Julio

Se taman tein kichiua maj timotekipachokan yejua keman techiluiaj oso techchiuiliaj tein amo kuali, uan okachiok komo se akin kuali iuan timouikaj oso se tochankauj. Keman timotekipachotoskej, uelis timomachtiskej ineskayo Ana keniuj taxiko porin ojpatika inamik itakauj kitajyouiltiya (1 Sam. 1:12). Kemej Ana, tejuan no uelis uejkauak tiktataujtiskej Jiova uan tikiluiskej tein techtekipachoua. Netataujtilmej amo moneki yeski semi kualtsitsin oso amo kipiaskej nepololmej. Kemansa xa hasta tichokaskej keman tikiluiskej tein techtekipachoua. Sayoj ke Jiova nochipa techkakis. Uan amo sayoj moneki tikiluiskej tein techtekipachoua, ta no moneki tikelnamikiskej tein techyolmajxitia Filipenses 4:6, 7. Ompa tatitanil Pablo senkis kijtoj ke moneki tiktasojkamatiliskej Dios keman tiktataujtiaj. Onkak miak taman tein uelis tiktasojkamatiliskej, kemej tonemilis, itachijchiualis, inetasojtalis uan tein tikchiaj tikseliskej satepan. w20.02 21 § 3; 22 § 6

Jiova techmakak se netetayokolil: kichiuak maj ueli titajtokan (Éx. 4:10, 11; Apoc. 4:11). Itech iTajtol techmachtia keniuj tikuiskej nejin netetayokolil. Nochipa moneki tiktemoskej tikteixmatiltiskej Jiova uan iTekiuajyo (Mat. 24:14; Rom. 10:14, TNM). Keman tikteixmatiltiaj, tikchiuaj kemej Jesús. Se taman tein Jesús okachi kichiuako nikan taltikpak yejua kiteixmatiltis iTajtsin uan akoni yekmelauj yejuatsin (Juan 18:37). Sayoj ke, moneki tikelnamikiskej ke kemej tikijtouaj teisa no tayekantok. Yejua ika, keman tikintapouiaj oksekin akoni Jiova moneki tikchiuaskej “ika yolyemanilis uan ika mouisyot”, uan moneki amo tikinyolkokoskej nion tikiniluiskej ke amo kuali yetok tein kineltokaj (1 Ped. 3:15). Komo ijkon tikchiuaj, amo nenkaj tikinnojnotsaskej, ta tikinmachtiskej teisa uan xa hasta kinekiskej momachtiskej. Komo tayekananij kiitaj ke se tokniuj moneki se kiyolmajxitis, moneki niman tajtoskej iuan. Sayoj ke, moneki kitemoskej kemanian uelis iuan tajtoskej, xa keman amo moajsiskej oksekin uan ijkon tokniuj amo mopinaujmatis. w20.03 18, 19 § 2-4

¿Toni moneki titajtaniskej itech netataujtil? Uelis tiktataujtiskej Jiova maj techpaleui maj okachi titakuaujtamatikan (Luc. 17:5; Juan 14:1). Nejon moneki porin Satanás kinyejyekos nochin itatojtokakauan Jesús (Luc. 22:31). ¿Keniuj techpaleuis takuaujtamatilis? Satepan ke tikchiuaskej nochi tein techpaleuis maj tikixnamikikan se ouijkayot, takuaujtamatilis techolinis maj tikauilikan imako Jiova. Titakuaujtamatiskej ke yejuatsin okachi kuali kiyektalis kuejmol ke tejuan, kichiuas maj tiyolseujtokan (1 Ped. 5:6, 7). Netataujtil techpaleuia maj tiksentokakan tiyolseujtokan maski tikpanoskej tein yeski ouijkayot. Maj tikitakan tein kipanok Robert, se tayekankej akin kipia panoua 80 xiujmej. Yejua kijtoua: “Tein tayolmajxitia Filipenses 4:6, 7 nechpaleuiani maj nikixnamiki miak ouijkayomej. Kemansa amo nikpiani tomin uan seki xiujmej amo uelik nitekitik kemej tayekankej”. No kijtoua: “Keman peua nimotekipachoua, niman niktataujtia Jiova. Nikita ke ijkon kemej okachi miakpa uan chikauak nimotataujtia, okachi nikpia yolseuilis”. w19.04 9, 10 § 5-7

Se ueyi tajtakol keman aksa ika mauiltia se konetsin. Keman aksa kichiua se tajtakol tein kijtakoua okse, no tajtakolchiua iixpan Dios. Maj tikitakan se neskayot tein moajsi itech Tanauatil tein Jiova kimakak xolal Israel. Tanauatil kijtouaya ke akin kiichtekiliaya teisa aksa, motajtakolmakaya iixpan Jiova (Lev. 6:2-4). Kemej tikitaj, keman aksa akin poui itech nechikol ika mauiltia se konetsin uan kitajyouiltia, motajtakolmaka iixpan Dios uan kichiua maj amo kuali ika tajtokan itokay. Yejua ika, keman aksa ika mauiltia se konetsin tikitaj kemej se tajtakol tein Dios senkis amo kiitstani. Itech amaix Tanejmachtijkej uan ¡Taijxitilis! mokixtiani tamachtilis tein uelis kinpaleuis akin ininka mauiltianij maj kiixnamikikan tein kimachiliaj, keniuj uelis oksekin kinpaleuiskej uan kinyolchikauaskej uan keniuj uelis tetatmej kinmatampauiskej ininkoneuan. Tayekananij no kinmakanij tanauatilmej tein mokixtia itech Biblia tein kiniluia toni moneki kichiuaskej keman aksa kichiua nejon tajtakol. Inechikol Jiova kisentoka kuali kiita maj nejon tanauatilmej mouikakan ika tein Biblia tamachtia. w19.05 9, 10 § 8, 9

ITajtol Dios kemej yeskia se machete tein semi tenej tein techpaleuia maj Satanás amo techkajkayaua (Efes. 6:17). Kemej neskayot, techmatiltia ke mikemej amo uelij tajtouaj iniuan akin yoltokej (Sal. 146:4). No techelnamiktia ke sayoj Jiova ueli kijtoua tein mochiuas satepan (Is. 45:21; 46:10). Komo nochipa tikixtajtoltiaj uan itech titanemiliaj, tikixtopeuaskej uan tiktauelitaskej nochi tein ika takajkayauaj amokuali ejekamej. Yejua ika, maj amo tikchiuakan nion teyi tein mouika ika naualot. Akin yekmelauj tikchiuaj kemej Cristo amo tiktemouaj ininnepaleuil naualmej nion tiktemouaj titajtoskej iniuan mikemej. Amo titapaleuiaj itech tein miakej kichiuaj keman aksa momikilia tein ika kinextiaj ke kineltokaj ke mikemej nemitij okseko. Uan nion no tiktemouaj tikmatiskej tein panos satepan ika tein kichiuaj sitalixmatinij oso okseki taman. Amo tiknekij tikchiuaskej nion teyi tein mouikas ika naualot. Tikmatij ke semi tamouilil uan uelis techuikas maj tiktekitilikan Satanás uan amokuali ejekamej. w19.04 21, 22 § 8, 9

Akin moixyekanaj ika inintanemilil taltikpakneminij amo kipoujkaitaj tein Biblia kijtoua kemej moneki se monejnemiltis uan kijtouaj ke amo tapaleuiaok. Xa motajtaniaj keyej Dios techchijchiuak maj tiknejnekikan timotekaskej iuan aksa uan satepan techiluia maj tiktsakuilikan nejon tanejnekilis. Kinemiliaj ke moneki tikchiuaskej nochi tein tiknejnekij. Sayoj ke Biblia amo kijtoua nejon, ta techiluia ke uelis tiktsakuiliskej tein amo kuali tein tiknejnekij (Col. 3:5). Uan no, Jiova kiixtalij nenamiktilis, ijkon se takat uan se siuat akin namikuanij uelis mosentekaskej uan ika moyolpaktiskej kemej kinamiki (1 Cor. 7:8, 9). Biblia techmachtia maj tikitakan kemej kinamiki keman se takat uan se siuat namikuanij mosentekaj. Kijtoua ke ijkuak mosentekaj uelis ika yolpakiskej (Prov. 5:18, 19). Sayoj ke no kijtoua: “Cada se tokniu ma kimati keniu iuan yetos isiuatsin ka ne yolchipaualis uan ika ne mouisyot. Uan [...] ma amo kinixnejnektinemikan ok oksekin siuame oso taka” (1 Tes. 4:4, 5). w19.05 22, 23 § 7-9

Dios amo kikauas maj tekiuajyomej kinixpolokan itekitikauan. Yejuan kinyolpaktia maj kinixmatikan ika itokay yejuatsin uan kitakamatkej keman kiajsikamatkej ke amo monekiaok pouiskej itech Ueyi Babilonia (Hech. 15:16, 17; Apoc. 18:4). Uan no, mochikauanij kinpaleuiskej oksekin maj amo ompa pouikanok. Ijkon, Jiova amo kintatsakuiltis kemej kipanos Ueyi Babilonia. Sayoj ke, kemaj kipiaskej ouijkayomej (Ezeq. 38:2, 8). Keman kintamiixpoloskej nochi taneltokalismej, sayoj mokauas se: ixolal Jiova. Nejon kichiuas maj Satanás semi kualani, yejua ika kimoyauas takajkayaualis tein kichiuas maj nochin altepemej mosentilikan uan maj kinixnamikikan itekitikauan Dios (Apoc. 16:13, 14, TNM). Nochi nejon altepemej tein mosentiliskej yejua “Gog tein poui Magog”. Keman yejuan kiixnamikiskej ixolal Dios, peuas Armagedón (Apoc. 16:16). w19.09 11 § 12, 13

Itech inintonaluan israelitas, Satanás kikuik taneltokalis tein amo melauak uan ika kichiuak maj miakej auilneminij. Axkan no ijkon kichiua. Akin pouij itech taneltokalis tein amo melauak kiitaj auilnemilis kemej se taman tein kuali. Yejua ika, miakej akin kijtouaj ke kitekitiliaj Dios amo monejnemiltiajok kemej yejuatsin kiixtalij. ¿Toni kiualkuini nejon? Tatitanil Pablo kijtoj toni itech amatajkuilol tein kinijkuilouilij romanos (Rom. 1:28-31). Itech “ten amo monekia kichiuaske” moajsi nochi tataman auilnemilis kampa no poui keman se takat moteka iuan okse takat oso se siuat iuan okse siuat (Rom. 1:24-27, 32; Apoc. 2:20). Kemej tikitaj, semi moneki maj tiktakamatikan tein Biblia tamachtia. Miak taman tein tamachtiaj taltikpakneminij kiixnamiki itanauatiluan Dios. Amo tapaleuia maj monexti itakilo espíritu, ta ‘tanejnekilis ten kuika tajtakol’ (Gál. 5:19-23). Kichiua maj miakej moueyinekikan uan maj sayoj yejuan motasojtakan (2 Tim. 3:2-4). Jiova amo kineki maj tiknextikan nejon, ta maj tiyolyemankej (2 Sam. 22:28). w19.06 5, 6 § 12-14

Elías kitekitilij Jiova itech tonalmej tein semi ouijkej uan kipanok tataman ouijkayomej. Jiova kiluij Elías maj kikauani maj Eliseo kichiuani seki tekit tein yejua kichiuaya. Ijkon, kimakak se itasojikniuj akin ueliskia kipaleuis keman yolkuetaujtoskia. No ijkon, komo tikpiaj se totasojikniuj akin iuan titakuaujtamatij, techpaleuis keman titajyouijtoskej (2 Rey. 2:2). ¿Uan komo amo tikpiaj aksa akin uelis tiktapouiskej tein techtekipachoua? Maj tiktajtanikan Jiova maj techpaleui maj tikajsikan se tokniuj akin yekyolmajsitok akin uelis techyolchikauas. Jiova kipaleuij Elías maj taxiko keman kipanotoya ouijkayomej uan maj kitekitiliani miak xiujmej. Tein kipanok nejin tanauatijkej techpaleuia maj tikchiakan tein kuali. Xa semi timotekipachojtokej uan nejon semi techsioujtis uan techtayokoltis. Sayoj ke, komo titakuaujtamatij iuan Jiova, yejuatsin techmakas chikaualis tein techpaleuis maj tiksentokakan tiktekitilikan (Is. 40:28, 29). w19.06 15 § 4; 16 § 9, 10

Titanojnotsaskej ika iTekiuajyo Dios techpaleuis maj okachi tiyolchikaujkej. ¿Keyej? Porin techpaleuia maj titakuaujtamatikan iuan Jiova uan maj amo tikinmouilikan taltikpakneminij. Ijkon kemej aksa kichikaua inakayo keman kichiua ejercicio, tejuan no okachi timoyolchikauaj keman titanojnotsaj kajkalpan, senteixtenoj, kampa yeski uan kampa tanamakaj. Komo axkan ika yolchikaualis titanojnotsaj, tiksentokaskej tikchiuaskej maski tekiuanij amo techkauaskejok (1 Tes. 2:1, 2). Semi techpaleuia ineskayo se tokniuj siuat akin kinextij ueyi yolchikaualis. Yejua Nancy Yuen. Uejkapan katka kemej se metro uan tajko, sayoj ke amo akin uelia kimojmoujtiaya. Kemej kisentokak tanojnotsak, kitsakkej kemej veinte xiujmej ompa China. Tekiuanij akin kitatajtanijkej kijtojkej ke yejua katka “akin okachi amo tatakamatia” itech altepet. w19.07 5 § 13, 14

Seki taltikpakneminij kinektokej kimatiskej tein Biblia tamachtia. Sayoj ke oksekin, yekinika amo kinekij momachtiskej uan xa moneki tiktemoskej maj kinyolnotsa tamachtilis. Komo achto kuali timomachtiaj toni tikiniluiskej kinekiskej techkakiskej. Maj tikixpejpenakan tamachtilis tein xa taltikpakneminij kinyolnotsas uan maj tiknemilikan keniuj ika tikinnojnotsaskej. Kemej neskayot, ueliskia tikijtoskej: “Nikuelitaskia nikmatis keniuj tikonita nejin taman. Axkan, tinochin tikpanouaj miak ouijkayomej. ¿Tikonnemilia ke motayektaliskia komo se tekiuaj taixyekana semanauak taltikpak?”. Satepan, ueliskia tikixtajtoltiskej Daniel 2:44 uan ika titajtoskej. Oso xa ueliskia tikijtoskej: “Nikuelitaskia nimitsontajtanis. ¿Toni kinpaleuis tetatmej maj kuali kinojtokaltikan ininkoneuan?”. Ompa ueliskia ika titajtoskej Deuteronomio 6:6, 7. Semi tiyolpakij keman tikpaleuiaj aksa maj mochiua itatojtokakauj Cristo. w19.07 15 § 4, 6, 7

Ompa Lejano Oriente, se tokniuj akin kimati keniuj kinnojnotsas akin amo kipiaj se taneltokalis, kijtoua: “Miakpa, nikan keman aksa kijtoua ke amo kineltoka Dios kijtosneki ke kiita ke amo tapaleuia maj se kinueyichiua tiotsitsin. Nikiluia ke nejua no nikneltoka ke tiotsitsin amo melaujkej, ta sayoj kinchijchiuanij. Nikixtajtoltilia Jeremías 16:20 uan niktajtania keniuj uelis tikmatiskej katiyejua dios akin melauak uan katiyejua diosmej tein sayoj kinchijchiuanij. Kuali nikaki tein nechnankilia uan nikixtajtoltilia Isaías 41:23: ‘Xiktematiltikan tein mochiuas satepan, ijkon tikmatiskej ke namejuan nandiosmej’. Satepan, niknextilia se taman tein Jiova motenkaua kichiuas satepan”. Okse tokniuj takat kijtoua: “Nikinnextilia keniuj Biblia semi tapaleuia, keniuj mochiuani tein ompa ijkuiliujtok uan ika nitajtoua keniuj chijchiujtok tein onkak itech taltikpak uan iluikak. Satepan, nikinpaleuia maj kiitakan keniuj nejon kinextia ke moajsi se Tachijchiujkej. Keman taltikpaknenkej peua kineltoka ke nejon melauak, niknextilia itech Biblia kampa ika tajtoua Jiova”. w19.07 23, 24 § 14, 15

Seki taman tein tayekantok yejua maj moueyitali itokay Dios, maj mochiua tein kiixtalijtok uan maj akin pouij itech nechikol kuali mouikakan uan maj yolseujkanemikan (Mat. 6:9, 10; Juan 13:35). Keman tiktayekanaltiaj nejon tiknextiaj ke tiktasojtaj Jiova. Tatitanil Pablo no kijtoj ke moneki maj ‘amo tikpiakan nepololmej’. Nejon amo kijtosneki ke senkis amo timopoloskejok. Jiova techitas ke amo tikpiaj nepololmej komo timochikauaj okachi titetasojtaskej uan tiktayekanaltiaj tein okachi moneki. Uan tiknextiaj ke titetasojtaj keman timochikauaj amo tikchiuaskej maj aksa kijtako ikuali uikalis iuan Dios. Moneki amo tikauilmatiskej keman technejmachtiaj maj amo tikinuetsiltikan oksekin. Kemej timoixpetaniaj, kemej timotakentiaj uan hasta itech tein titekitij uelis kinuetsiltis oksekin. Xa kuali yetok tein tikchiuaj, sayoj ke tel amo kuali yeskia komo tein tikixpejpenaj kikuejmoloua itanemilil aksa uan kijtakoua ikuali uikalis iuan Dios (Mat. 18:6). w19.08 10 § 9-11

Itech xiuit 1935, tiitaixpantijkauan Jiova peuak tikneltokaj ke “uel miak tagayot” yejuan akin kichiuaj kemej Cristo akin kichiaj nemiskej nochipaya itech taltikpak (Apoc. 7:9, 10). Moneki momachtiskej uan kitakamatiskej itanauatiluan Jiova achto ke Jesús tekiuajtis Mil Xiujmej, ijkon taxikoskej keman mochiuas okachi ueyi tajyouilis. No moneki kichikauaskej inintakuaujtamatilis, ijkon mopaleuiskej keman mochiuas “nochi nijin tajyouilis” (Luc. 21:34-36). Tein kichiaj akin pouij itech “uel miak tagayot” kichiua maj yolpakikan. Kiajsikamatij ke yejua Jiova kiixtalia ox itekitikauan nemiskej iluikak oso taltikpak. Taixpejpenalmej uan akin pouij itech “uel miak tagayot” kimatij ke uelis nemiskej iluikak oso nikan taltikpak sayoj porin Jiova kintasojta uan kinextij keman kitemakak Jesucristo maj kinmakixti (Rom. 3:24). w19.09 28 § 10; 29 § 12, 13

¿Tikselijkej se yankuik tekit? Uelis tiyolpakiskej kampa yeski titapaleuiskej. Maj amo tiknemilikan ke amo kuali tikchiujkej tekit oso ke axkan amo teyi tichiuanimej. Maj tiknemilikan keniuj Jiova techpaleuijtok axkan uan maj tiksentokakan titanojnotsakan. Maj tikchiuakan kemej tokniuan itech yekinika siglo, akin “tanojnotstinenke ika in Tajtoltsin de Dios nouiyampa kampa moajsiaj” (Hech. 8:1, 4). Komo tiksentokaj titanojnotsaj Jiova techtatiochiuis. Kemej neskayot, seki precursores akin kinkixtijkej itech altepet kampa tapaleuijtoyaj yajkej itech okse kampa tajtouayaj inintajtol uan no monekia nepaleuil. Itech sayoj seki metsti peujkej mosentiliaj miakej. Moneki maj okachi techyolpakti kuali timouikaskej iuan Jiova. Yejua ika, maj tiksentokakan timotokikan iuan Dios uan maj titakuaujtamatikan ke techmakas tamatilis, techixyekanas uan techpaleuis. Maj tikelnamikikan ke tein kichiuak maj tikintasojtakan taltikpakneminij kampa tiyetoyaj yejua tiktemoskej tikinpaleuiskej. No ijkon maj tikchiuakan kampa axkan tiyetokej uan maj tikitakan keniuj Jiova techpaleuia maj no tikintasojtakan taltikpakneminij (Ecl. 7:10). w19.08 24, 25 § 15, 16

Moneki timokauaskej maj Jiova techixyekana. Kemej yejuatsin techchijchiuak, kinamiki techiluis toni moneki tikchiuaskej (Apoc. 4:11). Sayoj ke no moneki tiktakamatiskej porin yejuatsin okachi kuali taixyekana. Miakej kipianij tanauatil uan kinixyekananij oksekin. Sayoj ke, Jiova yejua taixyekankej akin okachi tamatkej, tetasojtakej, teajsikamati uan akin okachi teiknelia (Éx. 34:6; Rom. 16:27; 1 Juan 4:8). Timokauaj maj Jiova techixyekana keman timochikauaj tiktakamatiskej itech nochi uan timochikauaj amo totech titakuaujtamatiskej (Prov. 3:5). Komo tikixmatij keniuj tamati Dios, okachi amo ouij timokauaskej maj techixyekana porin itech nochi tein kichiua tikitaj ikualneskayouan (Sal. 145:9). Ijkon kemej okachi tikixmatiskej Jiova, okachi tiktasojtaskej. Uan komo tiktasojtaj, amo moneki techiluis nochi tein moneki tikchiuaskej uan tein amo. w19.09 14 § 1, 3

Satanás kintajyouiltia taltikpakneminij ika tein tamachtia. Kemej neskayot, kineki maj tikneltokakan ke Jiova amo techtapojpoluia uan ke amo technamiki maj techtasojtakan. Nejon se ueyi takajkayaualis uan tetayokoltia (Juan 8:44). Keman timotokiaj iuan Cristo, toTajtsin techtapojpoluia (Mat. 11:28). Uan tein melauj Jiova semi techtasojta (Rom. 8:32, 38, 39). Tekit tein Jesús techmaka amo kemej okseki tekimej tein tikchiuaj. Kemej neskayot, satepan ke tikisaj totekipan, timiakej amo sayoj tisioujtokej, ta no amo tiyolpakij. Sayoj ke, keman tiktekitiliaj Jiova uan Cristo semi tiyolpakij. Xa satepan ke titekitij nochi tonal semi tisioujtokej uan moneki timochikauaskej tiyaskej nechikol. Sayoj ke keman timokepaj tokalijtik kuali timomachiliaj. No ijkon panoua keman timochikauaj titanojnotsatiuij oso timomachtiskej iTajtol Dios. Keman tikchiuaj kuali timomachiliaj. w19.09 20 § 1; 23, 24 § 15, 16

Kemej amo uejkaua ejkos “itonal” Jiova, yejuatsin kichia maj titekititokan itech tanojnotsalis. Moneki tikitaskej ox tiktayekanaltijtokej itekiyo Dios (1 Cor. 15:58). Keman Jesús ika tajtoj tein panoskia itech itamian tonalmej, no kijtoj: “Moneki ma mojmoyaua in kuali Tajtoltsin de Dios [...] nochi tech senmanauak” (Mar. 13:4, 8, 10; Mat. 24:14). Maj titanemilikan itech nejin taman: nochipa keman titanojnotsatij, titapaleuiaj maj mochiua nejon tein Biblia kijtojka. Xijxiujtika, okachi miakej kikakij kuali tanauatilmej ika iTekiuajyo Dios. Kemej neskayot, itech nejin itamian tonalmej semi momiakilianij akin kiteixmatiltiaj iTekiuajyo Dios noyampa taltikpak. Itech xiuit 1914, moajsiaj 5,155 tanojnotsanij itech 43 altepemej. Axkan, moajsij kemej 8,500,000 tanojnotsanij itech 240 altepemej. Sayoj ke ayamo tami. Moneki tiksentokaskej tikteixmatiltiskej ke sayoj iTekiuajyo Dios tayektalis nikan taltikpak (Sal. 145:11-13). w19.10 8 § 3; 9, 10 § 7, 8

Jiova kichiuak maj Barzilái kipaleui tekiuaj David. Keman tekiuaj uan itateuijkauan kicholuijtoyaj Absalón, se ikoneuj David, sioujtoyajya, mayanayaj uan amikiaj. Maski Barzilái katka xiuejya, yejua uan oksekin kipaleuijkej David maski ueliskiaj kinmiktiskej. Barzilái amo kinemilij ke kemej katka xiuejya Jiova amo kitekitiltiskiaok. Ta kitemakak tein kipiaya uan ika kinpaleuij itekitikauan Dios keman kinpolouaya (2 Sam. 17:27-29). ¿Toni techmachtia nejon? Ke maski tiyeskij tixiuejkejya oso amo, Jiova uelis kichiuas maj tikinpaleuikan tokniuan akin nemij noyampa akin amo kipiaj tein ika moixpanoltiskej (Prov. 3:27, 28; 19:17). Hasta komo yejuan amo ueli tikinmakaj teisa, uelis titemakaskej tomin tein ika mochiua itekiyo Dios noyampa taltikpak uan ika uelis kinpaleuiskej tokniuan kampa mochiua se tetsauit (2 Cor. 8:14, 15). w19.10 21 § 6

Komo aksa techyolxokoliani, xa techouijmakas tikintapouiskej oksekin tein tikmachiliaj (Prov. 18:19). Uan no, xa tiknemiliaj ke amo tikpiaj tiempo tikintemoskej kuali tasojiknimej. Sayoj ke maj amo tiknemilikan ke amo tiuelij. Komo tiknekij maj tokniuan techpaleuikan keman tikpiaskej ouijkayomej, moneki axkan maj tikintapouikan tein tiknemiliaj uan tein tikmachiliaj. Nejon semi tapaleuia maj se kinpia kuali tasojiknimej (1 Ped. 1:22). Jesús kinextij ke takuaujtamatia iniuan itasojikniuan keman nochi kintapouiaya (Juan 15:15). No uelis ijkon tikchiuaskej komo tikintapouiaj totasojikniuan tein techyolpaktia, tein techtekipachoua uan tein techyolxokolia. Uan no, moneki kuali tikakiskej akin touan tajtoua porin ijkon xa tikitaskej ke tanemilia kemej tejuan uan ke kiixtalia kichiuas tein tejuan tikixtalijtokej. Komo nochipa titajtouaj iniuan oksekin okachi kuali iniuan timouikaj. Yejua ika, maj tikchiuakan kemej Cindy uan maj tiktemokan titajtoskej iniuan oksekin (Prov. 27:9). w19.11 4 § 8, 9

Itech ueyi tajyouilis xa mopatas tein tikijtoskej itech tanojnotsalis. Axkan tikteixmatiltiaj kuali tanauatilmej ika iTekiuajyo Dios uan tikinchiuaj imomachtijkauan Jesús, sayoj ke ijkuak amo ijkon yeskiok. Biblia kijtoua ke tein tikijtoskej itech tanojnotsalis yeski kemej uejueyi tesiuit (Apoc. 16:21). Xa tiktematiltiskej ke Satanás uan nochi tein kiixyekana senkis ixpoliuis. Satepan tikmatiskej toni tikijtoskej uan keniuj tikchiuaskej. ¿Titanojnotsaskej ijkon kemej ipa tikchiuanij oso tikpataskej? Amo tikmatij. Maski ijkon, nesi ke tiktematiltiskej ika yolchikaualis ke Jiova kiualkuis tatsakuiltilis (Ezeq. 2:3-5). Tein tiktematiltiskej xa kichiuas maj taltikpaktekiuajyomej kitemokan techtsakuiliskej maj amo titanojnotsakanok. Ijkon kemej axkan titakuaujtamatij ke Jiova techpaleuia keman titanojnotsaj, ijkuak no monekis ijkon tikchiuaskej. Senkis tikmatij ke toDios techyolchikauas uan ijkon tikchiuaskej itanejnekilis (Miq. 3:8). w19.10 16 § 8, 9

Tajtol ‘kipoloskej’ kinextia ke komo tiktemouaj tikpiaskej miak taman tein amo moneki uelis techtapololtis. Nejon tein tiknejnekiskej kinextia “mijmikiloyot san” uan ueliskia kijtakos totakuaujtamatilis (1 Tim. 6:9). Yejua ika maj amo tikauakan maj nejon tanejnekilis techijtako. Moneki tikitaskej kemej tein ika Satanás kineki kijtakos totakuaujtamatilis. Maj tikijtokan ke tikpiaj tomin tein ika ueliskia tikouaskej miak taman. ¿Tikchiujtokej tein amo kuali komo tikouaj tein tiknekij sayoj ke amo techpoloua? Xa amo. Maj titanemilikan itech nejin netajtanilmej: Maski ueliskia tikouaskej teisa, ¿tikpiaj tiempo uan chikaualis tein ika tiktekitiltiskej uan tikyekpiaskej? Uan no, ¿ueliskia semi timomatiskej ika nochi tein tikpiaj? ¿Ueliskia nejon kichiuas maj tikchiuakan kemej telpoch akin keman Jesús kiyoleuak maj okachi kitekitili Dios, yejua kiixtopeuak? (Mar. 10:17-22). Okachi kuali maj amo tikpiakan miak taman uan maj tikuikan totiempo uan tochikaualis itech itekiyo Dios. w19.11 17, 18 § 15, 16

Jiova uelis techmakas chikaualis tein ika tikchiuaskej tein tikixtalijkej (Filip. 2:13). Yejua ika maj tiktataujtikan uan maj tiktajtanikan iyektikatsin espíritu tein techpaleuis maj tikpiakan chikaualis. Maj tiksentokakan tiktataujtikan maski tikitaskej ke amo niman technankilia. Jesús kijtoj: “Xiktajtanilikan Dios uan Yejuatsin namechmaktilis [yektikatsin espíritu]” (Luc. 11:9, 13). No, maj tikixtalikan keniuj tikchiuaskej (Luc. 14:28). Uelis tikchiuaskej teisa komo tikixtaliaj keniuj tikchiuaskej. No ijkon keman tikixtaliskej teisa, maj tikijkuilokan nochi tein monekis tikchiuaskej. Komo moneki tikchiuaskej teisa tein ouij uelis tikxexeloskej, ijkon tikitaskej toni techpolouaok tikchiuaskej. Tatitanil Pablo kiniluij tokniuan ompa Corinto maj kixelouanij tepitsin inintomin “cada chikueyi tech ne tayekanatonal domingo”, ijkon amo kichiuaskiaj keman yejua ajsiskia (1 Cor. 16:2). Uan no, komo tikxexelouaj tein moneki tikchiuaskej amo semi tisiouiskej. w19.11 29 § 13, 14

Xa tiknemiliaj ke tikixmatij Jiova porin tikmatij itokay oso seki taman tein kijtouani uan kichiuani. Sayoj ke nejon amo kijtosneki ke kuali tikixmatij. Moneki timomachtiskej tein kinemilia, tein kimachilia uan nochi tein kuali tein kichiua. Sayoj ijkuak peuas tikajsikamatiskej keyej kijtoua uan kichiua teisa. Nejon techpaleuis maj tikmatikan ox kiuelita tein tiknemiliaj uan tein tikchiuaj. Keman tikajsikamatij toni Jiova kineki maj tikchiuakan, moneki maj tikchiuakan. Xa seki taltikpakneminij techkejkelouaj porin tiknekij tiktekitiliskej Jiova uan xa okachi techixnamikij keman peua tiyouij nechikolmej. Sayoj ke Dios amo keman techkauas komo iuan titakuaujtamatij. Ijkon peuas kuali iuan timouikaskej uan ijkon yeski nochipaya. ¿Yekmelauj uelis kuali tikixmatiskej Jiova? Kemaj. w19.12 16, 17 § 3, 4

Tetatmej kemansa kimachiliskej ke semi ouij kuali kiniskaltiskej ininkoneuan, sayoj ke yejuan se inetetayokolil Jiova. Yejuatsin kineki kinpaleuis tetatmej. Ika nejmachkayot kikaki keman motataujtiaj uan kinnankilia ika iTajtol, ika amaixmej uan ika ininneskayo uan inintayolmajxitilis tetatmej akin kuali kiniskaltianij ininkoneuan. Sekin kijtouaj ke tetatmej kinuikilia veinte xiujmej kiniskaltiskej ininkoneuan, sayoj ke tetatmej nochipa yeskij tetatmej. Seki taman tein ika uelis kinpaleuiskej ininkoneuan yejua maj kinnextilikan ke kintasojtaj, maj yetokan iniuan uan maj kinmachtikan iTajtol Dios. Tataman tein kichiua se konet keman kimachtiaj. Sayoj ke miakej akin inintatuan kinmachtianij maj kitasojtakan Jiova momachiliaj kemej Joanna Mae, se tokniuj siuat akin nemi ompa Asia, akin kijtoua: “Niktasojkamati maj totatuan nechmelauanij uan maj nechmachtianij maj niktasojta Jiova. Amo sayoj nechyolitijkej, ta no nechpaleuijkej maj niyolpaki” (Prov. 23:24, 25). Millones akin kitekitiliaj Jiova no ijkon kijtoskiaj. w19.12 27 § 21, 22

Moajsij tokniuan akin moneki maj se kinyolchikaua. Maj tiktemokan tikinyolseuiskej oksekin maski techouijmakas tikchiuaskej. Kemej neskayot, xa amo tikmatiskej toni tikiluiskej oso keniuj tikpaleuiskej akin tajyouijtok. Maski ijkon, uelis tikinyolseuiskej komo ininka timotekipachouaj. Ijkon kemej okachi timotokiskej itech tonal keman tamis tein amo kuali, okachi motaouijkantalis (2 Tim. 3:13). Uan kemej titajtakolejkej uan timopolouaj monekis maj kisentokakan techyolseuikan. Tatitanil Pablo kixikoj ouijkayomej hasta ke momikilij porin akin iniuan kitekitilij Dios kiyolchikaujkej. Komo tikchiuaj kemej yejua, uelis tikinpaleuiskej tokniuan maj kisentokakan kitekitilikan Jiova (1 Tes. 3:2, 3). w20.01 12, 13 § 17-19

Maski taixpejpenalmej kimatij ke se ueyi tatiochiualis maj kinyoleuanij maj yakan iluikak, amo kichiaj maj oksekin semi kintakachiuakan (Filip. 2:2, 3). Kimatij ke keman Jiova kinixpejpenak amo kichiuak maj nochin kimatikan. Yejua ika se tokniuj taixpejpenal amo kichia maj oksekin niman kineltokilikan ke Dios kiixpejpenak. Ta, Biblia kijtoua maj amo niman tikneltokilikan akin kijtos ke tekiuajtis iuan Jesús ompa iluikak. Uan no, kemej amo kinekij maj kintakachiuakan, keman kiixmatij se taltikpaknenkej amo kiluiaj ke taixpejpenalmej uan amo no kijtojtinemij ke Dios kinixpejpenak (1 Cor. 4:7, 8). Akin taixpejpenalmej amo kitemouaj tajtoskej iniuan oksekin taixpejpenalmej ika tein kichiaj kiseliskej oso sayoj yejuan mosentiliskej uan momachtiskej Biblia (Gál. 1:15-17). Komo kichiuaskiaj nejon, kinxexelojtoskiaj tokniuan itech nechikol uan kiixnamiktoskiaj iespíritu Dios tein tapaleuia maj tokniuan itech nechikol yolseujkanemikan uan maj senyetokan (Rom. 16:17, 18). w20.01 28 § 6, 7

Itech ueyi tajyouilis, ejkos tonal keman akin kiitakej keniuj ixpoliuik inintaneltokalis kualaniskej porin kiitaskej ke totaneltokalis amo kiixpolojkej. Kampa yeski kiteixmatiltiskej hasta itech Internet, ke amo kiuelitaj ke tiksentokaj titaueyichiuaj. Nejon no kichiuas maj taltikpaktekiuajyomej uan inintaixyekankauj Satanás techtauelitakan porin amo uelik kinixpolojkej nochin taneltokalismej. Yejua ika kinekiskej techixpoloskej. Ijkuak, taltikpaktekiuajyomej mochiuaskej Gog tein poui Magog. Yejuan kisenixnamikiskej ixolal Jiova (Ezeq. 38:2, 14-16). Kemej amo tikmatij nochi tein mochiuas itech ueyi tajyouilis, xa techtekipachos tein ijkuak panos. Sayoj ke amo onkak keyej timouiskej porin Jiova techiluis toni tikchiuaskej tein ika timopaleuiskej (Sal. 34:19). w19.10 16, 17 § 10, 11

Amo sayoj tikijtouaj ke timotasojkamatij, ta tiknextiliaj Jiova ika tein tikijtouaj uan tikchiuaj. Axkan miakej amo ijkon kichiuaj. Taltikpakneminij amo kitasojkamatiliaj Dios tein kinmaka. Nejon tein kichiuaj kinextia ke tinemij itech itamian tonalmej (2 Tim. 3:1, 2). Maj amo keman tikchiuakan kemej yejuan. Jiova no kineki maj ijkon mouikakan ikoneuan. Netasojtalis tein timopialiaj se iuan okse techixnextia kemej akin yekmelauj kichiuaj kemej Cristo (Juan 13:35). Se itekitikauj Dios kijkuiloj: “¡Semi kuali uan semi teyolpaktij maj tokniuan kualtsin sennemikan!” (Sal. 133:1). Keman tikintasojtaj tokniuan, tiknextiliaj Jiova ke no tiktasojtaj (1 Juan 4:20). Semi kualtsin maj timoajsikan kemej kalyetouanij iniuan tokniuan akin ‘mopaleuiaj ika tetasojtalis se uan okse’ uan moikneliaj (Efes. 4:32). w20.02 9 § 6, 7

Tein kitajyouiltiaya Ana amo niman ixpoliuik. Yejua kisentokaya nemia itech kali kampa nemia Peniná. Uan Biblia amo kijtoua ke Peniná amo kitajyouiltijok. Yejua ika Ana xa kisentokak kixikoj nochi tein kiluiaya. Sayoj ke uelik oksepa kipiak yolseuilis. Maj tikelnamikikan ke amo tayokoyakok satepan ke kitapouij Jiova tein kipanotoya. Kikauak maj Jiova kiyolseuiani uan kipaleuiani maj kuali momachili. Uan satepan Jiova kinankilij inetataujtil uan kinpiak konemej (1 Sam. 1:2, 6, 7, 17-20). Uelis tiyolseuiskej maski amo ixpoliuis tein techtekipachoua. Seki ouijkayomej xa tiksentokaskej tikpiaskej maski semi tiktataujtiskej Jiova uan nochipa tiyaskej nechikolmej. Sayoj ke tein kipanok Ana technextilia ke nion teyi uelis kitsakuilis maj Jiova techyolseui. Yejuatsin amo keman techelkauas, uan amo uejkaua techtiochiuas komo amo tikauaj (Heb. 11:6). w20.02 22 § 9, 10

Tayekananij nochipa kitemakaj tayolmajxitilis tein kisa itech Biblia tein uelis kinpaleuis oksekin maj kichiuakan teisa ika tamatilis. ¿Keyej semi moneki maj tajtokan keman moneki? Maj tikitakan ineskayo Elí. Tayekankatiopixkat Elí kinpiaya ome ikoneuan akin semi kintasojtaya. Sayoj ke nejin takamej amo kipoujkaitayaj Jiova. Yejuan katkaj tiopixkamej itech tabernáculo. Sayoj ke kichiuayaj tein amo kinamikia, kikuiliayaj Jiova netetayokolilmej tein yayaj kimakatij uan semi auilnemiaj (1 Sam. 2:12-17, 22). Tanauatil tein kiselijka Moisés kijtouaya ke monekia kinmiktiskej, sayoj ke Elí amo teyi kichiuak. Sayoj tepitsin kinajuak uan kinkauak maj kisentokanij kemej tiopixkamej (Deut. 21:18-21). ¿Keniuj kiitak Jiova tein kichiuak Elí? Yejuatsin kiluij: “¿Keyej okachi tikinpatiuita mokoneuan ke nejua?”. Yejua ika kiixtalij kinixpolos nejon ome takamej akin semi kichiuayaj tein amo kuali (1 Sam. 2:29, 34). w20.03 19 § 4, 5