Nojua xijtekipano Jehová maske kemantika timoyolkokos

1. ¿Kenijkatsa techpaleuia pampa tiitstokej ipan Jehová itlanechikol?

¡TLAUEL tiyolpakij pampa tiitstokej ipan Jehová itlanechikol! Maske pano miak tlamantli tlen amo kuali pampa tiitstokej ipan itlamia tonali, Jehová techkajtok ma tiitstokaj ipan itlanechikol, kampa nochi timosentikapaleuiaj (Sal. 133:1). Tlen Jehová techmachtia techpaleuia ma tiyolpakikaj ika tochampoyouaj (Efes. 5:33–6:1). Nojkia, techpaleuia amo tlauel ma timotekipachokaj uan ma tiyolpakikaj.

2. ¿Tlake nojua moneki tijchiuasej, uan kenke?

² Maske kiampa tijyolmatij, nojua moneki tijchijtosej kampeka tijtekipanosej Jehová. ¿Kenke? Pampa tlen kiijtouaj uan tlen kichiuaj sekinok, uelis techyolkokos. Nojkia uelis timoyolkokosej kema miakpa timokuapolouaj ika se tlamantli. Ni tlamachtili techpaleuis nojua ma tijtekipanojtokaj Jehová maske: 1) techyolkokos se toikni, 2) maske tonamik kichiuas tlen techyolkokos uan 3) maske timoyolkokosej pampa timokuapolouaj. Ipan sejse tlen ni tlamantli tikitasej tlake techmachtia tlen kichijkej se keskij Jehová itekipanojka uejkajkia.

KEMA SE TOIKNI TECHYOLKOKOUA

3. ¿Tlake tlaouijkayotl kiixnamikij toTeotsij itekipanojkauaj?

³ Tlaouijkayotl. Kemantika toikniuaj kichiuasej se keski tlamantli tlen techkualankamakas. Uelis sekij techyolkokosej o amo kuali technojnotsasej. Uan kemantika ueuejtlakamej nojkia mokuapolouaj. Nopa uelis kichiuas se keskij ma moiljuikaj amo itstokej ipan religión katli melauak. Yeka, se keskij ayokmo kiueyichiuaj Jehová ininuaya toikniuaj, ayokmo kinnojnotsaj katli kinyolkokojkej o ayokmo yauij tlanechikoli (Sof. 3:9). ¿Kuali tlen kichiuaj? Ma tikitakaj tlake uelis tijyekosej tlen se toTeotsij itekipanojka katli nojkia kiampa kipanok.

4. ¿Tlake tlamantli kiixnamijki Pablo?

⁴ Tlen kichijki se toTeotsij itekipanojka. Apóstol Pablo kimatiyaya iikniuaj eliyayaj tlajtlakolejkej. Kema pejki yaui tlanechikoli ipan Jerusalén, miakej kimakasiyayaj uan amo motemachiyayaj ipan ya (Hech. 9:26). Teipa, se keskij kiijilnamijkej (2 Cor. 10:10). Kiitak kenijkatsa se ueuejtlakatl kitlapejpenik se tlamantli tlen ueltoskia kichiuas ayokmo kuali ma tlaneltokakaj sekinok (Gál. 2:11, 12). Uan tlauel moyolkokok kema Marcos, katli nochipa nemiyaya iuaya, ayokmo kinejki kitokilis (Hech. 15:37, 38). Pablo ueltoskia moiljuis ayokmo kinamikiyaya mouikas ininuaya katli kiyolkokojkej. Pero ya amo kikajki nopa tlamantli ma kichiua ayokmo ma kitekipano Jehová uan mosentlalik ipan nopa kuajkuali tlamantli tlen inijuantij kinextiyayaj. ¿Tlake kipaleuik kiampa ma kichiua?

5. ¿Tlake kipaleuik Pablo nojua kuali ma mouika ininuaya iikniuaj? (Colosenses 3:13, 14; nojkia xikita tlaixkopinkayotl).

⁵ Pablo tlauel kinikneliyaya toikniuaj, yeka amo mosentlalik ipan tlen amo kuali, ya kichijki kampeka kiitas nopa kuajkuali tlamantli tlen inijuantij kinextiyayaj. Nopa tlaiknelili kipaleuik ma kintlapojpoljui, kej kiijtok ipan Colosenses 3:13, 14 (xijpoua). Se neskayotl, kema achtoui tlajtolmoyauato uejka, Marcos amo kinejki yas iuaya, pero Pablo kitlapojpoljuik uan amo senkualantoya iuaya. Teipa, kema kintlajkuiljuilik toikniuaj tlen Colosas kiijtok, Marcos tlauel kipaleuijtoya uan kiyolchikajtoya (Col. 4:10, 11). Uan kema kitsaktoyaj ipan Roma, kiiljuik Marcos ma kipaleuiti (2 Tim. 4:11). Pablo amo kema moiljuik toikniuaj amo kema kipatlaskiaj kej elij. ¿Tlake techmachtia tlen kichijki?

6, 7. ¿Tlake techpaleuis nojua ma tikiniknelikaj toikniuaj maske mokuapolouaj? (1 Juan 4:7).

⁶ Tlen techmachtia. Jehová kineki nojua ma tikiniknelijtokaj toikniuaj (xijpoua 1 Juan 4:7). Tlaj se toikni techyolkokok, amo ma timoiljuikaj kiampa kinejki kichiuas. Ma timoiljuikaj mokuapolok uan kichiua kampeka monejnemiltis kej Jehová kipaktia (Prov. 12:18). Maske titlajtlakolejkej, Jehová tlauel techiknelia. Ya amo techtlauelkaua kema timokuapolouaj yon senkualantok touaya (Sal. 103:9). Tlauel moneki ma tijchiuakaj kej Jehová uan ma tikintlapojpoljuikaj sekinok (Efes. 4:32–5:1).

⁷ Nojkia, moneki tikilnamikisej moneki timosentikapaleuisej ininuaya toikniuaj pampa tiitstokej ipan itlamia tonali. Uelis techtlatsakuiltisej o techtsakuasej, yeka tlauel monekis ma techpaleuikaj toikniuaj (Prov. 17:17). Kiampa kipanok Josep,a se ueuejtlakatl katli eua España. Ya uan sekinok toikniuaj amo kinejkej mokalakisej ipan política, yeka kintsajkej. Ya kiijtoua: “Nochi sansejko tiitstoyaj uan kemantika timokualaniyayaj, yeka monekiyaya tijchiuasej kampeka kuali timouikasej uan timotlapojpoljuisej. Nopa techpaleuik amo ma timoxelokaj uan ma timomokuitlauikaj tlen sekinok katli nojkia tsaktoyaj touaya. Nikilnamiki se tonali nimoajkolkokok uan amo tleno ueliyaya nijchiua. Yeka, se toikni nechtlachikueniyaya uan nechpaleuiyaya ika sekinok tlamantli. Nikitak tlauel nechiknelijkej kema más monekiyaya”. Ni kinextia tlaj tijpiaj se kuesoli ika se toikni moneki nima tijsenkauasej.

KEMA TONAMIK TECHYOLKOKOUA

8. ¿Tlake tlaouijkayotl kiixnamikij katli kipiaj ininnamik?

⁸ Tlaouijkayotl. Biblia kiijtoua katli monamiktijtokej kipiaj kuesoli (1 Cor. 7:28). ¿Kenke? Pampa elij tlajtlakolejkej. Nojkia amo sanse kej moiljuiaj yon kinpaktia sanse tlamantli. Amo sanse tlen momajtokej kichiuaj uan amo sanse tlamantli kinpanotok ipan ininnemilis. Uan kej panotia tonali, peuaj kiitaj se keski tlamantli ipan ininnamik tlen achtouia amo kiitstoyaj. Nochi nopa tlamantli uelis kichiuas ayokmo kuali ma mouikakaj. Sekij peuaj kitlajtlakoltiaj ininnamik uan amo kichiuaj kampeka kisenkauasej nopa kuesoli o moiljuiaj más kuali mokauasej o moamaxelosej. Pero, ¿nelia kinpaleuis tlaj kiampa kichiuasej?b Ma tikitakaj tlen kichijki se toTeotsij itekipanojka katli amo kikajki inamik maske kiixnamijki miak tlaouijkayotl.

9. ¿Tlake tlaouijkayotl kiixnamijki Abigail?

⁹ Tlen kichijki se toTeotsij itekipanojka. Abigail monamiktijtoya iuaya Nabal, katli Biblia kiijtoua amo kuali tenojnotsayaya uan kichiuayaya tlen amo kuali (1 Sam. 25:3). Uelis tlauel ouij kej itstoya Abigail. ¿Ueltoskia kikauas iueue? Kena, pampa David kinekiyaya kimiktis Nabal pampa kintlaijiljuik ya uan itekipanojkauaj (1 Sam. 25:9-13). Maske Abigail ueltoskia cholos uan kikauas David ma kimikti Nabal, ya amo kiampa kichijki uan kitlajtlanik David ma kitlapojpoljui uan amo ma kimikti iueue (1 Sam. 25:23-27). ¿Kenke kiampa kichijki?

10. ¿Tlake kipaleuik Abigail amo ma kikaua iueue maske ouij kej itstoya?

¹⁰ Abigail tlauel kiikneliyaya Jehová uan amo kikajki iueue pampa kimatiyaya Jehová tlauel kipatiita kema omej mosenkauaj. Uelis kimatiyaya tlen Jehová kiniljuik Adán uan Eva kema kinsansejkotilik (Gén. 2:24). Abigail kimatiyaya Jehová kineki katli mosenkajtokej nochipa ma itstokaj sansejko. Yeka, kimanauik iueue uan sekinok itekipanojkauaj pampa amo kinekiyaya kiixpanos toTeotsij. Ya amo kinekiyaya David ma kimikti Nabal, yeka nima kichijki se keski tlamantli uan kiiljuik David ma kitlapojpoljui, maske ya amo kiixpanotoya. Jehová tlauel kiiknelik Abigail pampa amo majmajki uan kinpaleuik sekinok. ¿Tlake kinmachtia katli mosenkajtokej tlen Abigail kichijki? Ma tikitakaj.

11. 1) ¿Tlake kineki Jehová ma kichiuakaj katli mosenkajtokej? (Efesios 5:33). 2) ¿Tlake mitsmachtia tlen kichijki Carmen? (Nojkia xikita tlaixkopinkayomej).

¹¹ Tlen techmachtia. Jehová kineki katli mosenkajtokej nochipa ma itstokaj sansejko maske kiixnamikisej tlaouijkayotl. Ya tlauel yolpaki kema kiita katli mosenkajtokej kichiuaj kampeka kisenkauasej ininkuesoljuaj, ika tlatlepanitakayotl uan ika tlaiknelili (xijpoua Efesios 5:33). Ma tikitakaj tlen kipanok Carmen. Kema panotoya chikuasej xiuitl ika monamiktijtoya, pejki momachtia Biblia ininuaya toikniuaj uan moatsonpoliuiltik. Ya kiijtoua: “Noueue amo kipaktik pampa pejki nijtekipanoua Jehová. Nechtlaijiluiyaya uan nechiljuiyaya nechkauaskia”. Maske kiampa kipanok, Carmen nojua kitekipanok Jehová, 50 xiuitl kichijki kampeka nojua kitlepanitas uan kiiknelis iueue. Ya nojua kiijtoua: “Kej panotiajki se keski xiuitl, nijyekok kenijkatsa más kuali nijnojnotsas noueue uan pejki más kuali nijkuamachilia tlen kiyolmatiyaya. Nijmatiyaya Jehová tlauel kipatiita kema omej mosenkauaj. Yeka nijchijki kampeka nojua kuali nimouikas iuaya noueue. Tlauel nikiknelia Jehová nopa nechpaleuik ma nijchiua kampeka amo nijkauas noueue”.c Tlaj tijpia tlaouijkayotl iuaya monamik, ximotemachi Jehová mitspaleuis.

KEMA TECHYOLKOKOUA TLEN TIJCHIUAJ

12. ¿Kenijkatsa uelis tijyolmatisej tlaj titlajtlakolchiuaj?

¹² Tlaouijkayotl. Tlaj titlajtlakolchiuaj uelis timoiljuisej ayokmo uelis kuali tijtekipanosej Jehová. Biblia kiijtoua kema titlajtlakolchiuaj kichiua tlauel ma timoyolkokokaj uan ma timokuesokaj (Sal. 51:17). Kiampa kipanok Robert, se toikni katli miak xiuitl kichijtoya kampeka pampa kinekiyaya tlatekipanos kej tlapaleuijketl ipan tlanechikoli. Pero, kichijki se ueyi tlajtlakoli uan kiixpanok Jehová. Ya kiijtoua: “Tlauel nimoyolkokok ika tlen nijchijki. Tlauel amo kuali nijyolmatki, yeka pejki nichoka uan nimomaijtok. Nimoiljuik Jehová ayokmo nechtlakakiliskia pampa nikixpanotoya”. Tlaj titlajtlakolchiuaj uelis tlauel timoyolkokosej uan timoiljuisej Jehová ya techtlauelkajki uan ayokmo kinamiki tijtekipanosej (Sal. 38:4). Tlaj kiampa mitspanotok, tlauel mitspaleuis tlen kichijki se toTeotsij itekipanojka katli kichijki kampeka nojua kitekipanos Jehová, maske tlajtlakolchijki.

13. ¿Tlake tlajtlakoli kichijki Pedro uan kenke kiampa kichijki?

¹³ Tlen kichijki se toTeotsij itekipanojka. Kema nechka kimiktiskiaj Jesús, Pedro miakpa mokuapolok uan nopa kichijki tlauel ma moyolkoko. Achtoui kiijtok ya amo kitlauelkauaskia Jesús maske nopa sekinok apóstoles kena kitlauelkauaskiaj (Mar. 14:27-29). Uan kema itstoyaj Getsemaní, miakpa kochki (Mar. 14:32, 37-41). Teipa, kema kiitskijkej Jesús, Pedro kikajki iselti (Mar. 14:50). Uan teipa, expa kiijtok amo kiixmatiyaya Jesús uan kitestigojketski Dios (Mar. 14:66-71). ¿Tlake kiyolmatki kema kiitak tlajtlakolchijtoya? Tlauel moyolkokok uan chokak (Mar. 14:72). Tlauel amo kuali kiyolmatki kema kiitak kenijkatsa kikuapilojtoyaj Jesús.

14. ¿Tlake kipaleuik Pedro nojua ma kitekipano Jehová? (Xikita tlaixkopinkayotl).

¹⁴ Pedro nojua kichijki kampeka kuali kitekipanos Jehová uan amo mouejkatlalik. ¿Tlake kipaleuik? Kichijki kampeka mosentilis ininuaya sekinok toikniuaj uan inijuantij kiyolchikajkej (Luc. 24:33). Kema Jesús moyolkuik monextik iixpa Pedro, uelis pampa kinekiyaya kiyolchikauas (Luc. 24:34; 1 Cor. 15:5). Jesús amo kiajuak Pedro pampa kitlauelkajki, ya kiiljuik kimakaskia sekinok tekitl (Juan 21:15-17). Maske Pedro kimatiyaya tlajtlakolchijtoya, nojua kichijki kampeka kitekipanos Jehová. Motemachiyaya Jesús kimatiyaya ya nojua kuali kitekipanoskia Jehová uan toikniuaj kipaleuiskiaj. Ma tikitakaj tlake techmachtia tlen kichijki.

15. ¿Ipan tlake kineki Jehová ma timotemachikaj? (Salmo 86:5; Romanos 8:38, 39; nojkia xikita tlaixkopinkayotl).

¹⁵ Tlen techmachtia. Jehová kineki ma timotemachikaj ya tlauel techiknelia uan kineki techtlapojpoljuis (xijpoua Salmo 86:5; Romanos 8:38, 39). Maske amo kenijki tlaj timoyolkokouaj kema titlajtlakolchiuaj, amo kema ma timoiljuikaj Jehová ayokmo techiknelia uan amo techtlapojpoljuis. Moneki nima tikiniljuisej ueuejtlakamej ma techpaleuikaj. Robert, katli tikijtojkej ipan párrafo 12, kiijtoua: “Nimoiljuik noselti nimonauatiskia uan amo nikiniljuik toikniuaj ma nechpaleuikaj, yeka nitlajtlakolchijki”. Teipa, kiitak monekiyaya kiniljuis ueuejtlakamej tlen kipanoyaya. Robert kiijtoua: “Inijuantij nechpaleuijkej ma nikita Jehová nojua nechiknelia uan amo moiljuijkej ayokmo kema ueliskia kuali nijtekipanos Jehová. Uan nechpaleuijkej ma nikita Jehová amo nechtlauelkajtoya”. Sanse kej Robert, uelis timotemachisej Jehová tlauel techiknelia uan techtlapojpoljuis tlaj nelia timoyolkuepaj, tlaj tijkauaj ma techpaleuikaj ueuejtlakamej uan tlaj tijchiuaj kampeka ayokmo titlajtlakolchiuasej (1 Juan 1:8, 9). Tlaj timotemachiaj Jehová tlauel techiknelia, techpaleuis nojua ma tijtekipanokaj maske timokuapolosej o titlajtlakolchiuasej.

16. ¿Kenke nojua tijneki tijtekipanojtos Jehová?

¹⁶ Jehová tlauel kipatiita nochi tlen tijchiuaj pampa tijnekij tijtekipanosej ipan ni tonali tlen tlauel ouij. Ya techpaleuis nojua ma tijtekipanojtokaj uan amo ma timouejkatlalikaj maske kemantika timoyolkokosej. Uelis tijchiuasej kampeka más tikiniknelisej toikniuaj uan tikintlapojpoljuisej kema techyolkokosej. Nojkia, uelis tijnextisej tlauel tikikneliaj Jehová uan tijpatiitaj kema omej mosenkajtokej, tlaj tijchiuaj kampeka tijsenkauasej nopa kuesoli tlen tijpiaj iuaya tonamik. Uan tlaj titlajtlakolchiuasej, uelis tikiljuisej Jehová ma techpaleui, tikitasej kenijkatsa ya techtlapojpoljuia uan techiknelia uan nojua ma tijchiuakaj kampeka tijtekipanosej. Yeka, amo ma “tikuesiuikaj para tijchiuasej tlen kuali”, pampa tijmatij Jehová tlauel techteochiuas (Gál. 6:9).