Octubre

Biblia kijtoua ke Jiova techpaleuis “ma titaxikojtiyakan ika tajyouilis uan ma timoyoltalijtinemikan” (Rom. 15:5). Sayoj yejuatsin senkis kiajsikamati tein tikpanotokej, tein tikmachiliaj uan tein tikpanokej achto. Yejua ika okachi kuali kimati keniuj techpaleuis maj titaxikokan. ¿Keniuj technankilia Dios keman tiktajtaniaj maj techmaka chikaualis tein techpaleuis maj titaxikokan? Yejuatsin motenkaua ke techpaleuis maj tikajsikan keniuj tikisaskej itech nejon ouijkayot (1 Cor. 10:13, TNM). ¿Keniuj kichiua? Kemansa, kijkuania ouijkayot. Sayoj ke miakpa techmaka chikaualis tein techpaleuis maj titaxikokan ika nejmachkayot uan yolpakilis (Col. 1:11). Uan no, Jiova kuali kimati hasta kani uelis titaxikoskej itech tonakayo, totanemilil uan kemej timomachiliaj. Yejuatsin amo keman kikauas maj tikpanokan seki taman tein tel ouij tein kichiuas maj techouijmaka tiksentokaskej tiktakamatiskej. w16.04 2:5, 6

Biblia tamachtia ke moneki tikintakamatiskej tekiuanij. Sayoj ke no tamachtia ke nochipa moneki tiktakamatiskej Dios (Hech. 5:29; Tito 3:1). ¿Keniuj uelis tikchiuaskej nejin ome taman? Itech Biblia moajsi se tayolmajxitilis tein uelis techpaleuis. Jesús kijtoj tajtolmej tein moajsij itech tajkuilol tein axkan tikitaj. Tikmakaj “in rey César ten kinamiki” keman tiktakamatij tanauatilmej tein kitaliaj tekiuanij, keman tikinpoujkaitaj tekiuanij uan keman tikixtauaj impuestos (Rom. 13:7). Sayoj ke ¿komo tekiuanij technauatiaj maj tikchiuakan teisa tein Dios amo kiyolpaktia? Amo tikintakamatiskej. Sayoj ke nochipa moneki tikinpoujkaitaskej, maski amo tikpaleuiaj nion se tekiuajyot (Is. 2:4). ¿Keniuj tikchiuaj nejin? Amo tikinixnamikij, porin tikmatij ke Jiova kinkaua maj taixyekanakan. Amo no titapaleuiaj keman mochiuaj iluimej tein ika kiueyichiuaj altepet (Rom. 13:1, 2). Amo keman tiktemouaj tikpataskej se tekiuajyot nion tiktemouaj maj se tekiuaj kichiua tein tejuan tiknekij. Uan amo no tikixtaliaj akoni tekiuajtis nion tiktemouaj maj techmakakan se tekit itech tekiuajyot. w16.04 4:1, 2

Miakpa, kuejmolmej tein kipiaj ome tokniuan ueli uan moneki ininselti kiyektaliskej. Sayoj ke, Jesús kijtoj ke itech seki kuejmolmej moneki maj oksekin tapaleuikan maj moyektali (Mat. 18:15-17). Yejua amo ika tajtouaya keman ome tokniuan motajtolteuiaj porin amo kipiaj sayoj se tanemilil ika se taman. ¿Keniuj tikmatij? Porin kijtoj ke komo akin tajtakoj amo moyolnonotsa satepan ke iuan tajtoj tokniuj akin iuan kipia kuejmol, iniuan okseki tokniuan uan iniuan akin taixyekanaj itech nechikol, monekia se kiitas kemej se akin “amo poui iuan Dios”. Itech totonaluan, nejin kijtosneki ke monekiskia kikalankixtiskej itech nechikol. Yejua ika, “ten amo kuali” tein ika tajtoj Jesús, kijtosnekia seki taman kemej ijkuak se kitani tomin ika takajkayaualis oso keman se tetakajkayauilia. Sayoj keman panos nejin, uelis tikchiuaskej tein Jesús tayolmajxitij itech Mateo 18:15-17. w16.05 1:14

Itech Biblia amo moajsij tanauatilmej tein kinextiaj toni moneki tikchiuaskej itech nochi. Kemej neskayot, amo techiluia toni taken moneki timotaliliskej uan toni amo. Nejin kinextia ke Jiova semi tamatkej. ¿Keyej? Porin itech sejse ueyi altepet, semi tataman kemej motakentiaj taltikpakneminij. Uan no, tein kiuelitaj motaliliskej mopata ijkon kemej panouaj tonalmej. Biblia amo no kijtoua toni tekit uelis tikpiaskej uan toni amo, keniuj timopajtiskej oso keniuj timoixpetaniskej. Komo ijkon, ¿toni moneki tikchiuaskej? Maj amo tikixpejpenakan tein tiknemiliskej ke okachi kuali, ta maj titanemilikan ika nejmachkayot uan maj tikixpejpenakan tein kiyolpaktia Jiova. Ijkon tikyekmatiskej ke yejuatsin techpaleuis uan techtatiochiuis (Sal. 37:5). w16.05 3:2, 6

¿Katiyejua amatajkuilol tein kipia Biblia okachi tikuelitaj? Sekin kinyolpaktia kiixtajtoltiskej Mateo, Marcos, Lucas uan Juan, porin kemej kimelauaj keniuj tamatia Jesús kinpaleuia maj kiixmatikan ikualtsitsin kualneskayouan Jiova (Juan 14:9). Oksekin kiuelitaj amatajkuilolmej kemej Apocalipsis, tein ika tajtoua “nochi ten niman moneki mochiuas” (Apoc. 1:1). Miakej kinyolseuia tein kijtoua Salmos, uan oksekin kinyolpaktia kuali tayolmajxitilis tein kitemaka Proverbios. Senkis moita ke Biblia kinpaleuia nochin tataman taltikpakneminij. Kemej tiktasojtaj Biblia, no tikitaj ke motelnekij nochi amaixmej tein kimelauaj tein kijtoua Biblia. Itech libros, folletos, revistas uan okseki amaixmej tikajsij tamachtilis tein Jiova techmaka. Techpaleuiaj maj kuali timouikakan iuan Dios uan maj totakuaujtamatilis kisentoka chikauak (Tito 2:2). w16.05 5:1-3

Yektikatsin espíritu uelis techpaleuis maj timopatakan itech miak taman. Kemej neskayot, uelis techpaleuis maj titamatikan kemej Jesús uan maj tikpiakan kualneskayomej tein moajsij itech itakilo espíritu. Semej nejon kualneskayomej yejua netasojtalis. Kemej tiktasojtaj Dios, tiknekij tiktakamatiskej uan timokauaskej maj techpaleui maj timopatakan porin tikmatij ke nochi tein technauatia semi techpaleuia. Uan no, yektikatsin espíritu uelis techmakas chikaualis tein techpaleuis maj amo titanemilikan kemej akin amo kiixmatij Dios (Efes. 2:2). Keman tatitanil Pablo katka telpoch, tanemiliaya kemej tayekananij judíos akin semi moueyinekiaj. Sayoj ke yektikatsin espíritu kipaleuij maj mopata. Yejua ika satepan kijkuiloj: “Itech nochi taman nikpia chikaualis itechkopa akin nechmaka chikaualis” (Filip. 4:13, TNM). Tejuan no moneki tiktajtaniskej Jiova ika nochi toyolo maj techmaka yektikatsin espíritu, uan yejuatsin technankilis (Sal. 10:17). w16.06 1:12

Tiknextiaj ke sayoj Jiova toDios keman sayoj yejuatsin tikueyichiuaj. Moneki amo keman tikueyichiuaskej nion se tiotsin nion tikuiskej tanemililmej oso tachiualismej tein amo melaujkej keman tikueyichiuaskej Jiova. Yejuatsin amo sayoj se dios akin okachi ueyi ke okseki tiotsitsin uan akin okachi kipia chikaualis, ta yejuatsin Dios akin melauak. Moneki tiktayekanaltiskej Jiova itech tonemilis. Komo tiknekij tikueyichiuaskej sayoj yejuatsin, moneki timoyekpiaskej maj amo tiktayekanaltikan okseki taman. ¿Kemej toni? Itech Majtakti Tanauatilmej, Jiova kiniluij itekitikauan maj amo kinueyichiuanij tiotsitsin. Monekia amo kichiuaskej nion teyi tein kinextiskia ke kemej yeskia kinueyichiujtoyaj tiotsitsin (Deut. 5:6-10). Axkan moajsi miak taman tein uelis kinextis ke se kichiujtok nejon, uan miak amo ueli se kiita. Sayoj ke itanauatiluan Jiova amo mopataj. Yejuatsin kisentoka “sayoj se Jiova” (Mar. 12:29). w16.06 3:10, 12

Keman tatitanil Pedro kitajtanij Jesús ox moneki tiktapojpoluiskej aksa sayoj “chikojpa”, Jesús kinankilij: “Amo sayo chikojpa xiktapojpolui. Ta, xiktapojpolui miakpa”. Jesús techmachtij ke nochipa moneki tikintapojpoluiskej oksekin keman mopolouaj (Mat. 6:15; 18:21, 22). Maj tikelnamikikan ke kemej tinochin timopolouaj, tejuan no tikinyolxokoliaj oksekin. Yejua ika, komo tikmatij ke tikyolxokolijkej aksa, maj tikchiuakan tein tayolmajxitia Biblia. Maj tiktajtanikan maj techtapojpolui uan maj tiktemokan tikyektaliskej kuejmol (Mat. 5:23, 24). ¿Melauj ke tiktasojkamatij keman oksekin techtapojpoluiaj? Yejua ika tejuan no monekiskia titetapojpoluiskej (1 Cor. 13:5; Col. 3:13). Komo tikintapojpoluiaj, Jiova no techtapojpoluis. Yejua ika, maj tikiniknelikan oksekin, ijkon kemej Jiova techiknelia tejuan (Sal. 103:12-14). w16.06 4:15, 17

Itech nejin itamian tonalmej, Jiova technauatia maj tikteixmatiltikan iTekiuajyo “tech nochi senmanauak” (Mat. 24:14). Kuali tanauatilmej ika iTekiuajyo Dios no yejua “yankuik Tajtoltsin ten kualkui ne teiknelilis de Dios”. ¿Keyej? Porin nochi tatiochiualismej tein kiualkuis iTekiuajyo Dios mochiuas porin Jiova technextilia ueyi teiknelilis (Hech. 20:24; Efes. 1:3). Pablo kinextij ke kitasojkamatia iueyi teiknelilis Dios keman nochipa tanojnotsaya ika yolpakilis. ¿Tikchiujtokej kemej yejua? (Rom. 1:14.) Maski titajtakouanij, iueyi teiknelilis Dios techualkuilia miak tatiochiualismej. Yejua ika moneki tikinmachtiskej oksekin keniuj Jiova kinextia inetasojtalis uan keniuj yejuan uelis kinpaleuis. w16.07 4:4, 5

Tepitsin achto ke momikiliskia, Jesús expa kinelnamiktij itatitaniluan ke Satanás yejua akin “takitskijtok axkan taltikpak” (Juan 12:31; 14:30; 16:11). Amokuali kinkajkayaua taltikpakneminij ika taneltokalismej tein amo melaujkej. Yejua ika axkan miakej amo kineltokaj keman Biblia senkis kinextia ke amo uejkaua ixpoliuis nochi tein amo kuali (Sof. 1:14). Senkis moita ke Satanás “kinixpojpoyokuiltijtok den nintamachilis” (2 Cor. 4:3-6). Yejua ika, miakej amo kinekij techkakiskej keman tiktemouaj tikiniluiskej ke amo uejkaua ejkos poliuilis uan ke Cristo taixyekantokya. Miakej amo kinyolnotsa kimatiskej tein Biblia kijtojka ke mochiuaskia. Sayoj ke moneki amo timosenkauaskej. Tikmatij keyej motelneki maj tiksentokakan titachixtokan. w16.07 2:11, 12

Keman ejko tonal keman monamiktiskej, uan takat kiita siuat, nochin omen tel yolpakij. Jiova kiixtalij nemilis kemej namikuanij, uan yejuatsin kineki maj nochin namikuanij yolpakikan. Yejua ika kinmaka kuali tayolmajxitilis itech Biblia (Prov. 18:22). Maski ijkon, tinochin titajtakouanij. Yejua ika Biblia kijtoua ke akin monamiktiskej “kipiaske ouijkayot” (1 Cor. 7:28). ¿Toni kinpaleuis tokniuan namikuanij maj amo kipiakan miak ouijkayomej uan maj nochipa yolpakikan? Biblia tamachtia ke netasojtalis se kualneskayot tein motelneki. Moneki monextiliskej netasojtalis tein mopialiaj tasojiknimej uan netasojtalis tein mopialiaj se takat uan se siuat. Uan komo kinpiaj konemej, okachi moneki monextiliskej netasojtalis kemej kalyetouanij. Sayoj ke tein okachi kinpaleuis namikuanij maj yolpakikan yejua netasojtalis kemej Cristo technextilij. w16.08 2:1, 2

Timoteo miak xiujmejya tamachtiaya ika iTajtol Dios. Komo ijkon, ¿keyej Pablo kinauatij nejon? Porin taltikpakneminij uan tein mochiua mopataj. Komo Timoteo kinekia maj taltikpakneminij kisentokanij kikakinij, monekia okachi kuali tamachtis uan kipatas kemej tamachtiaya. Tejuan no moneki tikchiuaskej nejon. Keman titanojnotsatij, miakkan xa amo tikinajsij miakej ininchan. Kansaika, taltikpakneminij xa kemaj moajsij ininchan, sayoj ke amo ueli tikalakij kampa ika yejuan nemij. Komo techpanoua nejin, xa uelis tiktemoskej okseki taman kemej uelis tikinnojnotsaskej. Miakej tokniuan kiuelitaj tanojnotsaskej kampa miakej panouaj, kemej kampa ajsi tren uan autobús, tanamakaloyamej uan parques. w16.08 3:14-16

Jiova kichiua maj moajsikan semanauak taltikpak tel miak millones tokniuan akin toka motekipachouaj uan uelis techyolchikauaskej (Heb. 12:12, 13). Itech yekinika siglo, miakej tokniuan ijkon kinpaleuijkej okseki tokniuan. Axkan no ijkon panoua. ¿Toni uelis tikchiuaskej? Maj tiknemilikan keniuj Aarón uan Hur kichikaujkej imauan Moisés keman kimaajoktoyaj ijkuak israelitas moteuijtoyaj iniuan amalequitas (Éx. 17:8-13). Tejuan no uelis tiktemoskej keniuj tikinyolchikauaskej uan tikinpaleuiskej oksekin, kemej tokniuan akin tajyouiaj porin xiuejkejya, mokokouaj, ininchankauan kinixnamikij, ininselti momachiliaj oso porin se ininchankauj momikilij. No uelis tikinyolchikauaskej telpochmej uan ichpochmej, porin miakpa kinchikaujkauiaj maj kichiuakan tein amo kuali oso maj kitemokan kipiaskej se kuali tamachtilis, tomin oso se kuali tekit (1 Tes. 3:1-3; 5:11, 14). Maj tiktemokan keniuj uelis tikinpaleuiskej oksekin ika nochi toyolo keman tiyetoskej itech Kali kampa tiMosentiliaj, itech tanojnotsalis, keman tisentakuaskej oso keman tikinnotsaskej ika teléfono. w16.09 1:13, 14

Moneki timotakentiskej kemej tikueyitaliskej Jiova uan tikualnextiskej tamachtilis tein tikteixmatiltiaj. Ijkon tiknextiskej ke tikpoujkaitaj toDios akin yektik, tokniuan uan akin tikinnojnotsaj (Rom. 13:8-10). Motelneki maj kuali timotakentikan, okachiok keman tiyouij nechikolmej oso titanojnotsatij. Tilmaj tein timotaliliskej moneki kinextis ke tikueyichiuaj Dios (1 Tim. 2:10). Melauak ke seki tilmaj kinamiki maj timotalilikan kansaika, sayoj ke xa amo kinamiki maj tikuikan okseko. Yejua ika, kampa yeski tinemiskej, tiitaixpantijkauan Jiova moneki timotakentiskej kemej amo kinkuejmolos oksekin. Keman tiyouij uejueyi nechikolmej, totilmaj moneki kuali moitas. Moneki amo timotaliliskej tilmaj tein amo kuali moita tein kikuij miakej akin amo kitekitiliaj Jiova. Ijkon, amo timopinaujmatiskej tikijtoskej ke tiitaixpantijkauan Jiova uan uelis titanojnotsaskej keman yeski. w16.09 3:7, 8

Senkis tikmatij ke se kali amo iselti mochijchiua. Nochi tein yoltok okachi ouij kemej chijchiujtok ke se kali. Yejua ika aksa monekik kiitas keniuj yeskia uan kichijchiuas. Telpoch oso ichpoch, komo aksa amo senkis kineltoka ke Biblia ualeua imako Dios, yekinika uelis tiktajtanis toni kineltoka uan tiktemos tikmatis toni kiyolnotsa kimatis (Prov. 18:13). Komo kiyolnotsa tein kiajsinij tamatinij, uelis tikiluis neskayomej tein kinextiaj ke Biblia amo keman mopoloua keman ika tajtoua tein kiajsinij tamatinij. Komo kiuelita kimatis tein mochiuak ne uejkauj, uelis tikiluis se taman tein ixnesi itech amatajkuilolmej tein ika tajtouaj tein mochiuak ne uejkauj uan tein Biblia miak xiujmej achto kijtojka ke mochiuaskia. Oksekin uelis tikinnextilis seki tayolmajxitilis tein kitemakak Jesús keman tamachtij itech se tepet. Nochipa xikelnamiki ke amo tiknekij timotajtolteuiskej. Tiknekij maj taltikpaknenkej kiyolpakti momachtis Biblia. Yejua ika, ika poujkaitalis xikchiuili netajtanilmej uan satepan kuali xikaki. Xikmelauili tein tikneltoka ika poujkaitalis, okachiok komo kipia okachi xiujmej. Nejon kichiuas maj yejua amo kiouijmaka mitspoujkaitas. w16.09 4:14-16

¿Keniuj uelis tikinpaleuiskej akin uejka kayomej maj kuali momachilikan itech nechikol? Moneki timotajtaniskej: “Komo nejua niyetoskia itech okse altepet, ¿toni nikuelitaskia maj noka kichiuakan?” (Mat. 7:12). Maj amo tiyolijsiuikan iniuan akin yolik momattiyouij itech se yankuik altepet. Melauak ke yekinika xa amo senkis tikajsikamatiskej kemej tanemiliaj oso kemej kichiuaj teisa. Sayoj ke maj amo tikchiakan maj tanemilikan uan maj kichiuakan teisa kemej kampa tejuan tinemij. Okachi kuali maj tikinajsikamatikan uan maj amo tikchiakan maj mopatakan. Uelis okachi kuali tikinixmatiskej komo tikixtaliaj okachi tikixmatiskej altepet kampa kayomej uan kemej nemij ompa. Keman titaueyichiuaj kemej kalyetouanij uelis tiktemoskej tamachtilis tein ika tajtoua keniuj nemij. No uelis tikinyoleuaskej maj takuatij tokalijtik. Jiova kemej yeskia kintatapouilij akin uejka kayomej “ma takuautamatiyakan” (Hech. 14:27). Maj tikchiuakan kemej yejuatsin keman tikinyoleuaskej tokalijtik “tokniuan taneltokani” akin uejka kayomej (Gál. 6:10; Job 31:32). w16.10 1:15, 16

Jesucristo kixikoj okachi ueyi ouijkayot uan amo keman kikauak Jiova. ¿Toni kipaleuij maj taxiko? Pablo kijtoj: “Yejuatsin kipouak ke amo teyi pinaualis kuak kikuoupampilojke. Ta, Yejuatsin kiyekmatoya ya ke satepan kuak kitamitajyouiltiske ya, ijkuakon Yejuatsin kipia ueyi yolpakilis uan no moyoluelitas. Uan kuak tami tajyouij ya, ijkuakon Jesús yajki eluiyaktsinko uan motalito iyekmakopaka Totajtsin Dios” (Heb. 12:2). Yejua ika, Pablo kinyolchikauak tokniuan maj kitojtokanij ika nejmachkayot ineskayo Jesús. Ijkon kemej Jesús, miakej tokniuan itech yekinika siglo kinmiktijkej porin nochipa kitakamatkej Jiova. Semej katka Antipas (Apoc. 2:13). Nejin tokniuan kiselijkejya ininnetetayokolil ompa iluikak, amo ijkon kemej okseki itekitikauan Dios akin nenkej achto ke yejuan uan kichiayaj nemiskej nikan taltikpak (Heb. 11:35). Satepan ke Jesús peuak taixyekana itech xiuit 1914, tokniuan taixpejpenalmej akin momikilijkajya kiselijkej nemilis ompa iluikak, kampa amo uelisok mikiskej. Yejuan iuan Jesús kinixyekanaskej taltikpakneminij (Apoc. 20:4). w16.10 3:12

Seki tetatmej amo kinyolchikauaj ininkoneuan porin inintatuan amo keman kinyolchikaujkej. Uan miakej taltikpakneminij amo kiuelitaj maj amo akin kinilui ke kuali tein kichiuaj kampa tekitij. Uelis tikinyolchikauaskej oksekin keman tikiniluiskej ke kuali kinkisak teisa oso ke kipiaj kualtsitsin kualneskayomej. No uelis tikinyolseuiskej keman tayokoxtoskej oso yolkuetaujtoskej (1 Tes. 5:14). Kemej miakpa timosentiliaj iniuan tokniuan, uelis ijkuak tikinyolchikauaskej ika totajtoluan (Ecl. 4:9, 10). Yejua ika maj timotajtanikan: “¿Nikiniluia oksekin keyej nikintasojta uan nikinpoujkaita nochipa keman niueli?”. Maj tikelnamikikan tein kijtoua Biblia: “Se tajtol tein moijtoua keman monektok, ¡tel kuali temachililtia!” (Prov. 15:23). w16.11 1:3-5

Keman ika tajtoj tein kipanoskej itekitikauan, Dios kijtoj: “Nikinolochsentilis kemej ichkamej itech corral” (Miq. 2:12). Jiova no kijtoj itechkopa Sofonías: “Nikpatas inintajtol xolalmej ika se tajtol tein chipauak [tein yekmelauj tamachtia Biblia], uan ijkon nochin yejuan kikuiskej itokay Jiova uan kisentekitiliskej” (Sof. 3:9). ¿Melauj ke timoteltasojkamatij porin ueli tiksenueyichiuaj Jiova? Kemej tokniuan itech yekinika siglo kitakamatkej iTajtol Dios, chipaujkanemiaj, amo xexeliujtoyaj uan yolseujtoyaj (1 Cor. 1:10; Efes. 4:11-13; 1 Ped. 3:8). Axkan tiitekitikauan Dios no kuali timouikaj uan tisentekitij, uan tikteixmatiltiaj kuali tanauatilmej semanauak taltikpak. w16.11 2:16, 18

Kemej miakej taltikpakneminij ueliajok kiixtajtoltiayaj Biblia itech tajtol griego oso latín, ueliaj kiitayaj ox mouikaya tamachtilis tein kitemaka iTajtol Dios ika tein kinmachtiayaj tiopan. Keman sekin kiitayaj itech Biblia ke tein kinmachtiayaj tiopan amo melauak katka, kiixtopeuayaj. Sayoj ke komo kijtouayaj ueliskiaj kinmiktiskej. Satepan, amo semi miakej tajtouayajok griego oso latín. Uan akin taixyekanayaj tiopan amo kikaujkej maj nion akin kitajtolkepani Biblia itech tajtolmej tein kiajsikamatiaj taltikpakneminij. Komo aksa amo kiseliaya tein kinmachtiayaj tiopan, kiteltatsakuiltiayaj. Tokniuan taixpejpenalmej monekia moyekpiaskej keman monechikouayaj uan monekia amo mimiakej yeskiaj, uan sekin nion ueliaj monechikouayaj. Tokniuan taixpejpenalmej akin yeskiaj tiopixkamej uan tekiuanij amo ueliaj kisenueyichiuayaj Dios. Ueyi Babilonia kiixyekanaya nochi tein kichiuayaj taltikpakneminij. w16.11 4:8, 10, 11

Moneki amo tikchiuaskej uejueyi tajtakolmej kemej akin nemiaj Corinto. Moneki amo tiksentokaskej tiueyitajtakoskej uan tikchiaskej maj Jiova technextili iueyi teiknelilis uan maj techtapojpolui. Sayoj ke xa timotajtaniskej: “¿Toni panoua ika tajtakolmej tein sekin kinemiliaj ke amo uejueyi? ¿Senkis tikixtalijtokej timochikauaskej nochipa tiktakamatiskej Jiova?” (Rom. 6:14, 17). Maj titanemilikan itech tatitanil Pablo. Yejua kijkuiloj: “Notalnamikilis momautok ika tajtakol uan nejua majya niteaxkatitok tech in tajtakol”. Uan ompa kijkuiloj: “Porin amo nikchiutinemi ne ten nikneki nikchiuas. Ta, nejua nikchiuati ne ten niktauelitstinemi” (Rom. 7:14, 15). Maski amo kichiujtoya tein moijtoua itech 1 Corintios 6:9-11, Pablo kijtoj ke no tajtakouaya. Kinekia kiyolpaktis Dios, yejua ika mochikauak kichiuas tein kuali (Rom. 7:21-23). Moneki tikchiuaskej kemej yejua uan timochikauaskej tiktakamatiskej Jiova. w16.12 1:15, 16

Keman teisa techtekipachoua, toTajtsin kineki maj tiktapouikan keniuj senkis timomachiliaj. Komo tikchiujkejya nochi tein tapaleuis maj moyektali kuejmol, maj amo ika timotekipachojtokanok. Semi techpaleuis komo tiktataujtiaj Jiova ika nochi toyolo (Sal. 94:18, 19). Kemej kinextia Filipenses 4:6, 7, yejuatsin uelis techpaleuis maj tiyolseujtokan uan maj amo tiknemilikan nion maj tikmachilikan tein techijtakoua. Miakej tokniuan kimachilianij nejin yolseuilis, uan tejuan no uelis tikmachiliskej. Yolseuilis tein Dios temaka uelis techpaleuis maj tikxikokan tein yeski kuejmol. Jiova techiluia maj amo timouikan, porin yejuatsin motenkaujtok ke touan yetos uan techyolchikauas uan techpaleuis (Is. 41:10). Uelis senkis titakuaujtamatiskej itech nejin tein motenkaujtok. w16.12 3:3, 4

Moisés kiixtopeuak nochi tein kipiaya ipatiuj ompa Egipto uan motemakak tajyouis “keme tajyouitinemij ipueblojkauan de Dios. Uan Moisés amo no kiyolnejnekik mopakiltijtinemis tech in tajtakolnemilis ten uejkauas sayo para seki tonalme” (Heb. 11:25, 26). Maj titakuaujtamatikan kemej itekitikauan Dios ne uejkauj, kemej Moisés, uan maj tiknextikan ke tikpatiuitaj maj toselti tiuelikan titaixpejpenakan keman tikchiuaskej itanejnekilis Dios. Xa tikitaskej ke okachi amo ouij tikauaskej maj aksa kiixpejpena tein tikchiuaskej. Sayoj ke komo ijkon tikchiuaj, amo tikpiaskej se tatiochiualis tein kitelpia ipatiuj. ¿Toni nejon? Biblia kimelaua itech Deuteronomio 30:19, 20. Itech versículo 19 moijtoua ke Dios kiniluij israelitas toni ueliskia kiixpejpenaskej. Uan versículo 20 kijtoua ke ika tein kiixpejpenaskiaj ueliskiaj kinextiliskej Jiova ke yekmelauj kiteltasojtayaj. Tejuan no ueli tikixpejpenaj ox tiknekij tikueyichiuaskej Jiova. Komo tikixtaliaj nejon, uelis tikueyitaliskej Jiova uan tiknextiliskej ke tikteltasojtaj ika netetayokolil tein techmakak. w17.01 2:10, 11

Jiova kineki maj kuali tiktekitiltikan tein ueli tikchiuaj porin techtasojta uan kineki maj tiyolpakikan. Sayoj ke no kimati ke seki taman amo ueli tikchiuaj. Kemej neskayot, amo tiuelij tikixpolouaj tonepololuan, tajtakol nion mikilis (1 Rey. 8:46). Amo no ueli tikinchiualtiaj oksekin tein tejuan tiknekij, porin tinochin toselti tiuelij titaixpejpenaj. Uan maski xa tikpanouanijya miak taman oso tikpiaj miak taixmatilis, Jiova nochipa kipias okachi tamatilis ke tejuan (Is. 55:9). Nochipa moneki tikauaskej maj Jiova techixyekana. No moneki titakuaujtamatiskej ke techpaleuis uan kichiuas tein tejuan amo ueli tikchiuaj toselti. Sayoj ke Jiova no kineki maj tiknemilikan keniuj uelis tikyektaliskej tokuejmoluan uan tikinpaleuiskej oksekin. Ika okseki tajtolmej, moneki titakuaujtamatiskej iuan, tikchiuaskej tein kuali uan timonejnemiltiskej ika melaujkayot. w17.01 1:2-4

Barzilai kimatia ke nejin katka se ueyi tatiochiualis. Sayoj ke kemej xiuejya katka, amo kinekia taouijtis. Yejua ika kijtoj maj okachi kuali yani Kimham, akin xa katka ikonetsin (2 Sam. 19:31-37). ¿Amo kinekik yas Barzilai ichan David porin amo kinekia kipias okachi tekimej oso porin kinekia yolseujkanemis? Amo, ta porin katka yolyemanik. Kimatia ke mopataka inemilis uan ke amo ueliaok kichiuaya miak taman kemej achto (Gál. 6:4, 5). Maj amo tiktayekanaltikan tein tiknekij tikchiuaskej oso maj tikitakan tein tikchiuaj ika tein oksekin kichiuaj, ta maj tiktemokan tikmakaskej Jiova tein okachi kuali. Nejin okachi moneki ke se kipias se ueyi tekit oso maj tel teixmatikan (Gál. 5:26). Komo tiyolyemankej, tisentekitiskej iniuan tokniuan uan ijkon tiksenueyichiuaskej Jiova uan tikinpaleuiskej oksekin (1 Cor. 10:31). w17.01 4:5, 6

Jiova se tel kuali tachijchiujkej. Se kimoujkaita nochi tein kichijchiuak (Jer. 10:12). Nejin kinextia ke yejuatsin kiixtalij nochi. Kemej tetasojtakej, kiixtalij tanauatilmej tein kiixyekana tein onkak uan tein kinextiaj keniuj moneki monejnemiltiskej taltikpakneminij. Nejin tapaleuia maj nochi tein onkak itech iluikak uan taltikpak sentekiti (Sal. 19:7-9). Jiova kiixtalij kani moajsis uan keniuj tekitis nochi. Kemej neskayot, chikaualis tein tapaleuia maj nochi yeto talpan uan amo ejekaixko kichiua maj amo semi moskalti nion maj tel kaxani at itech ueyiamej uan maj ejekat tein kipiki taltikpak amo youi okseko. Komo amo moajsiskia nejin chikaualis, amo onkaskia nemilis itech taltikpak. Nochi tel kuali tekiti porin Jiova ijkon kiixtalij. Nejin kinextia ke moajsi keyej kichijchiuak taltikpak uan taltikpakneminij. Keman tikinnojnotsaj taltikpakneminij, ueli tikinpaleuiaj maj kiixmatikan Akin kichijchiuak nochi tein onkak tein semi tikmoujkaitaj (Apoc. 4:11). w17.02 1:4, 5

Se ángel kipaleuij Josué maj kintanini cananeos itech se neteuilis (Jos. 5:13-15; 6:2, 21). Satepan, keman tekiuaj Ezequías taixyekanaya itech ixolal Dios, tel miakej tateuianij asirios kinekiaj kiixpoloskej Jerusalén. Sayoj ke itech sayoj se youak, “iángel Jiova” kinmiktij 185,000 tateuianij (2 Rey. 19:35). Ángeles amo tajtakolejkej. Sayoj ke takamej akin kinpaleuijkej kemaj katkaj tajtakolejkej. Kemej neskayot, se tonal Moisés amo kiueyitalij Jiova (Núm. 20:12). Josué amo kitajtanij Dios maj kiixyekanani keman gabaonitas kinekkej kichiuaskej se netenkaualis iuan (Jos. 9:14, 15). Uan se tonal, tekiuaj Ezequías moueyinekik (2 Crón. 32:25, 26). Maski nejin takamej katkaj tajtakolejkej, israelitas monekia kintakamatiskej porin Jiova kinpaleuijtoya ika iángeles. Senkis nesia ke Jiova kiixyekantoya ixolal. w17.02 3:7-9

Tiknextiliaj aksa ke tikpoujkaitaj keman tiktakachiuaj. Miakpa, tikinpoujkaitaj akin motanilianij ika tein kichiujkej oso porin kipiaj tanauatil. Yejua ika moneki tikitaskej akonimej moneki tikinpoujkaitaskej uan keyej. Apocalipsis 5:13 kijtoua ke akin ‘tokotsyetikaj itech ne tayekankatrono’ uan Ichkatsin kinnamiki maj se kinueyitali. Apocalipsis capítulo 4 ininka tajtoua seki ángeles akin kijtouaj se taman tein kinextia keyej kinamiki maj se kiueyitali Jiova, akin “yoltinemis sen nachipa uan sen nachipa”. Yejuan kijtouaj: “Totekotsin Dios, Tejuatsin mitsonnamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi ten ongak. Uan Tejuatsin tikonmonekiltij ma taonka nochi ten tikitaj uan ma mochiua nochi” (Apoc. 4:9-11). w17.03 1:1, 2

Axkan, miakej mokauaj maj ininyolo kinyekana keman taixpejpenaj. Sayoj ke nejin uelis yeski tamouilil. Biblia technejmachtia maj amo timoyekanakan ika toyolo oso tein tikmachiliaj, porin titajtakouanij uan toyolo “okachi takajkayaua ke okseki taman, uan yolijsiui” (Jer. 17:9). Biblia ininka tajtoua miakej akin kinpanok tein amo kuali porin takuaujtamatkej itech ininyolo (1 Rey. 11:9; Jer. 3:17; 13:10). Komo ijkon, ¿toni uelis panos komo timoyekanaj ika toyolo keman titaixpejpenaj uan titanemiliaj? Kemej neskayot, xa amo kuali titaixpejpenaskej komo tikualantokej (Prov. 14:17; 29:22). Xa no amo kuali titaixpejpenaskej komo tiyolkuetaujtokej (Núm. 32:6-12; Prov. 24:10). Yejua ika, keman tikixpejpenaskej seki taman tein motelneki, maj amo timoyekanakan ika tein tikmachiliaj. w17.03 2:12, 13

Tinochin titajtakolejkej uan timopolouaj. Yejua ika tiktasojkamatij maj Jiova kitemakani iKonetsin maj techmakixti. Komo tiyolyemankej uan timoyolnonotsaj, uelis tiktajtaniskej maj techtapojpolui. Uelis tikyekmatiskej ke Jiova amo techtatsakuiltis kemej technamiki (Sal. 103:10). Maski ijkon, Jiova kichia maj tiktekitilikan ‘ika toyolo ajsitok’ (1 Crón. 28:9). Akin kitekitilia Jiova “ika iyolo ajsitok” kiteltasojta uan kineki kiueyichiuas nochipaya. Itech Biblia, tajtol yolo miakpa kijtosneki kemej yekmelauj se tamati: keniuj se tanemilia, tein se kiuelita, tein se kiixtalia se kichiuas satepan uan keyej se kichiua teisa. Maski titajtakouanij, uelis tikueyichiuaskej Jiova ika toyolo ajsitok. Tiktekitiliaj porin yekmelauj ijkon tiknekij tikchiuaskej, amo porin technauatiaj nion porin ijkon timomatkejya (2 Crón. 19:9). w17.03 3:1, 3

Keman kuali techyoui oso keman oksekin techueyitaliaj, moneki timoyekpiaskej. ¿Keyej? Porin tein tikchiuaj kinextia tein tikpiaj itech toyolo. Kemej neskayot, se tokniuj takat xa tel kuali momachtij achto ke kitemakas se tanojnots. Xa miakej kiluiaj ke tel kuali kikisak. ¿Toni kichiuas? Keman techiluiskej ke tel kuali tikchiujkej teisa, moneki tikelnamikiskej itajtoluan Jesús: “Kuak nankitamichiuaske ya namotekiu, ijkuakon moneki nankijtoske ijkuin: ‘Tejuan titakeualme ten amo teyika tikualtiaj, porin tikchiuke sayo ten [...] monekia tikchiuaske’” (Luc. 17:10). Keman Ezequías peuak moueyineki, amo kitasojkamatikok nochi nepaleuil tein Jiova kimakaka (2 Crón. 32:24-27, 31). Komo itech titanemiliaj tein Jiova toka kichiuani, ika titajtoskej yejuatsin uan keniuj techpaleuiani. w17.03 4:12-14