Septiembre

Keman Biblia ika tajtoua taxikolis, amo sayoj kijtosneki se kikauas maj pano ouijkayomej oso kuejmolmej tein se kipia. Mouika ika tanemilil tein se kipia keman se kipanoua kuejmolmej. Se taxikos kijtosneki se kinextis yolchikaualis, se kisentokas uan amo se yolijsiuis. Se amatajkuilol kijtoua ke se taxikos kijtosneki se kipias chikauak takuaujtamatilis uan amo se mosenkauas keman se kipanoua ouijkayomej, hasta tein okachi uejueyi. Keman se kixikoua kuejmolmej, kemej yeskia se tatani. Uan amo se kiita tekokojkayot tein se kimachilia, ta tein se kineki se kiajsis. Netasojtalis techpaleuia maj titaxikokan (1 Cor. 13:4, 7). Kemej neskayot, netasojtalis tein tikpialiaj Jiova techpaleuia maj tikxikokan tein yeski taman tein yejuatsin kikaua maj pano (Luc. 22:41, 42). Netasojtalis tein tikinpialiaj tokniuan techpaleuia maj tikxikokan nepololmej tein kipiaj (1 Ped. 4:8). Uan netasojtalis tein tikpialiaj tonamik techpaleuia maj tikxikokan kuejmolmej tein tikpiaj uan maj okachi kuali timouikakan (1 Cor. 7:28). w16.04 2:3, 4

Yekinika itatojtokakauan Cristo kisentokakej monechikojkej maski kintajyouiltijkej tekiuanij romanos uan akin taixyekanayaj itech inintaneltokalis judíos. Ouij kinkisak, sayoj ke kichiujkej nochi tein uelkej uan kisentokakej kichiujkej nechikolmej. Itech nejin tonalmej, tiitekitikauan Jiova no semi timotasojkamatij porin ueli tikpiaj nechikolmej. Tokniuj George Gangas, akin pouik iniuan Oloch Taojtokaltianij panoua 22 xiujmej, kijtoj ke semi kiyolchikauaya uan kitelnekia monechikos iniuan tokniuan uan ke kiitaya ke katka “se taman tein okachi teualkuilia yolpakilis”. Uan tejuatsin, ¿tionmomachilia kemej tokniuj Gangas? Komo ijkon, xikonsentoka xikonchiua nochi tein tionuelis uan ijkon tionyas nechikolmej, maski kemansa ouij yeski. Xikonnextili Jiova ke no tionmomachilia kemej tekiuaj David, akin kijtoj ke kitasojtaya kali kampa kiueyichiuaya Jiova (Sal. 26:8). w16.04 3:16-18

Maj timonemilikan ke tikmatkej ke se tokniuj kualanik porin tikchiujkej oso tikijtojkej teisa tein kiyolxokolij. ¿Toni moneki tikchiuaskej? Moneki iuan titajtoskej. Maj amo tiktajtakoltikan tein panok, ta moneki tikijtoskej ke timopolojkej. Moneki tiktemoskej tikyektaliskej kuejmol tein tikpiaj iuan. Okachi moneki maj kuali tiyetokan iniuan tokniuan. Maj tikitakan ineskayo Abrahán uan Lot, akin katka isobrino. Omen kipiayaj miak tapialmej, uan akin kinyekpiayaj inintapialuan peujkej motajtolteuiaj porin amo semi onkaya kani kintakualtiskej nochi tapialmej. Kemej Abrahán kinekia kuali yetos iuan Lot, kikauak maj yejua kiixpejpenani okachi kuali talmej (Gén. 13:1, 2, 5-9). Abrahán techkauilij se kuali neskayot. Sayoj ke ¿tapoloj porin ijkon kichiuak? Amo, porin tepitsin satepan Jiova motenkauak ke kimakaskia okachi ke tein kipolojka (Gén. 13:14-17). Komo tikyektaliaj kuejmolmej ika netasojtalis, maski kemansa tikitaskej ke tikpolouaj teisa, Jiova techtatiochiuis. w16.05 1:11, 12

Itech Biblia, Jiova techmakatok seki tanauatilmej. Kemej neskayot, yejuatsin techiluia maj amo tikinueyichiuakan tiotsitsin, maj amo titachtekikan, maj amo titauanakan nion maj tiauilnemikan (1 Cor. 6:9, 10). Uan no, Jesús kinmakak imomachtijkauan nejin tanauatil: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan ika itokaytsin de Toueyitajtsin Dios uan de Ikonetsin Dios uan de in [y]ektikatsin [e]spíritu. Uan xikinmachtikan de ke ma tatakamatikan nochi ika in tanextililisme ten namechnajnauatiaj ma no xikchiuakan. Uan xikmatikan ke Nejuatsin niyetos nachipa namouan” (Mat. 28:19, 20). Semi techpaleuia keman tiktakamatij itanauatiluan Jiova. Techpaleuia maj kuali timomachilikan, maj kuali tiyetokan uan maj tiyolpakikan iniuan tochankauan. Sayoj ke tein okachi moneki yejua ke komo tiktakamatij itanauatiluan Jiova, kemej tein kijtoua maj se kiteixmatilti iTekiuajyo, tikyolpaktiskej uan techtatiochiuis. w16.05 3:1

Moneki mojmostaj tikixtajtoltiskej Biblia, titanemiliskej itech tein tikixtajtoltiaj uan tiktajtaniskej Jiova iyektikatsin espíritu. Komo ijkon tikchiuaj, yejuatsin techpaleuis maj tikajsikamatikan tein kiyolpaktia, uan tikmatiskej titanemiliskej kemej yejuatsin. Ijkon, tein tiknemiliskej, tein tikijtoskej uan tein tikchiuaskej okachi kiyolpaktis (Luc. 11:13; Gál. 5:22, 23). Sayoj ke, monekis tiksentokaskej timochikauaskej tikyektaliskej tein ika timopolouaj (Prov. 4:23). Amo ijsiujka ueli se kinextia ikualneskayouan Jiova. Yejua ika, maj amo tiyolijsiuikan. Maj amo timosenkauakan komo tikmachiliaj ke amo ueli ijsiujka timopataj kemej tiknekiskiaj. Xa yekinika monekis timochikaujkauiskej tikchiuaskej tein kijtoua Biblia. Sayoj ke ijkon kemej okachi timochikauaskej titanemiliskej uan tikchiuaskej tein Jiova kineki, okachi amo ouij techkisas titanemiliskej kemej yejuatsin uan tikchiuaskej tein kuali (Sal. 37:31; Prov. 23:12; Gál. 5:16, 17). w16.05 4:14, 16

Jiova techpaleuia maj timopatakan ika Biblia, iyektikatsin espíritu uan nechikol. Komo tiknekij maj Biblia techpaleui maj timopatakan, moneki tikixtajtoltiskej, tiknemiliskej tein tikixtajtoltiaj uan tiktajtaniskej Dios maj techpaleui maj tiktakamatikan. Tekiuaj David kiluij Jiova: “Motech nitanemilia keman niijsatok youak” (Sal. 63:6). Uan no kijkuiloj: “Nikueyichiuas Jiova, akin nechyolmajxitia. Hasta itech youak, notanemililuan tein moajsij okachi noyolijtik nechmelauaj” (Sal. 16:7). Kemej tikitaj, David katka kemej sokit tein yemanik. Yejua tanemiliaya itech tein Jiova kiyolmajxitiaya uan kikauaya maj kiyektali tein kinemiliaya uan tein kimachiliaya okachi iyolijtik, maski se tayolmajxitilis ouij kikisaya kitakamatis (2 Sam. 12:1-13). ¿Keniuj no uelis tiyeskij tiyolyemankej uan titatakamatiskej kemej yejua? Maj timotajtanikan: “Keman nikixtajtoltia Biblia, ¿nitanemilia uan nikaua maj itayolmajxitilisuan Jiova nechpaleuikan maj nikpata tein niknemilia uan tein nikmachilia? ¿Uelis okachi nikyekchiuas?” (Sal. 1:3). w16.06 1:11

Tinochin titajtakouanij uan timopolouaj. Yejua ika moneki amo tiyolijsiuiskej uan tikelnamikiskej ke tokniuan kemansa kijtoskej oso kichiuaskej teisa tein amo kuali. Uan no, amo kuali yetok maj tiksentokakan titanemilikan itech ininnepololuan oksekin, porin nejon uelis kichiuas maj amo techyolpaktiok tiktekitiliskej Jiova. Uan amo sayoj nejon, ta uelis tikpolojtiyaskej totakuaujtamatilis uan xa hasta tikauaskej inechikol Jiova. Ijkon amo uelisok tikchiuaskej itanejnekilis Jiova nion tikchiaskej tinemiskej itech yankuik taltikpak. Komo ijkon, ¿toni uelis techpaleuis maj tiksentokakan tiktekitilikan Dios ika yolpakilis keman oksekin techyolxokoliaj? Maj nochipa tikelnamikikan nejin tein motenkaua Jiova tein semi teyolchikaua: “Nikchijchiuati yankuik iluikak uan se yankuik taltikpak; uan tein achto panok amo moelnamikisok, nion yetosok itech nanmoyolo” (Is. 65:17; 2 Ped. 3:13). Jiova techmakas nejin tatiochiualismej komo amo keman tikauaj. w16.06 4:13, 14

Tajtol “se”, kijtosneki ke Jiova takuaujtamach uan ke kichiua tein motenkaua. Amo keman mopata nion kipapata tein kichiua. Amo tekaua uan nochipa kijtoua tein melauak. Yejuatsin motenkauak iuan Abrahán ke nochin akin itech ualeuaskiaj nemiskiaj itech Tal tein motenkaujka kinmakas. Jiova amo keman kipatak nejon uan ika uejueyi tachiualismej ijkon kichiuak 430 xiujmej satepan (Gén. 12:1, 2, 7; Éx. 12:40, 41). Miak xiujmej satepan, Jiova kijtoj ke israelitas katkaj itaixpantijkauan uan kiniluij: “Nejua amo Nimopatatok. Achtopa ke nejua amo onkatok nion se Dios, uan satepan ke nejua amo onkas nion se”. Jiova no kiyeknextij ke tein kiixtalia amo keman mopata keman kijtoj: “Nochi tonalmej amo Nimopata” (Is. 43:10, 13; 44:6; 48:12). Israelitas kipiayaj ueyi tatiochiualis kiueyichiuaskej se Dios akin amo keman mopata uan senkis takuaujtamach. Tejuan no tikpiaj nejon tatiochiualis (Mal. 3:6; Sant. 1:17). w16.06 3:6, 7

Axkan, itech miak altepemej, tekiuanij kinpiaj tateuianij uan tataman teposmej tein ika tayekpiaj kampa ininaltepeuj monamiki iuan okse. Nejon kinpaleuia maj nion teyi uan nion akin taijtako itech ininaltepeuj. Sayoj ke nejin tekiuanij amo kiitaj ke ompa iluikak moajsi se tekiuajyot tein okachi kipia chikaualis tein kiixyekana Jesucristo. Amo uejkaua, nejin tekiuajyot kinixpolos nochi taltikpaktekiuajyomej (Is. 9:6, 7; 56:10; Dan. 2:44). Tiknekij maj ejko nejon tonal uan no tiknekij tikchiujtoskej tein moneki keman ejkos (Sal. 130:6). Ijkon kemej okachi motokia tonal keman ejkos poliuilis, okachi techouijmakas tiksentokaskej tiijsatoskej. Tetayokoltij yeskia komo amo tiksentokaj titachixtokej. w16.07 2:2, 9, 10

Kemej Pablo kinteltajyouiltijka itatojtokakauan Cristo, kuali kimatia ke amo kinamikia maj Dios kiikneliani. Keman yaya momikilitiya, kijkuilouilij Timoteo: “Nikueyitasojkamachilia Totekotsin Jesucristo porin Yejuatsin nechmakak in chikaualis para notekiu. Uan Yejuatsin yek takuautamatik nouan ke nejua niuelis nikchiuas nijin tekit” (1 Tim. 1:12-14). ¿Katiyejua katka nejon tekit? Pablo kiniluij tayekananij itech nechikol tein moajsia Éfeso: “Amo teyi nikueyipoua uan nion no niktasojta nonemilis de nejua san. Ta, para nejua kachi kuali [...] ma niktamichiuas in tekit ten nechnauatilij ya Totekotsin Jesús. Porin Yejuatsin nechnauatilij ke ma nejua nitanojnotstinemi ika in yankuik Tajtoltsin ten kualkui ne teiknelilis de Dios” (tejuan tiktalilijkej cursivas; Hech. 20:24). Pablo tanojnotsak ika yolpakilis uan techkauilij se kuali neskayot. Ijkon kinextij ke ueyi teiknelilis tein Dios kinextilij “amo nenkajtik”. w16.07 4:1-3

¿Toni tikchiuaskej komo uejkaujya timochixtokej maj techmakakan se tekit itech nechikol oso maj mopata tein tikpanotokej? Maj titakuaujtamatikan ke Jiova nochipa techmakas inepaleuil. Yejuatsin motenkauak iuan Abrahán ke kipiaskia se konetsin, sayoj ke panokej miak xiujmej hasta keman Isaac yolik. Maski ijkon, Abrahán amo yolijsiuik uan amo keman omeyolouak (Gén. 15:3, 4; 21:5; Heb. 6:12-15). Melauak ke semi teouijmaka se mochias (Prov. 13:12). Sayoj ke komo tiksentokaj titanemiliaj itech tein amo mochiua, tiyolkuetauiskej. Okachi kuali maj timochikauakan tikpiaskej kualneskayomej tein techpaleuis maj kuali tikchiuakan tekimej itech nechikol. Komo tikixtajtoltiaj Biblia uan itech titanemiliaj, techpaleuis maj tiknextikan tamatilis, maj okachi kuali titanemilikan uan maj kuali titaixpejpenakan. Mojmostaj uelis tikuiskej tein timomachtiskej uan ijkon tikixpejpenaskej tein kiyolpaktis. Tikmatiskej keniuj moneki timouikaskej iniuan oksekin, keniuj kuali tiktekitiltiskej tomin uan keniuj kuali tikixpejpenaskej tein timotaliliskej uan tein ika timoixpetaniskej. w16.08 3:9-11

Jiova kinpaleuij israelitas maj kintaninij amalequitas uan etíopes. Uan no, kinmakak chikaualis Nehemías uan judíos tein kinpaleuij maj kiyekchijchiuanij tepamit tein kiyoualouaya Jerusalén. No ijkon, Dios techmakas chikaualis tein techpaleuis maj tiksentokakan titanojnotsakan maski tikpiaskej netekipacholis uan maski techixnamikiskej oso amo kinekiskej techkakiskej (1 Ped. 5:10). Sayoj ke Jiova amo kichiuas se ueyi tachiualis uan ika techijkuanilis kuejmolmej tein tikpiaj. Komo tiknekij tikpiaskej chikaualis, moneki tikixtajtoltiskej Biblia mojmostaj, timomachtiskej tein tikitaskej itech nechikolmej uan amo timopolouiliskej nion se nechikol, timomachtiskej toselti uan iniuan tochankauan, uan tiktajtaniskej Jiova maj techpaleui. Maj amo tikauakan maj nion teyi kichiua maj amo tikuikan tein Jiova techmaka tein ika techyolchikaua. Komo tikitaj ke seki nejin taman amo tikyekchiujtokej, maj tiktajtanikan Dios maj techpaleui. Tikitaskej keniuj iespíritu techmaka chikaualis uan kichiua maj tiknekikan tikchiuaskej tein yejuatsin techiluia. w16.09 1:12

Tatitanil Pablo kijtoj ke semi kuali komo amo se monamiktia, sayoj ke no kijtoj tajtolmej tein moajsij itech tajkuilol tein axkan tikitaj. Uan no kijtoj: “Komo amo uelis ijkon nanmokauaske de amo nanmonamiktiske, ijkuakon kachi kuali ximonamiktikan. Porin kachi kuali ximonamiktikan para ma amo xisiuatatanemilijtinemikan uan [...] amo xitakatanemilijtinemikan”. Nejin kinextia ke aksa uelis kiixtalis monamiktis porin nejon kipaleuis maj amo momajmatoka iselti oso maj amo auilnemi. Maski ijkon, akin ininseltiok moneki kinemiliskej ox yekmelauj uelisya monamiktiskej. Pablo kijtoj: “Komo aksa kinemilia ke amo kuali monejnemiltijtok porin ayamo monamiktia, uan komo panokya xiujmej keman telpoch, yejua nejin tein moneki mochiuas: Maj kichiua tein kinekis; amo tajtakoua. Maj monamiktikan” (1 Cor. 7:9, 36, TNM; 1 Tim. 4:1-3). Moneki amo tikiluiskej se telpoch maj monamikti sayoj porin kitelneki motekas iuan aksa, porin nejon nochin akin moskaltijtokej kimachiliaj. Xa ayamo kipia tamatilis tein kipaleuis maj kichiua tein moneki itech nemilis kemej namikuanij. w16.08 1:17

Kemej timotakentiaj kichiua maj oksekin kuali techitakan oso amo (1 Sam. 16:7). Kemej tiitekitikauan Dios, moneki amo timotaliliskej teisa sayoj porin ika kuali timomachiliaj oso porin tikuelitaj. Tayolmajxitilismej tein moajsij itech Biblia moneki techpaleuiskej maj amo tikixpejpenakan tilmaj tein kopitstik oso tein kichiua maj moita tonakayo. Amo akin moneki mopinaujmatis nion maj okseko tachia keman kiitas keniuj titakentokej. Komo timotaliliaj tilmaj tein kuali moita, tichipaujkej uan kuali tichijchiujtiyouij, taltikpakneminij xa okachi techpoujkaitaskej. Hasta xa kinekiskej okachi kiixmatiskej Dios akin tikueyichiuaj uan tein tamachtia Biblia. w16.09 3:5, 6

Telpoch oso ichpoch, xiktemo tikmatis toni kineltoka akin tiknojnotsa. Sekin kineltokaj ke nemilis iselti peuak uan no kineltokaj ke nemi Dios. Yejuan kijtouaj ke Dios kichiuak maj iselti ixnesini nochi tein onkak. Oksekin kineltokaj ke nemilis iselti peuak porin yejua tein motamachtia itech kaltamachtiloyan. Uan oksekin amo kineltokajok ke nemi Dios porin itech inintaneltokalis amo mochiua tein kichiayaj. Yejua ika, keman iuan titajtos aksa, yekinika xiktajtani toni kineltoka uan keyej kineltoka. Komo kuali tikaki tein mitsiluia, xa okachi kinekis mitskakis. Komo aksa mitskejkeloua porin tikneltoka Dios, uelis tiktajtanis maj mitsmelauili keniuj kinemilia ke peuak nemilis. Uelis tikiluis ke komo nemilis yekmelauj iselti peuak, yekinika taman nemilis monekiskia maj uelini momiakiliani. Se takat akin tamachtia química kijtoj ke semi kimoujkaitak keman hasta seki taman tein moita ke tel tsikitsitsin, semi ouij se kiajsikamati keniuj chijchiujtokej. w16.09 4:12, 13

Nabot uan Zacarías kintetenkej uan kinmiktijkej porin kitakamatkej Dios (1 Rey. 21:3, 15; 2 Crón. 24:20, 21). Daniel kipantamotkej kampa moajsiaj tekuanimej tein tel mayantoyaj, uan eyi itasojikniuan kinpantamotkej tikoijtik. Okachi kuali kinekkej momikiliskej uan amo kitapanauiliskej itanauatiluan Jiova. Nejin takamej takuaujtamatkej ke Jiova kinmakaskia iyektikatsin espíritu uan kinpaleuiskia maj kixikokan tein yeski tajyouilis (Dan. 3:16-18, 20, 28; 6:13, 16, 21-23; Heb. 11:33, 34). Miakej tanauatianij kinkejkelojkej oso kintsakkej, kemej Micaya uan Jeremías. Uan ijkon kemej Elías, okseki tanauatianij “nentinemiaj kampa tayiukan san uan kampa tepepan uan kampa tekalme uan kampa uejueyi ostokme”. Nochin kixikojkej ouijkayomej uan amo keman kikaujkej Jiova porin ‘moyekmatiltiayajʼ ke se tonal kiseliskiaj tein kichiayaj (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2). w16.10 3:10, 11

Uelis tikinnextiliskej kualtakayot akin uejka kayomej komo kuali tikinseliaj itech Kali kampa tiMosentiliaj. Kemansa, akin yankuixtok mokaltalitoj itech se altepet pinauaj uan amo semi kinnojnotsaj oksekin. Xa no momachiliaj ke amo ueyichiuanimej porin taman kemej nemij, amo semi kipiaj tomin, taman kemej ixtamatij oso porin uejka kayomej. Yejua ika moneki tejuan tikinnojnotsaskej uan tikinnextiliskej kualtakayot uan ke yekmelauj ininka timotekipachouaj. Komo tikpiaj JW Language, uelis ika timomachtiskej keniuj tikintajpaloskej itech inintajtol (Filip. 2:4). Kemansa xa amo semi kuali timomachiliskej keman iuan titajtoskej aksa akin okseko kayot. ¿Toni techpaleuis maj amo ijkon timomachilikan? Uelis tiktapouiskej teisa tein tejuan tikchiuaj. Maski amo tiknemiliayaj, xa tikitaskej ke onkak miak taman tein yejua no kichiua kemej tejuan. Maj tikelnamikikan ke itech sejse altepet, taltikpakneminij ueli kuali kichiuaj seki taman uan okseki taman amo. w16.10 1:13, 14

ITajtol Dios kijtoua tein tinochin moneki tikchiuaskej tein tapaleuis maj amo mochiua tein amo kuali itech nechikol. Maj titanemilikan itech tein panok itech xolal Corinto. Pablo kinteltasojtaya tokniuan akin ompa nemiaj. Yejua kinmachtijka miakej (1 Cor. 1:1, 2). Yejua ika maj tiknemilikan keniuj momachilij keman kimatik ke se tokniuj auilnentoya, uan ke itech nechikol amo teyi kiluiayaj. Pablo kinnauatij tayekananij: “Xiktemaktikan imako in amokuali Satanás”. Yejuan monekia kikalankixtiskej nejon takat itech nechikol (1 Cor. 5:5-7, 12). Axkan, tayekananij uelis kikalankixtiskej aksa akin ueyi tajtakoua uan amo moyolnonotsa. Komo tikinitaj akin kinkalankixtiaj kemej tanauatia Biblia, titapaleuiskej maj amo moijtako nechikol. Uan xa no tikinpaleuiskej maj moyolnonotsakan uan maj kitemokan inetapojpoluilis Jiova. w16.11 2:14

Uelis tikintelpaleuiskej oksekin komo tikinyolchikauaj. Se tokniuj akin monotsa Rubén kijtoua: “Nitanojnotstoya iuan se tayekankej, akin kiitak ke amo kuali tein nikpanotoya nejon tonal. Niktapouij keniuj nimomachiliaya, uan kuali nechkakik. Nechiluij nochi tein kuali nikchiujtoya. No nechelnamiktij ke Jesús kijtoj ke Jiova okachi techpatiuita tejuan ke miakej tototsitsin. Nochipa nitanemilia itech nejon tajkuilol, uan kisentoka nechyolchikaua. Itajtoluan nejon tayekankej semi nechpaleuijkej” (Mat. 10:31). Biblia kijtoua ke nochipa moneki maj tikinyolchikauakan oksekin. Tatitanil Pablo kinijkuilouilij tokniuan hebreos: “Mosta mosta ximoyolmajxitijtiyakan [...] para ma amo ximoyolkajkayautinemikan ika in tajtakol” (Heb. 3:13). Komo tiknemiliaj keniuj tel kuali timomachiliaj keman aksa techyolchikaua, tikitaskej ke motelneki tikinyolchikauaskej oksekin. w16.11 1:2, 3

Itech xiuit 313 itech totonaluan, tekiuaj romano Constantino kiixtalij kemej taneltokalis taueyichiualis tein kiixnamiki tamachtilis tein melauak. Constantino mosentilij iniuan miakej taixyekananij itech taneltokalis itech nechikol tein moixmatik kemej Concilio de Nicea. Satepan ke mochiuak nejin nechikol, Constantino tanauatij maj kikixtikan itech altepet se tiopixkat akin monotsaya Arrio porin amo kinekik kiselis tamachtilis ke Jesús yejua Dios. Satepan, tekiuaj romano Teodosio kiixtalij Iglesia Católica kemej taneltokalis tein okachi tayekantok ompa Roma. Tamachtianij kijtouaj ke itech altepet Roma, taltikpakneminij peuak kijtouaj ke kichiuayaj kemej Cristo keman tekiuajtitoya Teodosio. Sayoj ke tein melauj, akin kiixtopeujkaj tamachtilis tein melauak ipa kiselijkajya inintamachtilis takamej uan ijkon peuak pouij iuan Ueyi Babilonia. Maski ijkon, seki tokniuan taixpejpenalmej tatakamatinij akin katkaj kemej trigo mochikaujkej kiueyichiuaskej Dios (Mat. 13:24, 25, 37-39). w16.11 4:8, 9

Axkan, Satanás techyoualojtinemi “keme yeskia se kuoutajtekuani ten kitemotinemi akoni kixixikos” (1 Ped. 5:8; Apoc. 12:17). Yejua ika, tinochin, hasta tiitekitikauan Dios, miak taman semi techtekipachoua. Itekitikauan Dios ne uejkauj no kemansa moteltekipachojkej, kemej tekiuaj David (Sal. 55:2). Uan tatitanil Pablo kijtoj: “Mosta mosta nikyolmachilijtinemi in tekit de keniu nikinpaleuijtiyas nochi in tokniuan” (2 Cor. 11:28). ¿Toni uelis tikchiuaskej komo tikmachiliaj ke timoteltekipachouaj? ToTajtsin kinyolseuij itekitikauan ne uejkauj, uan no kineki techyolseuis axkan. ¿Toni moneki tikchiuaskej? Yekinika, maj tikchiuakan netataujtil. Ojpatika, maj tikixtajtoltikan iTajtol Dios uan maj itech titanemilikan. Expatika, maj tikauakan maj iyektikatsin espíritu Jiova techpaleui. Uan naujpatika, maj tiktapouikan aksa akin itech titakuaujtamatij keniuj timomachiliaj. w16.12 3:1, 2

Itech xolal Corinto, sekin tachtekiaj, motekayaj iniuan inintakaikniuan oso ininsiuaikniuan, auilnemiaj, kinueyichiuayaj tiotsitsin uan tauanayaj. Sayoj ke keman kiixmatkej Jiova, kitasojtakej uan mopatakej. Mopinaujmatkej ika tein kichiujkaj (1 Cor. 6:9-11). Tokniuan akin nemiaj Roma no monekik kipataskej seki taman kemej nejon. Pablo kiniluij: “Amo xiktemaktijtiyakan ok namotakayo tech in tajtakol para ke ma in tajtakol namechtekitiltijtiu tech in amokuali tachiualisme. Ta, namechilia kachi ok ximotemaktijtiyakan imako Totajtsin Dios para ke ijkon Dios namechtekitiltijtiyas ika ten kuali [...] porin Dios namechpouak ke namechpankixtij ya nanyoltokke” (Rom. 6:13). Pablo senkis kineltokaya ke nejon tokniuan ueliskiaj kichiuaskej tein kuali uan ijkon kipiaskiaj iueyi teiknelilis Dios. w16.12 1:13

Jiova techchijchiuak kemej uelis titanemiliskej, tein techpaleuia maj tikyektalikan kuejmolmej uan maj tikixtalikan tein tikchiuaskej satepan (Prov. 2:11). No techchijchiuak kemej uelis tikchiuaskej tein tikixtaliaj (Filip. 2:13). Uan techmakak totanemilil, se taman tein totech moajsi tein techmatiltia toni kuali uan toni amo kuali. Totanemilil kichiua maj tikixtopeuakan tajtakol uan maj amo tikchiuakanok tein ika timopolojkej (Rom. 2:15). Jiova kineki maj kuali tiktekitiltikan tein ueli tikchiuaj porin techtasojta uan kineki maj tiyolpakikan. Itech Escrituras Hebreas techiluia ke komo ika nejmachkayot tikixtaliaj keniuj tikchiuaskej teisa, nochi kuali techkisas. No techiluia: “Tein yeski tein momay kiajsis toni kichiuas, xikchiua” (Ecl. 9:10; Prov. 21:5). Uan itech Escrituras Griegas techyolmajxitia: “Nachipa kuak tiueliske ma tikinpaleuijtiyakan nochi tagayot”. Uan no kijtoua: “Xikinpaleuijtiyakan in taneltokani ika nochi tataman uelilis ten Dios namechtayokolij” (Gál. 6:10; 1 Ped. 4:10). Kemej tikitaj, Jiova kineki maj tikchiuakan nochi tein tiueliskej tein ika tikinpaleuiskej oksekin uan no tejuan. w17.01 1:1, 2

Adán uan Eva tinochin techpanoltilijkej tajtakol uan mikilis. Sayoj ke ueliok toselti titaixpejpenaj. Nejin tikitaj ika tein Jiova kichiuak iuan xolal Israel. Yejuatsin kinkauak israelitas maj kiixpejpenanij ox kinekiaj yeskij iaxkauan (Éx. 19:3-6). Yejuan kinekkej yeskij ixolal uan kipoujkaitaskej tein yejuatsin kiniluij ke amo ueliskia kichiuaskej. Israelitas motenkaujkej: “Nochi tein Jiova kijtoj, ika miak pakilis tikchiuaskej” (Éx. 19:8). Sayoj ke satepan amo kichiujkej kemej motenkaujkaj. Nejon techmachtia ke moneki nochipa tikpatiuitaskej maj toselti tiuelikan titaixpejpenakan, kuali timouikaskej iuan Jiova uan tiktakamatiskej itanauatiluan. w17.01 2:9

Jeroboán, akin tekiuajtia Israel, kichijchiuak se altar itech xolal Betel kampa kinueyichiuaskiaj tiotsitsin. Yejua ika Jiova kititanik se tanauatijkej kayot Judá maj kinauatiti ke yaya kitatsakuiltiti. Tanauatijkej katka yolyemanik uan kimatiltij tekiuaj toni kijtojka Jiova. Jeroboán tel kualanik, sayoj ke Jiova kimatampauij tanauatijkej (1 Rey. 13:1-10). Jiova kiluijka tanauatijkej maj amo teyi kikua nion maj tayi at itech xolal Israel uan maj mokepa oksekopa. Keman mokepayaya ichan, kinamikik se takat xiuejya akin kikajkayauak porin kiluij ke Jiova kinekia kimatiltis teisa. Kiyoleuak ichan maj takuati uan maj tatayiti. Tanauatijkej kayot Judá amo kitakamatik Jiova uan yajki iuan. Jiova amo kiyolpaktij tein kichiuak. Yejua ika, keman tanauatijkej mokepayaya ichan, se tekuani kimiktij (1 Rey. 13:11-24). Amo tikmatij keyej tanauatijkej kichiuak tein kiluij takat akin xiuejya uan amo tein Jiova kinauatijka. Tein kemaj tikmatij yejua ke amo nentinemik ika yolyemanilis iuan Dios. w17.01 4:1-3

Biblia peujteua ika nejin tajtolmej tein amo ouijkej sayoj ke kitelpiaj ipatiuj: “Keman peuak nochi, Dios kichijchiuak iluikak uan taltikpak” (Gén. 1:1). Tejuan amo nochi tikixmatij tein Dios kichijchiuak. Amo semi tikmatij toni onkak iluikak, keniuj chijchiujtok tanex uan keniuj nochi yetok talpan uan amo ejekaixko (Ecl. 3:11). Sayoj ke Jiova techmatiltia toni kiixtalijtok maj mochiua nikan taltikpak uan keniuj kiixtalijtok maj nemikan taltikpakneminij. Yejuatsin kinchijchiuak kemej yejuatsin tamati uan kinekia maj neminij ika yolpakilis (Gén. 1:26). Yejuan yeskiaj ikoneuan, uan yejuatsin yeskia ininTajtsin. Itech Génesis capítulo 3 tikixtajtoltiaj ke mochiuak se kuejmol tein kitsakuilij maj mochiuani itanejnekilis Dios (Gén. 3:1-7). Sayoj ke Jiova ueli kiyektalia tein yeski kuejmol. Amo akin ueli kitsakuilia maj kichiua tein kinejneki (Is. 46:10; 55:11). Uelis tikyekmatiskej ke mochiuas keman monekis. w17.02 1:1, 2

¿Ueliaj kiitayaj israelitas ke Moisés kipiaya iespíritu Dios? Kemaj. Ika iyektikatsin espíritu Jiova, Moisés kichiuak uejueyi tachiualismej uan kimatiltij akin tekiuajtia Egipto keniuj monotsa Dios (Éx. 7:1-3). No kipaleuij maj kinixyekanani israelitas ika netasojtalis uan maj amo yolijsiuini. Senkis moitaya ke Jiova kiixpejpenka Moisés maj taixyekanani itech ixolal. ¿Akonimej Jiova no kinmakak iyektikatsin espíritu tein kinpaleuiskia maj taixyekananij itech ixolal? Biblia kijtoua ke “Josué ikoneuj Nun kitelpiaya tamatilis tein espíritu kitemaka” (Deut. 34:9). No kijtoua ke “iespíritu Jiova kikemik Gedeón” uan ke “iespíritu Jiova peuak kichikaua David” (Juec. 6:34; 1 Sam. 16:13). Nochin yejuan takuaujtamatkej ke yektikatsin espíritu kinpaleuiskia maj kichiuanij tein yejuan amo ueliaj kichiuayaj ininselti (Jos. 11:16, 17; Juec. 7:7, 22; 1 Sam. 17:37, 50). w17.02 3:3-5

Pablo kinkauak tokniuan maj ininselti taixpejpenanij. Axkan, tayekananij uelis kichiuaskej kemej yejua keman kiyolmajxitiaj se tokniuj akin moneki kiixpejpenas se taman. Ika yolpakilis kinextiliaj tamachtilis tein ualeua itech iTajtol Dios. Sayoj ke moyekpiaj amo yejuan kiixpejpenaskej tein kichiuas tokniuj porin kimatij ke yejua monekis tanankilis ika tein kiixpejpenas. Nejin techmachtia ke uelis tikinnextiliskej tokniuan tein Biblia tayolmajxitia ika tein kipanotokej. Sayoj ke yejuan uelij uan moneki ininselti taixpejpenaskej. Keman ijkon kichiuaj, kinpaleuia. Amo keman moneki tiknemiliskej ke tikpiaj tanauatil tikixpejpenaskej tein tokniuan moneki kichiuaskej. w17.03 2:11

Oloch Taojtokaltianij kinextianij ke kipiaj miak takuaujtamatilis keman tanojnotsaj ika yolpakilis uan kiixtaliaj miak taman tein tapaleuia maj okachi motanojnotsa. ¿Tikinpaleuiaj itech nejin tekit tein motelneki? Komo ijkon tikchiuaj, semi tiyolpakiskej keman Jesús techiluis: “Nochi ten yeski tapaleuilis ten nankichiuke para nijinkes nokniuan [...] nankichiuke para Nejuatsin” (Mat. 25:34-40). Keman Jesús mokepak iluikak, amo kinkauak imomachtijkauan ininselti (Mat. 28:20). Yejua kimatia ke yektikatsin espíritu, ángeles uan iTajtol Dios kipaleuijkej maj kinixyekana imomachtijkauan keman yetoya nikan taltikpak. Uan itech nejin tonalmej no kimaka takeual takuaujtamach nejon nepaleuilmej. Oloch Taojtokaltianij kitojtokaj Cristo ‘kampa yeski youi’ (Apoc. 14:4). Yejua ika, keman tiktakamatij tein technauatiaj Oloch Taojtokaltianij, tein melauj tiktakamatij toTaixyekankauj, Jesús. Amo uejkaua, yejua techyekanas maj tikpiakan nemilis nochipaya (Apoc. 7:14-17). Nion se taixyekankej nikan taltikpak ueli motenkaua nejon. w17.02 4:17-19

Moneki tiktajtaniskej Jiova maj techpaleui maski tokuejmoluan uelis yeskij uejueyi oso amo. Maj timotajtanikan: ¿Totech titakuaujtamatij uan tiktemouaj tikyektaliskej kemej tikitaj ke okachi kuali? ¿Oso timomattokej achto tikitaskej tein kijtoua Biblia uan ika timoyekanaskej keman tikyektaliskej kuejmol? Kemej neskayot, maj tiknemilikan ke tikpiaj kuejmolmej iniuan tochankauan porin tiyouij nechikolmej oso se ueyi nechikol. ¿Tiktajtaniskiaj Jiova maj techpaleui maj tikmatikan toni tikchiuaskej? Oso maj tiknemilikan ke uejkaujya tiktemojtokej tekit uan axkan tikajsikej aksa akin kineki techtakeuas. ¿Tikiluiskiaj ke nochi semanas moneki timonechikoskej, maski nejon xa kichiuas maj amo techtakeua? Itech tein yeski kuejmol tein tikpiaskej, maj tikelnamikikan tajtolmej tein moajsij itech tajkuilol tein axkan tikitaj. w17.03 4:6