Lizina lia Yehova, Liapande ku Lomboloka Vika Kuli Yetu?

1-2. Vati tua tantekeya nguetu lizina lia Yehova liapua liaseho kuli Yesu?

LIZINA lia Yehova liapua liaseho kuli Yesu. Vati tua tantekeyamo? Muomu kakuesi ueka ualinga viavingi muku hakuila lizina lia Ise. Ngue mutua mono mu cilongesa cina hiti, Yesu ua lihanene na mutima uose naha kutsa, linga a hakuile naku lelesa lizina lia Ise. (Mako 14:36; VaHe. 10:​7-9) Kaha mu nima ya Likulukazi lia Miaka, Yesu aka hiluisa Vuangana kuli Ise muomu uatonda kuhana vumpahu vuose kuli Yehova. (1 Kol. 15:​26-28) Mua vusunga, eci kulikata ca muesa seho na cilemo ca Yesu ku lizina lia Yehova.

² Yesu uezile ha mavu mu lizina lia Ise. (Yoa. 5:43; 12:13) Ua longesele lizina lia Ise ku vandongesi vendi. (Yoa. 17:​6, 26) Cikuavo naua, ua longesele nakulinga vikomoueso mu lizina lia Ise. (Yoa. 10:25) Kaha Yesu ua vundilile vene Yehova linga aniunge vandongesi vendi ‘omo lia lizina lia Ise.’ (Yoa. 17:11) Mua vusunga, Yesu uahaka seho ku lizina lia Yehova kuhiana viuma viose. Vuno citava muntu a handeke nguendi, ueku kava Kilistu nga ka tantekeya lizina lia Ise naku lipangesa ni?

3. Vika tu simutuila mu cilongesa cino?

³ Mukupua Vakua Kilistu vavusunga, tueku tambuluisa Yesu mukuhaka seho ku lizina lia Yehova. (1 Pet. 2:21) Mu cilongesa cino, tuhilula vati lizina lia Yehova lieku solola vaze veku kuambulula “muzimbu ua cili ua Vuangana.” (Mat. 24:14) Cikuavo naua, tu simutuila vati muntu ku muntu ahasa kumuesa seho ku lizina lia Yehova.

“VAVA KA SANESA LIZINA LIENDI”

4. (a) Vika Yesu ualekele vandongesi vendi ntsimbu kanda ahiluke muilu? (b) Cihula cika tu simutuila mu cilongesa cino?

⁴ Ntsimbu kanda ahiluke muilu, Yesu ualekele vandongesi vendi nguendi: “Omo sipilitu santu ikeza hali yenu, muka tambula ngolo kaha mu kapua vakaleho vange mu Yelusalema, na mu Yundeya yose, na mu Samaliya na kua lenga mavu.” (Vili. 1:8) Ngeci mukemuo, muzimbu uacili ve kuambuluile ku vihela viose, kati lika ku Isaleli. Kaha mu kuhita ca ntsimbu, vantu vaku vifuti viose veku uanene vukovelelo vua kuivua muzimbu uaco na kupua vandongesi va Yesu. (Mat. 28:​19, 20) Vunoni Yesu nguendi: “Mu kapua vakaleho vange.” Vuno vandongesi vavaha, veku tondekele ku tantekeya lizina lia Yehova, ni veku puile lika vakaleho va Yesu? Mizimbu yaku Vilinga kapitulu 15, i tukuasa kuuana cikumbululo ca cihula caco.

5. Vati vapostolo na vakuluntu mu Yelusalema, vatantekeyele nguavo vantu vose vatondeka ku tantekeya lizina lia Yehova? (Talenu naua cikupulo.)

⁵ Mu 49 T.K.N., vapostolo na vakuluntu mu Yelusalema va likunguluile muku simutuila viva pandele kulinga Vakua Vifuti, vakuhona kulovoka linga vapue Vakua Kilistu. Kaha ku ntsongo ya ciuano, Tiango ntsongo ya Yesu uahandekele nguendi: “[Petulu] na tu lumbunuina mua cili vati Njambi na tuala mana kuli vakua vifuti lua katete, naku hangulaho vamo vava ka sanesa lizina liendi.” Vuno lizina lieya uahandekele Tiango? Ua vuezeleko mezi a kapolofeto Amose, nguendi: “Linga vantu vaze va salako va tonde mua kama Yehova, hamolika na vantu vaku vifuti viose, vantu vaze vave kusana lizina liange, nguendi Yehova.” (Vili. 15:​14-18) Ngeci mukemuo, ava vandongesi vavaha kava lilongesele lika lizina lia Yehova, vunoni naua veku ‘va sanene ku lizina liendi.’ Eci ca lomboloka ngecize vapandele kuambata lizina lia Njambi kaha omoliaco vantu vahasele kuva nongonona.

6-7. (a) Omolia vika Yesu uezile ha mavu? (b) Vusunga vuka vukuavo vuamu lingisile kuiza ha mavu?

⁶ Lizina Yesu lia lomboloka “Yehova Muovole,” kaha Yehova ua pangesele Yesu mukuovola vose veku muesa lutsilielo. Ngeci Yesu uezile ha mavu naku hana muono uendi mukuovola vantu. (Mat. 20:28) Kaha nkombelo ya Yesu yatu sokuelela njila naku tuhana vukovelelo vuaku kayoya ku miaka yose.—Yoa. 3:16.

⁷ Omolia vika vantu va tondekele kuva patula? Omolia viuma via solokele mu citungu ca Endene. Kaha ngue mutua muene mu cilongesa cina hiti, visemi vetu, Andama na Eva va muesele lisino kuli Yehova. Omo liaco, va zimbalesele vukovelelo vua kuyoya miaka yose. (Njen. 3:​6, 24) Vunoni kuli viuma vikuavo viaseho kuhiana kuovola vantu ku vupi naku kutsa. Viuma vika? Satana uakuita mazilo ku lizina lia Yehova. (Njen. 3:​4, 5) Ngeci mukemuo, kuovoka ca vana va Andama na Eva calikuata na cimpande caseho yakama, kulelesa lizina lia Yehova. Yesu uemanene lizina lia Yehova, ngeci uahanene vukaleho na kulelesa lizina lia Yehova.

8. Vose vatsiliela muli Yesu vapande kuivuisisa vika?

⁸ Vakua Kilistu vose, vapande ku tantekeya nguavo Yehova, Ise ya Yesu ikeye Ndzundzi ya kuovoka cavo. (Yoa. 17:3) Cikuavo naua, ngeci mua Yesu navo vekuambata lizina lia Yehova naku mona seho ya kulelesa lizina liaco. Kaha hakeho hemenena kuovoka cavo. (Vili. 2:​21, 22) Ngeci mukemuo, vose vatondele kupua vandongesi va Kilistu vapandele ku lilongesa vusunga kutuala hali Yehova na Yesu. Ngeci Yesu uamanusuile civundilo cendi, nguendi: “Njina va tantekeyesa lizina liove kaha njika tualelaho ku lingamo, linga valeme vakuavo ngue mu uanji lema ange, kaha yange njika likata navo.”—Yoa. 17:26.

“ENU MU VAKALEHO VANGE”

9. Vati tuhasa kumuesa nguetu tuahaka seho ku lizina lia Yehova?

⁹ Vose veku kava Yesu, vanapande kutuala mana ku seho yaku lelesa lizina lia Yehova. (Mat. 6:​9, 10) Ngeci mukemuo, tuapande kuhaka seho ku lizina lia Yehova kuhiana viuma viose-ovio. Kaha tuhasa kulingamo kuhitila mu mezi na vilinga vietu. Vuno vati tuhasa kulelesa lizina lia Yehova na kumuesa nguetu via handeka Satana kutuala hali Yehova viapua makuli?

10. Ndzango ika ya cimueso va tumbulula ku livulu lia Isaya tupitulu 42-44? (Isaya 43:9; 44:​7-9) (Talenu naua cikupulo.)

¹⁰ Seho ya mutamba uetu mu kulelesa lizina lia Yehova va imuesa ku tupitulu 42-44 ka livulu lia Isaya. Mu tupitulu vaco va handekamo via ndzango ya cimueso. Kaha Yehova ali naku pinga kuvakua kulemesa vanjambi veka linga va muese nga vanjambi vavo vapua vavusunga. Vunoni naumo uahi ahasa kulingamo.—Tandenu Isaya 43:9; 44:​7-9.

11. Kuliya na Isaya 43:​10-12, vika Yehova ua handekele kutuala ha vangamba vendi?

¹¹ Tandenu Isaya 43:​10-12. Yehova ua handekele kutuala ha vangamba vendi nguendi: ‘Enu mu vakaleho vange, . . . kaha Yange nji Njambi.’ Kaha Yehova a lomba linga va kumbulule, cihula eci: ‘Vuno kuali Njambi ueka ku fumisako yange ni?’ (Isaya 44:8) Tuakala na civezikiso muku kumbulula cihula caco. Tueku muesa nguetu Yehova ikeye lika Njambi ua vusunga, kuhitila mu mezi na vilinga vietu. Kaha lizina Liendi liahiana mazina ose. Cikuavo naua, cifua citueku yoyelamo tangua na tangua, tueku muesa nguetu tua lema Yehova kaha tutonda kakatela kuli Ikeye, mu vieseko viose-ovio vihasa kutu kokela Satana. Kulingamo, tueku kulelesa lizina lia Yehova.

12. Vati vupolofeto vuaku Isaya 40:​3, 5 vua lipuisilemo?

¹² Mu tueku hakuila lizina ni lutsimo lua Yehova, tueku tambuluisa Yesu Kilistu. Kaha Isaya ua polofetele naua nguendi umo muntu ueku ‘viukisile njila ya Yehova.’ (Isaya 40:3) Vati vupolofeto vuaco vua lipuisilemo? Yoano Mukua Kumbatiza ua viukisile njila ya Yesu, uze uezile naku handeka mu lizina lia Yehova. (Mat. 3:3; Mako 1:​2-4; Luka 3:​3-6) Cikuavo naua, vupolofeto vua vuezeleko nguavo: “Na vumpahu vua Yehova vu ka soloka.” (Isaya 40:5) Vati via lipuisilemo? Yesu muezile ha mavu uemaneneko Yehova mu vutantuluke. Kaha ua lingilemo, mu cifua caku linga ngue Yehova vene uezile ha mavu.—Yoa. 12:45.

13. Vati tuhasa ku tambuluisa Yesu?

¹³ Netu tuapua vakaleho va Yehova, ngeci mua Yesu. Tuambata lizina liendi kaha tueku lekako vose kutuala ha vipanga viendi viaku komouesa. Linga tu vipuisemo vuino, tuapande naua kuleka vantu mutamba ua Yesu mu kulelesa lizina lia Yehova. (Vili. 1:8) Muomu naumo uahi uahele vukaleho kutuala hali Yehova kuhiana Yesu kaha tueku kava lungano luendi. (Kuso. 1:5) Vika naua tuhasa kulinga muku muesa nguetu tuahaka seho lizina lia Yehova?

VITUHASA KULINGA MUKU MUESA SEHO KU LIZINA LIA YEHOVA

14. Ngue muya muesa Visamo 105:​3, vati tueku muenamo lizina lia Yehova?

¹⁴ Tue kulipamba omolia lizina lia Yehova. (Tandenu Visamo 105:3.) Yehova cekumuya cikuma ku mutima mutue kulipamba kutuala ha lizina liendi. (Yele. 9:​23, 24; 1 Kol. 1:31; 2 Kol. 10:17) Ku ‘lipamba muli Yehova’ ca lomboloka ku lihalesa muli Yehova mukupua Njambi yetu. Capua kuvezika cakama kuliyetu kuleka vakuetu nguetu Yehova uapua uakulela kaha viose vieku linga viapua via vusunga. Ngeci mukemuo, katua pandele kuivua ntsoni muku lekako vakuetu ku vipanga, ku sikola ni va tualihata navo nguetu, tuapua Vakaleho va Yehova. Muomu Satana katondo tuhandeke via lizina lia Yehova ku vakuetu. (Yele. 11:21; Kuso. 12:17) Mua vusunga, Satana na vapolofeto vendi veku sanduola makuli kaha vatonda vantu vasuve lizina lia Yehova. (Yele. 23:​26, 27) Vunoni cilemo cetu ku lizina lia Yehova ceku tulingisa kumu sangaziala “litangua liose.”—Visa. 5:11; 89:16.

15. Ku tambakana lizina lia Yehova, ca lomboloka vika?

¹⁵ Tueku tualelelaho ku tambakana lizina lia Yehova. (Yoele 2:32; Loma 10:​13, 14) Ku tambakana lizina lia Yehova kaca lombolokele lika ku tantekeya lizina Liendi naku lipangesa, houe! Vunoni cambatesela kumo naku tantekeya Vuntu vuendi, kumu tsiliela naku hitukila hali ikeye muku tukuasa naku tuamenena. (Visa. 20:7; 99:6; 116:4; 145:18) Cikuavo naua, tueku lekako vakuetu via lizina na vifua viendi viaku komouesa. Kaha na kuvakuasa kualulula miono yavo linga vaye Yehova ku mutima.—Isaya 12:4; Vili. 2:​21, 38.

16. Vati tuhasa kumuesa nguetu Satana mukua makuli?

¹⁶ Tuatava kuyanda omolia lizina lia Yehova. (Tia. 5:​10, 11) Mu tueku tualelelaho kukakatela kuli Yehova mu ntsimbu ya visoti, tueku muesa nguetu Satana mukua makuli. Ku matangua a Yombi, Satana ua vangeyele vakua ku lemesa Yehova, muku handeka nguendi: “Viose vi a li navio muntu a ka vi hanena muono ueni.” (Yombi 2:4) Kulingamo, Satana ua muesele nguendi vantu veku pangela lika Yehova nga viose vili nakuenda vuino. Kaha nga vahita mu visoti vaka likela kumu pangela. Vunoni mukua lutsilielo Yombi uamuesele hatoma nguendi via handekele Satana viapua makuli. Netu vene, mu visoti viose-ovio viaka tukokela Satana nalimo litangua liahi tukaseza Yehova. Kaha tukalenu na vusunga nguetu Yehova aka tualelelaho kutuniunga omolia lizina liendi.—Yoa. 17:11.

17. Ngue muya muesa 1 Petulu 2:​12, vati naua tueku sangaziala lizina lia Yehova?

¹⁷ Tueku zumbangeya lizina lia Yehova. (Visi. 30:9; Yele. 7:​8-11) Muku linga vantu vatu tantekeya kupua Vakaleho va Yehova, vilinga vietu vihasa ku hana vumpahu ni kusahula lizina lia Yehova. (Tandenu 1 Petulu 2:12.) Ngeci mukemuo, tutonda kulinga viose vituhasa muku sangaziala Yehova mu mezi namu vilinga vietu. Nga tulingamo, tuka zumbangeya lizina liendi ambenga katua tantulukile.

18. Vati naua tueku muesa nguetu tuahaka seho ku lizina lia Yehova? (Talenu naua litota.)

¹⁸ Tuahaka seho yakama ku lizina lia Yehova kutuvakana lutsimo luetu. (Visa. 138:2) Vika capuila ca seho? Muomu cilemo cetu ku lizina lia Yehova, cihasa kulingisa vantu kutuzinda nakutu handeka muaku vihia.a Vunoni Yesu uatavele kumutsiha mu kasahuntu linga a zumbangeye lizina lia Yehova. Seho yahakele Yesu ku lizina lia Ise, yamu kuasele a “yenguile ntsoni” naku hona lisosomua cikuma kutuala havika veku singaniekele vakuavo. (VaHe. 12:​2-4) Kaha uatualele mana ku kupuisamo cizango ca Njambi.—Mat. 26:39.

19. Vati mueku livua kutuala ha lizina lia Yehova, kaha omolia vika?

¹⁹ Capua kuvezika cakama kupua Vakaleho va Yehova na kuambata lizina lia Liendi. Vutuhu kulingamo cekutu kokela kasahutu, vunoni tuka tualelelaho kumu sangaziala, muomu tuahaka seho ku lizina lia Yehova kuhiana lutsimo luetu. Ngeci mukemuo ambenga Satana atu luisa, tu lihakelenu kapandi kaku tualelaho ku sangaziala lizina Yehova. Ngecimua Yesu Kilistu, nga tulingamo tuka muesa nguetu tuahaka seho ku lizina lia Yehova.