Marzo

Tayekananij mochikauaj kinnextiliskej oksekin tein yejuan uelinij kichiuanij (Sal. 71:17, 18). Tapaleuiaj maj moajsikan okachi tokniuan takamej akin kinpaleuiskej tokniuan maj sentekitikan uan maj amo kikauakan Dios. Uan nejon motelneki itech nejin itamian tonalmej kampa tinemij. Sayoj ke okachi monekis satepan, keman mochiuas okachi ueyi tajyouilis (Ezeq. 38:10-12; Miq. 5:5, 6). Yejua ika, tokniuan tayekananij, komo ayamo nankixelojtokej tonalmej keman nankinnextiliskej oksekin keniuj kichiuaskej tekit, axkanya xipeuakan. Tikmatij ke tejuatsin semi tikonkuitok motonaluan itech tekit tein tikonpia itech nechikol. Sayoj ke xa monekis tikonxelos tepitsin nejon tonalmej uan ijkon uelis tikonnextilis oksekin keniuj kichiuaskej tekit (Ecl. 3:1). Komo ijkon tikonchiua, kuali tikonkuitos motonaluan. w15 15/4 1:8-10

Tikyekmatij ke tein Biblia tamachtia uelis kinpaleuis nochin taltikpakneminij. Sayoj ke Biblia no uelis techpaleuis tisejsemej maj timotokikan iuan Dios. Yejua ika, moneki tikyekitaskej keniuj timomachiliaj keman tikixtajtoltiaj uan timomachtiaj Biblia. No moneki tiknemiliskej keniuj uelis tikchiuaskej itech tonemilis tein tikixtajtoltiaj. Keman tikchiuaj nochi nejin, kemej yeskia Jiova technojnotstoskia ika Biblia. Uan keman tikitaj ke yejuatsin techpaleuia, okachi kuali timouikaj iuan (Heb. 4:12; Sant. 1:23-25). Maj tikijtokan se neskayot. Itech Mateo 6:19, 20, Jesús kijtoj: “Amo xiksentilikan namoricojyo nikan taltikpak”. Nejin kijtosneki ke moneki tiktayekanaltiskej itanejnekilis Jiova itech tonemilis. ¿Keniuj timomachiliaj keman tikixtajtoltiaj nejin? Komo tikchiujtokejya nejon, tikmachiliskej ke tikyolpaktiaj Jiova. Sayoj ke komo tikitaj ke moneki tikauaskej seki taman itech tonemilis uan ijkon okachi tiktekitiliskej, tikajsikamatiskej ke yejuatsin techpaleuijtok maj tikitakan tein tejuan moneki tikchiuaskej uan ijkon uelis okachi timotokiskej iuan. w15 15/4 3:3-5

Jiova technauatia maj titanojnotsakan uan techita kemej tiitekitikaikniuan (1 Cor. 3:9; 1 Tes. 2:4). Komo tiktayekanaltiaj tanojnotsalis, uelis tikyekmatiskej ke Jiova techmakas nochi tein techpoloua (Mat. 6:33). Uan no, amo semi techouijmakas timochiaskej maj technankili keman tiktataujtiaj. Nochi tonalmej xionmochikaua okachi kuali tionmouikas iuan Jiova. Keman tikonpias se ueyi kuejmol, xikontemo keniuj uelis okachi tionmotokis iuan. Xikonixtajtolti uan xionmomachti Biblia, uan xiontanemili itech tein kijtoua. Nochipa xikonchiua netataujtil uan xikonsentoka xikonchiua tataman tekimej itech nechikol. Komo tikonchiua nochi nejin, uelis tiontakuaujtamatis ke Jiova mitsonpaleuis ika kuejmolmej axkan uan tein tikonpias satepan. w15 15/4 4:17, 18

Ueyinekilis uelis kichiuas maj amo onka yolseuilis itech nechikol. Komo tikintauelitaj seki tokniuan uan tiknemiliaj ke okachi tiueyichiuanimej ke yejuan, uelis tikchiuaskej oso tikiniluiskej teisa tein uelis kintelyolxokolis (Prov. 12:18). Biblia techpaleuia maj amo timoueyinekikan uan maj amo tiknemilikan ke okachi tiueyichiuanimej ke oksekin. Kemej neskayot, Proverbios 16:5 kijtoua ke Jiova kintauelita “nochin akin itech ininyolo moueyinekij”. Uan Hechos 17:26 kijtoua ke Dios kichiuak maj nochi tataman taltikpakneminij ualeuanij itech sayoj se takat. Yejua ika uelis tikijtoskej ke amo titatamamej porin tinochin tiualeuaj itech Adán. Tein melauj, amo taixejekol maj tiknemilikan ke Dios kinchijchiuak seki taltikpakneminij maj okachi ueyichiuanimej ke oksekin. Komo ijkon titanemiliaj, uelis tikauaskej maj Satanás kitami netasojtalis itech nechikol uan maj timoxexelokan (Juan 13:35). Sayoj ke komo tiknekij tiktaniskej Satanás, moneki maj timochikauakan amo timoueyinekiskej (Prov. 16:18). w15 15/5 2:8, 9

Jiova motenkauak iniuan tokniuan taixpejpenalmej ke nemiskej nochipaya ompa iluikak. Uan iniuan okseki ichkamej motenkauak ke nemiskej nochipaya nikan taltikpak. Keman tinochin tinemiskej nochipaya, amo teyi techtajyouiltisok (Juan 10:16; 17:3; 1 Cor. 15:53). Sayoj ke Dios kimati ke axkan onkakok miak taman tein techtajyouiltia. Yejuatsin semi kiyolkokoua nejon. Kemej neskayot, Biblia kijtoua ke Jiova semi kiyolkokouaya keman kiitaya ke israelitas kintajyouiltiayaj ompa Egipto (Is. 63:9). Uan keman xiujmej satepan israelitas kiyekchijchiujtoyaj inintemplo, Jiova kimatia ke akin kintauelitayaj kintajyouiltijtoyaj. Yejuatsin kijtoj ke ijkuak aksa kinchiuilia tein amo kuali itekitikauan, semi kiyolkokoua uan kimachilia kemej yeskia kiixmajpiluiaj (Zac. 2:8). Jiova techteltasojta, uan yejua ika kineki techpaleuis keman kiita ke titajyouiaj. Techtasojta kemej se temomaj kitasojta ikonetsin (Is. 49:15). ¿Keniuj uelis tikchiuaskej kemej Jiova? Komo tiknemiliaj keniuj timomachiliskiaj komo tejuan tikpanotoskiaj tajyouilis tein kipanouaj oksekin (Sal. 103:13, 14). w15 15/5 4:2

¿Kijtosnekia Jesús ke nochipa moajsiskej akin kipanouaj tatasojtilis oso amo teyi kipiaj? Amo. Yejua kinekia kijtos ke moajsiskej akin kipanouaj tatasojtilis ijkuak Satanás taixyekantosok. Axkan tel miakej taltikpakneminij kipanouaj tatasojtilis porin tekiuanij amo kichiuaj tein melauak uan sayoj kitayekanaltiaj inintanejnekilis. Sayoj ke Dios motenkaua ke kitamis tatasojtilis (Sal. 72:16). Ika uejueyi tachiualismej tein kichiuak, Jesús kinextij ke kineki kitekitiltis ichikaualis uan ijkon techpaleuis. Yejua ika tikyekmatij ke amo uejkaua kichiuas (Mat. 14:14-21). Keman itech titanemiliaj nejon, tiknekij tikuiskej totonaluan uan tochikaualis kemej uelis tikinpaleuiskej oksekin (Sal. 45:1; 49:3). Semi melauak ke tejuan amo tiuelij tikchiuaj uejueyi tachiualismej. Sayoj ke kemaj ueli tikintapouiaj taltikpakneminij tein kuali tein Dios motenkaua kichiuas. Tein melauj, yejua nejon moneki tikchiuaskej (Rom. 1:14, 15). w15 15/6 1:7, 10, 11

Akin kuali timouikaj iuan Jiova tikchiuaj uan tiknemiliaj tein yejuatsin kiyolpaktia. Kemej tiknekij tiksentokaskej kuali timouikaskej iuan, timochikauaj amo tikchiuaskej nion teyi tein kiyolxokolis uan sayoj itech titanemiliskej tein chipauak (Sal. 24:3, 4; 51:6; Filip. 4:8). Semi melauak ke Jiova kimati ke titajtakouanij uan ke kemansa uelis peuas tikpiaskej amo kuali tanejnekilis. Sayoj ke kemej amo tiknekij tikyolxokoliskej, timochikauaj timoijkuaniliskej uan sayoj itech titanemiliskej tein chipauak (Gén. 6:5, 6). Komo nochipa tiktataujtiaj Jiova, yejuatsin techpaleuis maj timoijkuanilikan amo kuali tanejnekilis. Techmakas yektikatsin espíritu uan chikaualis tein techpaleuis maj tichipaujkanemikan. w15 15/6 3:4, 5

Jesús amo techmachtij maj tikijtokan “xinechmaka axkan notaxkaltsin tein nechpoloua”, ta techmachtij maj tikijtokan “xitechonmaka axkan totaxkaltsin ten techpoloa”. Se tokniuj takalpanojkej ompa África akin monotsa Victor, kijtoua: “Niktasojkamatilia Jiova porin nonamik uan nejua amo timotekipachouaj tiktemoskej tein tikuaskej nion titaxtauaskej kampa tinemij. Tokniuan akin tikintasojtaj techpaleuiaj maj tikpiakan nejin. Sayoj ke niktajtania Dios maj kinpaleui tokniuan maj kipiakan tein ika moixpanoltiskej maski semi tatasojti itech nejin tonalmej”. Tejuan xa amo techpoloua tein tikuaskej, sayoj ke miakej tokniuan kipanouaj tatasojtilis. Uan sekin kipanotokej okseki taman ouijkayomej. Moneki tiktataujtiskej Jiova maj kinpaleui. Sayoj ke no uelis tikchiuaskej seki taman tein ika tikinpaleuiskej. Kemej neskayot, uelis tikinmakaskej seki taman tein tikpiaj. No uelis titemakaskej tomin tein tapaleuia maj mochiua itekiyo Dios semanauak taltikpak. Tikmatij ke tomin tein titemakaj ika kinpaleuiaj tokniuan akin kinpoloua (1 Juan 3:17). w15 15/6 5:4-6

Ijkon kemej panouanij xiujmej, mopatani uan moyektaliani miak taman itech inechikol Dios tein poui nikan taltikpak. Uan tanauatijkej Isaías yejua nejon kijtojka ke panoskia (Is. 60:17). Akin okachi telpochmej uan akin yankuixtok moauijkej xa kimatij ke mopatani miak taman porin aksa kintapouij oso porin kiixtajtoltijkej itech toamaixuan. Sayoj ke moajsij tokniuan akin uejkaujya kitekitilijtokej Jiova uan kipiakej ueyi tatiochiualis kiitaskej keniuj mopatani miak taman. Yejuan senkis kineltokaj ke Dios kiixyekana inechikol itechkopa tekiuaj Jesús. Komo tikakij tein techtapouiaj nejon tokniuan, okachi titakuaujtamatiskej iuan Jiova. Tinochin moneki tikintapouiskej oksekin tein mochiua itech inechikol Jiova. Itech nejin taltikpak kampa mochiua miak taman tein amo kuali, se kimoujkaita maj tel miakej tokniuan akin kayomej noyampa taltikpak yolpakikan itech nejin xochital kampa onkak yolseuilis uan nochin kuali mouikaj. w15 15/7 1:12, 13

Itech Armagedón moueyitalis itokay Jiova tein yektik. Akin moixtalij ke pouij iniuan cabras ixpoliuiskej (Mat. 25:31-33, 46). Nochi tein amo kuali tein onkak nikan taltikpak ixpoliuis, uan akin amo kikauaskej Dios makisaskej. Axkan ke tikmatij tein amo uejkaua panos, ¿toni moneki tikchiuaskej? Tatitanil Pedro techyolmajxitij maj tiknemilikan keniuj timonejnemiltiskej. Moneki tichipaujkanemiskej, tiktasojtaskej Dios uan amo tikauaskej, uan maj amo tikelkauakan ke poliui tepitsin “kuak moualuikas Dios”. Pedro no kijtoj: “Notasojikniuan, xikyolikachixtiyakan nochi nijin tanauatilme de Dios. Uan ximofuerzajuijtiyakan de xichipaukanemikan para kuak moualuikas Dios, ijkuakon Yejuatsin namechajsikiu nanyolseukanentinemij uan amo nanmomautokke ika tajtakol uan ma amo no teyi mochiuto tajtakol namopan” (2 Ped. 3:11, 12, 14). Yejua ika, maj tikueyichiuakan Jiova kemej kiyolpaktia keman amo tikseliskej tamachtilis tein amo melauak, uan maj nochipa tiktakamatikan tekiuaj akin kiualkui yolseuilis, Jesucristo. w15 15/7 2:17, 18

Miakej itaixpantijkauan Jiova chikauak tekitij keman kichijchiuaj Kalmej kampa tiMosentiliaj noyampa taltikpak. Yejuan kiixtaliaj keniuj moitas kali, kichijchiuaj uan no kiyekchijchiuaj, uan amo kintaxtauiaj. Ijkon, itech 1 metsti noviembre xiuit 1999 uan hasta axkan mochijchiuanij noyampa taltikpak 28,000 kualtsitsin Kalmej kampa tiMosentiliaj, oso kemej makuil kalmej mojmostaj. Biblia kijtoua ke akin kipiaj miak moneki kinpaleuiskej akin amo semi kipiaj (2 Cor. 8:13-15). Yejua ika, itech inechikol Jiova mokui nepaleuil tein kitemakaj tokniuan akin amo tajtanij maj kintaxtauikan uan tomin tein tinochin titemakaj tein ika mochijchiuaskej Kalmej kampa tiMosentiliaj kampa okachi monekis. Ika nejin nepaleuil mochijchiuanij miak kalmej kampa mosentiliaj tokniuan akin amo kiajxitiayaj tomin tein ika kiixtauaskej kalchiualis. w15 15/7 4:9-11

Jesús kijtoj tein panoskia itech itamian tonalmej porin nejon kinpaleuiskia sayoj akin tachixtoskiaj maj kiajsikamatikan ke nentokej itech tonalmej keman ejkosya tamilis. Tiitekitikauan Dios tiksentokanij titachixtonij (Mat. 24:27, 42). Yejua ika, itech xiuit 1914 uan hasta axkan tikitanij keniuj mochiua nochi tein achtook moijtojka. Senkis tikneltokaj ke tinentokej itamiampa nochi tein amo kuali tein mochiujtok itech taltikpak. Uan Jiova kiixtalijya kemanian kiixpolos (Mat. 24:3, TNM). Moneki tiksentokaskej titachixtoskej uan tikchiujtoskej tein moneki. ¿Keyej? Yekinika, porin tiknekij tiktakamatiskej Cristo. Uan ojpatika, porin tikneltokaj ke mochiujtokya tein kijtojka ke panoskia itech itamian tonalmej. ¿Keyej tikneltokaj nejon? Amo porin tikneltokaj tein yeski taman tein tikakij, ta porin onkak tein kinextia ke tein achtook moijtojka itech Biblia mochiujtokya. w15 15/8 2:8, 9

¿Uelis timoixpetaniskej uan timoseuiskej itech Xochital? Kemaj, ta Jiova techchijchiuak kemej tiknejnekiskej tiyolpakiskej. Uan yejuatsin motenkaua ke techmakas tein tiknejnekij (Ecl. 2:24). Sayoj ke maj tikelnamikikan ke okachi techyolpaktia tein tikchiuaj keman tiktayekanaltiaj tokuali uikalis iuan Jiova. Yejua ika, maj ijkon tikchiuakan axkan uan maj titanemilikan itech nochi tein kuali tein Jiova techmaka porin tiktekitiliaj (Mat. 6:33, TNM). Itech Xochital, nemilis okachi kuali yeski ke tein ueli tiknemiliaj. Maj tiknextikan ke tiknekij ompa tiyetoskej keman axkan tikchiuaj tein moneki. w15 15/8 3:17, 18

Keman Jesús nemia nikan taltikpak, katka yektik. Sayoj ke itatuan, iikniuan uan nochin okseki taltikpakneminij katkaj tajtakouanij. Hasta itatitaniluan kemansa kinextijkej ke moueyinekiaj uan sayoj inintech tanemiliayaj. Kemej neskayot, itech youak keman Jesús yaya momikiliti peujkej motajtolteuiaj porin kinekiaj kiitaskej akoni okachi ueyichiujkej katka (Luc. 22:24). Maski ijkon, Jesús takuaujtamatia ke satepan yejuan yekyolmajsitoskiaj uan tapaleuiskiaj maj mopeualti se nechikol kampa nochin kuali mouikaskiaj. Yejua ika, nejon youak kitajtanij Jiova maj kinpaleuiani imomachtijkauan maj kuali mouikanij ijkon kemej yejuan omen moyekuikayaj. Kiluij: “Yejuan ma sepan poutinemikan ijkon keme Tejuatsin uan Nejuatsin tisepanpoutinemij” (Juan 17:21, 22). w15 15/9 1:10, 11

¿Keyej mouik Pedro keman nejnentiyaya aixko? Biblia kijtoua ke amo kiitakok Jesús uan sayoj kiitak chikaujkaejekat (Mat. 14:24-32). Nejon kichiuak maj peua kipolo itakuaujtamatilis uan maj peua pankalaki. Uelis tikijtoskej ke kuejmolmej uan tayejyekolismej tein mojmostaj ika timoixnamikij tamatij kemej ejekat uan at tein kiajkotamotaya nejon chikaujkaejekat. Maski nejin kuejmolmej uelis yeskij tel ouijkej, Jiova uelis techmakas chikaualis tein techpaleuis maj tikxikokan. Akin yeski uelis kipolos itakuaujtamatilis. ¿Keyej ijkon tikijtouaj? Porin Biblia kijtoua ke amo se kipias takuaujtamatilis yejua “ne tajtakol ten techmekania”, oso tein ijsiujka techmekauia (Heb. 12:1). Komo sayoj tikitaj kuejmolmej tein tikpiaj ijkon kemej kichiuak Pedro, uelis peuas tikpoloskej totakuaujtamatilis. w15 15/9 3:1, 6, 7

Keman aksa techtayokolia teisa, tiktemouaj tiknextiliskej ke tiktasojkamatiliaj. Se taman kemej tiknextiaj nejon yejua keman tikuij tein techtayokolij. Jiova techmaka nochi tein techpoloua tein techpaleuia maj tiyoltokan uan maj tiyolpakikan. Uan semi tiktasojkamatiliaj maj kichiua nejon. Tikajsikamatij ke Dios semi techtasojta uan tiknekij tiknextiliskej ke tejuan no tiktasojtaj. Itech tel miak xiujmej Jiova kinmakak israelitas nochi tein kinpolouaya tein kinpaleuij maj yoltokan. No kinmakak tanauatilmej uan ijkon kimatiskiaj toni monekia kichiuaskej (Deut. 4:7, 8). Kemej neskayot, Tanauatil kijtouaya ke yejuan monekia kimakaskej Dios “tein okachi kuali itech yekinika takilomej tein chikauayakejya” (Éx. 23:19). Komo kinekiaj maj Jiova kisentokani kinmakani miak taman tein kuali, monekia kitakamatiskej uan kimakaskej tein okachi kuali. Ijkon kinextiskiaj ke motasojkamatiaj iuan Jiova (Deut. 8:7-11). w15 15/9 5:5, 6

¿Keniuj uelis tikitaskej keniuj Jiova techpaleuia? Kemej neskayot, seki tokniuan kijtouaj ke yejuatsin kinpaleuij maj kiajsikan taneltokalis tein melauak. Oksekin kinemiliaj ke Jiova kinpaleuij keman se tokniuj kijtoj se tanemilil itech se nechikol. Oso xa kijtoskej ke Dios kinpaleuij keman kinnankilij se netataujtil. Xa oksekin kimachiliskej ke yejuatsin kinpaleuij maj uelikan kiajsikan se tekit tein kiixtalijtoyaj uan ijkon okachi kitekitiliskej. Uan oksekin xa kijtoskej ke Jiova kinmakak tein kinpolouaya keman kikaujkej se tekit tein amo kinkauaya maj yakan nechikolmej oso tanojnotsatiuij (Heb. 13:5). Komo tel kuali timouikaj iuan Jiova uan ‘tiyolchipaujkej’, uelis tikitaskej ke yejuatsin techpaleuijtok ika miak taman. ¿Keniuj uelis tiknextiskej ke ‘tiyolchipaujkej’? Komo titanemiliaj itech tein kuali uan amo tikchiuaj tein amo kuali (2 Cor. 4:2). Komo tiknekij tikitaskej keniuj Jiova techpaleuia, moneki tel kuali timouikaskej iuan. w15 15/10 1:17, 19

Sekin akin kayomej Grecia yajkaj Jerusalén iluititoj itech Pascua iniuan judíos. Keman kiitakej tein Jesús kichiuak itech templo, kitelmoujkaitakej. Yejua ika kitajtanijkej tatitanil Felipe ox ueliskia kiitaskej Jesús uan iuan tajtoskej. Sayoj ke Jesús amo kinekik. Yejua amo kitemouaya kinixmatis taltikpakneminij akin kipaleuiskiaj maj amo kimiktikan akin kitauelitayaj. Yejua kiitaya ke okachi monekia kichiuas tein Jiova kinauatijka: momikilis uan ijkon techmakixtis. Ompa kinelnamiktij imomachtijkauan ke amo uejkaua momikiliskia uan ke itatojtokakauan no monekia motemakaskej momikiliskej. Uan kiniluij tajtolmej tein ixnesij itech tajkuilol tein axkan tikitaj. Amo tiomeyolouaj ke Felipe kiniluij nejon takamej tajtolmej tein teyolchikauaj tein Jesús kijtoj (Juan 12:20-25). Keman Jesús yetoya nikan taltikpak, kitayekanaltij tanojnotsalis. Maski ijkon, amo sayoj yejua nejon kichiuak. w15 15/10 3:13, 14

Jesús kiitak ke imomachtijkauan kipiayaj se kuejmol porin nochipa motajtolteuijtoyaj porin kinekiaj kimatiskej akoni okachi ueyichiujkej katka. Yejua ika, miakpa kinmelauak ika nejmachkayot. Sayoj ke nochipa kitemoj kani uan kemanian ueliskia kinmelauas ika netasojtalis (Mar. 9:33-37). Tejuatsin tikontasojta mokoneuan, uan yejua ika tikonmati ke moneki tikonmelauas. Komo kichiuaj teisa tein amo kuali, kemansa sayoj monekis xikonmelauili keyej amo kuali yetok tein kichiujkej. ¿Uan komo kisentokaj amo tatakamatij? (Prov. 22:15.) Xikonchiua tein kichiuak Jesús. Xikonsentoka xikonixyekana, xikonyolmajxiti uan xikonmelaua ika nejmachkayot. Xikontemo kani uan kemanian uelis tikonmelauas ika netasojtalis. Ompa Sudáfrica, se tokniuj siuat akin monotsa Elaine kielnamiki ke itatuan nochipa kimelauiliayaj keyej kitatsakuiltiayaj uan amo keman kimelauayaj ika kualanyot. Nejon kichiuak maj kiyekmatini ke itatuan kiteltasojtayaj. w15 15/11 1:5, 6

Komo Jiova amo techtasojtaskia, ¿keniuj yeskia tonemilis satepan? Taltikpakneminij kisentokaskiaj kinixyekanaskiaj oksekin ika ichikaualis Satanás, inindios akin amo yolkuali (2 Cor. 4:4; 1 Juan 5:19; Apoc. 12:9, 12). ¡Tonemilis satepan semi tetayokoltij yeskia! Keman Satanás kiixnamikik Jiova, taomeyolotij ox Dios kinamiki kiixyekanas nochi tein onkak. Uan no, kiyekijtoj ke yejua okachi kuali taixyekankej ke Dios (Gén. 3:1-5). Kemej Jiova se Dios tel tamatkej, kikauak maj panouanij xiujmej uan ijkon Satanás kinextiskia ox melauak tein kijtojka. Sayoj ke senkis moitani ke nion Satanás nion taltikpakneminij kuali taixyekanaj. w15 15/11 3:3, 4

Komo tiyolyemankej, tiktakamatiskej nejin tayolmajxitilis tein kitemakak Jesús: “Nankikakke ya ke ne namouejkautatuan namechnajnauatijke ijkuin: ‘Xiktasojta mokniu uan xiktauelita naken mitstauelita’. Pero Nejuatsin namechnajnauatia ijkuin: Xiktasojtakan naken namechtauelitaske [...]. Uan ximotatatautilikan ika por yejuan ne naken namechkejkeloske uan ten namechtajyouiltiske. Uan ijkon ixnesis ke namejuan nantekoneuan de Namoueyitajtsin ten yetika ne eluiyaktsinko. Porin Yejuatsin kichiua ma pankisa in tonaltsin para kinpaleuis nochi naken yolkualime uan naken amo yolkualime. Uan Yejuatsin no kualtitani in kioutsin para kinpaleuis naken yolchipauke uan naken amo yolchipauke” (Mat. 5:43-45). Akin tiktekitiliaj Dios moneki tikintasojtaskej akin techtauelitaj, maski techchiuiliskej tein amo kuali. Nochipa moneki tiknextiskej ke tiktasojtaj Jiova uan tikintasojtaj oksekin. Hasta komo sekin techtauelitaj oso amo kinekij kikakiskej kuali tanauatilmej tein tikteixmatiltiaj, tikinpaleuiaj keman moneki. w15 15/11 4:17, 19, 20

Tiitekitikauan Dios tikuinij tajtol uan ika tikueyitaliaj Jiova uan tikintapouiaj oksekin keniuj tamati yejuatsin. Itech nejin tonalmej tikuinij tajtol uan ika tiktajtolkepanij Biblia uan ijkon tikinpaleuiskej taltikpakneminij maj kiixmatikan Jiova. Onkak miak Biblias tein kitajtolkepanij, uan seki okachi ajsitok tein kijtouaj ke okseki. Tokniuan akin kichijchiujkej Traducción del Nuevo Mundo kinekiaj maj ajsitok yeskia tein kitajtolkepaskiaj. Yejua ika kiixtalijkej kitojtokaskej eyi taman. Yekinika, kiueyitaliskej itokay Dios uan kitaliskej nochipa keman moajsiskia itech amatajkuilol tein yekinika moijkuiloj (Mat. 6:9, TNM). Ojpatika, nochipa keman ueliskia, kitajtolkepaskej sejse tajtol. Keman amo ueliskia, kitajtolkepaskej tanemilil. Uan expatika, kikuiskej tajtolmej tein amo teouijmaka se kiixtajtoltis uan se kiajsikamatis (Neh. 8:8). Tiitaixpantijkauan Jiova tiktemouanij tikchiuaskej nejin eyi taman keman tiktajtolkepanij Biblia itech panoua 130 tataman tajtolmej. w15 15/12 2:1, 2

Israelitas tataman kipitsayaj trompeta keman teisa kitematiltiayaj. Komo amo kuali kipitsayaj trompeta, tateuianij ueliskiaj mopoloskej. Ika totajtol no ijkon panoua. Biblia kijtoua ke moneki titajtoskej kemej amo ouij moajsikamatis. Komo amo ijkon tikchiuaj, xa tikinpojpoloskej taltikpakneminij oso amo techajsikamatiskej (1 Cor. 14:9). Sayoj ke, maski tikyekijtoskej teisa, moneki timoyekpiaskej maj amo titeyolxokolikan nion maj tiknextikan ke amo tikinpoujkaitaj oksekin. Jesús nochipa tajtouaya kemej amo ouij kiajsikamatiskiaj. Maj titanemilikan itech tanojnots tein tikixtajtoltiaj itech Mateo capítulos 5 hasta 7. Yejua amo kikuik tajtolmej tein amo monekiaj nion tein ouijkej uan ijkon taltikpakneminij kimoujkakakiskiaj kemej tajtouaya. Amo no kiyolkokoj aksa ika tein kijtoj. Kimelauak seki taman tein motelneki, sayoj ke nochipa ika tajtolmej tein amo ouijkej. Kemej neskayot, itech nejin tanojnots kinmachtij itatojtokakauan ke amo monekia motekipachoskej ika tein kikuaskiaj sejse tonal. Kemej kinekia maj nochipa kielnamikinij nejin tanemilil, kiniluij maj kiitanij keniuj Jiova kintamaka tototsitsin. Uan satepan kintajtanij: “¿Xe kachi amo nantayekantokke namejuan iuan Dios uan ke nijin tototsitsin?” (Mat. 6:26). Ika nejin tajtolmej tein amo ouij se kiajsikamati, kinyolchikauak uan kinmachtij se taman tein motelneki. w15 15/12 3:13, 14

¿Keniuj moneki tikintasojtaskej tokniuan? Netasojtalis tein moneki tikinpialiskej tokniuan yejua tein tikinpialiaj tochankauan oso totasojikniuan (Juan 11:36). Yejua ika akin tikchiuaj kemej Cristo amo sayoj tikijtouaj ke moneki timotasojtaskej kemej yeskia tiiknimej, ta yekmelauj tiiknimej (Mat. 23:8). Pablo kijtoj: “Ximotasojtatiyakan se uan okse ika ueyi yoltetasojtalis de totasojikniuan. Uan no ximofuerzajuikan de ximomouiskapoutinemikan se uan okse ika ueyi chipaukamouisyot” (Rom. 12:10). Nejin tajtolmej kinextiaj ke moneki tikinteltasojtaskej tokniuan. Komo timotasojtaj kemej iknimej uan kemej Cristo technextilij, okachi kuali timouikaskej uan amo tixexeliujtoskej. Akin yekmelauj kichiuaj kemej Cristo, kinitaj kemej ininikniuan nochin itekitikauan Jiova maski okseko kayomej (Rom. 10:12). Yejua ika, tinochin timotasojtaj kemej yekmelauj tiiknimej, porin yejua nejon techmachtiani Jiova (1 Tes. 4:9). w16.01 1:5, 6

Komo tiktasojtaj Jiova uan Jesús titanojnotsaskej uan tikinmachtiskej oksekin ika yolpakilis (Mat. 28:19, 20; Luc. 4:43). Itech nejin tonalmej keman tikelnamikiskej imikilis Jesús, ¿uelis tikchiuaskej tekit kemej precursor auxiliar uan titanojnotsaskej 30 oso 50 horas? Xiontanemili itech tein kichiuak se tokniuj takat akin kipia 84 xiujmej uan amo nemiok inamik. Yejua kinemilij ke amo ueliskia kichiuas tekit kemej precursor auxiliar porin xiuejya uan mokokoua. Sayoj ke precursores akin nemij ompakauin kipaleuijkej uan kiualkuiaj uan kiuikayaj keman yaya tanojnotsati uan kiixtalijkej kani okachi kuali ueliskia tanojnotsas. Ika nochi nejin uelik tanojnotsak 30 horas itech se metsti. ¿Uelis tikpaleuiskej se tokniuj maj mochiua precursor itech metsti marzo oso abril? Semi melauak ke amo tinochin ueli tikchiuaj tekit kemej precursor. Sayoj ke kemaj uelis tikuiskej seki totonaluan uan tochikaualis uan okachi tiktekitiliskej Jiova. Komo ijkon tikchiuaj, tiknextiskej ke tiktasojkamatij inetasojtalis Cristo, ijkon kemej kichiuak tatitanil Pablo. w16.01 2:7, 11

Komo okseki ichkamej amo kimatij inintokay nochin tokniuan taixpejpenalmej akin moajsijok nikan taltikpak, ¿keyej ueli kiniluiaj: “Tiknekij tiyaskej namouan”? Biblia kijtoua ke “majtakti takamej” kikitskiskiaj itaken se “judío” uan kijtoskiaj: “Tiknekij tiyaskej namouan, porin tikakinij ke Dios yetok namouan”. Kemej tikitaj, itech nejin tajkuilol ika motajtoua se “judío”, sayoj ke satepan kijtoua “namouan”. Yejua ika “judío” amo kiixnextia sayoj se taltikpaknenkej, ta nochin oloch taixpejpenalmej. Okseki ichkamej kimatij nejin, uan yejua ika ueli kijtouaj ke kemej yeskia youij iniuan taixpejpenalmej, tein kijtosneki, ke iniuan kisenueyichiuaj Jiova. Amo moneki kimatiskej inintokay nochin tokniuan taixpejpenalmej uan ijkon kintojtokaskej sejsemej. ¿Keyej? Porin Biblia kijtoua ke sayoj moneki tiktojtokaskej Jesús (Mat. 23:10). w16.01 4:4

Keman tiyolij hasta keman timomikiliaj, nochipa tiktemouaj maj techtasojtakan. Tinochin tikmachiliaj ke moneki tikinpiaskej kuali totasojikniuan akin techtasojtaj. Sayoj ke okachiok moneki kuali timouikaskej iuan Dios uan tikpiaskej inetasojtalis. Miakej taltikpakneminij kinemiliaj ke nejon amo uelis panos, porin Dios kipia miak chikaualis. Sayoj ke tejuan tikmatij ke kemaj uelis timochiuaskej tiitasojikniuan Jiova porin Biblia ininka tajtoua taltikpakneminij akin katkaj itasojikniuan. Semi kuali maj titanemilikan itech nejon taltikpakneminij uan maj tikchiuakan kemej yejuan. ¿Keyej? Porin tokuali uikalis iuan Dios yejua tein okachi kipia ipatiuj tein uelis tikpiaskej. Abrahán kikauak se kuali neskayot (Sant. 2:23, TNM). Yejua katka itasojikniuj Dios porin iuan takuaujtamatia. Yejua ika Biblia kijtoua ke yejua “uejkautat de nochi nekes ten takuautamatiske” (Rom. 4:11). w16.02 1:1, 2

Maski ipopaj Ezequías yejua semej akin tekiuajtik Judá akin okachi kichiuak tein tel amo kuali, Ezequías yejua semej akin kichiuak tein kuali (2 Rey. 18:6). Kiyektalij miak taman tein amo kuali tein kichiuak ipopaj. Tayektalij itech templo, kitajtanij Jiova maj kintapojpoluiani israelitas porin tajtakojkaj iixpan uan kinixpoloj tiotsitsin tein onkayaj itech nochi altepet (2 Crón. 29:1-11, 18-24; 31:1). Satepan, keman se tekiuaj kintenmojmoujtij akin nemiaj Jerusalén ke yaskiaj kinteuitiuij, Ezequías kinextij ke kipiaya ueyi takuaujtamatilis uan yolchikaualis. Uan no, kiniluij maj takuaujtamatinij ke Jiova kinmatampauiskia (2 Crón. 32:7, 8). Se tonal moueyinekik, sayoj ke kikakik Jiova keman kimelauak uan oksepa kinextij yolyemanilis (2 Crón. 32:24-26). Kemej tikitaj, maski ichankauan kichiujkej tein amo kuali, Ezequías amo kikauak maj nejon kijtakouani itech inemilis. Kinextij ke kuali mouikaya iuan Jiova. Tinochin moneki tikchiuaskej kemej yejua. w16.02 2:11

Tiknextiskej kualtakayot uelis techpaleuis maj tiknextikan ke tiktasojtaj Jiova uan no oksekin. Kemej neskayot, xikonnemili ke tejuatsin tikonpia tein kinextia ke se tokniuj kichiuak teisa tein amo kuali. Xa tikonneki tikonchiuas tein kiyolpaktis yejua, okachiok komo se mochankauj oso se motasojikniuj. Sayoj ke tejuatsin tikonmati ke okachi moneki tikonyolpaktis Jiova. ¿Toni uelis tikonchiuas? Xikontakamati Jiova uan xikonnextili kualtakayot mochankauj oso motasojikniuj. Xikonilui maj niman kintajtani tayekananij maj kipaleuikan. Komo yejua amo iniuan tajtoua, tejuatsin monekis tiontajtos iniuan. Ijkon tikonnextis ke okachi tikonneki tikonyolpaktis Jiova. Uan no tikonnextilis kualtakayot mochankauj oso motasojikniuj, porin tayekananij kimelauaskej ika netasojtalis uan kipaleuiskej maj oksepa kipia se kuali uikalis iuan Jiova (Lev. 5:1). w16.02 4:14

Telpoch, ¿keniuj tiknextia ke ‘tikmouistilia Dios’? Ika tein tikchiua itech nechikol, kemej titanojnotsas uan tiyas nechikolmej. Sayoj ke no ika tein tikchiua moselti, kemej tiktataujtis Jiova uan timomachtis Biblia. Akin motemaktia iuan Jiova kiyolpaktia kichiuas nejin uan amo kiita kemej seki taman tein moneki kichiuas maski amo kineki. Momachilia kemej tekiuaj David, akin kijtoj: “Nikchiuas motanejnekilis, noDios, nechtelyolpaktia, uan motanauatil moajsi noyolijtik” (Sal. 40:8). Xikelnamiki ke netemaktilis se taman tein moselti tikixpejpena. Keman timotemaktis iuan Jiova uan timoauis, tiyeski tiitasojikniuj uan monekis titanankilis iixpan ika tein tikchiuas. Yejua ika tein tikixpejpenas tikchiuas itech itekiyo Jiova amo tikixtalis ika tein kichiuaskej motatuan oso oksekin. Komo axkan tichipaujkanemi uan tiktemoua tikueyitalis Jiova, tiknextis ke senkis tikneltoka ke nejin yejua tein melauak uan ke tikneki tikchiuas tein Dios tanauatia. Ijkon, amo uejkaua uelisya timoauis. w16.03 2:10, 12, 15

Tanauatil tein kiselij Moisés kinmatampauij israelitas maj amo auilneminij nion maj kichiuanij kemej okseki taneltokalismej tein kipiayaj okseki xolalmej. Komo israelitas kinekiaj maj Dios kintatiochiuiani, monekia mokauaskej maj kinixyekana. Komo amo kitakamatiaj, kipiaskiaj uejueyi ouijkayomej (Deut. 28:1, 2, 15). Sayoj ke no onkaya okse taman tein kichiuaya maj israelitas kiselianij yankuik tanauatilmej. Tanauatil tein kiselij Moisés kinpaleuij maj kichiuanij tein monekia, porin ompa ualeuaskia Mesías, Jesucristo. Nejin motelnekia porin ijkon mochiuaskia itanejnekilis Jiova. No kinelnamiktij ke katkaj tajtakouanij. Uan kinpaleuij maj kiajsikamatinij ke monekia maj aksa akin amo kipiaya tajtakol motemakani uan maj kinpaleuiani maj ixpoliuini inintajtakoluan nochipaya (Gál. 3:19; Heb. 10:1-10). Uan no, kinmatampauij kalyetouanij kampa ualeuaskia Mesías. Uan keman ejkok Mesías, kinpaleuij israelitas maj kimatinij akoni katka. Yejua ika Biblia kijtoua ke nejin tanauatil katka kemej se “tapixke”, oso se taman tein itech amo miak xiujmej kinixyekanak hasta keman ejkoskia Cristo. w16.03 4:6, 7