¿TONI UELIS TIKCHIUASKEJ KEMAN TEL TAPATIYOUA?

Xionyolpaki ika tein tikpia

Akin yolpakij ika tein kipiaj, kuali momachiliaj. Uan keman teisa mopata, kichiuaj tein moneki para kuali kikuiskej inintomin.

KEYEJ MONEKI

Psicóloga Jessica Koehler kiitak ke akin yolpakij ika tein kipiaj okachi kuali tanemiliaj uan amo tenexikoluiaj. Yejua ika nochipa yolpaktokej uan amo semi motekipachojtokej. Tein melauj, akin okachi yolpakij yejuan akin amo kipiaj miak taman uan kitayekanaltiaj yetoskej iniuan ichankauan uan iniuan inintasojikniuan.

“Komo tikpiaj tein tikuaskej uan tein timotaliliskej, maj ika nejon tiyolpakikan” (1 Timoteo 6:8).

TONI UELIS TIKONCHIUAS

Amo xikonita tein oksekin kipiaj. Komo amo semi tikonpia miak taman uan tikita ke oksekin okachi kipiaj uan kuali nemij, uelis kichiuas xionkualani uan peua xikinnexikolui. Sayoj ke kemansa akin kipiaj miak taman amo yekmelauj kuali nemij, porin xa moteltauikaltianij. Nicole se siuat akin nemi Senegal, kijtoua: “Amo moneki miak taman para niyolpakis. Maski oksekin kipiaj okachi ke nejua, uelis niyolpakis ika tein nikpia”.

Xikonchiua nejin: Amo xikonita videos oso tein kitaliaj itech redes sociales kampa sekin kinextiaj ke kipiaj miak tomin uan ika kikouaj miak taman tein semi patiyoj.

“Maski se kitelpias miak tomin, nochi tein se kipia amo uelis kichiuas maj okachi se nemi” (Lucas 12:15).

Xionmotasojkamati. Akin motasojkamatij yolpakij ika tein kipiaj uan amo kinemiliaj ke moneki kipiaskej okachi. Roberton, akin kayot Haití, kijtoua: “Nikelnamiki nochi tein oksekin kichiuanij por nochankauan uan por nejua. Satepan nikiniluia ke semi nikintasojkamatilia tein kichiuanij. No nikmachtia nokonetsin akin kipia chikueyi xiuit maj motasojkamati keman kimakaj teisa”.

Xikonchiua nejin: Mojmostaj xikijkuilo teisa tein tiktasojkamati. Xa porin tipaktok, porin kuali timouika iniuan mochankauan uan tikinpia motasojikniuan oso tikitak teisa tein kualtsin kampa tinemi.

“Akin yolpaki, kemej yeskia kipia se tatakualis nochipaya” (Proverbios 15:15).

Kemansa xa ouij maj tiyolpakikan ika tein tikpiaj. Sayoj ke komo timochikauaj tiknemiliskej ke amo moneki tikpiaskej miak taman, tiyolpakiskej uan nejon se taman tein tomin amo techpaleuia maj tikpiakan.