Nochipa xijtokili Jesús maske ya timoatsonpoliuiltik

1, 2. ¿Kenijkatsa kipaleuia kema se akajya moatsonpoliuiltia?

KEMA se akajya moatsonpoliuiltia peua eli se tlen Jehová ichampoyouaj uan nopa kichiua tlauel ma yolpaki. Katli kiampa kichijtokej uelis kiyolmatij sanse kej David katli kiijkuilok ni salmo: “Nelia tipakij miak tojuantij tlen titechtlapejpenijtok para ma tiualakaj uan ma tiitstokij mouaya ipan moteopa tlen tlatsejtseloltik” (Sal. 65:4).

² Pero Jehová amo mouampojchiua ika aki ueli. Kej tikitakej ipan tlamachtili 9, Jehová kinnechkauia san katli kinextiaj nelnelia kinekij mouampojchiuasej iuaya (Sant. 4:8). Kema tijmaktilik Jehová monemilis uan timoatsonpoliuiltik, pejki timouampojchiua iuaya. Yeka, uelis timotemachis Jehová mitsmakas “miak tlateochiualistli hasta tlauel mokauas” (Mal. 3:10; Jer. 17:7, 8).

3. ¿Tlake moneki tijchiuasej nochi katli ya tijmaktilijkej Jehová tonemilis uan timoatsonpoliuiltijkej? (Eclesiastés 5:4, 5).

³ Kema se akajya moatsonpoliuiltia, peua kitekipanoua Jehová. Yeka, tijnekij tijchiuasej tlen tijtenkauilijkej kema tijmaktilijkej tonemilis maske techyoltilanas tlen amo kuali o tikixnamikisej tlaouijkayotl (xijpoua Eclesiastés 5:4, 5). Nojkia tijnekij tijchiuasej tlen Jesús technauatik uan tijchiuasej kej ya kichijki (Mat. 28:19, 20; 1 Ped. 2:21, TNM). Ni tlamachtili techpaleuis kiampa ma tijchiuakaj.

NOCHIPA XIJTOKILI JESÚS MASKE TIKIXNAMIKIS TLAOUIJKAYOTL O MITSYOLTILANAS TLEN AMO KUALI

4. ¿Kenijkatsa katli tijtekipanouaj Jehová kejuak tijuikaj se kuauitl tlen techtlaijiyouiltia? (Lucas 9:23).

⁴ Amo ximoiljui kema ya timoatsonpoliuiltis ayokmo tikixnamikis tlaouijkayotl. Jesús kiijtok katli kitokiliskia, mojmostla kiuikaskia se “kuauitl tlen ika tlaijiyouis” (xijpoua Lucas 9:23). Jesús amo kinejki kiijtos itokilijkauaj nochipa tlaijiyouiskiaj, ya kinejki kiijtos, maske kiseliskiaj tlateochiualistli nojkia kiixnamikiskiaj tlaouijkayotl uan se keski eliskia tlauel ouij (2 Tim. 3:12).

5. ¿Tlake tlateochiualistli kiijtok Jesús kiseliskiaj katli kikauaskiaj se keski tlamantli pampa kinekij kitekipanosej Jehová?

⁵ Uelis ya tikixnamiktok tlaouijkayotl pampa uelis mochampoyouaj amo kinekij xijtekipano Jehová o uelis tijkajtok se keski tlamantli pampa tijneki tikachtouitlalis tijtekipanos toTeotsij (Mat. 6:33). Tlaj kiampa tijchijtok, uelis timotemachis Jehová kiita nochi tlen tijchiua pampa tijneki tijtekipanos (Heb. 6:10). Uelis tikitstok kenijkatsa moaxitia tlen Jesús kiijtok: “Katli kikajtejtok ichaj, iikniuaj, isiuaikniuaj, inana, itata, ikoneuaj o itlal pampa eli notokilijka uan kineltoka nopa kuali tlamachtili, kiselia ipan ni tonali 100 ueltas más: ichaj, iikniuaj, isiuaikniuaj, inana, ikoneuaj o itlal, maske kitlaijiyouiltiaj; uan ipan nopa tonali tlen uala kiselis nemilistli tlen amo kema tlamis” (Mar. 10:29, 30). Maske tijkajtejtok se keski tlamantli, tijselijtok miak tlateochiualistli (Sal. 37:4).

6. ¿Kenke nojua moneki tijchiuas kampeka amo tijchiuas tlen amo kuali maske ya timoatsonpoliuiltik?

⁶ Maske ya timoatsonpoliuiltik, nojua moneki tijchiuas kampeka amo tijchiuas tlen amo kuali (1 Juan 2:16). Kiampa moneki tijchiuas pampa nojua tieli titlajtlakole. Uelis kemantika tijyolmatis kej apóstol Pablo, ya kiijtok: “Ipan noyolijtik nijneki nijchiuas tlen kiijtoua itlanauatil Dios, pero nikita ipan notlakayo eltok seyok tlanauatili tlen moteuia ika nopa tlanauatili tlen eltok ipan notlalnamikilis. Nopa tlanauatili eli tlajtlakoli tlen eltok ipan notlakayo uan nechnauatia” (Rom. 7:22, 23). Uelis kemantika amo kuali tijyolmati pampa mitsyoltilana tlen amo kuali. Tlauel mitspaleuis amo tijchiuas tlen mitsyoltilana, tlaj timoyoliljuis tlen tikiljuik Jehová kema tijmaktilik monemilis, pampa nopa mitspaleuis amo xitlajtlakolchiua. ¿Kenke kiampa tikijtouaj?

7. ¿Kenke mitspaleuis amo xijtlauelkaua Jehová tlaj tikilnamikis tijmaktilik monemilis?

⁷ Kema se akajya kimaktilia Jehová inemilis, mosentlalia ayokmo kichiuas san tlen ya kineki. Nopa kiijtosneki ayokmo kichiua tlen kiyoltilana yon mosentlalia ipan sekinok tlamantli tlen Jehová amo kipaktia (Mat. 16:24). Yeka, kema tikixnamikij se tlaouijkayotl o techyoltilana se tlamantli, amo timoiljuijtinemij tlake tijchiuasej pampa timosentlalijtokej amo tijtlauelkauasej Jehová uan nochipa tijchiuasej tlen ya kipaktia. Tlaj kiampa tijchiuasej, tielisej kej Job. Maske kiixnamijki miak tlaouijkayotl, ya mosentlalik amo kema kitlauelkauas Jehová (Job 27:5, TNM).

8. ¿Kenke tlaj timoyoliljuiaj ipan tlen tikiljuijkej Jehová kema timotemaktilijkej techpaleuis amo ma tijchiuakaj tlen techyoltilana?

⁸ Tlaj timoyoliljuiaj tikiljuijkej Jehová nochipa tijchiuasej ipakilis, techpaleuis amo ma tijchiuakaj tlen techyoltilana. Yeka, amo kema tijnextiskiaj tikixtokaj se akajya katli ya kipia inamik. Kema tijmaktilijkej Jehová tonemilis, timosentlalijkej amo kema tijchiuasej nopa tlamantli. Tlaj amo tijkauaj ma kalaki tlen amo kuali ipan toyolo, teipa amo titlaijiyouijtosej pampa techyoltilana tlen amo kuali. Kiampa amo tinemisej ipan “ininojui tlakamej tlen axkitlepanitaj TOTEKO” (Prov. 4:14, 15).

9. ¿Kenke tlaj timoyoliljuiaj ipan tlen tikiljuijkej Jehová kema timotemaktilijkej techpaleuis ma tikachtouitlalikaj tijtekipanosej?

⁹ Uan, ¿tlaj techiljuiaj ma tijselikaj se tekitl tlen amo techkauas ma tiakaj tlanechikoli? Ya tijmatij tlake tijchiuasej pampa maske ayamo techiljuiaj nopa tlamantli, ya timosentlalijtokej amo tijselisej. Yeka, amo tijseliskiaj nopa tekitl uan teipa tikitasej kenijkatsa nojua uelis tikachtouitlalisej tijtekipanosej Jehová. Tlen Jesús kichijki uelis techpaleuis. Ya mosentlalijtoya nochipa kiyolpakiltis iTata. Sanse kej ya, timosentlalijtokej amo kema tijchiuasej yon se tlamantli tlen Jehová kikualankaita pampa tijmaktilijkej tonemilis (Mat. 4:10; Juan 8:29).

10. ¿Kenijkatsa Jehová techpaleuis nochipa ma tijtokilikaj Jesús?

¹⁰ Kema tikixnamikij tlaouijkayotl uan kema amo tijchiuaj tlen techyoltilana, tijnextiaj timosentlalijtokej tijtokilisej Jesús. Uan timotemachiaj Jehová techpaleuis kiampa ma tijchiuakaj, pampa Biblia kiijtoua: “Pero Toteko, yajaya temachtli, uan axkikauilis ma inmechyoltilana se tlajtlakoli hasta kampa ayok uelis inkixikosej. Nochipa ipan nopa tlalochtli inmechnextilis kejatsa uelis incholosej para axintlajtlakolchiuasej” (1 Cor. 10:13).

¿TLAKE TECHPALEUIS NOCHIPA MA TIJTOKILIKAJ JESÚS?

11. ¿Kenijkatsa uelis nochipa tijtokilisej Jesús? (Nojkia xikita tlaixkopinkayomej).

¹¹ Jesús kitekipanok Jehová ika nochi iyolo uan kuali mouampojchijki iuaya pampa nochipa momaijtouayaya (Luc. 6:12). Tlaj ya timoatsonpoliuiltik, uelis nojua tijtokilis Jesús tlaj mojmostla tijchiuas tlen mitspaleuis más kuali timouampojchiuas iuaya Jehová. Biblia kiijtoua: “Moneki mojmostla ma tinejnemikaj keja kiijtoua nochi itlajtol tlen ya tijmajtokej” (Filip. 3:16). Uelis kemantika tijkakis se keskij toikniuaj mosentlalijkej más kitekipanosej Jehová. Uelis se keskij yajkej Kampa kinmachtiaj katli senkistok tlatekipanouaj o uelis yajkej kampa amo itstokej miakej tlajtolmoyauanij. Tlaj tiueli, ta nojkia uelis kiampa tijchiuas. Nochi katli kitekipanouaj Jehová nochipa kichiuaj kampeka más kuali kitekipanosej (Hech. 16:9). ¿Uan tlaj amo ueli kiampa tijchiua? Amo ximoiljui amo mopati. Tlauel ipati nochipa tijchijtos kampeka nojua tijtekipanos Jehová (Mat. 10:22). Nochipa xikilnamikto Jehová tlauel yolpaki pampa tijchiua kampeka tijtekipanos ika tlen ta tiueli. Tlaj kiampa tijchiuas, nochipa tijtokilis Jesús maske ya timoatsonpoliuiltik (Sal. 26:1).

12, 13. ¿Tlake uelis tijchiuas tlaj tikita ayokmo tlauel tiyolpaki kema tijtekipanoua Jehová? (1 Corintios 9:16, 17; nojkia xikita nopa recuadro “¿Tlake uelis tijchiuas tlaj nojua tijneki tijtekipanojtos Jehová?”).

¹² ¿Uan tlaj tikita ayokmo timomaijtoua ika nochi moyolo, uan ayokmo tiyolpaki kema titlajtolmoyaua o kema tijpoua Biblia? Tlaj kiampa mitspano kema ya timoatsonpoliuiltik, amo ximoiljui ayokmo tijpia ichikaualis Dios. Nochi titlajtlakolejkej, yeka kemantika kiampa tijyolmatij. Tlaj tikita ayokmo tlauel tiyolpaki kema tijtekipanoua Jehová, ximoyoliljui ipan tlen kichijki apóstol Pablo. Maske ya kichiuayaya kampeka kichiuas kej Jesús, kimatiyaya kemantika ouij kimatiskia kichiuas tlen Jehová kineki (xijpoua 1 Corintios 9:16, 17). Ya kiijtok: “Pero yonke axnijnekiskia, nojua moneki nitlakamanalos itlajtol, pampa Toteko kitlalik nomako ni tekitl uan moneki nijchiuas”. Tlen kiijtok kinextia Pablo mosentlalijtoya kichiuas nopa tekitl tlen Jehová kimakatoya, maske kemantika ouij kimatiskia.

¹³ Amo xijkaua tlen tijyolmati ma mitsyakana kema tijtlapejpenis se tlamantli. Ximosentlali nochipa tijchiuas tlen kuali, maske kemantika amo tijnekis. Tlaj kiampa tijchiuas, teipa ayokmo ouij tijmatis tijchiuas tlen kuali. Nochipa tijtokilis Jesús, tlaj mojmostla tijchiuas tlen mitspaleuis kuali titlaneltokas. Uan toikniuaj tlen motlanechikol tlauel kinyolchikauas kema kiitasej tijchiua kampeka nochipa tijchiuas tlen Jehová kipaktia (1 Tes. 5:11).

NOCHIPA “XIMOTLAJTLACHILIKAJ”

14. ¿Tlake tlamantli moneki timotlajtlanisej uan kenke moneki kiampa tijchiuasej? (2 Corintios 13:5).

¹⁴ Maske ya timoatsonpoliuiltik, kemantika moneki tijtlachilis tlake tlamantli timomajtok tijchiua (xijpoua 2 Corintios 13:5). Uelis tikitas tlaj mojmostla timomaijtoua, tijpoua uan timomachtia Biblia, tlaj nochipa tia tlanechikoli uan titlajtolmoyaua. Xikita tlake mitspaleuis ma mitspakti tijchiuas ni tlamantli, uelis timotlajtlanis: “¿Ueli nikixtoma nopa tlamachtili tlen amo ouij tlen Biblia tlamachtia? ¿Tlake uelis nijchiuas uan kiampa más niyolpakis kema nitlajtolmoyauas? ¿Nikiljuia Jehová tlen nelnelia nijyolmati kema nimomaijtoua uan nijnextia nimotemachia ipan ya? ¿Nijchiua kampeka nochipa nias tlanechikoli? ¿Tlake uelis nijchiuas uan kiampa más kuali nitlakaktos uan más kuali nitlanankilis ipan tlanechikoli?”.

15, 16. ¿Tlake techmachtia tlen kipanok Robert?

¹⁵ Nojkia tlauel mitspaleuis tlaj tikitas tlake tlamantli mitsyoltilana. Tlen kipanok Robert kinextia kenke tlauel moneki kiampa tijchiuasej, ya kiijtoua: “Kema nijpixtoya 20 xiuitl, nitekitiyaya se keski tonali. Se tonali kema ya tlantoya titekitij, se ichpokatl katli iuaya nitekitiyaya nechiljuik ma nia ichaj. Kiijtok tiitstoskiaj toselti uan ueliskia timoyolpakiltisej. Achtoui nikiljuik se keski tlamantli, pero teipa nikiljuik amo niaskia iuaya uan nikixtomilik kenke amo nijchiuaskia”. Maske tlauel kuali pampa Robert amo kichijki tlen kiyoltilanayaya, kema moiljuik tlen panotoya, kiitak ueltoskia nima kiiljuis amo yaskia iuaya. Ya kiijtoua: “Amo nijchijki kej José kema isiua Potifar kinejki motekas iuaya (Gén. 39:7-9). Amo nimoiljuik tlaj nijmatiskia tlauel ouij nikiljuis amo. Tlen nechpanok, nechpaleuik ma nikita monekiyaya más kuali nimouampojchiuas iuaya Jehová”.

¹⁶ Ximoiljui mitsyoltilanki se tlamantli tlen amo kuali uan amo tijchijki, maske amo tijchijki, uelis tijchiuas kej Robert uan timotlajtlanis: “¿Ouij nijmatki nikijtos amo nijchiuas?”. Tlaj tikita nojua moneki tijpatlas se keski tlamantli, amo ximoyolkoko, tlauel kuali pampa tikitak tlake tlamantli mitsyoltilana. Xikiljui Jehová tlen mitspano uan xijchiua tlen mitspaleuis nochipa timosentlalijtos tijchiuas tlen Jehová kipaktia (Sal. 139:23, 24).

17. ¿Kenijkatsa tlen kipanok Robert kinextia uelis tijuejkapantlalisej Jehová itoka tlaj amo tijchiuaj tlen amo kuali?

¹⁷ Nojua ma tikitakaj tlen kipanok Robert. Ya nojua kiijtoua: “Kema nikiljuik nopa ichpokatl amo niaskia iuaya, ya nechiljuik: ‘Amo nelia tlen nechiljuijkej’. Nijtlajtlanik tlake kinekiyaya kiijtos. Nechiljuik se iuampox katli achtouia eliyayaj se tlen Jehová itlajtoltemakauaj, kiiljuik nochi telpokamej katli kitekipanouaj Jehová, kema kiitaj ichtakatsi uelis kichiuasej tlen amo kuali, nima kichiuaj. Yeka, nopa ichpokatl kiiljuik iuampo ika tlen na nijchiuaskia kiitaskia tlaj melauak tlen kiiljuijtoya. ¡Tlauel niyolpaki pampa amo nijsokiuik Jehová itoka!”.

18. ¿Tlake timosentlalijtok tijchiuas maske ya timoatsonpoliuiltik? (Nojkia xikita nopa recuadro “Ome tlamachtili tlen tlauel mitspaleuis”).

¹⁸ Kema tijmaktilik Jehová tonemilis uan timoatsonpoliuiltik, tijnextik nochipa tijneki tijueyichiuas Jehová itoka maske tikixnamikis tlaouijkayotl. Uan uelis timotemachis Jehová kimati tlake tlaouijkayotl tikixnamiki uan kiita kema amo tijchiua tlen mitsyoltilana. Ya kiita tijchiua kampeka timonejnemiltis kej ya kipaktia uan mitsteochiuas pampa kiampa tijchiua. Ika ichikaualis mitspaleuis nochipa xijchiua tlen kuali (Luc. 11:11-13). Ika Jehová itlapaleuil, uelis nojua tijtokilis Jesús maske ya timoatsonpoliuiltik.