Septiembre

Tein Jiova uan Jesús kichiuanij amo kinextia ke amo moneki timoseuiskej. Jiova amo keman sioui, yejua ika amo moneki moseuis kemej tejuan. Sayoj ke Biblia kijtoua ke satepan ke kichijchiuak iluikak uan taltikpak, amo tekitikok uan moseuij (Éx. 31:17). Nejin kijtosneki ke satepan ke tachijchiuak yolpakik ika itachijchiualis. Uan Jesús, keman yetoya nikan taltikpak semi tekitik, maski ijkon no kitemoj moseuis uan takuas iniuan itasojikniuan (Mat. 14:13; Luc. 7:34). Biblia techiluia akin tiitekitikauan Dios maj titekitikan uan maj amo titatsiuikan (Prov. 15:19). Xa titekitij porin moneki tikintekipanoskej tochankauan. Uan tinochin moneki titanojnotsaskej. Sayoj ke, no moneki maj kuali timoseuikan. w19.12 2 § 2; 3 § 4, 5

Maj amo titetapouikan tein kichiuaj amokuali ejekamej. Maj tikchiuakan kemej Jesús. Keman nemia ompa iluikak, kimatik miak taman tein Satanás uan amokuali ejekamej kichiuayaj. Sayoj ke, keman ualaj nikan taltikpak, amo kitetapouijtinemik tein kichiuayaj, ta okachi kinekia kiteixmatiltis Jiova, amo Satanás. Ijkon kemej Jesús, tejuan amo titetapouijtinemij tein kichiuaj amokuali ejekamej. Ta okachi kuali, tiknextiaj ika totajtoluan ke semi tiyolpakij ika “se taman tein teyolpaktia”, nejin yejua tamachtilis tein melauak (Sal. 45:1). Maj amo tikinmouilikan amokuali ejekamej. Tinochin uelis techpanos se taman tein amo kuali. Keman amo tikchiaskej, uelis techpanos se ijsiujkayot, tikokolispeuaskej oso hasta timikiskej. Sayoj ke ¿moneki tiknemiliskej ke inintajtakol amokuali ejekamej? Biblia kimelaua ke tinochin uelis techpanos tein amo tikchiaj oso se “tachiualis tein amo momattok” (Ecl. 9:11). Jiova kinextiani ke okachi chikauak ke amokuali ejekamej. w19.04 23, 24 § 13, 14

¿Tatakamatij tayekananij keman tekiuanij tanauatiaj maj se kiteluili akin ika mauiltia se konet? Kemaj. Itech xolalmej kampa motanauatia maj ijkon mochiua, tatakamatij. Nejon amo kiixnamiki itanauatiluan Dios (Hech. 5:28, 29). Yejua ika, keman tayekananij kimatij ke mochiuak se tajtakol kemej nejon, niman tanotsaj sucursal uan tajtanij toni moneki kichiuaskej uan ijkon kitakamatiskej tein tekiuanij kiixtalianij maj mochiua keman aksa ika mauiltia se konetsin. Tayekananij kiniluiaj akin ininka mauiltianij, inintatuan uan akin kimati tein panok ke uelis kiteluiliskej ininixpan tekiuanij akin ika mauiltij konetsin. Sayoj ke, ¿komo akin kiteluiliaj poui itech nechikol uan miakej kimatij tein panok? ¿Monekiskia kinemilis tokniuj akin kiteluilij ke kichiuani maj amo kuali ika tajtokan Dios? Amo. Akin kichiuani maj amo kuali ika tajtokan itokay Dios yejua akin tajtakoj. w19.05 10 § 13, 14

Biblia kiniluia namikuanij ke moneki mopoujkaitaskej uan kichiuaskej tein motenkaujkej ijkuak monamiktijkej. No kinelnamiktia ke moneki kiixtaliskej nochipa senyetoskej. Yejua ika Biblia kijtoua: “Takat kikauas ipopaj uan imomaj, uan mosentilis iuan inamik, uan mochiuaskej sayoj se” (Gén. 2:24). Sayoj ke, akin moixyekanaj ika inintanemilil taltikpakneminij kijtouaj ke sejse akin namikej moneki kitayekanaltis sayoj yejua mopaleuis. Se amatajkuilol tein ika tajtoua keman kitsayanaj amat ininixpan tekiuanij, kijtoua: “Keman sekin monamiktiaj uan motenkauaj senyetoskej amo kijtouajok ‘hasta keman mikilis techxelos’, ta kijtouaj ‘hasta keman amo timotasojtaskejok’”. Nejon tein kinemiliaj kichiuani maj kalyetouanij moxexelokan uan maj semi tajyouikan. Kemej tikitaj, maj ijkon kiitakan nenamiktilis senkis amo tapaleuia. w19.05 24 § 12

Pablo motekipachouaya porin nesi seki tokniuan tanemiliayajya kemej akin Satanás kinixyekana (Efes. 4:17-19). Nejon uelis techpanos tinochin. Satanás akin taixyekantok nikan taltikpak, kikui miak taman tein ika kitemoua kipatas totanemilil. Kemej neskayot, komo kiita ke tiknejnekij tikpiaskej miak taman uan tiyeskij tiueyichiuanimej, ika kitemos maj tikauakan Jiova. Hasta uelis kikuis tein tikpanouanij, tein kichiuaj itech toaltepeuj oso tein techmachtianij uan ika kichiuas maj titanemilikan kemej yejua kineki. ¿Uelis timokixtiliskej tanemililmej tein semi chikaujkej? (2 Cor. 10:4.) Maj tikitakan tein kijtoj Pablo: “Tikuetsiltijtokej tanemililmej uan nochi tein moueyichiua tein moajokui uan kiixnamiki itaixmatilis Dios; uan tiktaliaj kemej takeual nochi tanemilil uan ijkon tikchiuaskej maj kitakamati Cristo” (2 Cor. 10:5, TNM). Kemej tikitaj, ika inepaleuil Jiova uelis timokixtiliskej nejon tanemililmej. w19.06 8 § 1-3

Maski Ana, David uan se salmista semi motekipachojtoyaj kitemojkej inepaleuil Jiova. Kitapouijkej nochi tein kipanotoyaj. Kiluijkej keyej semi motekipachojtoyaj. Uan kisentokayaj monechikouayaj kampa kiueyichiuayaj yejuatsin (1 Sam. 1:9, 10; Sal. 55:22; 73:17; 122:1). ToDios akin tetasojta sejse kinankilij. Ana amo motekipachojok (1 Sam. 1:18). David kijkuiloj: “Miak ouijkayomej kipia akin yolmelauak, sayoj ke Jiova kimakixtia itech nochi nejon” (Sal. 34:19). Uan salmista kimachilij ke Jiova kikitskilij ‘iyekmayʼ uan kiyekanak ika itayolmajxitilis (Sal. 73:23, 24). ¿Toni techmachtiaj nejon neskayomej? Kemansa, ouijkayomej kichiuaskej maj semi timotekipachokan. Sayoj ke amo timosenkauaskej komo titanemiliaj keniuj Jiova kinpaleuiani oksekin, tiktataujtiaj uan tiktakamatij itech nochi (Sal. 143:1, 4-8). w19.06 17, 18 § 14, 15

Maski taltikpakneminij techijtouiliskej oso techchiuiliskej miak taman, maj amo keman timopinaujmatikan tiyeskij tiitaixpantijkauan Jiova (Miq. 4:5). Maj tikitakan tein kichiujkej tatitanilmej ompa Jerusalén satepan ke Jesús kimiktijkej. Yejuan kimatiaj ke tayekananij judíos semi kintauelitayaj (Hech. 5:17, 18, 27, 28). Maski ijkon, mojmostaj yayaj templo uan ompa tanojnotsayaj (Hech. 5:42). Amo mokaujkej maj kinmojmoujtianij. Tejuan amo no techmojmoujtiskej komo nochipa timoteixmatiltiaj kemej tiitaixpantijkauan Jiova kampa titekitij, kampa timomachtiaj oso kampa tinemij (Hech. 4:29; Rom. 1:16). Tatitanilmej yolpakiaj porin kimatiaj keyej kintajyouiltiayaj. Kiitayaj kemej se tatiochiualis tajyouiskej porin kichiuayaj itanejnekilis Jiova (Luc. 6:23; Hech. 5:41). (1 Ped. 2:19-21). Keman tikajsikamatij ke taltikpakneminij techtauelitaj porin tikchiuaj tein kuali, tein techchiuiliaj amo techtsakuilia maj tiksentokakan tiktekitilikan Dios. w19.07 7 § 19, 20

Jesús uan itatojtokakauan, akin katkaj judíos, moseuiayaj itech tonal sábado porin kitakamatiaj Tanauatil tein Dios kimakak Moisés. Ika tein Jesús kijtoj uan kichiuak kinextij ke nejon tonal ueliskiaj kinpaleuiskej oksekin (Mat. 12:9-11). Yejua amo kiitaya ke kitapanauiliayaj Tanauatil komo kichiuayaj tein kuali itech tonal sábado. Tein kichiuak kinextij keyej moixtalijka maj amo se tekiti nejon tonal. Kemej israelitas amo tekitiaj, ueliaj kitayekanaltiayaj kiueyichiuaskej Dios. Ichankauan Jesús kiueyichiuayaj Dios itech tonal sábado, kemej kinextia tein kichiuak ompa Nazaret kampa kayot katka. Biblia kijtoua ke kemej ipa momattoya kichiuas “kalakik tech in tiopan de judíos, [...] moketsak uan peuak kinleerouilia in takakini in Tajtoltsin de Dios” (Luc. 4:15-19). Uan no, itatojtokakauan Jesús kitakamatiaj tanauatil ika tonal sábado, yejua ika keman Jesús momikilij amo teyi kichiuilijkej inakayo, ta hasta mostika kichijchiujkej xiuit uan aceite tein ajuiyak tein kitaliliskiaj (Luc. 23:55, 56). w19.12 4 § 10

Nochin akin titanojnotsaj uelis tikinajsiskej akin yekmelauj kinekij kiixmatiskej Dios. Nejin tamati kemej ijkuak kitemouaj se konet tein poliuik. ¿Keyej? Maj tikitakan tein kipanok se konetsin akin kipiaya eyi xiuit. Yejua poliujka. Keman kitemojkej tapaleuijkej kemej quinientos taltikpakneminij. Veinte horas satepan semej akin tapaleuij kiajsik milaj. Sayoj ke amo kijtoj ke yejua kiajsika, ta kijtoj: “Tikajsikej porin tel miakej titapaleuijkej”. Kemej nejon konetsin miakej kemej yeskia no poliujtokej. Amo kimatij tein kuali tein Dios kichiuas, sayoj ke kinekij maj kinpaleuikan. Panoua ocho millones tiitaixpantijkauan Jiova tikintemojtokej nejon taltikpakneminij. Kampa titanojnotsaj xa tejuan amo tikajsinij aksa akin kineki momachtis Biblia, sayoj ke okseki tokniuan kemaj. Keman se tokniuj kiajsi aksa uan kipaleuia maj mochiua imomachtijkauj Cristo, tinochin tiyolpakij. w19.07 16 § 9, 10

Tatitanil Pablo kinelnamiktij tokniuan akin nemiaj Filipos ke monekia kisentokaskej taxikoskej. Keman mopeualtij nechikol peujkej kintajyouiltiaj. Itech xiuit 50, Pablo uan Silas ajsikej Filipos satepan ke Dios kiniluij maj yakan Macedonia (Hech. 16:9). Ompa kinojnotskej Lidia, se siuat akin kinkakik uan Jiova “kiyoltapoj para uelis kajsikamatis” kuali tanauatilmej (Hech. 16:14). Satepan yejua uan ichankauan moauijkej. Sayoj ke, Amokuali kitemoj kintsakuilis. Itech nejon xolal seki takamej kititilatskej Pablo uan Silas hasta ininixpan tekiuanij uan kinteluilijkej ke takuejmolchiujtinemiaj. Yejua ika, kinmaakej, kintsakkej uan kiniluijkej maj kisanij (Hech. 16:16-40). ¿Taxikojkej? Kemaj. ¿Uan tokniuan ompa Filipos? Kikaujkej se kuali neskayot porin no taxikojkej. Semi kinpaleuij ineskayo Pablo uan Silas. w19.08 2 § 1, 2

Itech tein kuali poui maj tiktasojtakan Jiova uan itekitikauan. No maj tikteixmatiltikan ke titakuaujtamatij itech Jesús uan tein tikchiaj. Tikchiuaj tein kuali keman tiktayekanaltiaj tikinpaleuiskej oksekin maj mochiuakan itatojtokakauan Cristo (Mat. 28:18-20). Tein yeski tein tikpanotoskej, uelis tiyeskij kemej se tanex itech taltikpak. Kemansa, tein ueliskia techtsakuilis maj titanojnotsakan uelis techpaleuis maj tikchiuakan. Ijkon kipanok tatitanil Pablo. Keman kintajkuilouilij filipenses tsaktoya ichan ompa Roma. Maski ijkon kinnojnotsaya akin kipixtoyaj uan akin kikalpanouayaj. Ineskayo kinyolchikauak tokniuan maj tanojnotsakan “ika in Tajtoltsin de Dios [...] pero amo ika moukayot” (Filip. 1:12-14; 4:22). w19.08 12 § 15, 16

Okachi timochikauaj amo timoueyinekiskej porin nejon kiyolpaktia Jiova. Tatitanil Pedro ika tajtoj nejon keman kijkuiloj tein moajsi itech tajkuilol tein axkan tikitaj. Uan no, itech amatajkuilol “Ven, sé mi seguidor” capítulo 3 párrafo 23, kijtoua: “Semi amo kuali maj se moueyineki. Dios kiixtopeua akin moueyineki, yejua ika maski ueli kichiua miak taman amo uelis kitekitilis. Sayoj ke, akin amo moueyineki maski amo ueli kichiua miak taman Jiova uelis semi kitekitiltis”. Uan no kijtoua ke toDios “semi kiyolpaktis techtiochiuas komo no tiknextiaj ke amo timoueyinekij”. Senkis tikmatij ke tein okachi kuali yejua maj se kiyolpakti Jiova (Prov. 23:15). Amo sayoj kiyolpaktia Jiova maj amo timoueyinekikan, ta no semi techpaleuia. Komo amo timoueyinekij oksekin kinekiskej yetoskej touan. Uelis tikajsikamatiskej nejon komo tiknemiliaj iniuan akonimej tikuelitaj tiyetoskej (Mat. 7:12). w19.09 4 § 8, 9

Tayekananij tekitij chikauak uan ijkon kinpaleuiaj tokniuan. Uan amo moueyinekij porin kipiaj tanauatil, ta tapaleuiaj ika netasojtalis itech nechikol (1 Tes. 2:7, 8). Kemej yolyemankej uan tetasojtaj amo kinchikaujkanojnotsaj oksekin. Andrew, akin miak xiujmejya tapaleuiani kemej tayekankej kijtoua: “Nikitani ke keman se tayekankej kualtakat uan tetasojtakej, tokniuan okachi yolpakij. Nejon tein tayekananij kinextiaj kinolinia tokniuan maj tatakamatikan”. Uan Tony, akin no miak xiujmejya tapaleuiani kemej tayekankej, kijtoua: “Nimochikaua nikchiuas tein kijtoua Filipenses 2:3 uan nikinitas oksekin ke okachi ueyichiuanimej ke nejua. Nejon nechpaleuia maj amo nitanajnauati itech nechikol”. Jiova amo moueyineki uan tayekananij no moneki ijkon kichiuaskej. Maski yejuatsin akin okachi ueyichiujkej, moixpiloua uan kiajokui “akin amo ueli mopaleuia” (Sal. 18:35; 113:6, 7). Tein melauj, kintauelita akin moueyinekij (Prov. 16:5). w19.09 16, 17 § 11, 12

Kuali timomachiliskej ika iyugo Jesús komo tiktekitiliaj Jiova kemej yejuatsin kineki. Tekit tein tikchiuaj iaxka Jiova, yejua ika moneki tikchiuaskej kemej technauatia. Tejuan sayoj titekitinij uan yejuatsin toTeko (Luc. 17:10). Komo tikchiuaj tekit kemej tejuan tiknekij, timotajyouiltiskej ika yugo tein tikuikaj. Sayoj ke, uelis tikchiuaskej miak taman uan tikixnamikiskej tein yeski ouijkayot komo tiktekitiliaj Jiova kemej kineki. Maj tikelnamikikan ke amo akin uelis kitsakuilis maj mochiua itanejnekilis (Rom. 8:31; 1 Juan 4:4). Tiknekij tikueyichiuaskej Jiova. Yejua nejon tein okachi tiktemouaj. Itech yekinika siglo, moajsikej akin sayoj kitayekanaltijkej tein kinekiaj. Yejua ika, amo yolpakkej uan kikaujkej iyugo Jesús (Juan 6:25-27, 51, 60, 66; Filip. 3:18, 19). Sayoj ke, moajsikej akin tekitikej porin kitasojtayaj Dios uan oksekin. Keman nemiaj nikan taltikpak kinyolpaktij kiuikaskej iyugo Jesús uan kichiayaj tekitiskej iuan ompa iluikak. Tejuan no tiyolpakiskej komo tikuikaj iyugo porin tiknekij tikueyichiuaskej Jiova. w19.09 20 § 1; 24, 25 § 19, 20

Nejon kichiua maj Dios techseli uan maj amo techkuejmolo totanemilil. Nochi nejon semi techyolpaktia. Satepan senkis techmakixtiskej porin amo uejkaua Jesús kinixpolos taneltokalismej tein amo melaujkej uan taltikpaktekiuajyomej. Dios kinmatampauis “uel miak tagayot” akin kitekitiliaj uan kinmakas miak tatiochiualismej itech xochital nikan taltikpak (Apoc. 7:9, 14). Uan no, Dios kichiuas maj miakej akin momikilijkejya oksepa nemikan uan uelis nemiskej nochipaya porin amo kipiaskejok tajtakol (Hech. 24:15). Keman Jesús taixyekantos Mil Xiujmej, yejua uan akin iuan tekiuajtiskej kinpaleuiskej taltikpakneminij maj amo kokolispeuakanok uan maj mochiuakan ikoneuan Dios. Nejon tein mochiuas yeski kemej Jubileo tein mochiuaya ompa Israel. Nochin akin amo kikauaskej Jiova amo kipiaskejok tajtakol. w19.12 12, 13 § 14-16

Itech yekinika siglo, se takat akin itokay José (akin no moixmatia kemej Bernabé) mokauak maj Jiova kitekitilti (Hech. 4:36, 37). Keman Saulo mochiuak itatojtokakauj Cristo, miakej tokniuan kimouiliayaj porin kimatiaj ke kintajyouiltijka itekitikauan Dios. Sayoj ke Bernabé kipaleuij Saulo (Hech. 9:21, 26-28). Satepan, tayekananij ompa Jerusalén kimatkej ke tokniuan akin kayomej Antioquía de Siria, se xolal tein uejka moajsia, monekia maj kinyolchikauakan. Yejua ika kititankej Bernabé. Kuali tein kichiujkej porin Biblia kijtoua ke Bernabé “kinyolmajxitiaya in taneltokani ke ma kisentokakan takuautamatiyakan iuan Totekotsin ika nochi nintanejnekilis” (Hech. 11:22-24). Axkan, Jiova no uelis techpaleuis maj tikmatikan keniuj tikinyolseuiskej tokniuan, kemej neskayot, akin tajyouiaj porin momikiliani se akin kitasojtaj. Oso xa techolinis maj tikalpanokan oso maj tiknotsakan aksa akin mokokoua oso tayokoya uan maj tikiluikan teisa tein kiyolchikauas. ¿Tikauaskej maj Jiova techtekitilti kemej kichiuak iuan Bernabé? (1 Tes. 5:14). w19.10 22 § 8

Kemansa, titanojnotsaj iniuan tokniuan, amo sayoj tikitaj ininkualneskayouan, ta no ininnepololuan. Keman ijkon panos, ¿toni uelis tikchiuaskej? Amo uelis tikchiaskej maj tokniuan amo mopolokan. Yejua ika, maj timochikauakan okachi kuali timouikaskej iniuan totasojikniuan. Komo se totasojikniuj mopoloua, xa monekis tikyolmajxitiskej ika Biblia, sayoj ke ika netasojtalis (Sal. 141:5). Uan komo techyolkokoua moneki tiktapojpoluiskej. Keman tikchiuaskej maj amo oksepa ika titajtokan. Axkan okachi moneki maj tikitakan ininkualneskayouan tokniuan uan amo ininnepololuan. Ijkon, okachi kuali iniuan timouikaskej. Uan semi moneki maj tikchiuakan porin monekis timopaleuiskej iniuan totasojikniuan itech ueyi tajyouilis. w19.11 6 § 13, 16

Keman tikinmachtiskej ika Biblia oksekin, moneki tikinpaleuiskej maj mochiuakan imomachtijkauan Jesús uan maj tikinmachtikan maj kichiuakan tein yejua tanauatij. Moneki tikinpaleuiskej maj kiajsikamatikan ke motelneki maj Jiova kinixyekana uan maj kipaleuikan iTekiuajyo. Nejin kijtosneki ke moneki maj tikinpaleuikan maj kichiuakan ijkon kemej momachtiaj, maj motemaktikan iuan Jiova uan maj moauikan. Sayoj ijkon momakixtiskej keman ejkos itonal Jiova (1 Ped. 3:21). Amo uejkaua ixpoliuis tein amo kuali. Yejua ika, amo uelis tiksentokaskej tikinmachtiskej akin amo kinekij mochiuaskej imomachtijkauan Cristo (1 Cor. 9:26). Axkan ke ueliok maj tiksentokakan tikchiuakan nejin tekit tein motelneki porin miakej monekiok kikakiskej kuali tanauatilmej. w19.10 11 § 14, 15

Xijxiujtika, itech Tonal keman Kintapojpoluiayaj ininTajtakoluan israelitas mosentiliayaj uan tayekankatiopixkat kintemaktiaya tapialmej. Nejon kinelnamiktiaya israelitas ke monekia kinkixtiliskej tajtakol. Yekinika, tayekankatiopixkat kichiua maj kopal peua popoka uan kualtsin peua taajuiyaya. ¿Toni techmachtia nejon? Biblia kinextia ke kopal tein popoka kemej yeskia ininnetataujtil itekitikauan Dios (Sal. 141:2; Apoc. 5:8). Maj tikelnamikikan ke tayekankatiopixkat tapopochuiaya iixpan Jiova ika miak poujkaitalis. No ijkon, keman timotataujtiaj tikchiuaj ika miak poujkaitalis. Semi tikpatiuitaj maj toTachijchiujkauj techkaua maj iuan timotokikan, kemej kichiua se konetsin iuan ipopaj (Sant. 4:8). Techselia kemej tiitasojikniuan (Sal. 25:14). Nejon se ueyi tatiochiualis tein tikpiaj, yejua ika amo tiknekij tikchiuaskej teisa tein amo kiyolpaktis. w19.11 20, 21 § 3-5

¿Keniuj kiitaj tekit kampa tinemij? Itech miak altepemej, taltikpakneminij semi tekitij. Yejua ika amo kipiajok tiempo moseuiskej, yetoskej iniuan ininchankauan nion no kitemoskej Dios (Ecl. 2:23). Sayoj ke, sekin amo kiuelitaj tekitiskej uan kitemouaj amo kichiuaskej (Prov. 26:13, 14). Kemej tikitaj, miakej semi tekitij uan oksekin amo semi. Sayoj ke, ¿keniuj kiitaj tekit Jiova uan Jesús? Tikmatij ke Jiova kiuelita tekitis, Jesús ijkon kinextij keman kijtoj: “Notajtsin tekititiuits hasta axkan uan Nejuatsin nitekititok axkan” (Juan 5:17). Jiova kinchijchiuak tel miak ángeles, sitalimej uan okseki taman ompa iluikak. Uan nikan taltikpak kichijchiuak miak taman tein semi kualtsin. w19.12 2 § 1, 2

¿Toni kipaleuij David maj kuali mouika iuan Jiova? David kiixmatik Jiova ika itachijchiualis. Keman katka telpoch miak horas kinyekpiak iichkauan ipopaj ompa ixtauat. Xa ijkuak peuak itech tanemilia tein Jiova kichijchiuak. Kemej neskayot, keman youak ajkotachiaya amo sayoj kinitaya miakej sitalimej, ta no tanemiliaya keniuj toTajtsin kinextiaya tein kuali itech itachijchiualis. (Sal. 19:1, 2). No kiitaya keniuj Jiova semi tamatkej keman tanemiliaya kemej chijchiujtokej taltikpakneminij (Sal. 139:14). Keman David tanemiliaya keniuj chijchiujtok tein Dios kichijchiuani, yejua moitaya semi tsikitsin (Sal. 139:6). ¿Toni techmachtia? Keman teisa tikchiujtoskej maj tiknemilikan keniuj tein tikitaj kemej: koujmej, tapialmej uan taltikpakneminij, techpaleuia maj okachi tikixmatikan yejuatsin. Ijkon, mojmostaj okachi tikixmatiskej toTajtsin (Rom. 1:20). Uan tikitaskej keniuj ijkon kemej panotiyaskej tonalmej okachi tiktasojtaskej. w19.12 19, 20 § 15-17

Moisés amo kinekik yeski se ueyichiujkej. Keman kinpaleuij hebreos akin katkaj takeualmej ompa Egipto, kimatia ke faraón semi kualaniskia. Yejua katka se tekiuaj ueyichiujkej uan egipcios kiitayaj kemej se dios. Kemej tikitaj, Moisés kinextij ke takuaujtamatia iuan Jiova. Nejon kipaleuij maj nochipa kuali iuan mouika (Prov. 3:5). ¿Toni techmachtia ineskayo Moisés? Ke ijkon kemej yejua, tinochin moneki tikixpejpenaskej ox tiktekitiliskej Dios uan ox tiyetoskej itech ixolal. Xa monekis tikauaskej seki taman uan ijkon tiktekitiliskej uan xa no akin amo kiixmatij yejuatsin techtajyouiltiskej. Sayoj ke, komo titakuaujtamatij iuan toTajtsin senkis tikmatij ke techpaleuis. w19.12 17 § 5, 6

Maski tichijchiujtokej ika talnex, Jiova semi techpatiuita. Maj tikitakan seki taman tein kinextia ke Jiova semi techpatiuita. Kemej neskayot, techchijchiuak kemej uelis tiknextiskej ikualneskayouan (Gén. 1:27). Ijkon, okachi techuejkapantalij ke okseki taman tein kichijchiuak uan techkauak maj tikixyekanakan tein onkak nikan taltikpak (Sal. 8:4-8). Maski Adán tajtakoj, Jiova kisentokak kinpatiuita taltikpakneminij. Yejuatsin semi techpatiuita, yejua ika kitemakak iKonetsin, Jesús maj techmakixti (1 Juan 4:9, 10). Ika inemilis Jesús tein kitemakak, Jiova oksepa kinajokuis akin momikilijkejya, “amo sayo in yolkualime. Ta, no nekes ten amo yolkualime” (Hech. 24:15). Biblia kinextia ke Dios techpatiuita, maski timokokouaj, amo techajsi tomin oso tixiuejkejya (Hech. 10:34, 35). w20.01 15 § 5, 6

Nejin amo se taman tein kalyetouanij mopanoltiliaj, ta Dios kinixpejpena (1 Tes. 2:12). Amo no tikintajtaniskej tein uelis kinkuejmolos. Kemej neskayot, amo keman tiktajtaniskej se tokniuj siuat akin inamik taixpejpenal keniuj momachilia keman kinemilia ke inamik amo iuan nemis nochipaya nikan taltikpak. Ta tikmatij ke itech yankuik taltikpak Jiova techmakas nochi tein tiknejnekij (Sal. 145:16). Uan no, keman amo tikinitaj taixpejpenalmej kemej okachi ueyichiuanimej ke oksekin, semi techpaleuia. ¿Keyej? Biblia kijtoua ke sekin taixpejpenalmej ueliskia kikauaskej Jiova (Mat. 25:10-12; 2 Ped. 2:20, 21). Sayoj ke, komo amo semi tikintakachiuaj akin kipiaj se ueyi tekit, amo tikinitaskej kemej ueyichiuanimej, maski yeskij taixpejpenalmej, semi kinixmatiskej oso miak xiujmejya kitekitilijtoskej Jiova (Jud. 16). Ijkon, komo yejuan kikauaj Jiova, tejuan tiksentokaskej tiktekitiliskej. w20.01 29 § 9, 10

Kemej ‘Dios semi techyoltasojta porin tiikoneuan’, timochikauaj tikchiuaskej kemej yejuatsin. Tikchiuaj kemej yejuatsin keman tikinnextiliaj oksekin ke tikintasojtaj, tikualtakamej iniuan uan tikintapojpoluiaj. Akin amo kiixmatij Dios xa kinekiskej okachi kiixmatiskej komo kiitaj ke tikchiuaj tein kuali (1 Ped. 2:12). Tetatmej akin kichiuaj kemej Cristo moneki kintasojtaskej ininkoneuan ijkon kemej Jiova techtasojta. Komo kichiuaj, ininkoneuan xa no kinekiskej kuali mouikaskej iuan toTajtsin akin semi techtasojta. Tejuan tiyolpakij ika titajtoskej Totajtsin, Jiova, uan tiknekij maj oksekin kiixmatikan. Timomachiliaj kemej tekiuaj David, akin kijkuiloj: “Ika miak pakilis nikteixmatiltis Jiova” (Sal. 34:2). Sayoj ke tisekimej xa tipinauaj uan yejua ika amo tikteixmatiltiaj toTajtsin. ¿Toni techpaleuis? Komo tikelnamikij ke semi tikyolpaktiskej Jiova komo tikteixmatiltiaj uan ke oksekin semi kinpaleuis komo kiixmatij. Yejuatsin techpaleuis maj tiknextikan yolchikaualis. Ijkon kemej kinpaleuij tokniuan itech yekinika siglo, tejuan no techpaleuis (1 Tes. 2:2). w20.02 11 § 12, 13

Miakej akin momachtiaj Biblia moauiaj. Sayoj ke sekin akin tikinmachtiaj kimouiliaj mochiuaskej imomachtijkauan Cristo. Kiuelitaj momachtiskej sayoj ke amo kiixtaliaj moauiskej. Tiknekij tikpaleuiskej akin tikmachtijtokej ika Biblia maj kichiua tein momachtia uan maj mochiua imomachtijkauj Cristo. Jiova kineki maj taltikpakneminij kitekitilikan porin kitasojtaj. Yejua ika, moneki tiktemoskej tikinpaleuiskej akin tikinmachtiaj maj kiajsikamatikan ke Jiova semi ininka motekipachoua sejsemej uan ke semi kintasojta. Tiknekij tikinpaleuiskej maj kiitakan Jiova kemej “ininpopaj mikakaualmej uan akin kinmatampauia siuamej akin amo nemiok inintakauj” (Sal. 68:5). Keman akin tikinmachtiaj Biblia kiitaskej ke Dios semi kintasojta, xa yejuan no peuaskej kitasojtaskej. Yejuan ika maj tikinpaleuikan maj kiajsikamatikan ke Dios akin tetasojta kineki maj tinemikan nochipaya uan ke yejuatsin kitemoua kinpaleuis maj kiselikan nejon. w20.01 3 § 7, 8

Tatitanil Pablo amo moueyimatia, yejua ika kitemoj maj kiyolseuikan akin kuali iniuan mouikaya. Yejua amo kitekipachouaya maj oksekin kinemilianij ke amo yolchikauak katka porin tokniuan kiyolchikauayaj keman tajyouijtoya (Col. 4:7-11). Komo tikajsikamatij ke moneki maj techyolchikauakan, tokniuan techyolchikauaskej ika miak pakilis. Pablo kimatia ke iTajtol Dios kiyolseuiskia (Rom. 15:4). No kipaleuiskia maj kipia tamatilis tein kipaleuiskia maj kiixnamiki tein yeski ouijkayot (2 Tim. 3:15, 16). Keman ika ojpa tsaktoya ompa Roma, kimatik ke amo uejkaua kimiktiskiaj. Yejua niman kiluij Timoteo maj kiitati uan maj kiuikiliani amatajkuilolmej (2 Tim. 4:6, 7, 9, 13). ¿Keyej? Porin nejon amatajkuilolmej xa kipiayaj seki tajkuilolmej tein moajsij itech Escrituras Hebreas tein ika ueliskia momachtis. Ijkon kemej Pablo, komo nochipa timomachtiaj Biblia, Jiova ika techyolseuis maski tein yeski ouijkayot tikpanoskej. w20.02 23, 24 § 14, 15

Tein kijtoj Elifaz, Bildad uan Zofar, kinextia ke itech nejon tonalmej amo kinemilijtoyaj keniuj kipaleuiskiaj Job, ta keniuj kinextiskiaj ke kichiujka tein amo kuali. Seki taman tein kijtojkej melauak katka, sayoj ke miak taman tein kijtojkej keman ika tajtojkej Job uan Jiova amo melauak katka uan kinextijkej ke amo kiikneliayaj Job. Uan no, kijtojkej ke amo yolkuali katka (Job 32:1-3). ¿Keniuj kiitak Jiova nejon tein kichiujkej? Yejuatsin semi kualanik. Kiniluij ke amo tamatiaj uan no kiniluij maj kitajtanianij Job maj kintajtouiani iixpan (Job 42:7-9). Tein amo kuali tein kichiujkej Elifaz, Bildad uan Zofar techmachtia miak taman. Yekinika, ke moneki amo tikiniluiskej tokniuan ke kichiujtokej tein amo kuali (Mat. 7:2-5). Okachi kuali, moneki kuali tikinkakiskej achto ke tikijtoskej teisa. Sayoj ijkon uelis tikinajsikamatiskej (1 Ped. 3:8). Ojpatika, ke keman tikiniluiskej teisa moneki maj melauak uan maj amo kinyolkoko (Efes. 4:25). Uan expatika, ke Jiova kineki maj kuali tikinnojnotsakan tokniuan. w20.03 22 § 15, 16

Miakpa, okachi kuali tikixmatij Jiova keman tikinmachtiaj oksekin akoni yejuatsin. Kemej neskayot, tikitaj ke Jiova kiniknelia taltikpakneminij porin techpaleuia maj tikinajsikan akin no kinekij iuan mouikaskej (Juan 6:44; Hech. 13:48). Tikitaj keniuj iTajtol Dios kipia chikaualis porin kinpaleuia akin tikinmachtiaj maj amo kichiuakanok tein amo kuali uan maj monejnemiltikan kemej Dios kineki (Col. 3:9, 10). Uan tikitaj ke Jiova amo yolijsiui porin kisentoka kinpaleuia taltikpakneminij maj kiixmatikan uan maj momakixtikan (Rom. 10:13-15). Sayoj ke, maj nochipa tikpatiuitakan kuali timouikaskej iuan Jiova, maski miak xiujmejya tiktekitilianij. Se taman kemej tikchiuaj yejua keman iuan timotataujtiaj. Moneki nochipa iuan titajtoskej iuan akin timouikaj sayoj ijkon kuali timouikaskej. Yejua ika, maj nochipa tiktataujtikan Jiova uan maj tiktapouikan nochi tein tiknemiliaj uan tein tikmachiliaj. w19.12 19 § 11, 13, 14

Tikmatiskej ke Jiova techtapojpoluia itechkopa inemilis Jesús tein kitemakak semi techyolseuia. Uan no, tikmatiskej ke Jesús Tekiuaj itech iTekiuajyo Dios uan ke kitamiti tajyouilis tein Satanás uan akin kipaleuiaj kichiuanij, kichiua maj tikchiakan tein kuali (Is. 65:17; 1 Juan 3:8; Apoc. 21:3, 4). Uan tikmatiskej ke Jesús techpaleuijtok itech tekit tein technauatia maj tikchiuakan itech nejin itamian tonalmej, techpaleuia maj tiknextikan yolchikaualis (Mat. 28:19, 20). ¿Melauj ke yolseuilis, tikchiaskej tein kuali uan yolchikaualis semi techpaleuiaj maj tiyolseujtokan? Yejua ika, ¿keniuj uelis tiksentokaskej tiyolseujtoskej keman tikpanoskej uejueyi ouijkayomej? Komo tikchiuaj kemej Jesús. Yekinika, maj nochipa timotataujtikan. Ojpatika, maj tiktakamatikan Jiova uan maj titanojnotsakan ika yolpakilis hasta keman ouij yeski. Uan expatika, maj tikselikan nepaleuil tein techmakaj totasojikniuan. Ijkon, yolseuilis tein ualeua itechkopa Dios kiyekpias totanemilil uan toyolo (Filip. 4:6, 7). Uan ijkon kemej Jesús, tikxikoskej tein yeski ouijkayot (Juan 16:33). w19.04 13 § 16, 17