Marzo

Tatitanil Pedro kijkuiloj, kinyolmajxitij tokniuan maj kinyolchikauanij oksekin ika tein uelia kichiuayaj. Kijkuiloj: “Xikintekitilikan in oksekin taneltokani ijkon keme Dios namechmajmaktilij ya ne uelilisme” (1 Ped. 4:10). Komo teisa tiuelij maj tikchiuakan, maj amo tiknemilikan ke amo moneki tikchiuaskej porin oksekin technexikoluiskej oso porin motayokoltiskej. Sayoj ke maj amo ika timoueyimatikan (1 Cor. 4:6). Maj tikelnamikikan ke ueli tikchiuaj teisa porin Dios techpaleuia. Maj amo tikchiuakan tein tiuelij para maj tokniuan kuali techitakan, ta maj ika tikinyolchikauakan (Filip. 2:3). Tiyolpakij keman tikuij tochikaualis uan tein tiuelij tikchiuaj para tiktekitiliskej Jiova. ¿Keyej? Porin tikueyichiuaj ika nochi tein tikpiaj, amo porin tiknekij maj oksekin kuali techitakan nion porin tiknekij maj kinemilikan ke okachi tiuelij ke yejuan. w22.04 11, 12 § 7-9

Jesús semi kitasojtaya iTajtol Dios. Itech Salmo 40:8 moijtojka keniuj semi kipatiuitaskia iTajtol Dios, ompa kijtoua: “Nikchiuas motanejnekilis, noDios, semi nechyolpaktia, uan motanauatil moajsi noyolijtik”. Kemej semi kipatiuitaya kipaleuij maj yolpakini uan maj kisentokani kitekitiliani Jehová. Tejuan no tiyolpakiskej uan tiksentokaskej tiktekitiliskej komo tikixtajtoltiaj iTajtol Dios uan tiktasojtaj (Sal. 1:​1-3). Tein kijtoj uan tein kichiuak Jesús techyolchikaua maj nochipa tikixtajtoltikan Biblia uan maj timomachtikan. Para okachi tikajsikamatiskej tein tikixtajtoltiaj maj tiktataujtikan Jehová, maj yolik titaixtajtoltikan, maj timotajtanikan uan maj tikijkuilokan seki taman. Para itech titanemiliskej, maj kuali timomachtikan tein ika tajtojtok uan maj tiktemokan tamachtilis itech toamaixuan. Uan para maj iTajtol Dios techpata moneki maj tiyolyemankej, komo tikchiuaj nochi nejin okachi techpaleuis tein tikixtajtoltiskej itech Biblia uan okachi timotokiskej iuan Jehová (Sal. 119:17; Sant. 4:8). w23.02 13 § 15, 16

Maj tikixtalikan toni tiknekij okachi kuali tikchiuaskej uan satepan maj tikchiuakan tein techiluiskej. ¿Keniuj? Maj tiknemilikan ke tiknekij okachi kuali titamachtiskej. Uelis tikchiuaskej nejin komo kuali timomachtiaj folleto Maj okachi kuali titaixtajtoltikan uan titamachtikan. Uan achto ke tikpanoltiskej se tamachtilis itech nechikol tein mochiua itajkotian semana, uelis tiktajtaniskej se tokniuj akin miak xiujmejya kitekitilia Jiova, maj techkaki uan maj techilui toni uelis okachi kuali tikchiuaskej. Komo niman timomachtiaj tamachtilis tein tiktemakaskej, okachi kuali titamachtiskej uan oksekin kiitaskej ke titekitinij uan titakuaujtamachmej (2 Cor. 8:22). ¿Uan komo tiknekij tikchiuaskej se taman tein ouij techkisa? ¡Maj amo timosenkauakan! ¿Mochiuak Timoteo se kuali tamachtijkej uan kitemakaya kuali tanojnotsmej? Biblia amo kijtoua, sayoj ke tikmatij ke kichiuak tein Pablo kiyolmajxitij. Yejua ika, okachi kuali kichiuak tekimej tein kipiaya (2 Tim. 3:10). w22.04 24, 25 § 8-11

¿Toni kiixnextia koujtajtapial tein kipia chikome itsontekonuan? Biblia kijtoua ke nejin koujtajtapial tamati kemej se leopardo, sayoj ke kipia imetsuan kemej se oso, itenoj kemej se león uan kipia majtakti ikuaomiyouan. Naui tapialmej tein ika motajtoua itech Daniel capítulo 7 no ijkon tamatij. Sayoj ke, itech Apocalipsis moijtoua ke sayoj se tapial ijkon tamati. Yejua ika, nejin koujtajtapial amo kiixnextia sayoj se tekiuajyot. Uan no, Apocalipsis kijtoua ke kipia “tanauatil para tayekantinemis ipan nochi tataman tagayot uan ipan tataman pueblojme uan ipan nochi tataman paísme uan ipan nochi tataman tagayot ten tajtoaj ika tataman tajtolme”. Nejin kinextia ke kipia okachi tanauatil ke se tekiuajyot itech se altepet (Apoc. 13:7). Yejua ika, nejin koujtajtapial kinixnextia nochi tekiuajyomej tein taixyekananij nikan taltikpak hasta axkan (Ecl. 8:9). ‘Majtakti kuaomiyomej’ kiyeknextiaj ke tapial tein kipia chikome itsontekonuan kinixnextia nochi tekiuajyomej. Itech Biblia, tapoual majtakti miakpa mokui para monextis ke teisa ajsitok. w22.05 9 § 6

¿Akonimej kiseliskej nejin tatiochiualismej? Nochin akin makisaskej keman mochiuas Armagedón uan konemej akin yoliskej itech yankuik taltikpak. Uan no, Apocalipsis capítulo 20 kijtoua ke mikemej oksepa nemiskej (Apoc. 20:​11-13). ¿Uan akonimej oksepa nemiskej nikan taltikpak? Nochin akin “yolkualime”, tein kijtosneki itekitikauan Jiova akin momikilijkej ne uejkauj, uan no akin “amo yolkualime”, tein kijtosneki akin amo uelik kiixmatkej Jiova (Hech. 24:15; Juan 5:​28, 29). Nejin amo kijtosneki ke nochin akin momikilijkejya oksepa nemiskej keman iTekiuajyo Dios taixyekantos mil xiujmej. Amo oksepa nemiskej akin amo kinekkej kitekitiliskej Jiova. Yejuan kinextijkej ke amo kinnamikia nemiskej itech xochital porin amo kitekitilijkej Jiova maski ueliskia kichiuaskej (Mat. 25:46; 2 Tes. 1:9; Apoc. 17:8; 20:15). w22.05 18 § 16, 17

Itechkopa “takeual takuaujtamach uan tamatkej”, Jesús kichiuani se nechikol tein semi kualtsin para kiueyichiuaskej Jiova kemej yejuatsin kinamiki (Mat. 24:45). ¿Keniuj tikonita nejin nechikol? Xa tionmomachilia kemej Pedro keman kiluij Jesús itech tajkuilol tein axkan timomachtiaj. ¿Keniuj tietoskiaj komo amo tipouiskiaj itech inechikol Jiova? Jesús techmaka tamachtilis tein techpaleuia maj tiksentokakan titakuaujtamatikan iuan Dios uan technextilia keniuj okachi kuali titamachtiskej. Uan no, techpaleuia maj tikchiuakan tein kuali para tikyolpaktiskej Jiova (Efes. 4:24). Keman tikpanouaj ouijkayomej Jesús techixyekana ika tamatilis. Nejin senkis monextij keman peuak kokolis COVID-19. Miakej itech taltikpak amo kimatiaj toni kichiuaskej, sayoj ke Jesús kiitak keniuj techpaleuiskia. w22.07 12 § 13, 14

Jiova kiniluij tetatmej israelitas ke mojmostaj monekia kinnojnotsaskej de yejuatsin ininkoneuan (Deut. 6:​6, 7). Mojmostaj, miakpa ueliskia kinnojnotsaskej ininkoneuan uan kinpaleuiskej maj kitasojtakan Jiova. Kemej neskayot, okichpipil ueliskia yetoskej miak tiempo iniuan ininpopaj keman tatokayaj oso kisentiliayaj tein takia. Siuapipil ueliskia yetoskej miak tiempo iniuan ininmomaj keman kichiuayaj ininchiualis kalijtik, keman tajtsomayaj oso tajkitiaj. Keman senyetoyaj ueliskia ika monojnotsaskej seki taman tein monekia. Kemej neskayot, uelia itech tanemiliayaj ke Jiova kualtakat uan ke kinyekpiaya. Itech miak altepemej, tetatmej amo semi yetokej iniuan ininkoneuan. Tetatmej tekitij uan ininkoneuan momachtiaj. Yejua ika moneki kitemoskej keman uelis yetoskej iniuan ininkoneuan uan monojnotsaskej (Efes. 5:​15, 16). w22.05 28 § 10, 11

Uejueyi tajtakolmej tein semi kitapanauiliaj itanauatiluan Dios. Komo se tokniuj kichiua se tajtakol kemej nejin, moneki kitataujtis Jiova maj kitapojpolui uan kinnojnotsas tayekananij itech nechikol (Sal. 32:5; Sant. 5:14). ¿Toni moneki kichiuaskej tayekananij? Maski sayoj Jiova ueli senkis tetapojpoluia, uan kichiua porin Jesús toka momikilij, yejuatsin kikauani maj tayekananij kiitakan ika Biblia ox akin tajtakolchiuak uelis kisentokas itech nechikol oso amo (1 Cor. 5:12). Para kichiuaskej nejon, moneki kitemoskej itanankililuan nejin netajtanilmej: ¿kiixtalij kichiuas nejon tajtakol?, ¿kitemoj kitatis tein kichiuak?, ¿miakpa kichiuak nejon tajtakol? Uan tein okachi moneki, ¿kinextiani ke yekmelauj moyolnonotsa?, ¿toni kinextia ke Jiova kitapojpoluijya? (Hech. 3:19). w22.06 9 § 4

Jesús kijtoj ke moneki tiktemoskej maj mochiua tein kuali yetok (Mat. 5:6). Nejin kijtosneki ke moneki semi tiknekiskej tikchiuaskej tein Dios kiita ke kuali, melauak uan tein chipauak. ¿Tikonuelita maj mochiua tein melauak uan tein kuali yetok? Tikmatij ke kemaj, yejua ika amo tikonuelita tiontakajkayauas nion tikonchiuas tein amo kuali (Sal. 119:​128, 163). Akin takajkayauaj kichiuaj kemej Satanás, akin taixyekana nikan taltikpak (Juan 8:44; 12:31). Yejua kitemoua maj amo kuali kiitakan Jehová. Peuak kitakajkayauilia Dios desde keman taixnamikik ompa Edén, kijtouilia Jehová ke amo kuali taixyekana, amo ininka tanemilia oksekin, ke techkajkayaua uan amo techmaka tein kuali (Gén. 3:​1, 4, 5). Kemej Satanás kitakajkayauiliani, miakej amo kuali kiitajok Jehová. Satanás uelis kinchiualtis nochi taman tein tel amo kuali akin amo kinekij kichiuaskej tein kuali (Rom. 1:​25-31). w23.03 2 § 3

Oso oksepa tikonchiuas seki taman tein tionmochikaujtoya tikonkauas. Oso xa tikonnemilia ke miak tamanok mitsonpoloua para uelis tionmoauis uan yejua ika tikonnemilia ke amo uelis tikonchiuas. ¿Toni mitsonpaleuis amo xionmosenkaua? Semi mitsonpaleuis komo tikontasojta Jehová. Semi kualtsin ke ueli tikontasojta Jehová (Prov. 3:​3-6). Nejin mitsonpaleuis xikonixnamiki tein yeski ouijkayot. Biblia miakpa kijtoua ke Jehová kinnextiliani itekitikauan ke nochipa kintasojta, nejin kijtosneki ke amo keman kinsenkaua. Tejuatsin tiontamati kemej Dios tamati (Gén. 1:26). Komo ijkon, ¿keniuj uelis tiontetasojtas kemej yejuatsin? Yekinika moneki tionmotasojkamatis (1 Tes. 5:18). Mojmostaj xionmotajtani: “¿Keniuj nejin tonal Jehová nechnextilij ke nechtasojta?”. Uan satepan keman tionmotataujtis, xikontasojkamatili tein moka kichiuak. Xikonita ke Jehová moka kichiuak nejon porin mitsontasojta. w23.03 12 § 17-19

Jesús kintasojtak nochin 12 tatitanilmej. ¿Toni techmachtia nejon? Amo sayoj moneki tikitaskej keman mopolouaj oksekin, ta toni tikchiuaj. Keman techkualantis se tokniuj, maj timotajtanikan: “¿Keyej semi nechkualantij tein kichiuak? ¿Moneki nikpatas teisa? ¿Kipanotok tokniuj se ouijkayot? ¿Ueliskia niknextis ke niktasojta uan niktapojpoluis maski nechyolkokoj?”. Komo nochipa tikintasojtaj oksekin, tiknextiskej ke yekmelauj tikchiuaj kemej Cristo. Tein Jesús kichiuak no techmachtia ke moneki tikinajsikamatiskej tokniuan (Prov. 20:5). Jesús uelia kimatia toni kinemiliayaj uan kimachiliayaj oksekin, sayoj ke tejuan amo. Maski ijkon, uelis tikixpanouiskej ininnepololuan tokniuan (Efes. 4:​1, 2; 1 Ped. 3:8). Uan tein techpaleuis yejua komo timochikauaj okachi tikinixmatiskej. w23.03 30 § 14-16

Satanás kichiua maj sekin techiluikan ke komo amo tikauaj Jiova, techmiktiskej. Oso keman ijsiujka tikokolispeuaj, no uelis kitemos maj tikauakan Jiova. Xa tapajtianij oso tochankauan akin amo itaixpantijkauan Jiova, techchikaujkauiskej maj tiktapanauilikan itanauatil Dios uan maj techtalilikan esti. Oso xa aksa techiluis maj timopajtikan ika seki taman tein kitapanauilia itanauatiluan Dios. Amo akin kineki momikilis, sayoj ke tikmatij ke komo timomikiliaj Jiova kisentokas techtasojtas (Rom. 8:​37-39). Jiova kinelnamiki kemej yeskia yoltoskiajok akin kuali iuan mouikayaj uan momikilijkejya (Luc. 20:37). Semi kineki kichiuas maj oksepa nemikan (Job 14:15). Jiova kitemakak se taman tein semi kipia ipatiuj porin kineki maj tinemikan nochipaya (Juan 3:16). Kuali tikmatij ke Jiova semi techtasojta uan techyekpia. Yejua ika keman timokokouaj oso techiluiaj ke techmiktiskej amo tikauaj, ta tiktajtaniaj maj techyolseui, maj techmaka tamatilis uan maj techpaleui maj titaxikokan (Sal. 41:3). w22.06 18 § 16, 17

Biblia kijtoua: “Se kimojkatokas Jehová yejua yekinika taman para se kipias tamatilis, uan se kiixmatis akin Okachi Yektik yejua taajsikamatilis” (Prov. 9:10). Yejua ika, keman tikixpejpenaskej teisa tein motelneki, maj tiktemokan tein kijtoua Biblia uan toamaixuan. Komo tikchiuaj, tiknextiskej ke yekmelauj titamatinij (Prov. 2:​5-7). Sayoj Jehová ueli kitemaka yekmelauj tamatilis (Rom. 16:27). ¿Keyej? Yekinika, porin yejuatsin tachijchiuak uan kuali kiixmati nochi tein kichijchiuak (Sal. 104:24). Ojpatika, porin nochi tein kichiua kinextia ke semi tamatkej (Rom. 11:33). Uan expatika, porin tein tayolmajxitia nochipa kinpaleuia akin kichiuaj (Prov. 2:​10-12). Komo tiknekij tiyeskij yekmelauj titamatinij, moneki tikajsikamatiskej nejin eyi taman uan ika timoixyekanaskej keman tikixpejpenaskej uan tikchiuaskej teisa. w22.10 19 § 3, 4

Satanás tapoloj itech neteuilis tein ika motajtoua itech Apocalipsis capítulo 12, yejua ika kiualpantamotkej nikan taltikpak iuan iamokuali ejekauan. Uan kemej semi kualantok kinchiuilia taltikpakneminij miak taman tein amo kuali. Yejua ika, Biblia kijtoua ke teikneltijkej akin nemij nikan taltikpak porin Satanás kichiua miak taman tein amo kuali (Apoc. 12:​9-12). ¿Keniuj techpaleuia nejin tein achtook moijtojka? Nochi tein mochiujtok itech taltikpak uan tein kichiuaj taltikpakneminij kinextia ke Jesús taixyekantokya. Yejua ika amo tikmoujkaitaj maj taltikpakneminij sayoj inintech tanemilikan uan maj okachi tetauelitakan, ta tikelnamikij ke nejon kinextia ke mochiujtokya tein Biblia achtook kijtojka. ¡Senkis moita ke iTekiuajyo Dios taixyekantokya! (Sal. 37:1). Uan no, tikchiaj maj okachi motaouijkantali porin amo uejkaua mochiuas Armagedón (Mar. 13:8; 2 Tim. 3:13). Kemej Jiova techtasojta techmatiltia keyej okachi motaouijkantalia. ¿Melauj ke uelis tiktasojkamatiliskej maj ijkon kichiua? w22.07 3, 4 § 7, 8

Uelis tiktajtaniskej Jiova maj kinpaleui tokniuan maj taxikokan akin mokokouaj, akin kinpanok se tetsauit kampa ika nemij, akin kintajyouiltiaj uan akin nemij kampa onkak neteuilis. No uelis ininka timotataujtiskej tokniuan akin motemakaj tapaleuiskej keman mochiua se tetsauit. Komo tejuatsin tikonixmati se tokniuj akin kipanotok se taman kemej nejin uelis tikontokaytis keman tionmotataujtis. Tiknextiaj ke tikintasojtaj tokniuan keman tiktajtaniaj Jiova maj kinpaleui maj taxikokan. Tokniuan akin techixyekanaj itech nechikol semi kitasojkamatij maj ininka timotataujtikan, uan semi kinpaleuia keman tikchiuaj. Tatitanil Pablo kimatia ke semi monekia maj oksekin ika motataujtianij. Yejua kijkuiloj: “No ximotataujtikan noka para uelis nikmatis toni nikijtos keman peuas nitajtos uan ijkon amo nimouis nikteixmatiltis kuali tanauatilmej tein kimelauaj tein Dios amo kitematiltijtoya” (Efes. 6:​19, TNM). Tokniuan akin axkan techixyekanaj semi tekitij, keman tiktajtaniaj Jiova maj kitiochiua nochi tein kichiuaj, tiknextiaj ke tikintasojtaj. w22.07 23, 24 § 14-16

Se soldado moneki mokuatalilis teisa para amo kikuakokoskej. Itech neteuilis tein tikpiaj iuan Satanás moneki tikyekpiaskej totanemilil porin yejua kineki maj tiknemilikan uan maj tikchiuakan tein amo kuali. Ijkon kemej tein mokuatalilia se soldado kipaleuia itsontekon, tein tikchiaj tikseliskej kiyekpia totanemilil para maj amo tikauakan Jehová. Komo sayoj itech titanemiliaj tein tejuan tiknejnekij uelis amo itech titanemiliskejok tein tikchiaj. Maj itech titanemilikan tein kinpanok seki tokniuan akin nemiaj Corinto. Yejuan amo kineltokayajok ke mikemej oksepa nemiskej ijkon kemej Dios motenkaujka (1 Cor. 15:12). Pablo kijtoj ke akin amo kineltokayaj ke mikemej oksepa nemiskej, sayoj kitayekanaltiayaj tein kinejnekiaj (1 Cor. 15:32). Axkan miakej amo kineltokaj tein Dios motenkaua kichiuas, yejua ika sayoj kitemouaj moyolpaktiskej uan kichiuaskej tein kinejnekij. Sayoj ke tejuan titakuaujtamatij itech tein Dios motenkaua ke kichiuas satepan. w22.10 25, 26 § 8, 9

Jiova kineki maj tiktataujtikan. Yejuatsin kimati keniuj timomachiliaj uan techiluia ke uelis tiktataujtiskej keman yeski uan techkakis. Yejuatsin semi kiyolpaktia kinkakis itekitikauan (Prov. 15:8). ¿Toni uelis tikiluiskej Jiova keman timomachiliskej toselti? (Sal. 62:8). Maj tiktapouikan tein techtekipachoua uan keniuj timomachiliaj. Maj tiktajtanikan maj techpaleui maj tikmatikan toni tikchiuaskej. Uelis tiktajtanis yejuatsin maj mitspaleui xiyolchikauak uan xikmati keniuj tikmelauas tein tikneltoka (Luc. 21:​14, 15). ¿Uan toni uelis tikonchiuas komo amo kuali tionmomachilia oso tionmotayokoltia? Uelis tikontataujtis Jiova maj mitsonpaleui xiontajto iuan se tokniuj akin semi kuali mouika iuan, uan maj kipaleui maj mitsonajsikamati. Tikonitas keniuj mitsonnankilia keman tikontataujtia uan tionmokaua maj oksekin mitsonpaleuikan, amo tionmomachilisok moselti. w22.08 10 § 6

Itech yankuik nechikol ompa Tesalónica, peuak semi kinixnamikij tokniuan akin yankuixtok mochiujkaj itatojtokakauan Cristo. Se tonal kintitilatstiajkej “seki tokniuan ininixpan tekiuanij itech ueyi xolal” (Hech. 17:​6, TNM). Nejon tokniuan xa semi momoujtijkej keman kiitakej ke akin nemiaj itech ininxolal kinixnamikiaj. Nejon xa ueliskia kichiuas maj amo semi kinekinijok kitekitiliskej Jiova. Sayoj ke tatitanil Pablo amo kinekia maj pano nejon. Yejua kiitak akoni ueliskia kinpaleuis nejon tokniuan. Satepan, Pablo kiniluij: “Tiktitankej toknitsin Timoteo [...] maj namechyolchikauati uan maj namechyolseuiti para okachi xitakuaujtamatikan, para maj amo akin mosenkaua porin nankiixnamikij nejin ouijkayomej” (1 Tes. 3:​2, 3, TNM). Timoteo kiitak keniuj Pablo kinyolchikauak nejon tokniuan akin nemia Listra uan keniuj Jiova kinpaleuij. Yejua ika, Timoteo uelik kinyolchikauak tokniuan ompa Tesalónica (Hech. 14:​8, 19-22; Heb. 12:2). w22.08 21 § 4

Itech xiuit 1870, Charles Russell peuak kinixyekana sekin akin momachtiayaj Biblia akin peujkej kitemouaj toni yekmelauj tamachtiaya. Yejuan kinekiaj kiajsikamatiskej keniuj tapaleuia imikilis Cristo uan keniuj monekia kielnamikiskej. ¿Keniuj techpaleuia axkan nochi tein momachtijkej? Axkan tikajsikamatij toni kijtosneki imikilis Cristo uan nochi tein kichiuas (1 Juan 2:​1, 2). No timomachtianij itech Biblia ke sekin akin kitakamatij Dios kichiaj nemiskej nochipaya ne iluikak uan oksekin millones kichiaj nemiskej nochipaya nikan taltikpak. Okachi timotokiaj iuan Jehová keman titanemiliaj keniuj semi techtasojta uan keniuj techpaleuia tisejsemej imikilis Cristo (1 Ped. 3:18). Yejua ika, ijkon kemej kichiujkej tokniuan ne uejkauj, tejuan no tikinyoleuaj oksekin maj touan mosentilikan keman tikelnamikij imikilis Cristo, ijkon kemej yejua kijtoj maj mochiuani. w23.01 21 § 6, 7

Jesús kinmachtij oksekin tein kuali tein kichiuas Dios keman yejua taixyekantos. Semi timotasojkamatij maj Jesús toka momikiliani porin nejon techpaleuia maj kuali iuan timouikakan uan no iuan Jehová. Akin titakuaujtamatij iuan Jesús no tikchiaj tinemiskej nochipaya uan oksepa tikinitaskej akin momikilijkejya (Juan 5:​28, 29; Rom. 6:23). Tein melauj, amo technamiki tikseliskej nejin tatiochiualismej uan amo keman uelis tikixtauaskej tein Jehová uan Jesús toka kichiuanij (Rom. 5:​8, 20, 21). Sayoj ke, ¿keniuj uelis tiknextiskej ke timotasojkamatij? Keman tikuij tein tikpiaj para okachi tiktekitiliskej Jehová, kemej titapaleuiskej maj mochijchiua uan moyekchijchiua kalmej kampa tikueyichiuaj Jehová. w23.01 26 § 3; 28 § 5

Akin tekiuajtiskej itech iTaixyekanalis Dios, monekis kinixyekanaskej okachi miak millones itech nochi taltikpak. Ijkon kemej Jesús, 144 mil no yeskij tekiuanij uan tiopixkamej (Apoc. 5:10). ITanauatil Moisés kijtouaya ke tiopixkamej monekia kinpaleuiskej israelitas maj kuali yetokan uan maj kuali mouikakan iuan Dios. Nejon Tanauatil sayoj kiixnextiaya “tatiochiualismej tein onkas satepan”, yejua ika taixejekol maj tiknemilikan ke akin tekiuajtiskej iuan Jesús kinpaleuiskej itekitikauan Dios maj kuali yetokan uan maj kuali mouikakan iuan Jehová (Heb. 10:1). Ayamo tikmatij keniuj nejin tekiuanij uan tiopixkamej kinmatiltiskej tein monekis akin kinixyekanaskej nikan taltikpak. Uelis senkis tikneltokaskej ke akin nemiskej itech xochital nochipa kuali kinixyekanaskej (Apoc. 21:​3, 4). w22.12 11 § 11-13

Tiknekij maj kimatikan tein Jehová uan Jesús toka kichiuanij, yejua ika tikinyoleuaj oksekin maj touan mosentilikan keman tikelnamikij imikilis Cristo (Juan 3:16). Tein kiitaskej uan tein kikakiskej nejon youak, tiknekij maj kinyololini maj okachi kuali kiixmatikan Jehová uan maj kitekitilikan (Sal. 103:​1-4). Maski touan mosentiliskej oso amo, tejuan timochikauaj tikinyoleuaskej porin tikmatij ke Jehová kitasojkamati nochi tein tikchiuaj. Sayoj ke Jehová amo sayoj kiita kanachin mosentiliaj, ta akonimej mosentiliaj (Luc. 15:7; 1 Tim. 2:​3, 4). w23.01 20 § 1; 22, 23 § 9-11

Youak achto ke Jesús momikiliskia kitajtanij iTajtsin maj kinyekpiani itatojtokakauan (Juan 17:​15, 20). Jiova nochipa kinyekpia itekitikauan, no kimatia ke Satanás okachi kinixnamikiskia uan yejua ika monekia maj Jiova kinyekpiani. Itech nejin taltikpak kampa taixyekana Satanás onkak miak kuejmolmej tein kichiua maj itekitikauan Dios tajyouikan uan tein kichiua maj kinextikan ox yekmelauj takuaujtamatij. Sayoj ke, amo moneki timouiskej porin Jiova kiita nochi tein techpanoua uan yekmelauj kineki techpaleuis. Kemaj, “Jiova kinita akin kimoujkatokaj [...] para kinmachmakixtis” (Sal. 33:​17-20). w22.08 8 § 1, 2

Xijxiujtika, achto uan satepan ke moelnamikis imikilis, tikixtaliaj tiempo para timotataujtiskej uan titanemiliskej keniuj techpaleuia imikilis Jesús, ijkon tiknextiaj ke semi tiktasojkamatij tein toka kichiuak. Uan no semi tiyolpakij tikinyoleuaskej nochi akin ueliskej maj touan mosentilikan itech nejon tonal tein semi moneki. Uan amo tikauaskej maj nion teyi techtsakuili maj tikelnamikikan imikilis Cristo. Keman timosentiliaj para tikelnamikiskej imikilis Cristo, timomachtiaj keyej moneki maj techmakixtikan uan keniuj imikilis sayoj se takat kichiua maj kintapojpoluikan inintajtakoluan miakej. Techelnamiktiaj akonimej kikuaj pan uan tayij vino, uan toni kiixnextiaj (Luc. 22:​19, 20). Keman mopanoltia tanojnots titanemiliaj itech tatiochiualismej tein kipiaskej akin kichiaj nemiskej nochipaya nikan taltikpak (Is. 35:​5, 6; 65:​17, 21-23). Semi moneki maj kuali tikajsikamatikan tein tamachtia Biblia. w23.01 20 § 2; 21 § 4

Keman kitemakak iKonetsin para techtapojpoluis totajtakoluan, Dios kichiuak maj ueli tikchiakan tinemiskej nochipaya (Mat. 20:28). Tatitanil Pablo kijtoj: “Kemej peuak timomikiliaj itechkopa sayoj se takat, akin momikilijkejya no oksepa nemiskej itechkopa sayoj se takat. Porin ijkon kemej itechkopa Adán nochin momikilijtokej, no ijkon itechkopa Cristo nochin oksepa nemiskej” (1 Cor. 15:​21, 22). Jesús kinmachtij itatojtokakauan maj tajtanikan maj taixyekanaki iTaixyekanalis Dios uan maj mochiua tein yejuatsin kineki nikan taltikpak (Mat. 6:​9, 10). Se taman tein Jehová kineki yejua maj nochin nemikan nochipaya. Yejua ika kiixtalij iKonetsin maj taixyekana, uan kinixpejpenani 144 mil para maj kipaleuikan Jesús maj kichiua tein yejuatsin kineki (Apoc. 5:​9, 10). w22.12 5 § 11, 12

Keman momikilia se akin tiktasojtaj, semi tiktemouaj. Xa itech yekinika tonalmej sayoj tikmachiliaj tayokol, okachiok komo semi tajyouij. Sayoj ke ijkon kemej panouaj tonalmej, xa tikelnamikiskej seki taman tein kichiuaya akin momikilij. Tikelnamikij se taman tein techmachtij oso teisa tein kijtoj oso kichiuak para techyolchikauas oso techuetskitis. Keman tikelnamikij nejon techpaleuia maj kaxani tayokol. No ijkon, semi techtayokoltia keman timonemiliaj keniuj Jesús tajyouij achto ke momikiliskia. Uan okachiok titanemiliaj itech nejon tein kipanok Jesús keman tikelnamikij imikilis uan tikixtaliaj tiempo para titanemiliskej keniuj semi techpaleuia inemilis tein kitemakak (1 Cor. 11:​24, 25). Sayoj ke keman tiknemiliaj tein kijtoj uan kichiuak keman nemia nikan taltikpak, semi tiyolpakij. No techyolchikaua tiknemiliskej tein axkan kichiujtok uan tein toka kichiuas amo uejkaua. w23.01 26 § 1, 2

Keman Jesús momikilij, imomachtijkauan semi motayokoltijkej. Amo yetoyaok inintasojikniuj uan amo kuali momachiliayaj (Luc. 24:​17-21). Sayoj ke satepan, Jesús monextij ininixpan uan kinmelauilij ke itech mochiujka tein Biblia kijtojka. Uan no, kinnauatij maj kichiuakan se tekit tein motelneki (Luc. 24:​26, 27, 45-48). Keman Jesús oksepa yajki iluikak, imomachtijkauan semi yolpakiajya. Semi yolpakiaj kimatiskej ke Jesús oksepa nemia uan kinpaleuiskia maj kichiuakan tekit tein kinmakak. Kemej semi yolpakiaj, amo teyi kintsakuiliaya maj kiueyitalikan Jehová (Luc. 24:​52, 53; Hech. 5:42) Tejuan no uelis tikchiuaskej kemej imomachtijkauan Jesús keman tiktayekanaltiaj itaixyekanalis Dios. Maski moneki se mochikauas para se kisentokas se tiktekitilis Jehová. ToDios motenkaua ke semi techtatiochiuis (Prov. 10:22). w23.01 30, 31 § 15, 16

Amo tiknekij tikchiuaskej kemej Adán uan Eva. Yejua ika, moneki timochikauaskej okachi kuali tikixmatiskej Jiova, tikitaskej ikualneskayouan uan timochikauaskej tikajsikamatiskej keniuj tanemilia. Komo tikchiuaj okachi tiktasojtaskej. Maj itech titanemilikan Abrahán, yejua semi kitasojtaya Jiova uan maski kemansa amo kiajsikamatia tein yejuatsin kiixtaliaya, kisentokak kitakamatik uan mochikauak okachi kuali kiixmatis. Kemej neskayot, keman kimatik ke Jiova kiixtalijka kiixpolos Sodoma uan Gomorra, yekinika kinemilij ke “tamelaujkej itech nochi taltikpak” kinixpoloskia akin yolkualmej iniuan akin amo yolkualmej. Kinemiliaya ke Dios amo keman kichiuaskia nejon. Yejua ika, ika yolyemanilis kitajtanij seki taman. Jiova amo yolijsiuik uan kinankilij. Satepan Abrahán kiajsikamatik ke Jiova kiita ininyolo nochin uan amo keman kintatsakuiltia akin yolkualmej iniuan akin amo yolkualmej (Gén. 18:​20-32). w22.08 28 § 9, 10

Itech xiuit 455 achto ke ualaskia Cristo, satepan ke kitamichijchiujkej tepamit tein kiyoualouaya Jerusalén, tekiuaj Nehemías kiixtalij maj kiyekpianij xolal seki takamej akin takuaujtamachmej katkaj. Semej katka Hananías, akin taixyekanaya kampa yetoyaj soldados. Biblia kijtoua ke “katka se takat semi takuaujtamach uan okachi kimojkatokaya Dios ke oksekin” (Neh. 7:2). Semi kuali kichiuaya tein yeski tekit tein kimakayaj porin kitasojtaya Jehová uan kimojkatokaya. Komo no ijkon tikchiuaj, techpaleuis maj titakuaujtamachmej keman tiktekitiliskej Dios. Maj tikitakan tein kichiuak Tíquico, se tokniuj akin tatitanil Pablo semi iuan takuaujtamatia. Tíquico kipaleuij Pablo uan kijtoj ke yejua katka ‘se toknitsin akin takuaujtamach uan kitekitiliaya toTekotsin’ (Efes. 6:​21, 22). Pablo kinextij ke takuaujtamatia iuan Tíquico keman kiluij maj kinuikiliani tokniuan kayomej Éfeso uan Colosas amamej tein kinijkuilouilijka, uan no keman kiluij maj kinyolchikauani. Tein kichiuak Tíquico techelnamiktia tein kichiuaj tokniuan takamej akin amo kikauaj Dios uan takuaujtamachmej, akin techpaleuiaj maj tiksentokakan kuali timouikakan iuan Dios (Col. 4:​7-9). w22.09 9, 10 § 5, 6

José kipanouani uejueyi ouijkayomej kemej 13 xiujmej. Ika nochi tein kipanotoya, José ueliskia kinemilis ke Jehová amo kitasojtayaok uan ke kikaujka keman okachi monekia maj kipaleui. Sayoj ke amo kisentokak moyolkokojtoya, ta kinextij ke yektalnamikia uan yolseujtoya. Keman ueliskia momakepas iuan iikniuan amo kichiuak, ta kinextij ke kintasojtaya uan kintapojpoluij (Gén. 45:​4, 5). ¿Keyej uelik kichiuak nejon? Porin yektanemilij uan amo sayoj itech tanemilij tein kipanotoya, ta tein Jehová kinekia (Gén. 50:​19-21). ¿Toni techmachtia nejin? Komo aksa mitsonchiuilia teisa tein amo kuali amo xikonsentoka xionmoyolkokojto nion xionkualanto iuan Jehová oso xikonnemilijto ke yejuatsin mitsonkauak. Okachi kuali itech xiontanemili keniuj Jehová mitsonpaleuijtok xiontaxiko. Uan no, xiontetapojpolui uan xikonelnamiki ke “akin tetasojta nochipa tetapojpoluia”. w22.11 21 § 4

Jehová kichiuak maj tanauatijkej Daniel kiitani seki taman tein kinextij ke yejuatsin okachi ueyi ke okseki tekiuanij. Yekinika kinitak naui koujtajtapialmej tein kinixnextiaj uejueyi altepemej: Babilonia, Medopersia, Grecia uan Roma. Uan no Reino Unido uan Estados Unidos, tein axkan taixyekantok (Dan. 7:​1-3, 17). Satepan, Daniel kiitak ke ne iluikak Jehová tokotsyetok itech iueyi silla kampa tamelaua (Dan. 7:​9, 10). Daniel kiita ke Dios kinkuilia tanauatil nochin tekiuanij uan kinmaka akin okachi kinnamiki uan akin okachi chikaujkej. ¿Akonimej? “Aksa akin tamati kemej akin yolik kemej takat” oso Jesucristo, uan taixpejpenalmej akin “iaxkauan akin okachi Ueyichiujkej”, oso 144 mil akin “taixyekanaskej nochipaya” (Dan. 7:​13, 14, 18). Nejin kinextia ke Jehová yejua akin okachi Ueyichiujkej. Tein kiitak tanauatijkej Daniel kiyeknextia ke melauak tein achto ipa kijtojkaya. Yejua kijtojka ke “Dios akin nemi iluikak […] kinajchiua uan kinixtalia tekiuanij” (Dan. 2:​19-21). w22.10 14, 15 § 9-11