Abril

Moajsia se ángel akin katka itasojikniuj Jiova. Sayoj ke se tonal peuak kinejneki maj taltikpakneminij kiueyichiuakan yejua uan amo Dios. Kemej kisentokaya tanemilijtoya itech nejon, ejkok tonal keman tajtakoj (Sant. 1:14, 15). Kiixnamikik Jiova uan moixmatiko kemej “tetat den nochi nekes ten xolopijtijtinemij”, oso takajkayauaj (Juan 8:44). Amo tikmatij keniuj motokaytiaya achto ke taixnamikiskia, sayoj ke axkan tikixmatij kemej Satanás. Yejua akin okachi kitauelita Jiova uan taltikpakneminij. Biblia techpaleuia maj tikitakan ke yejua semi amo yolkuali. Kemej neskayot, kitokaytia Satanás, tein kijtosneki “Taixnamikkej”. Ijkon kitokaytia porin senkis amo kiuelita maj Jiova taixyekana uan kiixnamiki. w15 15/4 1:1, 2

Ijkuak timomachtiaj Biblia, tikajsikamatij toni moneki tikpataskej uan ijkon uelis okachi kuali tiktekitiliskej Dios. Sayoj ke no tikmatij toni kualneskayomej kipia uan toni kiolinia inetasojtalis maj kichiua. Keman tikmatij nochi nejin, okachi tiktasojtaj. Uan yejuatsin no okachi techtasojta. Uan nejon kichiua maj mochikaua tokuali uikalis iuan. Komo tiknekij timotokiskej iuan Jiova, motelneki tiktemoskej se taman tein tayekantok keman timomachtiskej Biblia. Jesús kijtoj ke komo tiknekij tinemiskej nochipaya, moneki kuali tikixmatiskej Jiova (Juan 17:3). Semi melauak ke itech Biblia timomachtiaj miak taman tein teyolnotsa. Sayoj ke amo yejua nejon tein moneki okachi tiktemoskej, ta moneki timomachtiskej Biblia porin tiknekij okachi tikixmatiskej Jiova (Éx. 33:13; Sal. 25:4). Komo tikitaj Jiova kemej se yekmelauj totasojikniuj, amo techtekipachos komo itech Biblia kemansa amo kimelaua keyej Dios ijkon kichiuak seki taman. w15 15/4 3:6-8

Miakej tayekananij akin kayomej itech tataman altepemej uelinij kinnextilianij oksekin keniuj kichiuaskej tekit. Yankuixtok kintajtanijkej sekin keniuj kichiuaj. Maski semi tataman kemej moajsij, nochin kitemakakej tayolmajxitilis tein moteluika. Nejin kinextia ke tein tayolmajxitia Biblia tapaleuia maj se kinnextili oksekin keniuj kichiuaskej tekit itech nochi nechikolmej tein moajsij itech taltikpak. Maj tikitakan se neskayot. Keman se tekitikej kineki kitokas xinach, achto kichiua maj tal moajsi kemej moneki. Ijkon tapaleuia maj kuali moskalti tein kitoka. No ijkon, keman tayekankej kineki kinextilis se tokniuj keniuj kichiuas tekit, yekinika moneki kipaleuis maj iyolo moajsi kemej moneki. ¿Keyej? Porin ijkon tokniuj okachi kiajsikamatis tein kinextiliskej. ¿Uan keniuj uelis kipaleuis tokniuj maj iyolo moajsi kemej moneki? Uelis kitojtokas neskayot tein kikauak tanauatijkej Samuel keman kimachtijtoya Saúl keniuj taixyekanaskia itech xolal Israel (1 Sam. 9:15-27; 10:1). w15 15/4 1:11, 12

Maski miak taman tein onkak nikan taltikpak kitapanauilia itanauatiluan Jiova, amo kijtosneki ke nochi amo kuali. Sayoj ke Satanás kitemos kitekitiltis nochi tein onkak itech nejin taltikpak uan ijkon techolinis maj tiktayekanaltikan tein tiknejnekij uan kichiuas maj amo tiktakamatikanok Dios (1 Juan 2:15, 16). Yejua nejon kinpanok seki tokniuan itech yekinika siglo. Kemej neskayot, tatitanil Pablo kipiaya se itapaleuijkauj akin monotsaya Demas. Sayoj ke Pablo kijtoj ke nejin tokniuj kikauak porin “kiyolnejneyik kichiutinemis tamachilisme de nikan taltikpak” (2 Tim. 4:10). ¿Toni yekmelauj kiyolnejnekia Demas? Biblia amo kijtoua. Xa kiyolnejnekia motomintis okachi ke kitekitilis Jiova. Sayoj ke Demas amo kipiakok tatiochiualis kichiuas miak taman tein semi kiyolpaktiskia itech itekiyo Jiova. Itech nejin taltikpak amo ueliskia kiselis teisa maj okachi kuali ke tatiochiualismej tein Jiova kitemaka (Prov. 10:22). w15 15/5 2:10, 11

Keman Jesús yetoya nikan taltikpak, uelia kiajsikamatia tein kijyouiayaj taltikpakneminij maski yejua amo kipanoka tein yejuan kipanotoyaj. Kemej neskayot, kimatia ke taixyekananij itech taneltokalis kichiuayaj maj taltikpakneminij tajyouianij. Yejuan kinkajkayauayaj uan kiixtaliayaj tanauatilmej tein Dios amo kitemakaka. Uan taltikpakneminij kintelmouiliayaj (Mat. 23:4; Mar. 7:1-5; Juan 7:13). Jesús amo kinmouiliaya nion kineltokaya inintakajkayaualis. Sayoj ke kiajsikamatia keniuj momachiliayaj taltikpakneminij uan semi kitayokoltiaya kiitas ke tajyouiayaj. Kijtoj ke katkaj kemej ichkamej tein amo kipiayaj inintajpixkauj (Mat. 9:36). Ijkon kemej iTajtsin, Jesús kinikneliaya uan kintasojtaya taltikpakneminij, yejua ika kinpaleuiaya keman kiitaya ke tajyouijtoyaj. Se tonal, tatitanilmej tanojnotsatoj uejka. Sioujtoyaj uan kitemouayaj kampa taseltijkan kampa ueliskiaj moseuiskej. Sayoj ke Jesús kiitak ke miakej taltikpakneminij kitemouayaj porin kinekiaj maj kinmachti. Yejua kiajsikamatia ke monekia maj kinpaleui. Yejua ika, “peuak kinmachtia ika miak tataman tamachtilisme” (Mar. 6:30, 31, 34). w15 15/5 4:3, 4

Itech Proverbios capítulo 8 ika motajtoua tamatilis kemej yeskia se aksa. Itech nejin tajkuilol, tamatilis kiixnextia Jesús achto ke ualaskia nikan taltikpak. Ompa moijtoua ke ijkuak Dios kichijchiuak nochi tein onkak, Jesús yetoya iuan kemej se “tekitikej tein ixmach”, oso se tel kuali tekitikej. Tikyekmatij ke semi yolpakia keman Dios kichijchiujtoya iluikak uan taltikpak. Sayoj ke itech nochi tein Dios kichijchiuak, Jesús okachi kintasojtaya taltikpakneminij (Prov. 8:22-31). ¿Keniuj kinextij Jesús ke semi kitasojta Dios uan taltikpakneminij? Kinextij keman motemakak kikauas iluikak uan ualas nikan taltikpak kampa kitemakak inemilis uan ijkon techmakixtij itech tajtakol uan mikilis (Mat. 20:28; Filip. 2:5-8, TNM). Jesús kinextij ke semi techtasojta. w15 15/6 2:1, 2

Telpoch, ¿tiktasojkamati tein Jiova moka kichiuak? Komo ijkon, tein okachi kuali tein uelis tikchiuas yejua timotemaktis iuan Dios uan timoauis. Kemej tikmati, timotemaktis iuan Dios kijtosneki ke timotenkauas iuan ke nochipa tikchiuas tein yejuatsin kineki. Sayoj ke moneki amo timouis tikchiuas nejin netenkaualis. ¿Keyej? Porin Jiova kineki xikpia se kuali nemilis, uan yejuatsin motenkaujtok kintatiochiuis akin kitakamatij (Heb. 11:6). Keman timotemaktis iuan Jiova uan timoauis, amo tikpias okachi ouijkayomej. ¡Tikpias okachi tatiochiualismej! Jiova kineki xikpia se kuali nemilis. Sayoj ke Satanás amo kitemoua mitspaleuis, porin yejua amo inintech tanemilia oksekin. Amo ueli mitsmaka nion se taman tein kuali porin amo kipia nion teyi tein kuali tein uelis temakas. w16.03 2:16, 18, 19

Komo tiknekij timochiuaskej yekmelauj tiitasojikniuan Jiova, moneki tikyekneltokaskej ke yejuatsin techkaki keman tiktataujtiaj. Maj titanemilikan itech Jesús. Achto ke ualaskia nikan taltikpak, kiitak keniuj Jiova kinnankiliaya itekitikauan keman kitataujtiayaj. Uan keman yetoya nikan taltikpak, Jesús kitataujtij Dios uan kitapouij tein kinemiliaya uan tein kimachiliaya. Se tonal kichiujtoya netataujtil nochi youal (Luc. 6:12; 22:40-46). Uan no, kinmachtij imomachtijkauan keniuj motataujtiskiaj. ¿Kichiuaskia Jesús nochi nejon komo kinemiliskia ke Jiova amo yekmelauj kikaki netataujtilmej? Amo. Yejua kimatia ke Dios kemaj kikaki netataujtilmej. Tejuan no tikyekmatij ke Jiova techkaki keman tiktataujtiaj (Sal. 65:2). w15 15/4 3:11, 13

Keman tejuatsin tionmotataujtis ininixpan mokoneuan, uelis tikonmachtis maj takuaujtamatikan iuan Jiova. ¿Keniuj? Amo sayoj xikontajtani Jiova maj kinpaleui yejuan, ta no xikontajtani maj mitsonpaleui tejuatsin. Itech ueyi altepet Brasil, se tokniuj siuat akin monotsa Ana kijtoua ke keman itatuan kipiayaj kuejmolmej, nochipa kitajtaniayaj Dios maj kinpaleuiani. Kemej neskayot, keman iueyitatuan Ana kokolispeujkej, itatuan kitajtanijkej Jiova maj kinmakani chikaualis uan tamatilis tein kinpaleuiskia maj kuali taixpejpenakan. Nochipa kikaujkej imako Dios nochi kuejmolmej tein kipiayaj, hasta tein okachi ouijkej. Nejin kichiuak maj Ana kimatini ke monekia takuaujtamatis iuan Jiova. Tejuatsin no uelis tikonchiuas nejon keman tikontataujtis Jiova iniuan mokoneuan. Kemej neskayot, xikontajtani Jiova maj mitsonmaka yolchikaualis tein mitsonpaleuis xikontapoui aksa akin nemi ompakauin kampa tionnemi tein Biblia tamachtia oso tein mitsonpaleuis xikontajtani moteko maj mitsonkaua xionyoui se ueyi nechikol. Keman tikonchiuas nejon, mokoneuan kiitaskej ke tiontakuaujtamati iuan Jiova uan no ijkon kichiuaskej. w15 15/11 1:7, 8

Telpoch, ¿keniuj uelis okachi tiktasojtas Jiova? Se taman tein okachi mitspaleuis yejua komo titanemilia itech inemilis Jesús tein kitemakak (2 Cor. 5:14, 15; 1 Juan 4:9, 19). Komo titanemilia itech nejin ueyi netetayokolil tein Dios mitsmakak, okachi tikpatiuitas uan tiknekis tiktasojkamatilis ika nochi moyolo. Xitanemili itech nejin neskayot. Xiknemili ke timoaeltsimijtok uan aksa mitskixtia itech at. ¿Toni tikchiuaskia? ¿Tiyaskia mochan timotapatilitiuj uan amo tiktasojkamatiliskia akin mitspaleuij? Amo. Tikyekmatij ke nochipa timotasojkamatiskia iuan. Jiova uan Jesús techmakixtijkej porin techteltasojtaj. Nejon tein kichiujkej techpaleuia maj ueli tinemikan nochipaya itech se xochital. ¿Melauj ke moneki tikinteltasojkamatiliskej? w16.03 2:16, 17

Jiova kiyekmatia ke Jesús nochipa kitakamatiskia keman yetoskia nikan taltikpak, porin tel miak xiujmej ijkon kichiuak ompa iluikak. Keman nemia nikan taltikpak, Jesús semi tajyouij, sayoj ke hasta keman kimiktijkej amo kikauak Dios uan kinextij ke sayoj iPopaj kinamiki techixyekanas. ¿Keniuj techpaleuia tinochin imikilis Jesús? Techpaleuia maj ueli tikselikan nemilis nochipaya itech Xochital. Tatitanil Juan kijkuiloj: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo. In tetasojtalis de Dios monextijtinemi ijkuin, ke amo tejuan achtopa tiktasojtakke Totajtsin Dios. Ta, achto Yejuatsin techtasojtak tejuan. Uan Yejuatsin techualtitanilij Nikonetsin yojtsin para ma Yejuatsin technekixtiltiki ka in mikilis den totajtakoluan” (1 Juan 4:9, 10). w15 15/11 3:13, 14

Tinochin titajtakouaj uan timomikiliaj porin tiikoneuan Adán, yejua ika amo akin ueli kijtoua ke imikilis Jesús amo kipaleuia. Hasta se itekitikauj Dios akin okachi kitakamati moneki kiselis nepaleuil tein kitemaka imikilis Jesús. Tinochin moneki tikajsikamatiskej ke Dios techtapojpoluijya tein timotauikaltijkej iuan. ¿Toni moneki tikchiuaskej komo timotasojkamatij maj Jiova techtasojta uan techikneli? Maj timotajtanikan: “¿Nechchiuilij teisa tein amo kuali se tokniuj? ¿Ouij nechkisa niktapojpoluis?”. Komo ijkon, maj tikchiuakan kemej Jiova, akin ‘niman tetapojpoluia’ (Sal. 86:5; Neh. 9:17). Komo tiktasojkamatiliaj Dios maj techtapojpolui uan maj techtasojta, tikintasojtaskej uan tikintapojpoluiskej tokniuan (Mat. 6:14, 15). Melauak ke keman titetapojpoluiaj amo kipata tein mochiuak, sayoj ke techpaleuis maj okachi tiyolpakikan satepan. w16.01 2:5, 15-17

Ika nejin tajtolmej, Pedro uan okseki imomachtijkauan Jesús ueliaj kinemiliayaj keniuj yeski keman taixyekantoskej iuan Cristo ne iluikak uan kinpaleuijtoskej taltikpakneminij akin amo kikaujkej Dios maj amo kipiakanok tajtakol. Itekitikauan Dios itech tanemilijkej tein kinpaleuiskia maj okachi takuaujtamatinij. Abel kinemilij keniuj yeski keman mochiuas tein Dios motenkaujtoya. Uan kemej takuaujtamatia itech nejon netenkaualis, kuali mouikak iuan Jiova. Abrahán kinemilij keniuj yeskia tonal keman mochiuaskia nochi tein Jiova motenkaujka ika ‘konetsin’ (Gén. 3:15). Nejon kipaleuij maj tatakamatini maski kipanouaya ouijkayomej. Moisés tanemilij itech taxtauil tein Dios motenkaujka kimakas, uan nejin kipaleuij maj kitasojta uan maj amo keman kikaua (Heb. 11:26). Komo tejuan no tiknemiliaj keniuj yeski tonal keman Jiova kichiuas nochi tein motenkaujtok, okachi tiktasojtaskej uan okachi titakuaujtamatiskej. w15 15/5 3:17, 18

Komo tiknekij tiyekyolmajsitoskej, moneki tikchiuaskej kemej Jesús. Moneki amo tiknemiliskej ke kuali komo sayoj tikixmatij tamachtilismej tein okachi tayekantokej itech Biblia. Moneki tiktemoskej okachi tikajsikamatiskej seki taman keman timomachtiskej Biblia, porin tikmatij ke “tapaloltsin kipaleuia in taka uan siuame ten majsikke ya” (Heb. 5:14). Moneki tikpiaskej se taixmatilis ajsitok ika tein tamachtia Biblia (Efes. 4:13). Yejua ika moneki tikixtaliskej keniuj timomachtiskej uan nochipa ijkon tikchiuaskej. Nejin no kijtosneki tikixtajtoltiskej Biblia mojmostaj uan timomachtiskej toselti uan iniuan tochankauan nochi semanas. Keman timomachtiskej Biblia, moneki tiktemoskej tikajsikamatiskej keniuj tanemilia Jiova uan toni kimachilia, uan ompa moneki tikuiskej nejin keman tikixpejpenaskej tein tikchiuaskej. w15 15/9 1:5, 9, 10

Jesús kuali kiajsikamati keniuj tekiti nochi tein onkak itech taltikpak uan kimati keniuj kitsakuilis chikaualis tein kipia itachijchiualis Dios, kemej ejekat uan ueyiat. Keman yetoya nikan taltikpak, kinextij ke uelia kitsakuiliaya chikaualis tein kipia itachijchiualis Dios. Xikonnemili tein panotoya. Ueyiat kiuiuitekia barco uan tel taakalakia. Tetsaujkaejekat kichiuaya maj tel chikauak takakistini, uan at kiuiuikaya barco. Maski ijkon, Jesús kochtoya porin tel sioujtoya. Sayoj ke imomachtijkauan tel mouiaj. Yejua ika kijxitijkej uan kiluijkej ke yayaj momikilitij (Mat. 8:25). ¿Toni kichiuak Jesús? Moketsak uan kiluij ejekat uan ueyiat: “Ximotamatili” (Mar. 4:39). ¡Uan tetsaujkaejekat motamatilij! Nejin kiyeknextia ke Jesús ueli kitsakuilia chikaualis tein kipia itachijchiualis Dios. w15 15/6 1:12-14

Satepan ke Jesús tamachtij padrenuestro, kitemakak se neskayot tein ika techmachtia maj amo timoteltekipachokan ika tein timoixpanoltiskej. Yejua kijtoj ke xochimej amo kintekipachoua kipiaskej tein moneki porin Jiova kinyekpia. No ijkon, tejuan moneki amo techtekipachos keniuj tikajsiskej tein ika timoixpanoltiskej satepan (Mat. 6:30-34, TNM). Moneki tiyolpakiskej porin tikpiaj tein mojmostaj moneki. Kemej neskayot, uelis tiktajtaniskej Dios maj tikpiakan kani tinemiskej, se tekit tein techpaleuis maj tikpiakan toni tikuaskej uan maj techpaleui maj kuali titaixpejpenakan keman tikpiaskej se kokolis. Sayoj ke, moajsi se taman tein okachi tayekantok tein moneki titajtaniskej keman timotataujtiskej. Moneki tiktajtaniskej Jiova maj kisentoka techmachti uan maj techpaleui maj tiksentokakan kuali timouikakan iuan, porin Jesús no kijtoj: “In taka ma nemikan amo sayo ika in takualis san. Ta, no ma yolpepexokatinemikan ika nochi in tajtolme ten Dios techmaktilijtinemi” (Mat. 4:4). w15 15/6 5:4, 7, 8

Moneki nochipa tiktajtaniskej Dios maj techpaleui maj amo tiauilnemikan, okachiok ijkuak timoajsiskej kampa uelis titajtakoskej. Uelis yeski ke achto ke timochiuaskiaj tiitaixpantijkauan Jiova tikuelitayaj tikchiuaskej seki taman tein amo kuali. Uan kemansa xa tikyolnejnekijok tikchiuaskej. Sayoj ke Jiova uelis techpaleuis maj timopatakan. Yejua nejon kipanok tekiuaj David. Yejua motekak iuan se siuat akin amo katka inamik. Sayoj ke satepan moyolnonotsak uan kitajtanij Jiova maj kimakani “se yolo chipauak” uan maj kipaleuiani maj tatakamatini (Sal. 51:10, 12). Yejua ika, komo tejuatsin tionmochikaujtok tionmoijkuanilis amo kuali tanejnekilis, xikontajtani Jiova maj mitsonpaleui. Yejuatsin mitsonpaleuis okachi xikonyolnejneki xikontakamati uan amo xikonpia amo kuali tanemililmej (Sal. 119:133). w15 15/6 3:5, 6

Akin uejkaujya kitekitilijtokej Jiova kielnamikij keman itech sejse nechikol moajsia sayoj se taixyekankej uan amo se oloch tayekananij; itech sejse sucursal amo moajsiaj Taixyekananij itech Sucursal ta sayoj se taixyekankej, uan itech ueyi kali kampa techixyekanaj amo taixyekanayaj Oloch Taojtokaltianij ta sayoj taixyekankej itech Sociedad Watch Tower. Maski sejsemej nejin tokniuan kipiayaj akin kinpaleuiayaj, tein melauj, sayoj se tokniuj kiixpejpenaya tein mochiuaskia itech sejse nechikol, itech sejse sucursal uan itech ueyi kali kampa techixyekanaj. Sayoj ke satepan ke panok xiuit 1970 mopatak seki taman uan ijkon amo sayoj se tokniuj taixpejpenaskia, ta miakej tayekananij. Semi tapaleuij tein mopatak itech inechikol Dios, ta nochi mochiuak porin axkan okachi tikajsikamatij Biblia. Itech inechikol Dios tinochin tikseliaj nepaleuil porin axkan amo sayoj se tokniuj taixyekana, ta nochin tayekananij akin Jiova kintemakak kemej netetayokolilmej uelij tapaleuiaj porin kipiaj tataman kualneskayomej (Efes. 4:8, TNM). w15 15/7 1:14, 15

Itech nejin tonalmej, miakej taltikpakneminij moxexelouaj porin kinemiliaj ke ininaltepeuj okachi kuali, moueyichiuaj porin taman ixtamatij oso taman kemej nemij. Sayoj ke tiitekitikauan Jiova amo ijkon titanemiliaj uan amo timokalakiaj itech kuejmolmej tein kichiuaj maj taltikpakneminij moxexelokan. ¿Keyej? Porin tiktasojtaj Jiova uan tiknekij tiktakamatiskej (1 Juan 5:3). Tiktakamatij itanauatiluan uan amo tiktayekanaltiaj kani tinemij oso kani tiyolkej. Tejuan tikitaj ke okachi tayekantok tikpaleuiskej Jiova uan itaixyekanalis (Mat. 6:33, TNM). Yejua ika ueli tikijtouaj ke “amo no [ti]poutinemij nikan taltikpak” (Juan 17:11, 15, 16; Is. 2:4). Miakej kinemiliaj ke ininaltepeuj uan kemej nemij okachi kuali ke okseki. Oksekin no ijkon kinitaj mauiltianij akin kinpaleuiaj. Nejin kichiua maj miakej motatanikan, motauelitakan uan hasta maj kinmiktikan akin amo tanemiliaj kemej yejuan. Keman se tekiuajyot kichiua tein amo melauak, xa tiknekiskej amo kuali ika titajtoskej. w15 15/7 3:1, 2

Jiova yektik uan chipauak, uan kiuelita maj nochi kuali tayekyeto. Yejua ika moneki titapaleuiskej maj Kali kampa tiMosentiliaj moajsi chipauak uan maj tayekyeto (1 Cor. 14:33). Komo tiknekij tiknextiskej nejin ikualneskayo Jiova, moneki titanemiliskej, timonejnemiltiskej uan tikueyichiuaskej ika chipaujkayot. Uan no, tonakayo no moneki maj chipauak moajsi (Apoc. 19:8). Komo titapaleuiaj maj nochipa chipauak moajsi Kali kampa tiMosentiliaj, amo timopinaujmatiskej keman tikinyoleuaskej taltikpakneminij maj yakan nechikol. Uan yejuan kiitaskej ke yekmelauj tiknekij tinemiskej itech se yankuik taltikpak tein chipauak. No kiitaskej ke tikueyichiuaj se Dios yektik akin kichiuas nejin taltikpak se kualtsin xochital (Is. 6:1-3; Apoc. 11:18). Kampa yeski tinemiskej, moneki tikchiuaskej maj chipauak moajsi Kali kampa tiMosentiliaj uan maj kuali tayekyeto. ¿Keyej? Porin ompa tikueyichiuaj Jiova (Deut. 23:14). w15 15/7 4:13-15

Keman tokniuan kiajsikamatkej ke Jesús peuak taixyekana itech xiuit 1914, kiajsikamatkej ke tamilis amo uejkaua ejkoskia. Yejua ika peujkej okachi kiteixmatiltiaj iTekiuajyo Dios. Itech Marcos capítulo 13, Jesús kijtoj ke ininteko takeualmej ueliskia ejkos okachi satepan ke tein yejuan kinemiliayaj. Sayoj ke yejuan monekia kisentokaskej tachixtoskej maski amo kimatiskiaj kemanian ejkoskia. Nejin techmachtia ke komo miak xiujmejya tikchixtokej maj ejko tamilis, nejon amo kijtosneki ke uejkauasok oso ke amo tikitaskejok. Moneki tiksentokaskej titachixtoskej. Keman tiyetoskejya itech Xochital, tikitaskejya keniuj mochiuak nochi tein Jiova kijtojka ke panoskia itech itamian tonalmej. Yejua ika, ¿keniuj timomachiliskej? Senkis titakuaujtamatiskej iuan Jiova uan senkis tikneltokaskej ke yejuatsin kichiuas nochi okseki taman tein motenkauak (Jos. 23:14). Semi tiktasojkamatiliskej Jiova porin kiualkuik tamilis keman okachi monekia uan porin kinnauatij itekitikauan maj tachixtonij uan maj kichiujtonij tein monekia (Hech. 1:7; 1 Ped. 4:7). w15 15/8 2:10, 11, 14

Miakej taltikpakneminij moixpetaniaj ika miak taman tein Jiova kitauelita, kemej tateuilis, auilnemilis oso naualot. Itech Internet, televisión, películas uan amaixmej nochi nejin monextia kemej yeskia kuali yetok. Itech seki uejueyi altepemej, kipatanij tanauatilmej uan axkan kinkauaj taltikpakneminij maj kichiuakan seki taman tein achto kiitayaj ke amo kuali yetoya. Sayoj ke Jiova amo kipatatok itanauatiluan uan kisentoka kitauelita nejon amo kuali tachiualismej (Rom. 1:28-32). Itech inintonaluan yekinika itatojtokakauan Cristo, taltikpakneminij no moixpetaniayaj ika tateuilis uan auilnemilis. Sayoj ke tokniuan amo kichiuayaj nejon, porin yejuan kitakamatiaj itanauatiluan Dios. Yejua ika kinijijtouayaj uan kintajyouiltiayaj. Tatitanil Pedro kijkuiloj: “Nekes ten amo taneltokaj iuan Cristo, yejuan nojonkes namechmoukaitaj kuak namejuan amo nankichiutinemij ok ijkon keme yejuan kuelitaj. [...] Uan no yejuan namechkejkeloaj porin namejuan amo inuan nannentinemij ok” (1 Ped. 4:4). w15 15/8 4:2, 3

Tokniuan akin yekyolmajsitokej mochikauaj tapaleuiskej maj itech nechikol nochin kuali mouikakan (Efes. 4:1-6, 15). Tinochin moneki tikixtaliskej tisentekitiskej iniuan tokniuan uan kuali iniuan timouikaskej. Uelis tikchiuaskej nejin komo tiyolyemankej. Kemej neskayot, komo se tokniuj mopoloua oso kichiua teisa tein techyolxokolia, ¿toni tikchiuaj? ¿Amo iuan titajtouajok? ¿Oso tiktemouaj tikyektaliskej kuejmol? Komo tiyekyolmajsitokej, tiktemoskej tikyektaliskej kuejmolmej uan amo okachi tikueyiltiskej. ¿Melauj ke tinochin monekiskia timochikauaskej kuali timouikaskej iniuan tokniuan? w15 15/9 1:12, 13

Jesús senkis kineltokaya ke tein kijtoua iTajtol Dios melauak uan ke kipia okachi kuali tayolmajxitilis. Komo tiknekij tikchiuaskej kemej Jesús uan tiknekij maj totakuaujtamatilis chikauak moajsi, moneki mojmostaj tikixtajtoltiskej Biblia, timomachtiskej uan itech titanemiliskej tein techmachtia. No moneki tiktemoskej itanankililuan netajtanilmej tein uelis tikpiaskej. Kemej neskayot, ¿senkis tikonneltoka ke tinemij itech itamian tonalmej? Xionmomachti tein Biblia achtook kijtojka ke mochiuaskia itech itamian tonalmej. ¿Senkis tikonneltoka ke Jiova kichiuas tein motenkauak? Xionmomachti tein Biblia achtook kijtojka ke panoskia uan tein ijkon mochiuakya. ¿Senkis tikonneltoka ke tein tayolmajxitia Biblia tapaleuia axkan? Xikonixtajtolti keniuj keman seki tokniuan kichiuanij tein Biblia tayolmajxitia kinpaleuiani maj kipiakan okachi kuali nemilis (1 Tes. 2:13). No uelis tikchiuaskej kemej Jesús komo titanemiliaj itech tein Jiova motenkauani techmakas (Heb. 12:2). Xikonnemili ke tein Dios motenkauak kichiuas no motenkaua mitsonmakas tejuatsin. w15 15/9 3:16, 17

¿Keniuj uelis tiknextiliskej Jiova ke tiktasojtaj? Se taman, keman titemakaj tomin uan ijkon titapaleuiaj maj mochiua itekiyo Dios itech tonechikol uan itech nochi taltikpak. Maski tisekimej amo tikpiaj miak taman, tinochin uelis tikuiskej tein tikpiaj uan ijkon tiknextiliskej Jiova ke tiktasojtaj (2 Cor. 8:12). Sayoj ke no uelis tiknextiliskej ke tiktasojtaj ika okseki taman. Tiknextiliaj ke tiktasojtaj keman iuan titakuaujtamatij. Maj tikelnamikikan ke Jesús techmachtij maj amo techteltekipacho keniuj tikajsiskej tein okachi tayekantok. Jiova motenkaua ke techmakas nochi nejon komo tiktayekanaltiaj tiktekitiliskej itech tonemilis (Mat. 6:31-33). Tejuan titakuaujtamatij ke yejuatsin kichiuas tein motenkaua. Uan nejin taixejekol, porin keman tiktasojtaj aksa, itech titakuaujtamatij. Keman okachi titakuaujtamatij iuan Jiova, okachi tiknextiliaj ke tiktasojtaj (Sal. 143:8). Yejua ika, moneki timochiuiliskej nejin netajtanilmej: “¿Niknextilia Jiova ke niktasojta ijkon kemej nikui notonaluan uan nochikaualis? ¿Niknextia mojmostaj ke nitakuaujtamati ke yejuatsin nechmakas nochi tein nechpoloua?”. w15 15/9 5:7, 8

¿Kemansa tionmotajtaniani ox Jiova mitsonmakixtis keman ejkos okachi ueyi tajyouilis? Se taman tein motelneki yejua maj timochikauakan tikpiaskej se chikauak takuaujtamatilis. Tatitanil Pedro kijtoj ke motelneki “momajxitijtiyas totakuautamatilis” (1 Ped. 1:7). Kemej okachi ueyi tajyouilis tel amo uejkauaok mochiuas, tiknekij tikpiaskej totakuaujtamatilis tein uelis techpaleuis maj timakisakan (Heb. 10:39). Yejua ika moneki timochikauaskej maj totakuaujtamatilis okachi mochikaujtiuj. Ijkon, Jesús techmakixtis keman kiixpolokiuj nochi tein amo kuali tein onkak nikan taltikpak. Uelis tiktajtaniskej Jiova tein se takat kitajtanij Jesús: “Xinechonpaleui kuak amo mouan niyektakuautamatis” (Mar. 9:24). Oso no uelis tiktajtaniskej Dios tein itatitaniluan Jesús kitajtanijkej: “Xitechonmajxitili totakuautamatilis kachi ok” (Luc. 17:5). w15 15/10 2:1, 2

Pablo kitayekanaltij tanojnotsalis, uan yejua ika yajki itech miak altepemej, kemej Siria, Asia Menor, Macedonia uan Judea. Yejua kijtoj: “Nikelkautiu nochi ten nopan mochiuak ya ne achtopa ya. Uan nimotekitiltijtiu para ijkon uelis nikajsitiyas ne nemaktil ten Dios nechmakatiualas ok” (Filip. 1:10; 3:8, 13, 14). Uan kemej iselti katka, uelia okachi kitekitiliaya Dios porin amo tanemiliaya itech okseki taman (1 Cor. 7:32-35). Itech nejin tonalmej, seki itekitikauan Jiova kiixtalianij amo monamiktiskej uan ijkon uelis okachi kitekitiliskej Jiova (Mat. 19:11, 12). Miakej akin amo kipiaj ininnamik, amo semi moneki kinpaleuiskej ininchankauan ke akin kemaj kipiaj ininnamik. Sayoj ke komo tikpiaj tonamik oso toselti, tinochin moneki tikitaskej maj amo teyi techtapololti keman tiktekitiliaj Jiova. Kemej neskayot, xa tisekimej monekis tikpataskej se taman tein timomattokej tikchiuaskej uan ijkon okachi kuali tiktekitiltiskej totiempo uan okachi tiktekitiliskej Jiova. w15 15/10 3:15, 16

Biblia kijtoua ke taltikpaknenkej “amo iaxka iojtokalis. Amo iaxka taltikpaknenkej akin nejnentok nion kiyekanas itaksalis” (Jer. 10:23). Tein kichiuanij taltikpakneminij itech xiujmej tein panouanij kinextiani ke Jiova amo techchijchiuak kemej tejuan toselti uelis timoixyekanaskej oso maj technamiki ijkon tikchiuaskej, ta moneki maj yejuatsin techpaleui. ¿Keyej kinkaua Jiova maj kisentokakan nemikan akin amo yolkualmej? Porin ijkon monextiani ke sayoj iTekiuajyo Dios okachi kuali taixyekana. Amo uejkaua, Dios kinixpolos nochin akin amo yolkualmej. Satepan ke kichiuas nejon, komo aksa oksepa taomeyolotia ox yejuatsin kinamiki taixyekanas, yejuatsin niman kichiuas tein monekis. Uelis kikuis tein kichiuanij taltikpakneminij itech xiujmej tein panouanij uan ijkon kinextis ke taixnamikinij moneki ixpoliuiskej. Amo keman oksepa kikauas maj nemikan akin amo yolkualmej. w15 15/11 3:5, 6

Jesús semi kiuelitaya kinnojnotsas taltikpakneminij ika iTekiuajyo Dios. Nochipa kitayekanaltij ika tajtos. Keman tanojnotstoya nikan taltikpak, ika tajtoj iTekiuajyo Dios itech panoua 100 tamachtilismej. ITekiuajyo Dios yejua tamachtilis tein okachi ika tajtoj (Mat. 12:34). Tepitsin satepan ke moajokuik, Jesús monextij ininixpan panoua 500 taltikpakneminij (1 Cor. 15:6). Xa yejuan nejin taltikpakneminij akin Jesús kinnauatij maj kinnojnotsakan “nochi in taltikpakuani”. Sayoj ke kinnojnotsaskej nochin taltikpakneminij ouij yeskia. Jesús kijtoj ke uejkaua kichiujtoskiaj nejin tekit. Mosentokaskia hasta keman ixpoliuiskia nochi tein amo kuali. Keman tejuan titanojnotsaj itech nejin tonalmej, titapaleuijtokej maj mochiua tein Jesús tanauatij (Mat. 28:19, 20). Uan Jiova techmaka “nochi ten kuali” uan ika techpaleuia maj titanojnotsakan. w15 15/11 5:1-3

Itech tajtol hebreo, itokay Dios kipia naui letra. Nejin tokayit ixnesi itech miak tajkuilolmej tein ne uejkauj mochijchiuak itech tajtol hebreo, kemej tajkuilolmej tein kiajsikej itech mar Muerto. No ixnesi itech miak tajkuilolmej tein pouij itech Septuaginta tein kichijchiujkej kemej itech xiuit 200 achto itech totonaluan uan xiuit 100 satepan itech totonaluan. Senkis moita ke itokay Dios moneki yetos itech Biblia. Maski ijkon, itech miak Biblias kijkuanianij. Kemej neskayot, itech xiuit 1901 kikixtijkej Biblia American Standard Version. Itech nejin Biblia ixnesia itokay Dios. Itech xiuit 1952 kikixtijkej American Standard Version tein oksepa kiyekitakej. Nejin Biblia amo kipiayaok itokay Dios. ¿Keyej? Porin akin kitajtolkepkej kinemiliayaj ke amo kuali yetoya maj kikuikan itokay Dios. Miak Biblias tein kitajtolkepanij itech tajtol inglés uan itech okseki tajtolmej no kijkuanianij itokay Dios. w15 15/12 2:3-5