Ka ca puile ca cili ku sembulula vuzeye vuetu na ku singanieka nguetu ka tu hasa ku vulumuna. (1 Yoa. 1:8) Vulukenu nguenu, Paulu ua handekele nguendi, ambe ‘vaze va nahi mu lutsilielo’ va hasa ku uila mu ceseko nga ka va tualelelaho ku vingila. (Ngal. 6:​1, NWT) Ngeci mukemuo, tua pande ku litavela nguetu tua kala na vuzeye.—2 Kol. 13:5.

7. Tua pande ku tuala mana ku vika? Hanenu cimueso.

⁷ Nga tua nongonona vuzeye vuetu, vika tua pande ku linga? Tu lihakelenu kapandi ka ku kaniama linga tu hase ku vula vieseko viaco! Ca ku muenako, ku laza vimo vimbonge va vi zingilikile na vivumbe via ku kola, kaha vitozi va hasele lika ku kovelela ku mbelo. Ngeci mukemuo, kua kele tuniungi vavengi va kele na ku niunga mbonge. Na vuno vene, tua pande ku tuala mana ku vuzeye vuetu linga tu hase ku vula vieseko.—1 Kol. 9:27.

VATI TU HASA KU VULA VIESEKO NA KU LINIUNGA KU VUPI?

8-9. Vika mukuendze ua ku Visimo kapitulu 7, ue ku lingile mangana kati a hete ha ku linga vupi vua kama? (Visimo 7:​8, 9, 13, 14, 21)

⁸ Vati tu hasa ku liniunga ku vupi? Tu ci hilulenu ha muzimbu ua mukuendze u va tumbula ku Visimo kapitulu 7. Ua lingile vupangala na umo mpuevo. Cinimbu 22 nguaco, ua mu kavele “haze vene.” Vunoni ngue mu via muesa vinimbu via ku livanga, ua lingile viuma vikuavo via mu lingisile kamandende-kamandende ku heta ha ku linga vupi vua kama.

⁹ Vika via mu lingisile ku heta na ha ku linga vupi vua kama? Ha katete, “ua hitile mu njila mu hiehi na mankano [a mpuevo mukua vupangala]” ku vutsiki. Kaha ua hitile naua mu njila ya ku ndzivo yendi. (Tandenu Visimo 7:​8, 9.) Mua muene mpuevo uaco, ka mu sondolokele. Vunoni ua tavele ku mu tsemba, kaha ua mu halakanene mua handele via vikombelo via ciyulo via lingile, halumo mu ku seteka ku limuesa nguendi ua puile mpuevo ua cili. (Tandenu Visimo 7:​13, 14, 21.) Nga mukuendze uaco ua liniungile, nga ka hetele ha ku linga vupi vua kama.

10. Vati halumo umo muanetu a hasa ku linga vupi ngeci mua mukuendze u va tumbula ku mukanda ua Visimo?

¹⁰ Muzimbu ua sonekele Solomone, ua muesa vi hasa ku solokela vangamba va Yehova vose. Ca ku muenako, nga umo muanetu a linga vupi vua kama, halumo a hasa singanieka nguendi vupi vuaco vu na mu solokela “haze vene” ni nguetu, mu njila ka lavelelele. Vunoni nga a hilulaho vuino, a hasa ku mona nguendi, ua livangele ku linga vimo vihangula via ku vihia. Kaha vikevio via mu lingisile ku heta ha ku linga vupi vua kama. Cikuavo naua, halumo ua likuatele vusamba na vantu ka va lemene Yehova, ni ua hanguile vueho vua ku pihia. Kaha halumo na ku tala viuma via ku vihia mu internet ni kuya ku vihela vize ka va pandele kuya Vakua Kilistu. Cikuavo naua, halumo ua likelele ku vundila, ku tanda Mbimbiliya, ku kunguluka na kuambulula. Ngeci mua mukuendze u va tumbula ku mukanda ua Visimo, na muanetu halumo ua livangele ku linga vihangula via ku vihia. Kaha vikevio via mu lingisile ku heta ha ku linga vupi vua kama.

11. Vika tua pande ku linga mangana kati tu linge vupi?

¹¹ Vika tu lilongesaho? Ka tua pandele lika ku liniunga ku vupi, vunoni na viuma vi tu lingisa ku heta ha ku vu linga. Vikevio via lomboluele Solomone ku Visimo. Munima ya ku handeka via solokelele mukuendze na mpuevo, Solomone ua mamuine nguendi: “Kati u zimbale mu zinjila zieni.” (Visi. 7:25) Ua handekele naua nguendi: “Fumisa njila yove ku laako neni, kaha kati u suene mu hiehi na lipito lia ndzivo yeni.” (Visi. 5:​3, 8) Ngeci mukemuo, linga tu liniunge ku vupi vua kama, tua pande ku likela ku linga viuma vi tu lingisa ku heta ha ku vu linga.b Evi via lomboloka ku likela ku linga ambe viuma vize ka via puile via vipi kuli Vakua Kilistu, vunoni vi hasa ku tu lingisa ku heta ha ku linga vupi.—Mat. 5:​29, 30.

12. Cihangula cika ua lingile Yombi, kaha vati ku lingamo ca mu kuasele ku liniunga ku vieseko? (Yombi 31:1)

¹² Linga tu liniunge ku viuma vi hasa ku tu lingisa ku linga vupi, tua pande ku vingila. Vikevio via lingile Yombi. Ua lingile “litavasiano na meso [endi],” linga kati a tale mpuevo ueka na masungu. (Tandenu Yombi 31:1.) Ku lingamo ca kuasele Yombi mangana kati a linge vupangala. Na vuno vene, tua pande ku lihakela kapandi tu likele ku linga viuma vi hasa ku tu kovelesa mu ceseko.

13. Omo lia vika tua pande ku zangama na visinganieka vietu? (Talenu naua vikupulo.)

¹³ Tua pande naua ku vingila mu visinganieka. (Ezu. 20:17) Vamo nguavo, ka kuesi citanga ku singanieka viuma via ku pihia, ca cili lika nga ka vesi na ku linga vupi vuaco. Vunoni capua vusonde vua kama ku singaniekamo. Muomu nga muntu a tualelelaho ku singanieka via vipi, na cizango ca ku linga vupi ce ku livuezelela. Omo liaco, ci ka mu kaluuila ku vula vilinga via vipi. Mua vusunga, tu hasa ku kala na visinganieka via ku pihia. Vunoni nga via tu solokela, tua pande ku vi viana vuasi-vuasi kaha na ku singanieka viuma via cili. Ku lingamo, tu ka hasa ku liniunga ku vupi vua kama, muomu ka tu ka tavesa visinganieka via ku pihia vi livuezelele.—Filp. 4:8; Kolo. 3:2; Tia. 1:​13-15.

14. Vika naua tu hasa ku linga tu liniunge ku vieseko?

¹⁴ Vika naua tu hasa ku linga tu liniunge ku vieseko? Tua pande ku tsiliela ngecize masiko a Yehova eku tu kuasa ntsimbu yose mu tue ku ononoka. Vintsimbu vimo ce ku tu kaluuila ku tombuesa visinganieka na vizango vietu ku viuma vie kuya Yehova ku mutima. Vunoni mu tue ku lihakela kapandi ka ku lingamo, tue kuivua ndzolela ya kama.

15. Vati ku kala na vizango via cili ci hasa ku tu kuasa ku liniunga ku vieseko?

¹⁵ Tua pande ku kala na vizango via cili. Nga tu lilongesa ku ‘zinda via vipi na ku lema via cili,’ tu ka tualelelaho ku lihakela kapandi ka ku linga via cili na ku liniunga ku viuma vi tu lingisa ku vulumuna. (Amose 5:15) Cikuavo naua, vizango via cili vie ku tu kuasa ku vula vieseko ka tua lavelele.

16. Vati ku linga viuma vie ku kaniamesa cilemo cetu kuli Yehova, ce ku tu kuasa ku tualelelaho ku vingila? (Talenu naua vikupulo.)

¹⁶ Vati tu hasa ku kala na vizango via cili? Tua pande ku linga viuma vi kaniamesa cilemo cetu kuli Yehova. Mu tue ku kunguluka na kuambulula, cizango ca ku vuisa Yehova ndzolela ce ku livuezelela. Kaha ka ce ku tu puila ca casi ku uila mu vieseko. (Mat. 28:​19, 20; VaHe. 10:​24, 25) Cikuavo naua, kutanda na ku lilongesa Lizi lia Njambi kaha na ku lihilula, ce ku tu kuasa ku lema via cili na ku zinda via vipi. (Yeho. 1:8; Visa. 1:​2, 3; 119:​97, 101) Yesu ua lekele vandongesi vendi nguendi: “[Tualelenuho] ku vundila, ku tina mu ka kovela mu ceseko.” (Mat. 26:41) Ngeci mukemuo, mu tue ku vundila, tue ku hana Tatetu ua muilu vukovelelo vua ku tu kuasa, linga tu tualeleleho ku lihakela kapandi ka ku muononoka.—Tia. 4:8.

TUALELENUHO KU VINGILA

17. Vuzeye vuka ua tualeleleho kulua navuo Petulu?

¹⁷ Halumo tu hasa ku vula vumo vuzeye vuetu. Vunoni, tu hasa tualelelaho kulua na vuzeye vukuavo mu ntsimbu ya kama. Ca ku muenako, kapostolo Petulu ua vianene Yesu lutatu, omo lia liova lia vantu. (Mat. 26:​69-75) Munima ya ntsimbu Petulu ua vulile vuoma vuaco, kaha ua hasele kuambulula ku meso a Mpunga. (Vili. 5:​27-29) Vunoni munima ya miaka, ua likelele kulia na Vakua Kilistu ka va puile vaYundeya muomu “ua zuzukile vaze vakua ku lovoka.” (Ngal. 2:​11, 12) Vuzeye vuendi vua mu hilukilile naua. Cimoneka ngue, ka vulile vuzeye vuendi mu vutuntu.

18. Omo lia vika tua pande ku tualeleleho kulua na vuzeye vuetu?

¹⁸ Ngeci mua Petulu, netu tu hasa kulua na vuzeye vu tua singaniekele nguetu tua vu vula laza. Ca ku muenako, umo muanetu ua litavelele nguendi: “Nja likelele ku tala via vuntselentsele mu miaka 10 kaha nja kele na vusunga nguange nja vulile citanga caco. Vunoni vintsimbu vimo, nja kele na kuivua cizango ca ku vitala naua.” Vunoni muanetu ua tualeleleho kulua. Kaha ua nongonuene nguendi, ua tondekele ku tualelelaho ku lihakela kapandi ka kulua na citanga caco mu muono uendi uose mu mavu ano a api. Na vukuasi vua mpueyendi na vakuluntu mu cikungulukilo, ue ku hasa ku liniunga ku ku tala via vuntselentsele.

19. Vika tu hasa ku linga nga kanda tu vule vuzeye vuetu?

¹⁹ Vika tu hasa ku linga mangana vuzeye vuetu kati vu tu lingise ku vulumuna? Tua pande ku linga via tu sikile Yesu nguendi: “Vingilenu,” ni nguetu ku liniunga ku vieseko. Ambe nga mu livua nguenu mua kaniama, tualelelenuho ku liniunga ku viuma vi hasa ku mi lingisa ku hita mu vieseko. (1 Kol. 10:12) Ngeci mukemuo, tualelelenuho ku linga viuma via mi kuasele kulua na vuzeye vuenu. Visimo 28:14 nguayo: “Ua vezika muntu uze [ue ku vingila] ntsimbu yose.”—2 Pet. 3:14.

VIVEZIKISO VIE KUIZA OMO LIA KU VINGILA

20-21. (a) Vivezikiso vika vi hasa kuizamo nga tu liniunga ku vieseko? (b) Nga tu lihakela kapandi ka ku liniunga ku vieseko, vika Yehova a ka tu hana? (2 Kolintu 4:7)

²⁰ Tu hasa ku kala na vusunga nguetu, kapandi ka tue ku lihakela mu ku vingila ka ke kuya mu ngoco. Vulukenu nguenu ndzolela ya ku linga vupi yapua ‘ya kantsimbu lika,’ vunoni ku yoya kuliya na cizango ca Yehova, ce ku neha ndzolela ya kama. (VaHe. 11:25; Visa. 19:8) Muomu ua tu tangele linga tu yoye kuliya na cizango cendi. (Njen. 1:27) Nga tu lingamo, tu ka kala na mutima ua ku lela kaha tu ka yoya miaka yose.—1 Tim. 6:12; 2 Tim. 1:3; Yun. 20, 21.

²¹ Vutuhu “vusitu vu na zeye,” ni nguetu, ka tua tantulukile, vunoni ka ca lombolokele ngecize, ka tu hasa ku linga na vimo viahi ku tuala ha vuzeye vuetu. Muomu Yehova ua liviukisila ku tu hana ndzili i tua tondeka. (Tandenu 2 Kolintu 4:7.) Njambi ue ku tu hana “ngolo ya ku hiana cikumakuma.” Vunoni ha katete, tua pande ku lihakela kapandi ka ku liniunga ku vieseko. Nga tu lingako mutamba uetu, tu hasa ku kala na vusunga nguetu, Yehova a ka kumbulula vivundilo vietu mu ku tu hana ngolo i tua tondeka. (1 Kol. 10:13) Cili vene, na vukuasi vua Yehova, tu hasa ku liniunga ku vieseko.