Agosto

Tamelaujkej Gedeón uan itateuijkauan moajsiaj itech se neteuilis tein tel ouij uan tein tel tesioujtij. Nochi youal kintokatoyaj akin kintauelitayaj kemej 32 kilómetros. Israelitas kimatiaj ke monekia amo mosenkauaskej. Yejuan kisentokakej kintokakej akin kintauelitayaj hasta ke kintankej (Juec. 7:22; 8:4, 10, 28). Tejuan no timoajsij kemej yeskia itech se neteuilis tein tel ouij uan tein tel tesioujtij. Iuan timoteuijtokej Satanás uan nochi tein kiixyekana, uan tajtakol tein Adán techpanoltilij. Tisekimej miak xiujmejya iniuan timoteuijtokej. Uan ika inepaleuil Jiova miakpaya tikintaninij. Sayoj ke ayamo senkis titatanij. Xa kemansa tisiouiskej porin uejkaujya titateuijtokej oso uejkaujya tikchixtokej maj ixpoliui tein amo kuali tein mochiujtok. Jesús kijtoj ke itech itamian tonalmej tikpiaskiaj miak kuejmolmej uan techtajyouiltiskiaj. Sayoj ke no kijtoj ke komo titaxikouaj, uelis titataniskej itech neteuilis (Luc. 21:19). w16.04 2:1, 2

Itech nechikolmej timomachtiaj Biblia uan tikitaj tein Jiova kineki maj tikchiuakan (Is. 30:20, 21). Hasta sekin akin amo kitekitiliaj Jiova uan uitsej nechikolmej kiajsikamatij ke yejuatsin techixyekana (1 Cor. 14:23-25). Kemej Jiova taixyekana itech nechikolmej ika iyektikatsin espíritu, itech ualeua tein timomachtiaj ompa. Yejua ika, keman tiyouij nechikolmej ueli tikakij Dios uan tikmachiliaj keniuj techteltasojta. Ijkon, okachi timotokiaj iuan. Jesús kijtoj: “Kampa mosentiliske se ome eyi den notaneltokakauan ika in chikaualis de notokaytsin, ompa Nejuatsin niyetos tatajkoyan de yejuan” (Mat. 18:20). Biblia no tamachtia ke Jesús taixyekana itech nechikolmej (Apoc. 1:20–2:1). Amo tiomeyolouaj ke Jiova uan Jesús touan yetokej uan techyolchikauaj keman tiyetokej itech nechikolmej. ¿Keniuj tikonnemilia ke momachilia Jiova keman kiita nochi chikaujkayot tein tikonchiua porin tikonneki tionmotokis iuan uan iuan iKonetsin? w16.04 3:13, 14

Se tokniuj siuat kintajpaloto ome tokniuan takamej. Semej amo kiuelitak kemej kinnojnotsak. Keman tokniuj siuat yajki, peuak kijijtoua. Sayoj ke, okse tokniuj kielnamiktij ke tokniuj siuat kitekitilianiya Jiova cuarenta xiujmej maski kipanouani miak ouijkayomej. Uan kiluij ke kiyekmatia ke yejua amo kinekia kiyolxokolis. ¿Toni kichiuak tokniuj akin moyolxokolij? Kiluij ke melauak tein kijtouaya uan kiixtalij kielkauas tein panok. ¿Toni techmachtia nejin neskayot? Ke komo aksa techyolxokolia uelis tikixpejpenaskej toni tikchiuaskej. Komo titetasojtaj, titetapojpoluiskej (Prov. 10:12; 1 Ped. 4:8). Jiova kiita ke semi kualtsin keman tikelkauaj tein oksekin ika techyolxokolijkej (Prov. 19:11). Yejua ika, keman oksepa aksa kijtos oso kichiuas teisa tein amo tikuelitaj, maj timotajtanikan: “¿Uelis nikelkauas tein panok? ¿Yekmelauj moneki niksentokas itech nitanemilijtos?”. w16.05 1:8, 9

¿Akonimej kiteixmatiltijtokej axkan iTekiuajyo Dios? Sayoj itaixpantijkauan Jiova. ¿Keniuj tikyekmatij nejon? Yekinika, porin tikteixmatiltijtokej tein moneki: iTekiuajyo Dios. Ojpatika, porin tikchiujtokej kemej moneki, tejuan tiyouij tikintemotij taltikpakneminij. Expatika, porin techolinia tein moneki: netasojtalis tein tikpialiaj Jiova uan taltikpakneminij. Naujpatika, porin tekit tein tikchiujtokej tel uejka ajsi, porin tikinnojnotsaj akin kayomej itech nochi tataman altepemej uan tajtouaj nochi tataman tajtolmej. Uan makuiltika, porin tiksentokaskej titanojnotsaskej hasta keman ejkos tamilis. Semi kualtsin tikitaskej nochi tein itekitikauan Jiova kichiujtokej tein kinpaleuia maj kiteixmatiltikan iTekiuajyo Dios itech itamian tonalmej. ¿Keniuj ueli kichiuaj? Tatitanil Pablo tanankilij ika tajtolmej tein moajsij itech tajkuilol tein axkan tikitaj. Yejua ika tiktajtaniaj Jiova maj kisentoka techmaka chikaualis tein techpaleuis maj tiksentokakan titanojnotsakan nochi tein tiueliskej (2 Tim. 4:5). w16.05 2:17, 18

Keman tikixtaliaj tiktakamatiskej Jiova uan timochikauaj tikchiuaskej tein yejuatsin kineki, tiknextiliaj ke tiktasojtaj uan tiknekij tikyolpaktiskej. Satanás kijtoua ke Jiova amo kinamiki techixyekanas. Sayoj ke keman tiktakamatij Dios, tiknextiaj ke tiknekij maj yejuatsin techixyekana. Uan toTajtsin tetasojtakej kitelpatiuita chikaujkayot tein tikchiuaj (Job 2:3-5; Prov. 27:11). Kemej Jiova amo kichiua maj amo techouijmaka tikyektaliskej tein ika timopolouaj, chikaujkayot tein tikchiuaj tapaleuia maj tiknextilikan ke sayoj yejuatsin tiknekij tikyolpaktiskej uan ke tiknekij maj techixyekana. Jiova techiluia ke moneki timochikauaskej tiknextiskej ikualneskayouan (Col. 3:12; 2 Ped. 1:5-7). Yejuatsin kichia maj timochikauakan tiktsakuiliskej tein amo kuali tein tiknemiliaj uan tein tikmachiliaj (Rom. 8:5). Komo tikchiuaj nochi tein tiuelij porin tiknekij timopataskej, semi tiyolpakiskej. w16.05 4:12, 13

Ijkon kemej se kuali sokikonchiujkej kuali kiixmati sokit tein kitekitiltia, Jiova no tel kuali techixmati. Jiova tel kuali techixmati. Kimati toni ika timopolouaj, tein amo ueli tikchiuaj uan toni kualneskayomej tiknextiajya. Keman techpaleuia maj timopatakan, kielnamiki nochi nejin (Sal. 103:10-14). Okachi kuali tikajsikamatiskej keniuj techita Jiova komo tikitaj toni kichiuaya Jesús keman itatitaniluan mopolouayaj. Kemansa, yejuan motajtolteuiayaj porin kinekiaj kimatiskej akoni okachi ueyichiujkej katka. Komo ompa timoajsiskiaj, ¿keniuj tikinitaskiaj tatitanilmej? Xa tiknemiliskiaj ke katkaj kemej sokit tein ouij se kitekitiltia. Sayoj ke Jesús amo ijkon kinitak. Yejua kimatia ke ueliskia kinpaleuis maj mopatakan komo kinyolmajxitiaya ika nejmachkayot uan kualtakayot, uan komo kinnextiliaya ika tein kichiuaya ke monekia yeskij yolyemankej (Mar. 9:33-37; 10:37, 41-45; Luc. 22:24-27). Satepan ke Jesús moajokuik, tatitanilmej kiselijkej yektikatsin espíritu uan amo kemanok kintekipachoj kimatiskej akoni katka okachi ueyichiujkej, ta kitayekanaltijkej kichiuaskej tekit tein Jesús kinkauilij (Hech. 5:42). w16.06 1:10

Amo onkak nion se dios kemej Jiova (2 Sam. 7:22). Yejua ika israelitas sayoj monekia kiueyichiuaskej Jiova. Amo monekia kichiuaskej kemej itech altepemej tein moajsiaj ompakauin, kampa kinueyichiuayaj miakej tiotsitsin. Nejon taltikpakneminij kineltokayaj ke inintiotsitsin kioliniayaj seki taman chikaualismej tein onkak. Kemej neskayot, akin kayomej Egipto kiueyichiuayaj Ra, tiotsin itech Tonaltsin; Nut, tiotsin itech iluikak; Geb, tiotsin itech taltikpak, uan Hapi, tiotsin itech ueyiat Nilo. No kinueyichiuayaj miak tapialmej. Sayoj ke Jiova kinextij ika majtakti chauismej ke okachi ueyi ke nochin nejin tiotsitsin. Akin nemiaj Canaán okachi kiueyichiuayaj tiotsin Baal. Kineltokayaj ke nejin tiotsin kinmakaya nemilis. No kineltokayaj ke katka tiotsin itech iluikak, kiouit uan tetsaujmej. Miakkan, kineltokayaj ke Baal kinmatampauiskia (Núm. 25:3). Sayoj ke israelitas monekia kielnamikiskej ke ininDios katka “Dios akin melauak”, “sayoj se Jiova” (Deut. 4:35, 39). w16.06 3:4, 5

Ineskayo Jesús techmachtia ke moneki amo tikauaskej Jiova nion ixolal. Uan onkak miak taman tein kinextia keyej. Ueli tikitaj ke Jiova techixyekantok itech nejin itamian tonalmej. Techpaleuia maj tikteixmatiltikan tamachtilis tein melauak itech nochi taltikpak. Tein melauj, sayoj tejuan tikchiujtokej nejon. Uan no, nochi tein Dios techmachtia techpaleuia maj kuali timouikakan uan maj tiyolpakikan. Biblia kijtoj ke itekitikauan Dios yolpakiskiaj porin “kuali moajsi ininyolo” (Is. 65:14). Semi tiyolpakij porin Jiova techixyekana uan techpaleuia maj tikchiuakan miak taman tein kuali. Taltikpakneminij akin Satanás kinixyekana amo yolpakij uan amo kichiaj kiseliskej tein kuali satepan. Moneki tiksentokaskej tiktekitiliskej Jiova uan timokauaskej maj techixyekana. w16.06 4:10-12

Techpaleuis maj tikajsikamatikan keyej motelneki maj titachixtokan komo tikitaj tein kichiuayaj akin tajpiayaj itech xolalmej ne uejkauj. Jerusalén uan okseki xolalmej kipiayaj uejkapan tepamit tein kinpaleuiaya maj amo kalakinij akin kinixnamikiaj. Tajpianij ijkatoyaj tepankuako, kampa uelia kiitayaj nochi. Oksekin tajpiayaj kaltenoj itech xolal. Youalintonal onkayaj tajpianij. Uan keman kiitayaj ke motokiayaj akin kinixnamikiaj, monekia kinnauatiskej nochin akin nemiaj itech xolal (Is. 62:6). Kimatiaj ke motelnekia ijsatoskej uan tachixtoskej. Komo amo kichiuayaj nejon, miakej ueliskiaj mikiskej (Ezeq. 33:6). Itech xiuit 70 itech totonaluan, tateuianij kayomej Roma uelik kalakkej Jerusalén. ¿Keniuj? Tajkuilojkej judío Josefo kijtoj ke akin tajpixtoyaj sekopa itech xolal kochkej. Yejua ika tateuianij kalakkej, kitikuiltijkej templo uan kiixpolojkej xolal. Ijkon tamik tonalmej tein okachi ouijkej kemej amo keman kijyouijtoyaj judíos. w16.07 2:2, 7, 8

Kemej Jiova technextilia ueyi teiknelilis tikseliaj miak tatiochiualismej. Sayoj ke moneki amo tiknemiliskej ke uelis titajtakoskej porin Jiova technextilia ueyi teiknelilis. Seki tokniuan itech yekinika siglo “ika ne teiknelilis [mopaleuiayaj okachi] ok yejuan ma nentinemikan tech in tajtakolnemilis” (Jud. 4). Nesi ke nejin tokniuan kinemiliayaj ke ueliskia tajtakoskej uan kichiaskej maj Jiova nochipa kintapojpoluiani. Hasta kitemojkej kichiuaskej maj okseki tokniuan no tajtakouanij. Axkan, akin yeski akin kichiua nejon kinextia ke senkis amo kipoujkaita iueyi teiknelilis Dios (Heb. 10:29). Axkan, Satanás kinkajkayauani seki tokniuan maj kinemilikan ke uelis tajtakoskej uan amo teyi panos porin Jiova kiniknelis. Melauak ke Jiova kineki kintapojpoluis tajtakouanij akin moyolnonotsaj. Sayoj ke no kichia maj timochikauakan timoijkuaniliskej totanejnekilis tein amo kuali. w16.07 3:16, 17

Komo namikuanij kitsayanaskiaj amat ininixpan tekiuanij maski amo akin auilnemik, amo uelis oksepa monamiktiskej iuan aksa. Takat oso siuat akin inamik kikajkayauak uelis kinemilis kitapojpoluis. Nejon kichiuak tanauatijkej Oseas iuan inamik, Gómer, uan Jiova iniuan israelitas akin moyolnonotskej (Os. 3:1-5). Komo aksa kimati ke inamik auilnemik sayoj ke oksepa iuan moteka, kijtosneki ke kitapojpoluijya. Ijkon, iixpan Dios amo uelis kitsayanasok amat ininixpan tekiuanij uan monamiktis oksepa. Satepan ke Jesús kijtoj tajtolmej tein moajsij itech tajkuilol tein axkan tikitaj, ininka tajtoj akin uelij kisentokaj nemij ininselti uan no kijtoj ke akin ueliok maj ijkon kisentoka (Mat. 19:10-12, TNM). Miakej tokniuan kiixtaliaj amo monamiktiskej porin kinekij kitekitiliskej Jiova uan maj amo kintekipacho okseki taman. Uan moneki tikiniluiskej ke kuali tein kichiuaj. w16.08 1:15, 16

Telpochmej uan ichpochmej amo semi kokolispeuaj uan chikaujkej, uan yejua ika ueli kichiuaj miak taman itech itekiyo Jiova (Prov. 20:29). Sekin akin tekitij Betel kichijchiuaj amaixmej. Miakej tapaleuiaj kampa kichijchiuaj oso kiyektaliaj Kalmej kampa tiMosentiliaj. Oksekin tapaleuitij kampa mochiua se tetsauit. Uan miakej akin kichiuaj tekit kemej precursor momachtiaj okse tajtol oso tapaleuitij okseko itech tanojnotsalis. Se itekitikauj Dios mokuikatij: “Akin kitemouaj Jiova, amo kinpolos nion teyi tein kuali” (Sal. 34:10). Keman tikmakaj Jiova tein okachi kuali, tiyolpakij porin tikmatij ke nejon kiyolpaktia. Uan yejuatsin techyekpias ijkon kemej motenkaujtok. w16.08 3:5, 8

Jiova ueli uan kineki techpaleuis. Yejuatsin techyolchikaua ika iyektikatsin espíritu (1 Crón. 29:12). Komo tiknekij tikixnamikiskej Satanás uan nochi tein kiixyekana, motelneki maj tiktajtanikan Dios iyektikatsin espíritu (Sal. 18:39; 1 Cor. 10:13). Jiova no techyolchikaua ika iTajtol, uan semi tiktasojkamatiliaj. Uan no, maj titanemilikan itech nochi tein mejmetstika timomachtiaj itech toamaixuan. Tein kijtoua Zacarías 8:9, 13 moijtoj keman kiyekchijchiujtoyaj templo ompa Jerusalén, sayoj ke uelis techyolchikauasok. Jiova no techyolchikaua ika nechikolmej, uejueyi nechikolmej uan tataman tamachtilismej tein motemakaj itech inechikol. Tein ompa timomachtiaj techpaleuia maj techolini tein kuali keman tiktekitiliaj Jiova, maj tikixtalikan tikseliskej seki tekimej uan maj kuali tikchiuakan tekit tein tikpiaj (Sal. 119:32). ¿Tiknekij tikuiskej chikaualis tein Jiova techmaka keman techmachtia? w16.09 1:10, 11

Tanauatil tein kiselij Moisés kinextiaya ke Jiova tel amo kiuelita maj se kikui tilmaj tein kichiua maj teouijmaka se kimatis akoni takat uan akoni siuat (Deut. 22:5). Techmachtia ke Jiova amo kiuelita tilmaj tein kichiua maj takamej moitakan kemej siuamej, maj siuamej moitakan kemej takamej, nion tein kichiua maj ouij se kimati akonimej takamej uan akonimej siuamej. Tayolmajxitilismej tein moajsij itech Biblia uelis techpaleuiskej maj kuali tikixpejpenakan keniuj timotakentiskej. Nejin tayolmajxitilismej moneki tiktakamatiskej maski kampa yeski tinemiskej, maski tel tonas oso taseseyas. Amo moneki maj senkis ixyeto toni tilmaj uelis timotaliliskej uan toni amo. Sayoj moneki tiktakamatiskej tayolmajxitilismej tein moajsij itech Biblia, tein techkaua maj timotalilikan tein tikuelitaj. w16.09 3:3, 4

Akin kijkuilojkej katkaj yolchikaujkej uan nochipa kijtojkej tein melauak. Itech nejon tonalmej, miakej tajkuilouanij sayoj kijtouayaj teisa tein kuali ika ininxolal uan inintaixyekankauan. Sayoj ke itanauatijkauan Jiova amo sayoj kijtouayaj tein kuali tein kichiuayaj israelitas uan inintaixyekankauan, ta no tein amo kuali tein kichiuayaj (2 Crón. 16:9, 10; 24:18-22). Uan no, kijtouayaj ininnepololuan yejuan uan okseki itekitikauan Dios (2 Sam. 12:1-14). Keman tikauaj maj Biblia techixyekana, tikitaj ke semi techpaleuia. Uan nejon kichiua maj senkis tikneltokakan ke ualeua imako Dios (Sal. 19:7-11). Biblia kinpaleuiani miakej maj kiitakan ke seki taman tein kineltokayaj amo melaujkej (Sal. 115:3-8). Sekin akin amo kineltokaj Dios kiitaj ke nochi tein onkak kemej yeskia se dios. Oksekin kijtouaj ke taltikpakneminij uelis kichiuaskej maj tikpiakan se okachi kuali nemilis. Sayoj ke keman tikitaj toni kichiuanij hasta axkan, tikitaj ke amo ueli kiyektaliaj kuejmolmej tein onkak (Sal. 146:3, 4). w16.09 4:10, 11

Boaz ika motekipachouaya Rut uan itech tanemiliaya ouijkayomej tein kipiaya porin okseko kayot katka. Kiyoleuak maj mokauani iniuan itekitikauan ichpochmej uan ijkon amo kikuejmoloskiaj takamej akin ompa tekitiaj. Uan no, kimakak tein kikuaskia uan tein tayiskia, ijkon kemej itekitikauan. Kipoujkaitak nejon siuat akin okseko kayot katka uan kiyolchikauak (Rut 2:8-10, 13, 14). Boaz kinextilij kualtakayot Rut porin yejua kinextilij ueyi netasojtalis imonan, Noemí. Sayoj ke no porin peujka kitekitilia Jiova uan kitemojka maj yejuatsin kimatampauiani. Tein melauj Boaz kinextijtoya ueyi netasojtalis tein Jiova kinextia (Rut 2:12, 20; Prov. 19:17). Axkan no ijkon panoua. Komo tikinnextiliaj kualtakayot “nochi in taltikpakuani”, uelis tikinpaleuiskej maj kiixmatikan tein yekmelauj tamachtia Biblia uan maj kiitakan ke Jiova kinteltasojta (1 Tim. 2:3, 4). w16.10 1:10-12

Totakuaujtamatilis okachi mochikaua keman tiktataujtiaj Jiova maj techpaleui uan tikitaj ke techkaki uan techmaka tein techpoloua keman moneki (1 Juan 5:14, 15). Maj tiksentokakan tiktajtanikan maj techmaka iyektikatsin espíritu tein techpaleuis maj tikchikauakan totakuaujtamatilis (Luc. 11:9, 13). Moneki amo tiktataujtiskej sayoj porin tiknekij tiktajtaniskej maj techmaka tein techpoloua. No moneki tiktasojkamatiliskej uan tikueyichiuaskej mojmostaj, porin yejuatsin kichiuani miak taman tein kualtsin (Sal. 40:5). No moneki ininka timotataujtiskej tokniuan itech nochi taltikpak, kemej “nekes ten tsaktokke” uan tokniuan akin taixyekanaj itech nechikol (Heb. 13:3, 7). w16.10 3:8, 9

Itekitikauan Dios itech nejin tonalmej kikauaj maj yektikatsin espíritu kinixyekana. Yejua ika takuaujtamatij itech iTekiuajyo Dios (Gál. 5:22, 23). Itech nochi taltikpak moajsij panoua chikueyi millones tokniuan akin kipiaj yolseuilis uan kuali mouikaj itech ininnechikoluan. Senkis moita ke takuaujtamatilis uan netasojtalis tel tapaleuiaj. Nejin kuali uikalis sayoj ueli mochiua ika inepaleuil Jiova. Yejua ika kinamiki maj tikueyichiuakan (Is. 55:13). Jiova kisentokas kinpaleuis miakej maj takuaujtamatikan iuan. Uan se tonal, itech nochi taltikpak moajsiskej taltikpakneminij yolmelaujkej, akin amo yeskijok tajtakouanij uan kipiaskej yolpakilis akin kiueyichiuaskej Jiova nochipaya. w16.10 4:18, 19

Moneki tikintakamatiskej tayekananij keman tayolmajxitiaj ika Biblia. Itech yekinika siglo, seki tokniuan mokalakiayaj kampa amo katka inintekiuj. Tayekananij kitemojkej kinpaleuiskej, sayoj ke yejuan amo kinekkej mopataskej. Pablo kiniluij tokniuan itech nejon nechikol keniuj monekia kiitaskej akin ijkon monejnemiltiaya. Kiniluij: “Kuali xikitakan akoni nojon motatsiukaketstinemi san. Uan [...] amo iuan ximouikatinemikan”. Tokniuan monekia amo semi iuan yetoskej nejon tokniuj, sayoj ke monekia amo kitauelitaskej (2 Tes. 3:11-15). Axkan, tayekananij no kitemouaj kinpaleuiskej tokniuan akin amo kitakamatij itanauatiluan Dios, kemej ijkuak se tokniuj peua moixmati iuan aksa akin amo kitekitilia Jiova (1 Cor. 7:39). Komo amo kineki mopatas, tayekananij xa kiixtaliskej maj motemaka se tanojnots kampa momelauas ke nejon uelis kichiuas maj amo kuali ika tajtokan nechikol. ¿Toni tikchiuaskej tejuan? Uan komo tikixmatij tokniuj akin kichiuak maj motemaka nejon tanojnots, ¿amo semi iuan timouikaskejok? Ijkon uelis tikpaleuiskej maj mopata. w16.11 2:13

Itech Pentecostés itech xiuit 33, tel miakej akin mochiujkaj itatojtokakauan Cristo kinixpejpenkej ika yektikatsin espíritu. Ininka nejin taltikpakneminij moijtoj: “Dios namechijitak ya xipoutinemikan iuantsin keme nanipueblojkauan [...,] nantiopixkame ten nankitekitilijtinemij se rey [...,] nanpueblojuani nanyolchipauke ten Dios kichiuak ya ke naniaxkauan” (1 Ped. 2:9, 10). Keman tatitanilmej yoltoyajok kuali kinyekpiakej tokniuan itech nechikolmej. Sayoj ke satepan ke momikilijkej, seki takamej itech nechikolmej peuak tamachtiaj tein amo melauak uan ijkon kitemouayaj kichiuaskej maj imomachtijkauan Jesús kikauanij tamachtilis tein melauak. Yejuan kiuelitayaj ika tajtoskej tein tamachtijkej tamatinij kemej Aristóteles uan Platón uan amo tamachtilis tein melauak tein moajsi itech iTajtol Dios (2 Tes. 2:6-8). Miakej katkaj tayekananij uan kipiayaj tekimej tein motelnekiaj itech nechikolmej. Uan maski Jesús kiniluijka itatojtokakauan ke nochin yejuan katkaj iknimej, yolik peuak moajsij seki oloch takamej akin taixyekanayaj uan moxelojkaj (Mat. 23:8). w16.11 4:8

Achto, xa tikchiujkej miak taman tein amo kuali porin amo tikmatiaj toni kinemiliaya Jiova. Tajtakol ‘techmajpachojtinemia’ (Rom. 6:19, 20). Sayoj ke keman timomachtijkej itech Biblia keniuj kineki Dios maj tinemikan, tikixtalijkej tikpataskej kemej timonejnemiltiayaj, iuan timotemaktiskej uan timoauiskej. Tajtakol amo techyekanayaok uan peuak tikchiuaj tein melauak (Rom. 6:17, 18). Maski ijkon, moneki tikixpejpenaskej se taman: tikauaskej maj techyekana toamo kuali tanemililuan uan toamo kuali tanejnekilis, oso timoijkuaniliskej. Maj timotajtanikan: “¿Nikaua maj noamo kuali tanejnekilis nechuika maj nikchiua tein amo kuali? ¿Oso niman nikixtopeua?”. Komo yekmelauj tiktasojkamatij iueyi teiknelilis Dios, timochikauaskej tikyolpaktiskej. w16.12 1:11, 12

Tinochin tiknekij tikpiaskej yolseuilis, kuali tiyetoskej iniuan tochankauan uan okseki tokniuan. Sayoj ke kemej tinochin titajtakouanij, kemansa tikpiaj kuejmolmej iniuan tokniuan. Keman panoua nejon, tiktakamatij nejin tayolmajxitilis tein kitemakak Jesús: “Xikitati ne mokniu uan xikiliti ma mitstapojpolui para ijkon nanmoyekauaske” (Mat. 5:24). Maj tikelnamikikan ke tokniuan no kitekitiliaj Jiova, “Dios [akin] teyolseuia” (Rom. 15:33; 16:20). Komo “tiyoltanemilijtinemij sayo itech in tamachilis ten kualkui in [y]ektikatsin [e]spíritu”, no tiyolseujtoskej iixpan Dios. Tanauatijkej Isaías kijtoj ke Jiova kinmatampauis akin senkis iuan takuaujtamatiskej uan nochipaya kinmakas yolseuilis (Is. 26:3; Rom. 5:1). w16.12 2:5, 18, 19

Jiova kintatiochiuia itekitikauan axkan, maski nemij itech nejin itamian tonalmej kampa Satanás taixyekantok. Yejuatsin techmaka miak tamachtilis uan yolseuilis. Uan no, techtatiochiuia ika tokniuan akin nemij itech nochi taltikpak akin tikinitaj kemej tochankauan uan techtasojtaj, ijkon kemej Jesús motenkauak (Is. 54:13; Mar. 10:29, 30). Dios no kinmaka ueyi yolseuilis uan yolpakilis akin mochikauaj kitemoskej (Filip. 4:5-7). Uelis tikyekmatiskej ke tikseliskej “nochi tatiochiualis ten Dios moyektenkauak ya” techmakas komo tikchiuaj “ten Dios kimonekiltia” (Heb. 10:35, 36). Yejua ika, maj tiksentokakan tikchikaujtokan totakuaujtamatilis uan maj timochikauakan tiktekitiliskej Jiova. Komo ijkon tikchiuaj, uelis titakuaujtamatiskej ke yejuatsin techtatiochiuis (Col. 3:23, 24, TNM). w16.12 4:17, 20

Kemej ixyetok hasta kani uelis toselti titaixpejpenaskej, ¿uelis tikijtoskej ke yekmelauj toselti tiuelij titaixpejpenaj? Kemaj. ¿Keyej? Porin keman ixyetok hasta kani uelis tikchiuaskej teisa techmatampauia. Maj tiknemilikan ke tikixtaliaj tiyaskej itech tocarro itech se xolal tein tel uejka moajsi, sayoj ke amo ixyetok keniuj moneki se kinejnemiltis carros itech ojti. Taltikpakneminij youij kampa ika kinekij uan kitsikuinaltiaj inincarro kemej kinekij. ¿Tiyolseujtiyaskiaj? Amo. Ika nejin neskayot moita ke moneki ixyetos hasta kani uelis tikchiuaskej teisa, porin nejon techpaleuis maj tiyolpakikan ika tein tikixpejpenaskej. Maj tikitakan ineskayo Adán. Yejua kiixpejpenak amo kipoujkaitas tein Jiova kiixtalijka ke amo ueliskia kichiuas. Yejua ika kikuaj takilot tein kinauatijka maj amo kikua. Kemej amo kuali taixpejpenak, taltikpakneminij tajyouianij tel miak xiujmejya (Rom. 5:12). Maj nochipa tikelnamikikan tein tel amo kuali tein kiualkuik tein kiixpejpenak Adán. Nejon techpaleuis maj kuali titaixpejpenakan uan maj tikpoujkaitakan tein Jiova kiixtalij ke amo uelis tikchiuaskej. w17.01 2:6, 8

Achto ke kiselis se tekit, tokniuj akin yolyemanik kitataujtia Jiova uan kuali kinemilia ox uelis kichiuas nejon tekit. Satepan ke kuali kiixejekos, xa kiajsikamatis ke amo uelis kuali kichiuas tekit tein kimakatokej. Komo tiyolyemankej, kemansa monekis tikijtoskej ke amo. Jiova kineki maj tiyolyemankej keman iuan tinentinemij (Miq. 6:8). Yejua ika, komo techmakaj se yankuik tekit, maj tikchiuakan kemej Gedeón uan maj tiktajtanikan Jiova maj techixyekana uan maj techpaleui. Maj tiknemilikan ika nejmachkayot tein Jiova techiluia itech Biblia uan inechikol. Maj amo tikelkauakan ke nochi tein tikchiuaj itech itekiyo, tikchiuaj porin yejuatsin yolyemanik uan techpaleuia, amo porin toselti tiuelij (Sal. 18:35). Komo tiyolyemankej, amo timoueyinekiskej nion tiknemiliskej ke amo teyi tichiuanimej. w17.01 3:17, 18

Jesús kimatia ke oksekin monekiskia kichiuaskej tein yejua kichiuaya. Maski kimatia ke imomachtijkauan katkaj tajtakouanij, takuaujtamatia ke tanojnotsaskiaj itech okachi miak altepemej ke yejua (Juan 14:12). Kuali kinmachtij keniuj tanojnotsaskej noyampa kampa ueliskiaj, uan yejuan kichiujkej tekit (Col. 1:23). Satepan ke momikilij, Jiova kiajokuik uan kimakak okachi tekit. Uan no, kimakak “tanauatil inpan nochi ejekame tekiuani uan inpan nochi ejekame chiuanime uan inpan nochi ejekame ten tanauatiani” (Efes. 1:19-21). Komo timomikiliaj achto ke ejkos Armagedón uan amo keman tikaujkej Jiova, timoajokuiskej itech yankuik taltikpak uan tikpiaskej miak tekit tein semi techyolpaktis. Sayoj ke axkan tikpiaj tel kualtsin tekit tikteixmatiltiskej kuali tanauatilmej uan tikinpaleuiskej oksekin maj mochiuakan itatojtokakauan Jesús. Yejua ika, tiyeskij titelpochmej oso tixiuejkejya, maj tiksentokakan titekitikan “kachi ok tech ne tekitsin ten Totekotsin Cristo technauatilij”. w17.01 5:17, 18

Amo monekisok maj Jesús oksepa momikili (Heb. 9:24-26). Adán techpanoltilij mikilis, sayoj ke inemilis Jesús tein kitemakak techmakas nemilis nochipaya. Uan no ueli techmakixtia itech nejin taltikpak kampa taixyekantok Satanás uan amo tikmouiliajok timomikiliskej (Heb. 2:14, 15). Uelis tikyekmatiskej ke inetenkaualisuan Jiova nochipa mochiuaskej. Uan ijkon kemej tanauatilmej tein kiixyekana tein onkak amo keman mopataj, Jiova amo keman mopatas. Yejuatsin amo techkajkayauas. Uan no, amo sayoj techtayokolia nemilis, ta no techmaka inetasojtalis. “Tejuan tikajsikamatke ya uan titakuautamatke ya de ke Dios techtasojta. Uan Totajtsin Dios tetasojta.” (1 Juan 4:16.) Amo uejkaua taltikpak mochiuas se kualtsin xochital. Nochin taltikpakneminij kichiuaskej kemej Jiova uan motasojtaskej. Ijkuak, nochin itekitikauan Dios akin moajsiskej iluikak uan taltikpak kijtoskej: “Ma timitsonueyipanchiuakan uan ma timitsonmouistilikan tion to Dios, porin sayo Tejuatsin tikonpia nochi tamachilisme. Uan ma timitsontasojkamachilikan uan ma timitsonmouiskapouakan porin sayo Tejuatsin tikonpia nochi chikaualis uan uelilis [...] sen nachipa uan sen nachipa. Ma ijkon mochiutiu” (Apoc. 7:12). w17.02 2:16, 17

Itech amaix La Atalaya 15 de octubre de 1973 motajtanik: “¿Uelis moauiskej akin kisentokaj tachichinaj?”. Moijtoj ke amo. Ompa, moijkuiloj miak tajkuilolmej tein moajsij itech Biblia tein tapaleuiaj maj momelaua keyej moneki kikalankixtiskej itech nechikol akin amo kikaua tachichinalis (1 Cor. 5:7). Kimelauak ke nejin chikauak tanauatil amo kitemaka se taltikpaknenkej, ta “Dios, akin tajtoua itechkopa iTajtol”. Yankuixtok, se amatajkuilol tein ika tajtoua taneltokalismej ompa Estados Unidos kijtoj: “Taixyekananij itech taneltokalismej miakpa kiitaj ox tein tamachtiaj mouika ika tein kineltokaj uan kinemiliaj akin pouij itech inintaneltokalis uan okseki taltikpakneminij”. Sayoj itaixpantijkauan Jiova senkis mokauaj maj kinixyekana iTajtol Dios. Uan ijkon kichiuanij maski seki tokniuan kinouijmaka kitakamatiskej. w17.02 4:15

Tayekananij amo kinekij maj se kinita kemej taltikpakneminij akin kintelixmatij. Amo kichiuaj kemej miakej taixyekananij itech taneltokalismej axkan nion kemej akin nenkej itech itonaluan Jesús. Keman ininka tajtoj, kijtoj: “Kinekij de ke ma yetokan kampa kachi kualtsin kuak tatakuatij. Uan no semi kinekij motaliske tech in tiopan de judíos [...] ne taixpampa. Uan no semi kinekij ke in tagayot ma kinmouiskatajpalokan tech in ojme” (Mat. 23:6, 7). Tayekananij kitakamatij nejin tein kijtoj Jesús: “Nion no ximotekauilikan de ke ma namechpouakan in tagayot keme tamachtiani. Porin namejuan nochi naniknime san, uan nankipiaj sayo se Namotamachtijkau [...]. Uan amo no xikpouakan nikan taltikpak nion aken keme se Namoueyitajtsin, porin namejuan nankipiaj ya ne se Namoueyitajtsin ne ten yetika nepa eluiyaktsinko. Uan amo no ximotekauilikan ma namechpouakan keme nantayekanani, porin sayo in Cristo Temakixtijke Yejuatsin in Namotayekankau. Uan naken kintekitilia oksekin tokniuan, yejua ne kachi ueyi chiuke” (Mat. 23:8-11). Keman tayekananij itech nochi taltikpak yolyemankej uan kichiuaj tein kijtoj Jesús, tokniuan kintasojtaj uan kinpoujkaitaj. w17.03 1:14, 15

Moneki tikauaskej maj iTajtol Dios techixyekana uan ijkon uelis kuali titaixpejpenaskej. Yejua ika moneki amo tikauaskej maj oksekin kiixpejpenakan tein tikchiuaskej, ta moneki timomachtiskej tein Dios kijtoua ke kuali yetok uan tikchiuaskej. ¿Toni uelis kichiuas maj tikauakan maj oksekin kiixpejpenakan tein tikchiuaskej? Keman techteliluiaj maj tikixpejpenakan tein amo kuali (Prov. 1:10, 15). Moneki tikauaskej maj techixyekana totanemilil, tein tikmachtianij ika tein kijtoua Biblia. Komo tikauaj maj oksekin kiixpejpenakan tein tikchiuaskej, tikaujtoskej maj yejuan techixyekanakan. Uan nejin uelis techualkuilis tein tel amo kuali. Tatitanil Pablo kinnejmachtij tokniuan akin nemiaj Galacia maj amo kikauanij maj oksekin kiixpejpenanij tein kichiuaskiaj (Gál. 4:17). Seki tokniuan itech nejon nechikol kitemojtoyaj kiixpejpenaskej tein kichiuaskej tokniuan. Kinekiaj maj kichiuanij tein yejuan kijtouayaj, uan amo tein kijtouayaj tatitanilmej. w17.03 2:8-10

Josías mochikauak kiyolpaktis Jiova. Manasés, iueyitat akin moyolnonotska, xa kimachtij ke Jiova kineki tetapojpoluis. Telpoch, tejua no uelis tikchiuas kemej Josías uan okachi kuali tikixmatis Jiova. Uelis mitsmachtis miak taman tein mitstapouiskej mochankauan uan tokniuan akin xiuejkejya. Yejuan uelis mitsiluiskej keniuj Jiova kinpaleuiani. Xikelnamiki keniuj momachilij Josías keman kimatik tein kijtouaya iTanauatil Dios. Kemej kinekia kiyolpaktis Jiova, niman kichiuak tein monekia. Komo tikixtajtoltia Biblia, tejua no tiknekis tiktakamatis Jiova. Nejon kichiuas okachi kuali ximouika iuan uan okachi tiyolpakis. Uan no, tiknekis ika titajtos Jiova iniuan oksekin (2 Crón. 34:18, 19). Keman timomachtis Biblia, xa tikitas ke moneki tikpatas seki taman tein mitspaleuis okachi kuali xiktekitili Dios. Komo panoua nejon, ximochikaua tikpatas tein monekis, ijkon kemej kichiuak Josías. w17.03 3:18, 19