¿TONI UELIS TIKCHIUASKEJ KEMAN TEL TAPATIYOUA?

Kuali xikonkui motomin

Keman nochi tapatiyoua, tinochin titajyouiaj. Sayoj ke uelis tikonchiuas seki taman para kuali tietos.

KEYEJ MONEKI

Komo amo tiknemiliaj keniuj kuali tikuiskej tomin, niman uelis tiktamiskej tein tiktanij. Nejon kichiuas maj tikpiakan okseki kuejmolmej uan maj timoteltekipachokan. Maski amo tikpiaskej miak tomin, uelis tikchiuaskej seki taman para kuali tikuiskej.

TONI UELIS TIKONCHIUAS

Sayoj xikoua tein mitsonajsis. Komo ijkon tikonchiua, tiyolseujtos uan tikmatis toni tikchiuas keman teisa panos.

Komo tikonneki maj mitsajsi motomin, xikonijkuilo kanachi tiktani, xikonnemili toni yekmelauj mitspoloua uan keniuj tikuis motomin. Xionmochikaua tikouas sayoj tein tikonijkuiloj uan komo amo semi tiktaniok tomin oso okachi tapatiyoua, xikonpata tein tikonijkuiloj. Uan komo tikonpia motakatsin oso mosiuatsin, nochipa xikonixejekolti tein tikixtalij tikchiuas.

Xikonchiua nejin: Komo tikonpia tomin, xiktamiixtaua teisa uan amo ximocuentajti oso ximotauikalti. Miakej kiitanij ke nejon kinpaleuia maj kimatikan itech toni kikuiskej inintomin uan maj amo motauikaltikan. Uan komo tikonpia tomin itech banco, nochipa xikonita kanachi tikpia. Komo tikonmati kanachi tomin uelis tikuis, mitspaleuis amo semi ximotekipacho.

Xa ouij yeski techajsis tomin para tikouaskej nochi tein moneki. Sayoj ke uelis techpaleuis komo kuali tikixtaliaj itech toni tikuiskej tomin, uan xa hasta amo semi ika timotekipachojtoskej.

‘Xikixejekokan kanachi tomin monekis’ (Lucas 14:28).

Kuali xiontekiti. ¿Toni uelis tikonchiuas para nochipa tikpias tekit? Xionmochikaua nochipa hora tiajsis kampa titekiti uan okachi itech xitanemili tein tikuelita de nejon tekit. Xikontemo keniuj tikinpaleuis oksekin, xikinpoujkaita oksekin uan chikauak xiontekiti. Xikonchiua ijkon kemej mitsonnauatis akin tiktekitilia uan xionmochikaua okachi kuali tikchiuas teisa.

Amo xikauilchiua tomin. Xionmotajtani: “¿Nikoua seki taman tein amo moneki oso tein amo nechpaleuia?”. Miakej kiauilchiuaj inintomin uan kikouaj drogas, cigarros, tayil tein teuintij uan kikuij inintomin para ika mauiltiskej. Nochi nejin uelis kichiuas maj se kokolispeua uan maj amo se kipiaok tekit.

“Yolpaki takat akin kitemoua mochiuas tamatkej […]. Okachi kuali ke se kitanis plata” (Proverbios 3:13, 14).

Xikonxelo tomin para keman monektikisas. Keman tiuelis xikonxelo tepitsin tomin para keman panos se ijsiujkayot oso monektikisas teisa. Tikpias tepitsin tomin mitspaleuis keman panos teisa tein amo tiknemiliaya ke panoskia. Xa tejuatsin oso se mochankauj kokolispeuas oso xa amo nankipiaskejok tekit.

“Nochin kinpanoua tein amo kuali uan tein amo kichiayaj” (Eclesiastés 9:11).

¿Keniuj uelis tikyekpias motomin?

Xitakualchiua kalijtik

Okachi patiyoj kisa komo se takua calle, uan komo se kikoua teisa tein se tayis oso se kikuas. Sayoj ke amo semi komo se takualchiua kalijtik, maski se uejkaua uan kemansa ouij. Uan no, tein tikuaskej okachi chipauak yeski uan kuali chijchiujtos.

Ximomachti keniuj uelis titakouas

Keman tias titakouatiuj, xikijkuilo toni tikouati uan amo xikoua tein amo tikijkuiloj. Amo no xikoua teisa sayoj porin tikonuelita.
Komo tionueli uan tikita ke amo semi patiyoj, xitakoua miak. Sayoj ke kuali xikita kani tiktalis para maj amo uejueliui uan maj amo moauilo.
Xikonita ox uelis tikouas seki taman tein amo semi patiyoj sayoj ke xikita ox kualtia.
Xikonita ox uelis titakouas itech internet. Kemansa ompa amo semi tapatiyoj uan okachi uelis tikitas keniuj tikuitok motomin.
Xikoua teisa keman amo semi patiyoj yeski oso xitapata ika teisa tein tikonpia. Xikontemo kampa amo tapatiyoj. Xikonita kani amo semi patiyoj tikixtauas gas, at uan okseki taman.

Kuali xikonnemili ox motelneki tein tikouati

Akin kinchijchiuaj celulares oso okseki teposmej, nochipa kikixtijtokej tein okachi yankuik para maj nochin kikouakan. Nejon kichiua maj kitanikan okachi tomin. Yejua ika, komo tikneki tikouas teisa, xionmotajtani: “¿Yekmelauj motelneki nikpatas nocelular? Komo kemaj, ¿moneki niman nikchiuas? Uan komo nikpata, ¿motelneki maj nikoua se tein yankuik kikixtijkej?”.

Xiktechijchiualti moteposuan uan xikoua tein kikuikajya

Xikinyekpia moteposuan para maj amo niman uejueliuikan. Uan keman uejueliuis, xikita ox amo okachi patiyoj tiktechijchiualtis uan amo tikouas se yankuik. No uelis tikyekpias motomin komo tikoua teisa tein kikuikajya.

Xiktoka tein tikuas

¿Tikonpia kampa uelis titatokas? Nejon mitsonpaleuis para amo tikouasok miak taman. Uan no uelis tikpatas ika oksekin taman, tiknamakas oso tikinuantis oksekin.

“Akin tekiti para kiixtalis tein kichiuas, kuali kikisas tein kichiuas, sayoj ke akin kijsiujkachiua se taman, amo teyi kipias” (Proverbios 21:5).

“Nochipa tikitstokej toni tein tikuij mojmostaj amo patiyoj para tikouaskej uan kanachpa tikuinij tarjeta de crédito” (Miles, Inglaterra).

“Achto ke tiaskej titakouatiuij iniuan nochankauan, tikijkuilouaj toni sayoj moneki tikouaskej” (Jeremy, Estados Unidos).

“Keman nochi tapatiyoua, tikixtaliaj toni uelis tikouaskej, uan tikxelouaj tepitsin tomin para keman panos teisa” (Yael, Israel).

“Tikinmachtijkej tokoneuan maj kiyekchijchiuakan teisa komo uejueliui kemej tocarro oso seki taman tein onkak kalijtik uan maj amo niman kikouakan se tein yankuik. Nosiuatsin uan nejua no tikixtalijkej amo tikouaskej tein yankuixtok kisak” (Jeffrey, Estados Unidos).

“Niktokak seki taman tein tikuaskiaj uan nikiniskaltij seki piomej para amo nikouaskiaok. Axkan hasta ueli nikinuanti oksekin tein niktokani” (Hono, Myanmar).

Se takat kitektok seki takilot kampa tatokak.