Julio

Nesi ke Sebná taixyekanaya ichan Ezequías, tein kijtosneki ke kipiaya ueyi tanauatil (Is. 22:15). Sayoj ke, moueyinekik uan kinekik kichiuas maj oksekin kinemilianij ke katka ueyichiujkej (Is. 22:16-18). Kemej kitemouaya maj kiueyitalianij, Dios kikuilij tekit tein kipiaya uan kimakak Eliaquim (Is. 22:19-21). Nejin panok keman tekiuaj asirio Senaquerib kiixtalijtoya tateuitiuj Jerusalén. Satepan, Senaquerib kintitanik seki uejueyi chiuanimej uan tel miakej tateuianij porin kinekia kinmojmoujtis judíos uan kichiuas maj tekiuaj Ezequías motemaktiani (2 Rey. 18:17-25). Ezequías kintitanik Eliaquim uan okseki ome takamej maj kinnamikitij nejon asirios. Semej katka Sebná, akin axkan tekititoya kemej itajkuilojkauj tekiuaj. Nejin xa uelis kinextis ke Sebná amo motauelnekik nion motayokoltijtinemia, ta kiajsikamatik ke monekia yeski yolyemanik, porin ika pakilis kichiujtoya se tekit tein amo semi ueyi katka. w18.03 24, 25 § 7, 8, 10

Komo tikitaj ke tiktayekanaltiaj timotomintiskej oso timoyolpaktiskej, maj tiksentokakan tiktajtanikan Jiova iyektikatsin espíritu, uan yejuatsin techpaleuis maj itech titanemilikan tein okachi tayekantok (Luc. 11:13). Maj tikelnamikikan tein kipanok tatitanil Pedro. Yejua amo nochipa tanemilij kemej Cristo (Mat. 16:22, 23; Luc. 22:34, 54-62; Gál. 2:11-14). Sayoj ke amo mosenkauak. Ika inepaleuil Dios, yolik peuak tanemilia kemej Cristo. Uan tejuan no uelis tikchiuaskej. Tein melauj, satepan ika tajtoj seki kualneskayomej tein moneki tikpiaskej, kemej timotsakuiliskej uan titetasojtaskej (2 Ped. 1:5-8). Moneki timochikauaskej tikpiaskej nejin kualneskayomej tein techpaleuiskej maj kisentoka mochikaua tokuali uikalis iuan Jiova. Maj mojmostaj timotajtanikan: “¿Toni kualneskayot uelis nimochikauas niknextis axkan tein nechpaleuis maj okachi nitanemili kemej Jiova?”. w18.02 25, 26 § 12, 13

Job kuali kiajsikamatia itayolmajxitilis Dios. Kemej yekmelauj kiixmatia Jiova, kichiuak tein kuali. Kemej neskayot, kimatia ke amo uelia kijtouaya ke kitasojtaya Dios komo kinchiuiliaya oksekin tein amo kuali (Job 6:14). Amo kinemiliaya ke katka okachi ueyichiujkej ke oksekin, yeskiaj tominpianij oso amo, ta kinitaya kemej yeskiaj ichankauan. Yejua kijtoj: “¿Xe Akin nechchijchiuak itech iijtik nomomaj amo no kinchijchiuak yejuan?” (Job 31:13-22). Maski Job tominpiaya uan kipiaya tanauatil, amo moueyinekik nion kinemilij ke okachi ueyichiujkej katka. Tein kichiuak semi taman ke tein kichiuaj miakej tominpianij uan akin kipiaj tanauatil axkan. Job amo kikauak maj nion teyi, nion tomin nion okseki taman, okachi tayekantoni ke Jiova. Kimatia ke komo kikauaya maj pano nejon, kiixtopeuaskia “Dios akin melauak” (Job 31:24-28). Uan no, kiitaya nemilis kemej namikuanij kemej se taman tein Dios kiixtalij iuan se takat uan se siuat. Hasta motenkauak ke amo kiitaskia nion se siuat kemej kinextiskia ke kinekia iuan motekas (Job 31:1). w18.02 11 § 16; 12 § 18, 19

Noé amo sayoj mochikauak yeski yolkuali, ta ika yolchikaualis kinmatiltij oksekin ke takuaujtamatia iuan Jiova. Biblia kijtoua ke “tanojnotstinemia ika ten melauak” (2 Ped. 2:5). Tatitanil Pablo kijkuiloj: “Noé takuautamatik iuan Dios [...]. Ika ya nojon Noé kinmatiltij in taltikpakuani ke yejuan tajtakolejke uan tatelchiualme” (Heb. 11:7). Tikmatij ke taltikpakneminij kikejkelouayaj, kiixnamikiaj uan xa hasta kinekiaj kixokoliskej. Sayoj ke amo kinmouilij (Prov. 29:25). Kipiak yolchikaualis tein Jiova kinmaka itekitikauan akin amo kikauaj. Satepan ke kitakamatik panoua quinientos xiujmej, Jiova kinauatij maj kichijchiua se arca kampa momakixtiskiaj taltikpakneminij uan tapialmej (Gén. 5:32; 6:14). Noé xa kiitak ke tel ouij yeskia. Uan no, xa kimatia ke okachiok kikejkeloskiaj uan kiixnamikiskiaj. Sayoj ke takuaujtamatik uan tatakamatik. “Senkis ijkon kichiuak” kemej Jiova kinauatij (Gén. 6:22). w18.02 4 § 4, 6, 7

Titapaleuiaj maj amo tixexeliujtokan komo titetasojtaj kemej Jiova (1 Juan 4:8). Maj amo keman tikijtokan seki taman kemej nejin: “Nikmati ke moneki nikinxikos tokniuan, sayoj ke amo moneki iniuan nimouikas”. Komo ijkon titanemiliaj amo tikchiujtoskej tein Pablo tayolmajxitij: “Ika por ne tetasojtalis [...], ximoxikouilijtiyakan ne yolxokolilis ten namechiuiliaj oksekin” (Efes. 4:2). Pablo amo sayoj kijtoj ke moneki ‘timoxikouilijtiyaskej yolxokolilis’, ta ke moneki tikchiuaskej ika “tetasojtalis”, tein amo sayoj se taman kijtosneki. Jiova kichiuak maj itech nechikol moajsinij tataman taltikpakneminij (Juan 6:44). Yejua ika yejuatsin kiita miak taman tein kichiua maj kintasojta. Komo ijkon, ¿keniuj ueliskia tikijtoskej ke se tokniuj amo kinamiki maj tiktasojtakan? Maj nochin tikintasojtakan kemej Jiova kineki (1 Juan 4:20, 21). w18.01 16 § 14

Seki tetatmej kinemiliaj ke achto ke moauis ininkonetsin, okachi kuali maj kiseli se ueyi nemachtil uan maj kipia se kuali tekit. Xa kinekij maj kuali moajsi satepan. Sayoj ke ¿ijkon kipaleuiaj maj yekmelauj yolpaki? ¿Yejua nejon tein tamachtia Biblia? Motelneki tikelnamikiskej ke nejin taltikpak uan nochi tein nikan moajsi kiixnamiki tein Jiova kineki uan kemej tanemilia (Sant. 4:7, 8; 1 Juan 2:15-17; 5:19). ¿Toni okachi kipaleuis konetsin maj kiixnamiki Satanás, nochi tein kiixyekana uan kemej tanemiliaj akin kinixyekana? Komo kuali mouika iuan Dios. Komo tetatmej kitayekanaltiaj motomintiskej, ininkonetsin xa kinemilis ke tein onkak itech nejin taltikpak okachi tayekantok ke ikuali uikalis iuan Jiova. Tein melauj, nion se tokniuj tetat kineki maj tein onkak itech nejin taltikpak kinextili ikonetsin tein uelis kiyolpaktis. Sayoj uelis yekmelauj tiyolpakiskej komo tiktayekanaltiaj Jiova (Sal. 1:2, 3). w18.03 10 § 10, 11

Miakej kiitanij ke komo amo kipiaj miak taman amo sayoj okachi yolpakij, ta no ueli okachi kitekitiliaj Jiova. Se tokniuj takat akin monotsa Jack kipiaya se ueyi kali uan se tanamakaloyan, sayoj ke kinnamakak porin kinekia tekitis kemej precursor iuan inamik. Yejua kijtoua: “Miak xiujmej, nimokepaya kalijtik uan amo kuali nimomachiliaya porin nikpanouaya kuejmolmej itech tekit. Sayoj ke, nonamik, akin precursora, nochipa tel yolpakia. Yejua kijtouaya: ‘Nikpia okachi kuali teko akin uelis moajsis’. Axkan ke no niprecursor, tiomen sayoj se tiktekitiliaj, Jiova”. ¿Toni techpaleuis maj tikmatikan keniuj yekmelauj tikitaj tomin? Moneki timotajtaniskej nejin uan titanankiliskej kemej yekmelauj titanemiliaj: “¿Niknextia ke yekmelauj nikneltoka tein Biblia kijtoua ika tomin? ¿Okachi niktayekanaltia niktanis tomin? ¿Okachi ika nimotekipachoua tomin uan okseki taman ke kuali nimouikas iuan Jiova uan oksekin? ¿Yekmelauj nitakuaujtamati ke Jiova nechmakas tein nechpoloua?”. Uelis tikyekmatiskej ke Dios amo keman kinkauas akin iuan takuaujtamatij. w18.01 25 § 12, 13

Telpoch, tikchiuas tein mitspaleuis ximakisa se taman tein amo auil. Yejua ika, moneki tikixtajtoltis Biblia uan itech titanemilis, tiktataujtis Dios uan titanemilis itech tatiochiualismej tein mitsmakani. Nejin mitspaleuis okachi xikneltoka ke Jiova motasojikniuj. Uan nejon mitsolinis ika xitajto tein tikneltoka (Sal. 73:28). Jesús kijtoj: “Takan aksa kineki nechtoktilijtiyas, ijkuakon ma kikauteua ne tanejnekilis de yejua san, uan ma [...] nechtoktilijtiu” (Mat. 16:24). Senkis moajsikamati ke komo se kineki se kitojtokas Jesús, moneki se motemaktis iuan Jiova uan se moauis. Nejin kichiua maj tikselikan miak tatiochiualismej axkan uan nemilis nochipaya itech yankuik taltikpak. Yejua ika, maj tiksentokakan tikchiujtokan tein techpaleuis maj timakisakan. w17.12 27 § 18, 19

Keman tetatmej amo yolijsiuij, konemej yolik kiajsikamattiyouij “keniu moueyisoutok [...,] keniu moueyiltijtok uan de keniu uejkatan ajsis uan de keniu uejkapan ajsis” takuaujtamatilis (Efes. 3:18). Moneki kinmachtiskej ijkon kemej xiujmej tein kipiaskej uan tein uelis kiajsikamatiskej. Komo konemej senkis kineltokaj tein momachtiaj, okachi uelis kinmelauiliskej akin iniuan momachtiaj uan oksekin tein kineltokaj (1 Ped. 3:15). Kemej neskayot, ¿ueli kimelauaj ika Biblia tein panoua keman timomikiliaj? ¿Kiitaj ke taixejekol? Moita ke motelneki amo se yolijsiuis keman se kinmachtis, uan amo nenkaj yeski (Deut. 6:6, 7). Sayoj ke, komo tetatmej kinekij maj ininkoneuan kineltokakan ke melauak tein momachtiaj, no motelneki maj kinkauilikan se kuali neskayot. Stephanie, akin kipia eyi siuapipil, kijtoua: “Nimotajtaniani: ‘¿Nikinmelauilia keyej nejua nikneltoka ke Jiova nemi uan ke kichiua tein melauak uan tetasojta?’. Amo ueli nikchia maj yejuan kineltokakan komo nejua amo nikneltoka”. w17.12 20 § 8-10

¿Keyej Marta kiyekmatia ke iikniuj moajokuiskia? Porin keman siuapilok katka, xa ichan oso itech sinagoga kitekakilijka ke achto mochiujkaj nejon uejueyi tachiualismej. Xa tikinelnamikij eyin akin Biblia kijtoua ke moajokkej. Yekinika neajokuilis kichiuak tanauatijkej Elías. Jiova kimakak chikaualis tein ika kichiuak uejueyi tachiualismej. Itech xolal Sarepta tein pouia Fenicia uan moajsia atenoj, se siuatsin akin amo nemiaok inamik uan kipanotoya tatasojtilis, kitakachiuak tanauatijkej. Ompa Dios kichiuak maj nochipa kipiani aceite uan harina, yejua ika siuatsin uan iokichpiltsin uelik ixpanokej (1 Rey. 17:8-16). Satepan, okichpiltsin kokolispeuak uan momikilij. Sayoj ke Elías kitataujtij Jiova: “NoDios, ika kualtakayot, xikchiua maj inemilis nejin konetsin oksepa itech mokepa”. Jiova kikakik Elías uan kichiuak maj okichpiltsin oksepa nemini (1 Rey. 17:17-24). Tikyekmatij ke Marta kiixmatia nejin ueyi tachiualis. w17.12 3 § 1; 4 § 3, 5, 6

Miakej techyolmajxitiaj maj tikuikan totiempo uan tochikaualis itech se ueyi nemachtil. Xa techiluiskej ke sayoj ijkon tikpiaskej se kuali nemilis, tiyeskij tiueyichiuanimej uan timotomintiskej. Yejua nejon tein kiixtalijtokej kipiaskej miakej, yejua ika seki tokniuan no uelis peuas ijkon tanemiliskej. ¿Yekmelauj teualkuilia yolpakilis se kipias se ueyi nemachtil tein kichiua maj se ueyichiujkej uan maj miakej teixmatikan? Amo. Maj tikelnamikikan ke Satanás kitelnekia kinyekanas oksekin uan maj kimoujkaitanij. Sayoj ke, maski uelis se kijtos ke kiselij tein kinekia, amo yolpaki, ta kualantok (Mat. 4:8, 9; Apoc. 12:12). Yekmelauj tiyolpakij keman tikinpaleuiaj oksekin maj kiixmatikan Dios uan tein motenkaujtok kichiuas. Nion se ueyi nemachtil uelis teualkuilis yekmelauj yolpakilis, porin nejin kichiua maj taltikpakneminij motatanikan, monexikoluikan uan maj kinekikan kipiaskej okachi taman ke oksekin. Sayoj ke, nochi nejon sayoj nenkaj, kemej yeskia se kinekiskia se kikitskis ejekat (Ecl. 4:4). w17.11 23 § 11-13

Itech itonaluan Jesús, kisentokayaj kiueyichiuayaj Dios ika tatsotson. Satepan ke Jesús kipeualtij iTakualis toTekotsin, itech tonal tein okachi moneki, mokuikatij iniuan imomachtijkauan. Tokniuan itech yekinika siglo techkauilijkej se kuali neskayot porin kisenueyichiuayaj Dios ika nekuikatilmej. Maski mosentiliayaj itech kaltsitsin, amo kichiuak maj amo mokuikatianij ika yolpakilis. Dios kichiuak maj tatitanil Pablo kiniluiani tokniuan: “Ximomachtijtiyakan se uan okse uan no ximoyolmajxitijtiyakan se uan okse ika [...] salmos uan ka himnos uan ka ne cantos [...]. Uan ma tiktasojkamachilijtiyakan Totajtsin Dios” (Col. 3:16). Ijkon moneki timokuikatiskej nekuikatilmej tein ika tikueyichiuaj Dios. Amatajkuilol tein ika timokuikatiaj no poui itech tamachtilis tein techmaka takeual takuaujtamach uan tamatkej (Mat. 24:45). w17.11 4 § 7, 8

Jiova kichiuak maj israelitas amo ouij kinkisani ajsiskej itech semej chikuasen xolalmej kampa mopaleuiskiaj. Tanauatij maj moajsinij eyi xolalmej inajnakastan ueyiat Jordán. Ijkon, temiktijkej ueliskia niman ajsis itech semej nejon xolalmej (Núm. 35:12-14). Israelitas monekia tachipauaskej itech ojmej tein teajxitiayaj ompa (Deut. 19:3). Seki amatajkuilolmej tein ininka tajtouaj judíos kijtouaj ke kitaliayaj tajkuilolmej tein kinextiayaj kanikauin monekia yas temiktijkej. Kemej moajsiaj nejon xolalmej, temiktianij amo monekia choloskej itech okse altepet, kampa ueliskia peuaskej kinueyichiuaskej tiotsitsin. Maj tiknemilikan nejin: Jiova tanauatij maj kinmiktianij temiktianij, sayoj ke akin temiktiayaj maski amo ijkon kiixtalijkaj ueliskiaj kinnextiliskej teiknelilis uan kiseliskej nepaleuil. Se takat akin motelmachtia tein moijtoua itech Biblia kijkuiloj ke nochi moixtalijka kemej amo ouij kinkisaskia ajsiskej. Jiova amo se tamelaujkej akin teikamauiltia akin kitemoua kintatsakuiltis itekitikauan, ta yejuatsin semi teiknelia (Efes. 2:4). w17.11 14 § 4, 5

Se amatajkuilol tein patani, se siuat akin tsaktok itech se chikiuit uan ome siuamej akin kipiaj ininajtapal kemej iajtapaluan se cigüeña moajsij ejekaixko. Nejin tikajsij itech amatajkuilol tein kijkuiloj tanauatijkej Zacarías (Zac. 5: 1, 7-9). ¿Keyej Jiova kiitaltij itanauatijkauj nejin tein se kimoujkaita? Chikuasentika uan chikometika taman tein kiitak Zacarías senkis kinnejmachtia akin kichiuaj tein amo kuali. Uan no, techelnamiktiaj ke Jiova amo kikauas maj kisentoka mochiua tein amo kuali. Tiitekitikauan moneki tiktauelitaskej tein amo kuali. Ika tein Zacarías kiitak, Jiova techyekmatiltia ke komo timochikauaj tikyolpaktiskej, amo kijtos maj techpano tein amo kuali, ta techmatampauis uan techtatiochiuis. Uan tikyekmatij ke techpaleuis maj tiuelikan timoajsikan tichipaujkej itech nejin taltikpak kampa mochiua tein amo kuali. w17.10 21 § 1; 25 § 19

Axkan tokniuan siuamej akin ininselti uelis okachi kitekitiliskej Jiova. Uelis kichiuaskej tekit kemej precursor, tapaleuitiuij kampa monekij okachi tanojnotsanij, tapaleuiskej Kampa Moixtalia uan Moixyekana Kalchiualis, uan kititaniskej amat kampa tajtanij kiseliskej Tamachtilis tein kiseliaj akin kiteixmatiltiaj iTekiuajyo Dios. Sekin hasta uelis kiseliskej tamachtilis tein motemaka Galaad. Maski tokniuan siuamej akin xiuejkejya amo ueliok kichiuaj miak nejon tekimej, tiktasojkamatij maj touan yetokan itech nechikol. Uan no, uelisok kinextiskej yolchikaualis uan tapaleuiskej. Kemej neskayot, komo tayekananij kiniluiaj maj iuan tajtokan se tokniuj ichpoch uan maj kimelauilikan keyej motelneki maj kuali motilmajti, yejuan monekis moyolchikauaskej uan ijkon uelis iuan tajtoskej. Melauak ke amo kiajuaskej, ta kitemoskej maj kinemili keniuj kemej motilmajtia uelis kinijtakos oksekin (1 Tim. 2:9, 10). Semi tapaleuia keman tokniuan siuamej akin xiuejkejya ijkon kinextiaj netasojtalis. w17.09 31, 32 § 17, 18

Kemansa, miakej taixyekananij kitemouanij kitsakuiliskej maj taltikpakneminij kipiakan uan kiixtajtoltikan Biblia. Sayoj ke, akin kitasojtaj Dios mochikauanij kichiuaskej maj nochin kipiakan Biblia. Semej yejua John Wyclef, akin nemik Inglaterra kemej seiscientos xiujmej achtoya. Yejua kinemiliaya ke nochin monekia ueliskej kiixtajtoltiskej iTajtol Dios. Sayoj ke itech nejon tonalmej, miakej akin nemiaj ompa Inglaterra amo ueliaj kipiayaj se Biblia. Itech xiuit 1382, kisak se Biblia itech tajtol inglés tein kitajtolkepkej John Wyclef uan oksekin. Itatojtokakauan Wyclef, akin kinixmatiaj kemej lolardos, kitelpatiuitayaj Biblia. Ojtokakej itech miak xolalmej ompa Inglaterra uan kinixtajtoltiliayaj Biblia taltikpakneminij uan kinkauiliayaj seki tajkuilolmej itech amamej tein kimaijkuilojkaj. Miak xiujmej satepan, sekin akin nemiaj Europa uan itech okseki altepemej peuak kitajtolkepaj uan kiamakixtiaj Biblia itech tajtolmej tein miakej ueliskia kiajsikamatiskej. w17.09 20, 21 § 10-12

Seki siuamej moteltayokoltiaj porin amo uelij mokokoxkataliaj (Prov. 13:12). Ne uejkauj, moitaya ke siuamej motelnekia kinpiaskej konemej. Yejua ika inamik Jacob, Raquel, semi tayokoyak keman kiitak ke iikniuj kinpiaya konemej uan yejua amo (Gén. 30:1, 2). Itech ouijkayomej tein uelis kipiaskej namikuanij, moajsi keman momikilia se inamik. Akin kijyouia nejin xa amo keman kinemilij ke ueliskia kipanos itech nejin tonalmej. Akin kichiuaj kemej Cristo senkis kineltokaj ke moajokuiskej mikemej, uan nejon semi kinyolseuia (Juan 5:28, 29). ToTajtsin kinyolseuia uan kinpaleuia ika iTajtol akin kipanotokej ouijkayomej. w17.06 4 § 1; 5 § 6; 6 § 9

Se tonal, Dios moteixmatiltij iuan Moisés keman kiluij itokay uan seki ikualneskayouan. Jiova ueliskia okachi kinextis ke tamatkej oso ke tel chikauak, sayoj ke yekinika kijtoj ke teiknelijkej uan teyoliknelijkej (Éx. 34:5-7). Yejuatsin kimatia ke Moisés kinekia kiyekmatis ox kipaleuiskia, uan yejua ika okachi kinextij ikualneskayouan tein kinextiaj ke yejuatsin kineki kinpaleuis itekitikauan (Éx. 33:13). Maski techchijchiuak maj titeyoliknelikan, miakpa sayoj totech titanemiliaj porin titajtakouanij. Kemansa, uelis yeski ouij tikixejekoskej ox tikpaleuiskej aksa oso sayoj totech titanemiliskej. ¿Toni techpaleuis maj okachi titeyoliknelikan? Yekinika, maj tikitakan keniuj Jiova uan seki taltikpakneminij teyoliknelianij. Ompa, maj tikitakan keniuj uelis tikchiuaskej kemej Jiova uan keniuj techpaleuis komo ijkon tikchiuaj. w17.09 8 § 1; 9 § 3

Timotaliliaj “yankuik talnamikilis” porin tiknekij tikueyitaliskej Jiova, amo porin tiktemouaj maj techueyitalikan. Maj tikelnamikikan ke se ángel akin amo tajtakolej katka, tajtakoj porin peuak moueyineki (no xikonita Ezequiel 28:17). Kemej titajtakouanij, okachi ouij techkisa amo timoueyinekiskej. Maski ijkon, uelis tiknextiskej yolyemanilis. ¿Keniuj? Moneki mojmostaj tikixtajtoltiskej Biblia uan itech titanemiliskej (Deut. 17:18-20). Techtelpaleuis komo titanemiliaj itech itamachtilisuan Jesús uan itech ueyi yolyemanilis tein kinextij (Mat. 20:28). Yejua hasta kinmetspajpakak itatitaniluan (Juan 13:12-17). No moneki nochipa tiktajtaniskej Dios maj techmaka iespíritu tein techpaleuis maj amo tiknekikanok timomachiliskej okachi tiueyichiuanimej (Gál. 6:3, 4). w17.08 25 § 11, 12

Xa se tonal tiktajtanijkej Dios maj techpaleui keman monekia tikixpejpenaskej teisa uan tiknemiliayaj ke tikaujtoyaj maj yektikatsin espíritu techyekana. Sayoj ke xa amo mochiuak tein tikchiayaj. Xa tikpanokej ouijkayomej oso panok seki taman tein kichiuak maj senkis mopatani tonemilis (Ecl. 9:11). ¿Toni uelis techpaleuis maj amo timotekipachokan uan maj tikpiakan yolseuilis tein Dios temaka? Tein Pablo kiniluij tokniuan akin nemiaj Filipos techmachtia ke techyolseuis netataujtil. Yejua ika maj tikchiuakan netataujtil nochipa keman timotekipachojtoskej (1 Ped. 5:6, 7). Uan keman tiktataujtiskej Jiova, maj tiknextikan ke senkis titakuaujtamatij ke toka motekipachoua. No maj tiktasojkamatilikan tatiochiualismej tein techmaka. Uan maj amo keman tikelkauakan ke yejuatsin “kipixtinemi ne chikaukauelilis para ika kichiuas [...] kachi ok ne ten tejuan ayamo tiknemiliaj tikontajtaniliske” (Efes. 3:20). w17.08 9 § 4, 6; 10 § 10

Miakej tokniuan mochiujkej precursores keman telpochmejok katkaj, uan nejin kinyolpaktij. Telpoch, ¿uelis tiktapouis semej tein tikixtalia tikchiuas? Nejin tokniuan mitsiluiskej ke keman tiktekitilis Dios miak tonalmej timomachtis miak taman tein mitspaleuis nochi monemilis. Jesús momachtij miak taman keman yetoya iuan iTajtsin ne iluikak uan kisentokak keman tanojnotsak nikan taltikpak. Kiyolpaktij kinixmatiltis oksekin kuali tanauatilmej uan amo kikauas Dios keman kipanok ouijkayomej (Is. 50:4; Heb. 5:8; 12:2). Jesús kijtoj ke tiitatojtokakauan moneki tiyaskej uan tikinmachtiskej oksekin maj no kiueyichiuakan Dios (Mat. 28:19, 20). Komo tikixtalia tikchiuas nejin nochi monemilis, tiyolpakis uan tikueyitalis Dios. Ijkon kemej okseki taman tekit, amo ijsiujka tiuelis. w17.07 23 § 6, 7

ToTajtsin Jiova, akin semi teiknelia, yejua akin okachi techyolseuia (2 Cor. 1:3, 4). Akin tayokoxtokej porin momikilij aksa akin kitasojtayaj no uelis kiajsiskej yolseuilis itech nechikol (1 Tes. 5:11). ¿Keniuj uelis tikyolchikauaskej uan tikyolseuiskej akin “moyolkokojtok”? (Prov. 17:22.) Maj tikelnamikikan ke moajsi “tonal keman amo teyi se kijtos uan tonal keman se tajtos” (Ecl. 3:7). Dalene, se tokniuj siuat akin momikilij inamik, kijtoua: “Akin tayokoxtokej moneki kijtoskej tein kinemiliaj uan tein kimachiliaj. Yejua ika, okachi uelis tikinpaleuiskej komo tikinkakij uan amo tikintajtolkotonaj”. Junia, akin iikniuj takat momiktij, kijtoua: “Maski xa amo ueli senkis tikajsikamatij keniuj momachilia aksa keman momikilia se akin kitasojtaya, tein okachi moneki yejua ke tiknekij tikajsikamatiskej”. No moneki tikelnamikiskej ke tataman tein sejse taltikpaknenkej kimachilia uan kemej kinextia itayokol. w17.07 13 § 3; 14 § 11-13

Miakej kiitaj ke okachi tayekantok tomin. Yejua ika, okachi kitemouaj motomintiskej oso amo kipoloskej tein kipiajya. Oksekin kiitaj ke okachi tayekantok ininchankauan, kuali moajsiskej oso tein kiixtalijtokej kiajsiskej. Sayoj ke moajsi se taman tein okachi tayekantok uan tein moneki amo keman tikelkauaskej: iueyitaixyekanalis Jiova. Komo amo timoyekpiaj, uelis techtapololtis tein tikchiuaj mojmostaj oso semi ika timotekipachoskej tokuejmoluan uan tikelkauaskej ke iueyitaixyekanalis Jiova motelneki. Sayoj ke, komo tikpaleuiaj, okachi uelis tikixnamikiskej kuejmolmej tein tikpiaskej uan okachi kuali iuan timouikaskej. w17.06 22 § 1, 2

Jiova taixyekana ika netasojtalis. Yejua ika, akin taixyekanaj kalijtik uan tayekananij akin kitasojtaj iueyitaixyekanalis Dios moneki amo tel tanajnauatiskej. Okachi kuali, moneki kichiuaskej kemej Jiova. Pablo kichiuak kemej Dios uan iKonetsin. Amo kinpinaujtij nion kinchikaujkauij oksekin maj kichiuanij tein kuali, ta ika netasojtalis kitemoj maj kinemilianij tein monekia kichiuaskej (Rom. 12:1; Efes. 4:1; Filem. 8-10). Jiova ijkon kichiua. Uan ijkon moneki kichiuaskej akin kitasojtaj uan kipaleuiaj itaixyekanalis. ¿Keniuj no tikpaleuiaj itaixyekanalis? Keman tikinpoujkaitaj uan tikinpaleuiaj akin yejuatsin kinmakatok tanauatil, hasta keman amo tikyekajsikamatiskej tein moixpejpenak oso amo senkis techyolpaktia. Nejin tanemilil amo kinextiaj akin Satanás kinixyekana, sayoj ke ijkon moneki mochiuas itech itaixyekanalis Jiova (Efes. 5:22, 23; 6:1-3; Heb. 13:17). w17.06 30 § 14, 15

Tokniuan akin yolkuetauij, akin tayokoyaj oso kipiaj okse kuejmol moneki maj tikinpaleuikan, maj tikinyolchikauakan uan maj tikinyolseuikan (Prov. 12:25; Col. 4:11). Ika tein tikijtouaj uan tein tikchiuaj tiknextiaj ke tikintasojtaj (Gál. 6:10). Biblia kijtoj ke itech itamian tonalmej miakej sayoj inintech tanemiliskiaj uan kitelnekiskiaj kipiaskej miak taman (2 Tim. 3:1, 2). Tiitekitikauan Dios moneki timochikauaskej okachi tiktasojtaskej Jiova uan iTajtol, uan timotasojtaskej se uan okse. Kemej titajtakouanij, kemansa xa tikpiaskej se kuejmol iniuan tokniuan. Sayoj ke netasojtalis tein timopialiaj techolinis maj niman tikyektalikan ika yolseuilis (Efes. 4:32; Col. 3:14). Yejua ika, maj ika nochi toyolo tiksentokakan tiktasojtakan Jiova, iTajtol uan tokniuan. w17.05 20 § 17, 18

Tiitekitikauan Dios tikmatij ke akin amo kiixmatij yejuatsin uelis toka mauiltiskej. Sayoj ke uelis yeski se ueyi ouijkayot komo tiknemiliaj ke itech nechikol techchiuilijkej oso kichiuilijkej se tokniuj tein amo kuali. Komo techpanoua se taman kemej nejon, ¿tikauaskej maj nejin kichiua maj amo tiktekitilikanok Jiova? Tinochin titajtakolejkej uan timopolouaj. Yejua ika xa se tokniuj uelis techchiuilis tein amo kuali oso tejuan tikchiuiliskej tein amo kuali se tokniuj. Nejin amo semi panoua. Sayoj ke keman mochiua, akin tikixtalijtokej amo tikauaskej Dios amo tikmoujkaitaj nion timosenkauaj. Jiova tel kuali techyolmajxitia itech Biblia tein techpaleuia maj amo tikauakan yejuatsin komo se tokniuj techchiuilia tein amo kuali (Sal. 55:12-14). w17.04 16 § 4, 5

Komo tonamik amo itaixpantijkauj Jiova, xa tikpiaskej okachi kuejmolmej iuan. Maski ijkon, amo uelis tikauaskej sayoj porin amo kitekitilia Dios (1 Cor. 7:12-16). Tokniuj siuat moneki kipoujkaitas itakauj kemej itaixyekankauj maski amo kinpaleuia maj kuali mouikakan iuan Jiova. Uan tokniuj takat moneki kitasojtas inamik uan kiyekpias maski amo kitekitilia Jiova (Efes. 5:22, 23, 28, 29). ¿Uan toni uelis tikchiuaskej komo tonamik kiixtalia seki taman itech totaueyichiualis? Kemej neskayot, itakauj se tokniuj siuat kiluij maj sayoj tanojnotsati seki tonalmej itech semana. Komo tikpanoskiaj se taman kemej nejon, maj timotajtanikan: “¿Nechiluijtok nonamik maj amo nikueyichiuaok Jiova? Komo amo, ¿uelis nikchiuas tein nechiluia?”. Komo timotemakaj tikpataskej tein uelis, techpaleuis maj amo tikpiakan miak kuejmolmej (Filip. 4:5). w17.10 13 § 7, 8

Kemej itech Biblia achtook moijtojka, taltikpakneminij “itech nochi tataman tajtolmej tein tajtouaj itech altepemej” motokijtokej itech inechikol Jiova (Zac. 8:23). Tetatmej, komo nanmokoneuan amo kiyekajsikamatij nanmotajtol, ouij namechkisas nankinmachtiskej tein melauak. Yejuan akin okachi moneki nankinmachtiskej ika Biblia, uan sayoj uelis kipiaskej nemilis nochipaya komo kiixmatij Jiova (Juan 17:3). Yejua ika moneki nochipa ika nankinnojnotsaskej tein Jiova tamachtia (Deut. 6:6, 7). Nanmokoneuan xa ueliskej tajtol tein mokui itech altepet kampa nanmokaltalitoj keman yetoskej kaltamachtiloyan oso iniuan oksekin. Sayoj ke ueliskej nanmotajtol sayoj komo namejuan nanmomattokej iniuan nantajtoskej. Komo uelij nanmotajtol, okachi amo ouij kinkisas namechtapouiskej keniuj momachiliaj. Sayoj ke no, komo uelij ome tajtolmej kinpaleuis maj okachi kuali tanemilikan uan maj kiajsikamatikan keniuj tanemiliaj okseki taltikpakneminij. w17.05 10 § 5, 6

Itateuijkauan Jabín kipiayaj 900 carros tein kipiayaj seki teposmej tein tetekiaj. Sayoj ke israelitas amo kipiayaj teposmej tein ika tateuiskiaj nion tein motaliliskiaj keman tateuiskiaj (Juec. 4:1-3, 13; 5:6-8). Sayoj ke Jiova kinauatij Barac tein moajsi itech tajkuilol tein axkan tikitaj. Barac uan 10,000 takamej yajkej kinteuitoj akin kinixnamikiaj itech se tal tein motokaytiaya Taanac (Juec. 4:14-16). ¿Kinpaleuij Jiova israelitas? Kemaj. Niman peuak kioui chikauak uan kampa moteuijtoyaj motasokitalij. Barac kintotokak itateuijkauan Sísara 24 kilómetros hasta se tal tein motokaytiaya Haróset. Ompakauin, icarro Sísara mosokitokak. Yejua ika Sísara temok uan tsikuintiyajki hasta Zaananim. Ompa, motatij itech itakenkal se siuat akin motokaytiaya Jael. Kemej tel sioujtoya, niman kochik. Keman kochtoya, Jael moyolchikauak uan kimiktij (Juec. 4:17-21). Jiova kinpaleuijka israelitas maj tataninij. w17.04 29 § 6-8

¿Moajsis se nechikol itech taltikpak satepan ke panos Armagedón? Biblia kijtoua: “Dios kichijchiuas se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis ijkon kemej yejuatsin motenkauak” (2 Ped. 3:13). Iluikak tein achto moajsia kinixnextia tekiuajyomej tein takajkayauaj. Uan taltikpak tein achto moajsia kinixnextia taltikpakneminij akin kinixyekanaj. ¿Toni kinixpatas? “Se yankuik eluiyak uan ne yankuik taltikpak.” Yankuik iluikak kiixnextia se yankuik tekiuajyot. Nejin yejua iTekiuajyo Dios, kampa pouij Jesucristo uan 144,000 tekiuanij akin iuan taixyekanaskej. Yankuik taltikpak kinixnextia taltikpakneminij akin kinixyekanas iTekiuajyo Dios. Jesús uan akin iuan tekiuajtiskej senkis kinextiskej ikualneskayouan Jiova, akin kiuelita maj nochi kuali tayekyeto (1 Cor. 14:33). Yejua ika kuali ixyetos keniuj moajsis “yankuik taltikpak”. Takamej akin taixyekanaskej itech Xochital yeskij yolkualmej uan kitojtokaskej itaixyekanalis Jesús uan 144,000 (Sal. 45:16). Maj tiknemilikan keniuj yeski nemilis keman taltikpaknechikolmej kampa takajkayauaj kinixpatas sayoj se nechikol kampa amo xexeliujtoskej uan kampa amo keman takajkayauaskej. w17.04 12 § 8, 9

Jiova kiixtalij nemilis kemej namikuanij. Keman takat uan siuat kijtouaj ininnetenkaualis, motenkauaj iixpan Jiova uan ininixpan akin ompa moajsij. Miakpa, motenkauaj motasojtaskej, moyekpiaskej uan mopoujkaitaskej keman omen sennemiskej nikan taltikpak, kemej Dios kiixtalij maj nemikan namikuanij. Sekin akin amo itaixpantijkauan Jiova xa kijtoskej ika okseki tajtolmej, sayoj ke komo motenkauaj nochipa senyetoskej, kichiuaj se netenkaualis iixpan Dios. Keman takat uan siuat kijtouaj ininnetenkaualis, mochiuaj namikuanij, uan moneki sennemiskej nochipaya (1 Cor. 7:39). Jesús kijtoj: “Tagat uan siuat ten Dios kinsentilij namikuani ya, yejuan nojonkes ma amo se tagat kinxelos”. Akin kiixtalijtokej monamiktiskej moneki amo kinemiliskej ke uelis kitsayanaskej amat ininixpan tekiuanij komo amo kuali mouikaj (Mar. 10:9). Amo moajsinij namikuanij akin amo kipiaj kuejmolmej, porin nochin tajtakolejkej. Yejua ika Biblia kijtoua ke kemansa “kipiaske ouijkayot” (1 Cor. 7:28). w17.04 7, 8 § 14, 15