Junio

Komo aksa techiluia teisa tein techyolxokolia, okachi kuali maj titanankilikan ika kualtakayot (Prov. 15:1). Maj tikitakan tein kipanok se temomaj akin iselti kiiskaltijtoya itelpoch. Telpoch ichtaka kichiujtoya tein amo kuali. Se tonal, se tokniuj siuat kimatik nejon uan kinekik kiyolchikauas temomaj. Maski amo kinekia kiyolxokolis, kiluij: “¡Semi tetayokoltij amo xikmatini kuali tikiskaltis!”. Achto ke kinankilis, temomaj tanemilij uan mochikauak kisentokas yolseujtos. Satepan kinankilij ika kualtakayot ke amo mosenkauaya uan ke kisentokaskia mochikauas kuali kimachtis itelpoch. Kemej kuali tanankilij, nejon ome tokniuan kisentokakej kuali mouikakej. Uan no, telpoch kikakik tein imomaj kijtojka. Keman kikakik ke imomaj amo kinemiliaya ke amo ueliskiaok mopatas, kikauak tein amo kuali tein kichiujtoya, moauij uan satepan tekitik Betel. ¿Toni techmachtia nejin? Ke yeski titajtojtoskej iniuan tokniuan, tochankauan oso oksekin akin amo tikinixmatij, moneki nochipa titajtoskej ika poujkaitalis (Col. 4:6). w15 15/12 3:15, 17

Ompa Jerusalén, 120 imomachtijkauan Jesús amo omeyolouayaj ox Dios kinixpejpenka ika yektikatsin espíritu itech nejon tonal. Ueliaj tajtouayaj itech tataman tajtolmej (Hech. 2:6-12). Sayoj ke amo nochipa panoua seki taman tein se kimoujkaita keman Dios kiixpejpena aksa ika iyektikatsin espíritu. ¿Keniuj tikmatij? Kemej neskayot, itech nejon tonal Dios no kinixpejpenak okseki tel miakej taltikpakneminij, sayoj ke Biblia amo kijtoua ke no kipiayaj tit itech inintsontekon. Dios kinixpejpenak nejon taltikpakneminij keman moauijkej (Hech. 2:38). Sayoj ke yejuatsin amo nochin kinixpejpena keman moauiaj. Tokniuan akin nemiaj Samaria kinixpejpenak seki tonalmej satepan keman moauijkej (Hech. 8:14-17). Uan Cornelio uan akin moajsiaj ichan kinixpejpenak hasta achto ke moauiskiaj (Hech. 10:44-48). w16.01 3:3, 5

Tokniuan taixpejpenalmej amo kinemiliaj ke okachi ueyichiuanimej ke oksekin. Amo kinemiliaj ke porin taixpejpenalmej kipiaj okachi yektikatsin espíritu ke okseki tokniuan. Amo no kinemiliaj ke okachi kiajsikamatij Biblia ke oksekin. Uan amo kiluiaj aksa ke kinemiliaj ke yejua no taixpejpenal uan ke monekiskia kikuas pan uan tayis vino. Okachi kuali, kinextiaj yolyemanilis uan kineltokaj ke sayoj Jiova ueli kiixpejpena aksa maj youi iluikak. Amo no kichiaj maj okseki tokniuan kinueyitalikan (Efes. 1:18, 19; Filip. 2:2, 3). Kimatij ke keman Jiova kinixpejpenak, amo kichiuak maj nochin kimatinij nejon. Yejua ika se tokniuj taixpejpenal amo kimoujkaita komo se tokniuj amo niman kineltoka ke taixpejpenal. Biblia techiluia maj amo niman tikneltokilikan aksa komo kijtoua ke Jiova kimakak se tel ueyi tatiochiualis (Apoc. 2:2). w16.01 4:6, 7

Jiova miakpa kinmakixtij Abrahán uan Sara (Gén. 12:10-20; 20:2-7, 10-12, 17, 18). Ika nochi nejin tein kipanok okachi mochikauak itakuaujtamatilis Abrahán. ¿Uan tejuan? ¿Uelis timochiuaskej tiitasojikniuan Jiova? Kemaj. Techpaleuis komo no tikixmatij Jiova ijkon kemej Abrahán. Uan no, moneki tikseliskej taixmatilis uan tikpanoskej seki taman itech tonemilis. ¿Keniuj? Abrahán amo kipiaya nochi Biblia, sayoj ke tejuan kemaj (Dan. 12:4). Itech Biblia tikajsij miak taman kemej tamati “Akin kichijchiuak iluikak uan taltikpak” (Gén. 14:22). Nejon tein tikixmatiskej kichiuas maj tiktasojtakan Jiova uan maj senkis tikpoujkaitakan. Uan nejon techolinis maj tiktakamatikan. Uan tikitaskej keniuj yejuatsin techmatampauia uan techtiochiua, uan nejon tein tikpanoskej techpaleuis maj mochikaua totakuaujtamatilis. Tiktekitiliskej Jiova ika nochi toyolo techualkuilis yolpakilis uan yolseuilis (Sal. 34:8; Prov. 10:22). Ijkon kemej okachi tikixmatiskej Dios uan tikmachiliskej inepaleuil, okachi mochikauas tokuali uikalis iuan. w16.02 1:7, 8

Nejin tajkuilol techmachtia ke María kuali kiixmatia Escrituras Hebreas. ¿Keyej tikijtouaj nejin? Porin itajtoluan katkaj kemej tajtolmej tein Ana, imomaj Samuel, kijtoj itech se netataujtil tein kichiuak (1 Sam. 2:1-10). Nesi ke itech nejon tonal, María kikuik tajtolmej tein moajsij kemej itech 20 tajkuilolmej tein kipia iTajtol Dios. Moyekita ke yejua kiuelitaya ika tajtos tein momachtiaya kemej tamati Jiova, akin katka okachi kuali iTasojikniuj. Komo kemansa moneki tikchiuaskej se tekit tein Jiova techmaka tein tikitaj ke semi ouij, xa timomachiliskej kemej María. ¿Toni uelis tikchiuaskej? Maj tiknextikan takuaujtamatilis kemej yejua. ¿Keniuj? Maj tikselikan tekit ika yolyemanilis uan maj titakuaujtamatikan ke Jiova techpaleuis. Maj kuali tikakikan Jiova uan maj itech titanemilikan tein techmachtiani uan tein kichiuas satepan. Uan no, maj ika yolpakilis tikintapouikan oksekin tein timomachtianij (Sal. 77:11, 12; Luc. 8:18; Rom. 10:15). w16.02 2:17, 18

Nochi xiujmej moauiaj tel miakej telpochmej uan ichpochmej (Ecl. 12:1). Tetatmej akin kichiuaj kemej Cristo uan tayekananij moneki kiyekitaskej maj kinekikan moauiskej porin ininyolo kinolinia uan maj kiajsikamatikan tein kijtosneki se moauis. Keman aksa kimaktilia Jiova inemilis uan moauia, peua se yankuik nemilis kemej itekitikauj Dios. Nejin kijtosneki ke Jiova semi kitatiochiuis, sayoj ke Satanás semi kiixnamikis (Prov. 10:22; 1 Ped. 5:8). Yejua ika, tetatmej akin itaixpantijkauan Jiova moneki kiixtaliskej kinpaleuiskej ininkoneuan maj kiajsikamatikan tein kijtosneki se mochiuas se itatojtokakauj Cristo. ¿Uan komo itatuan se telpoch amo itaixpantijkauan Jiova? Komo ijkon, tayekananij itech nechikol kipaleuiskej ika netasojtalis maj kiajsikamati tein kijtosneki se motemaktis uan se moauis (Luc. 14:28-30). Keman aksa kineki kichijchiuas se ueyi kali, moneki kipias nochi tein ika uelis kichijchiuas. No ijkon, komo se telpoch kineki moauis, no moneki kipias nochi tein kipaleuis maj kitekitili Jiova ika nochi iyolo hasta keman ejkos tamilis (Mat. 24:13). w16.03 1:1, 2

Jiova kinmakak israelitas tanauatil tein kiselij Moisés maj kinpaleuiani maj kimatinij keniuj nemiskiaj uan keniuj kiueyichiuaskiaj. Satepan ke Jesús ualaj nikan taltikpak, Jiova kitemakak yankuik tanauatilmej oso kitamajxitilij tein ipa yetoyajya. ¿Keyej? Porin ijkuak uan satepan itekitikauan amo ualeuaskiajok itech sayoj se xolal, ta itech miak xolalmej uan kipiaskiaj tataman tanemililmej. Itech ixolal pouiskiaj akin taixpejpenalmej. Yejuan kipeualtiskiaj nechikol kampa kichiuaj kemej Cristo uan pouiskiaj itech se yankuik netenkaualis. Itech yankuik nechikol kitakamatiaj “tanauatil de Cristo”. Nejin tanauatil amo kemej tanauatil tein kiselij Moisés. ¿Keyej? Porin moyekana ika tamachtilismej tein amo ijkuiliujtokej itech tet, ta itech iyolo sejse akin kichiua kemej Cristo. Nejin tanauatil kinixyekanaskia uan kinpaleuiskia nochin itekitikauan Dios maski kayomej itech tataman altepemej (Gál. 6:2). Taixpejpenalmej semi kinpaleuij “tanauatil de Cristo”. Tepitsin achto ke mopeualtiskia yankuik netenkaualis, Jesús kitemakak ome tanauatilmej tein motelnekij. Se, mouika ika tanojnotsalis. Uan okse kinextia keniuj moneki mouikaskej tokniuan. Kemej nejin tanauatilmej monekia kitakamatiskej nochin akin kichiuaj kemej Cristo, tinochin moneki tiktakamatiskej, yeski tikchiaskej tinemiskej iluikak oso nikan taltikpak. w16.03 4:10, 11

Keman se tayekankej kinextilis se tokniuj keniuj kichiuas tekit, achto moneki kitemos kuali mouikas iuan uan ijkon tokniuj kuali momachilis. Uelis kichiuas nejon kemej momattokej kichiuaskej kampa nemij uan kemej uelis kichiuaskej. Maski tikonpias miak tekit, xikonxelo tonalmej keman uelis tionyetos iuan tokniuj. Nejin motelneki porin ijkon tikonnextilis ke tikonita ke motelneki inepaleuil. Uan tikyekmatij ke tokniuj kitasojkamatis netasojtalis tein tikonnextilis uan tein tikonchiuas iuan. Se kuali tayekankej amo sayoj kinnextilia okseki tokniuan keniuj kichiuaskej tekit, ta no kintasojta (no xikonita Juan 5:20). Komo tokniuan kimachiliaj ke tikonita ke motelneki ininnepaleuil, okachi kuali tanankiliskej keman tikonnextilis keniuj kichiuaskej tekit (Prov. 17:17; Juan 15:15). w15 15/4 1:19, 20

Tanojnots kampa ika tajtoua tekiuaj Azarías (Uzías) kimelaua miak taman tein techpaleuia maj tikmatikan keyej Dios kitatsakuiltij. Sayoj ke itech Biblia moajsi okseki tanojnotsmej tein amo kimelaua nochi nejon (2 Rey. 15:7, 32; 2 Crón. 26:3-5, 16-21). Keman ijkon panos, ¿tiomeyolouaskej ox Jiova kichiuak tein monekia? ¿Oso titakuaujtamatiskej ke nochipa kichiua teisa ika melaujkayot? (Deut. 32:4.) Biblia kipia miak tamachtilis tein techpaleuia maj kuali tikixmatikan Jiova uan maj iuan titakuaujtamatikan. Komo tikixmatij uan tiktasojtaj, amo monekis nochipa tikmatiskej keyej ijkon kichiua teisa. ¿Uan toni uelis techpaleuis maj senkis titakuaujtamatikan ke Dios nochipa kichiua tein moneki? Komo timomachtiaj Biblia. Ijkon timochiuaskej yekmelauj tiitasojikniuan Jiova (Sal. 77:12, 13). w15 15/4 3:8, 10

Ángeles kipiaj miak chikaualis. Okachi kipiaj tamatilis uan okachi chikaujkej ke tejuan. Sayoj ke ángeles akin yolkualmej kichiuaj tein kuali ika ininchikaualis. Kemej neskayot, ne uejkauj, se ángel kinmiktij itech sayoj se youal 185,000 tateuianij akin kintauelitayaj israelitas. Nejon amo keman ueliskia kichiuas se taltikpaknenkej uan no semi ouij yeskia maj kichiuakan se ueyi oloch tateuianij (2 Rey. 19:35). Okse tonal, se ángel kinkixtij itatitaniluan Jesús kampa kintsakkaj. Tatapoj, kinkixtij tatitanilmej uan oksepa tatsakuak uan tajpianij amo kiitakej (Hech. 5:18-23). Kemej tikitaj, ángeles akin yolkualmej kichiuaj tein kuali ika ininchikaualis. Sayoj ke Satanás kichiua tein amo kuali ika ichikaualis. Uan yejua kipia miak chikaualis. Yejua ika Biblia kijtoua ke “takitskijtok” uan “tayekantinemi nikan taltikpak” (Juan 12:31). w15 15/5 1:5, 6

Tokniuan akin ininselti uan namikuanij moneki mochikauaskej kiixtopeuaskej nochi tataman auilnemilis. Sayoj ke nejin ouij. Kemej neskayot, telpochmej uan ichpochmej kinkakij miakej akin iniuan momachtiaj keman ika ueyinekilis kijtouaj ke motekaj iuan akin yejuan kinekij, uan ke ika tajtouaj auilnemilis keman motajkuilouiliaj ika ininteléfono uan kititanij taixkopimej kampa moita auilnemilis. Itech seki uejueyi altepemej kiitaj ke se kititanis nejon kemej yeskia se kititanis taixkopimej kampa ixnesi keniuj ininka mauiltiaj konemej. Uan no, Biblia kijtoua ke akin auilnemi “moijtakouilia [...] itakayo” (1 Cor. 6:18). Miakej momikilianij oso tel tajyouiaj porin kipiaj kokolismej tein mopanoltiliaj keman motekaj iuan aksa. Uan miakej telpochmej uan ichpochmej akin motekaj iuan aksa keman ayamo monamiktiaj, satepan moyolnonotsaj. Miak amatajkuilolmej, películas uan nekuikatilmej kitemouaj maj tiknemilikan ke amo teyi techpanos komo amo tiktakamatij itanauatiluan Jiova. Sayoj ke nejon amo melauak. Komo amo timoyekpiaj, uelis ‘timoyolkajkayaujtinemiskej ika in tajtakol’. w15 15/5 2:14

Jiova kualtakat iniuan nochin, uan Jesús no ijkon kichiua. ¿Toni kipaleuiaya Jesús maj kualtakat? Yejua kinemiliaya keniuj momachiliskiaj oksekin ika tein kichiuaskia. Kemej neskayot, se tonal, se siuat akin kichiujka miak taman tein amo kuali yajki kiitato Jesús. Yejua tel chokak hasta kimetsapaloj Jesús ika iixayo. Jesús kiitak ke siuat moyolnonotska uan kiajsikamatik ke komo amo katka kualtakat iuan, okachi amo kuali momachiliskia. Yejua ika kiyolchikauak ika tein kemaj kuali kichiujka uan kitapojpoluij. Se taixyekankej itech taneltokalis amo kiyolpaktij maj Jesús kitapojpoluiani nejon siuat. Maski ijkon, Jesús no kikuik kuali tajtolmej keman kinankilij yejua (Luc. 7:36-48). Komo tiknekij tiyeskij tikualtakamej iniuan oksekin kemej Jiova, ¿toni moneki tikchiuaskej? Pablo kijtoj ke akin kichiua kemej Cristo “amo kinchiuilijtinemi oksekin ke ma no motajtolteuijtinemikan. Ta [...] kachi ok moneki ok ma yolyemankanemi” (2 Tim. 2:24). Moneki tiknemiliskej keniuj momachiliaj oksekin uan keniuj momachiliskej ika tein tikiniluiskej. Nejon techpaleuis maj tikualtakamej iniuan uan tikchiujtoskej kemej Jiova (Prov. 15:28). w15 15/5 4:8, 9

Keman tokniuan tajyouiaj, uelis tikinmakaskej tein kinpoloua uan tikinyolseuiskej (Prov. 17:17). Nejin uelis tikchiuaskej satepan ke mochiua se tetsauit. Kemej neskayot, satepan ke panok se chikauak kiouaejekat, ichan se tokniuj siuat akin amo nemiok itakauj tel uejueliuik. Keman tokniuan kipaleuijkej, yejua kijtoj ke semi kitasojkamati pouis kemej itaixpantijkauj Jiova, amo sayoj porin kimakakej miak taman, ta okachi porin kipaleuijkej maj mochikaua ikuali uikalis iuan Jiova. No ijkon kipanok se tokniuj siuat akin iselti. Yejua semi motekipachojtoya porin se chikauak kiouaejekat kiuejueloj ichan. Sayoj ke tokniuan kipaleuijkej maj kiyektaliani. Yejua kijtoj ke amo kimatia keniuj kimelauas kemej momachiliaya. Uan ompa kijtoj: “Tasojkamatik, Jiova”. Tinochin tiktasojkamatij maj moajsikan tokniuan takamej uan siuamej akin toka motekipachouaj. Sayoj ke okachi tiktasojkamatiliaj Jiova uan Jesucristo porin techyekpiaj. w15 15/6 1:17

Biblia techiluia keniuj moneki mouikaskej takamej uan siuamej, uan ijkon techpaleuia maj timoijkuanilikan amo kuali tanemililmej. Sekin kinemiliaj ke komo se takat uan se siuat amo monetechouaj, kuali yetok komo kinextiaj ke moixuelitaj kemej moixuetskiliaj, kemej moixitaj oso ika tein kichiuaj. Sayoj ke keman omen kichiuaj nejon, uelis peuas kipiaskej amo kuali tanejnekilis uan nejin uelis kinuikas maj auilnemikan. Nejin kinpanokya oksekin, uan no uelis techpanos tejuan. Uelis techtelpaleuis kuali neskayot tein kikauak José. Inamik iteko kitemouaya kichiuas maj José iuan motekani. José kiluij ke amo, sayoj ke siuat kisentokaya kitemouaya maj iuan motekani. Mojmostaj kitajtaniaya maj mokauanij ininselti (Gén. 39:7, 8, 10). Sayoj ke José kiixtalijka amo iuan motasojtas nion mokauas maj kitanejnektiani tein siuat kichiuaya. Nejon kipaleuij maj amo kipiani amo kuali tanejnekilis. w15 15/6 3:10, 11

Jiova kineki maj inintech titanemilikan tokniuan uan itech ininkuali uikalis iuan. Se taman kemej uelis tikchiuaskej, yejua keman tikintapojpoluiaj keman techyolxokoliaj. Miakpa, ininnepololuan amo uejueyi. Keman tikintapojpoluiaj tokniuan, tiknextiaj ke tikintasojtaj uan ke tiktasojkamatij maj Jiova techtapojpolui (Col. 3:13, TNM). Kemej titajtakouanij, kemansa xa techouijmaka tiktapojpoluiskej se tokniuj (Lev. 19:18). Uan komo no tikintapouiaj oksekin tein tokniuj techchiuilij, xa techpaleuiskej tejuan uan kiixtopeuaskej tokniuj. Uan nejon uelis kichiuas maj itech nechikol moxexelokan. Komo panoua nejon uan amo tikchiuaj nion teyi tein tapaleuis maj moyektali nejon kuejmol, tiknextijtoskej ke amo tiktasojkamatij maj Jesús toka momikiliani (Mat. 18:35). Komo amo tikintapojpoluiaj oksekin, Jiova amo no techtapojpoluis (Mat. 6:14, 15). Sayoj ke komo tiknekij maj Jiova techtapojpolui, moneki amo keman tiueyitajtakoskej (1 Juan 3:4, 6). w15 15/6 5:9-11

Jiova techmakatok ueyi tatiochiualis maj okachi tikualtsintilikan xochital kampa moajsi ixolal. ¿Keniuj uelis tikchiuaskej? Se taman, keman titanojnotsaj uan titamachtiaj ika yolpakilis tein kijtoua Biblia. Nochipa keman tikpaleuiaj aksa maj mochiua itaixpantijkauj Jiova, tikchiujtokej maj mopataua nejon xochital (Is. 26:15; 54:2). Keman timochikauaj okachi kuali tiknextiskej kualneskayomej tein kiyolpaktia Jiova no titapaleuiaj maj okachi mokualtsintili xochital kampa moajsi ixolal. Ijkon tikchiuaj maj oksekin kinyolnotsa pouiskej itech nejin xochital. Tein melauj, taltikpakneminij amo sayoj kinyolnotsa taixmatilis tein tikpiaj, ta kemej kuali timonejnemiltiaj kinolinia maj motokikan itech nechikol uan maj kiixmatikan Jiova uan Jesús. Tikyekmatij ke Jiova uan Jesús semi yolpakij keman kiitaj kualtsin xochital kampa moajsi ixolal Dios. Uan tejuan no tiyolpakij porin titapaleuiaj maj mokualtsintili. Sayoj ke okachi tiyolpakiskej keman titapaleuiskej maj nejin taltikpak mochiua se xochital. w15 15/7 1:18-20

Jiova kikaua maj sejse taltikpaknenkej kiixpejpena akoni kipaleuis kemej taixyekankej. Yejua ika xionmotajtani: “¿Niktakamati Jiova porin niknemilia ke yejuatsin okachi kuali taixyekankej? ¿Senkis nikneltoka ke sayoj itaixyekanalis Dios uelis kiyektalis nochi kuejmolmej tein onkak? ¿Oso niknemilia ke amo moneki maj Dios techixyekana?”. Kemej neskayot, ¿toni tiontanankiliskia komo aksa mitsontajtania keniuj tikonita se tekiuajyot oso se taman nechikol? Semi melauak ke seki tekiuanij oso akin pouij itech nejon nechikolmej kipiaj kuali tanemilil uan yekmelauj kinekij kinpaleuiskej taltikpakneminij. Sayoj ke maj tikelnamikikan ke sayoj iTekiuajyo Jiova uelis kiyektalis kuejmolmej tein onkak itech taltikpak uan kichiuas maj amo onkaok teikamauiltilis. Yejua ika sayoj tikpaleuiaj Jiova. Komo amo tikchiuaskiaj, itech nechikol nochin moxexeloskiaj. w15 15/7 3:7, 8

Keman tikitaj itachijchiualis, tikajsikamatij ke Jiova semi techtasojta (Rom. 1:20). Kemej neskayot, yejuatsin techtalij itech taltikpak ika nochi tein moneki uan ijkon tiyolpakiskej. Uan no, kichijchiuak tataman takual uan ijkon techyolpaktis tein tikuaskej (Ecl. 9:7). Jiova kinchijchiuak taltikpakneminij kemej ueliskej kichiuaskej se tekit tein kinyolpaktis uan kimachiliskej ke ueli tapaleuiaj (Ecl. 2:24). Kintalij nikan taltikpak maj kinpiakan konemej, maj kiyekpiakan taltikpak uan tapialmej uan okseki taman tein yoltok (Gén. 1:26-28). Uan no, techchijchiuak kemej tiueliskej tiknextiskej ikualneskayouan tein kualtsitsin (Efes. 5:1). w15 15/8 1:4, 5

Senkis moita ke tein achtook kijtojka Biblia mochiujtokya uan ke tamilis ejkos keman amo tikmattoskej. Amo uejkaua, Organización de las Naciones Unidas uan tekiuajyomej tein kipaleuiaj kinekiskej kintamiixpoloskej taneltokalismej tein amo melaujkej (Apoc. 17:16). Moneki amo tiknemiliskej ke poliuiok miak tonalmej keman mochiuas nejon. Maj tikelnamikikan ke Dios kichiuas maj tekiuajyomej kinekikan kinixnamikiskej taneltokalismej. Yejuatsin ijsiujka uelis kichiuas nejon uan keman amo tikmattoskej (Apoc. 17:17). Amo uejkaua ixpoliuis tein amo kuali tein mochiujtok nikan taltikpak. Yejua ika, maj tikchiuakan tein Jesús tayolmajxitij ika tajtolmej tein ixnesij itech tajkuilol tein axkan tikitaj (Apoc. 16:15). Maj tiksentokakan titachixtokan uan maj tiktayekanaltikan tiktekitiliskej Jiova. Maj titakuaujtamatikan ke yejuatsin kinmakixtis akin tachixtokej uan kichiujtokej tein moneki (Is. 64:4). w15 15/8 2:17

Melauak ke moneki tikintakachiuaskej nochin. Sayoj ke moneki amo timouikaskej iniuan akin amo kitakamatij Dios. Kemej neskayot, amo kuali yeskia maj se itaixpantijkauj Jiova peua moixmati iuan aksa akin amo itaixpantijkauj Jiova. Okachi moneki maj kuali timouikakan iuan Dios ke kuali timouikaskej iuan akin amo kitasojta Jiova. Sayoj moneki yeskij totasojikniuan akin nemij kemej Dios kiyolpaktia. Akin mouikaj iniuan akin amo kuali monejnemiltiaj mokalakiaj itech uejueyi kuejmolmej, kemej kinpanok israelitas (Éx. 23:24, 25; Sal. 106:35-39). Yejua ika, Jiova kiixtopeuak xolal Israel uan kiixpejpenak nechikol kampa kichiuaj kemej Cristo kemej ixolal (Mat. 23:38; Hech. 2:1-4). w15 15/8 4:7, 8

Jiova techchijchiuak kemej uelis tikixpejpenaskej toni tikchiuaskej. Yejuatsin techmakak totanemilil tein techpaleuia maj kuali titaixpejpenakan. Komo kuali tikmachtiaj totanemilil, techpaleuis maj tikchiuakan tein kuali uan maj tikixtopeuakan tein amo kuali. Keman Jiova techmakak totanemilil, kinextij ke techtasojta uan ke kineki maj tiyolpakikan. Seki taltikpakneminij amo kiixmatij itanauatiluan Biblia, maski ijkon kichiuaj tein kuali uan kiixtopeuaj tein amo kuali (Rom. 2:14, 15). ¿Keyej? Porin inintanemilil kiniluia ke seki taman kuali yetok uan okseki amo kuali yetok. Komo taltikpakneminij amo kipiaskiaj inintanemilil tein kiniluiskia toni kuali uan toni amo kuali, okachi mochiuaskia tein amo kuali. Yejua ika uelis timotasojkamatiskej maj Jiova techmakani tinochin totanemilil. w15 15/9 2:1, 2

Ika nejin tajtolmej, tatitanil Juan techyoleuak maj tiknemilikan keniuj techteltasojta Jiova uan keniuj kinextia. Komo titanemiliaj itech nejon, okachi kuali timouikaskej iuan Dios uan okachi tiktasojtaskej. Seki taltikpakneminij amo kineltokaj ke Jiova kintasojta. Kinemiliaj ke yejuatsin amo ininka motekipachoua uan ke sayoj kitalia miak tanauatilmej uan kintatsakuiltia akin amo kitakamatij. Seki taneltokalismej tamachtiaj ke Dios se aksa akin semi tetajyouiltia. Yejua ika miakej kinemiliaj ke amo uelis tiktasojtaskej. Sayoj ke, oksekin kinemiliaj ke Dios kintasojta nochin taltikpakneminij maski kichiuaskej miak taman tein amo kuali. Sayoj ke tejuan timomachtianij Biblia uan tikmatij keniuj yekmelauj tamati Jiova. Biblia techiluia ke yejuatsin semi techtasojta uan yejua ika kiualtitanik iKonetsin maj toka momikiliki (Juan 3:16; 1 Juan 4:8). w15 15/9 4:1, 2

Nochipa moneki tikseliskej itamelaualis Jiova. Nejon techpaleuis maj tikmatikan tikchiuaskej tein kuali uan tiyolseujtoskej. Maj amo keman tikixtopeuakan tamelaualis nion maj tikualanikan komo amo tikuelitaj tein techiluiskej. Komo tikakij Jiova uan tikpataj tein moneki, tiknextiliskej ke tiktasojtaj. Tel miakej taltikpakneminij itech nejin tonalmej moueyinekij uan sayoj kitayekanaltiaj inintanejnekilis. Miakej amo kiuelitaj maj kinyolmajxitikan oso maj kiniluikan toni moneki kichiuaskej. Uan sekin kikakij tein kinyolmajxitiaj, sayoj ke ika kualanyot. Sayoj ke Biblia kijtoua ke tejuan moneki tikixtopeuaskej nejon tanemilil. Moneki tikmatiskej toni kineki Jiova maj tikchiuakan uan maj tikakikan (Rom. 12:2). Yejuatsin techyolmajxitia itech inechikol keniuj moneki mouikaskej se takat uan se siuat, keniuj uelis tikinixpejpenaskej kuali tasojiknimej uan keniuj kuali tikixpejpenaskej tein ika timoixpetaniaj. Keman tikseliaj itamelaualis Jiova uan tikpataj tein moneki tein ika tikyolpaktiskej, tiknextiliaj ke tiktasojkamatij tein techyolmajxitia uan ke tiktasojtaj (Juan 14:31; Rom. 6:17). w15 15/9 5:13, 15

Komo tiknekij tikchikauaskej totakuaujtamatilis, moneki tiktajtaniskej Dios maj techmaka iyektikatsin espíritu. ¿Keyej? Porin takuaujtamatilis poui itech itakilo espíritu (Gál. 5:22). Jesús techyolmajxitij maj tiktajtanikan Jiova maj kisentoka techmaka yektikatsin espíritu uan kiyekijtoj ke Dios kinmaka akin kitajtaniaj (Luc. 11:13). Komo chikauakya totakuaujtamatilis, moneki tikyekitaskej maj kisentoka chikauak. ¿Keyej? Porin totakuaujtamatilis tamati kemej tit tein xotatok. Yekinika, xa chikauak xotatos. Sayoj ke komo amo se kitatokilia, seuis. No ijkon panoua ika totakuaujtamatilis. Komo amo tiknekij tikpoloskej, moneki tikixtajtoltiskej uan timomachtiskej Biblia mojmostaj. Ijkon, okachi tiktasojtaskej Jiova uan Biblia, uan totakuaujtamatilis nochipa chikauak yeski. w15 15/10 2:6, 7

Tamatinij kiajsinij ke okachi ijsiujka se kielnamiki se taman keman ichtaka se taixtajtoltia oso kemej se motenkakis. Uan Jiova kimati nejon, porin yejuatsin techchijchiuak. Yejua ika kiluij Josué maj kiixtajtoltiani amaix tein kipiaya Tanauatil kemej yeskia moichtakanojnotstoskia (Jos. 1:8). Komo ijkon tikixtajtoltiaj Biblia techpaleuis maj sayoj tikpiakan itech totsontekon tein tikixtajtoltijtokej uan maj tikelnamikikan. Semi melauak ke kemansa techouijmaka maj sayoj tikpiakan itech totsontekon tein timomachtijtokej uan itech titanemiliskej. Xa porin tisioujtokej oso tel takakistitok kampa tiyetokej. Yejua ika moneki titanemiliskej kampa amo teyi techkuejmolos uan keman tikuaseujtoskej. Kemej neskayot, David tanemiliaya youak (Sal. 63:6). Uan Jesús kitemouaya kampa taseltijkan kampa ueliskia tanemilis uan kichiuas netataujtil (Luc. 6:12). w15 15/10 4:4, 6, 7

Se tonal seki taltikpakneminij kayomej Galilea kitemojtinemiaj Jesús (Juan 6:22-24). Sayoj ke yejua kimatia ke amo yetoyaj ompa porin kinekiaj kikakiskej, ta porin kinekiaj kitajtaniskej maj kintamaka. Yejua ika kinmelauak ika nejmachkayot uan kinmelauilij toni monekia kichiuaskej tein kinpaleuiskia maj mopatanij (Juan 6:25-27). Semi melauak ke tejuatsin tiontajtakolej uan amo ueli tikonmati toni kinemilijtokej mokoneuan. Sayoj ke uelis tikontemos tikonajsikamatis keyej kichiuaj seki taman. Kemej neskayot, tikyekmatij ke mokoneuan mouan tanojnotsatij. Sayoj ke xionmotajtani: “¿Keyej tanojnotsatij? ¿Youij porin yekmelauj kiuelitaj? ¿Oso sayoj porin kemansa tionmotsakuilia uan teisa nankikuaj oso nantayij?”. Komo tikonita ke tein melauj mokoneuan amo kiuelitaj tanojnotsaskej, xikontemo keniuj uelis okachi kinyolnotsas tanojnotsaskej. Xikonkauili maj kichiuakan seki taman tein amo ouij uan ijkon kimachiliskej ke tapaleuiaj itech tanojnotsalis. w15 15/11 1:10, 11

ToDios tetasojtakej nochipa kichiua tein okachi kuali ininka itekitikauan akin amo kikauaj. Biblia kijtoua ke yejuatsin “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok”. Salmo 37:37, 38 kijtoua ke akin Jiova kiitas ke “amo motajtakolmakani”, oso ke amo kinamiki maj se kitajtakolti teisa, kipias se kualtsin nemilis ika yolseuilis satepan. No kijtoua ke Dios kinixpolos nochin akin amo yolkualmej uan amo tatakamatij. Komo tiknekij maj Jiova techita kemej akin amo kinamiki maj se kitajtakolti teisa, moneki tikixmatiskej yejuatsin uan iKonetsin, uan tiktakamatiskej nochi tein Jiova kijtoua (Juan 17:3). Moneki titakuaujtamatiskej ke amo uejkaua ixpoliuis nochi tein amo kuali, sayoj ke akin kichiua tein Dios kiyolpaktia nemis nochipaya (1 Juan 2:17). Kemej amo uejkaua ixpoliuiti nochi tein amo kuali, motelneki maj tiktakamatikan nejin tayolmajxitilis: “Xikchia Jiova uan xiksentoka itech ojti tein iaxka” (Sal. 37:34). w15 15/11 3:11, 12

Tiitekitikauan Dios tiktekitiltianij miak taman tein ika tikinixmatiltiaj kuali tanauatilmej nochin taltikpakneminij tein tiueliskej. Nochi nejin okachi tapaleuijkej keman amo semi miakej itaixpantijkauan Jiova onkayaj itech nochi taltikpak. Se taman tein mokuik seki xiujmej achtoya yejua periódicos kampa moteixmatiltiaya seki tamachtilis. Nochi semanas, tokniuj Russell kititania se tanojnots kampa kiteixmatiltiayaj tanauatilmej. Uan yejuan kititaniaj maj moteixmatilti itech periódicos ompa Canadá, Estados Unidos uan Europa. Itech xiuit 1913, tanojnotsmej tein kitemakaya tokniuj Russell moteixmatiltiayaj itech 2,000 periódicos uan kiixtajtoltiayaj kemej 15 millones taltikpakneminij. Okse taman tein semi tapaleuij keman tikteixmatiltiayaj kuali tanauatilmej katka radio. Itech tonal 16 metsti abril xiuit 1922, tokniuj Rutherford kitemakak semej yekinika tanojnotsmej itech radio. Kikakkej kemej 50,000 taltikpakneminij. Tepitsin satepan tikchijchiujkej se estación itech radio. Yekinika tanojnots motemakak itech tonal 24 metsti febrero xiuit 1924. w15 15/11 5:10, 11

¿Keniuj kichiua Jiova maj itachijchiualis mochiua tein yejuatsin kineki? Kemej neskayot, kichiuak maj Noé kichijchiuani arca uan maj Bezalel mochiuani se tel kuali tamachijchiujkej. No kichiuak maj Gedeón mochiuani se tel kuali tateuijkej uan maj Pablo mochiuani se tanojnotskej yolchikauak. Itekitikauan Dios kiitaj ke itokay yejuatsin kitelpia ipatiuj. Yejua ika, tokniuan akin kichijchiujkej Traducción del Nuevo Mundo kitalijkej itokay Dios kampa moneki yas. Axkan moajsij okachi Biblias kampa kijkuanijkej itokay Dios. Uan kampa monekia yas kitalijkej “ToTajtsin” oso itokay se tiotsin tein moixmati kampa yejuan nemij. Nejin se taman tein tayekantok tein kichiua maj Oloch Taojtokaltianij kinekikan maj taltikpakneminij itech nochi tataman tajtolmej kipiakan se Biblia tein kiueyitalia itokay Dios (Mal. 3:16). Hasta axkan, Traducción del Nuevo Mundo kiueyitalia itokay Dios itech panoua 130 tataman tajtolmej. w15 15/12 2:7-9

Jiova ueli kikui ichikaualis uan ika kichiua maj seki taltikpakneminij kokolispeuakan. Kemej neskayot, yejuatsin kintatsakuiltij ika se kokolis se tekiuaj ompa Egipto uan Míriam, iikniuj Moisés (Gén. 12:17; Núm. 12:9, 10; 2 Sam. 24:15). Uan keman israelitas amo kitakamatkej, Dios kintatsakuiltij ika chauismej uan kokolismej (Deut. 28:58-61). Sayoj ke Jiova no kikuik ichikaualis uan ika kinyekpiak itekitikauan uan kichiuak maj amo kokolispeuanij (Éx. 23:25; Deut. 7:15). Kemansa hasta kinpajtij seki itekitikauan. Kemej neskayot, kipajtij Job keman motelkokouaya uan kinekia momikilis (Job 2:7; 3:11-13; 42:10, 16). Ijkon kemej Jiova, Jesús ueli kinpajtia taltikpakneminij. Keman yetoya nikan taltikpak, kinpajtij akin kipiayaj lepra, epilepsia, akin amo tachiayaj, akin amo ueliaj nejnemiaj uan oksekin akin kipiayaj okseki taman kokolis (Mat. 4:23, 24; Juan 9:1-7). Nejin uejueyi tachiualismej kichiuaj maj tiknemilikan nochi tein Jesús kichiuas itech Xochital. w15 15/12 4:3, 4