Kalenu na Vusunga Nguenu Yehova Akami Lembezieka

1. Vati muono ua vaYundeya uafuile ku Mbambilone?

ACI SINGANIEKENU vati va livuile vaYundeya va yoyele ku Mbambilone. Va muene mu va pihisile cifuti cavo. Omo lia ku hona kuononoka, va va fumisile ku membo avo na ku va tuala ku cifuti ceka. (2 Miz. 36:​15, 16, 20, 21) Ku Mbambilone vaYundeya va hasele ku yoya muono ua tangua na tangua mu ciyulo. (Yele. 29:​4-7) Vunoni mu ku linga kati kukeko ku va tondele ku yoyela, ngeci ka ca puile ca casi. Vati va livuile ku tuala ha visoti viavo? Umo uavo ua handekele nguendi: “Ku vandonga va ku Mbambilonia, kuze tua tumamene, cili, tua lilile, omo tua vulukile Siono.” (Visa. 137:1) Mua vusunga, vaYundeya va tondekele ku va lembezieka. Vunoni iya ue ku va lembeziekele?

2-3. (a) Vika Yehova ua lingilile vaYundeya vakele ku Mbambilone? (b) Vika tu simutuila mu cilongesa cino?

² Yehova ua pua “Njambi ua ku-lembezieka cose.” (2 Kol. 1:3) Ua lema vangamba vendi, kaha a tonda ku va lembezieka. Yehova ua tantekeyele nguendi, vamo vaYundeya va ile ku Mbambilone ve ku liveyele ku vipi viavo na ku mu lemesa mu njila ya cili. (Isaya 59:20) Mu miaka i tuvakana 100 ku nima, tele kanda vaYundeya va va tuale ku Mbambilone, Isaya va mu huiminine ku soneka livulu li va luka lizina liendi. Vati livulu liaco lia va kuasele? Isaya nguendi: “Lembeziekenu, lembeziekenu vantu vange, ngueni Njambi yenu.” (Isaya 40:1) Mua vusunga, ku hitila mu livulu lia Isaya, Yehova ua hele vaYundeya ku lembezieka ci va tondekele.

³ Ngeci mua vaYundeya va kele ku Mbambilone, netu vintsimbu vimo tue ku tondeka ku tu lembezieka. Mu cilongesa cino, tu simutuila ha vinjila vitatu via lembeziekelemo Yehova vaYundeya va kele ku Mbambilone, (1) ua kulahesele kuecela vakua ku liveya, (2) ua hele lulavelelo vangamba vendi, kaha (3) ua va kuasele linga kati vevue vuoma. Tu simutuila naua, vati Yehova ue ku tu lembezieka ngue mua lingile na vaYundeya.

YEHOVA UE KU TUECELA OMO LIA CIKEKETIMA CENDI

4. Vati Yehova uamuesele nguendi uapua mukua cikeketima? (Isaya 55:7)

⁴ Yehova ua pua “Ise ya vikeketima.” (2 Kol. 1:3) Ua muesele cifua caco, mua kulahesele vakua ku liveya va kele ku Mbambilone. (Tandenu Isaya 55:7.) Ua handekele nguendi: “Na ngozi ka i ka hua nji ka ku vuila cikeketima.” (Isaya 54:8) Vati Yehova ua muesele cikeketima? Vutuhu vaYundeya va yoyele miaka ya yingi ku Mbambilone omo lia ku muesa lisino, Yehova ua va kulahesele nguendi ue ku va patuile. (Isaya 40:2) Mua vusunga, mezi aco a lembeziekele vaYundeya vaze va liveyele.

5. Omolia vika tuakala na vusunga vua vuingi kuhiana vaYundeya ku tuala ha kuecela ca Yehova?

⁵ Vika tua lilongesaho? Yehova ue kuecela vangamba vendi mu vutuntu. Tua kala na vusunga vua vuingi ku hiana vaYundeya ngecize, Yehova ue kuecela vipi. Omo lia vika? Muomu tua tantekeya vika ua linga Yehova mangana a tuecele ku vipi. Munima ya miaka ya ingi tunde ha polofetele Isaya, Yehova ua tumine Muanendi ya lema linga a ku patule vakua ku liveya. Mu ku linga Yesu ua tu tsililile, ngeci Yehova ue ku tuecela mu vutuntu. (Vili. 3:19; Isaya 1:18; Efe. 1:7) Mua vusunga, tua vezika ku lemesa Njambi, mukua cikeketima!

6. Vati kutuala mana ku cikeketima ca Yehova cihasa kutu kuasa? (Talenu naua cikupulo.)

⁶ Mezi a Yehova kuli vaYundeya ku Isaya 55:​7, netu a hasa ku tu lembezieka nga tu livua mulonga ku visevuka via laza vutuhu tua liveyele. Halumo tu hasa ku tualelelaho ku livua mulonga cikumakuma nga kasi tu pinda na visoti omo lia visevuka vi tua lingile. Vunoni tu hasa ku kala na vusunga nguetu Yehova ua tuecela ku vipi vietu, nga tua liveya na ku seza vipi viaco. Kaha Yehova mue ku tuecela, ke ku vuluka vipi vietu. (Setekesenu na Yelemiya 31:34.) Nga Yehova ke ku tualelelaho ku singanieka vipi vietu via laza, netu ka tua pandele ku vi singanieka. Muomu via seho ya kama kuli Yehova via pua viuma vi tuli na ku linga mu ntsimbu ino, kati visevuka vietu via laza. (Ezek. 33:​14-16) Kaha vuovuno mu mavu a aha, Tatetu mukua cikeketima a ka manusula tuyando tuezamo omo lia visevuka vietu.

7. Vika tua pande kulinga tutambule vukuasi vua vakuluntu nga tualingi vupi vuakama?

⁷ Vika tua pande ku linga nga mutima uetu ue ku tu paya ku vupi vu tua lingile, na ku vu sueka? Mbimbiliya ya tu mamuna ku tambula vukuasi vua vakuluntu mu cikungulukilo. (Tia. 5:​14, 15) Vutuhu kati ca casi ku va leka vupi vuaco. Vunoni tua pande ku vuluka nguetu, Yehova ue pangesa vamuanetu vaco linga va tu kuase. Kaha ve ku tu muesa cilemo na ngozi ngeci mua Yehova. Tu hilulenu vati Yehova ua pangesele vakuluntu mu cikungulukilo va lembezieke muanetu Arthur.a Muanetu uaco, ua vuile citakutaku omo viuma via lingile. Muanetu Arthur nguendi: “Nja kele na ku tala via vuntselentsele, kampe muaka. Vunoni munima ya ku halakana ku cimpande ca handekele ku tuala ha ku kala na mutima ua ku lela, nja hasele ku lekeleko mpueyange na vakuluntu mu cikungulukilo via vupi vuange. Ku lingamo, ca nji kuasele ku kala na ciyulo mu mutima. Vunoni mu nje ku vuluka viuma vi nja lingile, kasi nje kuivua vusiua. Ngeci vakuluntu va nji vulusuile nguavo Yehova kasi tonda nji pue kavusumba kendi. Cikuavo naua, Njambi ue ku tu sungamesa muomu ua tu lema. Mua vusunga, mezi aco a nji lembeziekele kaha a nji kuasele ku mona ngecize Yehova ua njecelelele.” Hano honi muanetu Arthur ua pua pioneru na mukua kuasa vipanga. Cili vene, ce ku kaniamesa mua kama ku tantekeya nguetu, Yehova ua liviukisila ku tuecela ntsimbu yose nga tu liveya mu vusunga.

YEHOVA UE KU TU HANA LULAVELELO

8. (a) Lulavelelo luka uahele Yehova kuli vaze vakele mu vundzinda? (b) Kuliya na Isaya 40:​29-31, vati va Yundeya va livuile omolia lulavelelo luava hele Yehova?

⁸ VaYundeya va kele ku vundzinda halumo va singaniekele nguavo, na limo litangua liahi ve ku hilukile ku cifuti cavo. Muomu vakua Mbambilone ka va tavesele vindzinda va hiluke ku membo avo. (Isaya 14:17) Vunoni Yehova ua hele vangamba vendi lulavelelo. Ua va ku lahesele nguendi ue ku va patuile. Kaha na vimo viahi via hasele ku mu vindika linga a puisamo cikulaheso caco. (Isaya 44:26; 55:12) Kuli Yehova Vakua Mbambilone ka va kele na ngolo na imo yahi, ngeci mua mpumputa. (Isaya 40:15) Muomu mpumputa ya pua yayasi ku yi pekumuna. Na vuno vene, kuli Yehova ce ku puile ca casi ku patula vangamba vendi va kele ku Mbambilone. Vati eci cikulaheso ca kuasele va Yundeya? Ca va lembeziekele cikuma. Vunoni Yehova ua vuezeleko naua ku hitila muli Isaya nguendi: “Vaze va tumamena Yehova va ka lingisa ngolo yavo ya iha.” (Tandenu Isaya 40:​29-31.) Cili vene, ndzili yavo ye ku puile ngue ya cihungu mue ku londa muilu, muomu lulavelelo luavo lue ku va vuezelele ndzili.

9. Vusunga vuka vakele navuo vaYundeya vuaku kulahela mu vikulaheso via Yehova?

⁹ Yehova ua hele naua vaYundeya vusunga vua ku tsiliela mu vikulaheso viendi. Vati ua lingilemo? Aci singaniekenu vupolofeto vua lipuisilemo laza, vu va tantekeyele vaYundeya. Ca ku muenako, Vakua Asilia va nongesele vuangana vua vaIsaleli vua ku muyati likumi na ku tuala vantu ku vundzinda. (Isaya 8:4) Kaha va limuenenene vakua Mbambilone mu va nongesele Yelusalema na ku va tuala ku vundzinda. (Isaya 39:​5-7) Cikuavo naua, Muangana Zendekiya mu va mu tuvile meso na ku mu tuala ku Mbambilone, navo vamueneko. (Yele. 39:7; Ezek. 12:​12, 13) Mua vusunga, viose via polofetelele Yehova via lipuisilemo. (Isaya 42:9; 46:10) Kaha viose evi via hele vaYundeya vusunga ngecize, cikulaheso ca ku va patula naco ce ku lipuisilemo.

10. Vika vitu kuasa ku tualelelaho ku kaniamesa lulavelelo kuno ku matangua aku kotokela?

¹⁰ Vika tua lilongesaho? Nga tuli mu vusiua, vikulaheso via Yehova vi hasa ku tu lembezieka na ku tu hana ngolo. Viuma mu mavu ano vi li na ku tualelelaho ku pihia cikuma, kaha vitozi va Njambi va li na ku tu luisa. Vunoni ka tua pandele kuivua vusiua. Muomu Yehova ua tu kulahesa nguendi tu ka yoya miaka yose mu Citungu, na ku yoya vuino mu ciyulo. Ngeci mukemuo, tua pande ku haka seho ku lulavelelo luetu. Nga kati ngoco, lulavelelo luetu lu hasa kupua ngue tuli na ku tala cimo citungu ca cili, vunoni ci soloka ca ku tsintsivala muomu tuli na ku citalela ha njanena ya mazilo. Vati tu hasa ku lelesa njanena yetu, ni nguetu, ku tualelelaho ku kaniamesa lulavelelo luetu? Tu hasa ku lingamo nga tu pua na ku hilula vati muono uetu u kapua mu mavu a aha. Tu hasa ku tanda vimpande, ku tala vivideo, kaha na ku halakana ku miaso ya handeka ku tuala ha lulavelelo. Cikuavo naua, tu hasa ku leka Yehova ku tuala ha viuma vi tua lavelela mu Citungu.

11. Vika vieku kuasa umo ndumbuetu kulua na vitanga via cihindu?

¹¹ Tu hilulenu vati lulavelelo lua kaniamesele ndumbuetu Joy, ue kulua na vitanga via cihindu. Ivene nguendi: “Mu nje ku lisosomua mua kama ku tuala ha vitanga viange, nje ku leka Yehova cifua ci nje ku livuilamo, kaha nji tantekeya nguange ue ku njivuisisa. Mu vintsimbu viaco, Yehova ue ku nji hana ‘ngolo ya ku hiana cikumakuma.’” (2 Kol. 4:7) Cikuavo naua, ndumbuetu Joy ue ku lisinganiekela mu mavu a aha, muze “mundambo ka li ka handeka ngueni, nji ku vavala.” (Isaya 33:24) Na vuno vene, nga tu muania mutima uetu kuli Yehova na ku tuala mana ku lulavelelo luetu, tu hasa ku kolesa mu visoti.

12. Omolia vika tuapande kutsiliela mu vikulaheso via Yehova? (Talenu naua cikupulo.)

¹² Ngeci mua lingile na vaYundeya ku Mbambilone, Yehova uatuhana vusunga vuavuingi vutu lingisa kutsiliela mu vikulaheso viendi. Aci singaniekenu ha vupolofeto vuli naku lipuisamo. Caku muenako, tueku mona vuangana vua Anglo-Amerika, vuze vua pua “mutamba vu ka kola, na ku mutamba ku vatuka.” (Ndan. 2:​42, 43) Tue kuivua naua via “mandunduma a mavu kueka na kueka,” kaha tue kuambuluila vantu vaku “vifuti viose.” (Mat. 24:​7, 14) Mua vusunga, kumona kulipuisamo ca vupolofeto ceku tuhana vusunga nguetu vikulaheso viose via Yehova vika lipuisamo mpundu.

YEHOVA UEKU TUKUASA KUHONA KU LISOSOMUA

13. (a) Vitanga vika veku lihitile navio vaYundeya mu ntsimbu ya kuva patula? (b) Kuliya na Isaya 41:​10-13, vati Yehova ua lembeziekele vaYundeya va kele ku vundzinda?

¹³ Yehova uahele vaYundeya vakele ku Mbambilone lulavelelo lua kuva patula, vunoni ua tantekeyele nguendi veku hitile muvitanga ha ntsimbu yaco. Muomu Yehova ua polofetele nguendi vumo vuangana vua ngolo vueku nongesele vifuti via zingilikile Mbambilone. Kaha vuangana vuaco vueku nongesele naua Mbambilone. (Isaya 41:​2-5) Vuno vaYundeya va pandele ku lisosomua ni? Mu miaka yayingi ntsimbu kanda visoloke, Yehova ua lembeziekele vangamba vendi, mu kuva leka nguendi: “Kati u ivue vuoma, muomu ange nji li nove; kati u livete cikumba, muomu yange Njambi yove.” (Tandenu Isaya 41:​10-13.) Vika mpundu ua tondele kuhandeka na mezi, “yange Njambi yove”? Kakele naku vuluisa vaYundeya linga vamu lemese, muomu vavi tantekeyele laza ngecize vapandele kulingamo vene. Vunoni uakele naku vavuluisa nguendi kasi ua kele ku mutamba uavo mukuva kuasa.—Visa. 118:6.

14. Vati Yehova ua lembeziekele naua vaYundeya?

¹⁴ Yehova ua lembeziekele naua vaYundeya muku vavuluisa via ngolo na mana aku komuouesa akala nauo. Ngeci uava lekele kutala ku vintangantanga, na kuvaleka naua nguendi, katangele lika vintangantanga vunoni a tantekeya naua mazina avio. (Isaya 40:​25-28) Navuno vene, nga Yehova a tantekeya mazina a vintangantanga viose, tukalenu na vusunga nguetu Yehova a tantekeya vuino vangamba vendi. Cikuavo naua, nga Yehova uakala na ngolo yakutanga vintangantanga, tukalenu na vusunga nguetu ahasa ku kuasa vangamba vendi. Cili vene, vaYundeya kava pandele kuivua vuoma ni ku lisosomua.

15. Vati Yehova ua viukisile vangamba vendi ku viuma vieku va solokelele ku lutue?

¹⁵ Yehova ua viukisile naua vangamba vendi, vi vapandele kulinga muyeku hetele ntsimbu yaku vapatula. Umo mutamba una hatako ua mukanda ua Isaya, Njambi ua handekele na vangamba vendi nguendi: “Kovela mu hondo yove, na ku lisoka mapito ove. Vanda kantsimbu ka kandendendende, noho matoto a na hiti.” (Isaya 26:20) Mua vusunga, halumo vaYundeya va pangesele eci cimamuna omo Muangana Silu ua nongesele Mbambilone. Umo mukua mizimbu ua ciNgelengu ua handekele nguendi: “Omo Silu na masualale vendi va kovelele mu Mbambilone, kaha uava hele lisiko liaku tsiha uose uva uanene hambelo.” Aci singaniekenu ku zuzuka civa vuile vantu vakele mu Mbambilone! Vunoni, halumo vaYundeya vovokele omolia kukava vimamuna via Yehova.

16. Vika katua pandele kuivua vuoma, omolia viuma vika soloka ha ntsimbu ya lamba ya kama? (Talenu naua cikupulo.)

¹⁶ Vika tua lilongesaho? Lamba yakama vuovuno ikaputuka. Ha ntsimbu yaco vantu vakevua vuoma kaha naku kala mu liuayanga. Vunoni kati vangamba va Yehova, muomu tu tantekeya nguetu Yehova uapua Njambi yetu. Kaha tukahasa kuimana nakusimpa, muomu tua tantekeya nguetu, ‘ku kula cetu ci li na ku suena mu hiehi.’ (Luka 21:28) Kaha ambe civunga ca vifuti cika tuluisa, kasi tuka tualelelaho ku tsiliela muli Yehova. Yehova aka pangesa tungelo mukutu niunga naku tuhana vimamuna vikovola miono yetu. Vati a katu hana vimamuna viaco? Tua pande kulavelela mu ikaheta ntsimbu yaco. Vunoni halumo tuka tambula vimamuna viaco ku hitila mu vikungulukilo. Vati tuhasa ku livuikisila viuma viatu lavelela? Tuapande kulikuata kumo na vamuanetu na vandumbuetu, kaha nakukala na vukatuisi vua kuononoka vimamuna via lukungulukilo lua Yehova, naku tsiliela ngecize Yehova alinaku tuamenena lukungulukilo luetu.—VaHe. 10:​24, 25; 13:17.

17. Vati tuhasa ku lengeya ku lembezieka ca Yehova?

¹⁷ Vutuhu muono ua vaYundeya mu Mbambilone uapuile uaukalu, vunoni Yehova uava hele viose via tondekele. Netu vene Yehova akatu hana vitua tondeka. Ngeci mukemuo, kamua pandele ku lisosomua naviuma via kulutue. Vunoni tualelenuho ku tsiliela muli Yehova naku tonda ku lembezieka cendi. Kaha tsilielenu ngecize Yehova ue kuecela vangamba vendi va kuononoka nakuva niunga. Tualelenuho naua ku kaniamesa lulavelelo luenu. Kaha vulukenu nguenu, Yehova ikeye Njambi yenu, kamua pandele kuivua vuoma na vumo vuahi.