Abril

¿Toni moneki tikchiuaskej uan ijkon techpaleuis tekit tein kichiuaj tayekananij? Maj titakuaujtamatikan uan maj tikchiuakan kemej yejuan, uan maj tiktakamatikan tein techyolmajxitiaj ika Biblia (Heb. 13:7, 17). Yejuan techtasojtaj uan kinekij maj kuali timouikakan iuan Jiova. Kemej neskayot, komo kiitaj ke titapolouaj nechikolmej oso ke tiyolkuetaujtokej, niman techpaleuiskej. Techkakiskej ika nejmachkayot, techyolchikauaskej uan kuali techyolmajxitiskej ika Biblia. ¿Tikonita ininnepaleuil kemej se taman tein kinextia ke Jiova mitsontasojta? Kemansa tayekananij ouij kinkisa techyolmajxitiskej. Komo ijkon, ¿keniuj uelis tiontapaleuis maj amo ouij kinkisa? Xikonnexti yolyemanilis, xikonkaki uan xionmotasojkamati. Xikonita ke nepaleuil tein mitsonmakaj kinextia inetasojtalis Dios. Nejin mitsonpaleuis uan tayekananij kinyolpaktis tekit tein kichiuaj. w18.03 31 § 15, 16

Nochin konemej tatamamej. Amo nochin niman kiajsikamatij tein moneki. Sekin nojnelmejok keman kiajsikamatij tein melauak, kuali taixpejpenaj uan kinekij moauiskej. Oksekin xa uelis moauiskej hasta keman okachi ueyiaskej. Tetatmej akin kiajsikamatij nejin amo kinchikaujkauiaj ininkoneuan maj moauikan, ta kinpaleuiaj maj kichikauakan inintakuaujtamatilis ijkon kemej kinnamiki. Tetatmej yolpakij keman ininkoneuan kichiuaj tein kijtoua tajkuilol tein axkan tikitaj. Sayoj ke, moneki amo keman kielkauaskej ke moneki kinpaleuiskej maj mochiuakan itatojtokakauan Cristo. Yejua ika, moneki motajtaniskej: “¿Kipiaya nokonetsin taixmatilis tein moneki tein kipaleuis maj motemakti iuan Dios uan maj moaui?”. w18.03 9 § 6

Komo aksa techyoleua ichan uan tikiluiaj ke kemaj tiyaskej, satepan moneki amo tikijtoskej ke amo tiyaskej komo amo techtsakuilia teisa tein motelneki. Komo amo tiyouij, nochi chikaujkayot tein kichiuak nenkajtis (Mat. 5:37). Sekin kijtouaj ke yaskej kampa kinyoleujkej sayoj ke satepan amo youij porin okseko kinyoleujkej uan kiitaj ke okachi kuali. ¿Melauj ke ijkon amo se kinextia netasojtalis nion poujkaitalis? Tein moneki tikchiuaskej yejua tiyaskej uan tiktasojkamatiskej tein tokniuan techmakaskej (Luc. 10:7). Uan komo teisa panoua uan yekmelauj amo uelis tiyaskej, maj niman tiknauatikan akin techyoleuak. Ijkon tiknextiskej netasojtalis uan poujkaitalis. No moneki timochikauaskej tikchiuaskej tein momattokej akin techyoleuaj. Kansaika, kuali kiseliaj aksa akin ajsi kalijtik uan amo achto tanauatij, sayoj ke itech okseki xolalmej okachi kuali maj achto se tanauati. Uan itech seki xolalmej, mochia maj akin kinyoleuaj kijtokan sepa oso ojpa ika poujkaitalis ke amo yaskej achto ke kijtoskej ke kemaj. Sayoj ke itech okseki xolalmej kiitaskej ke amo motasojkamatij komo kijtouaj ke amo. Maj nochipa timochikauakan tikchiuaskej maj akin techyoleuaj yolpakikan porin techyoleujkej. w18.03 18 § 20, 21

Amo sayoj moneki tikmatiskej toni tamachtia Biblia uan ijkon mochikauas tokuali uikalis iuan Dios (1 Rey. 4:29, 30; 11:4-6). No moneki maj mochikaujtiuj totakuaujtamatilis (Col. 2:6, 7). Yejua ika, motelneki maj timomachtikan amatajkuilol “Xiksentokakan itech inetasojtalis Dios”. Nejin techpaleuis maj tikitakan keniuj tikuiskej itech tonemilis tein Biblia tayolmajxitia. Komo timomachtijkejya, uelis timomachtiskej okseki amaixmej tein techpaleuiskej maj mochikaua totakuaujtamatilis (Col. 1:23). Uan no, moneki tiktataujtiskej Jiova uan tiknemiliskej keniuj uelis tikchiuaskej tein timomachtiaj. Keman timomachtiaj uan titanemiliaj, moneki tiktemoskej tiknekiskej tikyolpaktiskej uan tiktakamatiskej Jiova (Sal. 40:8; 119:97). Uan no, techpaleuia maj tikixtopeuakan tein techtsakuilia maj okachi mochikaua tokuali uikalis iuan (Tito 2:11, 12). w18.02 24, 25 § 7-9

¿Keniuj uelis titakuaujtamatiskej kemej Noé? Motelneki timomachtiskej iTajtol Dios ika miak nejmachkayot, tikpatiuitaskej tein timomachtiaj uan tikauaskej maj techpaleui maj timopatakan uan keman titaixpejpenaskej (1 Ped. 1:13-15). Ijkon, takuaujtamatilis uan itamatilis Dios techpaleuiskej maj amo techkajkayaua Satanás nion maj techijtako inintanemilil akin kinixyekana (2 Cor. 2:11). Nejin tanemilil kichiua maj miakej kintelyolpakti tateuiskej uan auilnemiskej, uan maj kitayekanaltikan ininamo kuali tanejnekilis (1 Juan 2:15, 16). Hasta uelis kichiuas maj akin amo chikauak inintakuaujtamatilis amo kiitakan ke okachi amo uejka yetok itonal Jiova. Maj tikelnamikikan ke keman Jesús kijtoj ke totonaluan yeskiaj kemej itonaluan Noé, amo okachi ika tajtoj tateuilis oso auilnemilis, ta ke uelis techtapololtis uan amo tiktekitiliskejok Dios (Mat. 24:36-39). Xionmotajtani: “¿Niknextia ika tein nikchiua ke yekmelauj nikixmati Jiova? ¿Necholinia notakuaujtamatilis maj amo sayoj niktakamati itanauatiluan, ta no maj nikinteixmatilti?”. Tein tiontanankilis kinextis ox yekmelauj tionnentinemi iuan Dios akin melauak (Gén. 6:9). w18.02 9, 10 § 8-10

Melauak ke amo ueli senkis amo tikinnotsaj akin amo kitekitiliaj Jiova, porin xa moneki iniuan titekitiskej, tiyaskej kaltamachtiloyan oso iniuan tinemiskej. Tein kemaj ueli tikchiuaj yejua amo titanemiliskej nion timonejnemiltiskej kemej yejuan. ¿Toni techpaleuis? Moneki tikchikauaskej tokuali uikalis iuan Jiova keman timomachtiaj Biblia uan timouikaj iniuan akin kitasojtaj. No moneki timochikauaskej tikinpaleuiskej oksekin maj kiixmatikan Jiova. Maj tiktemokan tikinnojnotsaskej uan maj tiktajtanikan Jiova maj techpaleui maj tikijtokan tein moneki keman monekis. Maj tikiniluikan ke tiitaixpantijkauan Jiova. Ijkon, kemej kuali timonejnemiltiaj kuali ika motajtos Dios uan amo tejuan. Jiova techmachtiani maj “tiksekokautiyakan ne amokuali nemilis uan ma tikmajpeutiyakan ne tanejnekilisme ten ualeutok iuan in taltikpakuani [...,] ma tiyekchipaukanemikan ika ne kuali taixejekolis, uan ma tikpiakan ne yolmelaukanemilis uan ma tikmouistilijtiyakan Totajtsin Dios nikan taltikpak” (Tito 2:11-14). Komo tikchiuaj kemej Jiova uan tiktakamatij, taltikpakneminij techitaskej uan xa sekin hasta kijtoskej: “Tiknekij tiyaskej namouan, porin tikakinij ke Dios yetok namouan” (Zac. 8:23). w18.01 31 § 17, 18

¿Kijtosneki nejin ke amo kuali yetok maj se motasojta? Amo. Totech yetok maj timotasojtakan uan moneki ijkon tikchiuaskej. Ijkon techchijchiuak Jiova. Jesús kijtoj: “Xiktasojta mokniu ijkon keme tejua timotasojta” (Mar. 12:31). Komo amo timotasojtaj, amo uelis tikintasojtaskej oksekin. Uan no, Biblia kijtoua: “Teyokichuan ma kintasojtatinemikan ninsiuauan ika ne tetasojtalis tenika cada se teyokich mopialitinemi uan motasojtatinemi. Porin ne teyokich ten kitasotajtinemi isiuatsin, [...] motasojtatinemi yejua san mismo. Uan amo aken kitauelitstinemi de yejua itakayo san. Ta, cada se tagat motasojtatinemi kuak motekipanoa uan moyekpia” (Efes. 5:28, 29). Yejua ika semi kuali maj timotasojtakan. Netasojtalis tein ika motajtoua itech 2 Timoteo 3:2 kichiua maj se kitayekanalti se itanejnekilis. Akin sayoj yejuan motasojtaj kinemiliaj ke nochi ueli kichiuaj (Rom. 12:3). Amo ininka motekipachouaj oksekin. Uan keman teisa amo kuali kisa, kintajtakoltiaj oksekin. Yejuan amo yekmelauj yolpakij. w18.01 23 § 4, 5

Tikakij Jiova keman timomachtiaj Biblia. Sayoj ke, komo tiknekij iuan titajtoskej moneki tiktataujtiskej. Tiitekitikauan moneki amo tikitaskej netataujtil kemej se taman tein ipa se kichiua oso tein tepaleuia maj kuali kisa teisa. Netataujtil yekmelauj tepaleuia maj se tajto iuan Tachijchiujkej. Uan Jiova kineki techkakis (Filip. 4:6). Yejua ika, telpoch, keman teisa mitstekipachojtos, xikelnamiki ke Biblia mitsyolmajxitia: “Xikauili Jiova motamamal” (Sal. 55:22). Tel miakej tokniuan uelis mitsiluiskej ke kinpaleuiani nejin. Uan tejua no uelis mitspaleuis. Moneki nochipa tiktataujtiskej Jiova, amo sayoj keman tiknekij maj techpaleui. Kemansa xa semi ika timotekipachouaj kuejmolmej tein tikpiaj uan tikelkauaj nochi tatiochiualismej tein tikseliaj. Kuali yeskia mojmostaj xitanemili maski sayoj itech eyi taman tein uelis tiktasojkamatilis Jiova. w17.12 25, 26 § 10, 11

Nochi xiujmej, tel miakej akin momachtiaj Biblia motemaktiaj iuan Jiova uan moauiaj. Miakej telpochmejok akin inintatuan itaixpantijkauan Jiova uan kiixpejpenkej se tel kuali nemilis (Sal. 1:1-3). Tokniuan tetatmej kichiaj maj ejko tonal keman ininkoneuan moauiskej (no xikonita 3 Juan 4). Kinekij maj ininkoneuan kiixmatikan “Tajkuilolamatsin de Dios”, kampa axkan pouij Escrituras Hebreas uan Escrituras Griegas Cristianas. Hasta konemej akin semi nojnelmejok, ijkon kemej ueliskej, uelis momachtiskej seki taman tein kichiujkej akin ininka tajtoua Biblia uan tein mochiuak ne uejkauj. Itech inechikol Jiova mochijchiuanij tataman libros, folletos uan videos itech miak tataman tajtolmej tein tetatmej uelis ika kinpaleuiskej ininkoneuan. Maj tikelnamikikan ke motelneki se kiixmatis tein tamachtia iTajtol Dios uan ijkon uelis kuali se mouikas iuan Jiova. w17.12 18 § 1; 19 § 4

Maj tiknemilikan ke se tokniuj siuat kinemilia ke itakauj, akin amo itaixpantijkauj Jiova, amo kinextilia ke kitasojta. ¿Tapaleuis komo iuan motajtolteuia? Uan maski kichiuas maj itakauj kichiua tein kineki tokniuj siuat, ¿kipaleuis maj kineki kitekitilis Jiova? Xa amo. Sayoj ke komo kipoujkaita porin yejua taixyekana kalijtik, tapaleuis maj onka yolseuilis, kiueyitalis Jiova uan xa hasta takat kinekis kitekitilis Dios. Ijkon, xa nochin omen kiseliskej netetayokolil (1 Ped. 3:1, 2). Axkan maj tiknemilikan ke se tokniuj takat kinemilia ke inamik, akin amo itaixpantijkauj Jiova, amo kipoujkaita. ¿Kichiuas maj kipoujkaita komo kitsajtsilia uan ijkon kinextilia akoni taixyekana kalijtik? Amo. Jiova kichia maj tokniuj kichiua kemej Jesús uan maj kitasojta inamik. Cristo taixyekana itech nechikol ika netasojtalis uan nejmachkayot (Luc. 9:46-48). Tokniuj takat akin kichiua kemej Jesús xa kichiuas maj inamik no kineki kitekitilis Jiova. w17.11 29 § 13, 14

Akin amo kiixmatij Dios amo kitakamatij itanauatiluan. Nejon uelis kichiuas maj yolik kaxani totakuaujtamatilis. Tinochin uelis techijtakos inintanemilil, porin moteixmatiltia itech televisión, Internet, totekipan oso kaltamachtiloyan. Itech miak altepemej miakej amo kineltokaj Dios. Xa amo kitemouanij kimatiskej ox Dios yekmelauj nemi, sayoj ke kiuelitaj kinemiliskej ke uelis kichiuaskej tein kinekiskej (Sal. 10:4). Oksekin xa kinemiliaj ke kinextiaj tamatilis keman kijtouaj ke uelis kichiuaskej tein kuali maski amo kineltokaj Dios. ¿Taixejekol maj se kinemili ke amo moajsi se Tachijchiujkej? Komo tiktemouaj tanankilil itech tein kiajsinij tamatinij, xa timopojpoloskej. Sayoj ke tanankilil amo ouij. Ijkon kemej se kali kichijchiuak aksa, nochi taman tein yoltok no kichijchiuak aksa. w17.11 21 § 2-4

¿Keyej motelneki timonechikoskej keman moelnamiki imikilis Cristo? Maj tikelnamikikan ke nechikolmej pouij itech totaueyichiualis. Uelis tikyekmatiskej ke Jiova uan Jesús kinitaj akin mochikauaj moajsiskej itech nejin nechikol tein okachi moneki. Tiknekij maj kiitakan ke ompa tiyetoskej. Sayoj amo tiyetoskej komo yekmelauj amo tiuelij. Keman tiknextiaj ika tein tikchiuaj ke nechikolmej motelnekij, tikchiuaj maj Jiova kiita ke moneki ijkuiliujtos totokay itech amatajkuilol tein yejuatsin ika teelnamiki. Nejin amatajkuilol, tein no moixmati kemej “libro kampa ijkuiliutok nochi taneltokani ten yoltinemiske”, kipia inintokay akin yejuatsin kineki kinmakas nemilis nochipaya (Apoc. 20:15). Tonalmej achto keman moelnamikis imikilis Cristo, uelis tiktataujtiskej Jiova uan tikitaskej ika nejmachkayot ox chikauak tokuali uikalis iuan (2 Cor. 13:5). w18.01 13 § 4, 5

Keman temiktijkej moajsiaya itech xolal kampa mopaleuiayaj, amo teyi kipanoskiaok. Jiova kijtoj nejin keman ininka tajtoj nejon xolalmej: “Ompa uelis nanmopaleuiskej” (Jos. 20:2, 3). Yejuatsin amo tajtania maj oksepa kimelauanij temiktijkej ika nejon tein kichiujka. Uan takat akin momakepaskia amo kikauayaj maj kalaki itech xolal uan maj kimikti. Komo temiktijkej ompa mokauaya uan amo kisaya, Dios kimatampauiaya uan amo teyi monekia kimouilis. Amo tsaktoya, porin uelia tekitia, kinpaleuiaya oksekin uan kitekitiliaya Jiova ika yolseuilis. Uelia yolpakia uan amo motekipachouaya. Seki itekitikauan Dios ueyi tajtakojkaj uan moyolnonotskej, sayoj ke kisentokaj motajtakoltiaj. Sekin hasta kinemiliaj ke Jiova amo keman kielkauas tein kichiujkej. Komo tejuatsin ijkon tionmomachilia, uelis tikonyekmatis ke Jiova senkis mitsontapojpoluijya. w17.11 9 § 6; 11 § 13, 14

Se taman kemej uelis titapaleuiskej maj amo tixexeliujtokan yejua komo tiknemiliaj ika nejmachkayot toni kiixnextiaj pantsin uan vino keman tikelnamikij imikilis Cristo. Moneki tikchiuaskej achto ke mochiuas nejon nechikol uan okachiok keman mochiuas (1 Cor. 11:23-25). Pantsin tein amo kipia tein ika xokoyas kiixnextia inakayo Jesús tein amo kipiaya tajtakol tein kitemakak kemej nemaktil, uan vino kiixnextia iesyo. Maj tikelnamikikan ke inemilis Jesús tein kitemakak kinextij ueyi netasojtalis tein techpialiaj Jiova uan Jesús. Jiova kitemakak iKonetsin maj techmakixti, uan Jesús motemakak toka momikilis. Keman titanemiliaj ika nejmachkayot itech netasojtalis tein techpialiaj techolinia maj no tikintasojtakan. Uan netasojtalis tein tejuan uan tokniuan tikpialiaj Jiova tamati kemej se mekat tein techsentilia uan kichikaua tokuali uikalis. w18.01 14 § 11

Jiova semi techpatiuita. Kemej semi techtasojta, hasta kitemakak iKonetsin maj techmakixtiki uan ijkon uelis tinemiskej nochipaya (Juan 3:16). Komo Jiova amo kichiuaskia tein motenkaua, Satanás kemaj ueliskia kijtos ke Dios takajkayaua uan ke amo kuali taixyekana porin amo kinmaka tein kuali taltikpakneminij. No kinextiskia ke melauak tein kijtouaj akin kiixnamikij, akin kikejkelouaj uan tajtanij: “‘¿Keye amo mochiua ya ijkon keme Cristo motenkauak touan de ke oksepa moualuikas? [...] Touejkautatuan momikilijke ya uan desde ne tonal hasta axkan amo teyi tikitaj ten yankuik. Uan kachi no ijkon san desde ne tonalme kuak tsinpeuak in taltikpak’” (2 Ped. 3:3, 4). Yejua ika, Jiova kiitas maj ika ininnemakixtilis taltikpakneminij no monexti ke kinamiki taixyekanas (Heb. 6:17, 18). Uan no, Jiova taixyekana ika netasojtalis. Yejua ika uelis tikyekmatiskej ke nochipa kintasojtas uan kinpatiuitas itekitikauan akin amo kikauaj (Éx. 34:6). w17.06 23 § 7

Keman Jiova motenkauak ke kititaniskia se Temakixtijkej, kemej moijtoua itech Génesis 3:15, yejuatsin kiitak kemej yeskia kitemakakaya iKonetsin. Kemej naui mil xiuit satepan, kitemakak iKonetsin maj ininka momikili taltikpakneminij (Juan 3:16). ¡Semi tiktasojkamatij maj kichiuani nejon! Kemej tichijchiujtokej kemej Dios tamati, ueli tiknextiaj yekmelauj netasojtalis. Abel kinextij ke kitasojtaya Dios keman kimaktilij tein okachi kuali tein kipiaya (Gén. 4:3, 4). Noé kinextij ke kintasojtaya oksekin keman miak xiujmej kinnejmachtij maski amo kikakkej (2 Ped. 2:5). Uan Abrahán kinextij ke okachi kitasojtaya Dios ke tein yeski tein kimachiliaya keman yaya kitemaktiti ikonetsin, Isaac (Sant. 2:21). Ijkon kemej yejuan, tejuan tiknekij tiknextiskej netasojtalis hasta keman ouij techkisas. w17.10 7, 8 § 3, 4

Jesús, kemej toTayekankatiopixkauj, okachiok techyekmatiltia ke Jiova techtapojpoluis uan ke tikseliskej nepaleuil uan ueyi teiknelilis keman monekis (Heb. 4: 16). Yejua ika, xiontakuaujtamati itech inemilis Jesús tein kitemakak. Xiontakuaujtamati ke mitsonpaleuia tejuatsin (Gál. 2:20, 21, TNM). Xiontakuaujtamati ke ika inemilis Jesús tein kitemakak, Dios mitsontapojpoluia tajtakolmej tein tikonchiuak tejuatsin, uan ke mitsonpaleuia tejuatsin xikonchia tionnemis nochipaya. Inemilis Jesús tein kitemakak se netetayokolil tein Jiova mitsonmakak tejuatsin. Keman Jiova techtapojpoluijya, moneki amo timouiskej maj oksepa techelnamikili tein tikchiujkaj oso maj techtatsakuilti (Sal. 103:8-12). Kemaj, uelis tikyekmatiskej ke yejuatsin techtapojpoluia. w17.11 11, 12 § 14-17

Youak keman yekinika mochiuak iTakualis toTekotsin, Jesús kitajtanij Jiova maj imomachtijkauan kuali mouikakan ijkon kemej yejua uan iTajtsin kuali mouikaj. Senkis moita ke Jiova kinankiliani iKonetsin uan axkan tel miakej kineltokaj ke Jiova kiualtitanik. Amo moajsi okse nechikol kemej tein ika tikelnamikij imikilis Cristo tein senkis kinextia ke tiitaixpantijkauan Jiova amo tixexeliujtokej. Kansaika, amo semi moita oso hasta amo kiyekitaj maj akin seseko kayomej mosentilikan uan maj kisenueyichiuakan Dios. Sayoj ke Jiova uan Jesús kiitaj ke semi kualtsin maj kuali mouikakan. Tiitekitikauan Jiova amo tikmoujkaitaj maj tinochin kuali timouikakan. Yejuatsin kijtoj ke panoskia nejin (Ezeq. 37:15-17; Zac. 8:23). w18.01 14 § 7-9

“Tepanchiuanij” akin kiixtopeujkej Mesías yejuan taixyekananij judíos. Amo sayoj amo kikakkej oso amo kinekkej kineltokaskej ke yejua katka Cristo. Miakej hasta tajtankej maj kimiktikan (Luc. 23:18-23). Yejua ika, yejuan inintajtakol maj kimiktianij. Komo Jesús kiixtopeujkej uan kimiktijkej, ¿keniuj ueliskia mochiuas “tepanchikaualoni”? Sayoj komo moajokuia. Tatitanil Pedro kiniluij taixyekananij judíos: “Jesucristo ten pouia de Nazaret [...] nankikuoupampilojke, pero Totajtsin Dios kipankixtij Jesús yoltok” (Hech. 3:15; 4:5-11; 1 Ped. 2:5-7). Satepan ke moajokuik, sayoj itechkopa iKonetsin Dios ueli timomakixtiaj, “porin Totajtsin Dios amo techmaka ok okse tokaytsin tenika se tagat nikan taltikpak uelis momakixtis” (Hech. 4:12; Efes. 1:20). w17.12 9, 10 § 6-9

Keman Jesús ika tajtoj okachi ueyi tajyouilis tein amo uejkaua mochiuas, kijtoj: “Nejuatsin [...] nipetantiualas ika in ueyi chikaualis. Uan [...] ángeles takeualme de Dios ika se ueyi tsajtsilis den tapits [...] kinsentiliske nochi ne notaijitaluan” (Mat. 24:29-31). Jesús kinsentilis ‘taijitalmej’ keman kinuikas iluikak taixpejpenalmej akin yetoskejok nikan taltikpak. Nejin panos satepan ke peuas okachi ueyi tajyouilis, sayoj ke achto ke peuas Armagedón. Itech nejon neteuilis, Jesús uan 144,000 moteuiskej iniuan taixyekananij itech taltikpak uan kintaniskej (Apoc. 17:12-14). Satepan ke tikelnamikiskej imikilis Jesús achto ke ualas uan kinuikas taixpejpenalmej iluikak, amo sepaok tikelnamikiskej. w18.01 16 § 15

Jesús nemi iluikak “sen nachipa” (Apoc. 1:5, 18; Rom. 6:9; Col. 1:18; 1 Ped. 3:18). Yejua motenkauak iniuan itatitaniluan ke yaskiaj iluikak uan iuan tekiuajtiskiaj (Luc. 22:28-30). Pablo kijtoj ke amo sayoj Jesús moajokuiskia, ta oksekin no moajokuiskiaj uan yaskiaj iluikak. Kijtoj: “Nochi nijin mochiuak ika kuali nejmach. Porin achto Cristo pankisak yoltok, keme yeskia se tayekankatakilot”, uan satepan akin pouij iuan Cristo “tech ne tonal kuak moualuikas” (1 Cor. 15:23). Iyetolis Jesús peuak itech xiuit 1914. Tinemijok itech iyetolis uan amo uejkaua ixpoliuis tein amo kuali. w17.12 10 § 11; 11 § 14-16

“Totajtsin Dios [akin] nachipa techyoliknelijtinemi” kimachiliani tayokol keman momikilianij itekitikauan, kemej Abrahán, Isaac, Jacob, Moisés uan tekiuaj David (Núm. 12:6-8; Mat. 22:31, 32; Hech. 13:22). Biblia kijtoua ke Dios kineki maj ejko tonal keman oksepa kinmakas ininnemilis (Job 14:14, 15). Ijkuak, yejuan yolpakiskej uan amo keman kokolispeuaskej. Jiova no kiitak keman kimiktijkej iKonetsin akin semi kitasojta (Prov. 8:22, 30). Amo ueli tiknemiliaj ueyi tayokol tein kimachilij Jiova (Juan 5:20; 10:17). Uelis senkis titakuaujtamatiskej ke Jiova techpaleuis. Yejua ika moneki senkis tikyekmatiskej ke uelis tiktapouiskej nochi tein tikmachiliaj. Semi techyolseuia tikmatiskej ke techajsikamati keman titayokoyaj uan techyolseuia (2 Cor. 1:3, 4). w17.07 13 § 3-5

Millones taltikpakneminij kinyolpaktia temakaskej “tein kipia ipatiuj”, kemej inintonaluan, inintomin uan ininchikaualis (Prov. 3:9). Ijkon kipaleuiaj taueyichiualis tein melauak. Jiova amo keman kielkauas tein tikchiuaj itech itekiyo uan netasojtalis tein tiknextiliaj. Senkis moita ke itatiochiualis Jiova uan itaixyekanalis Cristo tapaleuiani maj itekitikauan Jiova kichiuakan se ueyi tekit itech nejin itamian tonalmej. Tiitekitikauan Dios tipouij itech se nechikol tein kuali ixyetok, kampa kuali se moajsi uan tein moajsis nochipaya. Yejua ika, maj tikpatiuitakan tekit tein tikpiaj itech nechikol uan maj tikakikan “itajtol Jiova” toDios (Zac. 6:15). Komo ijkon tikchiuaj, techmatampauiskej toTekiuaj uan Tayekankatiopixkat. Maj timochikauakan tikpaleuiskej taueyichiualis tein melauak. Ijkon, Jiova techpaleuis maj kuali tiyetokan itech nejin itamian tonalmej, uan nochipaya. w17.10 30 § 18, 19

Amo uejkaua, ixpoliuiskej taltikpaktekiuajyomej, taneltokalismej tein amo melaujkej uan kemej ixyetok motekitiltis tomin tein poui itech nochi tein Satanás kiixyekantok. Tanauatijkej Ezequiel uan Sofonías kijtojkej ke oro uan plata amo kipiaskejok ininpatiuj, maski tel miak xiujmej yejua tein moteltekitiltiaya (Ezeq. 7:19; Sof. 1:18). ¿Keniuj timomachiliskiaj komo tixiuejkejya tiyeskiaj uan tikitaskiaj ke tikaujkej tein yekmelauj kipia ipatiuj porin tiknekkej tiksentiliskej miak ‘ricojyot’? Xa timomachiliskiaj kemej akin tekiti nochi inemilis porin kineki kitanis miak tomin uan satepan kiita ke nejon tomin amo kualtia (Prov. 18:11). ‘Ricojyot tein poujtok nikan taltikpak’ amo kipiasok ipatiuj. Yejua ika, maj tiktekitiltikan kemej techpaleuis maj timochiuakan tiitasojikniuan Jiova uan Jesús. Tein yeski taman tein ika tikpaleuiskej iTekiuajyo Jiova techpaleuis maj okachi kuali iuan timouikakan. w17.07 11 § 16

Seki tokniuan akin kichiujkej se ueyi tajtakol kitemouaj maj amo momati uan ijkon amo mopinaujtiskej nion kichiuaskej maj oksekin amo kuali kinitakanok (Prov. 28:13). Sayoj ke nejon kinextia ke amo tetasojtaj, porin ininselti moijtakouaj uan no kinijtakouaj oksekin. Yektikatsin espíritu uelis amo semi tapaleuisok itech nechikol uan tokniuan uelis moxexeloskej (Efes. 4:30). Yekmelauj netasojtalis kiolinis tokniuj akin ueyi tajtakoj maj iniuan tajto tayekananij, uan yejuan kimakaskej nepaleuil tein monekis (Sant. 5:14, 15). Kualneskayot tein okachi tayekantok yejua netasojtalis (1 Cor. 13:13). Nejin kinpaleuia taltikpakneminij maj kiitakan akonimej yekmelauj kichiuaj kemej Cristo uan kemej Jiova, akin itech ualeua netasojtalis. Pablo kijkuiloj: “Komo amo nikpia tetasojtalis, ijkuakon nejua amo teyi nikualtia” (1 Cor. 13:2). Yejua ika, maj nochipa tiknextikan ke titetasojtaj, amo “sayo ika totajtoluan”, ta “ika nochi ten tikchiutinemij” (1 Juan 3:18). w17.10 11 § 17, 18

José kinextij yolchikaualis keman inamik Potifar kiteliluiaya maj iuan moteka. Yejua xa kimatia ke kipiaskia uejueyi kuejmolmej komo kiixtopeuaya. Sayoj ke nion tepitsin omeyolouak kiixtopeuas (Gén. 39:10, 12). Rahab no kinextij yolchikaualis. Keman ome tapijpianij israelitas ajsikej ichan ompa Jericó, kintatij uan kinpaleuij maj cholouanij (Jos. 2:4, 5, 9, 12-16). Itatitaniluan Jesús akin amo keman kikaujkej kiitakaj keniuj Jesús kinextijka yolchikaualis, uan keman saduceos kinnauatijkej maj amo ika tajtouanijok, yejuan amo kintakamatkej (Hech. 5:17, 18, 27-29). José, Rahab, Jesús uan tatitanilmej senkis kiixtalijkaj kichiuaskej tein kuali. Katkaj yolchikaujkej porin takuaujtamatiaj iuan Jiova, amo itech tein yejuan ueliaj kichiuayaj. Keman tikpanoskej seki taman kampa monekis tiknextiskej yolchikaualis, maj titakuaujtamatikan iuan Jiova uan amo totech (2 Tim. 1:7, TNM). w17.09 29 § 6-9

Amo uelis toselti timokixtiliskej “soltik talnamikilis”. Ika inepaleuil iTajtol Dios uan iyektikatsin espíritu sekin uelik mopatakej (Luc. 11:13; Heb. 4:12). Tejuan no uelis tikseliskej nejon nepaleuil komo tikixtajtoltiaj Biblia mojmostaj, itech titanemiliaj uan nochipa tiktajtaniaj Jiova maj techmaka tamatilis uan chikaualis tein techpaleuis maj tiktakamatikan tein kijtoua iTajtol (Jos. 1:8; Sal. 119:97; 1 Tes. 5:17). Yektikatsin espíritu uan Biblia no techpaleuiskej komo timomachtiaj tein moitas itech nechikolmej uan amo titapolouaj (Heb. 10:24, 25). Uan no, moneki tiktekitiltiskej nochi tein techmakaj itech inechikol Jiova, kemej amaixmej, JW Broadcasting, JW Library uan jw.org (Luc. 12:42). Tiitekitikauan Dios moneki senkis timokixtiliskej amo kuali tachiualismej. Sayoj ke komo tiknekij tikpiaskej itatiochiualis Dios no moneki timotaliliskej “yankuik talnamikilis” (Col. 3:10). w17.08 21 § 16, 17

Tekiuaj David miakpa ika mauiltijkej. Jiova kiixpejpenak keman katka telpoch maj yeskia tekiuaj ompa Israel. Sayoj ke monekik mochias kemej kaxtol xiujmej hasta keman mochiuak tekiuaj itech kalyetouanij kampa pouia (2 Sam. 2:3, 4). Itech seki nejon xiujmej, monekik kicholuijtinemis tekiuaj Saúl, porin kinekia kimiktis. Yejua ika, kemansa monekik yas nemitiuj itech okse altepet oso itech ostokmej tein onkayaj taluakyan. Satepan, Saúl mikik itech se neteuilis. Maski ijkon, David monekik mochiasok kemej chikome xiuit hasta keman mochiuak tekiuaj itech nochi Israel (2 Sam. 5:4, 5). ¿Keyej mochiak ika nejmachkayot? Yejua kimatia ke Jiova kitasojtaya uan ke amo keman kikauaskia. Kinemiliaya keniuj Jiova kipaleuijka achto uan kichiaya tonal keman yejuatsin kitamiskia ikuejmoluan (Sal. 13:6). David kimatia ke amo nenkaj mochiaskia. w17.08 6 § 14, 15

Tajtolmej mopataj ijkon kemej panouaj xiujmej. Xa tikixmatij tajtolmej tein axkan kijtosnekij okse taman. Yejua nejon panok ika tajtolmej hebreo uan griego, tein ika moijkuiloj miak tajkuilolmej itech Biblia. Axkan, amo mokuijok tajtolmej tein mokuiaj ne uejkauj. Yejua ika, miakej akin kinekij kiajsikamatiskej iTajtol Dios moneki kiixtajtoltiskej se biblia tein motajtolkepak, maski uelij tajtouaj hebreo uan griego tein axkan mokui. Sekin kinemiliaj ke okachi kuali kiajsikamatiskej Biblia komo momachtiaj hebreo uan griego tein ne uejkauj mokuia, sayoj ke nejin xa amo semi kinpaleuis kemej yejuan kinemiliaj. Tiktasojkamatij maj Biblia motajtolkepani nochi oso sayoj seki amatajkuilolmej itech panoua tres mil doscientos tataman tajtolmej. Nejin kinextia ke Jiova kineki maj itech nochi altepemej uan akin tajtouaj tataman tajtolmej kinpaleui iTajtol (Apoc. 14:6). Kemej Jiova tetasojta uan amo techikoita, kichiua maj okachi timotokikan iuan. w17.09 19 § 4

Komo se tochankauj kikalankixtijkej itech nechikol, xa monekis timotsakuiliskej uan amo tiktemoskej iuan titajtoskej komo amo moneki. Amo ouij techkisas komo tikelnamikij ke ijkon tikchiuaj kemej Jiova uan tiktakamatij tein tanauatia. Kemej neskayot, keman Saúl kitemojtinemia David porin kinekia kimiktis uan keman Simeí kiuijuikaltij, amo kualanik nion kinchiuilij tein amo kuali porin kipiaya tanauatil (1 Sam. 26:9-11; 2 Sam. 16:5-10). Kemaj, tikmatij ke amo nochipa kimatik motsakuilis. Tikelnamikij tein kinekia kichiuas keman Nabal amo kinekik kinmakas takual uan keman tajtakoj iuan Bat-seba (1 Sam. 25:10-13; 2 Sam. 11:2-4). ¿Toni techmachtia tein kichiuak David? Yekinika, ke tayekananij moneki kimatiskej motsakuiliskej uan amo ininka mauiltiskej tokniuan porin kipiaj tanauatil. Uan ojpatika, ke amo akin moneki kinemilis ke amo teyi uelis kichiuas maj tajtako (1 Cor. 10:12). w17.09 5, 6 § 12, 13