Octubre

Tamatilis ualeua imako Jiova, uan yejuatsin kiuelita kitemakas. Se taman tein techpaleuis maj timochiuakan titamatinij yejua komo timokauaj maj techmelaua. Tamatilis techpaleuia maj amo tikchiuakan tein amo kuali uan maj tikchikauakan tokuali uikalis iuan (Prov. 2:10-12). Ijkon, uelis tikchiaskej tinemiskej nochipaya (Jud. 21). Kemansa ouij techkisa timokauaskej maj techmelauakan oso tikitaskej ke techpaleuia, porin titajtakouanij oso taman kemej techiskaltijkej. Sayoj ke, keman tikitaj ke techpaleuia, okachi tikpatiuitaj uan tikajsikamatij ke kinextia ke Dios techtasojta. Proverbios 3:11, 12 techiluia: “Nokonetsin, amo xikixtopeua itamelaualis Jiova, [...] porin Jiova kinmelaua akin kintasojta”. Maj amo tikelkauakan ke yejuatsin kineki maj kuali timoajsikan (Heb. 12:5-11). Kemej kuali techixmati, nochipa techmelaua kemej kinamiki. w18.03 28 §1, 2

Tatitanil Pedro kinijkuilouilij tokniuan akin katkaj kayomej itech tataman xolalmej tajkuilol tein axkan tikitaj. Yejuan kintajyouiltijtoyaj. ¿Toni kinpaleuiskia itech nejon tonalmej tein semi ouijkej? (1 Ped. 1:1; 4:4, 7, 12.) Tatitanil kiniluij maj monextilianij kualtakayot se uan okse, maski moixmatiajya uan kisenchiuayaj miak taman. ¿Keniuj kinpaleuiskia nejin? Kinpaleuiskia maj okachi kuali mouikanij. Maj tiknemilikan nejin. Keman se tokniuj techyoleuak ichan, ¿melauj ke tikpanokej miak taman tein kualtsin? Uan keman tejuan tikyoleujkej se tokniuj, ¿melauj ke okachi kuali peuak iuan timouikaj? Tiyeskij tikualtakamej techpaleuia maj okachi kuali tikinixmatikan tokniuan. Itech itonaluan Pedro, ijkon kemej tokniuan okachi ouij tein kipanouayaj, okachiok monekia maj amo xexeliujtonij. Itech nejin itamian tonalmej, no moneki ijkon tikchiuaskej (2 Tim. 3:1). w18.03 14 §1-3

Jesús kijtoj ke akin mokauaj maj kinixyekana yektikatsin espíritu yolpakij. Uan Romanos 8:6 kijtoua keyej okachi kuali maj se mokaua maj teixyekana yektikatsin espíritu. Kijtoua: “Kuak tikyoltanemilijtinemij sayo itech totalnamikilis ten kualkui tajtakol, ijkuakon yejua ne techuika ya tech in ixpoliuilis. Pero kuak tiyoltanemilijtinemij sayo itech in tamachilis ten kualkui in [y]ektikatsin [e]spíritu, ijkuakon yejua nojon techualkuilia se yankuik nemilis uan se kualtsin yolseukanemilis”. Komo tiktayekanaltiaj tokuali uikalis iuan Dios, axkan tikpiaskej yolseuilis iuan uan kuali timomachiliskej, uan satepan uelis tinemiskej nochipaya. Tanemilil tein noyampa onkak uelis semi kijtakos tokuali uikalis iuan Dios. Techyoualouaj miakej akin amo tanemiliaj kemej yejuatsin, yejua ika moneki timochikauaskej tikyekpiaskej totanemilil. Komo amo titanemiliajok kemej Jiova, taltikpakneminij uelis techmauaskej ika inintanemilil uan timonejnemiltiskej kemej yejuan. Judas kijtoj ke sekin hasta senkis amo kipiaj iespíritu Jiova (Jud. 18, 19). w18.02 19 § 5, 7; 20 § 8

Miakej tapajtianij uan akin kinpaleuiaj, kinpajtiaj akin kipiaj kokolismej tein temauaj. Kinpajtiaj porin kinekij kinpaleuiskej. Sayoj ke, komo amo kinekij maj kinmauakan, moneki moyekpiaskej. No ijkon, miakej tiitekitikauan Jiova tinemij uan titekitij iniuan akin itech inintanemilil uan inintachiualisuan amo kinextiaj ikualneskayouan Dios. Komo amo tiknekij maj techmauakan, moneki timoyekpiaskej. Itech nejin itamian tonalmej, taltikpakneminij amo kipoujkaitaj itanauatiluan Dios. Itech ojpatika amat tein tatitanil Pablo kijkuilouilij Timoteo, kimelauak keniuj yeskiaj (2 Tim. 3:1-5). Uan maski nejin tel amo techyolpaktia, uelis peuas titanemiliskej, titajtoskej uan tikchiuaskej kemej yejuan (Prov. 13:20). Yejua ika, moneki tikchiuaskej tein techpaleuis maj amo techmaua inintanemilil keman tikinpaleuiaj oksekin maj kiixmatikan Dios. w18.01 27 § 1, 2

Itech xiuit 33, niman keman Jesús moajokuik monextij ininixpan panoua quinientos takamej, siuamej uan xa konemej. Xa ijkuak kijtoj tein moajsi itech tajkuilol tein axkan tikitaj (1 Cor. 15:6). Nesi ke moajsiaj tel miakej itatojtokakauan keman kitemakak nejin tanauatil. Uan no, kijtoj ke akin kinekia kiuikas “yugo” kemej itatojtokakauj monekia moauis (Mat. 11:29, 30). Akin kinekiskiaj kiyolpaktiskej Dios monekia kiajsikamatiskej ke yejuatsin kichiua itanejnekilis itechkopa Jesús. Sayoj ijkuak ueliskiaj moauiskej. Sayoj nejin neauilis kipiaskia itatiochiualis. Itech Biblia, miak taman kinextia ke akin mochiuayaj itatojtokakauan Cristo itech yekinika siglo kiajsikamatiaj ke monekia moauiskej uan amo kinemiliayaj ke monekia mochiaskej uan moauiskej satepan (Hech. 2:41; 9:18; 16:14, 15, 32, 33). w18.03 5 § 8

Axkan motelita auilnemilis uan taueyichiualis tein amo melauak. Taltikpakneminij kinyekana Ueyi Babilonia, nochi taneltokalismej tein amo melaujkej, tein Biblia kitokaytia “se pueblo kampa kalyetokke sayo amokuali ejekame” (Apoc. 18:2). Sayoj ke tejuan titamamej uan taltikpakneminij techkejkelouaj (Mar. 13:13). Yejua ika, kemej Daniel, maj timotokikan iuan Jiova. Komo iuan titakuaujtamatij, tiyolyemankej uan titatakamatij, Jiova no techpatiuitas (Ageo 2:7). Tetatmej uelis kinmachtis miak taman ininneskayo itatuan Daniel. Yejua kitasojtak Jiova maski ompa Judá motelchiuaya tein amo kuali keman nojnelok katka, porin itatuan kuali kimachtijkej (Prov. 22:6). Tein melauj, itokay Daniel, tein kijtosneki “NoTamelaujkauj yejua Dios”, kinextia ke itatuan kitasojtayaj Jiova. Yejua ika, tetatmej, amo xiyolijsiuikan keman nankinpaleuiaj nanmokoneuan maj kiixmatikan Jiova. Amo ximosenkauakan (Efes. 6:4). Xiktajtanikan Jiova maj kinpaleui. Iniuan xiktataujtikan. Komo nanmochikauaj nankinpaleuiskej maj kipatiuitakan tein Jiova kijtoua ke melauak, yejuatsin namechteltatiochiuis (Sal. 37:5). w18.02 5 § 12; 6 § 14, 15

Tikmakaj Jiova tein tikpiaj porin ijkon tikueyichiuaj. Itech se taman tein kiitaltijkej, tatitanil Juan kikakik ke itekitikauan Dios ompa iluikak kijtojtoyaj: “Totekotsin Dios, Tejuatsin mitsonnamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi ten ongak. Uan Tejuatsin tikonmonekiltij ma taonka nochi ten tikitaj uan ma mochiua” (Apoc. 4:11). Jiova senkis kinamiki maj se kiueyichiua uan maj se kiueyitali, yejua ika moneki tikmakaskej tein okachi kuali tein tikpiaj. Itechkopa Moisés, Jiova kinnauatij israelitas maj kichiuanij eyi iluimej itech xiuit. Tanauatil kijtouaya: “Nion semej moneki yaskej iixpan Jiova uan amo teyi kiuikaskej” (Deut. 16:16). Kemej tikitaj, kimakaskej Jiova se netetayokolil itech nejin iluimej pouia itech inintaueyichiualis. Axkan, titemakaskej tein tikpiaj uan amo tikchiaskej maj no techmakakan teisa no poui itech totaueyichiualis. Ijkon, tiknextiaj ke tikpatiuitaj uan tikpaleuiaj tekit tein mochiua itech inechikol Jiova. w18.01 18 § 4, 5

Jesús no kijtoj: “Xikselikan notamachilis itech namonemilispan, keme se yugo [...]. Porin in yugo de namechtalilis, yejua ne semi amo etik. Uan in tamamal [...] amo no tesiouti” (Mat. 11:29, 30). ¡Melaujkej nejin tajtolmej! Kemansa, semi tisioujtokej keman tiyouij nechikolmej oso titanojnotsatij. Sayoj ke ¿melauj ke keman timokepaj kalijtik timomachiliaj tichikaujkej uan ke okachi uelis tikxikoskej kuejmolmej? Senkis nesi ke yugo tein Jesús ika tajtoj amo etik. Se tokniuj siuat kipia se kokolis tein kichiua maj nochipa sioujto, no nochipa tayokoya uan kikokoua itsontekon. Yejua ika, kemansa kiouijmaka yas nechikolmej. Sayoj ke se tonal, satepan ke mochikauak yas se nechikol, kijkuiloj: “Tanojnots ika tajtouaya keman se mosenkauasneki. Tokniuj akin kitemakak tanojnots kinextij ke teajsikamatia uan techyemankanojnotsak uan yejua ika peuak nichoka. Nikajsikamatik ke moneki niyetos itech nechikolmej”. Yejua semi yolpakik porin mochikauak yas. w18.01 8 § 6, 7

¿Toni uelis kichiuaskej tetatmej komo ininkoneuj peua omeyoloua satepan ke moauij? Kemej neskayot, se telpoch uelis kiyolnotsas tein onkak nikan taltikpak oso peuas motajtanis ox se kitakamatis tein kijtoua Biblia yejua tein okachi kuali (Sal. 73:1, 3, 12, 13). Tetatmej moneki kimatiskej ke tein kichiuaskej uan tein kiluiskej uelis kichiuas maj kisentoka kitekitili Jiova oso amo. Moneki mochikauaskej amo iuan motajtolteuiskej, yeski telpochya oso nojnelok. Moneki kichiuaskej maj kimati ke kitasojtaj uan kinekij kipaleuiskej. Telpoch akin moauijya motenkauak iuan Jiova ke kitasojtas uan kitayekanaltis itanejnekilis (Mar. 12:30). Dios amo kiauilmati nejin netenkaualis, uan no ijkon moneki kiitaskej nochin akin motemaktijkejya (Ecl. 5:4, 5). w17.12 22 § 16, 17

Ijkon kemej Marta, itekitikauan Dios akin amo keman kikaujkej kimatiaj ke mikemej moajokuiskej. Abrahán miak xiujmej kichixtoya maj yolini Isaac. Sayoj ke se tonal Dios kiluij maj kitemakani ikonetsin, akin semi kitasojtaya, “kemej se nemaktil tachichinol” (Gén. 22:2). Maj timonemilikan keniuj momachilij. Jiova motenkaujka iuan ke nochi altepemej kiseliskiaj tatiochiualis inintechkopa ikoneuan (Gén. 13:14-16; 18:18; Rom. 4:17, 18). Uan no, kiluijka ke nejon tatiochiualis ualeuaskia “itechkopa Isaac” (Gén. 21:12). Sayoj ke ¿keniuj mochiuaskia nejon komo Abrahán kimiktiaya Isaac? Dios kichiuak maj Pablo kimelauani ke Abrahán kineltokaya ke Dios ueliskia kiajokuis (Heb. 11:17-19). Abrahán amo uelia kimatia kemanian moajokuiskia Isaac. Sayoj ke takuaujtamatia ke Jiova kiajokuiskia. w17.12 6 § 12-14

Kemej Pablo, tejuan no moneki timochikauaskej tikitaskej nemilis kemej Jiova kiita, akin “kimonekiltia ke tinochin ma timoyolnemilikan de totajtakoluan” (2 Ped. 3:9). ¿No tiknekij nejon? Komo titeikneliaj, okachi tikuelitaskej titanojnotsaskej uan okachi tiyolpakiskej. No tiknextiskej ke tikitaj nemilis kemej Jiova kiita komo tiktakamatij tanauatilmej tein kijtouaj keniuj se moyekpias. Nochipa moneki titekitiskej uan tiknejnemiltiskej carro kemej amo timoijtakoskej, kemej ijkuak titekitij itech kalchiualis uan tikyekchijchiuaj teisa, uan keman tiyouij se nechikol oso se ueyi nechikol. Okachi tayekantok maj kuali tiyetokan ke tekit tein mochiuas, tomin uan tiempo. ToDios nochipa kichiua tein melauak, uan tejuan tiknekij tiyeskij kemej yejuatsin. Tayekananij yejuan akin yekinika moneki kiitaskej maj kuali yetokan yejuan uan akin iniuan moajsij (Prov. 22:3). Komo se tayekankej techelnamiktia ke moneki tikchiuaskej se taman tein ika timoyekpiaskej, moneki tiktakamatiskej (Gál. 6:1). Komo tikitaj nemilis kemej Jiova kiita, amo totajtakol yeski maj momikili aksa (Deut. 19:10). w17.11 16 § 11, 12

Ijkon kemej tatitanil Pablo, axkan tokniuan taixpejpenalmej kichiaj kiseliskej “kualtsin tetayokolil [...] nepa eluiyaktsinko” (Filip. 3:14). Yejuan yetoskej iuan Jesús itech iTekiuajyo uan iuan kinpaleuiskej taltikpakneminij maj amo kipiakanok tajtakol (Apoc. 20:6). ¡Tel kualtsin nechialis kinmakak Jiova! Okseki ichkamej kichiaj nemiskej nochipaya nikan taltikpak, uan nejon semi kinyolpaktia (2 Ped. 3:13). Kemej Pablo kinekia kinpaleuis tokniuan taixpejpenalmej maj tatakamatinij uan maj kiselianij netetayokolil, kinyolmajxitij: “Xiknemilijtiyakan ika ne tamachilisme ten ualeutok ne eluiyaktsinko” (Col. 3:2). Monekia amo keman kielkauaskej ke kichiayaj kiseliskej netetayokolil ne iluikak (Col. 1:4, 5). Komo titanemiliaj itech tatiochiualismej tein Jiova motenkaujtok kinmakas itekitikauan, techpaleuis maj amo tikelkauakan netetayokolil tein tikchiaj (1 Cor. 9:24). w17.11 25 § 1, 2

Miak nekuikatilmej tein kipia amatajkuilol Maj timokuikatikan ika yolpakilis iixpan Jiova ijkuiliujtokej kemej netataujtilmej. Nejin techpaleuia maj tikiluikan Jiova tein tikmachiliaj. Okseki nekuikatilmej techoliniaj maj tikinyolchikauakan tokniuan maj kinextikan netasojtalis uan maj kichiuakan tein kuali (Heb. 10:24). Yejua ika moneki kuali tikixmatiskej tatsotson, ox yolik oso ijsiujka youi nekuikatil uan tein kijtoua. Techpaleuis komo tikakij nekuikatilmej tein tokniuan mokuikatiaj itech jw.org. Keman tochan timomamachtiskej nekuikatilmej, amo tiomeyolouaskej keman timokuikatiskej uan tikchiuaskej ika nochi toyolo. Maj tikelnamikikan ke timokuikatiskej se taman tein tayekantok itech totaueyichiualis. Se taman tein motelneki tein ika tiknextiliaj Jiova ke tiktasojtaj uan timotasojkamatij (Is. 12:5). Keman timokuikatiaj ika yolpakilis, tikinyolchikauaj oksekin maj no ijkon kichiuakan. Tinochin itech nechikol, yeski titelpochmej oso tiichpochmej, tiuejueykejya oso yankuixtok timoauijkej, uelis ijkon tikueyichiuaskej Dios. Yejua ika, maj amo tiomeyolouakan timokuikatiskej ika nochi toyolo. ¡Maj ika yolpakilis timokuikatikan! w17.11 7 § 18, 19

Miakej tepalyetonij ualeuaj itech altepemej kampa tekiuanij amo kinkauaj itaixpantijkauan Jiova maj tanojnotsakan. Kemej tokniuan mochikauaj tanojnotsaskej, tel miakej akin amo keman kikaktoyaj “Tajtoltsin de Dios” ueli kikakijya (Mat. 13:19, 23). Miakej akin moteltekipachojtokej kipiaj yolseuilis itech tonechikoluan. Niman kijtouaj: “Ueyi melau ke Totajtsin Dios namouan yetinemi” (1 Cor. 14:25; Mat. 11:28-30). Moneki tiknextiskej kuali taixejekolis keman tikinnojnotsaskej (Prov. 22:3). Moneki tikinkakiskej ika nejmachkayot, sayoj ke maj amo ika titajtokan tein kichiuaj tekiuanij. Maj tikchiuakan tein technauatiaj itech sucursal uan tein kiixtaliaj tekiuanij, uan ijkon amo teyi techpanos nion tikchiuaskej maj aksa kipano tein amo kuali. Kemej tepalyetonij kipiaj tataman taneltokalis uan kayomej itech tataman xolalmej, moneki tikmatiskej keniuj tanemiliaj uan keniuj momachiliaj, uan maj tikinpoujkaitakan. Kemej neskayot, itech seki uejueyi altepemej ixyetok keniuj moneki motilmajtiskej siuamej. Yejua ika, keman tikinnojnotsaskej tepalyetonij, moneki timotilmajtiskej kemej amo mokuejmoloskej. w17.05 8 § 17, 18

Uelis tiktajtaniskej Jiova maj techmaka iyektikatsin espíritu tein techpaleuis maj kuali tikinnojnotsakan tochankauan akin amo itaixpantijkauan Jiova. Moneki amo tikiniluiskej ke nochi tein kineltokaj amo melauak. Komo kijtouaj oso kichiuaj teisa tein techkuejmoloua, uelis tikchiuaskej kemej tatitanilmej. Pablo kijkuiloj: “Kuak in tagayot techtejtelchiuayaj, ijkuakon tejuan tikinmouiskanankiliayaj. Uan kuak in tagayot techtokatinemiaj para techmiktiskiaj, ijkuakon tejuan nochi titaxikoayaj. Uan kuak in tagayot techtejteneuayaj, ijkuakon tejuan tikinnejmachnojnotsayaj” (1 Cor. 4:12, 13). Maski tikinnojnotsaskej tochankauan ika nejmachkayot uelis techpaleuis maj kuali timouikakan iniuan, kemej timonejnemiltiskej uelis okachi techpaleuis (1 Ped. 3:1, 2, 16). Komo tikauaj se kuali neskayot, uelis tikchiuaskej maj kiitakan ke itaixpantijkauan Jiova yolpakij kemej namikuanij, kinyekpiaj ininkoneuan uan chipaujkanemij uan yolpakij. Hasta komo amo keman mochiuaj itaixpantijkauan Jiova, uelis tiyolpakiskej porin tikmattokej ke tikyolpaktijtokej yejuatsin. w17.10 15 § 13, 14

Amo tikmoujkaitaj maj axkan miakej senkis mopatakan keman momachtiaj iTajtol Dios. Yejua nejon panok iniuan yekinika itatojtokakauan Cristo, akin kichiayaj yaskej iluikak (1 Cor. 6:9-11, TNM). Tatitanil Pablo ika tajtoj akonimej amo kiseliskej iTekiuajyo Dios, uan ompa kiniluij tokniuan: “Ijkon nantachiutinemiayaj sekin de namejuan”. Sayoj ke iTajtol Dios uan yektikatsin espíritu kinpaleuij maj mopatanij. Satepan ke mochiujkej itatojtokakauan Cristo, sekin ueyi tajtakojkej uan kijtakojkej ininkuali uikalis iuan Jiova. Kemej neskayot, Biblia ika tajtoua se taixpejpenal akin monekik kikalankixtiskej. Sayoj ke satepan kipatak tein monekia uan mokepak itech nechikol (1 Cor. 5:1-5; 2 Cor. 2:5-8). Techyolchikaua tikitaskej keniuj miakej tokniuan kipatanij ininnemilis ika inepaleuil iTajtol Dios. Yejua ika tiknekij kuali tiktekitiltiskej. w17.09 23, 24 § 2, 3

Itech Jiova ualeua netasojtalis (1 Juan 4:7). Nejin netasojtalis moyekana ika tein kuali, uan itech Biblia mokui tajtol griego agápe keman ika motajtoua. Amo sayoj se kimachilia, ta no se kinextia ika tein se kichiua tein ika se kinpaleuia oksekin uan amo se kichia taxtauil. Nejon techyolpaktia uan kichiua maj kuali timomachilikan. Jiova kinnextilij netasojtalis taltikpakneminij achto ke kinchijchiuaskia Adán uan Eva. Kemej neskayot, kichijchiuak taltikpak kemej uelis nikan tinemiskej nochipaya uan kitalij nochi tein moneki, amo sayoj tein ika tiyoltoskej, ta no tein kichiuas maj tiyolpakikan. Uan amo kichijchiuak tein sayoj yejuatsin kiyolpaktis, ta tein tejuan techyolpaktis. Uan no, taltikpakneminij ueliskiaj nemiskej nochipaya itech Xochital. w17.10 7 § 1, 2

Santiago no kijkuiloj: “Komo nankinchichikotasojtaj aksame, ijkuakon sayo nanmotajtakolmakaj” (Sant. 2:9). Komo titetasojtaj, amo tikitaskej toni nemachtil kipia aksa, keniuj ixtamati, toni tekit kipia uan ox tominpia oso amo. Moneki yekmelauj amo titechikoitaskej, uan amo sayoj tiktemoskej maj nesi ke amo titechikoitaj. Akin tetasojta no “yolyemanik uan kixikoa tajyouilis” uan “amo moueyinektinemi” (1 Cor. 13:4). Yejua ika moneki amo tiyolijsiuiskej, moneki tiyeskij tikualtakamej uan tiyolyemankej porin nejin techpaleuis maj tiksentokakan tiktematiltikan kuali tanauatilmej (Mat. 28:19). Nejin kualneskayomej no techpaleuiaj maj kuali timouikakan iniuan nochin tokniuan itech nechikol. Komo tinochin tiknextiaj nejin netasojtalis, itech nechikolmej amo tixexeliujtoskej uan tikueyitaliskej Jiova. Uan no, oksekin no kinekiskej momachtiskej Biblia. Yejua ika, keman Biblia ika tajtoua “yankuik talnamikilis” tami ika nejin tajtolmej: “Ximotakentikan ika ne tetasojtalis kachi ok. Porin ne tetasojtalis techsepanpoualtia” (Col. 3:14). w17.08 26 § 18, 19

Moneki tikinyolikneliskej akin ayamo kiixmatij Dios sayoj ke uelisok moyolnonotsaskej uan yeskij itasojikniuan. Jiova amo kineki maj aksa ixpoliui (2 Ped. 3:9). Yejua ika, kemej ueliok, maj tiksentokakan tikinnejmachtikan nochin uan ijkon uelis kinpaleuis teyoliknelilis tein kinextia Dios. Ineskayo Jesús uelis techpaleuis. Keman kiitak ke akin kitojtokayaj “tajyouijtoyaj uan tayokoyayaj keme ichkame ten kuamoyautokke uan keme ne ichkame ten amo kipiaj in tapixke”, ¿toni kichiuak? “Semi kinyoliknelij” uan “peuak kinmachtia ika miak tataman tamachtilisme” (Mat. 9:36; Mar. 6:34). Jesús amo katka kemej fariseos, akin amo kinekiaj kinpaleuiskej taltikpakneminij (Mat. 12:9-14; 23:4; Juan 7:49). ¿Titeyolikneliaj kemej Jesús uan yekmelauj tiknekij tikinpaleuiskej taltikpakneminij maj kiixmatikan Jiova? w17.09 9 § 6; 10 § 9

Keman José tsaktoya, amo kinemiliaya ke mochiuaskia ojpatika takat akin okachi ueyichiujkej ompa Egipto. Amo no kinemiliaya ke itechkopa, Jiova kinmakixtiskia ichankauan maj amo mayanmikinij (Gén. 40:15, nota; 41:39-43; 50:20). Jiova kichiuak okachi ke tein José kichiaya. Maj no itech titanemilikan Sara. Kemej xiuejya katka, ¿kichiaya maj Jiova kichiuani maj kipia se konetsin? Keman yolik Isaac panok okachi ke tein Sara uelia kinemiliaya (Gén. 21:1-3, 6, 7). Tejuan amo tikchiaj maj Jiova kiixpolo nochi tokuejmoluan achto ke mochiuas yankuik taltikpak. Uan amo no tiktajtaniaj maj mochiua uejueyi taman itech tonemilis. Sayoj ke tikmatij ke Dios kinpaleuij itekitikauan akin nenkej ne uejkauj kemej amo kichiayaj (Is. 43:10-12). Tikyekmatij ke yejuatsin techmakas chikaualis tein techpaleuis maj tikchiuakan itanejnekilis (2 Cor. 4:7-9). Jiova uelis techpaleuis hasta keman tikpiaskej uejueyi ouijkayomej komo nochipa tiktakamatij. w17.08 11 § 13, 14

Telpoch, keman tiktekitilia Dios miak tonalmej, iniuan titekiti okseki tokniuan akin no ijkon kitekitiliaj. Nejon mitspaleuis xiyekyolmajsito. Miakej kiitanij ke kitekitiliskej Jiova miak tonalmej keman telpochmejok kinpaleuiani satepan ke monamiktiaj. Miakpa, akin katkaj precursores achto ke monamiktiskiaj ueli kisentokaj itech nejon tekit iniuan ininnamik (Rom. 16:3, 4). Tein tikixtaliaj kinextia tein tikpiaj itech toyolo. Itech Salmo 20:4 moijtoua tein Jiova uelis kichiuas: “Maj mitsmaka tein tikyolnejneki uan maj mitstatiochiui itech nochi tein tikixtalis”. Yejua ika xiknemili tein tikneki tikchiuas itech nochi monemilis, xiknemili tein Dios kichiujtok axkan uan tein uelis tikchiuas itech itekiyo. Ompa, xikixtali tikchiuas tein kiyolpaktia. Tiktekitilis miak tonalmej semi mitsyolpaktis, porin tikueyitalis ika tein tikchiuas. Kemaj, “xikajsi ueyi yolpakilis itech Jiova, uan yejuatsin mitsmakas tein tikyolnejneki” (Sal. 37:4). w17.07 26 § 15-18

Miakpa, tinochin kuali ininka titajtouaj akin kichiuaj teisa tein kuali oso kipiaj se kualtsin kualneskayot. Melauak ke Jiova yejua akin okachi kinamiki tikueyichiuaskej. Kinamiki nejon porin tikitaj iueyi chikaualis itech itachijchiualis uan porin kinextij ke semi techtasojta keman kiualtitanik iKonetsin maj toka momikiliki. Akin kijkuiloj Salmo 147 kinekia kiueyichiuas Jiova ika nochi iyolo. Uan no, kinyolchikauak oksekin maj iuan kiueyichiuanij (Sal. 147:7, 12). Amo tikmatij akoni kijkuiloj nejin salmo, sayoj ke nesi ke nemik keman israelitas mokepkej Jerusalén satepan ke Jiova kinkixtij ompa Babilonia (Sal. 147:2). Nejin tajkuilojkej kiueyichiuak Jiova porin kichiuak maj israelitas oksepa kiueyichiuanij itech tal kampa kayomej katkaj. ¿Keyej axkan tejuan no ueli tikijtouaj “¡xikueyichiuakan Jah!”? (Sal. 104:35, nota; 147:1.) w17.07 17 § 1-3

Jesús kimatia ke tel miakej imomachtijkauan ouij kinkisaskia moixpanoltiskej. Biblia kinextia ke Dios amo kiixtalij maj taltikpakneminij kiteltemokan motomintiskej. Itech xochital tein moajsia Edén Jiova kinmakak Adán uan Eva okachi ke tein kinpolouaya (Gén. 2:15, 16). Uan no, keman Dios kinmakak iyektikatsin espíritu tokniuan taixpejpenalmej itech yekinika siglo, “amo senme den tokniuan kiyolnemiliayaj ke sayo pouia de yejua den iaxkakopaka. Ta, nochi in tokniuan kiyolnemiliayaj ke kisepanpiaj ya nochi de inaxkakopaka” (Hech. 4:32). Tanauatijkej Isaías kijtoj ke ejkoskia se tonal keman nochin yolpakiskiaj ika tein motemaka itech taltikpak (Is. 25:6-9; 65:21, 22). Sayoj ke, hasta maj ejko nejon tonal, imomachtijkauan Jesús moneki kinextiskej tamatilis uan ijkon uelis moixpanoltiskej ika ‘ricojyot’ tein onkak nikan taltikpak, uan no, mochikauaskej kiyolpaktiskej Dios (Luc. 16:8). w17.07 8 § 4-6

Itech amatajkuilol Job, semej amatajkuilolmej tein yekinika moijkuiloj tein poui itech Biblia, tikixtajtoltiaj ke Satanás kijtoj ke Job kiixnamikiskia Dios komo tel tajyouiaya. Kiluij Jiova maj yejuatsin kitajyouiltiani. Dios amo kichiuak, maski kemaj kikauak Satanás maj kitajyouiltiani. Itech amo miak tonalmej, Job kipoloj nochi tein kipiaya, momikilijkej itekitikauan uan no nochin majtakti ikoneuan. Satanás kichiuak maj moitani ke katka itajtakol Dios (Job 1:13-19). Satepan kichiuak maj Job kipiani se kokolis tein kiteltajyouiltiaya uan tein tetajyaltij (Job 2:7). Uan amo sayoj nejon, ta inamik uan eyi takamej akin kijtouayaj ke katkaj itasojikniuan kichiujkej maj okachi amo kuali momachiliani (Job 2:9; 3:11; 16:2). ¿Melauak tein kijtouaya Satanás? Amo, porin Job amo kikauak Dios (Job 27:5). w17.06 24 § 9, 10

Jiova kinnauatijtok tetatmej maj kintekipanokan ininchankauan. Yejua ika, moneki chikauak tekitiskej. Sayoj ke itech nejin itamian tonalmej, se kiajsis se tekit oso amo se kipolos uelis techteltekipachos. Yejua ika, miakej kichiuaj tein yeski taman porin amo kinekij maj kinkuilikan tekit. Kiitaj ke moneki tekitiskej okachi horas, maski amo semi kintaxtauiskej. Itech uejueyi tekitiloyamej amo kintakeuaj miakej, sayoj ke kitemouaj maj mochiua miak taman tekit. Nejin miakpa kichiua maj tekitinij moteltekipachokan, maj tel siouikan uan hasta maj kokolispeuakan. Miakej kimouiliaj maj kinkixtikan kampa tekitij komo amo kichiuaj nochi tein ininteko kiniluia. Tiitekitikauan Jiova okachi tiktakamatij yejuatsin ke okse taltikpaknenkej, maski yeski akin techtakeuak (Luc. 10:27). Titekitij porin ika timoixpanoltiaj uan techpaleuia maj tiksentokakan tiktekitilikan Jiova. Sayoj ke komo amo timoyekpiaj, tekit uelis kichiuas maj amo semi tiktekitilikanok. w17.05 22, 23 § 5-7

Kemansa, tokniuan akin yankuixtok moauijkej kiluiaj se tokniuj akin uejkaujya kitekitilijtok Jiova maj kinnextili keniuj kinmachtiskej ininkoneuan. Komo se tetat techiluia maj tikmachtikan ika Biblia se ikoneuj, moneki tikelnamikiskej ke amo tikpiaj tanauatil tein yejua kipia (Efes. 6:1-4). Kemansa hasta uelis tikmachtiskej ikoneuj aksa akin amo itaixpantijkauj Jiova. Komo ijkon, moneki tikelnamikiskej ke keman tikmachtiaj se tekoneuj amo timochiuaj tiitatuan. No moneki timomachtiskej ininchan konemej keman yetoskej inintatuan oso se tokniuj akin kipia kuali taixejekolis, oso kampa miakej moajsiskej. Ijkon, amo moteajsikamatiltis tein amo kuali. Xa satepan yejuan tetatmej kiixtaliskej kinmachtiskej ininkoneuan, ijkon kemej Jiova kinnauatia. w17.06 8 § 15, 16

Komo konemej amo kiuelitaj nemiskej kemej kampa kayomej inintatuan, xa amo no kinekiskej ueliskej inintajtol nion pouiskej itech inintaneltokalis. Tokniuan tetatmej moneki amo kitayekanaltiskej tein yejuan kinekij, ta tein kinpoloua ininkoneuan (1 Cor. 10:24). Se tokniuj akin monotsa Samuel, kijtoua ke inamik uan yejua kiitakej katiyejua tajtol okachi kinpaleuiaya ininkoneuan maj motokikan iuan Jiova. Uan no, kitajtanijkej maj kinmakani tamatilis. No kijtoua: “Keman tikitakej ke amo semi kinpaleuiaya nechikolmej itech totajtol, timopatakej itech okse nechikol. Tisenyayaj nechikolmej uan iniuan titanojnotsayaj. Uan no, tikinyoleuayaj tokniuan maj touan takuakij uan maj tiyanij tipaxalotij. Nochi nejin tapaleuij maj tokoneuan okachi kuali kinixmatinij tokniuan uan maj kiitanij Jiova amo sayoj kemej ininDios, ta no kemej ininTajtsin uan ininTasojikniuj. Tikitayaj ke nejon okachi monekia ke tajtoskej totajtol”. w17.05 11, 12 § 11-13

Amo uejkaua, itech taltikpak moajsiskej sayoj akin kipaleuiskej itaixyekanalis Jiova. Tiknekij maj ejkoya nejon tonal. Timomachiliaj kemej Débora uan Barac, akin mokuikatijkej: “Maj ixpoliuikan nochin akin mitsixnamikij, Jiova, sayoj ke akin mitstasojtaj maj mochiuakan kemej keman tonal kisa itech iueyiyo” (Juec. 5:31). Nejin tajtolmej mochiuaskej keman Jiova kiixpolos nochi tein Satanás kiixyekana. Keman peuas neteuilis Armagedón, Jiova amo techtajtanis maj tikpaleuikan maj kinixpolo akin kiixnamikij. Tein melauj, amo teyi tikchiuaskej uan tikitaskej ‘keniuj Jiova techmakixtia’ (2 Crón. 20:17). Axkan tikpiaj miak taman tein ika uelis tikpaleuiskej itaixyekanalis Jiova ika yolchikaualis uan yolpakilis. Satepan ke tamik neteuilis, Débora uan Barac ika ininnekuikatil peuak kiueyitaliaj Jiova, amo taltikpakneminij. Yejuan mokuikatijkej: “Porin xolal motemakak tapaleuis, ¡xikueyichiuakan Jiova!” (Juec. 5:1, 2). Tejuan no uelis timotemakaskej tiktekitiliskej Jiova kemej yejuatsin kineki. Komo ijkon tikchiuaj, xa oksekin no kinekiskej kiueyitaliskej Jiova. w17.04 32 § 17, 18

Maski José amo kielkauak tein kijyouij 13 xiujmej, nejon amo kichiuak maj motauelneki (Gén. 45:5-8). Uan tein okachi moneki, amo kikauak maj ininnepololuan oksekin oso tein kichiuilijkej kiuejkatilianij iuan Jiova. Kemej nochipa kitakamatik, José uelik kiitak keniuj yejuatsin kiyektalij nochi uan keniuj kintatiochiuij yejua uan ichankauan. Tejuan no moneki tikpatiuitaskej uan tikyekpiaskej tokuali uikalis iuan Jiova. Maj amo keman tikauakan maj ininnepololuan tokniuan techuejkatilikan iuan Dios akin tiktasojtaj uan tikueyichiuaj (Rom. 8:38, 39). Komo se tokniuj techchiuilia tein amo kuali, maj tikchiuakan kemej José uan maj okachi timotokikan iuan Jiova. Maj tiktemokan titanemiliskej kemej yejuatsin. Maj tikchiuakan tein tiueliskej tein ika tikyektaliskej kuejmol ijkon kemej tayolmajxitia Biblia. Uan satepan, maj tikauakan kuejmol imako Jiova. Uelis titakuaujtamatiskej ke yejuatsin kiyektalis keman monekis uan kemej kiitas ke okachi kuali. w17.04 19 § 12; 20 § 15, 16

Ana kichiuak tein motenkaujka iuan Jiova. Kiuikak Samuel itech tabernáculo, tein yetoya Siló. Ompa kiuikak iixpan tayekankatiopixkat Elí, uan kiluij: “Ika nejin okichpil nikchiuak netataujtil, uan Jiova nechmakak tein niktajtanij. Yejua ika, nejua axkan niktaneujtia Jiova. Nochi itonaluan, niktaneujtia Jiova” (1 Sam. 1:24-28). Ompa “Samuel kisentokak moskaltij iixpan Jiova” (1 Sam. 2:21). Ana xa kiouijmakak kichiuas tein motenkaujka. ¿Keyej? Porin amo ueliskia kiitas ikonetsin mojmostaj nion kiitaskia keniuj moskaltiskia. Maski ijkon, Ana amo kiauilmatik tein motenkaujka iuan Jiova (1 Sam. 2:1, 2; Sal. 61:1, 5, 8). w17.04 5 § 7, 8

Tatitanil Pablo kijtoj ke itamian tonalmej yeskiaj ouijkej. Uan no kijtoj ke taltikpakneminij okachi amo yolkualmej yeskiaj (2 Tim. 3:2-5, 13). ¿Melauj ke tikitaj ke mochiujtok nejin? Timiakej techijtakouanij temiktianij, tachtekinij oso akin teikamauiltiaj, oso akin kintauelitaj akin taman ixtamatij. Sekin nion kitatiaj tein amo kuali tein kichiuaj. Oksekin kinextiaj ke kinekij kinpaleuiskej taltikpakneminij, sayoj ke tein melauj kitemouaj kinchiuiliskej tein amo kuali. Uan maski xa amo teyi techchiuilianij, techijtakoua tein kichiuaj. ¿Keniuj timomachiliaj keman tikitaj keniuj ininka mauiltiaj seki konemej, akin xiuejkejya uan akin amo ueli mopaleuiaj? Sekin akin amo yolkualmej monejnemiltiaj kemej yeskiaj koujtajtapialmej oso hasta kemej amokuali ejekamej (Sant. 3:15, TNM). Sayoj ke Biblia techmatiltia ke uelis tikchiaskej tein kuali satepan. w17.04 11 § 4