Abril

Yejua ika para maj techpaleui inakayo uan iesyo Jesús, moneki titakuaujtamatiskej itech inemilis tein kitemakak (Efes. 1:7). Akin Jesús kinnotsak kemej “okseki ichkamej” amo moneki kikuaskej pantsin nion tayiskej vino keman kielnamikiskej imikilis (Juan 10:16). Maski ijkon, kemaj kinpaleuia inakayo uan iesyo Jesús tein kitemakak komo itech takuaujtamatij tein kichiuak (Juan 6:53). Sayoj ke akin ueli kikuaj pantsin uan tayij vino kinextiaj ke pouij itech yankuik taman tein Dios motenkauak uan kichiaj tekiuajtiskej itech iTaixyekanalis Dios. Yejua ika komo tipouij iniuan taijitalmej oso iniuan okseki ichkamej, moneki titakuaujtamatiskej para uelis tinemiskej nochipaya. w24.12 13 § 14, 16

Itech iTakualis toTekotsin, Jesús kinmakak itatitaniluan pantsin tein amo kipia levadura uan kiniluij ke kiixnextiaya inakayo. Satepan kinpanoltilij vino uan kiniluij ke nejon kiixnextiaya ‘esti tein ika moixtalijka tein Dios motenkaujka iniuan’ (Mar. 14:​22-25; Luc. 22:20; 1 Cor. 11:24). Dios amo motenkauak iniuan nochin, ta sayoj “iniuan israelitas” akin yaskej iluikak uan tekiuajtiskej iuan Cristo “itech iTaixyekanalis Dios” (Heb. 8:​6, 10; 9:15). Tein Jesús kijtoj itech iTakualis ininka tajtojtoya ichkamej ‘tein amo miakej’. Uan akin achto peuak pouij iniuan nejon ichkamej yejuan tatitanilmej akin amo kikauayaj akin ompa iuan yetoyaj. Yejuan tekiuajtiskej iuan Jesús ompa iluikak. w24.12 11 § 9, 10

Semej itasojikniuan Jesús kitemaktij, satepan akin kiixnamikiaj kikitskijkej, kipijpinaujtijkej uan kipantijkej tein amo melauj, kitajyouiltijkej uan kiixtalijkej kimiktiskej. Uan satepan seki soldados kimasojsokej para kikoujpampiloskej. Maski semi kitajyouiltijkej, Jesús kixikoj nochi tein kichiuilijkej, sayoj ke Jehová okachi tajyouij keman kiitak tein kipanotoya iKonetsin. Yejuatsin semi kitasojtaya iKonetsin uan ueliskia kichiuas maj amo tajyouianiok, sayoj ke amo kichiuak. ¿Keyej? Porin techtasojta. Inemilis Jesús tein kitemakak kinextia ke Jehová semi techtasojta. Jehová taxikoj keman kitemakak iKonetsin akin semi kitasojtaya para mitsonmakixtis den tajtakol uan mikilis (1 Juan 4:​9, 10). Yejuatsin kineki techpaleuis tisejsemej para maj tiktekitilikan maski titajtakolejkej uan satepan senkis kichiuas maj amo tikpiakanok tajtakol. w24.08 6 § 13, 14

Ueli tikajsikamatij ke Jehová techteltasojta keman tiknemiliaj keniuj semi kiyolkokoj keman kiitak ke iKonetsin tajyouij. Satanás kijtoua ke nion se itekitikauj Dios uelis kitakamatis keman tajyouijtos. Yejua ika, Jehová kikauak maj Jesús tajyouiani uan maj momikiliani, ijkon kinextij ke Satanás se xolopij (Job 2:​1-5). Keman miakej kikejkelojkej Jesús uan keman soldados kiuijuitekkej uan kikoujpampilojkej, Jehová kiitstoya nochi desde iluikak. No kiitak keman kimiktijkej iKonetsin (Mat. 27:​28-31, 39). Jehová ueliskia kintsakuilis komo kinekiskia (Mat. 27:​42, 43). Sayoj ke komo ijkon kichiuaskia, Jesús amo ueliskia toka momikilis uan tejuan amo ueliskia tikseliskej nion teyi. Yejua ika, Jehová kikauak iKonetsin maj tajyouiani uan momikiliani. w25.01 22 § 7

Itech 16 metsti nisán xiuit 33 imomachtijkauan Jesús semi moyolkokojtokej uan motelmoujtiaj, ome de yejuan kisaj de Jerusalén uan youij Emaús. Imomachtijkauan kichiayaj maj Mesías kichiuani miak taman para kinpaleuis judíos, sayoj ke kimiktijkej. Se takat akin amo kiixmatij motokia uan peua iniuan nejnemi. Yejuan kitapouiaj ke semi tayokoxtokej porin Jesús kipanok miak taman tein amo kuali. Satepan nejon takat peua kiniluia seki taman tein amo keman kielkauaskiaj, porin ‘peua ika tajtoua tein kijkuiloj Moisés uan nochin Tanauatianij’, kinmelauilia keyej Mesías monekik tajyouis uan keyej kimiktijkej. Keman ajsij Emaús yejuan momakaj cuenta ke nejon takat katka Jesús akin Dios kichiujka maj oksepa nemi (Luc. 24:​13-35). Jesús miakpa monextij ininixpan imomachtijkauan itech 40 tonalmej achto ke yaskia iluikak. Yejua kinyolchikauak imomachtijkauan porin tayokoxtoyaj uan moujtoyaj, yejua ika semi yolpakkej uan moyolchikaujkej para tanojnotsaskej uan kiteixmatiltiskej iTaixyekanalis Dios. w24.10 12 § 1-3

Se konetsin iselti moskaltijtiuj ijkon kemej panouaj xiujmej, sayoj ke tejuan moneki tikchiuaskej seki taman para kuali timouikaskej iuan Jehová. Ijkon kemej kinpanok tokniuan de Corinto. Yejuan kuali kiselijkaj kuali tanauatilmej, moauijkej, kiselijkej ichikaualis Dios uan tein Pablo kichiuak kinmachtij miak taman (Hech. 18:​8-11). Maski ijkon, seki xiujmej satepan ke moauijkej miakej kisentokayaj amo kuali taixejekouayaj (1 Cor. 3:2). Para uelis kuali titaixejekoskej, monekis tiknejnekiskej tikchiuaskej. Akin amo tamatinij mosenkauaj uan amo mochikauaj mouikaskej okachi iuan Jehová (Prov. 1:22). Amo tiknekij tikchiuaskej kemej akin kisenkauaj inintekiuj uan kichiaj maj inintatuan kiniluikan toni kichiuaskej, ta tiknekij timochikauaskej okachi kuali timouikaskej iuan Jehová. Komo tejuatsin tikonita ke ayamo kuali tiontaixejekoua, xikontajtani Jehová maj mitsonpaleui ‘xikonnejneki tikonchiuas nochi tein kiuelita’ (Filip. 2:13). w24.04 4 § 9, 10

Jehová kijtoua keniuj momachilia keman kiixtalia ke kitatsakuiltiti aksa. (Ezeq. 33:11). Jehová amo keman kiixpolos aksa para maj amo keman nemiok, sayoj kichiuas komo kiita ke yekmelauj moneki. Yejua semi teiknelia uan nochipa ijkon kichiua. ¿Akonimej kemaj tikmatij ke amo nemiskej? Biblia sayoj ininka tajtoua sekin. Kemej Judas Iscariote akin Jesús kijtoj ke amo oksepa nemiskia (Mar. 14:21; no xikonita Juan 17:12 uan nota de estudio). Judas kuali kimatia ke tein kichiuak ika kiixnamikik Jehová uan iKonetsin (xikonita Marcos 3:29 uan notas de estudio). Jesús no kijtoj ke sekin akin taixyekanayaj itech taneltokalis akin kiixnamikiaj, amo oksepa nemiskiaj (Mat. 23:33; no xikonita Juan 19:11 uan nota de estudio kampa kijtoua “del hombre”). Uan tatitanil Pablo kijtoj ke akin kikauaj tamachtilis tein melauak uan kiixnamikij, amo oksepa nemiskej komo amo moyolpataj (Heb. 6:​4-8; 10:29). w24.05 4 § 10, 11

Keman tietokej iuan Jehová, Satanás amo ueli techchiuilia nion teyi tein uejkauas nochipaya uan tein amo uelis tikxikoskej (1 Juan 3:8). Uan itech xochital Jehová kisentokas kinyekpias itasojikniuan para maj kisentokakan kuali iuan mouikakan. Uan no kinpaleuis maj amo momikilikanok (Apoc. 21:4). ¡Semi tiktasojkamatiliaj Jehová porin techkaua maj tietokan ichan, ijkon uelis kuali iuan timouikaskej nochipaya! (Ezeq. 37:27). Sayoj ke, ¿toni moneki tikchiuaskej para maj ueli tiksentokakan tietokan ichan? Komo aksa techyoleua ichan tikuelitaskiaj maj techilui toni kineki maj tikchiuakan. No ijkon, akin tietokej ichan Jehová tiknekij tikmatiskej toni moneki tikchiuaskej para maj tiksentokakan ompa. Kemej semi tiktasojtaj, timochikauaj tikchiuaskej tein kiyolpaktia (Col. 1:10). Komo tikmojkatokaj Jehová techpaleuis maj amo tikchiuakan tein amo kiyolpaktia uan maj tinemikan kemej yejua kineki (Miq. 6:8). w24.06 4 § 8, 9

Jehová kitajtanij Abrahán maj kitemaktiani ikonetsin Isaac. Nejin xa semi kitekipachoj Abrahán uan kitayokoltij. Maski ijkon, ipa kinekik kitakamatis. Uan keman yaya kimiktitia, Jehová kitsakuilij para maj amo kichiua. Nejin kinextia tein Jehová kichiuaskia satepan: yejuatsin kitemaktiskia itasojkonetsin porin semi techtasojta tinochin (Gén. 22:​1-18). Miak xiujmej satepan, keman Jehová kinmakak tanauatil israelitas, kiniluij maj kintemaktianij tapialmej para kintapojpoluiskia inintajtakoluan (Lev. 4:​27-29; 17:11). Tein kitemakayaj kiixnextiaya ke tein Jehová yaya kitemakati okachi kuali katka porin senkis techmakixtiskia den tajtakol. Dios kiniluij tanauatianij maj kinmelauilianij oksekin ke se ikoneuj Dios akin moijtojka ke ualaskia kitajyouiltiskiaj uan kimiktiskiaj para maj techmakixti tinochin den tajtakol uan mikilis, uan ijkon kichiuak para maj tejuatsin no ueli xionmomakixti (Is. 53:​1-12). w24.08 4 § 7, 8

Keman tikonixtajtoltis Biblia, nochipa moneki tikonnemilis keniuj uelis tikonchiuas tein tionmomachtia. Keman tikonixtajtoltis seki versículos, xionmotajtani: “¿Keniuj uelis nikchiuas tein nimomachtia axkan uan satepan?”. Maj tiknemilikan ke tikonixtajtoltij 1 Tesalonicenses 5:​17, 18. Satepan xikonnemili keniuj tionmotataujtia. ¿Miakpa tikontataujtia Jehová uan tikoniluia nochi tein tikonmachilia? ¿Toni tikonneki tikontasojkamatilis? Xa uelis tikontasojkamatilis eyi taman. Komo tikonchiua nejin maski amo uejkauak, amo sayoj tikonkaktos tein kijtoua iTajtol Dios, ta no peuas tikonchiuas. Uan komo mojmostaj ijkon tikonchiua keman tikonixtajtoltia Biblia, satepan okachi kuali tikontekitilis Jehová. w24.09 4, 5 § 9, 10

Okachi tiyolpakij keman tikinpaleuiaj oksekin porin Jehová ijkon techchijchiuak. Kuali timomachiliaj keman tikinpaleuiaj tokniuan, uan tikuelitaj maj techtasojkamatilikan. Sayoj ke maski techtasojkamatiliskej oso amo, uelis tiyolpakiskej porin tikchiujkej tein kuali. Uan maski amo uelis tikchiuaskej miak taman maj nochipa tikelnamikikan tein kijtoua 2 Crónicas 25:9: “Jehová uelis mitsmakas okachi”. ¡Jehová yejua akin okachi techpaleuia! Uan semi tiyolpakij porin yejua techtatiochiuia. Yejua ika, maj tiksentokakan tikinpaleuikan oksekin ijkon kemej kichiua toTajtsin. w24.09 31 § 20, 21

Jehová kinextia miak taman tein kualtsin uan yejua ika tiktasojtaj. Kinextia ke teiknelia uan yolkuali (Sal. 103:13; Is. 49:15). Kimati keniuj timomachiliaj keman titajyouiaj uan no kiyolkokoua (Zac. 2:8). Techpaleuia maj ueli tikixmatikan uan maj kuali timouikakan iuan (Sal. 25:14; Hech. 17:27). Uan no, yolyemanik uan “moixpiloua para kipanitas iluikak uan taltikpak uan ijkon kiajokuis den talnex akin yolyemanik” (Sal. 113:​6, 7). Nochi nejin tein kinextia Jehová, kichiua maj tiknekikan tikueyitaliskej. Tikueyitaliaj Jehová porin tiknekij maj kiixmatikan. Miakej amo kuali kiixmatij Jehová. ¿Keyej? Porin Satanás semi kitakajkayauiliani uan miakej kineltokanij nejon (2 Cor. 4:4). Kichiuani maj kineltokakan ke Jehová nochipa kualantok, ke amo toka motekipachoua uan ke yejua itajtakol maj mochiua miak taman tein amo kuali. Sayoj ke tejuan tikmatij ke nejon amo melauj. Uan uelis tikinpaleuiskej oksekin maj kuali kiixmatikan Dios para maj no kiueyitalikan (Is. 43:10). w25.01 3 § 6, 7

Maski Jesús, iKonetsin Dios, amo katka tajtakolej uan kichiuaya miak milagros, Satanás kichiuak maj sekin kitakajkayauilikan. Akin taixyekanayaj itech taneltokalis kijtouayaj ke Jesús kinkalankixtiaya amokuali ejekamej porin “akin kinixyekanaya amokuali ejekamej” kipaleuiaya (Mar. 3:22). Satepan uejueyi tiopixkamej uan taixyekananij judíos kijtojkej ke yejua kiuijuikaltijka itokay Dios uan kichiujkej maj nochin tajtanikan maj kimiktikan Jesús (Mat. 27:20). Satepan ke imomachtijkauan Cristo peujkej tanojnotsaj, akin kintauelitayaj “kichiujkej maj kualanikan” uan “maj kinixnamikikan” (Hech. 14:​2, 19). Amaix La Atalaya 1 de diciembre xiuit 1998 ika tajtoj Hechos 14:2 uan kijtoj ke judíos akin kintauelitayaj amo sayoj kiixtopeujkej tein ika kinnojnotsayaj, ta peujkej kinijtouiliaj tein amo melauak para maj amo akin kinkakini uan maj kintauelitanij imomachtijkauan Cristo. Satanás kisentoka kinkajkayaua “nochin akin nemij nikan taltikpak”. w24.04 11 § 15, 16

Keman kiixtaliaj ox aksa nemis nochipaya, amo kiitaj kemanian momikilia. Jehová yejua toJuez akin amo keman mopoloua uan tein kiixtalia nochipa kuali yetok (Sal. 33:​4, 5). Tikyekmatij ke ‘Juez akin okachi ueyichiujkej’ nochipa kichiuas tein kuali yetok. Amo no moitas kani nemi aksa para kiixtaliskej ox uelis nemis nochipaya oso amo. Jehová amo keman kinitaskia kemej yeskiaj “chivos” akin nemij kampa amo ueli kinixmatiltiaj kuali tanauatilmej (Mat. 25:46). Tejuan tikinpatiuitaj, uan Juez akin okachi ueyichiujkej okachi kinpatiuita. Amo tikmatij keniuj Jehová kiixtalis tein kinnamiki kiseliskej sejsemej keman mochiujtos tetsaujkatajyouilis. Xa sekin kiixmatiskej uan takuaujtamatiskej iuan Jehová keman kichipauas itokay ininixpan nochi altepemej (Ezeq. 38:16). w24.05 12 § 14, 15

Tiitekitikauan Jehová tikuelitaj timosenpaleuiskej (2 Cor. 8:4). Sayoj ke kemansa moneki maj tiyolchikaujkej para tikchiuaskej nejon. Keman itech se altepet peua moteuiaj, tayekananij kimatij ke moneki kinyolchikauaskej tokniuan, kinpaleuiskej ika teisa oso xa monekis kinuikiliskej amaixmej oso okseki taman tein kinpolos. Kemej kintasojtaj tokniuan motemakaj kinmakaskej tein kinpoloua, maski uelis kinpanos tein amo kuali. Keman ijkon panos semi moneki maj titatakamatikan para amo tixexeliujtoskej. Yejua ika moneki tikchiuaskej tein technauatiaj tokniuan akin taixyekanaj itech sucursal (Heb. 13:17). Tayekananij moneki miakpa momachtiskej tein technauatiaj maj tikchiuakan achto uan keman mochiua se tetsauit (1 Cor. 14:​33, 40). Maj tiyolchikaujkej, sayoj ke no maj kuali titanemilikan (Prov. 22:3). Kuali xiontanemili achto ke tikonchiuas teisa. Ijkon amo mitsonpanos tein amo kuali. Maj titakuaujtamatikan iuan Jehová. Yejua ininka motekipachoua nochin uan kineki maj kuali tietokan. Uan uelis techpaleuis maj tikinmakakan tokniuan tein kinpoloua. w24.07 4 § 8; 5 § 11

David kiixmatia Jehová uan iuan takuaujtamatia. Kitataujtij Jehová maj kipaleui keman tekiuaj Saúl uan oksekin kinekiaj kimiktiskej. Keman David kiitak ke Jehová kinankilij uan kipaleuij, kijtoj: “¡Jehová yoltok!” (Sal. 18:46). ¿Toni kijtosnekik David? Yejua kijtosnekia ke Jehová yejua Dios akin nochipa yoltok uan nochipa kinpaleuia itekitikauan. David kimatia ke Jehová kiitaya tein kipanouaya uan ke nochipa kipaleuiskia, nejon kiyolchikauak maj kisentoka kitekitili uan maj kiueyichiua (Sal. 18:​28, 29, 49). Komo tikneltokaj ke Jehová yoltok uelis tiyolpakiskej keman tiktekitiliskej. Nejon no techyolchikauas maj tikxikokan tein yeski ouijkayot uan maj tiksentokakan tiktekitilikan. Uan no, techpaleuis maj amo keman tikauakan. w24.06 20, 21 § 3, 4

¿Toni techmachtia tein Pablo kinijkuilouilij akin nemiaj Tesalónica? Komo techtapouiaj teisa tein se kimojkaita oso tikakij teisa tein amo tamachtia Biblia, maj niman tiknextikan ke titamatinij. Ne uejkauj, keman taixyekanaya Unión Soviética, akin techixnamikiaj kimoyaujkej se amat tein kijtouayaj ke kijkuilojkaj itech ueyi kali kampa techixyekanaj. Ompa kijtouaya maj tokniuan kichiuanij okse nechikol kampa ininselti moixyekanaskiaj. Maski moitaya ke tein kijtouayaj katka melauak, tokniuan akin amo kikaujkej Jehová amo kineltokakej. Kiitakej ke tein ompa kijtouaya amo katka tein yejuan momachtijkaj. Axkan, akin kiixnamikij tein Biblia tamachtia kikuij tein moita itech internet uan itech redes sociales para techkajkayauaskej uan techxexeloskej. Uelis timopaleuiskej para maj amo niman ‘techtapololtikan’ komo tikyekitaj ox tein tikakij uan tein tikixtajtoltiaj yejua tein timomachtijkejya itech Biblia (2 Tes. 2:2; 1 Juan 4:1). w24.07 12 § 14, 15

Uan keman aksa kiixtalis motemaktis iuan Jehová uan kiueyichiuas iniuan tokniuan, moneki kuali kinemilis achto ke kichiuas. Uan Jehová kineki maj tinochin tikixtalikan tikchiuaskej. ¿Keyej? Kineki maj kuali iuan timouikakan uan maj tinemikan nochipaya (Deut. 30:​19, 20; Gál. 6:​7, 8). Jehová amo akin kichikaujkauia maj kitekitili, ta techkaua maj tisejsemej tikixpejpenakan ox tikchiuaskej oso amo. Sayoj ke, ¿toni moneki kichiuaskej tokniuan tayekananij komo se tokniuj akin moauijya tel tajtakolchiua? Komo amo moyolpata, moneki kikalankixtiskej de nechikol (1 Cor. 5:13). Sayoj ke maski kikalankixtiskej, Jehová kineki maj moyolpata uan maj oksepa kuali iuan mouika. Uan no yejua ika kitemakak iKonetsin porin ijkon ueliskia kintapojpoluis akin moyolpataj. Jehová semi tetasojta, yejua ika kinpaleuia akin tajtakolchiuaj maj moyolpatakan (Zac. 1:3; Rom. 2:4; Sant. 4:8). w24.08 14 § 1, 2

Itech expatika carta, Juan kijkuiloj ke semi kiyolpaktiaya kiitas ke tokniuan kitakamattoyaj Dios. Ijkuak, sekin tamachtiayaj tein amo melauj uan kichiuayaj maj tokniuan itech nechikol amo kuali mouikakan. Sayoj ke sekin, kisentokayaj nemiaj itech “ojti tein melauak”. Kitakamatiaj Jehová uan kisentokayaj kichiuayaj tein kijtoua “itanauatiluan” (2 Juan 4, 6). Nejon tokniuan semi kiyolpaktiayaj Juan uan no Jehová (Prov. 27:11). ¿Toni techmachtia? Komo amo tikauaj Jehová nochipa tiyolpakiskej uan oksekin no yolpakiskej (1 Juan 5:3). Tel kualtsin timomachiliaj keman tikmatij ke tikyolpaktiaj Jehová. Yejuatsin semi yolpaki keman amo tikchiuaj tein amo kuali uan tiktakamatij tein technauatia. Ángeles no semi yolpakij (Luc. 15:10). Uan keman tikmatij ke tokniuan amo kikauaj Jehová, no semi tiyolpakij (2 Tes. 1:4). Uan keman ixpoliuis nochi tein kiixyekana Satanás, no semi tiyolpakiskej porin amo keman tikaujkej Jehová. w24.11 12 § 17, 18

Yejua ika, ¿kemanian uelis tikiluis tein tikmachilia? Komo niman tikiluia, uelis kinemilis ke amo achto kuali tiknemilia tein tikchiua (Prov. 29:20). Sayoj ke komo kimati ke mitsyolnotsa uan amo niman tikiluia, uelis kinemilis ke semi tiknenemilia para tikixtalis teisa (Ecl. 11:4). Achto ke tikiluis aksa tein tikmachilia, xikelnamiki ke keman nanyeskij novios xa uelisok namokauaskej uan amo namonamiktiskej. Sayoj ke achto ke peuas timoixmatis iuan aksa, moneki kuali tikitas ox yekmelauj uelisya timonamiktis uan ke xa yejua akin uelis iuan timonamiktis. ¿Uan komo tikita ke aksa kineki okachi mitsixmatis? ¿Toni uelis tikchiuas? Komo tejua amo tikneki, moneki tiknextis ika tein tikchiua. Amo kuali yeskia komo tikaua maj kisentoka kinemilijto ke yejua no mitsyolnotsa komo amo melauj (Efes. 4:25). w24.05 22, 23 § 9, 10

Yejua kinmelauilijtoya ke sayoj akin yekmelauj taijital uan amo keman kikaua Jehová ‘kiuikaskej’, nejin kijtosneki ke Jesús kiselis itech iTaixyekanalis Dios ompa iluikak. Komo se taijital amo kichiua tein kipaleuis maj kisentoka kuali mouika iuan Jehová, amo kisentiliskej iniuan “taijitalmej” (Mat. 24:31). Uan nochin akin kichiaj nemiskej nikan taltikpak no moneki kikakiskej tein Jesús tanejmachtij, moneki kitakamatiskej Jehová uan tachixtoskej. Kemej kuali tikixmatij Jehová, titakuaujtamatij ke kuali yetok tein kiixtalia kichiuas. Yejua ika, amo techtekipachoua maj Jehová kinijita seki tokniuan itech nejin xiujmej. Tikelnamikij tein Jesús kijtoj keman ika tajtoj takat akin kintakeuato akin kitekiskiaj uvas italpan keman tiotakia katka (Mat. 20:​1-16). Akin peuak tekitij tiotak kintaxtauijkej kemej akin peuak tekitij desde kualkan. No ijkon, nochin taijitalmej akin amo keman kikauaskej Jehová yaskej iluikak maski yekin oso ne kemanya kinijitakej. w24.09 24 § 15-17

Jesús techmachtij keniuj uelis tikchiuaskej kemej yejua. Miakej kichiuilijkej tein amo kuali. Sekin ichankauan amo kineltokayaj ke yejua katka Mesías uan kijtouayaj ke kuatapolojka. Akin taixyekanayaj itech taneltokalis kijtouilijkej ke iniuan tekitia amo kuali ejekamej. Uan soldados romanos ika mokejkelojkej, kimagakej uan kimiktijkej (Mar. 3:​21, 22; 14:55; 15:​16-20, 35-37). Maski ijkon, taxikoj uan amo momakepak. ¿Toni techmachtia tein kichiuak? (1 Ped. 2:​22, 23). Jesús tel kuali technextilij toni moneki tikchiuaskej keman oksekin techchiuiliskej tein amo kuali. Yejua kimatia kemanian tajtos uan kemanian amo (Mat. 26:​62-64). Keman kitakajkayauiliayaj, kemansa kiixtaliaya amo teyi kijtos (Mat. 11:19). Uan keman tajtouaya, amo kinuijuikaltiaya, amo kinijijtouaya nion kinmojmoujtiaya akin kitauelitayaj. w24.11 4, 5 § 9, 10

Maj tiknemilikan ke tiktayokoliaj aksa teisa tein semi kualtsin uan kipaleuis. ¿Keniuj timomachiliskiaj komo tikitaskiaj ke kieua uan amo kikui? Xa semi titayokoyaskiaj, sayoj ke semi tiyolpakiskiaj komo tikitaskiaj ke kikui tein tiktayokolijkej. ¿Toni techmachtia nejin? Jehová kitemakak iKonetsin maj toka momikili. Yejua ika semi yolpaki keman tiktasojkamatij maj Jesús taxtauani para techmakixtis uan porin kinextij ke techtasojta (Juan 3:16; Rom. 5:​7, 8). Xa ijkon kemej panos tiempo, amo semi tiktasojkamatiliskejok Jehová porin Jesús taxtauak para techmakixtis. Komo ijkon tikchiuaskiaj, kemej yeskia tiktalijtoskiaj tein techtayokolij kampa amo tikitaj uan nion no tikelnamikij. Para maj amo techpano nejon moneki maj nochipa tikintasojkamatilikan Jehová uan Jesús tein toka kichiuanij. w25.01 26 § 1, 2

Se tokniuj takat amo uelis yeski tayekankej komo “yekin peuak taneltoka”. Moneki panos tiempo para okachi kuali mouikas iuan Jehová uan momachtis kuali kikuis Biblia para kiixtalis tein kichiuas. Ijkon kemej Jesús moneki maj yolyemanik uan maj amo yolijsiui, ta moneki mochias hasta maj Jehová kimaka okachi tekimej itech nechikol (Mat. 20:23; Filip. 2:​5-8). Uan no, kinextia ke “amo kikaua Dios” keman kitakamati uan keman kichiua tein yejuatsin tanauatia itechkopa inechikol. Biblia kijtoua ke tayekankej “moneki kimatis keniuj tamachtis”. ¿Kijtosneki nejin ke moneki kitemakas tel kuali tanojnotsmej? Amo, porin amo nochin tayekananij ueli kichiuaj nejon, sayoj ke keman tanojnotsaj uan kinyolchikauaj tokniuan nochipa kuali kikuij Biblia para tamachtiskej uan tayolchikauaskej. w24.11 23, 24 § 14, 15

Komo tikonajsi itech Biblia se versículo tein amo tikonajsikamati, xikontemo tamachtilis. Uan satepan itech xiontanemili tein tikonajsik uan tein tionmomachtij de Jehová, de iKonetsin uan keniuj mitsontasojtaj (Sal. 119:97). Amo xionmosenkaua komo keman tionmomachtia Biblia amo tikonajsi teisa tein yankuik oso tein tikonuelitaskia tikonajsis. Keman timomachtiaj Biblia kemej yeskia tiktemoskiaj oro. Akin kitemouaj oro, moneki miak horas uan tonalmej kitemojtoskej para tekit kiajsiskej. Sayoj ke amo yolijsiuij nion mosenkauaj porin maski tepitsin kiajsij semi patiyoj. Tamachtilis tein tikajsij itech Biblia okachi kipia ipatiuj ke oro (Prov. 8:10). Yejua ika, amo xionyolijsiui uan xikonsentoka xikonlero uan xionmomachti Biblia (Sal. 1:2). w25.01 25 § 14, 15

Jehová kineki maj tikintapojpoluikan akin techyolkokouaj (Sal. 86:5; Luc. 17:4). Xa aksa kijtos oso kichiuas teisa tein semi techyolkokos, uan okachiok techyolkokos komo techchiuilia se totasojikniuj oso se tochankauj (Sal. 55:​12-14). Kemansa semi tikualaniskej oso timoyolkokoskej uan tikmachiliskej kemej yeskia techtsoponiskiaj ika se tepos (Prov. 12:18). Uan xa tiknekiskej ijkon tikauaskej oso amo tikijtoskej tein tikmachiliaj. Sayoj ke komo ijkon tikchiuaskiaj kemej yeskia tikauaskiaj maj totech tokto se cuchillo uan amo tikixtiskiaj. Komo amo teyi tikchiuaj para tiyolseuiskej tiksentokaskej fiero timomachiliskej. Keman aksa techyolkokoua xa niman tikualantikisaj. Biblia kijtoua ke kemansa ipa ijkon techpanos. Sayoj ke no technejmachtia ke amo moneki uejkauak tikualantoskej (Sal. 4:4; Efes. 4:26). ¿Keyej? Porin keman tikualanij ueliskia tikchiuaskej tein amo kuali (Sant. 1:20). Xikonelnamiki ke keman aksa techchiuilia teisa xa ipa tikualanij, sayoj ke tejuan tikmatij ox tiksentokaskej tikualantoskej oso amo. w25.02 15 § 4-6

Jesús ika tajtoj se taman para kinextis ke amo tapaleuia komo aksa kisentilia tomin sayoj ke “iixpan Dios amo teyi kipia” (Luc. 12:​16-21). Amo tikmatij toni techpanos satepan (Prov. 23:​4, 5; Sant. 4:​13-15). Uan no, Jesús kijtoj ke nochin akin kitojtokaskiaj amo monekia kinyolkokos kikauaskej nochi tein kipiaj (Luc. 14:33). Uan yejua nejon tein kinpanok tokniuan de Judea keman nemiaj tatitanilmej, yejuan kikaujkej nochi tein kipiayaj (Heb. 10:34). Axkan miakej tokniuan amo kipiajok tekit oso kinkuilianij tein kipiayaj porin amo tavotarouaj (Apoc. 13:​16, 17). Yejuan kinextianij ke takuaujtamatij itech nejin tein Jehová motenkaua: “Amo keman nimitskauas uan nochipa nimitspaleuis” (Heb. 13:5). Yejua ika timochikauaj tiksentiliskej tepitsin tomin para ika timopaleuiskej keman tiyeskij tixiuejkejya uan titakuaujtamatij ke Jehová techpaleuis komo techpanoua teisa tein amo tikchiayaj. w25.03 29 § 13, 14

Jehová techpaleuia maj kuali titaixejekokan, yejua ika kiixtalij maj seki tokniuan techixyekanakan itech nechikol “hasta maj timoskaltikan kemej se akin ueyiya uan titamatikan kemej Cristo itech nochi” (Efes. 4:​11-13). No techpaleuia ika ichikaualis para maj ‘titanemilikan kemej Cristo’ (1 Cor. 2:​14-16). Uan no, kichiuak maj moijkuilo naui Evangelios tein techpaleuiaj maj tikmatikan toni kichiuako Jesús keman yetoya nikan taltikpak. Komo titanemiliaj, titajtouaj uan tikchiuaj kemej yejua, uelis kuali titaixejekoskej. Sayoj ke komo tiknekij kuali titaixejekoskej, amo moneki sayoj tikitaskej “tein yekinika timomachtijkej de Cristo”. w24.04 4, 5 § 11, 12

Mojmostaj moneki titaixpejpenaskej. Seki taman amo ouij tikixtaliskej tikchiuaskej, kemej toni tikuaskej kualkan oso toni hora tikochitiuij. Sayoj ke seki taman okachi ouij porin tein tikixtaliskej uelis semi techpaleuis maj tipaktokan, maj tiyolpakikan tejuan uan tochankauan oso maj ueli tiktekitilikan Dios. Tiknekij tikixpejpenaskej tein techpaleuis tejuan uan tochankauan, sayoj ke okachi tiknekij tikyolpaktiskej Jehová (Rom. 12:​1, 2). Komo achto tikmatij nochi tein moneki, techpaleuis maj kuali titaixpejpenakan. ¿Keyej semi moneki nejin? Maj tiknemilikan ke aksa akin motelkokoua kiitati tapajtijkej. ¿Niman kiixtaliskia tapajtijkej toni pajti kimakas maski ayamo kiita oso ayamo kitajtania toni kimachilia? Amo. No ijkon, tejuatsin kuali tiontaixpejpenas komo achto tikontemoua tikonmatis nochi tein mitsonpaleuis. w25.01 14 § 1-3

Jehová semi teiknelia uan “amo kineki maj nion akin ixpoliui”. ¿Keniuj kiniknelij sekin akin tajtakolchiujkaj? (2 Ped. 3:9). Tekiuaj David semi tajtakolchiuak porin auilnemik uan temiktij, sayoj ke kemej moyolpatak Jehová kiiknelij uan kitapojpoluij (2 Sam. 12:​1-12). Tekiuaj Manasés kichiuak miak taman tein amo kuali. Maski yejua tel amo yolkuali katka, Jehová kiiknelij uan kitapojpoluij porin yekmelauj moyolpatak (2 Crón. 33:​9-16). Nejin techmachtia ke Jehová techiknelia keman kiita ke yekmelauj timoyolpataj. Yejuatsin kichiuas maj David uan Manasés oksepa nemikan porin moyolpatakej maski tel tajtakolchiujkaj. w24.05 4 § 12