Abril

Seki itekitikauan Jehová akin nenkej ne uejkauj kipiakej ouijkayomej tein amo kichiayaj. Maj itech titanemilikan Jacob. Itat kinauatij maj iuan monamiktiani semej isiuapipiluan Labán, se ichankauj akin kiueyichiuaya Jehová. Uan kiyekiluij ke Jehová semi kitatiochiuiskia (Gén. 28:​1-4). Jacob kichiuak tein kiluijkej: kisak de Canaán uan yajki hasta kampa nemia Labán, akin kinpiaya ome isiuapipiluan, Lea uan Raquel. Jacob kitasojtak Raquel akin okachi siuapil katka. Kemej Jacob kinekia iuan monamiktis, kinekik kitekitilis Labán chikome xiujmej (Gén. 29:18). Sayoj ke amo mochiuak tein kinemiliaya. Labán kikajkayauak uan kimakak isiuapil Lea, akin tayekanaya maj iuan monamiktiani. Se semana satepan kikauak maj monamiktiani iuan Raquel, sayoj ke monekia kitekitilisok chikome xiujmej (Gén. 29:​26, 27). Uan amo sayoj nejon, ta no kichiuiliaya tein amo kuali keman amo kiyektaxtauiaya. ¡Ijkon kitekitiltij 20 xiujmej! (Gén. 31:​41, 42). w23.04 15 § 5

¿Akoni uelis techpaleuis keman monekis maj techixyekanakan uan maj techyolchikauakan? Tejuan tikmatijya akoni: yejua Jehová. Yejuatsin techyoleua maj tiktataujtikan uan tikmatij nejin porin techiluia: “Nochipa xikchiujtokan netataujtil” (1 Tes. 5:17). Uelis timotataujtiskej keman tiknekiskej uan tiktajtaniskej maj techixyekana itech nochi tein tikchiuaskej (Prov. 3:​5, 6). Kemej Jehová techmaka miak tiempo, techkaua maj timotataujtikan keman tiknekiskej uan amo ixyetok kanachpa uelis tikchiuaskej. Jesús kimatia ke Jehová kiita ke semi moneki maj se motataujti. Miak xiujmej achto ke ualaskia nikan taltikpak yejua kiitak keniuj iTajtsin kinnankiliaya itekitikauan keman kitataujtiayaj. Jesús yetoya iuan iTajtsin keman kinankilij Ana, David, Elías uan miakejok keman kitataujtijkej ika nochi ininyolo (1 Sam. 1:​10, 11, 20; 1 Rey. 19:​4-6; Sal. 32:5). Yejua ika kiniluij itatitaniluan maj nochipa motataujtianij uan maj takuaujtamatinij ke Jehová kinnankiliskia (Mat. 7:​7-11). w23.05 2 § 1, 3

Tayekankatiopixkat Jehoiadá kimojkatokaya Jehová. Keman Atalía, isiuapil Jezabel, peuak taixyekana ompa Judá maski amo kinamikia, Jehoiadá kinextij ke semi kimojkatokaya Dios. Yejua kinekia kisentokas taixyekanas, yejua ika kitemoj kinmiktis nochin iixuiuan akin kinnamikia maj taixyekanakan (2 Crón. 22:​10, 11). Sayoj ke Jehosabeat, isiuatsin Jehoiadá, kimakixtij se okichpiltsin akin monotsaya Jehoás. Yejua uan itakatsin, kicholtijkej uan kiyekpiakej. Ijkon amo kintamimiktijkej ichankauan David akin kinnamikia taixyekanaskej. Jehoiadá amo kikauak Jehová uan amo kimouilij Atalía. Keman Jehoás kipiaya chikome xiuit, Jehoiadá oksepa kinextij ke amo kikauaya Jehová. Yejua kuali kiixtalij tein kichiuaskia. Komo mochiuaya tein kinekia, Jehoás mochiuaskia tekiuaj, se ichankauj David akin kinamikia maj taixyekana. Uan komo amo mochiuaya tein kiixtalijka, xa kimiktiskiaj Jehoiadá. Sayoj ke kemej Jehová kipaleuij, mochiuak kemej kiixtalijka. w23.06 17 § 12, 13

Tekiuaj Nabucodonosor ueliskia kinemilis ke Daniel kiixnamiktoya uan ueliskia tanauatis maj kimiktikan, sayoj ke Daniel moyolchikauak uan kimelauilij nochi tein kikochitak. ¿Toni xa kipaleuij Daniel maj nochipa yolchikauak? Xa semi kipaleuij tein kichiuayaj itatuan keman katka telpoch (Deut. 6:​6-9). Daniel amo sayoj kiixmatia Majtakti Tanauatilmej, ta no okseki tanauatilmej tein kijtouajya toni ueliskia kikuaskej israelitas uan toni amo (Lev. 11:​4-8; Dan. 1:​8, 11-13). Daniel kimatia tein kipanoka ixolal Dios uan tein kinpanouaya keman amo kitakamatiaj Jehová (Dan. 9:​10, 11). Nochi tein kipanok kipaleuij maj kiita ke Jehová uan ángeles akin semi chikaujkej nochipa kipaleuiskiaj (Dan. 2:​19-24; 10:​12, 18, 19). w23.08 3 § 5, 6

Rebeca katka semi tamatkej uan yolchikauak, kimatia kemanian kichiuas teisa uan keniuj kichiuas (Gén. 24:58; 27:​5-17). Sayoj ke no tapoujkaitaya uan tatakamatia (Gén. 24:​17, 18, 65). Komo amo no timoueyineki kemej Rebeca uan tikinpaleuia akin Dios kinixtalij maj techixyekanakan, mochankauan uan tokniuan itech nechikol kinpaleuis tein tikchiua. Kiajsikamatij ke amo nochi ueli kichiuaj. Ester akin kuali kitekitiliaya Dios, kiajsikamatia ke amo nochi uelia kichiuaya. Keman Ester kiixtalijkej kemej tekiuaj amo moueyinekik. Uan no, kikakia uan kichiuaya tein kiyolmajxitiaya iprimo Mardoqueo (Est. 2:​10, 20, 22). No uelis tikchiuas kemej yejua keman tikiniluis oksekin maj mitsyolmajxitikan uan tikchiuas tein mitsiluiaj (Tito 2:​3-5). Maj tikitakan keniuj Ester no kinextij ke amo moueyinekia. Ester kualtsin kemej moitaya “uan kuakualtsin katka”, sayoj ke amo ika moueyinekik (Est. 2:​7, 15). w23.12 19, 20 § 6-8

Keman semi timotajtakoltiaj teisa kemej yeskia techetilijtoskia, yejua ika moneki timokixtiliskej. Komo tikijtojkejya tajtakol tein tikchiujkej, timoyolpatakejya uan timochikaujtokej amo oksepa tikchiuaskej, uelis tikyematiskej ke Jehová techtapojpoluijya (Hech. 3:19). Keman tikchiuaskejya nochi nejon, Jehová amo kineki maj timotajtakoltikanok porin kimati ke komo nochipa ijkon timomachiliaj uelis timotajyouiltiskej (Sal. 31:10). Komo semi timotayokoltiaj xa amo tiknekiskejok kemej yeskia tiksentokaskej titsikuiniskej uan timosenkauaskej (2 Cor. 2:7). Komo nochipa tionmotajtakoltijtok xikonelnamiki ke Dios ‘yekmelauj tetapojpoluia’ (Sal. 130:4). Keman aksa yekmelauj moyolpata, Jehová kichiua tein motenkaua: “Amo nikelnamikisok inintajtakol” (Jer. 31:34). Nejin kijtosneki ke keman Jehová mitsontapojpoluia, amo mitsonelnamikilijtokok tein tikonchiuak. Komo amo tikonpiaok tekimej tein tikonpiaya itech nechikol amo xionmoyolkoko. Jehová amo kielnamikiok tajtakol tein tikonchiuak uan tejuatsin no uelis tikonelkauasya. w23.08 30, 31 § 14, 15

Keman mochiujtoya kokolis COVID-19 momoyauak miak taman tein amo yekmelauj. Itaixpantijkauan Jehová akin kichiujkej tein kinnauatiaya inechikol, amo semi motekipachojkej kemej akin kineltokakej tein motakajkayauaya (Mat. 24:45). Moneki kuali tikitaskej “toni okachi tayekantok” (Filip. 1:​9, 10). Onkak miak taman tein uelis kichiuas maj tikpolokan tiempo uan maj amo tikchiuakanok tein moneki. Seki taman kemej titakuaskej, titatayiskej, timoixpetaniskej uan titekitiskej, uelis kichiuas maj tikauakan tein okachi tayekantok (Luc. 21:​34, 35). Uan no, mojmostaj tikakij uan tikixtajtoltiaj keniuj motajtolteuiaj políticos. Maj amo tikauakan maj nochi nejin techkuili totiempo. Komo amo timoyekpiaj, itech toyolijtik ueliskia semej tikpaleuijtoskej. Satanás kikui miak taman para techuetsiltis uan maj amo tiktakamatikanok Jehová. w23.07 16, 17 § 12, 13

Tiitekitikauan Jehová tikitaj ke tonal keman tikelnamikij imikilis Cristo motelneki. Sayoj yejua nejin tein Jesús technauatij maj tikchiuakan (Luc. 22:​19, 20). Nejon tonal no ueli itech titanemiliaj tatiochiualismej tein tikpiaskej. Techelnamiktia keniuj uelis tiktasojkamatiskej tein Jesús toka kichiuak (2 Cor. 5:​14, 15). No ueli tietokej iniuan tokniuan uan timosenyolchikauaj (Rom. 1:12). Uan no, miakej semi kiuelitaj tein ompa kikakij uan kiitaj, yejua ika peua momachtiaj Biblia. No tiknekij maj ejkoya nejon tonal porin tikmatij ke tokniuan itech nochi taltikpak no ijkuak mosentiliaj. Nochi nejin kichiua maj semi tiyolpakikan keman tikelnamikij imikilis Cristo. w24.01 8 § 1-3

Keman okachi itech titanemiliskej tein Jehová uan Jesús toka kichiujkej, okachi tikajsikamatiskej keniuj techtasojtaj tisejsemej (Gál. 2:20). Jehová kitemakak iKonetsin porin yekmelauj techtasojta. Kinextij ke techtasojta keman kitemakak iKonetsin akin semi kitasojtaya uan kikauak maj tajyoui uan maj toka momikili. Jehová amo sayoj techtasojta, ta no kinextia (Jer. 31:3). Kichiuak maj iuan timotokikan porin techtasojta (no xikonita Deuteronomio 7:​7, 8). Nion teyi uan nion akin uelis kichiuas maj amo techtasojtaok (Rom. 8:​38, 39). ¿Keniuj tionmomachilia keman itech tiontanemilia nejin? w24.01 28 § 10, 11

Tokniuan taixpejpenalmej semi kipatiuitaj tein kichiaj. Itech xiuit 1991 tokniuj Frederick Franz, kijtoj: “Tein tikchiaj yekmelauj mochiuas uan tisejsemej akin tipouij iniuan 144 mil tikseliskej tein Dios motenkaua, uan yeski okachi kuali ke tein tiknemiliaj”. Franz kijtoj: “Tiksentokaj tiktelpatiuitaj tein tikchiaj. Uan ijkon kemej panotiuj tiempo, [...] okachi tiktasojkamatiliaj Dios. Tiknekij tiksentokaskej tikchiaskej tein tikseliskej maski amo tikmatij hasta kemanian. Axkan okachi nikpatiuita tein tikchiaj ke achto”. Tinochin tikchiaj teisa tein techyolpaktia. Xa tikchiaj tinemiskej nikan taltikpak oso ne iluikak, uan uelis okachi tikneltokaskej ke yekmelauj mochiuas nejon tein tikchiaj. w23.12 9, § 6; 10 § 8

Ne uejkauj ikalakyan takenkal yetoya se altar tachijchiuj ika cobre kampa kimaktiliayaj Jehová tapialmej (Éx. 27:​1, 2; 40:29). Sayoj ke tein kimaktiliayaj Jehová amo uelia kichiuaya maj senkis kintapojpolui israelitas (Heb. 10:​1-3). Keman miakpa kinchichinouayaj tapialmej itech takenkal, kiixnextij tein motemakaskia satepan tein kichiuaskia maj senkis kintapojpoluikan nochin. Jesús kimatia ke Jehová kiualtitanka nikan taltikpak para maj kinmakixtiki nochin (Mat. 20:28). Yejua ika keman Jesús moauij, motemakak para kichiuas tein Jehová kinekia (Juan 6:38; Gál. 1:4). Jesús “motemaktij sayoj sepa uan nejon tapaleuia” para maj nochin akin itech takuaujtamatij kintapojpoluikan nochipaya (Heb. 10:​5-7, 10). w23.10 26, 27 § 10, 11

Tejuan toselti amo ueliskia timokixtiliskej tajtakol uan mikilis (Sal. 49:​7, 8). Yejua ika Jehová kiixtalij maj iKonetsin toka motemaktiani, uan maski katka semi ouij para Jehová uan Jesús, ipa kichiujkej. Keman okachi itech titanemiliskej tein Jehová uan Jesús toka kichiujkej, okachi tikpatiuitaskej. Keman kichijchiujkej yekinika takat Adán amo katka tajtakolej. Sayoj ke keman tajtakoj amo uelikok nemik nochipaya uan ikoneuan no ijkon kinpanok. Para moixtauas tein Adán kipoloj monekik maj toka momikili Jesús akin amo tajtakolej. Nochi xiujmej keman nemik nikan taltikpak, Jesús “amo kichiuak nion se tajtakol, uan amo keman takajkayauak” (1 Ped. 2:22). Keman Jesús momikilij, amo katka tajtakolej, yejua ika uelik kiixtauak tein kipolojka Adán akin achto amo no katka tajtakolej (1 Cor. 15:45; 1 Tim. 2:6). w24.01 10 § 5, 6

Satepan ke Jesús oksepa nemik, kalakik kampa Okachi Yektik itech itemplo Jehová. Kemej Jehová kiixtalij maj tikueyichiuakan yejua tein okachi kuali uan ijkon kiixtalij porin Jesús toka momikilij uan mochiuak toueyi Tayekankatiopixkat. Kampa Okachi Yektik tein kipiaya takenkal kimachijchiujkaj israelitas uan tayekankatiopixkat ompa kiuikaya iesyo tapialmej. Sayoj ke Jesús kalakik kampa yekmelauj Okachi Yektik: “ne iluikak”, iixpan Jehová. Ompa kimaktilij inemilis tein amo tajtakolej para techmakixtis tinochin uan “kiixpolos tajtakol porin motemaktij” (Heb. 9:​24-26). Tinochin uelis tikueyichiuaskej Jehová itech itemplo maski tiaskej iluikak oso tinemiskej nikan taltikpak. w23.10 28 § 13, 14

Maj ika titanemilikan tekit tein kichiua Jesús ompa iluikak kemej Tekiuaj uan Tayekankatiopixkat akin teyoliknelia. Itokaykopa Jesús uelis timotokiskej “kampa tokotsyetok Dios akin kitemaka itatiochiualis tein amo technamiki”, uan tiktajtaniskej maj techikneli “itech hora keman okachi monekis maj techpaleuikan” (Heb. 4:​14, 15). Mojmostaj maj ika titanemilikan tein Jehová uan Jesús toka kichiuaj. Kemej techtasojtaj tiknejnekij okachi tiktekitiliskej Jehová (2 Cor. 5:​14, 15). Se taman kemej tiknextiaj ke timotasojkamatij yejua keman timochikauaj tikinpaleuiskej oksekin maj mochiuakan itekitikauan Jehová uan imomachtijkauan Jesús (Mat. 28:​19, 20). No ijkon kichiuak tatitanil Pablo. Pablo kimatia ke Jehová kineki “maj akin yeski momakixti uan maj kuali kiixmati tein melauak” (1 Tim. 2:​3, 4). w23.10 22, 23 § 13, 14

Nejin versículos semi tikuij keman titanojnotsaj para tikinyolseuiskej oksekin uan tikiniluiskej keniuj tinemiskej itech xochital. ¿Toni kijtouaj sekin keman kikakij nejin? Yejuan xa kijtouaj: “Kuali mokaki, sayoj ke xa amo mochiuas”. ¿Keniuj uelis tikinpaleuiskej oksekin maj kineltokakan ke yekmelauj mochiuas tein moijtoua itech Apocalipsis 21:​3, 4? ¿Uan toni moneki tikchiuaskej para okachi titakuaujtamatiskej iuan Jehová uan tikneltokaskej ke kichiuas tein motenkaujtok? Jehová amo sayoj kijtoj tein kichiuas satepan, ta no kijtoj keyej uelis tikneltokaskej ke yekmelauj kichiuas tein motenkaua. Biblia kijtoua keyej uelis tikneltokaskej ke Jehová kichiuas xochital. Itech versículos tein tikitatij kijtoua: “Akin tokotsyetoya itech ueyi silla kijtoj: ‘¡Xikita! Nikchijchiujtok nochi yankuik’. No kijtoj: ‘Xikijkuilo nejin porin tein nikijtoua takuaujtamach uan melauak’. Uan nechiluij: ‘¡Motamichiuakya! Nejua nipeua uan nejua nitami’” (Apoc. 21:​5, 6a). w23.11 3 § 3-5

Se tokniuj telpoch no kinextia ke tanemilia kemej Jehová kichiua, keman kuali kiita toni motalilis uan keniuj mokuaxiluis. Miakej akin kichijchiuaj tasal uan akin motaliliaj para kinextiskej keniuj moita, amo kipoujkaitaj Jehová uan auilnemij. Yejua ika tasal kichijchiuaj maj tetilinti uan maj pepechiujto oso para maj takamej moitakan kemej siuamej. Yejua ika se tokniuj telpoch akin mochikaua kichiuas kemej Jesús ueli kinemilia toni kiyolpaktia Jehová uan kuali motasaltia kemej kichiuaj tokniuan itech nechikol. Uelis motajtanis: “¿Kinextia tein nikchiua ke kuali nitanemilia uan nechtekipachoua tein kinemiliaj oksekin? ¿Kinextia kemej nimotakentia ke niktekitilia Dios?” (1 Cor. 10:​31-33). ToTajtsin Jehová uan tokniuan itech nechikol kipoujkaitaj telpoch akin kuali tanemilia. w23.12 26 § 7

Ne uejkauj “tekiuaj akin taixyekana sur” no kintajyouiltij itekitikauan Jehová (Dan. 11:40). Ijkon panok keman mochiuak Yekinika uan Ojpatika Ueyi Neteuilis keman miakej tokniuan kintsakkej porin amo kinekkej yaskej moteuitiuij, uan miakej konemej kinkixtijkej de tamachtiloyan porin amo kinekkej kitajpaloskej bandera. Sayoj ke itech nejin tonalmej, itekitikauan Jehová akin nemij kampa tekiuajti “tekiuaj akin taixyekana sur” kipanouanij okseki taman ouijkayomej. Xa keman tayoleujtinemij maj se tapaleui maj aksa mochiua tekiuaj, xa se tokniuj kinemilis ke semej okachi kuali taixyekanas maski amo yas kiixpejpenatiuj, sayoj ke xa kinemilis oso kinejnekis maj aksa tatani. Para amo tikpaleuiskej nion se moneki semi tikitaskej tein tikchiuaj, tein tiknemiliaj uan tein tikmachiliaj (Juan 15:​18, 19). w23.08 12 § 17

Para uelis tinemiskej nochipaya moneki titsikuiniskej kemej uelis titataniskej (1 Cor. 9:24). Jesús kijtoj ke uelis techpanos, ke sayoj ‘tiknemilijtoskej titeltakuaskej uan titeltatayiskej uan sayoj techtekipachojtos tein techpoloua’ (Luc. 21:​34, nota). Nejin texto uan oksekiok uelis techpaleuis maj tikmatikan toni moneki tikpataskej para tiksentokaskej tiktekitiliskej Jehová uan tinemiskej nochipaya. Tikyekmatij ke titataniskej uan tinemiskej nochipaya porin Jehová techpaleuis maj titaxikokan hasta keman ejkos nejon tonal (Is. 40:​29-31). Yejua ika amo xionmosenkaua. Xikonchiua kemej tatitanil Pablo, akin semi mochikauak para kiselis tein kitayokoliskiaj (Filip. 3:​13, 14). Nejin amo akin ueli moka kichiua, sayoj ke Jehová nochipa mitsonpaleuis. Yejuatsin uelis mitsonpaleuis sayoj xikonchiua tein moneki uan amo tein amo moneki. Kemej Jehová mouan yetok uelis tiontaxikos keman kemej yeskia tiontsikuintos para tiontatanis. w23.08 31 § 16, 17

Keman Jesús kipiaya 12 xiujmej, yejua yajki Jerusalén iniuan itatuan, uan keman mokepkej amo iniuan mokepakok (Luc. 2:​46-52). José uan María monekia kiitaskej maj nochin ininkoneuan iniuan mokepanij satepan ke tamik iluit, sayoj ke amo ijkon kichiujkej. Satepan ke kiajsikej Jesús, María kitajtakoltij porin momoujtijkaj. Maski Jesús ueliskia kiniluis ke amo kuali tein kichiujtoyaj amo teyi kiniluij, ta kuali kinnankilij uan kinpoujkaitak. Sayoj ke José uan María “amo kiajsikamatkej tein kiniluijtoya”. Maski ijkon, Jesús “kisentokak kintakamatik”. Telpoch, ¿ouij mitskisa tikintakamatis motatuan keman mopolouaj oso amo mitsajsikamatij? ¿Toni uelis mitspaleuis? Xiknemili keniuj momachilia Jehová. Biblia kijtoua ke komo tekoneuan kintakamatij inintatuan, “kiyolpaktia toTekotsin” (Col. 3:20). Jehová kimati keman motatuan amo mitsajsikamatij oso mitsiluiaj xikchiua teisa tein semi ouij. Sayoj ke komo tikixtalia tikintakamatis maski ijkon kichiuaskej, Jehová semi yolpakis. w23.10 7 § 5, 6

Xa akin iuan timomachtiaj kijtos ke tiitaixpantijkauan Jehová moneki tikpataskej kemej tikinitaj akin kinuelitaj inintakaikniuan oso ininsiuaikniuan. Xa ueliskia tikiluiskej ke tikpoujkaitaj tein kiixpejpenaj oksekin (1 Ped. 2:17). Ijkon xa techkauas maj tikmelauilikan keyej semi tapaleuia maj tiktakamatikan tein kijtoua Biblia. Komo aksa amo kiuelita tein tikneltokaj uan techiluia tein kinemilia, maj amo niman tiknemilikan ke tikmatijya tein kineltoka. Maj tikijtokan ke aksa akin iuan timomachtia mitsiluia ke tepinaujtij maj se kineltoka ke Dios nemi. ¿Tiknemiliskia ke kineltoka evolución uan ke kuali kiajsikamati? Tein melauj, xa sayoj kineltoka tein kikakini. Ueliskia tiktitanilis tein ika kitapos se tamachtilis oso se video itech jw.org kampa ika tajtoua ke aksa tachijchiuak. Xa satepan hasta kinekis kiitas okse tamachtilis mouan, uan komo kuali tiknojnotsa hasta kinekis kipatas tein kinemilia. w23.09 17 § 12, 13

Tejuan no uelis tikmatiskej ke maski timopoloskej, uelis tiksentokaskej tiktekitiliskej Jehová. Yejuatsin techtatiochiuis komo amo tikchiuajok tein tikchiuayaj uan tiksentokaj tiktemouaj maj techpaleui (Prov. 28:13). Sansón maski katka tajtakolej uan mopoloj keman kineltokilij Dalila, amo mosenkauak uan kisentokak kitekitilij Jehová. Uan Jehová amo no kisenkauak, ta kipaleuij maj kichiuani teisa tein motelnekia. Jehová kisentokaya kiitaya ke Sansón semi takuaujtamatia, yejua ika kichiuak maj no moijkuilouani itokay iniuan okseki itekitikauan akin amo keman kikaujkej, akin ininka motajtoua itech Hebreos capítulo 11. Semi techyolchikaua tikmatiskej ke toTajtsin techtasojta uan kineki techpaleuis maj titaxikokan, okachiok keman tikpiaj ouijkayomej. Yejua ika, maj tikchiuakan kemej Sansón uan maj tiktajtanikan Jehová: “NoUeyi Teko Jehová, nimitstataujtia xinechchikaua” (Juec. 16:28). w23.09 7 § 18, 19

Kemej tikmatij ke itonal Jehová amo uejkaua ejkos, tiknekij tikinmatiltiskej oksekin tein kuali tein kichiuas iTaixyekanalis Dios. Sayoj ke kemansa, xa amo tiknekiskej titajtoskej. ¿Keyej? Porin tikinmouiliskej oksekin. Ijkon kipanok Pedro youak keman yaya kitatsakuiltitij Jesús. Pedro amo kijtoj ke no katka semej imomachtijkauan uan miakpa kijtoj ke amo kiixmatia (Mat. 26:​69-75). Sayoj ke satepan amo mouiaok uan kijtoj: “Amo xikmouilikan tein yejuan kimouiliaj nion ximotekipachokan” (1 Ped. 3:14). Tein kijtoj Pedro kinextia ke tejuan no uelis timoyolchikauaskej uan amo tikmouiliskejok tein kichiuaskej oksekin. ¿Toni techpaleuis maj amo tikinmouilikanok oksekin? Pedro techyolmajxitia: “Itech namoyolo xiktakachiuakan Cristo kemej namoTekotsin” (1 Ped. 3:15). Nejin no kijtosneki ke moneki tikelnamikiskej ke toTekotsin Jesucristo yejua toTekiuaj uan ke semi chikauak. w23.09 27, 28 § 6-8

Tejuan moneki semi timoyekpiaskej para amo tikchiujtoskej “tein amo tapaleuia tein poui kampa tayouayan” (Efes. 5:11). Keman aksa kikaki, kiita oso tajtoua de auilnemilis oso tein pitsotik, okachi ijsiujka kichiua tein amo kuali (Gén. 3:6; Sant. 1:​14, 15). Satanás kitemoua kichiuas maj amo tikmatikan toni kuali yetok uan toni amo (Is. 5:20; 2 Cor. 4:4). Yejua ika, amo tikmojkaitaj maj miakej kitemokan maj tikneltokakan ke amo tajtakol tein Jehová kijtoua ke pitsotik oso auilnemilis (2 Ped. 2:19). Itech películas, itech televisión uan itech internet kijtouaj miak taman tein Jehová techiluia ke amo kuali yetok maj tikchiuakan. Satanás kineki maj tiknemilikan ke kuali yetok tein kichiuaj tein pitsotik uan nochi taman auilnemilis (Efes. 5:6). w24.03 22 § 8-10

Kampa nochin israelitas mosentiliayaj para kiueyichiuaskej Dios uan kinchichinoskej tapialmej motokaytiaya “takenkal” (Éx. 29:​43-46). Israelitas nochipa kiuikatinemiaj nejon takenkal kampa yayaj itech taluakyan (Éx. 25:​8, 9; Núm. 9:22). Uan kikuikej kemej 500 xiujmej hasta keman kichijchiujkej templo ompa Jerusalén. Sayoj ke takenkal no kiixnextij teisa tein mochiuaskia amo uejkaua tein semi kuali. Takenkal “kinextia tein mochiua ne iluikak” uan kiixnextia iueyi templo Jehová. Tatitanil Pablo kijtoj: “Nejin takenkal kiixnextia tein axkan mochiujtok” (Heb. 9:9). Keman kintajkuilouilij tokniuan hebreos, kiueyichiujtoyajya Jehová kemej monekia, peuak ijkon kiueyichiuaj itech xiuit 29. Itech nejon xiuit Jesús moauij uan peuak tekiti kemej ‘iueyi tayekankatiopixkat’ Jehová itech itemplo (Heb. 4:14; Hech. 10:​37, 38). w23.10 25, 26 § 6, 7

Tejuan no moneki kemej yeskia timokuetaxoskej oso timokelpachoskej para tiyolpakiskej keman tiktekitiliskej Jehová maski tikpiaskej ouijkayomej, ¿keniuj? Keman amo timosenkauaj maski mopatas teisa, uan keman tikpoujkaitaj tein kinemiliaj uan tein kiixtaliaj kichiuaskej oksekin. Tinochin akin tiktekitiliaj Jehová tiknekij tiyeskij tiyolyemankej, titeikneliskej uan amo tiktemoskej maj nochipa mochiua tein tiknemiliaj. Biblia kijtoua ke Jehová kemej yeskia se “Tepejxit” porin kuali ijkatok uan amo teyi ueli kiolinia (Deut. 32:4). Sayoj ke amo no kitemoua maj nochipa mochiua tein kinemilia. ¿Keniuj tikmatij? Keman itech taltikpak mopata miak taman, Jehová no kipata seki taman para maj mochiua tein kinejneki. Uan kemej Jehová techchijchiuak kemej yejuatsin, tejuan no ueli timopataj keman mopata teisa. Maski tikpiaskej ouijkayomej, nochipa tikmatiskej toni tikchiuaskej porin Jehová techmakani tayolmajxitilismej itech Biblia tein amo ouij moajsikamatij. Tein kichiua uan tein techyolmajxitia kinextia ke maski Jehová kemej yeskia se tepejxit amo kitemoua maj nochipa mochiua tein yejua kinemilia. w23.07 20 § 1-3

Biblia kijtoua ke Jehová tamati kemej se temomaj akin semi tetasojta (Is. 66:​12, 13). Xikonnemili keniuj se temomaj semi kitasojta ikonetsin uan kiyekpia uan keman pili choka oso teisa kikokoua, temomaj niman kiitati. No ijkon, keman titayokoxtoskej Jehová touan yetos. Yejuatsin kisentoka techtasojta maski timopolouaj (Sal. 103:8). Israelitas miakpa kiyolkokojkej Jehová, sayoj ke keman yejuan moyolpatakej uan amo kichiujkejok tein amo kuali, Jehová kisentokaya kinnextiliaya ke kintasojtaya. Se tonal kiluij ixolal: “Nimitspatiuitak, nimitspoujkaitak, uan nimitstasojtak” (Is. 43:​4, 5). Jehová amo mopatani uan maski tiueyitajtakoskej yejuatsin amo techsenkaua. Komo timoyolpataj uan oksepa iuan timokepaj, yejuatsin kisentokas techtasojtas. Motenkaua ke ‘techtapojpoluis’ (Is. 55:7). Biblia kijtoua ke ‘tiyolseuij’ keman Jehová techtapojpoluia (Hech. 3:19). w24.01 27 § 4, 5

Jehová uelis techpaleuis keman tikpiaj ouijkayomej. Xa keman monekis maj tiktajtanikan akin tiktekitiliaj maj techkaua maj tiakan se ueyi nechikol oso maj techkaua maj tikpatakan hora keman titekitij para uelis tiaskej nechikol. Keman techpanoua nejin ueli tikitaj keniuj Jehová semi techpaleuia. Uan keman tikitaskej ke kuali kisa tein tikchiuaj, tikmojkaitaskej uan okachi titakuaujtamatiskej iuan Jehová. Esdras katka yolyemanik uan kitajtanij Jehová maj kipaleui. Nochipa kitataujtiaya Jehová keman kiitaya ke amo ueliskia kichiuas tein kinauatijka (Esd. 8:​21-23; 9:​3-5). Oksekin kipaleuijkej keman kiitakej ke semi takuaujtamatia uan no takuaujtamatkej kemej yejua (Esd. 10:​1-4). Keman semi timotekipachojtokej porin amo tikpiaj tomin oso porin tiknekij maj kuali yetokan tochankauan, maj tiktataujtikan Jehová uan maj titakuaujtamatikan ke yejuatsin techpaleuis. w23.11 18 § 15-17

Jehová amo kijtoua ke moneki tikchiuaskej nochi tein Abrahán kichiuak para kiitas ke tiyolmelaujkej, ta onkak miak taman kemej uelis tiknextiskej ke titakuaujtamatij. Uelis tikinpaleuiskej tokniuan akin kipiaj se ouijkayot, tikinpaleuiskej tochankauan uan kuali tikinseliskej akin yankuixtok peua monechikouaj. Komo tikchiuaj nochi nejin tikyolpaktiskej Jehová (Rom. 15:7; 1 Tim. 5:​4, 8; 1 Juan 3:18). No moneki semi tiknejnekiskej titanojnotsaskej para tiknextiskej ke titakuaujtamatij (1 Tim. 4:16). Tinochin uelis tiknextiskej ke titakuaujtamatij ke Jehová kichiuas tein motenkaua uan ke yejuatsin okachi kuali techixyekana. Komo ijkon tikchiuaj, uelis tikmatiskej ke Jehová kiitas ke tiyolmelaujkej uan ke tiitasojikniuan. w23.12 2 § 3; 6 § 15

Tatitanil Pablo kinyolchikauak tokniuan akin nemiaj Corinto ika tajtolmej tein axkan tikitaj. Nochin tokniuan takamej akin kinekij kichiuaskej kemej Jesús semi moneki maj kitakamatikan nejin. Uan para kichiuaskej, moneki kitakamatiskej itanauatiluan Dios uan nochipa kichiuaskej tein tayolmajxitia Biblia (Luc. 2:52). ¿Keyej semi moneki maj tokniuan okichpipil okachi kuali kitekitilikan Dios? Tokniuan takamej moneki kichiuaskej miak taman para kinpaleuiskej ininchankauan uan tokniuan itech nechikol. Komo tiokichipilok, xa tiknemiliani toni tekimej uelis tikchiuas amo uejkaua. Xa tikneki timochiuas precursor, tapaleuijkej itech nechikol uan satepan timochiuas tayekankej. Xa no tiknekis timonamiktis uan tikinpias konemej (Efes. 6:4; 1 Tim. 3:1). Para tikchiuas tein tikixtalijtok, moneki kuali tiktekitilis Dios. w23.12 24 § 1, 2

Jehová kinnauatijtok tokniuan tayekananij maj kinyekpiakan iichkauan akin semi kintasojta. Yejuan semi kiuelitaj kinpaleuiskej tokniuan uan mochikauaj yeskij kuali ichkatajpianij (Jer. 23:4; 1 Ped. 5:2). ¡Semi kualtsin maj itech nechikolmej moajsikan tokniuan akin semi tekitij! Tokniuan tayekananij uelis kinmachtis miak taman tein kichiuak juez Gedeón (Heb. 6:12). Yejua kiyekpiaya uan kiixyekanaya ixolal Dios (Juec. 2:16; 1 Crón. 17:6). Tokniuan tayekananij no moneki kinyekpiaskej tokniuan keman kipiaskej ouijkayomej ijkon kemej kichiuak Gedeón (Hech. 20:28; 2 Tim. 3:1). Uelis kinmachtis miak taman komo kiitaj ke Gedeón kiajsikamatia ke amo nochi uelia kichiuaya, katka yolyemanik, tatakamatia uan kixikouaya ouijkayomej. Tein kichiuak nejin juez no uelis kinpaleuis nochin tokniuan itech nechikol maj okachi kitasojkamatikan tein kichiuaj tayekananij uan maj kinpaleuikan (Heb. 13:17). w23.06 2 § 1; 3 § 3