Marzo

Biblia no ininka tajtoua akin katkaj yolmelaujkej uan satepan amook, kemej tekiuaj Salomón. Yejua kuali kiixmatia Jehová, kimatia keniuj monekia kiueyichiuas uan yejuatsin semi kitatiochiuij. Sayoj ke satepan peuak kinueyichiua tatadiosmej. Yejua ika Jehová semi kualanik, uan nochin israelitas tajyouijkej miak xiujmej porin Salomón tajtakolchiuak. Biblia kijtoua ke keman Salomón momikilij, “moseuito iniuan iuejkaujtatuan” uan semej akin no ompa kitokkaj katka David (1 Rey. 11:​5-9, 43; 2 Rey. 23:13). Sayoj ke, ¿kijtosnekisia ke nochin akin momikilijkejya oksepa nemiskej? Biblia amo kijtoua. Kemej Jehová semi techtasojta kineki maj oksepa tinemikan para maj ueli tiktekitilikan nochipaya (Job 14:​13, 14; Juan 6:44). ¿Yeski Salomón semej akin oksepa nemiskej? Sayoj Jehová kimati, tejuan amo. Sayoj ke tikmatij ke Jehová kichiuas tein kuali. w24.05 4 § 9

Keman timotemaktiaj iuan Jehová kemej yeskia tikalakij “ichan”. Uan keman ompa tietokej tikpiaj miak taman tein techpaleuia maj tiksentokakan kuali iuan timouikakan uan maj tikinixmatikan okseki tokniuan. Sayoj ke ichan Jehová amo moajsi sayoj seko, ta yetok kampa yeski kampa moajsij itekitikauan akin kitakamatij (Apoc. 21:3). ¿Uan toni kinpanos itekitikauan Jehová akin nochipa kitekitilijkej uan momikilijkejya? ¿No kisentokaj yetokej ichan Jehová? Kemaj. ¿Keyej ijkon tiknemiliaj? Porin Jehová kuali kinelnamiktok uan kinita kemej yeskia yoltokejok. Jesús kijtoj: “Tein ijkuiliujtok ke panok itech kouit tein uitsyoj, hasta Moisés kinextij ke mikemej oksepa nemiskej, yejua kinotsak Jehová, ‘iDios Abrahán, iDios Isaac uan iDios Jacob’. Yejua amo ininDios mikemej, ta ininDios akin yoltokej, porin yejua kinita ke nochin yejuan yoltokej” (Luc. 20:​37, 38). w24.06 3 § 6, 7

Sadoc yajki Hebrón uan kiuikaya nochi tein kikuiskia komo monekia tateuis (1 Crón. 12:38). Yejua kiixtalijka yas tateuitiuj iuan David uan kipaleuis Israel komo kiixnamikiaj. Nejin telpoch semi yolchikauak katka. ¿Toni kipaleuij Sadoc maj yolchikauak? Yejua kimatia tein kichiujkej okseki takamej yolchikaujkej, uan nejon semi kipaleuij. Semej katka David. Nochin israelitas kiixtalijkej kemej tekiuaj porin katka yolchikauak keman “kinixyekanaya soldados israelitas keman yayaj tateuitij” (1 Crón. 11:​1, 2). David takuaujtamatia iuan Jehová uan kitajtaniaya maj kipaleui keman kiixnamikiaj akin kitauelitayaj (Sal. 138:3). Sadoc no kiitaya tein kichiuayaj okseki takamej yolchikaujkej, kemej Jehoiadá uan ikoneuj Benaya, uan 22 takamej akin kinixyekanayaj tateuianij akin kipaleuijkej David (1 Crón. 11:​22-25; 12:​26-28). w24.07 3 § 5, 6

Saulo de Tarso semi kintajyouiltij itatojtokakauan Cristo. Yejua ika miakej xa kinemiliayaj ke amo keman mopataskia. Sayoj ke Jesús kimatia ke Saulo ueliskia moyolpatas. Yejua uan iTajtsin kiitakej tein kuali tein kichiuaya Saulo. Jesús kijtoj: “Nejin takat nikijitak” (Hech. 9:15). Hasta kichiuak se milagro para kipaleuis Saulo maj moyolpata (Hech. 7:58–8:3; 9:​1-9, 17-20). Saulo oso tatitanil Pablo moyolpatak uan peuak kitojtoka Cristo, uan Jesús kiixtalij kemej tatitanil. Pablo miakpa kijtoj ke kitasojkamatiliaya Jehová uan Jesús porin kinextilijkaj ke semi kiikneliayaj uan yolkualmej katkaj iuan (1 Tim. 1:​12-15). Se tonal, Pablo kikakik ke itech nechikol ompa Corinto kuali kiselijtoyaj se takat akin auilnemia. ¿Toni kiniluij maj kichiuakan? Tein kijtoj Pablo techmachtia keniuj Jehová kinextia ke kintasojta itekitikauan keman kinmelaua, uan ke kiniknelia keman moyolpataj uan no techmachtia keniuj uelis tikchiuaskej kemej yejuatsin. Itech okse tamachtilis ika titajtoskej tein panok itech nechikol ompa Corinto. w24.08 13 § 15, 16

¿Keniuj ueliskia iuan timotokiskej Jehová maski titajtakolejkej? Tel miak xiujmej yejuatsin yolik technextilijtiajki keniuj uelis iuan timotokiskej. Abel ojpatika ininkoneuj Adán uan Eva, yejua akin yekinika iuan takuaujtamatik Jehová satepan ke itatuan kiixnamikkej itech xochital Edén. Yejua kitasojtaya Jehová, kinekia kiyolpaktis uan iuan motokis. Uan yejua ika kiixtalij kimaktilis teisa. Kemej kinyekpiaya ichkatsitsin kinkuik miak “ichkamej tein achto yolkej” uan kinmaktilij Jehová. ¿Uan yejuatsin toni kichiuak? “Kiyolpaktiaya keniuj katka Abel uan no kiyolpaktij tein kimaktilij” (Gén. 4:4). Satepan Jehová no kiyolpaktij tein kimaktiliayaj oksekin akin kitasojtayaj uan iuan takuaujtamatiaj, kemej Noé (Gén. 8:​20, 21). Nejin kinextij ke maski titajtakolejkej, uelis tikyolpaktiskej uan iuan timotokiskej. w24.08 3 § 5, 6

Xa timoyolkokojtokej uan timotekipachojtokej porin techchiuilijkej tein amo kuali (Ecl. 7:7). Job uan Habacuc akin kuali kitekitilijkej Jehová no ijkon momachilijkej (Job 6:​2, 3; Hab. 1:​1-3). Maski kemansa ijkon timomachiliskej, moneki timoyekpiaskej para amo tikchiuaskej tein amo monekiuan tiknekiskej timomakepaskej. Keman tikitaj ke akin kichiuaj tein amo kuali amo teyi kinpanoua, xa tiknemiliskej ke nenkaj komo tikchiuaj tein kuali yetok. Maj itech titanemilikan salmista, yejua kiitaya ke akin amo yolkualmej kisentokayaj yolpakiaj maski kintajyouiltiayaj oksekin. Yejua kijtoj: “Ijkon kichiuaj akin amo yolkualmej, akin amo teyi kintekipachoua” (Sal. 73:12). Amo kuali momachiliaya keman kiitaya ke oksekin kichiuayaj tein amo kuali uan kinemilij ke nenkaj katka maj kisentokani kitekitiliani Jehová. Yejua kijtoj: “Keman niknekia nikajsikamatis, semi nechtekipachouaya...” (Sal. 73:​14, 16). w24.11 3 § 5-7

Tikueyitaliaj Jehová porin semi tiktakachiuaj. Miak taman kinextia ke kinamiki maj tiktakachiuakan Jehová. Yejua kipia chikaualis para kichiuas nochi tein kiixtalia uan amo keman sioui (Sal. 96:​4-7). Itech nochi tein kichijchiuak moita ke semi tamatkej. Techmakatok tonemilis uan nochi tein moneki para tinemiskej (Apoc. 4:11). Amo keman tekaua (Apoc. 15:4). Kuali kisa nochi tein kichiua uan nochipa kichiua tein motenkaua (Jos. 23:14). Yejua ika tanauatijkej Jeremías kiluij Jehová: “De nochin tamatinij akin nemij itech altepemej uan de nochin inintekiuanij, amo akin kemej tejua” (Jer. 10:​6, 7). Nochi nejin kinextia ke onkak miak taman tein kichiua maj tiknekikan tiktakachiuaskej toTajtsin. Sayoj ke amo sayoj tiktakachiuaj, ta no tiktasojtaj. Uan no, tikueyitaliaj Jehová porin semi tiktasojtaj. w25.01 3 § 5, 6

Akin techtauelitaj kinextiaj ke tein kuali tein kichiua inechikol Dios amo kuali yetok. Biblia tamachtia ke Jehová kineki maj itekitikauan chipaujkej, maj kichiuakan tein kuali yetok uan maj kiueyichiuakan kemej yejua kiuelita. Yejua kijtoua ke akin kisentoka kichiua tein amo kuali yetok uan amo moyolpata amo uelis yeskiok itaixpantijkauj Jehová (1 Cor. 5:​11, 12; 6:​9, 10). Kemej tiknekij tiktakamatiskej nejin tanauatil, akin techtauelitaj kijtouaj ke amo titeajsikamatij, amo titeikneliaj uan ke timoueyimatij. Moneki tikelnamikiskej akoni kichiua maj techixnamikikan. Satanás yejua “akin peuak takajkayaua”, uan kichiua maj kitakajkayauilikan inechikol Dios (Juan 8:44; Gén. 3:​1-5). Amo tikmojkaitaj maj kichiua maj oksekin takajkayauakan. w24.04 10, 11 § 13, 14

Xa satepan ke peuas tetsaujkatajyouilis sekin akin kiitaskej keniuj kiixpoloskej “Ueyi Babilonia”, kielnamikiskej ke itaixpantijkauan Jehová miak xiujmej ipa kiteixmatiltijtoyajya ke ijkon panoskia. ¿Kichiuas nejon maj sekin takuaujtamatikan iuan Jehová? (Apoc. 17:5). Maj tiknemilikan tein panok keman Moisés nemia. Keman israelitas kiskej de Egipto, “no kintojtokateujkej tel miakej”. Xa sekin peuak takuaujtamatij iuan Jehová keman kiitakej ke mochiuak tein Moisés kijtojka ke panoskia (Éx. 12:38). Komo no ijkon panoua satepan ke kiixpoloskej Ueyi Babilonia, ¿tikualaniskej komo sekin kinekij touan kiueyichiuaskej Jehová achto ke ixpoliuis nochi tein amo kuali? ¡Amo! Tejuan tiknekij tikchiuaskej ijkon kemej Jehová, “Dios akin teiknelia uan yolkuali, amo niman kualani, nochipa tetasojta uan nochipa kijtoua tein melauj” (Éx. 34:6). w24.05 11 § 12, 13

¿Toni uelis panos komo amo tikelnamikij “kuali tajtolmej tein ipa ixyetokya”? Maj tikitakan tein panok itech yekinika siglo. Seki tokniuan kijtojtinemiaj ke itonal Jehová ejkokaya. Xa moajsia se amat kampa kijtouaya nejon uan tein kijtouayaj ke kijkuilojka tatitanil Pablo. Seki tokniuan de Tesalónica amo kiitakej ox yekmelauj katka nejon uan yejua ika kineltokakej, uan no peuak tetapouiaj. Amo kinkajkayauaskiaj komo kielnamikiskiaj tein Pablo kinmachtijka keman iniuan yetoya (2 Tes. 2:​1-5). Tatitanil Pablo kiniluij maj amo kineltokanij nochi tein kikakiaj. Uan kemej amo kinekia maj oksekin no ijkon kinpanouani, kiniluij nejin tajtolmej keman kitamiijkuiloj ojpatika amatajkuilol tein kintitanilij: “Nejua Pablo, nikmaijkuiloua nejin tajtolmej tein ika namechtajpaloua. Nochipa ijkon nikijkuiloua nochi noamatajkuiloluan, para xikmatikan ke nejua nitajkuiloj” (2 Tes. 3:17). w24.07 12 § 13, 14

Tokniuan monekia okachi kinextiskej ke takuaujtamatiaj porin ompa Judea okachi kipiaskiaj ouijkayomej. Maski sekin semi kintajyouiltijkajya, miakej amo kinpanotoya nejon. Yejua ika tatitanil Pablo kiniluij ke satepan okachi kintajyouiltiskiaj uan ke monekia maj kinextikan ke amo kikauayaj Jehová hasta komo kinmiktiskiaj, ijkon kemej Jesús (Heb. 12:4). Kemej tel miakej peuak kichiuaj kemej Cristo, miakej judíos peuak okachi kualanij. Seki xiujmej achto, panoua 40 judíos ‘moyektenkaujkaj maj kinpanouani tein amo kuali komo takuayaj uan tatayiaj achto ke kimiktiskiaj Pablo’ (Hech. 22:22; 23:​12-14). Maski miakej kintauelitayaj, nejon tokniuan monekia kisentokaskej mosentiliskej, tanojnotsaskej uan okachi takuaujtamatiskej. w24.09 12 § 15

Jesucristo semi kitasojtaya tatitanil Juan (Mat. 10:2). Iuan tanojnotsak Jesús, kiitak milagros tein kichiuak uan iuan yetoya keman semi tajyouij. Iuan yetoya keman kikoujpampilojkej uan satepan kiitak keman oksepa nemik. No kiitak keman miakej peuak kichiuaj kemej Cristo itech yekinika siglo: desde keman amo miakej katkaj hasta keman ‘kuali tanauatilmej moteixmatiltijkaya itech nochi taltikpak’ (Col. 1:23). Keman Juan yaya momikilitia, kijkuiloj seki amatajkuilolmej tein kipia Biblia. Kijkuiloj “se tanextililis itechkopa Jesucristo” (Apoc. 1:1). Uan no kijkuiloj Evangelio tein kipia itokay uan eyi cartas. Expatika carta kijkuilouilij se tokniuj takat akin monotsaya Gayo, uan kitasojtaya kemej ikonetsin (3 Juan 1). Tein kijkuiloj nejin tayekankej akin amo keman kikauak Jehová kinyolchikauani miakej imomachtijkauan Jesús hasta axkan. w24.11 12 § 15, 16

Se takat akin kitasojta isiuatsin kiita kemej teisa tein kualtsin uan semi patiyoj tein Jehová kitayokolij (Prov. 18:22; 31:10). Yejua ika kualtakat iuan, kiyekpia uan kitakachiua hasta keman mosentekaj. Amo kichikaujkauia maj kichiua tein amo kineki keman mosentekaj oso tein kichiuas maj amo kuali momachili uan maj kikuejmolo itanemilil. Uan takat amo no kichiuas nion teyi tein uelis kikuejmolos itanemilil keman mosentekaskej (Hech. 24:16). Tokniuan takamej, xikyekmatikan ke Jehová kiita uan kipatiuita nochi tein nankichiuaj para nankinextiliskej namosiuatsin ke nankitakachiuaj. Xikixtalikan amo nankichiuaskej nion teyi tein kiyolkokos namosiuatsin, xikualtakamej iuan, xiktakachiuakan uan xiknextilikan ke nankitasojtaj. Ijkon nankinextiskej ke nankipatiuitaj uan nankitasojtaj. Komo nankitakachiuaj namosiuatsin, kisentokas kuali namouikaskej iuan Jehová, uan yejua nejon tein okachi moneki (Sal. 25:14). w25.01 13 § 17, 18

Tiitekitikauan Jehová semi tikuelitaj titanojnotsaskej, amo kemej okseki taneltokalismej kampa kijtouaj ke kichiuaj kemej Cristo. ¿Toni techpaleuis maj tiksentokakan titanojnotsakan oso maj okachi tikuelitakan tikchiuaskej? Semi techpaleuis maj tikuelitakan okachi titanojnotsaskej komo tikitaj tein Jesús kichiuak. Keman yejua yetoya nikan taltikpak amo keman mosenkauak, ta okachi tanojnotsaya. Yejua kijtoj ke katka kemej takat akin kipiaya se higojkouit uan eyi xiuit kiyekpixtoya, sayoj ke amo keman takia. Jesús no ijkon kichiuak, eyi xiuit kisentokak kinnojnotsak judíos sayoj ke amo miakej mochiujkej imomachtijkauan. Maski ijkon yejua amo mosenkauak, ta kichiuak kemej nejon takat akin kisentokaya kichiaya maj taki higojkouit (Luc. 13:​6-9). Timomachtiskej tein Jesús kichiuak uan tein tamachtij, techpaleuis maj okachi tikuelitakan titanojnotsaskej. w25.03 14, 15 § 1-4

¿Uan komo tikajsikya aksa akin tikita ke uelis iuan timonamiktis? ¿Moneki niman tikiluis tein tikmachilia? Biblia tamachtia ke akin tamattok, achto kitemoua kimatis seki taman uan satepan kichiua. Yejua ika achto ke tikiluis tein tikmachilia, moneki tikitas keniuj mouika iniuan oksekin keman namonechikouaj oso keman namoixpetaniaj. Xa timotajtanis: “¿Keniuj uelis nikmatis keniuj tamati achto ke nikiluis tein nikmachilia?”. Itech kali kampa namosentiliaj oso keman namoixpetaniskej uelis tikitas toni kichiua, keniuj mouika iniuan oksekin oso keniuj mouika iuan Jehová. ¿Akonimej itasojikniuan? ¿Toni ika tajtoua? (Luc. 6:45). ¿Kiixtalijtok kichiuas tein tejua tikixtalijtok? Xa uelis titajtos iniuan tayekananij de inechikol oso iniuan okseki tokniuan akin kuali kiixmatij (Prov. 20:18). Xa uelis tikintajtanis keniuj kiitaj oksekin uan toni kualtsitsin taman kinextia (Rut 2:11). Sayoj ke keman tikitas tein kichiua uan keniuj tamati, amo xikchiua maj fiero momachili. Xikpoujkaita tein kimachilia uan amo xiktemo nochipa iuan tietos nion tikmatis nochi tein kichiuani. w24.05 22 § 7, 8

Tayekananij no kichiuaj kemej Jesús keman amo niman kinemiliaj ke akin tajtakolchiuak amo kineki moyolpatasok. Sekin xa niman moyolpataj keman yekinika mosentiliaj iniuan tayekananij akin kinixtaliaj maj kipaleuikan, sayoj ke oksekin amo niman kichiuaj. Yejua ika tayekananij amo moneki sayoj sepa iuan tajtoskej. Xa satepan ke yekinika iuan mosentiliskej, itech tanemilijtos tein tayekananij kiluijkej uan kitataujtis Jehová maj kitapojpolui (Sal. 38:18). Uan xa keman oksepa iuan mosentiliskej amo tanemilisok kemej achto. Para uelis kipaleuiskej akin tajtakolchiuak maj moyolpata, tayekananij moneki kinextiskej ke teajsikamatij uan ke yolkualmej. Moneki kitataujtiskej Jehová maj kitiochiua tein kichiujtokej uan maj ueli kipaleuikan tokniuj maj yektanemili uan maj moyolpata (2 Tim. 2:​25, 26). w24.08 22, 23 § 12, 13

Jehová amo kineki maj nion akin ixpoliui. Kineki maj nochin akin tajtakolchiuaj oksepa kuali iuan mouikakan (2 Cor. 5:20). Yejua ika desde ne uejkaujya, Jehová miakpa kiniluiani akin kikauanij maj moyolpatakan uan maj oksepa kuali iuan mouikakan. Uan tayekananij iuan tekitij Jehová para kinpaleuiskej maj moyolpatakan akin tel tajtakolchiuaj (Rom. 2:4; 1 Cor. 3:9). Ángeles semi yolpakij keman akin tajtakolchiuaj moyolpataj. ToTajtsin no semi yolpaki keman aksa oksepa mokepa itech nechikol. Maj nochipa itech titanemilikan keniuj Jehová kinextia ke teiknelia, tetasojta uan tetatiochiuia maski amo technamiki porin nejon techpaleuis maj okachi tiktasojtakan (Luc. 1:78). w24.08 31 § 16, 17

Komo Jesús mokauaskia maj kiixtalikan kemej tekiuaj, mokalakijtoskia itech política, sayoj ke amo ijkon kichiuak. Biblia kijtoua ke yejua “yajki […] itech tepet”. Maski kinekiaj kichikaujkauiskej, amo mokalakij itech política. Tein kichiuak Jesús semi techmachtia. Tejuan amo akin techtajtanis maj tikmiakiltikan pantsin oso maj titapajtikan ika se milagro. Amo no techtajtaniskej maj timochiuakan tekiuanij. Sayoj ke xa techchikaujkauiskej maj titapaleuikan itech política keman aksa kiixtaliaj kemej tekiuaj oso maj tikpaleuikan aksa akin yejuan kinemiliaj ke kuali techixyekanas. Sayoj ke Jesús techmachtij tein moneki tikchiuaskej. Yejua amo mokalakij itech política. Uan satepan kijtoj: “NoTaixyekanalis amo poui nikan taltikpak” (Juan 17:14; 18:36). Akin tikchiuaj kemej Cristo timochikauaj tikchiuaskej uan titanemiliskej kemej yejua. Tejuan tikpaleuiaj iTaixyekanalis Dios, tikteixmatiltiaj uan tiktataujtiaj Dios maj taixyekana (Mat. 6:10). w24.12 4 § 5, 6

Xikontemo keniuj uelis tikonchiuas tein tionmomachtia. Uelis tikonchiuas kemej Jehová keman amo tiontechikoitas. Uan no tiontetasojtas kemej Jesús kitasojta iTajtsin uan oksekin, komo tikonchiua tein Jehová kineki uan keman tikonpaleuia oksekin maski kemansa semi ouij yeski. Uan komo tiontanojnotsa uelis tikonpaleuis oksekin maj kimatikan tein Jehová toka kichiuani uan maj kineltokakan ke Jesús toka momikilij. Keman okachi tikajsikamatiskej uan tikpatiuitaskej tein Jesús toka kichiuak, okachi tikintasojtaskej Jehová uan iKonetsin. Uan yejuan no okachi techtasojtaskej (Sant. 4:8). Yejua ika maj tiksentokakan tikuikan tein Jehová techmaka para tiksentokaskej timomachtiskej tein Jesús toka kichiuak. w25.01 25 § 16, 17

Tajkuilol tein axkan timomachtiaj ueliskia motajtolkepas ijkon: “Amo tikitaok notajtakoluan”. Yejua ika keman timoyolpataj, Jehová kemej yeskia uejka kintamota totajtakoluan kampa amo oksepa kinitas. Nejin versículo no ueliskia motajtolkepas ijkon: “Tikchiua maj moita kemej yeskia amo keman nitajtakolchiuaskia”. Biblia techpaleuia maj tikajsikamatikan nejin porin ika tajtoua okse taman itech Miqueas 7:​18, 19. Ompa kijtoua ke Jehová kinpantamota totajtakoluan itech mar. Ne uejkauj keman teisa pankalakia itech mar amo keman oksepa kiajsiaj. Tikitakejya seki taman itech Biblia tein kinextia ke keman Jehová techtapojpoluia senkis kiuika totajtakoluan para maj amo timoyolkokojtokanok. David kijtoj: “Yolpakij akin kintapojpoluilianij tein amo kuali tein kichiujkej uan akin kinelkauilianij inintajtakoluan” (Rom. 4:7). Yejua nejon tein Jehová kichiua keman techtapojpoluia. w25.02 9 § 7, 8

Axkan miakej kisenueyichiuaj Jehová uan kinpaleuiaj oksekin. Yejuan pouij itech inechikol Dios kampa yolseujtokej, uan kiixtalianij amo keman kikauaskej Jehová. Yejuan no kinekij kinpaleuiskej oksekin maj no kuali mouikakan iuan Jehová uan iniuan oksekin. Maski axkan miakej tetauelitaj uan kichiuaj tein amo kuali, Jehová kichiuani maj ueli tiksenueyichiuakan (1 Juan 5:19; Apoc. 12:12). Yejua kimati ke nochi tein Satanás kichiua uelis techtajyouiltis. Sayoj ke kichiua maj itekitikauan kuali momachilikan para maj kisentokakan kitekitilikan. Itech iTajtol kijtoua ke kampa tiksenueyichiuaj Jehová kemej yeskia kampa se mopaleuia uan “kampa onkak xochit tein kualtsin kiatekiaj” (Is. 4:6; 58:11). Kemej Jehová kintiochiua akin ompa kisenueyichiuaj, yejuan ueli yolpakij uan amo mouij (Is. 54:14; 2 Tim. 3:1). w24.04 20 § 1, 2

Komo tikneki timonamiktis xa tikiluianiya Jehová tein tikneki. Yejuatsin amo akin iuan motenkauani kitemolis akoni iuan monamiktis, sayoj ke kitekipachoua tein tikmachilia uan tein tikneki uan uelis mitspaleuis xikajsi aksa. Yejua ika nochipa xikilui tein tikmachilia (Sal. 62:8). Xiktajtani maj mitspaleui amo xiyolijsiui uan xitamatkej (Sant. 1:5). Uan, ¿toni panos komo ayamo tikajsi aksa? Jehová motenkaua mitsmakas tein mitspolos uan mitspaleuis xiyolpaki (Sal. 55:22). Sayoj ke, amo xiknemili ke tiktemojtos akoni iuan timonamiktis yejua tein okachi moneki (Filip. 1:10). Maski timonamiktijkejya oso amo, tinochin uelis tiyolpakiskej komo kuali timouikaj iuan Jehová (Mat. 5:3). Uan no, komo ayamo timonamiktia uelis okachi tiktekitilis Jehová (1 Cor. 7:​32, 33). Yejua ika komo ayamo timonamiktia, xikchiua nochi tein tiuelis para tiktekitilis Jehová. w24.05 21 § 4; 22 § 6

¿Kanachi tiempo moneki nanuejkauaskej kemej novios? Keman ijsiujka tikixtaliaj teisa, amo kuali kisa (Prov. 21:5). Yejua ika moneki maj pano tiempo tein monekis para kuali tikixmatis. Sayoj ke amo no xiteluejkaua, porin Biblia kijtoua ke ‘tein tikchiaj uan amo niman mochiua tetayokoltia’ (Prov. 13:12). ¿Keniuj uelis tikinpaleuiskej akin novios? Xa uelis tikinyoleuaskej maj touan paxalotij, maj touan takuakan oso maj touan taueyichiuakan (Rom. 12:13). Komo moneki, uelis tikiniluiskej ke uelis tikinuikaskej kampa yejuan yaskej oso uelis tikinyoleuaskej tochan para maj monojnotsakan uan ijkon amo yetoskej ininselti (Gál. 6:10). Uan komo sekin techtajtaniaj maj iniuan tietokan, maj tikelnamikikan ke ijkon uelis tikinpaleuiskej. No moneki tikitaskej keman kinekiskej yejuan monojnotsaskej, sayoj ke amo no moneki tikinkauaskej inintelselti. w24.05 30 § 13, 14

Tayekananij kitemouaj kimatiskej keyej tokniuj tajtakolchiuak. Xa motajtaniaj, ¿toni kichiuak maj amo semi kuali mouikaok iuan Jehová? ¿Xa amo momachtiayaok Biblia oso amo tanojnotsayaok? ¿Amo semi kitataujtiayaok Jehová? ¿Peuak okachi kinejneki kichiuas tein amo kuali? ¿Itasojikniuan uan tein ika moixpetaniaya kichiuak maj amo kuali tanemiliok uan maj kinejneki kichiuas tein amo kuali? ¿Kiajsikamati ke tein kichiuak semi kiyolkokoj iTajtsin Jehová? Tayekananij kitajtaniskej seki taman akin tajtakolchiuak, sayoj ke amo moneki kitajtaniskej okseki taman komo tayekananij kimatijya toni panok. Komo yejuan kuali kinojnotsaj kinekis kiniluis nochi uan kiajsikamatis keyej tajtakolchiuak (Prov. 20:5). Tayekananij no uelis kitapouiskej se taman akin tajtakolchiuak para maj kiita ke amo kuali yetok tein kichiuak. Xa keman yekinika iuan mosentiliskej, semi kiyolkokos tein kichiuak oso hasta moyolpatas. w24.08 22 § 9-11

Jesús semi kiuelitaya kiteixmatiltis “kuali tanauatilmej tein ika tajtoua iTaixyekanalis Dios” porin kimatia ke Jehová kinekia maj ijkon kichiua. Yejua kiitaya ke semi monekia maj tanojnotsa. Uan ijkon kisentokak kichiuak hasta chikuasen metsti achto ke yaskia iluikak, yejua “panotiaya itech uejueyi xolalmej uan xolaltsitsin uan tamachtijtiaya” (Luc. 13:22). Uan no kinmachtij okseki imomachtijkauan para maj no tanojnotsakan (Luc. 10:1). Axkan semi moneki maj titanojnotsakan, uan Jehová uan Jesús kinekij maj ijkon tikchiuakan (Mat. 24:14; 28:​19, 20). Komo ininka timotekipachouaj akin tikinnojnotsaj ijkon kemej Jehová kichiua techpaleuis maj okachi tikuelitakan titanojnotsaskej. Yejua kineki maj tel miakej kikakikan kuali tanauatilmej uan maj kiixmatikan (1 Tim. 2:​3, 4). Kemej kuali tanauatilmej uelis kinpaleuis miakej maj momakixtikan, Jehová kineki maj kuali titamachtikan. Uan hasta komo amo techkakij axkan, xa uelisok techkakiskej keman mochiujtos tetsaujkatajyouilis. w25.03 15, 16 § 5-7

Sayoj ke no sejse tokniuj moneki kiixtalis toni kichiuas, uan tein momachtiani itech Biblia semi kipaleuis. Sekin xa kitajpaloskej oso kiluiskej ke yolpakij porin yajki nechikol. Sayoj ke amo uejkauak tiknojnotstoskiaj nion tikchiuaskiaj seki taman iuan. Biblia ininka tajtoua sekin akin tajtakolchiuaj, akin amo moneki tikintajpaloskej porin komo tikchiuaskiaj kemej yeskia ‘no tikchiujtoskiaj tein amo kuali tein yejuan kichiuaj’ (2 Juan 9-11). Tein ika tajtoua nejin versículos kinextia ke ininka tajtojtok akin mochiujkej apóstatas, oso akin kitemouaj maj kichiuakan tein Biblia kijtoua ke tajtakol (Apoc. 2:20). Yejua ika, komo aksa nochipa kimoyaujtok tein tamachtiaj apóstatas oso okseki taman tein amo kuali, tayekananij amo kinemiliskiaj kikalpanoskej. Maski ijkon, xa uelisok mopatas. Sayoj ke komo amo kichiua, amo tiktajpaloskiaj nion tikyoleuaskiaj maj youi se nechikol. w24.08 30, 31 § 14, 15

Satepan ke kintamakak miakej, Jesús kinnauatij itatitaniluan maj mokepakan Capernaúm itech barco uan yajki itech tepet para maj amo kiixtalikan kemej tekiuaj (Juan 6:​16-20). Uan keman yayaj itech barco, ueyiat peuak moajkotatamota porin tel taejekaya. Yejua ika, Jesús peuak nejnemi aixko uan kiluij tatitanil Pedro maj no ijkon kichiuani (Mat. 14:​22-31). Keman Jesús tejkok itech barco, ejekat motamatilij. Kimojkaitakej uan kiluijkej: “Tejua yekmelauj tiiKoneuj Dios” (Mat. 14:33). Tatitanilmej kijtojkej nejin satepan ke Jesús nejnemik aixko uan amo satepan ke kimiakiltij pantsin. Marcos kijtoj nejin: “Ayamo kiajsikamatiaj toni kijtosnekia keman kimiakiltij pantsin” (Mar. 6:​50-52). Yejuan amo kimatiaj nochi chikaualis tein Jehová kimakaka Jesús para kichiuas milagros. w24.12 5 § 7

No uelis tikchiuaskej okse taman para tiknextiliskej Jehová ke tiktasojkamatiliaj maj techtasojta. Achto uan satepan ke tikelnamikiskej imikilis Cristo uelis tiknextiliskej ke tiktasojkamatiliaj maj kitemakani iKonetsin. Amo sayoj maj tikixtalikan tejuan ompa tietoskej, ta no maj tikinyoleuakan oksekin. Keman tikinyoleuaskej, maj tikinmelauilikan toni tikchiuaj itech nejon nechikol. Uelis tikuiskej videos ¿Keyej momikilij Jesús? uan Ijkuak tikelnamikij imikilis Jesús, tein moajsij itech jw.org. Tayekananij kinyoleuaskej akin amo touan monechikouajok nion tanojnotsajok. Xikonnemili keniuj ne iluikak uan nikan taltikpak semi yolpakiskej keman kiitaskej ke semej iichkauan Jehová akin mopolojka kineki oksepa mokepas (Luc. 15:​4-7). Keman tikelnamikiskej imikilis Cristo, maj amo tikixtalikan sayoj tikintajpaloskej akin ipa monechikouaj, ta no akin yekinika yaskej uan akin amo monechikojtoyajok. Tiknekij titapaleuiskej maj nochin kuali momachilikan (Rom. 12:13). w25.01 29 § 15

Kemej Jehová taxtauak para techmakixtis, kinextia ke nochipa kichiua tein kuali yetok sayoj ke okachi kinextia ke semi techtasojta (Juan 3:16; 1 Juan 4:​9, 10). Jehová kiualtitanik iKonetsin maj toka momikiliki porin kineki maj tinemikan nochipaya uan maj tipouikan iniuan ichankauan. Keman Adán tajtakoj amo pouikok iniuan ichankauan Jehová, yejua ika keman tiyolij amo no tipouij iniuan ichankauan. Sayoj ke, kemej Jesús toka momikilij Jehová ueli techtapojpoluilia totajtakoluan uan miakej akin iuan takuaujtamatij uan kitakamatij uelis pouiskej iniuan ichankauan. Uan tejuan no ueli timouikaj iuan Jehová uan iniuan tokniuan. ¡Jehová semi techtasojta! (Rom. 5:​10, 11). w25.01 21 § 6

Jehová kemej yeskia techtayokolij teisa tein semi kipia ipatiuj porin kiualtitanik iKonetsin maj toka momikiliki (2 Cor. 9:15). Kemej Jesús toka momikilij, ueli timouikaj iuan Jehová uan satepan uelis tinemiskej nochipaya. Yejua ika semi tiktasojkamatiliaj Dios porin kinextij ke semi techtasojta keman kitemakak iKonetsin (Rom. 5:8). Para nochipa tiktasojkamatiskej uan amo keman tikelkauaskej tein kichiujkej, Jesús tanauatij maj tikelnamikikan imikilis xijxiujtika (Luc. 22:​19, 20). Nejin xiuit tikelnamikiskej imikilis Cristo itech tonal jueves 2 de abril xiuit 2026. Amo tiknekij timopolouiliskej nejon tonal. Achto uan satepan ke tikelnamikiskej imikilis Cristo, maj tikxelokan tiempo para itech titanemiliskej tein Jehová uan iKonetsin toka kichiujkej. w25.01 20 § 1, 2

Uelis tikonsentokas tionmomachtis keniuj Jehová uan Jesús techtasojtaj komo itech tiontanemilia tein moka kichiuanij. Nejin xiuit xa uelis tikonleros seki Evangelios itech tonalmej keman tikelnamikiskej imikilis Cristo. Amo moneki sepasan tikonleros miak capítulos, ta yolik uelis tikonitstias keyej moneki tikintasojtaskej Jehová uan Jesús. Komo ne uejkaujya tionmoauij xa tionmotajtaniani ox uelisok tikonajsis okseki tamachtilismej tein kijtoua ke Dios nochipa kichiua tein kuali yetok, ke tetasojta uan ke kitemaktij iKonetsin. Sayoj ke ipa onkakok miak taman tein uelis timomachtiskej. Xikonlero uan xionmomachti toamaixuan. w25.01 24, 25 § 13-15