Junio

Jiova techmelaua uan techmachtia porin techtasojta. Kineki maj tiksentokakan kuali timouikakan iuan uan maj tinemikan nochipaya. Sayoj ke kemansa, monekis amo sayoj se kiyolmajxitis aksa. Komo ueyi tajtakoj, xa kipolos tekimej itech nechikol. Maski ijkon, tamelaualis tein kiselis kinextia inetasojtalis Jiova. Keman kipolos tekimej uelis kipaleuis maj kiita ke motelneki okachi momachtis, tanemilis uan kichiuas netataujtil. Nejin kipaleuis maj kichikaua ikuali uikalis iuan Jiova (Sal. 19:7). Satepan, xa oksepa kimakaskej nejon tekimej. Hasta keman kikalankixtiaj aksa itech nechikol monextia inetasojtalis Jiova, porin kinpaleuia okseki tokniuan maj amo kinijtako tein kichiujtok (1 Cor. 5:6, 7, 11). Uan no, kemej itamelaualis Jiova nochipa mochiua kemej kinamiki, akin kikalankixtijkej uelis kipaleuis maj kiajsikamati ke itajtakol semi ueyi uan kiolinis maj moyolnonotsa (Hech. 3:19). w18.03 24 § 5, 6

Tajpixkej amo kiixmatia iTajtol Dios. Yejua ika, komo kinekia mochiuas itatojtokakauj Cristo, monekia kiixmatis tamachtilis tein tayekantok, kiajsikamatis tein moneki kichiuas se itekitikauj Jiova uan kiixtalis kitakamatis itamachtilisuan Jesús. Tein momachtij itech amo miak tonalmej kiolinij maj kinekini moauis (Hech. 16:25-33). Sayoj ke monekik kisentokas momachtis satepan ke moauij. Yejua ika, ¿toni uelis kichiuaskej tetatmej komo ininkonetsin kiniluia ke kineki moauis porin kitasojta Jiova uan kineki kitakamatis? Uelis kiluiskej maj iniuan tajto tayekananij uan ijkon yejuan uelis kiitaskej ox uelisya moauis. Ijkon kemej okseki itatojtokakauan Cristo akin moauijkejya, konetsin kisentokas momachtis itanejnekilis Dios nochipaya (Rom. 11:33, 34). w18.03 10 § 8, 9

Keman timochikauaj okachi titanemiliskej kemej Jiova, yektikatsin espíritu techpaleuia maj tikpatakan kemej titanemiliaj. Ijkon, yolik peua okachi titanemiliaj kemej Cristo. Uan no, techpaleuia maj timoijkuanilikan toamo kuali tanejnekilis uan maj tikpiakan kualneskayomej tein kiyolpaktiaj Dios. Komo titanemiliaj kemej Cristo techpaleuis kemej titajtouaj, kemej timonejnemiltiaj kampa titekitij oso kampa timomachtiaj uan kemej titaixpejpenaj mojmostaj. Nejin kinextis ke timochikauaj tikchiuaskej kemej yejua. Komo tikpiaj itanemilil, amo tikauaskej maj nion teyi kijtako tokuali uikalis iuan Jiova. Keman timoajsiskej kampa uelis tikchiuaskej tein amo kuali, tokuali uikalis iuan Jiova techpaleuis maj tikixtopeuakan. Uan keman titaixpejpenaskej, timotajtaniskej: “¿Toni tayolmajxitilis tein kitemaka Biblia uelis nechpaleuis? ¿Toni kichiuaskia Cristo itech nejin taman? ¿Toni kiyolpaktis Jiova?”. w18.02 25 § 12; 26 § 14

Itech itonaluan Enoc, ipopaj iueyitat Noé, taltikpakneminij kitelchiuayaj tein amo kuali. Hasta “kiuijuikaltiayaj” Jiova (Jud. 14, 15). Itech itonaluan Noé, “motelmoyauak tateuilis”. Ángeles akin amo yolkualmej mochiujkej kemej takamej, monamiktijkej iniuan siuamej uan kinpiakej konemej akin tel tateuiayaj (Gén. 6:2-4, 11, 12). Sayoj ke Noé amo monejnemiltij kemej yejuan. Biblia kijtoua ke “amo motajtakolmakak kemej akin nemiaj itech itonaluan” uan ke “nentinemik iuan Dios akin melauak” (Gén. 6:9). Maj tikitakan tein nejin tajtolmej kinextiaj kemej monejnemiltiaya Noé. Yekinika, maj tiknemilikan kanachi tonalmej kitekitilij Jiova ika nochi iyolo keman mochiujtoya tein tel amo kuali achto ke mochiuaskia Tetsaujkakiouit. Amo sayoj setenta oso ochenta xiujmej, ta ajsitoyaya seiscientos xiujmej (Gén. 7:11). Ojpatika, amo moajsia se nechikol kampa kipaleuiskiaj uan kiyolchikauaskiaj kemej tejuan. Nesi ke nion iikniuan kipaleuiayaj. w18.02 4 § 4, 5

Akin kitasojtaj tomin nochipa kinekiskej okachi uan nochipa yejua kitemojtoskej. Sayoj ke nejin sayoj kinualkuilis “miak tataman ouijkayome” (1 Tim. 6:9, 10; Ecl. 5:10). Tinochin moneki tikpiaskej tomin, porin techpaleuia (Ecl. 7:12). Sayoj ke ¿uelis aksa yolpakis komo sayoj kipia tein ika moixpanoltis? Kemaj (Ecl. 5:12). Agur, ikoneuj Jaqué, kitajtanij Dios: “Amo xinechmaka tatasojtilis nion tominpialis. Sayoj xinechkaua maj nikmajseua tein ixyetok maj nikua”. Amo teouijmaka se kiajsikamatis keyej amo kinekia kitelpanos tatasojtilis. Yejua kimelauak ke amo kinekia maj nejon kiuikani maj tachteki, porin ijkon amo kiueyitaliskia Dios. Sayoj ke ¿keyej amo kinekia tominpias? Yejua kijtoj: “Ijkon amo senkis nikpias nochi uan nimitsixtopeuas uan nikijtos: ‘¿Akoni Jiova?’” (Prov. 30:8, 9). Jesús kijtoj: “Amo aken uelis kintekitilis ome patrones, porin [...] kitauelitas se patrón uan kitasojtas in okse, oso kimouistilis se patrón uan amo kiueyichiuas in okse. Amo aken uelis kintekitilis [...] Dios uan in ricojyot” (Mat. 6:24). w18.01 24 § 9-11

Titapaleuiaj maj amo tixexeliujtokan komo tikintapojpoluiaj oksekin ika nochi toyolo. Ijkon, tiknextiaj ke tiktasojkamatij maj Jiova ueli techtapojpolui itechkopa inemilis Cristo tein kitemakak. Maj titanemilikan itech neskayot tein Jesús ika tajtoj itech Mateo 18:23-34. Maj timotajtanikan: “¿Necholinia nejin neskayot maj nikchiua tein Jesús tamachtij? ¿Amo niyolijsiui uan nikinajsikamati tokniuan? ¿Nikneki nikintapojpoluis akin nechyolxokoliaj?”. Melauak ke seki tajtakolmej okachi uejueyi ke okseki. Uan no, kemej titajtakouanij ouij techkisa tikintapojpoluiskej akin techchiuiliaj seki taman. Sayoj ke itajtoluan Jesús kinextiaj toni kineki Jiova maj tikchiuakan. Jesús senkis kinextij ke Jiova amo techtapojpoluis komo amo tikintapojpoluiaj tokniuan keman yejuan yekmelauj moyolnonotsaj. Nejin se taman tein moneki itech titanemiliskej ika nejmachkayot. w18.01 15 § 12

Maski kimatia ke ueliskia kimiktiskej, Daniel amo kinekik kiteajsikamatiltis ke amo kiueyichiuayaok Jiova. Yejuatsin kitatiochiuij Daniel porin amo kikauak uan kinextij yolchikaualis. Kimakixtij maj amo kikuanij tekuanimej. Nejon ueyi tachiualis tapaleuij maj itech nochi xolalmej kampa taixyekanayaj medopersas kiixmatinij Jiova (Dan. 6:25-27). ¿Keniuj uelis titakuaujtamatiskej kemej Daniel? Amo sayoj moneki tikixtajtoltiskej iTajtol Dios, ta motelneki tikajsikamatiskej (Mat. 13:23). Tiknekij tikmatiskej keniuj tanemilia Jiova uan keniuj kiita tein panoua. Yejua ika, moneki titanemiliskej itech tein tikixtajtoltiaj. No motelneki maj nochipa tikchiuakan netataujtil, okachiok keman tikpanouaj ouijkayomej. Uelis titakuaujtamatiskej ke Jiova techmakas tamatilis uan chikaualis tein tiktajtaniskej (Sant. 1:5). w18.02 10, 11 § 13-15

Telpoch, maski timoauijya, uelis tikitas ke Jiova yolkuali keman tikita keniuj mitspaleuia xiktematilti tein tikneltoka itech tanojnotsalis uan kampa timomachtia. Uelis ouij mitskisas tikinnojnotsas akin iniuan timomachtia porin amo tikmati keniuj mitsnankiliskej. Uan uelis yeski okachi ouij komo moneki tikinnojnotsas miakej. ¿Toni uelis mitspaleuis? Yekinika, xiknemili keyej tikneltoka tein timomachtia. Itech jw.org, kampa kijtoua “Guías de estudio” tein moajsi itech miak tataman tajtolmej uelis mitspaleuis xiknemili toni tikneltoka, keyej tikneltoka uan keniuj uelis tikmelauas. Komo yekmelauj tikneltoka tein timomachtia uan kuali timomachtia, tiknekis ika titajtos Jiova (Jer. 20:8, 9). w17.12 26 § 12, 14, 15

Amo sayoj moneki tikintapouiskej tokoneuan tein kichiujkej akin ininka motajtoua itech Biblia uan tein mochiuak ne uejkauj. Timoteo no ‘kiyekneltokak’ tein momachtij. Yejua peuak kiixmati Escrituras Hebreas ijkuak nojnelok katka. Sayoj ke, xiujmej satepan, tein kiitak kichiuak maj kineltoka ke Jesús katka Mesías. ¿Keniuj uelis tikonpaleuis mokonetsin maj kineltoka tein momachtia, ijkon kemej Timoteo? Yekinika, amo xionyolijsiui. Mokonetsin amo niman kineltokas tein momachtia, uan amo no kineltokas sayoj porin tejuatsin tikonneltoka ke melauak. Sejse konetsin moneki taixejekos uan tanemilis uan ijkon kineltokas tein tamachtia Biblia (1 Tes. 5:21). Tetatmej uelis kintelpaleuiskej ininkoneuan maj kichikauakan inintakuaujtamatilis, okachiok keman konemej kinchiuiliskej netajtanilmej. w17.12 19 § 3, 5, 6

Marta tel kuali mouikaya iuan Jesús uan katka semej imomachtijkauan. Semi tayokoxtoya porin iikniuj, Lázaro, momikilijka. ¿Toni ueliskia kiyolseuis? Jesús kiyekmatiltij: “Moknitsin oksepa pankisas yoltok” (Juan 11:20-23). Marta senkis kineltokaya ke Lázaro moajokuiskia satepan. Sayoj ke, Jesús kiajokuik nejon tonal. Xa momikilij tonamik, semej totatuan, toueyitatuan oso hasta se tokonetsin. Tiknekiskiaj oksepa tiknauaskej, iuan titajtoskej uan tiuetskaskej. Melauak ke amo onkak keyej tiknemiliskej ke Jesús oso iPopaj kiajokuiskej axkan. Sayoj ke ¿senkis tikneltokaj ijkon kemej Marta ke moajokuis satepan? Techyolpaktia tikmatiskej ke onkak seki taman tein kichiua maj tikijtokan tein Marta kijtoj: “Nejua nikmati ke [...] oksepa yoltinemis”. Maski ijkon, motelneki maj tiknemilikan keyej senkis tikneltokaj nejon. w17.12 3 § 1, 2

Jesús kitasojtaya Tanauatil tein kiselijka Moisés. Uan amo tikmoujkaitaj, porin nejon Tanauatil kitemakaka Jiova, iTajtsin, akin okachi kitasojta. Itech Biblia moijtojka ke Jesús kiteltasojtaskia itanauatiluan Dios, kemej kinextia tajkuilol tein axkan tikitaj. Kinextij ika tein kijtoj uan tein kichiuak ke nejon Tanauatil tel kuali katka uan tel tapaleuiaya, uan ke nochi tein ompa moijtouaya mochiuaskia (Mat. 5:17-19). Xa semi motayokoltij keman kiitak ke tajkuilouanij uan fariseos amo kuali kitekitiltiayaj Tanauatil. Melauak ke yejuan kuali kitakamatiaj seki taman tein amo tel tayekantoya. Yejua ika, Jesús kijtoj: “Nankimaktiliaj Dios ne namodiezmo den xiutsitsin [...], keme menta uan anís uan cominos”. Komo ijkon, ¿toni tein amo kuali kichiujtoyaj? Jesús kijtoj: “Nankisekokauaj in tanextililisme ten kachi ueyi tech in tanauatil de Moisés. Nankisekokauaj in chipaukanemilis, uan ne teyoliknelilis uan ne takuautamatilis” (Mat. 23:23). Nejon fariseos amo kiajsikamatiaj tein kijtosnekia Tanauatil uan kinemiliayaj ke okachi kuali monejnemiltiayaj. Sayoj ke Jesús kemaj kiajsikamatia keyej motemakaka Tanauatil uan tein sejse tanauatil kinextiaya kemej tamati Jiova. w17.11 13 § 1, 2

Xa aksa kijtos ke moneki se moyolpaktis uan ke uelis se motekas iuan akin amo se inamik. Sayoj ke Biblia kijtoua ke amo kuali yetok maj se auilnemi (1 Tes. 4:4-8). Kemej Jiova techchijchiuak, kinamiki kiixtalis tein uelis tikchiuaskej uan tein amo. Uan yejuatsin kijtoua ke sayoj uelis mosentekaskej se takat uan se siuat akin namikuanij. Dios techmaka tanauatilmej porin techtasojta uan porin kimati ke techpaleuiaj. Keman kalyetouanij kitakamatij, motasojtaj uan mopoujkaitaj, uan kuali momachiliaj. Jiova kintatsakuiltis akin kiixmatij itanauatiluan uan amo kitakamatij (Heb. 13:4). Biblia techmachtia keniuj tikixtopeuaskej auilnemilis. Moneki timoyekpiaskej ika tein tikitaj (Mat. 5:28, 29). Yejua ika, moneki amo tikitaskej auilnemilis nion tikakiskej nekuikatilmej tein kijtouaj pitsotik tajtolmej (Efes. 5:3-5). w17.11 22 § 9, 10

Itekitikauan Jiova tel miak xiujmejya kiueyichiuanij ika nekuikatilmej. Ueli tikitaj ke keman israelitas kitakamatiaj Dios, kiitayaj ke motelnekia mokuikatiskej keman taueyichiuayaj. Kemej neskayot, keman tekiuaj David kixejxeloj tekimej tein mochiuaskia itech templo, kinixtalij 4,000 levitas maj kiueyichiuanij Dios ika tatsotson. Ompa pouiaj 288 akin tel kuali mokuikatiayaj (1 Crón. 23:5; 25:7). Israelitas tatsotsonkej uan mokuikatijkej keman kitamichijchiujkej templo. Biblia kijtoua: “Keman tapitsanij ika trompetas uan mokuikatianij senoloch kiueyichiujtoyaj uan kitasojkamatilijtoyaj Jiova, uan keman okachi chikauak kakistikej trompetas, címbalos uan okseki manamikmej tein ika tatsotsontoyaj keman kiueyichiujtoyaj Jiova, [...] iueyiyo Jiova moajsik itech nochi ichan Dios akin melauak”. Nejon xa semi kichikauak inintakuaujtamatilis (2 Crón. 5:13, 14; 7:6). w17.11 4 § 4, 5

Jesús kimatia ke amo nochin kiseliskiaj tein tamachtiaya uan ke sekin kinixnamikiskiaj imomachtijkauan uan yejua ika monekiskia yeskij yolchikaujkej. Yejua amo kinekia kinxexelos taltikpakneminij, ta kinekia kinmachtis tein melauak (Juan 18:37). Kinekia tamachtis ke kemansa ouij yeskia se kitojtokas, okachiok keman se itasojikniuan oso se ichankauan teixnamikiskiaj. Kemej kinekij kiyolpaktiskej Cristo, itatojtokakauan taxikouaj keman ininchankauan kinkejkelouaj oso hasta kinixtopeuaj. Sayoj ke kiselianij okachi ke tein kipolouanij (Mar. 10:29, 30). Maski tochankauan techixnamikij porin tiktekitiliaj Jiova, tiksentokaj tikintasojtaj. Sayoj ke moneki tikelnamikiskej ke moneki okachi tikintasojtaskej Dios uan Cristo (Mat. 10:37). No moneki tikelnamikiskej ke Satanás kitemos kichiuas maj tiktayekanaltikan netasojtalis tein tikinpialiaj tochankauan uan ijkon maj amo tiktakamatikanok Jiova. w17.10 13 § 3-6

Nejin tein Zacarías kiitak kiyeknextia ke Jiova amo kikauas maj nion se taman tein amo kuali mochiua itech ixolal. Komo kiita teisa tein amo kuali, ijsiujka kijkuanis (1 Cor. 5:13). Ángel kinextia nejin keman ijsiujka kitalilia chikiuit itentsak tein chijchiujtok ika plomo. Tein Zacarías kiitak kinyekmatiltij israelitas ke Jiova kichiuaskia maj itaueyichiualis moajsini chipauak. No kinelnamiktij ke monekia kichiuaskej tein tapaleuiskia maj ijkon moajsini. Amo ueli se kikaua nion se kikauas maj moajsi tein amo kuali itech ixolal Jiova. Yejuatsin techpaleuij maj timoajsikan itech inechikol tein chipauak, kampa tikmachiliaj ke techtasojta uan techmatampauia. Sayoj ke moneki tikchiuaskej tein tapaleuis maj moajsi chipauak. Amo ueli moajsi nion se taman tein amo kuali itech ixolal Dios. w17.10 24 § 14, 15; 25 § 17, 18

Yekinika 39 amatajkuilolmej tein kipia Biblia kijkuilojkej israelitas oso judíos. Yejuan akin yekinika kiselijkej “iamatajkuilol den ojtsin de Totajtsin Dios” (Rom. 3:1, 2). Sayoj ke, keman ajsik xiuit 300 achto itech totonaluan, miakej judíos amo kiajsikamatiajok tajtol hebreo. ¿Keyej amo? Porin Alejandro Magno, kayot Grecia, peuak taixyekana itech miak altepemej tein moinaxkatilijka (Dan. 8:5-7, 20, 21). Yejua ika, miakej peuak tajtouaj sayoj griego, hasta judíos akin nemiaj itech xolalmej kampa Alejandro Magno taixyekanaya. Nejin kichiuak maj miakej judíos ouij kinkisani kiajsikamatiskej Biblia itech tajtol hebreo. ¿Toni ueliskia mochiuas? Itech ojpatika siglo achto itech totonaluan kitamitajtolkepkej itech tajtol griego amatajkuilolmej tein pouij itech Escrituras Hebreas. Nejin Biblia moixmatik kemej Septuaginta. Yejua yekinika Biblia tein moixmati tein kipia nochi Escrituras Hebreas tein motajtolkepak uan moijkuiloj. w17.09 20 § 7-9

Tokniuan tetatmej xa kiniluiskej kampa tekitij maj tekitikan okachi horas itech tonalmej keman taueyichiuaj kemej kalyetouanij, keman tanojnotsaj oso monechikouaj. Moneki kipiaskej yolchikaualis tein kinpaleuis maj kijtokan ke amo. Ijkon, kinkauiliskej se kuali neskayot ininkoneuan. No kinextiaj yolchikaualis keman kinpaleuiaj maj kiixtalikan okachi kitekitiliskej Dios. Seki tetatmej xa amo kinekij kinyolchikauaskej maj kiixtalikan tekitiskej kemej precursores, maj tapaleuitij kampa monekij okachi tanojnotsanij, maj tekitikan Betel oso maj tapaleuikan kampa mochijchiuaj kalmej kampa titaueyichiuaj. Xa kimouiliaj maj amo kinyekpiakan keman xiuejkejya yeskij. Sayoj ke, tetatmej akin kipiaj tamatilis, kinextiaj yolchikaualis uan takuaujtamatij ke Jiova kichiuas tein motenkauak (Sal. 37:25). Nejin kichiua maj kinpaleuikan ininkoneuan maj no ijkon kichiuakan (1 Sam. 1:27, 28; 2 Tim. 3:14, 15). w17.09 30 § 14, 15

¿Keniuj uelis nankinpaleuiskej nanmokoneuan maj kimatikan motsakuiliskej? Konemej amo yolij ika nejin kualneskayot, yejua ika moneki nankinkauiliskej se kuali neskayot (Efes. 6:4). Komo nankiitaj ke ouij kinkisa motsakuiliskej, ximotajtanikan toni neskayot nankinkauilijtokej. Xikelnamikikan ke motelneki nochipa nantanojnotsaskej, nanmonechikoskej uan nantaueyichiuaskej kemej kalyetouanij. Uan keman monekis, amo xiomeyolouakan nankiniluiskej ke amo uelis kichiuaskej teisa. Jiova kiixtalij toni ueliskiaj kichiuaskej Adán uan Eva uan toni amo. Nejon kinpaleuiskia maj kimatinij ke monekia kipoujkaitaskej itaixyekanalis. No ijkon, keman tetatmej kinmelauaj uan kinkauiliaj se kuali neskayot, uelis kinpaleuis ininkoneuan maj kimatikan motsakuiliskej. Se kitasojtas itaixyekanalis Dios uan se kipoujkaitas itanauatiluan yejua se taman tein kitelpia ipatiuj tein tetatmej uelis kinnextiliskej ininkoneuan (Prov. 1:5, 7, 8). w17.09 7 § 17

Kemej Satanás taixyekantokok nikan taltikpak, tiksentokaskej titajyouiskej porin amo tikpiaj tekit, porin tikpiaj se ueyi kokolis, techtajyouiltiaj porin tiitaixpantijkauan Jiova, titajyouiskej porin mochiuaj tetsaujmej, techtachtekiskej oso tikpanoskej okseki ouijkayomej. Moneki yekmelauj titeikneliskej uan ijkon uelis timosenpaleuiskej. Teiknelilis techolinis maj tiknextikan kualtakayot (Efes. 4:32). Nejin kualneskayomej tein pouij itech “yankuik talnamikilis” techpaleuiskej maj tikchiuakan kemej Dios uan maj tikinyolseuikan oksekin (2 Cor. 1:3, 4). Xa itech tonechikol moajsij tokniuan akin kayomej itech okse ueyi altepet oso akin semi amo kipiaj tomin. Uelis tikinnextiliskej okachi kualtakayot komo timochiuaj tiinintasojikniuan uan tikinpaleuiaj maj kuali momachilikan itech nechikol (1 Cor. 12:22). Uan no, miakej tokniuan peua momachtiaj se yankuik tajtol porin kinikneliaj akin okseko kayomej akin mokaltalitoj itech ininxolal (1 Cor. 9:23). Nejin semi tapaleuiani. w17.08 23, 24 § 7-9

Tinochin moneki tiknekiskej timochiaskej ika nejmachkayot. ¿Toni techpaleuis? Maj tiktataujtikan Dios maj techmaka iespíritu, tein techpaleuia maj amo tiyolijsiuikan (Efes. 3:16; 6:18; 1 Tes. 5:17-19). Yejua ika moneki tiktataujtiskej Jiova maj techpaleui maj titaxikokan ika nejmachkayot. Maj no tikelnamikikan ke kemej Abrahán, José uan David takuaujtamatiaj iuan Jiova, nejon kinpaleuij maj mochianij ika nejmachkayot maj kichiuani tein motenkaujka. Amo sayoj inintech tanemilijkej nion kitayekanaltijkej tein yejuan kinekiaj. Komo titanemiliaj itech tatiochiualismej tein kiselijkej techyolchikauas maj timochiakan ika nejmachkayot maski tikpanoskej uejueyi ouijkayomej. Sayoj ke, kemansa xa titajtaniskej: “¿Hasta kemanian, Jiova?” (Is. 6:11). Sayoj ke, ika inepaleuil yektikatsin espíritu uelis tikijtoskej tein Jeremías kijtoj itech tajkuilol tein axkan tikitaj. w17.08 7 § 18-20

Keman Jesús okichpilok katka, xa mauiltiaya uan moixpetaniaya. Kemej kijtoua Biblia, ixyetok “tonal keman se uetskas” uan “tonal keman se mijtotis” (Ecl. 3:4). Sayoj ke no momachtij iTajtol Dios uan ijkon kuali mouikak iuan iTajtsin. Keman kipiaya 12 xiujmej, tamachtianij itech templo “kimoukakakiaj de keniu in okichpil Jesús niman kinajsikamatiliaya ne tanextiliani. Uan no kimoukaitayaj de keniu Jesús [kinnankiliaya]” (Luc. 2:42, 46, 47). Keman moskaltij, yolpakia porin kichiuaya tein Dios kinekia. Kemej neskayot, iTajtsin kinekia maj kinuikiliani kuali tanauatilmej akin amo teyi kipiayaj uan maj kintachialtiani akin amo tachiayaj (Luc. 4:18). Yejua semi kiuelitaya kinmatiltis oksekin keniuj tamati iTajtsin (Luc. 10:21). Se tonal, kinextilij se siuat keniuj kiueyichiuas Dios. Satepan, kiniluij imomachtijkauan: “Notakualis yejua nijin, ma nikchiua in tekit ijkon keme kimonekiltia Notajtsin Dios ten nechualtitanik. Uan ma niktamichiua” (Juan 4:31-34). Kinnextilis netasojtalis Dios uan oksekin kiyolpaktij. Uan nejon no uelis mitsyolpaktis. w17.07 23 § 4, 5

Tein Jesús kichiuak uan kijtoj keman yetoya nikan taltikpak senkis kinextij ikualneskayouan iTajtsin, Jiova (Juan 5:19). Dios kiualtitanik maj kinyolseuiki “akin tajyouijtokej” uan “nochin akin tayokoxtokej” (Is. 61:1, 2; Luc. 4:17-21). Taltikpakneminij ueliaj kiitayaj ke Jesús semi kinikneliaya, ke kiajsikamatia tajyouilis tein kipanotoyaj uan ke yekmelauj kinekia kinpaleuis (Heb. 2:17). Biblia kijtoua: “Jesucristo amo keman mopapatatinemi” (Heb. 13:8). Jesús yejua akin “kitemaka nemilis” porin kichiuak maj ueli tikchiakan tinemiskej nochipaya. No techajsikamati keman titayokoyaj, yejua ika ueli kinpaleuia akin kipanotokej “tataman tajyouilisme” (Hech. 3:15; Heb. 2:10, 18). Yejua kisentoka techiknelia keman techita ke titajyouijtokej. Kiajsikamati tayokol tein tikmachiliaj uan techyolseuia “kuak moneki” (Heb. 4:15, 16). w17.07 13 § 6, 7, 10

Satanás uan tein kiixyekana kiteltemouaj kichiuaskej maj amo tikpatiuitakanok netetayokolilmej tein Jiova techmaka. Komo amo timoyekpiaj, uelis timokauaskej maj techtapololti seki taman kemej tiknekiskej tiktaniskej miak tomin oso tikpiaskej miak taman tein patiyoj uan maj oksekin kiitakan. Tatitanil Juan techelnamiktia ke tein onkak itech nejin taltikpak amo uejkaua ixpoliuis (1 Juan 2:15-17). Yejua ika, moneki timochikauaskej maj tiksentokakan tikpatiuitakan netetayokolilmej tein Jiova techmaka. Amo xionomeyoloua tikonkauas tein yeski taman tein uelis kichiuas amo semi xikonpatiuitaok iTekiuajyo Dios. Xikonsentoka xikontayekanalti tanojnotsalis uan nochipa xikonpatiuita. Xikonsentoka xikontemo okachi tamachtilis itech Biblia. Ijkon, tikonsentilis ompa iluikak tein kipia ipatiuj kampa “tachtekke amo uelis kalakis” uan “amo no okuilmimalotos” (Luc. 12:33). w17.06 13 § 19, 20

Jiova amo se taixyekankej yoltakuauak. Nochin akin kinixyekana yolpakij uan amo kimachiliaj ke amo teyi kinkauaj maj kichiuakan (2 Cor. 3:17). David kinextij ika nejin tajtolmej: “Iixpan [Jiova] moajsij tanauatil uan ueyiyot; chikaualis uan yolpakilis moajsij kampa nemi” (1 Crón. 16:7, 27). Uan semej akin kijkuiloj salmos akin itokay Etán, kijtoj: “Yolpaki xolal akin kiixmati yolpakkatsajtsilis. Jiova, yejuan nentinemij itech tanex tein yetok moixko. Yolpaktokej itech motokay nochi tonal, uan itech momelaujkayo moueyitaliaj” (Sal. 89:15, 16). Ijkon kemej okachi titanemiliskej itech ikualtakayo Jiova, okachi tikneltokaskej ke amo akin okachi kuali taixyekana ke yejuatsin. Jiova kiixtalij keniuj techchijchiuas uan ijkon kichiuak, yejua ika kimati tein yekmelauj techualkuilis yolpakilis uan techmaka okachi ke tein techpoloua. Tein yeski tein technauatis kimati ke techualkuilis tein kuali, uan maski ouij techkisas, komo tiktakamatij nochipa tiyolpakiskej (Is. 48:17). w17.06 29 § 10, 11

Se tokniuj siuat kayot Inglaterra nochipa kinekik kinpias konemej uan amo uelik. Keman peuak xiuejya mochiua, semi tayokoyak, porin kiajsikamatik ke nejon tein kinekia amo mochiuaskia itech nejin tonalmej. Yejua ika yejua uan inamik kiselijkej kemej ininkoneuj se okichpil akin amo kipiaya itatuan. Maski ijkon, momachilij kemej se momachilia ijkuak momikilia aksa akin se kitasojtaya. Yejua kijtoj: “Nikmatia ke se kiselis se tekoneuj amo ijkon kemej keman se yejua se kipia se ikonetsin”. Melauak ke Biblia kijtoua ke siuat kitelpaleuia maj kinpia konemej (1 Tim. 2:15, TNM). Sayoj ke nejon amo kijtosneki ke komo kinpia kiselis nemilis nochipaya, ta kijtosneki ke siuat akin kipia ikoneuan uan miak tekit ichan kipaleuia maj amo tajtojtinemi uan maj amo mokalaki kampa amo itekiuj (1 Tim. 5:13). w17.06 5, 6 § 6-8

¿Kijtosnekia Elihú ke nenkaj timochikauaj tiktekitiliskej Dios? Amo. Elihú kijtosnekia ke Jiova amo kipoloua maj tikueyichiuakan, ta yejuatsin amo teyi kipoloua maj tikmakakan. Nion teyi tein tikchiuaskej kipaleuis maj kipia okachi taman oso maj kipia okachi chikaualis. Tein melauj, nochi kualneskayomej oso tein ueli tikchiuaj Dios techmakak, uan kiita keniuj tiktekitiltiaj. Jiova kiita keman tikintasojtaj itekitikauan. Kiita tein kuali tein ininka tikchiuaj kemej yeskia yejuatsin tikchiuiliskiaj. Proverbios 19:17 kijtoua: “Akin kinextilia kualtakayot akin kipanotok tatasojtilis kitaneujtia Jiova, uan yejuatsin kiixtauilis tein kichiua”. Nochipa keman tiknextiliaj kualtakayot aksa, Jiova kiita. Maski yejuatsin kichijchiuak nochi tein onkak, kiita kemej yeskia techtauikilia teisa uan techtaxtauia ika miak tatiochiualismej. IKonetsin Dios techmachtij ke nejin melauak (Luc. 14:13, 14). w17.04 28 § 3, 4

¿Toni techpaleuis maj kisentoka mochikaua netasojtalis tein tikpialiaj tamachtilis tein melauak? Moneki nochipa tiyaskej nechikolmej. Se taman tein Jiova okachi ika techmachtia yejua tamachtilis tein tikpiaj sejse semana ika amaix Tanejmachtijkej. Komo tiknekij maj techpaleui, yekinika moneki kuali timomachtiskej. Uelis tikixtajtoltiskej nochi tajkuilolmej itech Biblia tein ompa moajsij. Axkan, miakej tokniuan ueli kiixtajtoltiaj oso ijsiujka kitemouiaj nejin amaix itech jw.org uan no itech JW Library. Itech seki amaixmej tein moajsij itech tepos ueli niman se kiixtajtoltia tajkuilolmej tein moajsij itech Biblia. Tein yeski taman tein ika timomachtiskej nejin amaix, moneki tikixtajtoltiskej uan titanemiliskej ika nejmachkayot itech tajkuilolmej tein moajsij itech Biblia. Ijkon, okachi tiktasojtaskej tein Biblia tamachtia. w17.05 18 § 14

Keman timoauijkej, timotenkaujkej iuan Jiova ke nochipa tiktekitiliskej uan ke timochikauaskej tiktakamatiskej. Amo ueli timotajtolkepaj. Akin amo kinekiok kitekitilis Jiova uan nemis kemej se akin kichiua kemej Cristo amo ueli kijtoua ke amo keman yekmelauj motemaktij uan ke ineauilis amo kualtiak. Komo ueyi tajtakoua, moneki tanankilis iixpan Jiova uan nechikol. Se tonal, Jesús ininka tajtoj seki tokniuan akin amo kitasojtayajok Jiova kemej ijkuak peujkej kitekitiliaj. Tejuan amo tiknekij tiyeskij kemej yejuan, ta tiknekij maj Jesús techilui tajtolmej kemej nejin: “Kuali nikmatok nochi ten tejua tikchiutinemi. Uan no nikixmati keniu titetasojtatinemi uan keniu titakuautamatinemi nouantsin. Uan no nikmatok keniu timotekitiltijtinemi uan keniu tiyolikataxikojtiu ika tajyouilis. Uan no nikmati ke axkan kachi tikchiutok motekiu uan ke ne achtopa” (Apoc. 2:4, 19). Tiknekij tikyolpaktiskej Jiova keman tikchiuaskej ika yolpakilis tein timotenkaujkej iuan. w17.04 7 § 12, 13

“¿Tamelaujkej itech nochi taltikpak amo kichiuas tein melauak?” (Gén. 18:25.) Ika nejin netajtanil, Abrahán kinextij ke takuaujtamatia ke keman Jiova kintatsakuiltiskia akin nemiaj Sodoma uan Gomorra kichiuaskia kemej kinamiki uan amo mopoloskia. Senkis kimatia ke Jiova amo keman kiixpoloskia “akin yolmelauak iuan akin amo yolkuali”. Abrahán nion kinemiliaya maj Dios kichiuani nejon. Senkis kimatia ke Jiova amo keman mopoloua keman kinextia melaujkayot. Kemej itanauatiluan nochipa melaujkej, yejuatsin nochipa tamelaua ika melaujkayot. Biblia kijtoua ke yejuatsin “kitasojta melaujkayot uan tein melauak” (Sal. 33:5). w17.04 15 § 1, 2

Tetatmej, komo nankinekij maj nanmokoneuan nemikan nochipaya, motelneki xikinkauilikan se kuali neskayot. Komo kiitaj ke nankitayekanaltiaj iTekiuajyo Dios, kimatiskej ke uelis takuaujtamatiskej ke Jiova mojmostaj kinmakas tein kinpolos (Mat. 6:33, 34). Amo xiktemokan nankipiaskej miak taman, ta xiktayekanaltikan itekiyo Jiova uan amo ximotauikaltikan. No amo xiktemokan nankipiaskej miak tomin nion maj taltikpakneminij namechueyitalikan, ta ximochikauakan nankipiaskej itatiochiualis Jiova (Mar. 10:21, 22; Juan 12:43). Maski nankipiaskej miak tekit, xiktemokan nanyetoskej iniuan nanmokoneuan. Xikiniluikan ke semi namechyolpaktia maj kitayekanaltikan kitekitiliskej Jiova uan amo kitemoskej maj kintelixmatikan oso kitaniskej miak tomin tein ika kuali nemiskej yejuan oso namejuan. Miakej kinemiliaj ke konemej moneki tekitiskej uan ijkon inintatuan kipiaskej se kuali nemilis, sayoj ke nejon tanemilil amo kuali yetok. Xikelnamikikan ke “tetatme moneki kinechikojtiyaske tomin para ika kinixpanoltijtiyaske nikoneuan” (2 Cor. 12:14). w17.05 10 § 3, 4